Soundoulik Kan​—Kisakis Kan Rehn Ohl Akan

“Ni eh ketidalahng wasa ile kan, e ketiki kohda me selidi ngedehrie, oh ahpw ketin kamwerehdiong pohn aramas akan sapwelime kisakis kan.”​—EPISOS 4:8.

1. Doadaohk kapw dahieu pakairda nan makasihn wet nan 1894?

POHNANGIN sounpar epwiki samwalahro, Watch Tower pakairki mehkot kapw. Met pwarada me iei “Ehu Rahn Doadoahk.” Dahme doadoahk kapw wet kin pidada? Met iei tepiada kapw en ahnsouwet doadoahk en irail soundoulik kan. Septempe 1, 1894, en makasihn wet kawehwehda me sang met kohla brother kan me warohng pahn pwarek pwihn en Tohnsukuhl kan en Paipel ‘ong karepeo en kakehle irailda nan padahk mehlel.’

2. Ia pwukoahn sounapwalih en circuit oh district?

² Nan tepin pahr kan en Kristian C.E., sounapwalih kan me duwehte Pohl oh Parnapas kin pwarek mwomwohdisohn Kristian kan. Ohl lelepek pwukat kin akedeiong ‘kakehleda’ mwomwohdiso kan. (2 Korint 10:8) Rahnwet, kitail kin paikihda soangen ohl kid pwukat me wiewia doadoahk wet. Governing Body en Sounkadehde kan en Siohwa kin idiada irail nin duwen sounapwalih en circuit oh district. Sounapwalih en circuit men kin apwalih impen mwomwohdiso 20 ehu ehu wihk impen sounpar riau, ni ah kin tetehk rekord kan en mwomwohdiso, oh kihda padahk kan, oh iang sounkalohken Wehio wasao kalohk. Sounapwalih en district kin wia chairman en ehu ehu kapokon en circuit ehu ehu sounpar ong ekei circuit, oh e kin iang mwomwohdiso me e pwarek kalohk, oh kihda kangoang nan ah padahk kan me kin pwilsang nan Paipel.

Arail Ngehnin Tohnmetei

3. Dahme karehda soundoulik kan anahne ahneki ngehnin tohnmetei?

³ Soundoulik kan kin ahnsou koaros seiseilokseli. Met kin kasalehda duwen arail anahne ahneki irair en tohnmetei. Seilok sang ehu mwomwohdiso kohlahng ehu mwomwohdiso kin pak tohto apwal, ahpw ohl pwukat oh arail pwoud kan kin wia met ni peren. Emen sounapwalih en circuit kosoia: “Ahi pwoud uhdahn kin utung ie oh sohte kin kaulim . . . E warohng ale kaping pwehki ah ngehnin tohnmetei.” Ekei sounapwalih en circuit kin seiloki mwail 600 nanpwungen mwomwohdiso kan. Me tohto kin dake weren nansapw, ahpw meteikan kin kohsang ekis wasa kohlahng ekis wasa ni arail kin iang mehn peidaid en weipokon, sang ni arail kin dake paiskel, iang oahs, de alu. Emen sounapwalih en circuit me kohsang wehin Aprika anahne urak nan pillap ni ah wahda ah pwoudo pohn pwopwe pwehn kak lellahng ehu mwomwohdiso. Nan ah seilok en misineri, wahnpoaron Pohl kin anahne powehdi karakar oh kopou, dupek oh mehn nimpil, pehden pwong, soangen kahpwal teikan, oh kalokolok suwed kan. E kin pil ahneki “pwunod en apwalih mwomwohdiso”​—mehkot me kin kalap lelohng soundoulik kan rahnwet.​—2 Korint 11:23-29.

4. Iaduwen soumwahu kin kamwekidih mouren soundoulik kan oh arail pwoud kan?

⁴ Duwehte iengen Pohlo Timoty, soundoulik kan oh arail pwoud kan kin pil ahneki soumwahu kan. (1 Timoty 5:23) Met kin kihong irail pwunod laud. En emen sounapwalih en circuit ah pwoud kawehwe: “I kin apwalki mih rehn rie Kristian kan ma I soumwahu. Ni ahnsou me I tepiada sohla wia ahi pwong me kin pil iangahkihdo soumwahu me pidada met, I diarada me seilokseli me inenin apwal. Kihpene ahi kepwe kan wihk koaros oh keseulahng ekis wasa me inenin apwal. Pak tohto, I kin anahne uhdi oh kapakap ong Siohwa en kihong ie kehl en kak kohkohwete mwowe.”

