Dahme Keieu Kesempwal Nan Ahmw Mour?

“Komw ketin kasalehiong ie ahl me I pahn keid ie.”​—MELKAHKA 143:8.

1. Dahme Nanmwarki Solomon diarada ni imwin doadoahk oh nanti koaros en ahn aramas?

MWEIN ke wehwehki me mour kin diren koasoanehdi oh pwunod akan. Ma ke pahn medewehla, ke pahn kak kasawiada ekei mehpwukat me re kesempwal. Ahpw ekei koasoandi oh pwunod akan sohte nohn kesempwal, oh pil ekei sohte katepe. Pwehki atail esehier met, e kin wehwehki me ahmw wehwehki pahrekiongehr emen ohl me keieu loalokong, iei Nanmwarki Solomon. Ni ah kousapahlehr koasoandi en mour en aramas, ni kaimwseklahn pwuhken Eklesiasdes e mahsanih: “Lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” (Eklesiasdes 2:4-9, 11; 12:13) Ia kesempwal en mahsen pwukat ong kitail nan rahnwet?

2. Peidek dah me irair me lahn Koht akan en idek ong pein irail, oh met pil elehda mehnia peidek kan?

² Ma ke men “lemmwiki Koht oh kapwaiada sapwellime mahsen,” pein idek rehmw peidek kesempwal wet: ‘Dahme keieu kesempwal nan ahi mour?’ Ni mehlel, mwein ke sohte kin medemedewe peidek wet rahn koaros, ahpw ke soh medemedewe kanaieng ahnsouwet? Ni mehlel e pahn elehda aramas en pil pein idek peidek teikan me duwehte, ‘I soh kin nohn ngoangkihla mehkan me sohte nohn katapan me duwehte ahi doadoahk en mwohni, ahi pwukoahn doadoahk de pil dipwsou en sampah kan? Ia uwen laud I kin kesempwaliki imwei, ahi peneinei oh aramas me I kin pokepoke?’ Me pwulopwul me kak idek pein irail, ‘Ia uwen laud palien ahi sukuhl kin kadirehkihla ahi madamadau oh ahi ahnsou? Ni mehlel, mehn kamweit, mwadong, mwemweit de pil soangen men kamwahuiala wiepen wiahda dipwsou ieu iei me wia mehkot keieu kesempwal ong ie?’ Sohte lipilipil ia uwen atail sounpahr de ia duwen atail irair en mour, kitail uhdahn pahn idek: ‘Ia uwen ahi kesempwaliki papah Koht nan ahi mour?’ Ke mwein pahn kamehlele me kin mie koasoandi en mehnia rehn atail anahn akan me keieu karuwaru ireirekihdi. Ahpw iawasa kitail pahn kak ale sawas pwe kitail en kairakihdi atail anahn akan ni ahl me keieu pwung?

3. Dahme e katapan Kristian akan en koasoanehdi dahme uhdahn kesempwal?

³ “Me keieu kesempwal” kitail en anehki koahiek en koasoanehdi mehnia anahn me pahn keieu oh mwuri keriau oh eri ireirekihdi. Sohte lipilipil ma komwi emen Sounkadehdehn Siohwa de ma emen tohnsukuhl en Mahsen en Koht oh kin ehukihong Sounkadehdehn Siohwa kan, medemedewe irair mehlel wet: “Ong soahng koaros mie ahnsou me koasoandiong, ahnsou en soangen wiewia koaros pahn lahng kan.” (Eklesiasdes 3:1) Met pil wehwehki ahnsou en ahmw kasalehda poakohng oh nsenohki ahmw peneinei. (Kolose 3:18-​21) Met pil kin wehwehki kihda kisakis mwahu ong tohn imwomw ki ahmw apwalihkin irair en ahmw doadoahk en sahpw de mwohni. (2 Deselonika 3:10-​12; 1 Timoty 5:8) Oh pwehn kihsang sangat rehn tohn peneinei, ke kak koasoanehdi ahnsou pwe kumwail en mwadongpene de wiahki ehu mwemweit. (Pil kilang Mark 6:31.) Ma kitail pahn medemedewe kanaieng, ke soh pahn kilang me sohte ehu nanpwungen mehpwukat me keieu kesempwal ong mour en aramas emen? Mie mehkot tohrohr me kesempwal sang mehpwukat.

