Kitail Pahn Sawaspene

1. Soangen ahnsou mwahu dah kan me mwemweit en sounapwalih en mwemweit kan kin kihong kitail?

¹ Wahnpoaron Pohl ntinglahng mwomwohdiso nan Rom: “I kin anahne mehlel I en pwarowohng rehmwail, pwe I en kak kihong kumwail kapai ehu ong pali ngehn mehn kakehlakai kumwail. Eri, met wehwehki me kitail pahn sawaspene, amwail pwoson en sewese ie, oh ei pwoson en sewesei kumwail.” (Rom 1:11, 12) Mwemweit en sounapwalih en mwemweit kan nan atail ahnsou pil kin kihong kitail ahnsou mwahu kan en sawaspene.

2. Dahme kahrehda pakair en mwemweit en sounapwalih en circuit kin wiawi mwowe?

² Mwomwohdiso: Pakair en mwemweit en sounapwalih en circuit kin wiawiong mwomwohdiso sounpwong siluh mwowe. Met kak mweidohng kitail en wiahda koasoandi mwahu pwehn uhdahn paiekihda eh mwemweitdo. (Episos 5:15, 16) Ma ke kin doadoahk, mwein ke pahn kak peki ahnsoun kommoal sang doadoahko pwehn iang doadoahk en kalohk erein wihko. Ekei kin koasoanehdi en iang doadoahk en auxiliary pioneer erein sounpwong me mwemweit kin wiawi. Ma ke koasoanehdier en seiloak, ke kak wekidala ahmw koasoandi pwehn kak mihmi erein wihko?

3. Dahme emenemen kitail men wia erein mwemweit pwehn ale kangoang kan?

³ Keieun kahrepen mwemweit en sounapwalih en circuit iei en kihong emenemen kitail kangoang oh kaiahn ong doadoahk en kalohk. Ke kak idek reh de eh pwoud, ma e pwopwoud, ken iang ih kalohk? Sounapwalih en circuit kin perenki iang sounkalohk tohto, iangahki irail me kapw kan de irail akan me men koahiekla nan doadoahk en kalohk. Koaros kak sukuhlikihsang mwomwen eh padahk oh sawas kan me e pahn kihda ni elen kadek. (1 Korint 4:16, 17) En luke ih en iang uhk mwenge pil pahn kalaudehla ahnsou mwahu en ehukihpene kangoang kan. (Ipru 13:2) Pwehki eh kin kaunopada eh padahk kan ong kamwahupen ahmw mwomwohdiso, konehng ken rong kanahieng.

4. Iaduwen kitail pahn kak kangoange atail sounapwalih en circuit?

⁴ Sounapwalih en Circuit: Wahnpoaron Pohl kin duwehte brother teikan nan mwomwohdiso. E kin lelohng kahpwal kan oh kin ahneki kapwunod kan, oh e pil anahne oh kalahnganki kangoang kan sang meteikan. (2 Korint 11:26-28) Ni ahnsou me mwomwohdiso nan Rom rongada me Pohl me wia tohn imweteng men ahnsowo kohkohlahng arail wasa, ekei irail seiloaklahng Wasahn netinet en Appius pwehn tuhwong ih—mwail 46 dohsang arail wasa! “Ni Pohl eh kilangirailda, e ahpw kapingkihong Koht oh eh koapworopwor ahpw laudla.” (Wiewia 28:15) Ke pil kak kangoange ahmw sounapwalih en circuit. Kasalehong ih wahu sang ni ahmw kin perenki utungada koasoandi en eh mwemweit. Kasansalehda ahmw kalahnganki eh doadoahk laud ong uhk. Ih oh eh pwoud pahn perenki kilang ahmw pwoson, limpoak, oh dadaur.—2 Deselonika 1:3, 4.

5. Dahme kahrehda kitail koaros anahne kangoang kan rahnwet?

⁵ Nan “ahnsou apwal ekei,” ihs nanpwungatail me sohte anahne kangoang kan? (2 Timoty 3:1) Koasoanehdi mwahu ni ahnsouwet pwehn iang koasoandi tohrohr en wihk en sounapwalih en circuit. Kitail koaros—sounapwalih en mwemweit kan oh sounkalohk kan koaros—kak perenki sawaspene nanpwungatail. Ni ahl wet, kitail pil pahn “kakehlakahda emenemen [kitail], oh sawaspene.”—1 Deselonika 5:11.