Dahme Keieu Kesempwal ong Mouren Peneinei Nsenamwahu?

DAHME PAIPEL MAHSANIH

“Irail kan me kin rong mahsen en Koht oh kapwaiada, iei irail me paisang mehlel!”​—Luk 11:28, Pwuhk Sarawi ni Mahsen en Pohnpei.

DAHME MET KAK WIAHIONG UHK

Diar limpoak mehlel.​—Episos 5:28, 29.

Ahneki wahu mehlel.​—Episos 5:33.

Sohte perki mehkot.​—Mark 10:6-9.

KITAIL KAK UHDAHN KAMEHLELE DAHME PAIPEL MAHSANIH?

Ei, pwehki kahrepe riau pwukat:

• Koht me ketin tapihada koasoandi en peneinei. Paipel mahsanih me “peneinei koaros” kin pwukoahki arail mour mwohn Siohwa Koht. (Episos 3:14, 15) Met wehwehki me Siohwa ketin koasoanehdi koasoandi en peneinei. Dahme kahrehda met kesempwal?

  Medewehla: Ma ke iouki mwenge ehu oh men ese dahme wiahda, ihs me ke men idek reh? Keieu, rehn aramaso me wiahda.

  Duwehte, pwehn esehla dahme anahn ong mouren peneinei nsenamwahu, kitail en sohpeiong Siohwa, ih me ketin wiahda koasoandi en peneinei.​—Senesis 2:18-24.

• Koht kin ketin nsenohkin uhk. E mwahu peneinei kan en rapahki sapwellimen Siohwa kaweid, me e ketikihda nan sapwellime Mahsen. Dahme kahrehda? “Pwehki eh kin ketin apwahpwalih kumwail.” (1 Piter 5:6, 7) Siohwa kin ketin mwahngih dahme keieu mwahu ong uhk oh ahnsou koaros sapwellime kaweid kin pweida!​—Lepin Padahk 3:5, 6; Aiseia 48:17, 18.