5. Mendahki soangen kahpwal kan, ngehn dahieu soundoulik kan oh arail pwoud kan kin kasalehda?

⁵ Mendahki arail soumwahu oh apwal teikan, soundoulik kan oh arail pwoud kan kin diar peren nan arail doadoahk oh kin kasalehda limpoak soh roporop. Ekei kin pein kihong arail mour nan keper pwehn kihda sawas en pali ngehn ni ahnsoun kalokolok kan oh ahnsoun mahwin. Ni arail kin pwarek mwomwohdiso kan, re kin kasalehda soangen ngehnohte me Pohl ahneki, me padahkiong Kristian kan en Deselonika: “Se kin kadek ni at mi rehmwail, duwehte nohno men ni eh kin apwahpwalih nah seri kan. Pwehki at poakohng kumwail, se onopdahr se en kihong kumwail, kaidehn Rongamwahuwohte me sang rehn Koht, ahpw pil pein at mour.Pwe kumwail wialahr kompoakepaht mehlel.”​—1 Deselonika 2:7, 8.

6, 7. Mehn kangoang mwahu dahieu soundoulik pwerisek kan kin kihda?

⁶ Duwehte elder teikan nan mwomwohdisohn Kristian, sounapwalih kan kin “doadoahk laud ni arail kin padahk oh katohnpadahk.” Soangen elder pwukat koaros anahne “wahu.” (1 Timoty 5:17) Arail mehn kalimeng kak mie katepe ma, mwurin atail ‘kin medemedewe duwen ar mour, kin kalimengih irail.’​—Ipru 13:7.

⁷ Ia duwen soundoulik kan kin kamwekidada meteikan? Emen Sounkadehde en Siohwa intingihdi: “Ia wen Brother P—— kin wia mehn kalimeng mwahu ong ahi mour! E wia emen soundoulik nan Mexico sang nan pahr 1960 kohdo. Ni ahnsou me I seri, I kin kasikasik ih oh perenki ah kin pwarek. Ni ahnsou me I mahki sounpar eisek, e padahkiong ie, ‘Ke pahn pil wiahla emen soundoulik.’ Erein ahnsou me I pwulopwul (teenage), I kin kalap kosoi ong ih pwehki e kin ahnsou koaros kihda kaweid loaloakong. E mourki en apwalih pwihn en Koht! Ahnsou wet ni ahi wiahlar emen sounapwalih en circuit, I kin ahnsou koaros nantiong kihong me pwulopwul kan ahnsou oh pil mehn akedei ngehnin kan duwehte me e kin wiahiong ie. Pil ni kaimwseklahn ah mour, mendahki soumwahu en mongiong, Brother P—— kin ahnsou koaros nantiong en wia lokaiahn kangoang. Rahn ehute mwohn ah mehla nan February 1995, e iang ie kohlahng ehu kapokon tohror oh kangoangehki brother men kin wia pilahn en ihmw en wiahda ah mehn akedei. Mwadangete mwurin met brothero kapidelong nah kisinlikoun pekipek en doadoahk nan Bethel.”

Meteikan Kin Kalahngankin Irail

8. Ihs me “kisakis rehn ohl akan” me kileledi nan Epsos irelaud 4, oh iaduwen arail kin wia kapai ong mwomwohdiso?

⁸ Soundoulik kan oh elder teikan me kin paikihda pwukoah doadoahk kan sang ni kalahngan en Koht kin adaneki “kisakis rehn ohl akan.” Nin duwen wiliepen Siohwa oh Tapwin mwomwohdiso, Sises kin ketikihda ohl ngehnin pwukat pwe emen emen kitail en kehlailla oh mahla. (Epsos 4:8-15) Kisakis kan warohng kaping. Met me keiou mehlel ma kisakiso kin kakehle kitail pwe sen kaukaule papah atail Siohwa. Eri, iaduwen atail kak kasalehda atail kalahnganki doadoahk en soundoulik kan? Ni ahl dah kan kitail kak kasalehda me se kin ‘wauneki ohl pwukat’?​—Pilipai 2:29.

