IRELAUD 9
Kaudokiong Siohwa nin Duwen Peneinei Ehu
‘Poaridi mwohn silangi oh pwongih me ketin kapikada nanleng oh sampah.’—Kaudiahl 14:7
Nin duwen omw sukuhlkiher nan kisin pwuhk wet, Paipel kin audaudki kaweid tohto me pahn sewese kowe oh omw peneinei. Siohwa ketin kupwurki ken kin peren. E ketin inoukihda ma ke kin kaudokiong ih mahs, ‘soahng teikan koaros e ahpw pahn ketikihong uhk.’ (Madiu 6:33) E uhdahn ketin kupwurki ken wia kompoakepah. Doadoahngki ahnsou mwahu koaros en kakairada omw nanpwungmwahu rehn Koht. Met iei pwais me keieu kaselel me aramas men kak ahneki.—Madiu 22:37, 38.
1 KAKEHLAKA OMW NANPWUNGMWAHU REHN SIOHWA
DAHME PAIPEL MAHSANIH: “I pahn wiahla Samamwail, oh kumwail pahn wiahla nei seri; Kaun-o, Wasa Lapalahpie, me mahmahsen.” (2 Korint 6:18) Koht ketin kupwurki ken wiahla kompoakepah keren. Kapakap iei ehu ahl en wia met. Siohwa kin ketin luke iuk ken “poadidiong kapakap.” (1 Deselonika 5:17) E kin ketin kupwurki karonge omw madamadau loal kan oh dahme ke kin nsenohki. (Pilipai 4:6) Ni ahnsou me ke kin kapakap rehn omw peneinei, re pahn kilang ia uwen omw kin kamehlele Koht.
Ni omw kin patohong Koht, ke anahne en pil kin rong ih. Ke kak wia met ni omw pahn onopki sapwellime Mahsen oh sawaspen Paipel kan. (Melkahka 1:1, 2) Doudouloale dahme ke sukuhlki. (Melkahka 77:11, 12) Omw kin rong Koht pil kin wehwehki me ke anahne ahnsou koaros towehda mihting en Kristian kan.—Melkahka 122:1-4.
Koasoiaiong meteikan duwen Siohwa iei ehu ahl kesempwal en kakehlaka omw nanpwungmwahu reh. Ma ke kin kalapw wia met, ke pahn pehm me ke karanihala ih.—Madiu 28:19, 20.
DAHME KE KAK WIA:
Koasoanehdi ahnsou mwahu ehu ken kin wadek Paipel oh kapakap rahn koaros
Nin duwen peneinei ehu, kihong ahnsoun kalohk oh mihting en wia mehkot me kin keieu kesempwalsang mehn kamweit kan oh ahnsoun kommoal
2 PERENKI AMWAIL KAUDOK EN PENEINEI
DAHME PAIPEL MAHSANIH: “Kumwail keido mpen Koht, oh e pahn ketin keiong mpamwail.” (Seims 4:8) Ke anahne koasoanehdi oh idawehn rahn me koasoandi en amwail kaudok en peneinei. (Senesis 18:19) Ahpw e anahne laudsang met. Ke anahne kihong Koht en iang mi nan omw mouren ehuehu rahn. Kakehlaka en omw peneinei nanpwungmwahu rehn Koht sang ni omw pahn koasoia duwen ih “ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” (Deuderonomi 6:6, 7) Wiahda omw mehn akadei en duwehte Sosua, ni eh nda: “A ngehi oh ei peneinei, se pahn papah KAUN-O.”—Sosua 24:15.
DAHME KE KAK WIA:
Koasoanehdi koasoandi en kasukuhl ehu me pahn kaukaule wiawi oh kaitarala anahn en emenemen nan omw peneinei