Kaimwisekelahn Ahn Mehn Israel Nanmwahrki Mwahu

SOSAIA sounpahr waluhte ni ansou me e wiahla nanmwahrki en kainok riau palieir en Israel. Met inenen pwulopwul ong emen en wiahla nanmwahrki. Ihme ni tapio ekei ohl mah kan kin sewese ih kaunda wehio.

Ni ansou me Sosaia wia kakaun sounpahr isuh e tapiadahr rapahki Siohwa. E kin idawehn mehn kalemeng en nanmwahrki mwahu kan duwehte Depit, Sehosapad oh Esekaia. Ni ansou me e pwulopwul, Sosaia wia mehkot ni aima.

Ansou reirei mehn Israel kan kin wia me suwed. Irail kin kaudokiong koht likamw akan. Irail dairukedi mwohn dikadik kan. Ihme Sosaia kahre aramas kei oh tapiada kihsang kaudok likamw nan sahpwo. Met inenen doadoahk laud ehu pwehki aramas tohto kaudokiong koht likamw kan. Ke kak kilang Sosaia oh ohl kei kawehla dikadik kan.

Mwuhri, Sosaia eri kasapwilada ohl silimen pwen onehda ihmwen kaudok en Siohwa. Mwohni kan pil rikirikpene sang rehn aramas kan pwen pwainki doadoahk me ohl pwukat wia. Ni ansou me re wiewia ihmwen kaudoko, samworo lapalap Ilkaia diarada mehkot inenen kesempwal wasao. Iei pwuhk en kosonnedo me Siohwa kehkehlikiong Moses en intingihdi mahso. Pwuhk wet salongala sounpahr ngeder.

Pwuhko wisiklahngehr Sosaia, oh e peki me emen en wadek ong ih. Ni ah rongerong, Sosaia kak kilang me aramas akan sohte kin kapwaiada kosonned en Siohwa. E pahtoukihla met kowahlap, ih eri tehrpesang ah likou, duen me ke kilang wasaht. E indahda: ‘Siohwa engieng ong kitail, pwehki samatail ko sohte kapwaiada kosonned kan me intingdiehr nan pwuhk wet.’

Sosaia kehkehlikiong samworo lapalap Ilkaia en kalelepak dahme Siohwa pahn ketin wiaiong irail. Ilkaia eri kohla rehn lih men me adaneki Uldah, emen lih soukohp, oh idek reh. Liho kasalehda rohng wet sang rehn Siohwa pwe ren kohla kairehki Sosaia: ‘Serusalem oh towe kan koaros pahn kalokolok pwehki re kaudokiong koht likamw akan oh sahpwo direkihlahr wiewia suwed. Ahpw pwehki kowe, Sosaia, wiahdahr me mwahu, kalokolok wet sohte pahn kohdo lao mwehrin ahmw pahn mehla.’