Iaduwen Sounsoulik Kan Kin Papah Nin Duwen Sounkohwa Lelepek Kan

“Emenemen kumwail, nin duwen sounkohwa mwahu en sapwelimen Koht kapai kan, en kin doadoahngki ong ni kamwahupen meteikan, kapai me e alehsangehr rehn Koht.”​—1 PITER 4:10.

1, 2. (a) Iaduwen amw pahn kawehwe lepin lokaiao “sounkohwa”? (b) Ihs me kin iang doadoahk en sounkohwa me Koht kin doadoahngki?

SIOHWA kin ketin doadoahngki Kristian lelepek koaros nin duwen sounkohwa kei. Sounkohwa iei lidu men me kin pwukoahki apwalih tohnihmw ehu. E kin pil apwalih en ah soumaso pisnes kan. (Luk 16:1-3; Kalesia 4:1, 2) Sises kin kahdaneki sapwelime pwihn en me lelepek keidi kan pohn sampah “sounkohwa lelepek.” Ong sounkohwa menet e kasapwildahng “ah diwpsou koaros,” iangahki doadoahk en kalohki Wehio.​—Luk 12:42-44; Madiu 24:14, 45.

² Wahnpoaron Piter kosoia me Kristian koaros kin wia sounkohwa en sapwelimen Koht kapai kan ong kamwahupen meteikan. Emenemen Kristian ahneki pwukoahn wia doadoahk en sounkohwa lelepek men. (1 Piter 4:10) Kristian elder idihda kan kin wia sounkohwa, oh nanpwungarail iei soundoulik kan. (Taitus 1:7) Iaduwen atail en kilangwong soundoulik pwukat? Irair dahkan oh mehn akadei dahkei me re anahne kasalehda? Oh iaduwen arail kak kapwaiada arail doadoahk ni ahl ehu me keiou katapan?

Kalahnganki Arail Doadoahk

3. Dahme karehda soundoulik kan kin adaneki “sounkohwa mwahu”?

³ Ehu pwopwoud Kristian intinglahng emen soundoulik oh eh pwoud oh kosoia: “Se men kasalehda at kalahnganki ahnsou kan koaros oh limpoak me kumwa kasalehiong kiht. Nin duwen peneinei ehu, se inenin paikihda amwa kangoang kan oh kaweid kan. Se ese me se anahne kakaulehte kekeirada ni pali ngehn, ahpw ki sawas en Siohwa oh ki brother kan oh sister kan me duwehte kumwa, kansensuwed kan kin tikitikla pwehki met.” Soangen lokaia pwukat kin kalap pwarada pwehki soundoulik kan kin nsenohki emenemen iengerail me pwoson kan, duwehte sounkohwa mwahu men ah kin apwalih mwahu anahn en tohnimw ehu. Ekei soundoulik kin samanih padahk, oh meteikan kin ndandki arail limpoak oh kadek. Ni arail kin kekeirada soangen kisakis pwukat pwehn papahki meteikan, soundoulik kan kin kak ni pwung adaneki “sounkohwa mwahu kan.”

4. Peidek dahieu me kitail pahn ahnsouwet tehkpene?

⁴ Wahnpoaron Pohl intingihdi: “A ia duwe, dahme konehng en kin mie rehn sounkohwa kan? Re en kin likilik pahn ar kaun akan.” (1 Korint 4:2) Apwalih Kristian teikan nan soangesoangen mwomwohdiso kan nan ehu ehu wihk kin wia pwukoah tohror oh kaperen ehu. Mendahki met, e kin pil wia pwukoah toutou ehu. Eri, ahpw iaduwen soundoulik kan kak ni lelepek kapwaiada arail pwukoahn sounkohwa me pahn pweida mwahu?

Kapwaiada Mwahu Arail Pwukoahn Sounkohwa

5, 6. Dahme karehda kapakap likih Siohwa me kesemwpwal nan mouren soundoulik men?