4. Iaduwen Pilipai 1:9, 10 kin pid duwen kitail wia pilipil mwahu ong dahme keieu kesempwal?

⁴ Ele ke diaradahr me poahsoan en kaweid sang nan Paipel kin wia elen sawas kesempwal ong kaweidada dahme pahn wiawi mahs oh kaweidada pilipil erpit. Karasepe, nan Pilipai 1:9, 10, e kangoangehki Kristian kan en “kalaudehla arail audaudki loalokong pwung oh wehwe unsek.” Ong dah? Wahnpoaron Pohl kapataiong: “Pwe kumwail ese ni mehlel soahng kan me uhdahn kesempwal.” Met soh mehlel? Sang ni loalokong pwung, Kristian akan me marain pahn kakehr kilangada dahme re pahn keieu kesempwaliki nan arail mour.

Mehn Kasalepehieu Ong Dahme Keieu Kesempwal

5. Ni Paipel ah kasalehda ahl me Kristian en alasang, iaduwen iren Pwuhk Sarawi kan kin kasalehda me keieu kesempwal nan mour en Sises?

⁵ Kitail alehdi iren loalokong ehu sang nan mahsen kan en Piter me mahsanih: “Pwe ong ni met me Koht ketin malipehkinkumwaildo; pwe duwen pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih.” (1 Piter 2:21) Ehi, pwehn kasalehda dahme keieu kesempwal nan mour, kitail kak kasawi duwen padahk en Sises Krais me pid irewet. Melkahka 40:8 wia mahsen en kokohp wet me pid ih mahsanih: “Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mongiongiet.” Iei met duwen ah pil kin mahsanihada duwen elen kupwukupwure wet me mahsanih: “Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.”​—Sohn 4:34; Ipru 12:2.

6. Iaduwen aht pahn ale songen pwepweiohte duwehte Sises ni ah kihdi mahs kupwuren Koht en keieu kesempwal ong ih?

⁶ Tehk kanaieng kihoiei wia kupwuren Koht. Sapwellimen Sises mehn kalimeng mwahu kasalehiongehr sapwellime wahnpoaron oko en ese dahme keieu kesempwal nan arail mour, pwe e mahsanih me “tohnpadahk koaros, ni ar pahn deila mehlel, re pahn kin duwehla ar sounpadahk kan.” (Luk 6:40) Oh ni ahn Sises kin kekeidiki ahl me Semeo koasoanehdi, e kin kasalehda me mie “nsenamwahu oh kaperen” ni emen ah pahn kin kesempwaliki kupwuren Koht en keieu nan ah mour. (Melkahka 16:11; Wiewia 2:28) Ke kak kilangehr wehwehn met? Ni ahnsou me sapwellimen Sises werek kan pahn wiahki kupwuren Koht en keieu kesempwal nan arail mour, irail pahn anehki “peren mwuledek” oh anehki uhdahn mour mehlel. (1 Timoty 6:19) Kahrehda e wia kahrepe tohto me kitail en kiengki kupwuren Koht en keieu kesempwal nan atail mour.

7, 8. Soahng kalokolok dah kan me Sises lelohng, oh dahme kitail sukuhlikihsang met?

⁷ Mwurinte Sises ah wia kasalepen eh inoukihda pein ih ong wia kupwuren Koht, Tepil rapahki ahl en wiahiong ih en salelepekla. Iaduwen? E kihong ih kasongosong ni irair siluh. Nan ehu ehu irair oko Sises kin kihda sapwellime pasepeng sang nan Pwuhk Sarawi, ni ahl wehwe mwahu. (Madiu 4:1-​10) Ahpw pil kasongepe laud sang pil nanahk ong ih nan sapwellime mour en mwuhr​—kalokolok, kapailok, Sudas pangala ih, karaunlikamw akan, oh ih eri kamatala nin tuhke. Ahpw mehpwukat koaros sohte wiahiong sapwellimen Koht ohl lelepek en salelepekla. Ni eilepen sapwellime apwal, Sises kapakapki: “Kaidehkin nseneiet, pwe kupwuromwihte en pweida.” (Madiu 26:39, 42) Kitail soh konehng mwekidiki nan kapehdatail soangen mehn kalimeng wet, oh kahrehong kitail en pil “poadidiong kapakap ahnsou koaros”?​—Rom 12:12.

