Lingan Lapalapie En Sapwellimen Siohwa Tehnpas Sarawi
“‘I pahn kadirehkihla tehnpas sarawi wet lingan,’ Siohwa, Kaun en Karis en sounpei mahsanih.”—AKKAI 2:7.
1. Iaduwen ngehn sarawi kin pidada pwoson oh wiewia?
NI AH kalokalohk sang ihmw-lel-ihmw, emen Sounkadehdehn Siohwa kan tuhwongada emen lih en palien lamalam en Pendekosdal me koasoia, ‘Kiht anehki ngehn sarawi, ahpw kumwail me kin wiewia doadoahko.’ Ni lokaia kadek, Sounkadehdeo kawehwe ong liho me ma emen anehki ngehn sarawi, e pahn pein mwekidki en wia doadoahk en Koht. Seims 2:17 mahsanih: “Eri, ih duwen ni pwoson: ma pwosonte me mie, ahpw sohte iangahki wiewia, eri, met wehwehki me pwosono pwoson mehla ehu.” Ki sawas en ngehnin Siohwa, sapwellime Sounkadehde kan kekeirada pwoson kehlail, oh e ketin ‘kadirehkihlahr tehnpase lingan’ ni ah koasoaneiong ren wia doadoahk pwung—keieu ‘kalohki rongamwahu wet en Wehio nan sampah pwon pwehn wia kadehde ong wehi kan koaros.’ Ni ahnsou me doadoahk wet pahn lel uwen me Siohwa kupwurki, “eri imwi ahpw pahn kohdo.”—Madiu 24:14.
2. (a) Kedirepwkin kitailla nan doadoahk en Siohwa pahn wahdo kapai dah? (b) Dahme kahrehda sen perenkihki e wia “pwapwand”?
2 Sang ni mahsen pwukat en Sises, kitail wehwehkihlahr me atail doadoahk rahnwet pahn keieu pidada kalohkiong mehteikan “rongamwahu lingan en Koht kalangano,” me kitail pwukoahki. (1 Timoty 1:11) Uwen laud en atail perenki kasohpisengkin kitailla doadoahk en Siohwa, iei uwen imwi ah pahn pil mwomwen kerendohr. Nan Apakuk 2:2, 3, kitail wadek mahsen kan en Siohwa: “Ntingihedi pohn ekei pelien takai dahme I pahn mahsanihong uhk, pwe aramas en kak mengeiki wadek. Ntingihedi, pwehki e saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” Ehi, “dahme Koht mahsanih” pahn pweida “mehnda ma e pahn pwand.” Pwehki kitail miher nan sounpahr kawalihsek siluh en kaundahn Wehin Sises, ekei kin lemeleme me kitail mih nan ahnsou pwand ehu ahnsou wet. Ahpw, kitail soh kin peren, me imwio saikinte kohdo? Erein sounpahr pwukat en 1990, kainepw kan me kin irehdi kalohkpen rongamwahuo kohsangehr, mwomwen ngehnin Koht me kamwekid met, nan Palimesen Iurop, ekei wasa nan Aperika, oh sahpw teikan. Irair en “pwando” kin mweidong ahnsou ong “sihpw” tohto en rikirikpene sang wasa pwukat me ahpwtehn mweimwei ong kalohk en wiawiong.—Sohn 10:16.
3. Dahme kahrehda atail wehwehkihla kapw “dih wet” en kamwekid kitail en wia doadoahk en Koht ni ahlen karuwaru?
3 “E sohte pahn pwand,” soukohpo mahsanih. Sises mahsanih me dih suwed wet sohte pahn ohla “lau soahng pwukat koaros wiawi.” (Madiu 24:34) Atail wehwehkihla kapw ire wet en sapwellime mahsen me pid ‘dih wet’ kin wehwehki me atail doadoahk en kalohk sohte karuwaru?a Ire mehlel kan kasalehda me soh! Atail dih kin mihlahr nan irair en suwed oh mwersuwed me inenen laud oh sohte parekpe nan poadoapoad. (Kilang Wiewia Acts 2:40.) Kitail en doadoahk karuwaru. (2 Timoty 4:2) Kokohp kan koaros me pid ahnsoun kahn kamakam kohwalap kasalehda me e pahn kohdo mwadang, e pahn wiahkinte ieu wiawi, oh e pahn mwomwen wai—duwehte lipirap emen. (1 Deselonika 5:1-4; Kaudiahl 3:3; 16:15) “Iei me kumwail en pil onohnop ahnsou koaros, pwe Nein-Aramas pahn ketido ni awa me kumwail pahn sasairiki.” (Madiu 24:44) Ni en koasoandi en aramas me dohsang Koht wet kerenlahng kamwomwla, ni mehlel kitail sohte men kesehla atail koapwoaroapwoar kaselel en mour soutuk ni atail pahn pwurelahng “wuledek nan pwelmatak” en mehn koarompwa kan en sampah!—2 Piter 2:22; 3:10; Luk 21:32-36.