⁵ Kapakap likih Siohwa me kesemwpwal ma soundoulik kan men wia sounkohwa kei me kin wia doadoahk pweida mwahu. Pwehki arail koasoandi kan oh pwukoah kan me tohto, ekei pak re kin toutoula. (Kaparekiong 2 Korint 5:4) Ihme karehda re anahne mwekid parekiong koul en sounmelkahkao Depit: “Mweidong Kauno (Siohwa) omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Melkahka 55:22) E pil kansenamwahu mahsan kan en Depit: “Kapinga Kauno (Siohwa), me kin ketiki atail tungoal wisik toutou kan rahn koaros.”​—Melkahka 68:19.

⁶ Ia wasa Pohl kihsangie kehl pwehn apwalihki eh pwukoah kan en pali ngehn? E intingihdi: “I kakohng mehkoaros sang ni manamano me Krais kin ketikihong ie.” (Pilipai 4:13) Ehi, Siohwa Koht me kin wia Utupen ahn Pohl kehl. Me rasehng met, Piter kaweidki: “Me kin padahk, en padahkihwei mahsen en Koht; me kin papah, en papah uwen kak me Koht ketikiohng, pwe kaping en kowohng Koht ni mehkoaros ni mwaren Sises Krais, me ketin sapwelimaneki wahu oh kaping erein dih koaros kohkohlahte. Amen.” Emen brother me wia emen soundoulik erein sounpar tohto kasalehda anahnepen en likih Koht, kosoia: “Ahnsou koaros kilangwohng Siohwa ni ahnsou me ke pahn apwaliehla kahpwal ehu, oh rapahki sawas en sapwelime pwihno.”

7. Iaduwen touparek kin pid nan doadoahk en soundoulik men?

⁷ Emen soundoulik me men pweida mwahu anahne touparek. Duwehte Kristian teikan, e kin nantiong “rapahki kamehlelpen mehkan me keiou kesemwpwal.” (Pilipai 1:10)a Ma elder kan en wasao kin peidengki ire ehu, e wia elen loaloakong irail en tuhkiong sounapwalih en circuito me mwemweito. (Lepin Padahk 11:14; 15:22) Ele, ah keseu touparek oh kaweid en Pwuhk Sarawi kan pahn uhdahn wia sawas ni en elder kan pahn kaukaule apwaliehla kahpwalo mwurin e mweselsang mwomwohdiso. Me parekiong met, Pohl padahkiong Timoty: “Oh mahsan kan me ke kin rong ei kalohki mwohn sounkadehde tohto, ke en pil likihong ohl lelepek kan me pahn kak padahkiong aramas teikan.”​—2 Timoty 2:2.

8. Dahme karehda onop en Paipel, wia reperep kan en Paipel, oh doudouloale mepwukat me kesemwpwal?

⁸ Pwehn kak kihda kaweid pwung, onopki Pwuhk Sarawi, wia roporop en ire kan, oh doudouloale mepwukat me anahn. (Lepin Padahk 15:28) Emen sounapwalih en district kosoia: “ Ni at kin mihding rehn elder teikan, en dehr masak wekada me se sohte ese pasapeng en peidek ehu.” Nantiong alehda “lamalam en Krias” ong ire ehu kin karehong meno en kak kihda kaweid en Paipel me pahn sewese meteikan en peikiong kupwuren Koht. (1 Korint 2:16) Ekei pak soundoulik men anahne intinglahng Watch Tower Society pwehn ale kaweid. Nan irair sohte lipilipil, pwoson Siohwa oh poakohng padahk mehlel me kesemwpwal sang eden emen de ah semenih padahk. Pohl tepiada ah doadoahk en kalohk nan Korint “ni luwet oh rerrerki eh masepwek,” ah kaidehn ni “mwomwen aramas kadek lokaia de nin loaloakong en sampah.” Met karehda en sohte lipwen ah kalohk? Soh, e sewese mehn Korint kan en pwoson, “kaidehn ni loaloakong en aramas, ahpw ni manaman en Koht.”​—1 Korint 2:1-5.