⁸ Ehi, pwe kitail en kak koasoanehdi dahme kesempwal nan atail mour, kitail anahne kaweid en Koht, ahpw mehlel ma kitail kin kin pelianda padahk mehlel oh irail akan me kin uhwong kupwuren Koht. Tamanda Nanmwarki lelepek Depit, ahpw me e peki kaweid sarawi ahnsou me ah imwintihti kan kin pelianda ih. Kitail pahn kilang met ni atail pahn tehk ire kan en Melkahka 143. Met pahn sewese kitail en wehwehkihla iaduwen atail pahn kak kakehlailiala atail ehukihong Siohwa oh pere pwe atail en wia kupwuren Koht en keieu kesempwal nan atail mour.

Siohwa Kin Ketin Karonge oh Sapengki Atail Kapakap Akan

9. (a) Mehnda ma Depit aramas dipan emen, ahpw dahme ah mahsen oh wiewia kan kasalehda? (b) Dahme kitail dehr pwangahkihdahki wiewia me pwung?

⁹ Mendahte ma Depit ni nan irair en dihp laud, e kin pwoson me Siohwa pahn karonge ah pekipek. Ni karakarahk e peki: “Maing Kaun [Siohwa], komw ketin karonge ei kapakap! Komw ketin karonge ei pekipek ngidingid ni sapwellimomwi pwung; komw ketin sapeng ie ni loaloapwoat! Komw dehr ketin kadeik ie, sapwellimomwi ladu menet; sohte emen me sohte dipe mwohn silangomwi.” (Melkahka 143:1, 2) Depit kin tamataman me ih aramas sohte unsek emen, ahpw ah mongiong kin unsekiong Koht. Kahrehda e kin koapwoaroapwoarki me e pahn ale pasepengpen ah kapakap nin duwen me pwung. Met soh kin wia mehn kakehlail atail koapwoaroapwoar? Mendahte me kitail sohte wahrong irair pwung en Koht, kitail kak koapwoaroapwoarki me e pahn ketin karonge kitail ma mongiongatail akan kin uhwong ih kelepw. (Eklesiasdes 7:20; 1 Sohn 5:14) Ni atail pahn kin poadidiong kapakap, atail ineng iei en “powehdi me suwed me mwahu” nan rahn suwed pwukat.​—Rom 12:20, 21; Seims 4:7.

10. Dahme kahrehda Depit kin lelohng irair kapwunod akan?

¹⁰ Depit pil kin mie ah imwintihti kan, duwehte kitail. E sohte lipilipil ma e kin lipilipseli pwehn ruksang Sohl, oh kin rukirukseli wasa me sohte aramas kin mihmi ie, de pil kin tuhwong sapwellime imwintihti kan ni ah wiahier nanmwarki, Depit kin lelohng ahnsou kapwunod ekei. E kin kawehwehda iaduwen irair pwukat ahr kin kahpwaliala ah mour mahsanih: “Ei imwintihtio koliedier . . . E ahpw keseiehlong nan imweteng rotorot ehu, . . . Ngeniet mwoahtohtalahr; oh I milahr nan pwunod laud.” (Melkahka 143:3, 4) Iaduwen​—kr kin lelohng irair en ahnsou me kin kahrehiong ahmw pepehm en duwehte ahn Depit?

11. Soangen ahnsou apwal dah kan me sapwellimen Koht ladu kan nan rahnwet kin lelohng?

¹¹ Kapwunod sang rehn imwintihti, oh apwal me kin kohsang pwupwudiong paien wehi, oh soumwahu laud oh suwed, oh pil soangen kahpwal kapwunod teikan kin pil kahrehiong ekei sapwellimen Koht aramas akan en me arail ngenen wiewia mwahu pahn sohrala sang ihr. Mie pak me likamwete arail mongiong kan kin sohla pehm wasa. Irail kin ngihl laudida oh koasoia: “Komw ketikihongieier apwal oh lokolok, ahpw komwi pahn pwurehng ketin kakehlaiehda . . . komw pahn ketin pwurehng kansenamwahwihiehla. (Melkahka 71:20, 21) Ia mwomwen sawas me re alehdi?

