Sosaia Poakohng Sapwellimen Koht Kosonnedo

Sosaia wiahla nanmwarki en Suda ni ahnsou me e sounpar waluh. Nan ahnsou pwuko, aramas akan kin wia wunahni oh kaudokiong dikedik kan. Ni ahnsou me Sosaia sounpar 16, e song en sukuhlki mwomwen kaudokiong Siohwa ni ahl pwung. Ni ahnsou me e sounpar 20, e tepida kauwehla dikedik kan oh pei sarawi kan nan sahpwo pwon. Oh ni ahnsou me e sounpar 26, e koasoanehdi pwe tehnpas en Siohwa en pwurehng kamwahula.

Nan tehnpaso, samworo lapalap Ilkaia, diarada sapwellimen Siohwa kosonnedo nan doaropwe ehu, ele mwein doaropwe me Moses ntingihada. Sapan nein nanmwarkio sekterio wahdo doaropwe ko rehn Sosaia oh wadekohng ih Kosonnedo. Ni Sosaia eh wie rongorong, e tehkada me erein sounpar tohto aramas ako kin sapeikiong Siohwa. Nanmwarki Sosaia ahpw ndaiong Ilkaia: ‘Siohwa uhdahn ketin lingeringer pahtail. Kohla oh esehda dahme E kupwurki kitail en wia.’ Siohwa ketin sapengala ni eh doadoahngki soukohp lih men me adaneki Ulda en mahsanihong irail: ‘Aramas en Suda kan keseielahr. Irail pahn ale kalokeparail ahpw kaidehn erein Sosaia eh wiewia nanmwarki, pwehki eh aktikitiklahr.’

Ni ahnsou me Nanmwarki Sosaia rongada rohng wet, e kohla ni tehnpaso oh ekerpene aramas en Suda kan. Ih eri wadekohng wehio pwon sapwellimen Siohwa Kosonnedo. Sosaia oh aramas ako ahpw inoukihda me re pahn peikiong Siohwa sang nan mohngiongirail unsek.

Wehin Suda saikinte kasarawih Pahsohpao erein sounpar tohto. Ahpw ni ahnsou me Sosaia wadekada Kosonnedo me re anahne kasarawih Pahsohpao sounpar koaros, e ndaiong wehio: ‘Kitail pahn wia sarawien Pahsohpa ong Siohwa.’ Sosaia eri kaunopada pwehn wiahda meirong tohto oh koasoanehdi sounkoul kan ni tehnpaso. Wehio eri wia sarawien Pahsohpao, oh mwuri, Sarawien Pilawa Sohte Doal Ihs, me wiawihki rahn isuh. Saikinte Pahsohpa ehu me duwehte met sangete ni mwehin Samuel. Sosaia uhdahn poakohng sapwellimen Koht Kosonnedo. Ke kin perenki sukuhlki duwen Siohwa?