Irair Kesemwpwal Teikan

9. Dahme karehda soundoulik kan anahne kasalehda wehwehki irair en meteikan?

⁹ Ni en soundoulik kan kin wehwehki irair en meteikan e kin sewese irail en kak ale imwila mwahu sang met. Piter kangoangehkin Kristian koaros en ‘kasalehda poakehla meteikan,’ de “kasalehda amw wehwehkin irail.” (1 Piter 3:8, footnote) Emen soundoulik pehm duwen anahnepen en ‘insenohki koaros nan mwomwohdiso oh ni mehlel tehk meteikan.’ Ki soangen ngehnohte, Pohl intingihdi: “Kumwail iang peren rehn me kin pereperen kan, oh pil iang sengiseng rehn me kin sengiseng kan.” (Rom 12:15) Soangen lamalam wet kin kamwekid soundoulik kan en nantiong wehwehkihla kahpwal kan oh irair kan en iengerail me pwoson kan. Eri re kak kihda kaweid en Pwuhk Sarawi kangoang kan me kak pweida mwahu ma e kadoadoahk. Emen sounapwalih en circuit me kin deila ni a kasalehda irair en poakehla meteikan alehdi kisinlikou wet sang mwomwohdiso ehu limwahn Turin, Iali me kosoia: “Ma ke mwahuki meteikan en men rong uhk, en rong mahs irail; ma ke men meteikan en perenkin uhk, en perenkin irail; ma ke men ale sawas, en kihda sawas. Ih met me se sukuhlkihsang kumwail!”

10. Dahme sounapwalih en circuit kan oh district kan kosoiahki duwen en aktikitik, oh mehn kalimeng dah me Sises ketikihda nan ire wet?

¹⁰ Arail aktikitik oh meteikan kin mengeiki tuhwong irail pahn sewese soundoulik kan en wia soang mwahu tohto. Emen soundoulik en circuit kosoia: “E inenin kesemwpal en kolokol lamalam en aktikitik.” E panauwihki soundoulik kapw kan: “Endehr mweidong pein kumwail en nohn mihla pahn mwekid en riamwail Kristian kepwehpwe kan pwehki dahme re kak wiahiong kumwail, de en koampoakepahkihte soangen Kristian pwukat, ahpw en nantiong ahnsou koaros kasalehda soh lipilipilki meteikan.” (2 Kronikel 19:6, 7) Oh soundoulik men me uhdahn aktikitik sohte pahn kalaudehla pein eh kesemwpal nin duwen emen wilipen Society. Emen sounapwalih en district pwung ni ah kosoia: “ En aktikitik oh perenki rong riomw Kristian kan. Ahnsou koaros kamangeiuhkala pwe meteikan en kak tuhwong uhk.” Nin duwen ohl me keiou lapalap me mour mahso, Sises Krais kak karehong aramas akan en apwaliki tuhwong, ahpw e inenin aktikitik oh meteikan kin mengeiki tuhwong me karehda seri kan kin insenamwahuki arail kin mih re. (Madiu 18:5; Mark 10:13-16) Soundoulik kan perenki seri kan, me pwulopwul kan, me mah kan​—ni mehlel koaros nan mwomwohdiso​— en mengeiki tuhwong irail.

11. Iahd me emen anahne kasalehda aktikitik, oh dahme pahn imwikihla pekmahk ong meteikan?

¹¹ Ni mehlel, “kitail koaros kin pwupwedi pak tohto,” oh sohte soundoulik me kak ire iraildi sang wiahda sapwung kan. (Seims 3:2) Ni arail kin wiahda sapwung kan, oh pekmahki, met pahn kasalehong elder teikan karaspen en kasalehda aktikitik. Nin duwen me Lepin Padahk 22:4 kosoia: “Lemmwki Kauno (Siohwa) oh impai, eri, ke ahpw pahn kepwehpwehla, waunla, oh pil mour werei.” Oh kaidehn ladu kan koaros en Koht anahne ‘aktikitik ni arail iang arail Koht kekeid’? (Maika 6:8, 1960 Edition) Ni ahnsou me peidek kohwong duwen soangen kaweid dah e pahn kihong soundoulik kapw men, emen sounapwalih en circuit kosoia: “Wauneki oh insenohki brother kan koaros, oh medemedewe me re mwahusang uhk. En aktikitik. En kasalehda ia uhdahn kowe. Dehr aklapalap.”​—Pilipai 2:3.