Iaduwen Kitail en Powehdi Kasongosong kan Sang Atail Imwintihtio

12. Iaduwen Nanmwarki Depit kin powehdi kahpwal oh kalokolok kan?

¹² Melkahka 143:5 kasalehda dahme Depit wia ahnsou me e lelohng irair keper oh apwal akan: “I kin tamanda rahn akan en mahso, I kin nennenla oh medemedewe omwi wiewia kan; I kin inengkihda ien nsenohkihda doadoahk en nin limemwihkan.” Depit kin tamanda sapwellimen Koht wiewia kan ong sapwellime aramas akan oh pil pein Depit ah lelohng irair me e kin pitsang nan ah apwal akan. E kin mowhndi oh medemedewe duwen Siohwa a kin ketin wia soahng kan pwehn kaindandiala mware. Ehi, Depit kin kolokol medemedewehn kesempwaliki sapwellimen Koht doadoahk kan.

13. Ni atail kin lel irair en kasongosong kan, iaduwen atail kin katamanda mehn kalemeng en ladu lelepek en mahs oh ahnsou wet kin sewese kitail en kak powehdi pein atail kahpwal akan?

¹³ Kitail soh kin tamanda sapwellimen Koht wiewia kan ohng sapwellime aramas akan? Iei! Met pil kin iangahki nting kan me pid ‘depwek kalaimwun en sounkadehde kan’ me mih mwohn ansoun Kristian kan. (Ipru 11:32-​38; 12:1) Pil Kristian keidi kan ni tepin Kristian kan ale kangoang “en tamataman rahn en mahs akan” oh apwal akan me re powehdi. (Ipru 10:32-​34) Ahpw iaduwen eksperiens en sapwellimen Koht aramas akan nan atail ahnsou, duwehte irail oko me koasoiepe kohda nan pwuhko Jehovah’s Witnesses​—Proclaimers of God’s Kingdom?a Koasoi kan nan pwuhko oh pil nan pwuhk teikan kin kak katamandohng kitail duwen Siohwa ah kin ketin sewese sapwellime aramas akan en kin kehlail ni arail doadoahk oh kin inepwidi, de re selidi, de irair mwersuwed lel irail, de pil selidi nan wasahn sounpei kan. Mie kahpwal akan irail diar nan sahpw akan me saminiminla pwehki mahwin, me duwehte Liberia, Burundi, Rwanda, oh wasa me mahs adaneki Yugoslavia. Ahnsou me moromor kin wiawi, sapwellimen Koht aramas akan kin kanengamah, pwe ren kolokol kehlail arail ehu ong Siohwa. Lime kin ketin kolokol irail oko me kin wiahki kupwuren Koht en keieu kesempwal sang soahng koaros nan arail mour.

14. (a) Ia ehu mehn karasepe me kasalehda me Koht ketin sewesehda aramas emen me anehki irair me duwehte atail? (b) Dahme ke koledi sang mehn kalemeng wet?

¹⁴ Ele komw pahn kak koasoia me komwi saikinte lelohng wiakaula duwehte met, oh komw sohte kasik me soahng pwukat pahn lelohng komwi. Sapwellimen Koht utuht ong sapwellime kan, kaidehkinte ahnsou en irair me ekei kin wiahki irair apwal akan. E pil kin ketin utungada aramas akan nan pil irair akan me kitail kin wiahki irair me kin lelohng aramas koaros. Iet ehu karasepe. Komw kak kasawiada kilel me mih poweht oh e kin katamandohng uhk duwen sapwellimen Koht wiewia kan ong sapwellime kan? Met pwarada nan The Watchtower en December 1, 1996. Komw wadekehr duwen Penelope Makris? Ma saikinte, a komw soh wadek? Komw kak tamanda duwen apwal akan me kohsang rehn mehn mpe kan me e powehdi, duwen eh peiong apwal en soumwahu en paliwere, oh duwen nanti me e wia pwehn kak mihmihte nan doadoahk en kalohk kaukaule? Oh iaduwen kamwahu kan me e lelohng Mytilene? Me kesempwal wasaht, iaduwen ke kin kilang mehn kalemeng pwukat oh wiahki mehn sawas ekei ong kitail en kak kihong wia kupwuren Koht en keieu kesempwal nan atail mour?