4. Irair dahieu me karehda anahnepen kalaudlahn “mwenge ni ahnsou me konehng,” oh iaduwen anahn wet kin kaitarahla?
4 Me pwungiong kokohp en Sises, nan 1914 iei “tepiadahn apwal” ni en tohnsampah pidelong nan “kaimwseklahn koasoandi en mehkan.” Nsensuwed, wiewia suwed kan, oh kawehla kosonned wie lalaud lau lel atail ahnsou. (Madiu 24:3-8, 12) Ni ahnsouwohte, Siohwa ketin kehkehlikiong pwihn en ladu lelepek oh loalokong en ketikihong tohnimwen arail Soumas, Krais, “mwengen pali ngehn ni ahnsou me konehng.” (Madiu 24:45-47) Sang nan mwoale nanleng, Nanmwarki Mesaia menet kin ahnsouwet kaukauweidih koasoandi en kamweng ngehnin ehu nan sampah pwon.
Diren “Mwenge Kan”
5. Anahn dahieu kin kohieng “mwenge”?
5 Tehk duwen kaunopadahn “mwenge kan.” (Luk 12:42) Mwenge keieu nan kenen Kristian kan mwenge iei Mahsen en Koht, Paipel. Pwehn mie lipwan ahmw padahki Paipel, ke pahn anahne ehu kawehwe me pwung oh wehwe. Erein sounpahr kan me dower powe, anahn wet kin ekis ekis pweida, keieu tepidahn nan 1950 ni ahnsou me New World Translation of the Christian Greek Scriptures ntingda ni lokaian wai. Nan 1961, New World Translation en Paipel pwon pil mihela, oh kopi kan pil ntingda ni lokaia teikan. Volume 3 me kohda nan pahr en kalohk en 1996 wiadahr me 27, oh me 14 sang met iei Paipel unsek. Pwehn kak apwaliala kawehwehn Paipel, iangahki sawas kan en Paipel irail Kristian lelepek 1,174 samwa kin ahnsouwet doadoahk full-time nan rahn ohpis 77 en Watch Tower Society.
6. Iaduwen Society apwaliahla anahn akan en pwuhk kan en Paipel?
6 Pwehn utungada doadoahk en pwihn laud wet en sounkawehwe kan, rahn ohpis 24 en nting en Watch Tower Society kin wiwiahda pwuhk tohto. Pwehki met, re pil kihong nan ohpis laud kan en Society misihn kan en wiahda pwuhk (rotary presses). Wiawihdahn makasihn kan Watchtower oh Awake! wie tohtohla nan sounpwong kan, me lelehr me 943,892,500, persent 13.4 kekeirada ong sounpahr ehu. Uwen tohtohn wiawihdahn Paipel kan oh pwuhk nan United States, Brazil, Finland, Semen, Itali, Sapan, oh Mexico kekeirada persent 40 nan 1995 lel kopi 76,760,098 nan 1996. Rahn ohpis teikan pil wiahda pwuhk tohto me kahrehda tohtohlahn pwuhk kan.
7. Iaduwen Aiseia 54:2 kin alehda iren karuwaru laud ehu ahnsouwet?
7 Pali lauden kekeirada kan kin wiawihda erein pahr kan en 1990 pwehki tokedi en keinapw kan me kin wiawihong Sounkadehde kan en Siohwa nan Palimesen Iurop oh Aperika. Duhpek en pali ngehn me inenen laud wasa pwukat. Ihme kahrehda ngihlen likwero kin wiawi ni karuwaru: “Eri, kalaudehla imwomw impwal me ke kin kousoan loale; kareireila selipe kan oh katengehdi kisin lepin tuhkehn katenge kan!”—Aiseia 54:2.