12. Dahme karehda ngoangki doadoahk en kalohk en Kristian me inenin kesemwpwal?

¹² En soundoulik men ngoangki doadoahk en kalohk pahn karehong ah kosoi en mie lipwe. Ni mehlel, ni ahnsou me ih oh eh pwoudo kihda mehn kalimeng mwahu nan doadoahk en kalohk, elder kan, arail pwoud kan, oh tohn mwomwohdiso kin ale mehn kangoang sang met en kasalehda ngoang nan arail kalohk. Emen sounapwalih en circuit kangoangehki: “En ngoangki kalohk.” E kapataiong: “I diarada me ahnsou koaros me, ma mwomwohdiso ehu ngoang nan doadoahk en kalohk, eri arail kahpwal kan pahn pil malaulau.” Emen sounapwalih en circuit kosoia: “I kamehlele me ma elder kan iang brother kan oh sister kan kalohk oh sewese irail en perenki kalohk, met pahn imwikihla meleilei en lamalam oh insenamwahu mehlel en papah Siohwa.” Wahnpoaron Pohl ‘ale kehl sang rehn Koht pwe en padahkihong kumwail rongamwahuwo me pwarodo sang reh, mehnda ma se diarada apwal laud.’ Ihme e sohte kapwuriamwei arail kin perenki arail kin tamanda ah mwemweit kan oh doadoahk en kalohk oh men pil pwurehng kilang ih!​—1 Deselonika 2:1,2; 3:6.

13. Dahme soundoulik men en medemedewe ni ah kin iang ienge Kristian kan nan doadoahk en kalohk?

¹³ Ni eh kin iang ienge Kristian kan nan doadoahk en kalohk, soundoulik men en kin tehk arail irair kan oh wen arail koahiok. Mendahki iren sawas kan me e kihda kin wia sawas laud, e ese me ekei pak re kin salo ni arail kin iang elder koahiok men kalohk. Ihme karehda, nan ekei irair, kihda kangoang pahn wia sawas laud sang kihda kaweid. Ni e kin iang sounkalohk kan de pioneer kan nan arail kin wia onop en Paipel ong meteikan, re pahn men en wia onopo. Ele re wia met pwe ren kak sukuhlki sang ih ekei ahl en kamwahuwiahla wiepen arail padahk kan.

14. Dahme karehda kitail kak indahki me soundoulik kan me kin ngoang kin pil kamwekidada meteikan en pil ngoang?

¹⁴ Ngoang en soundoulik kan kin pil kamwekidada rehn meteikan ren pil ngoang. Emen sounapwalih en circuit nan Uganda aluhki awa riau nan wel pwehn iang emen brother kohlahng ehu onop en Paipel rehn emen me sohte nohn kekeirada. Erein ahnsou me ira wia alialu e kotou mosul me karehda ahnsou me re lel rehn me re pahn onop rehu re inenin wiseksekla doulul. Ni ahnsou me tohn peneineio me wenemen esehda me ohlo emen soundoulik, re inenin wadekala met. Re ese me sounpadahk en arail sarawio sohte pahn kasalehda soangen inseno wet ong tohn arail pelien lamalam. Rahn Sarawi en mwuri, re iang mihding me re ahpwten iang towehda oh kasalehda arail ineng en wiahla Sounkadehde kan en Siohwa.

