Kisinlikou Sang Pwihn me Kin Apwalih Mwomwohdiso nan Sampah Pwon
Ong iangat Kristian akan:
Nin duwen omw esehier, Paipel wia pwuhk ehu me audaudki koasoipen aramas tohto. Me tohto irail iei ohl oh lih lelepek kei me kin lelohng kahpwal kan me duwehte atail. Re ahneki pepehm kan me duwehte atail. (Seims 5:17) Ekei kin toutoukihla kahpwal kan oh pwunod kan. Ekei kin uhdahn medengkihla dahme tohnpeneinei de iangarail tohnkaudok teikan wiahiong irail. Oh tohto irail kin nsensuwedkihla kanamenek en sapwung kan me re wiahdahr.
Ia duwe, irail pwukat kesehlahr douluhl Siohwa? Soh. Me tohto irail duwehte sounmelkahkao me kapakapki: “I kin sansalongseli duwehte sihpw men me salongalahr; eri, komwi ketido rapahkin ie, sapwellimomwi ladu, pwehki ei sohte kin sohpeisang sapwellimomwi kosonned kan.” (Melkahka 119:176) Ke kin iang ahneki soangen pepehm pwukat?
Siohwa sohte kin ketin manokehla sapwellime tohnkaudok kan me salongasang sapwellime pwihn. Weksang met, e kin ketin kupwurki karanih irail oh kin ketin kalapw doadoahngki iengerail Kristian akan en wia met. Karasepe, tehk ia duwen Siohwa eh ketin sewese sapwellime ladu Sohp, me lelohng soangsoangen kahpwal laud kan, me duwehte kahpwal en mwohni, mehlahn irail kan me e poakohng, oh soumwahu laud. Sohp pil anahne dadaur pahn soangen lokaia kamedek kan sang rehn irail kan me anahne sewese ih. Ahpw e sohte douluhl sohpeisang Siohwa, mendahki ahnsou kis e ahnekihda madamadau sapwung. (Sohp 1:22; 2:10) Ia duwen Siohwa eh ketin sewese Sohp en ahneki madamadau toupahrek?
Ehu ahl me Siohwa ketin sewesehda Sohp sang ni eh ketin doadoahngki ienge tohnkaudok me adaneki Elihu. Ni Sohp eh kasalehda eh iren kapwunod kan, Elihu kin karonge oh mwekidki en sapeng. Dahme e pahn nda? Ia duwe, e pahn kauwe Sohp de song en kamwakid ih sang ni eh doadoahngki pepehm en suwedki eh sapwung de kanamenekihala? Ia duwe, Elihu kin leme me e mwahusang Sohp? Soh douluhl! Elihu mwekidki sapwellimen Koht manaman oh nda: “Kita duwepenehte mwohn silangin Koht, kita koaros wiawihda sang pwehl.” Ih eri ahpw kameleileidi Sohp oh nda: “Eri, sohte kahrepen omwi pahn masak ie; I sohte pahn poweikomwihdi.” (Sohp 33:6, 7) Elihu sohte kalaudehla en Sohp eh pwunod kan, ahpw ni kadek e kihda kaweid oh kangoang me Sohp anahne.
Menlau wehwehki me ni soangen mwohmwohte, ih kahrepen at kaunopada kisin pwuhk wet. Keieu se rong oh kasawih mwahu irair kan oh koasoipen me tohto me salongala. (Lepin Padahk 18:13) Mwuri se tehk Paipel ni at kapakapki sawas oh kasawih ia duwen Siohwa eh kin ketin sewesehda sapwellime ladu kan mahso ni ahnsou me re kin lelohng nan soangen irairkohte. Eri, se kapatapene koasoipen aramas pwukat nan Paipel oh koasoipen riatail kan rahnpwukat oh wiahda kisin pwuhk wet. Ni kadek se luke komwi en tehk kanahieng ire kan loale. Menlau ese me se poakohng kumwail ni mehlel.
Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan