Sosaia Ahneki Kompoakepah Mwahu kan

Ke leme e apwal en wia dahme pwung?— Pali laud en aramas kin medewe me e apwal. Paipel mahsanih me e uhdahn apwal ong emen pwutak me adaneki Sosaia en wia dahme pwung. Ahpw mie kompoakepah mwahu kan me sewese ih. Nna, kitail pahn sukuhlki duwen Sosaia oh kompoakepah kan.

Ahn Sosaia pahpa iei Amon, nanmwarki en Suda. Amon uhdahn sakanakan oh e kin kaudokiong dikedik kan. Ni ahnsou me ahn Sosaia pahpa mehla, Sosaia wiahla nanmwarki en Suda. Ahpw e sounparte waluh! Ke leme me e sakanakan duwehte eh pahpao?— Soh!

Mendahki e uhdahn pwulopwul, Sosaia men peikiong Siohwa. Eri e pilada en kompoakepahnkihte aramas akan me kin poakohng Siohwa. Oh re sewese Sosaia en wia dahme pwung. Ihs ekei kompoakepahn Sosaia kan?

Emen kompoakepah iei Sepanaia. Sepanaia emen soukohp. E padahkihong aramas en Suda soahng suwed kan me pahn wiawihong irail ma re kaudokiong dikedik kan. Sosaia rong Sepanaia oh kaudokiong Siohwa, kaidehn dikedik kan.

Pil emen kompoakepahn Sosaia iei Seremaia. Ira kereniong sounpar ehute oh wasa me ira tikida ie kerenpene. Ira uhdahn kompoakepah keren. Kahrehda ni ahnsou me Sosaia mehlao, Seremaia ntingihdi ehu koul me kasalehda ia uwen eh loaleidki Sosaia. Seremaia oh Sosaia kin sawaspene wia dahme pwung oh peikiong Siohwa.

Dahme ke kak sukuhlki sang mehn kahlemeng mwahu en Sosaia?— Mendahki Sosaia wia kisin pwutak, e men wia dahme pwung. E ese me e anahne kompoakepahnki aramas me poakohng Siohwa. Eri ken pilada kompoakepahmw kan me poakohng Siohwa oh me kak sewese iuk en wia dahme pwung!