9. Ni ahl dah kitail kak kasalehda atail kalahnganki soundoulik kan?

⁹ Ni ahnsou me mwemweit en soundoulik kin pakairda, kitail kak tepiada wia pilahn en iang wiewiahn mwomwohdiso erein wihko. Ele kitail kak koasoanehdi ahnsou en utung koasoandi en kalohk erein ahnsou me e mwemweit. Kitail kak auxiliary pioneer erein sounpwongo. Ni mehlel kitail pahn men kapwaiada kaweid kan me soundouliko kin kihda pwehn kak kamwahuwihla atail doadoahk en kalohk. Atail ngehnin men kasamwo ih pahn wia mehkot katapan ong kitail oh pahn kasalehong ih me ah mwemweit mie katepe. Ehi, soundoulik kan kin pwarek mwomwohdiso pwehn kakehle kitail, ahpw pein irail pil anahne en kelailda ni pali ngehn. Mie ahnsou kan me Pohl kin anahne kangoang, oh e kin kalap pekih ienge Kristian kan en kapakapkin ih. (Wiewia 28:15; Rom 15:30-32; 2 Korint 1:11; Kolose 4:2, 3; 1 Deselonika 5:25) Soundoulik kan rahnwet kin pil anahne atail kapakap oh mehn kangoang.

10. Iaduwen atail kak sewese wia pwe doadoahk en soundoulik men en kaperen?

¹⁰ Kitail kin indaiong sounapwalih en circuito oh ah pwoud ia uwen atail kalahnganki ar mwemweit? Kitail kin menlauki mehn kaweid katapan kan me e kihda? Kitail kin kehsehkin ih kekeiradahn atail perenki kalohk pwehki kaweid kan me e kin kihda me pid kalohk? Ma kitail kin wia met, met pahn sewese karehda ah doadoahk en kaperen. (Ipru 13:17) Emen sounapwalih en circuit nan Spain kin keiou kosoia duwen ia uwen ih oh ah pwoud kin kesemwpwalki kisinlikoun kalahngan kan me re alehdi sang mwomwohdiso kan me re kin pwarek. E kosoia: “Se kin kolokol kisinlikou pwukat oh ahnsou me se kin pahtou a se kin wadek. Re kin wia mehn kakehl ong kiht.”

11. Dahme karehda kitail en kehsehki en sounapwalih en circuit oh district arail pwoud kan me kitail kin poakohng irail oh kalahngankin irail?

¹¹ En soundouliko pwoud kin keiou paikihda lokaiahn kangoang kan. E kin wia tohnmetei laud ni ah kin sewese ah pwoudo nan doadoahk wet. Soangen sister lelepek pwukat kin tohnmeteikihla arail men imwaneki pein imwerail oh, nan irair tohto, naineki seri. Nein Sepda serepeino iei emen laduhn Siohwa me sang ni pein insene tohnmeteikihla ah ahnsou mwahu en pwopwoud oh naineki seri pwehki inou ehu me ah pahpao wiahda. (Sounkopwung 11:30-39) Iaduwen meteikan kin kilangwohng ah ngehnin tohnmetei? Sounkopwung 11:40 kosoia: “Sounpar koaros serepein kan en Israel kin kohla pwehn kihong nein Sepda men Kilead nah serepeino lokaiahn kaping, rahn pahiou nan sounparko.” (New World Translation) Ia uwen ah pahn mwahu ma kitail kin nantiong padahkiong en sounapwalih en circuit oh district arail pwoud kan me se poakohng irail oh kalahngankin irail!

“Dehpa Manokehla Ngehnin Kasamwo”

12, 13. (a) Menia iren Pwuhk Sarawi me kasalehda me kitail en kasamwo soundoulik kan oh arail pwoud kan? (b) Karasahda iaduwen soangen irair en kasamwo aramas wet kin kak katapan.

¹² Kasamwo meteikan iei ehu elen kasalehda limpoak oh kalahnganki irail ko nan doadoahk en doulik en Kristian. (Ipru 13:2) Wahnpoaron Sohn kapinga Kaius pwehki ah kin kasamwo irail ko me kin pwarek mwomwohdiso nin duwen misineri kan me kin doulikseli. Sohn intingihdi: “Kompoakpahi, me mwahu omw loalopwoatohng doadoahk mwahu me ke kin wiahiong riata souleng kan, mehnda ma irail mehn keiru kei. Re kin koasoiaiong tohn mwomwohdiso wet duwen omw limpoak. Eri, I peki rehmw, ke en pil sewese irail pwe re en kak wonoweite nan arail seilok, ni soahng kan me Koht pahn kupwurperenki. Pwe ni arail tapihada seiloangki doadoahk en Krais, re sohte men ale sawas sang irail me seupwoson kan. Eri, kitail souleng kan en sewese aramas pwukat, pwe kitail en wiahki ehu ni arail doadoahk en me mehlelo.” (3 Sohn 5-8) Rahnwet, kitail kak kalaudehla doadoahk en kalohki Wehio ni atail pil kasalehda soangen ngehnin kasamwo ohte ong soundoulik kan oh arail pwoud kan. Ni mehlel, elder en wasao anahne tehk kanaiohng pwe wasahn pweidi en soundouliko oh eh pwoudo me mwahu, ahpw emen souapwalih en district kosoia: “Ni at kin werekiong riat kan se sohte kak kohpada ihs me pahn wiahiong kiht mehkot. Se sohte men kasalehong riat kan met. Se anahne pwungki kasamw en riat kan, mehnda ma re kepwehpwe de semwehmwe.”