15. Ekperiens mwahu dahieu emen soundoulik ngoang paikihda nan Mexico?

¹⁵ Nan Oaxaca, me mih nan Mexico, emen sounapwalih en circuit wiahda mehkot me sohte me kasik me e pahn wia. E koasoanehdi me e pahn mih nan ehu perehn imweteng erein pwohng pahieu pwehn kak pwarek pwihn en tohnimweteng isimen me wiahlahr sounkalohken Wehio. Ong rahn kei e kin iang tohn imweteng pwukat ni arail kin wia kadehde sang ehu perehn imweteng kohlahng ehu pere oh wia onop en Paipel. Pwehki aramas kan perenki, ekei onop pwukat kin wiawi lau lel ni lukepen pwong. Sounapwalih en circuit menet intingihdi: “Ni imwin mwemweito, tohn imweteng ko oh ngehi inenin peren mehlel pwehki mehn kangoang kan.”

16. Dahme karehda e kin inenin katapanki ma soundoulik kan oh arail pwoud kan kin kihda mehn kangoang?

¹⁶ Soundoulik kan en nantiong wia kangoang. Ni ahnsou me Pohl pwarek mwomwohdisohn Masadonia, ‘e kangoangehkin irail mahsan tohto.’ (Wiewia 20:1, 2) Lokaiahn kangoang kan kin inenin sewese me pwulopwul kan oh me mah kan ong mehn akedei ngehnin kan. Ni ehu rahn ohpis laud en Watch Tower Society, ehu roporop kasalehda me sounapwalih en circuit kan kangoangeiehr kereniong persent 20 en volunteer kan en wia doadoahk en papah kaukaule. Sang ni ah mehn kalimeng mwahu nin duwen sounkalohk en Wehio kaukaule men, en soundouliko pwoudo kin pil wia utupen mehn kangoang.

17. Iaduwen emen soundoulik en circuit me mah kin kilangwong ah kapai en sewese meteikan?

¹⁷ Me mah kan oh me pahtou kan kin keiou anahne kangoang. Emen sounapwalih en circuit me mahla intingihdi: “Ehu kisehn ahi doadoahk me kin karehong ie peren iei kapai en sewese irail kan me sohla kin iang mihding oh kalohk oh pil luwet ni pali ngehn nan mwomwohdisohn Koht. Mahsan kan en Rom 1:11, 12 kin ahneki wehweh tohror ehu ong ie, pwehki I kin kihsang met kangoang oh kehl nin doken ahi kin ‘kihda ekei kisakis en ngehn ong soangen irail pwukat pwe ren kak tengedi nan pwoson.’”

Katingpen Arail Doadoahk Kaperen

18. Ia mehn akadei kan sang nan Pwuhk Sarawi me soundoulik kan ahneki?

¹⁸ Soundoulik kan kin keiou insenohki iengerail me pwoson kan. Re men mwomwohdiso kan en kekeirada oh kehlailla ni pali ngehn. (Wiewia 15:41) Emen soundoulik kin doadoahk laud “pwehn kihda kangoang, kihda mehn katihnain, oh kekeirada rehn meteikan ineng en kapwaiada doadoahk en kalohk oh kaukaule momourki padahk mehlel.” (3 Sohn 3) Emen tohror kin rapahki pwehn kakehlehla rie Kristian teikan nan pwoson. (Kolose 2:6, 7) Tamataman me soundoulik kin wia “iengetail mehlel,” kaidehn en kaunda en meteikan pwoson. (Pilipai 4:3; 2 Korint 1:24) Ah mwemwito pahn wia ahnsoun kangoang oh kekeiradahn doadoahko, iangahki ahnsou ong pwihn en elder kan en kousapahlih kekeirada kan me mwomwohdiso wiahda oh koasoanehdi mehn akedei kan ong ahnsou kohkohdo. Sang ni ah lokaia kan oh mehn kalimeng, sounkalohk kan, pioneer kan, ministerial servant kan, oh elder kan kak kehlailda oh onopadahng doadoahk kan me mih mwowe. (Kaparekiong 1 Deselonika 5:11) Eri, ihme karehda, en ni mongiong unsek utungada mwemweit en sounapwalih en circuit, oh isaneki sawas kan me sounapwalih en districto wiahda.