15. Ia ekei wiewia en Siohwa kan me kitail en doudouloale?

¹⁵ E wia me kakehlapatail ni atail pahn kin doudouloaleh duwen sapwellimen Siohwa wiewia kan, duwehte me Depit kin wia. Ni ah ki ketin koasoanehdi sapwellime koasoandi kan. Siohwa kin ketin ketkihda irair en kamour sang ni pwoulahn sapwellime ohl, oh kaiasada oh ah linganlahu. (1 Timoty 3:16) E ketin koasoanehdi sapwellime Wehin lahng, kesehsang Sehdan oh nah ngehn saut akan sang nanleng, oh kapwurehda kaudok mehlel nan sampah. (Kaudiahl 12:7-​12) E pil kauwada paradais en ngehn oh ketikihda kapai ong sapwellime kan ni ah katohtohirailla. (Aiseia 35:1-​10; 60:22) Sapwellime aramas akan nan ahnsou wet wiewia kaimwseklahn kadehde mwohn Kahn Kamakam Laud ah pahn leledo. (Kaudiahl 14:6, 7) Ehi, soahng tohto me kitail pahn doudouloale.

16. Dahme kangoang kohwong kitail en keieu nsenohki, oh dahme pahn wia mwekid laud ehu ong atail mehn kataman?

¹⁶ Atail nsenohki doadoahk en nin limen Koht akan oh sohte kedirepwikihla dahme aramas en kainpwah kin nannantiong wiahda pahn kin katakataman ong kitail me kehl en Siohwa mehkot me kitail sohte kak soikala. Doadoahk pwukat sohte kin pidte doadoahk en kepikipikda kan nanleng oh pil nan sampah. (Sohp 37:14; Melkahka 19:1; 104:24) Sapwellime doadoahk kapwuriamwei kan pil pidada kasalehdeklahn sapwellime aramas akan sang pahn kanaudok, nin duwen me sansalasang dahme e ketin wiahiong sapwellime aramas pilipil akan ni ahnsou en kawao.​—Eksodus 14:31; 15:6.

En Wehwehki Mehnia Ahl Ken Keid Loale

17. Ia uwen Depit ah kamehlele me Siohwa wie ieias, oh iaduwen atail kak ale mehn kamehlelepe ong kitail sang wasaht?

¹⁷ Depit kin kapakapki me pilen mour nan paliwere en dehr madada oh mahsanih: “I kapahda pehi kat ni ei kapakapohng komwi; ngeniet tihwohkinkomwilahr rasehngalahr pwehl madekeng e kin anahne pihl. Maing Kaun [Siohwa], komw ketin kupwure ie met! Solahr ei koapwoaroapwoar. Komw dehr ketin rirweisang ie, pwe I dehr iang irail kan me kin kohdihla nan sapwen me mehlahr akan.” (Melkahka 143:6, 7) Nin doken Depit ah wia aramas dipan emen, e kin ese me Koht ketin mwahngih irair me e mih loale. (Melkahka 31:7) Pil duwehte kitail, ekei pak kitail kin pehm me atail irair en pali ngehn kin inenen tikitikla. Ahpw met sohte wehwehki me e solahr kak pwurehng mwahula. Siohwa, me kin sounkaronge kapakap akan, kak mwadang apwalihkitailla sang ni ah pahn doadoahngki elder kan, de pil oaralap ieu sang nan The Watchtower de padahk ehu nan mihting me koasoanehdi oh konehng ong atail irair kan.​—Aiseia 32:1, 2.

18, 19. (a) Ia pahn atail ineng en ale kaweid sang Siohwa? (b) Dahme kitail dehpa kalikamwe?

¹⁸ Atail likih Siohwa kin kamwekid kitail kehliki ih: “Komw ketin katamankin ie nimenseng koaros duwen sapwellimomwi limpoak poatopoat, pwe I kin koapwoaroapwoarkin komwi. Ei tungoal kapakap akan kin kohdawohng rehmwi; komw ketin kasalehiong ie ahl me I pahn keid ie.” (Melkahka 143:8) Iaduwen, Siohwa kahrehong Sister Makris en pahtoula, ni ah kelepwla ni kisin dekehn Krihk kiso? Eri, e pahn ketin likidmeliehla ieu ni omw kin keieu kesempwaliki kupwure nan omw mour? Tepil oh ienge kan kin men kalomwatiala de pil kauhdi mahs atail doadoahk en kalohki Wehin Koht. Sohte lipilipil ma kitail wia atail doadoahk wasa me kaudok mehlel kin mweimwei ie de inepwi, atail ehupene nan kapakap kin utung dahme Depit ketin peki me mahsanih: “Maing Kaun [Siohwa], I patohdo pahn kupwuromwi pwe komwi en ketin sinsilei ie; komw ketin kapitiehla sang ei imwintihti kan.” (Melkahka 143:9) Atail meleilei sang apwal en ngehn akan pahn kin pidada atail en rukila nan wasa rir rehn Wasa Lapalapie.​—Melkahka 91:1.