¹³ Kasamwo meteikan kin wahdo kapai. Jorge, me mahs kin wia doadoahk en sounapwali en circuit ahpw ahnsouwet kin wiewia doadoahk nan Bethel kosoia: “Nan ahi peneinei, se kin wiahki tiahk ehu en lukehdo soundoulik kan en mihmih reht. I lemeleme me mwemweit pwukat kin inenin sewese ie laud sang me I kin medemedewe ahnsouwo. Ni ahnsou me I pwulopwul, I luwet ni pali ngehn. Ahi nohno kin pwunodki met ahpw e sehse iaduwen e pahn sewese ie oh ih eri pekih rehn sounapwalih en circuit en kosoi ong ie. Nin tepio I kin nantiong ruksang, pwehki I masak pwe e de lipwoare ie. Ahpw pwehki ah kadek I wekidala ahi lamalam. E luke ie en iang ih mwenge ehu Ni Ehd, oh I wehkong ih audepen mongiongih pwehki I kamehlele me e wehwehkin ie. E kin rongorong kanaiong. Ah kaweid katapan kan uhdahn doadoahk, oh ngehi eri kekeirada ni pali ngehn.”

14. Dahme karehda kitail en kasalehda atail kalahnganki elder kan me kin doulikseli oh ieremen kauwe irail?

¹⁴ Soundoulik men kin nantiong kihda sawas en pali ngehn ong me pwulopwul kan oh me mah kan. Eri, ni mehlel, sen kasalehda atail kalahnganki soang kan me e kin wia. Ahpw iaduwen ma kitail kin kauwe ih pwehki ehu ah irair luwet de kitail kin kaparekih ah doadoahk me e sohte mwahu duwehte meteikan me kin pwarek mwomwohdiso? Ni mehlel, met pahn kansensuwed. E sohte kin wia mehn kangoang ong Pohl en rong meteikan kauwe ah doadoahk. E sansal me, ekei Kristian mehn Korint kin kauwe mwomwe oh eh koahiok en padahk. Pein ih kin kasalehda dahme re kin inda ni ah kosoia: “Nein Pohl kisinlikou kan me nohn uk oh kehlail, ahpw ni eh kin piserdo rehtail, e kin luwet oh eh mahsen kan pil sohte wia mehkot.” (2 Korint 10:10) Ahpw e kaperen pwe mendahki met, soundoulik kan kin ahnsou koaros rong lokaiahn kaping kan.

15, 16. Iaduwen soundoulik kan oh arail pwoud kan kin mwekidki limpoak oh ngoang me iengerail me pwoson kan kin kasalehda?

¹⁵ Emen sounapwalih en circuit nan Latin America kin aluhki rahn ehu pwon nan pwelmata ni ah kin nantiong en lellahng rie Kristian kan en pali ngehn me kin mihmi nan wasa ehu pahn epwelpen sounuhwong kosonned kan. E intingihdi: “E inenin kin kamwekid ie en kilang riatail Kristian kan kasalehda arail kalahnganki mmwemweit wet. Mendahki I kin apwaliki kohlang wasao, ni ahi kin lelohng keper kan oh apwal akan, mepwukat koaros kin miehla katepe sang ni limpoak oh ngoang me riatail kan kasalehda.”

¹⁶ Emen sounapwalih en circuit nan Aperika intingihdi: “Pwehki limpoak me riatail Kristian kan kasalehong kiht, se inenin poakohng wasahn kalohk nan Tanzania! Riatail Kristian kan kin perenki ale kasukuhl sang kiht, oh re kin perenki lukei kiht ong nan imwerail.” Wahnpoaron Pohl oh pwopwoudo nan tepin pahr ko en Kristian, Akwila oh Persila kin ahnekipene nanpwung limpoak oh peren ehu. Ni mehlel, Pohl kosoiakin ira: “Ei rahnmwauh ong Persila oh Akwila, iengei kan ni doadoahk en Krais Sises, me lelohng nan keper laud pwehki ngehi. I kapinga ira mehlel​—a kaidehn ngehite, ahpw pil tohn mwomwohdisohn mehn liki kan koaros.” (Rom 16:3, 4) Soundoulik kan oh arail pwoud kan kin kalahnganki en ahneki soangen pirien kan en nan rahnwet me rasehng Akwila oh Persila me kin ngoangki kasalehda kasamwo meteikan oh wia werek mwahu.