8. Mwekid sapan dahieu kin sewese utuht en mwohni?
8 Ihme kahrehda, e konehngki en kalaudehla ihmw kan en rahn ohpis 104 kan en Society. Pwehki iren pai en wehi me apwal nan wasa kan me ahpwtehn ritdahng kalohk, pali laud en mwohni ong doadoahk kalaud wet kin kohsang sawas en riatail kan nan sahpw kepwehpwe kan nan sampah pwon. E inenen kaperen, pwehki mwomwohdiso kan oh emen emen aramas kin peikiong met sang nan mongiongarail, ni arail kin kapwaiada Eksodus 35:21: “Oh emen emen nin duwen me e nsenki ahpw patohwanohng Kauno [Siohwa] e meirong mehn wiahda impwal.” Se men isaneki ahnsou mwahu wet pwehn kalangankihong koaros me kin iang kisehn kisakis kadek wet.—2 Korint 9:11.
9. Iaduwen Rom 10:13, 18 kin pweida rahnwet?
9 Erein 1996, pwuhk kan en Watch Tower Society kin uhdahn kalinganada mwaren Siohwa oh kupwure lel ni imwin sampah. E duwehte me wahnpoaron Pohl kohpada. Ni ah pwurehng kapwarehda kokohp en Soel oh Melkahka kaieisek duwau, e ntingihdi: “‘Koaros me kin likweriong mwaren Kauno [Siohwa] pahn mourla.’ Ahpw I pahn idek: Mehlel pwoat me re saikinte rong mahseno? Soh! Pwe re rongehr—pwe Pwuhk Sarawi pil mahsanih, “Ngilarail kan lelpesengier wasa koaros nin sampah, arail padahk kan kipedier sampah pwon.’” (Rom 10:13, 18) Eri, ni arail kapinga mwar kesempwalo SIOHWA, sapwellime aramas kan kin iang kise kesempwal ehu en kadirehkihla sapwellime imwen kaudok lingan. Ahpw, iaduwen, pakair wet pweida keieu erein 1996? Menlau kasawih charto nan pali 18 lel 21.
Dondul Sampah Pwon
10. Irair kaselel dah kei ke tehkada nan weiwiahn sapwellimen Siohwa aramas kan, me sansalda nan chart ni pali 18—21?
10 Mahsen en Sises me diarek nan Luk 10:2 me inenen kehlail: “Rahket me inenen laud, a tohndoadoahk kan me malaulau; kumwail eri kapakap oh peki rehn kaunen rahket pwehn ketin kadarodohng tohndoadoahk tohto nan sapwellime rahk.” Komw kin kapwaiada pahngok wet? Irail aramas rar kei nan sampah kin wia met. Met kin sansalkihda keirada kapw en sounkalohk en Wehio me 5,413,769 me kin repotki arail kalohk erein 1996. Pil ehu, mie brother oh sister kapw 366,579 me pepdaisla. Ia uwen atail kin kesempwalki “me mwahu pwukat en wehi kan koaros,” me ahnsouwet iang kisehn ‘kadirehkihla sapwellimen Siohwa imwen kaudok lingan’!—Akkai 2:7.
11. Dahme kahrehda kitail koaros anehki kahrepe mwahu en peren?
11 Repoht en kalaudla kan nan wasa kan me ahpwtehn ritdahng kalohk sohte kin wia mehkot kapwuriamwei. Ekei kitail kin peirinki ekei Sounkadehde kan me ahnsouwet kin paiekihda soangen keirada wet? Weksang met, kitail en iang arail peren. Sahpw koaros kin tepida tikitik. Iengen Akkai soukohpo, Sekaraia, ntingihdi: “Ihs me tateki rahn kan en soahng tikitik kan?” (Sekaraia 4:10, NW) Kitail kin perenkihda me nan sahpw akan me doadoahk en kalohk kin pweida mwahu, ahnsouwet mie sounkalohk en Wehio me rar kei, oh re kin kalap kalohk wasa kan me kilelong irail, pil wihk koaros nan kahnimw laud tohto. Mie karepen sen wawaila nan atail kalohk nin doken Siohwa ahnsouwet ketikihda ahnsou mwahu ong kamourala ong wasa kan me doadoahko keinapw? Soh douluhl! Sises mahsanih: “Mwahto iei sampah.” (Madiu 13:38) Kadehde mwuledek anahne wiawi, duwehte tohnpadahk kan en mahs me kin wia ‘kadehde mwuledek ni imwin koasoandi en mehn Suhs akan.—Wiewia 2:40; 10:42; 20:24; 28:23.