¹⁹ Atail inoukihda dahme keieu kesempwal kin poasoanda teng. (Rom 12:1, 2) Kitail en perei kitail sang soahng kan me sampah kin men kitail en leme me iei me keieu kesempwal. Ahnsou koaros kin kasalehda nan irair en ahmw mour koaros dahme keieu kesempwal ong uhk​—iei en wia kupwuren Koht.​—Madiu 6:10; 7:21.

20. (a) Dahme kitail sukuhliki duwen Depit sang nan Melkahka 143:1-9? (b) Iaduwen Kristian en rahnwet kin alasang irair en nan kapehd en Depit?

²⁰ Tepin iretikitik duwau en Melkahka 143 kin kasalehda mwahu duwen ahn Depit ah ehuiong Siohwa. Ahnsou me e kin tuhwong ah imwintihti kan, e kin sohpeiwong Siohwa oh ale kaweid. E kin wehkada audepen mongiongi oh kin rapahki ahl en weweidwei ni pwung. Met pil duwehte irair en irail luwen me keidi kan nan sampah oh iengarail akan. Irail kin kesempwaliki arail ehuiong Siohwa oh kin ale kaweid sang reh. Irail kin keieu kesempwaliki wia kupwuren Koht, mendahki ma irail ale apwal akan sang rehn Tepil oh sang ni sampah.

21. Dahme e kesempwaliki ong kitail en kasalehda mehn kalemeng mwahu ma kitail padahkiong mehteikan dahme keieu kesempwal nan atail mour?

²¹ Aramas rar kei me kin onop Paipel rehn Sounkadehde kan en Siohwa anahne pohnese me wia kupwuren Koht iei me keieu kesempwal. Kitail kak sewese irail en wehwehki met ni atail pahn koasoi ong irail irelaud 13 en pwuhk me ede Knowledge That Leads to Everlasting Life, me kin kasalehda mouren padahk me pid duwen en wiahla sounwia Mahseno.b Ni mehlel, irail pil anahne en kilang kitail pil kin kapwaiada dahme kitail padahkiong irail. Ni ahnsou mwadang ehu, re pahn pil esehla ahlo me re pahn keid loale. Ni ahnsou me irail me rar kei arail pein esehier dahme uhdahn pahn keieu kesempwal nan arail mour akan, me tohto pahn mwekidki en kahkala mwowe oh inoukihda arail mour oh pepdaisla. Mwurin mwo, mwomwohdiso kak sewese irail en tengediong kekeid wei nan alen mour.

22. Peidek dah kan me kitail pahn tehkpene nan artikel en mwhr?

²² Aramas tohto kamehlele me kupwuren Koht me uhdahn pahn keieu kesempwal nan arail mour. Ahpw iaduwen, Siohwa kin kalaudehla sapwellime elen padahk ong sapwellime ladu kan pwe ren wia kupwure? Kamwahu dah kan me met pahn kahrehda? Peidek pwukat pahn pwarada oh pil iangahki iretikitik kesempwal pwukat, Melkahka 143:10, nan artikel en mwuhr.

[Nting tikitik kan me mi pah]

Ia Ahmw Pasepeng?

◻ Ma kitail kapwaiada kaweid en Pilipai 1:9, 10, iaduwen met pahn sewese kitail en wehwehki dahme keieu kesempwal nan atail mour?

◻ Iaduwen Sises kin kaselehda dahme keieu kesempwal nan eh mour?

◻ Dahme kitail kak sukuhliki sang ahn Depit wiewia kan me pahn sewese kitail ahnsou me kitail lelohng kasongosong?

◻ Iaduwen Melkahka 143:1-9 pahn kak sewese kitail rahnwet?

◻ Dahme pahn keieu kesempwal nan atail mour?

[Kilel nan pali 22]

Ahn Depit wiewia kan kasalehda me e kin likih Siohwa

[Credit Line]

Reproduced from Illustrite Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s