Kakehle Mwomwohdiso

17. Dahme karehda kitail kak indahki me mie loalokong me kin utungada koasoandi en soundoulik kan, oh iawasa re kihsang arail kaweid?

¹⁷ Sises mahsanih: “Eri, kupwurokong en Koht kin dehdehda sang ni wahn sapwelime doadoahk kan.” Loalokong me kin utungada koasoandi en soundoulik kan kin sansalda ni eh kin sewese kakehle mwomwohdisohn sapwelimen Koht aramas kan. Erein ahn Pohl seilok en misineri keriau, ahn ih oh Sailas ara doadoahk kin pweida mwahu ni ara “kin kohla Siria oh Silisia, oh kakehlehda mwomwohdiso kan.” Pwuhk en Wiewia padahkihong kitail: “Ni ara kotekote kahnimw kan, irail ahpw koasoiaiong me pwoson akan duwen kosonned akan me koasoandier sang rehn wahnpoaron ako oh me mah kan nan Serusalem; oh re padahkihong irail re en kapwaiada kosonned pwukat. Eri, mwomwohdiso kan pil kehlaillahr nan pwoson oh towe kan wie tohtola rahn koaros.” (Wiewia 15:40, 41; 16:4, 5) Soundoulik kan en rahnwet kin ale kaweid en pali ngehn sang Pwuhk Sarawi oh pwuhk kan me “pwihn en ladu lelepek oh loalokong” intingihdi, duwehte me Kristian teikan kin wia.​—Madiu 24:45.

18. Iaduwen soundoulik kan kin kakehlehda mwomwohdiso kan?

¹⁸ Ehi, elder kan me kin doulikseli anahne kaukaule mwengehsang sapwelimen Siohwa tehpel en pali ngehn. Re anahne wehwehki wiepe kan oh kosonned kan me pwihn en Koht kin idawen. Eri soangen ohl pwukat kak wia kapai ehu ong meteikan. Sang ni arail mehn kalimeng mwahu en ngoang nan kalohk, re kak sewese iengerail me pwoson kan en kamwahuwihala arail doadoahk nan kalohk en Kristian. Padahk kan me kin poahsonda pohn Paipel me elder pwukat kin kihda kin kakehle pali ngehnin irail kan me kin rongorong. Soundoulik kan kin kakehle mwomwohdiso kan me re kin pwarek sang ni arail kin sewese meteikan en kapwaiada kaweid en Mahsan en Koht, oh ni arail kin papah oh miniminiong sapwelimen Siohwa aramas kan nan sampah pwon, oh ar kin pil kapwaiada koasoandi ngehnin kan en Koht me ‘ladu lelepek’ kin kihda.

19. Peidek dahkei kitail pahn tehkpene mwuhr?

¹⁹ Ni ahnsou me pwihn en Siohwa tepiada doadoahk en soundoulik kan rehn Tohnsukuhl en Paipel kan impen sounpar epwiki samwalahro, makasihn wet kosoia: “Se pahn mwasamwasahn imwilahn met oh kaweid en Kauno.” Kaweid en Siohwa kin sansalda. Pwehki e kin kapaiada oh e kin mih pahn epwelpen Governing Body, erein sounpar kan doadoahk wet kin laudla oh mwahula. Pwehki met, mwomwohdiso kan en Sounkadehde kan en Siohwa nan sampah pwon kin kehlailla nan pwoson oh kin wie kekeirada rahn koaros. Sansal, me Siohwa kin kapaida ngehnin tohnmetei en kisakis pwukat rehn ohl pwukat. Ahpw iaduwen soundoulik kan kak kapwaiada mwahu arail doadoahk? Ia arail mehn akedei? Iaduwen arail kak alehdi katep laudsang arail doadoahk?

Iaduwen Komw Pahn Sapeng?

◻ Ia pwukoah kan en sounapwalih en circuit kan oh district kan?

◻ Dahme karehda soundoulik kan anahne ahneki ngehnin tohnmetei?

◻ Iaduwen meteikan kak kasalehda arail kalahnganki doadoahk en soundoulik kan oh arail pwoud kan?

◻ Dahme soundoulik kan wia pwehn kakehlehla mwomwohdiso kan nan pwoson?

[Kilel nan pali 21]

Pwehki re kalap seiloakseli me karehda re anahne kasalehda ngehnin tohmetei

[Kilel nan pali 24]

Komw kin kasamwohlong nan imwomw soundoulik kan oh arail pwoud kan?