Mwekimwekidwei Mwohwe
12. Mehn kangoang dah kitail anehki pwehn mwekid “inenwei mwohwe”?
12 Ei, kitail anahne peipeian, mwekimwekid “inenwei mwohwe” ieiang sapwellimen Siohwa kuruma en nanleng. (Esekiel 1:12) Kitail en tamataman mahsen en Piter: “Kauno [Siohwa] sohte kin ketin pwapwang ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki eh sohte kin kupwurki koaros en wiliakapwala oh sohpeisang nan diparail kan.” (2 Piter 3:9) Kitail en mweidong mehn kalimeng en ngoang en riatail nan sahpw pai suwed kan en kamwekid kitail. Pwandlahn Armakedon kin karehdahr aramas kid kei en rikrikpene sang nan sahpw pwukat iangahki nan wasa kan me kalohk kalap wiawihong. “Rahn lapalap en Kauno [Siohwa] kerendohr—kerendohr mehlel oh pahn mwadang leledo.” (Sepanaia 1:14) Kitail pil anahne karuwaru en wia kadehde mwuledek!
13, 14. (a) Dahme kitail kak ndahki kohpeseng en pwuhk kan erein 1996? (b) Pilahn tohrohr dah kei mwomwohdiso kan en wiahdahr ehu ehu sounpahr, oh iaduwen ke pilahn en iang kisehn met?
13 Mendahki oaretik kan sohte pwarada nan chart en kalohk, mie keirada laud en kohpeseng en Paipel kan, pwuhk kan oh makisihn kan erein pahr en mwohweo. Karasepe ehu, kohpeseng en makasihn sampah pwon kasalehda kekeiradahn persent 19, wehwehki me koaros makasihn kan kohpeseng nan sampah pwon lel 543,667,923. Neitail makasihn kan kin sewese wiahda soangsoangen wiepen kalohk—pohn ahl akan, nan wasahn mwemweit kan, ni uhdihn poahs kan (bus stops), nan wasahn pisnis kan. Repoht kan kasalehda me nan wasa kan me kalohkpen Wehio kalap wiawi, irail me sukuhl laud kan kin perenkihda mwomwen neitail makasihn kan oh koahiek en wiepen koasoi kan loale, oh re kin pwungki koasoandi en onop Paipel.
14 Ehu ehu sounpahr erein sounpwong en April, mwomwohdiso kan kin kalap koasoanehdi kalohk tohrohr en makasihn, re kin koasoanehdi rahn ehu kalohk sang ihmw-lel-ihmw oh kalohk wasa teikan. Ahmw mwomwohdiso pahn iang kisehn doadoahk wet erein April 1997? Makasihn kaselel kan kaunopadahngehr uhk, kohpeseng en makasihn wet me wiawi ahnsou tehkis nan sampah pwon pahn inenen lipwalipw ong koaros. Pohn dekehn Saipros, mwomwohdiso kan kin wia dahme arail lepin kahso kin nda me dene “en lelkihong aramas koaros rongen Wehio,” kin pwurela sounpwong koaros ki doadoahk en makasihn, me kin kahrehda e kin tohtohkihla makasihn 275,359 ong sounpahro, met wehwehki persent 54 tohtohsang pahr samwalahro.
En Akkai Kaimwsekpen Rohng
15. (a) Dahme kahrehda Siohwa pil kadarado rohng kan ki Akkai? (b) Mehn kasukuhl dah rohng kesiluh en Akkai kin kasalehong kitail?
15 Siohwa kadaredo Akkai, rahn 63 mwurin e pakairki eh rohng keriau, ki pahngok kesiluh me kitail anahne peikiong nan mongiongatail rahnwet. Akkai koasoi ni mwomwen me mehn Suhs kan ahnsouwo wie kakau poahsoan en tehnpas sarawio, me uhdahno re poahsoanehdier sounpahr 17 mwohwe. Pil pwurehng Siohwa ketin mwahngiada anahnepen ehu kamwakel. Samworo kan oh aramas kan sohla nsenohki apwalih arail pwukoah kan; ihme karehda, mwohn silangen Siohwa, re samin. Ekei sapwellimen Siohwa aramas kan rahnwet pil soukautihla, ni arail kasoupisengkinirailla elen sampah me mouren wia pein nsenen emen oh mouren roporop? E karuwaru me kitail koaros en koasoanehdiong nan mongiongatail “sang rahnwet oh kohkohla” en wahdo kaping ong mwaren Siohwa, oh koapwoaroapwoarki sapwellime inou: “Sang met kohla I pahn kupwuramwahuwih kumwail.”—Akkai 2:10-19; Ipru 6:11, 12.
16. “Itiht” dahieu me keren, oh dahme pahn imwikihla?
