IREN MEHN KASUKUHL 56
Kolokol Minimin nan Mwomwohdiso
Ni atail kin mi nanpwungen iangatail Kristian kan, kitail kin ahneki soangen pepehmohte me Nanmwarki Depit ahneki: “Ia uwen lingan, ia uwen kansenamwahu en sapwellimen Koht aramas akan ar kin miniminpene!” (Melkahka 133:1) Atail minimin sohte uhdahte miehla. Emenemen kitail kin anahne kolokol minimin wet.
1. Dahme kapwuriamwei nanpwungen sapwellimen Koht aramas akan?
Ma ke iang towehda mihting en mwomwohdiso nan ehu sahpw tohrohr, mwein ke sohte pahn kak wehwehki lokaiao, ahpw ke pahn kak soanamwahu. Dahme kahrehda? Pwehki kitail kin onopki Paipel ni atail doadoahngki sawaspen Paipel kan me kin kadoadoahk wasa koaros. Oh kitail kin nantihong limpoakpene. Sohte lipilipil wasa kitail kin mi ie, kitail koaros kin “likweriong mwaren Siohwa, pwe [kitail] en miniminpene papah ih.”—Sepanaia 3:9, NW.
2. Dahme ke kak wia pwehn wiahda minimin?
“Kumwail en uhdahn poakpene mehlel sang nan mohngiong.” (1 Piter 1:22) Ia duwen omw kak doadoahngki kaweid wet? Dehr kilikilangete en meteikan soh unsek ahpw rapahki soahng mwahu kan rehrail. Dehr patehngete irail kan me kin perenki dahme ke kin perenki, ahpw pil song esehla riatail Kristian teikan. Kitail pil kak nantihong kihsang pepehm en lipilipilki aramas rehtail ma mie.—Wadek 1 Piter 2:17.a
3. Dahme ke pahn wia ma mie nanpwung suwed nanpwungen kowe oh iengomw Kristian men?
Kitail kin miniminpene ahpw kitail pil sohte unsek. Ekei pak kitail kin kansensuwedih de kamedekihala emenemen. Eri Mahsen en Koht kin kangoangei kitail en “pousehlahte . . . mahkpene,” oh e pil mahsanih: “Nin duwen Siohwa eh kin ketin mahkohng kumwail, kumwail pil anahne wia duwehte.” (Wadek Kolose 3:13.) Kitail kin kamedekihala Siohwa pak tohto ahpw e kin ketin mahkohng kitail. Eri e ketin kupwurki kitail en mahkohng riatail Kristian kan. Ma ke esehda me ke kamedekihala emen, tiengla mwowe pwe ken kamwahwihala nanpwungamwa.—Wadek Madiu 5:23, 24.b
KALAUDEHLA OMW ESE MET
Medewe dahme ke kak wia pwehn wiahda minimin oh popohl nan mwomwohdiso.
Dahme ke pahn wia pwehn wiahda popohl?
4. Kesehla madamadau en lipilipilki aramas
Kitail men poakohng riatail Kristian kan koaros. Ahpw ele kitail kin apwalki ehuiong emen me weksang kitail. Dahme kak sawas? Wadek Wiewia 10:34, 35, oh mwuri koasoiapene peidek pwukat:
Siohwa ketin kupwurperenki soangsoangen aramas akan me wia sapwellime Sounkadehde. Ia duwen omw kak kahlemengih ih ni omw kin medewe irail kan me weksang uhk?
Nan omw wasa, soangen aramas dah me meteikan kin kalapw lipilipilki? Dahme kahrehda ke men soikala madamadau wet?
Wadek 2 Korint 6:11-13, oh mwuri koasoiapene peidek wet:
Ia duwen omw kak karanihala riomw Kristian kan me weksang uhk?
5. Mahkpene douluhl oh wiahda popohl
Siohwa kin uhdahn ketin mahkohng kitail mendahki e sohte anahne kitail en mahkohng ih. Wadek Melkahka 86:5, oh mwuri koasoiapene peidek pwukat:
Ia uwen laud en sapwellimen Siohwa mahk?
Dahme kahrehda ke kalahnganki sapwellime mahk?
Soangen ahnsou dah kan me kitail kakete apwalki ehuiong meteikan?
Ia duwen atail kak kahlemengih Siohwa oh pousehlahte miniminiong riatail Kristian kan? Wadek Lepin Padahk 19:11, oh mwuri koasoiapene peidek wet:
Ma emen kansensuwedih de kalingeringerihiuk, dahme ke kak wia pwehn kamwahwihala nanpwungamwa?
Ekei pak kitail kin kalingeringerihada meteikan. Ma met wiawi, dahme kitail anahne wia? Kilang KISIN KASDO, oh mwuri koasoiapene peidek wet.
Dahme sistero wia pwehn wiahda popohl?
6. Kilang soahng mwahu kan rehn riomw Kristian kan
Ni atail kin karanihala riatail Kristian akan, kitail kin esehla soahng mwahu kan rehrail oh ar luwet akan. Ia duwen atail kak kilangwohngete soahng mwahu kan rehrail? Kilang KISIN KASDO, oh mwuri koasoiapene peidek wet.
Dahme kak seweseiuk en kin kilangwohngete soahng mwahu kan rehn riomw Kristian kan?
Siohwa kin ketin kilangwohngete soahng mwahu kan rehtail. Wadek 2 Kronikel 16:9a, oh mwuri koasoiapene peidek wet:
Ia omw pepehm ni omw ese me Siohwa kin ketin kilangwohngete soahng mwahu kan rehmw?
Mendahte mie kisin ohla ni daimon kaselel ehu, ahpw e pil kesempwalte. Duwehte met, riatail Kristian kan koaros sohte unsek, ahpw re kesempwal ong Siohwa
EKEI ARAMAS KIN NDA: “Mwohn ei pahn mahkohng ih, e anahne peki mahk rehi mahs.”
Dahme kahrehda kitail anahne mahkohng douluhl meteikan?
DAHME KE SUKUHLKIER
Ke kak kolokol minimin nan mwomwohdiso ni omw kin mahkohng oh poakohng riomw Kristian kan koaros.
Kousapahl
Ia duwen omw kak kesehla madamadau en lipilipilki aramas?
Dahme ke pahn wia ma mie nanpwung suwed nanpwungen kowe oh iengomw Kristian men?
Ke men kahlemengih duwen Siohwa eh kin ketin mahkohng meteikan? Dahme kahrehda?
PIL TEHK
Sukuhlki ia duwen ehu sapwellimen Sises karasaras ko eh kak sewese kitail en dehr kadeik meteikan.
Kitail anahne peki mahk ma kitail medewe me kitail sohte wiahda mehkot sapwung?
“Apologizing—A Key to Making Peace” (The Watchtower, November 1, 2002)
Kilang ia duwen ekei ar sukuhlki ren dehr kin lipilipilki aramas.
Medewe ia duwen omw kak kapwungala nanpwung suwed me ke ahneki rehn emen mwohn met eh kauwehla popohl en mwomwohdiso.
“Kapwungala Kahpwal kan Nanpwungamwail ni Elen Limpoak” (Kahn Iroir, May 2016)