19, 20. Iaduwen soundoulik kan oh arail pwoud kan kin ale katingpen arail papah lelepek?

¹⁹ Soundoulik kan oh arail pwoud kan kin ale katingpen arail papah lelepek, oh re kak koapworopworki me Siohwa pahn kapai irailda pwehki soang mwahu kan me re wiahda. (Lepin Padahk 19:17; Epsos 6:8) Georg oh Magdalena iei pwopwoud mah ehu me papah sounpar tohto nan doadoahk en doulikseli. Nan ehu kapokon nan Luxemburg, mie emen aramas me pwaredohng Magdalena, aramaso me e kalohkong impen sounpar 20 samwalaro. Lih en Suhs menet perenkihda pwuhk en sawas en Paipel me Magdalena pwilikihdi reh, oh kedekedeo e papdaisla. Emen sister tuhwong Georg me tamanda ah pwarek imweo impen sounpar 40 samwalaro. En Georg ngoangki kalohngki rongamwahuwo karehong liho oh ah pwoud en alehda padahk mehlel. Ira koaros Georg oh Magdalena kin perenkihda mehlel met.

²⁰ En Pohl kalohk mwahu nan Epsos karehong ih peren oh kamwekid ih en pwurehng kapwurehda mahsan en Sises: “Kihkihwei me kaperen sang ale.” (Wiewia 20:35) Pwehki doadoahk en doulikseli kin ahnsou koaros pidada kihkihwei, irail ko me kin wia met kin kilang me mie imwila mwahu en arail doadoahk. Emen sounapwalih en circuit me sewesehda emen elder me pahtoula alehda ehu kisinlikou sang rehn elder menet: “Komw kin wia ‘mehn sawas en kehl’ nan ahi mour en pali ngehn​—laudsang me ke ese. . . . Ke sohte uhdahn ese ia uwen sawas laud me ke wiahiong emen Asaph en rahnwet, me ‘neh kan kereniong luwetala.’”​—Kolose 4:11; Melkahka 73:2.

21. Dahme karehda komw kak indahki me 1 Korint 15:58 kin kadoadoahkiohng doadoahk en soundoulik kan?

²¹ Emen Kristian mah me mih nan doadoahk en circuit erein sounpar tohto kin men tamanda 1 Korint 15:58, wasao me Pohl kangoangehki: “Kumwail kehlail oh dadaur oh loalenohng amwail doadoahk ong Kauno, pwe kumwail ese me papah Kauno kaidehk doadoahk mwahl ehu.” Soundoulik kan uhdahn ahneki pwukoah tohto nan doadoahk en Kauno. Oh ia uwen atail kin kalahnganki me re kin papah ni peren nin duwen sounkohwa lelepek en sapwelimen Siohwa kalahngan!

[Nting tikitik me mi pah]

Iaduwen Komw Pahn Sapeng

◻ Dahme karehda soundoulik kan kak wia “sounkohwa mwahu kei”?

◻ Ia ekei ire kan me sewese sounapwalih en circuit kan oh district kan en wiahda soang mwahu tohto?

◻ Dahme karehda aktikitik oh ngoang me kesemwpwal ong irail ko me kin wia doadoahk en doulikseli?

◻ Mehn akedei mwahu dahkei me soundoulik kan ahneki?

[Kilel nan pali 27]

Soundoulik kan kin rapahki pwehn kangoange ienge meteikan

[Kilel kan nan pali 28]

Me pwulopwul kan oh me mah kan koaros kak paikihda werekiohng soundoulik kan oh arail pwoud kan

[Kilel nan pali 29]

En soundoulik men ngoangki doadoahk en kalohk pahn kamwekid meteiakn en pil ngoangki kalohk