16 Ni rahnohte, mahsen en “Siohwa, Kaun en Karis en sounpei” kohdohng Akkai kapahieu oh kaimwsekpen ahnsou. E kasalehda dahme pidada e pahn “itikada nanleng oh sampah,” mahsanih: “I pahn kauwehla wehi kan oh katokehdi weren nansahpw en mahwen kan oh sountangahki kan; oahs akan pahn mehla, oh soundakeparail kan, emente pahn kemehla emen.” (Akkai 2:6, 21, 22) “Itiht” wet eri pahn lel ni imwi ni ahnsou me Siohwa pahn mwuledek kamwakele sampah nan Armekedon. “Me kesempwal kan en wehi kan” eri pahn pidelong, oh wiahda pwihn en koasoandi en aramas en sampah kapwo. Ia uwen met iwa kahrepe kan en pereperen oh wia kaping ong Siohwa!—Akkai 2:7; Kaudiahl 19:6, 7; 21:1-4.
17. Iaduwen Sises kin wia duwehte “rihng sidamp” ehu?
17 Ni ah kaimwsekla ah kokohp, Akkai ntingihdi: “‘Ni rahno,’ Kauno [Siohwa], Kaun en Karis en sounpei, mahsanih, ‘I pahn aleiuk, Serupapel, nei ladu, oh I pahn idihukada pwe ke en kaunda ni mwarei. Kowe me I piladahr,’ Kauno [Siohwa], Kaun en Karis en sounpei me mahmahsen.” (Akkai 2:23, NW) Krais Sises ahnsouwet kin wia sapwellimen Siohwa Nanmwarki Mesaia oh Samworo Lapalap, ni ah alehda nanleng pwukoah kan me Kepina Serupapel oh Samworo Lapalap Sosua kin pwukoahki nan pein ara ahnsou nan Serusalem sampah. Duwehte rihng me sidamp kin mih powe nin limen Siohwa palimaun, Sises iei meno me wiahla “Ehi” nin duwen mehn doadoahk en Siohwa ni ah pahn kapwaiada “inou en Koht” tohtohie. (2 Korint 1:20; Episos 3:10, 11; Kaudiahl 19:10) Rongen kokohp pwon en Paipel kin pidada en Siohwa koasoandi en Krais me iei Nanmwarki oh Sountomwo.—Sohn 18:37; 1 Piter 1:18, 19.
18. Iaduwen kaimwseklahn “mahsen en Siohwa, Kaun en Karis en sounpei” pahn pweida?
18 Mehlel nan atail ahnsou, lingan lapalapie kin diarek nan sapwellimen Siohwa Tehnpas Sarawi lingano! Oh ni ahnsou keren, mwurin Siohwa koakoahksang koasoandi koaros en Sehdan, Akkai 2:9 pahn pweida kohwahlap: “‘Nan wasakiset I pahn ketikihda popohl,’ Siohwa, Kaun en Karis en sounpei me mahmahsen.” Popohl!—popohl soutuk sampah oh nanleng, me uhdahn pahn mie sang sapwellimen Siohwa “rihng sidamp,” me iei Krais Sises, “Soupeidi en Popohl,” me ntingdier pid duwen ih: “Sapwellime manaman pahn wie lapalapla, oh popohl pahn poatoapoat nan sapwellime wehi . . . Kauno [Siohwa], Kaun en Karis en sounpei, ketin ngoangki kowahlap mehpwukat koaros en pweida.” (Aiseia 9:6, 7, NW) Ong ahnsou soh imwi lingan en imwen kaudok en Siohwa pahn sansalda nan sapwellime kaunda unsek en lahng oh sampah meleilei. Kitail en mihmihte nan tehnpaso!—Melkahka 27:4; 65:4; 84:10.
[Nting tikitik me mi pah]
a Kilang “Pitsang ‘Dih Suwed’ Ehu” oh “Ahnsou Ehu En Pepehd” nan Kahn Iroir en May 1, 1996 (November 1, 1995 issue of The Watchtower.)
Komw Kak Kawehwe?
◻ Iaduwen, rahnwet, sapwellimen Siohwa Tehnpas Sarawi kin ‘direkihla lingan’?
◻ Dahme kahrehda e inenen anahn sang mahs en karuwaru kalohki rongamwahuo?
◻ Dahme kamwekid en karuwaru kalohk me sansalda sang pahr en kalohk en 1996?
◻ Iaduwen Krais kin wia sapwellimen Siohwa “rihng sidamp”?
[Chart nan pali 16-19]
1996 SERVICE YEAR REPORT OF JEHOVAH’S WITNESSES WORLDWIDE
(Kilang pwuhk wet)
[Kilel kan nan pali 14, 15]
“Me kesempwal kan en wehi kan” pahn kohsang Deke kan en Nansed (1), South America (2), Aperika (3), Eisia (4), North America (5), and Iurop (6)