Kumwail Dadaurete Amwail Limpoakong Riatail Brother kan!
“Kumwail dadaurete amwail limpoakong riatail brother kan.”—IPRU 13:1.
1. Dahme komw pahn wia pwen dehr mweidong kisiniei en kunla ni pwong kopou ehu, oh pwukoah dah me kitail ahneki me duwehte karasaras wet?
LIKIN ihmw me inenen kopou. Ihte, wasa me karakar nan imwomw iei kisiniei nan ahmw wasahn kisiniei. Mouren aramas akan kin liki komwi en dehr mweidong kisinieio en kunla. Komw pahn mwohndi oh kilang kisiniei kunla oh kilang mwoalus wiahla pehs? Uhdahn soh. Komw pahn nantiong kihong tuwi nan kisinieio pwehn dehr kunla. Duwehte emen emen kitail koaros, kitail kin ahneki ehu pwukoah me kin pid “kisiniei” ehu me kesempwal sang met—iei kisiniei me sohte konehng en kunla nan mongiongitail kan—limpoak.
2. (a) Dahme kahrehda kitail kak nda me limpoak kin loula ni imwen rahn akan? (b) Ia uwen kesempwal en limpoak ong Kristian mehlel akan?
2 Kitail mih nan ahnsou ehu me, nin duwen me Sises kohpada mahs mahsie, limpoak en irail kan me dene irail Kristian pahn loula sampah pwon. (Madiu 24:12) Sises koasoiada duwen soangen limpoak me keieu kesempwal, iei limpoak ong Siohwa Koht oh sapwellime Mahsen, iei Paipelo. Soangen limpoak teikan pil kin tikitikla. Paipel kohpada me ni “imwen rahn akan,” aramas tohto pahn “sempoak.” (2 Timoty 3:1-5) Met inenen mehlel! Peneinei kan anahne ahneki limpoak, ahpw akamai oh pei—kin kalap wiawi. Ahpw nan sampah wet me limpoak sohte mie, Kristian akan kin alehdi kaweid en limpoakpene oh pil limpoak ni soh-roporop, oh kesempwalki mehteikan laudsang kitail. Kitail anahne kasalehda limpoak wet ni sansal pwe koaros en kak kilang, pwehn wiahla kilel en mwomwohdisohn Kristian mehlel ehu.—Sohn 13:34, 35.
3. Dahkot limpoak ong riatail Kristian kan, oh ia wehwehn en dadaurete amwail limpoak?
3 Wahnpoaron Pohl mwekidki ngehn sarawi en ntinghdi met: “Kumwail dadaurete amwail limpoakong riatail brother kan.” (Ipru 13:1) Nin duwen me emen me sukuhl laud kasalehda, lepin lokaiahn Krihk me kawehwe “limpoak ong riatail kan” (phi·la·del·phiʹa) “kin wehwehki limpoak, kasalehda kadek, kihda ahmw sawas.” Oh ia wehwehn ahn Pohl koasoi, ni ahnsou me e nda me kitail en dadaurete atail limpoak? E kin wehwehki “en dehr loula.” Met kin wehwehki, e sohte itar en pehm limpoak ong riatail brother kan; ahpw kitail anahne mweidong atail limpoak en sansalda. Pil, kitail anahne mweidong limpoak wet en sohte sohla, sohte mweidong en loula. Apwal? Ehi, ahpw sapwellimen Siohwa ngehn sarawi kak sewese kitail en kakairada atail limpoak ong riatail brother kan oh kolokolte atail limpoak. Kitail pahn onopki ahl silu en kainengiada nan mongiongatail kan limpoak wet.
Kaselehda me Komw Wehwehki Irair en Iengomw kan
4. Dahkot en ahneki pepehm ong mehteikan?
4 Ma ke men kalaudehla ahmw limpoak ong riamwail Kristian brother oh sister kan, ke anahne mahs ahneki pepehm ong irail, poakehla irail nin duwen kasongosong kan oh kahpwal akan me irail kin lelong irail nan ahr mour. Wahnpoaron Piter koasoi duwen ire wet ni ahnsou me e ntingihdi: “Eri, kumwail en kin soangen lamalamteieu oh kupwurteieu; kumwail limpoakpene nin duwen Kristian men, oh kadekpene oh aktikitikpene.” (1 Piter 3:8) Lepin lokaiahn Krihko me kin kadoadoahk wasaht ong “ahneki pepehm ong mehteikan” kin wehwehki “iang ahr lokolok kan.” Emen me samani Paipel en Krihk mahsanih: “Lepin lokaia wet kin wehwehki en ahneki soangen madamadau me pepehm en aramas teikan pahn duwehte pein atail pepehm.” Ihme kahrehda kitail anahne kasalehda irairen wehwehki arail irair kan oh mweidong pepehm en aramas teikan en wiahki pein atail. Emen ladu en Siohwa me lelepek, ahpw mahlahr koasoia: “Wehwehki irair en mehteikan kin wehwehki omwi kalokolok kan me mih nan ai mongiong.”
5. Iaduwen kitail esehki me Siohwa kin poakepoake aramas akan?
5 Siohwa sapwellimaniki soangen pepehm en limpoak ong mehteikan? Uhdahn! Karasepe ehu, kitail wadek duwen kalokolok kan me sapwellime aramas mehn Israel kan kin lelong: “nan ahr lokolok koaros, pil kin wia lokolok ong ih.” (Aiseia 63:9) Siohwa sohte ihte kilang ahr kapwal kan; ahpw e kin pehm en sapwellime aramas akan ahr kahpwal akan. Ia uwen laud sapwellime pepehm kan ong sapwellime aramas akan kin sansalda sang pein sapwellimen Siohwa mahsen kan, me ntingihdi nan pwuhken Sekaraia 2:8 (New World Translation): “Me kin doahke iuk pil doadoahke pwoaren meseiet.”a Soun nuhs men koasoia duwen iretikitik wet: “Kutohr en mahs iei mehkot me oaretik oh anahne epwel keneinei nan paliwar en aramas; oh nan pwoaren mahs—iei wasa me marain pahn pidelong pwehn kahrehong emen en kak kilang—iei wasa me keieu kesempwal en pwoaren mahs. Sohte mehkot mwahu sang met me kak kasansalehda sapwellimen Siohwa epwel mwahu ong aramas akan me e kin poakong.”
6. Iaduwen Sises Krais pehmada anahn en mehteikan?
6 Sises pil kasansalehda me e kin poakepoake aramas akan. Ahnsou koaros e mwekidki “kupwurohkinirailla” pwehki ienge aramas akan me kin soumwahu de nsensuwed. (Mark 1:41; 6:34) E kasalehda me ahnsou me aramas akan sohte kin kadekong rie me keidi kan, e pahn pil duwehte arail sohte kin kadekong pein ih. (Madiu 25:41-46) Oh nan rahn pwukat, nin duwen atail “samworo lapalap” me kin ketiket nanleng, ih emen me kak “pehmada atail tungoal luwet akan.”—Ipru 4:15.
7. Iaduwen ahneki irair en pehmada anahn en mehteikan kak sewese kitail ni ahnsou me emen brother de sister kalingeringerih kitail?
7 “Pehmada atail tungoal luwet akan”—koasoi wet kaidehn mehn kamweit ehu? Kitail pil men wia met ong aramas teikan. Ahpw, ni mehlel e mengei en kilikilangte luwet en aramas teikan. (Madiu 7:3-5) Ahpw, ma ehu rahn, emen brother de sister pahn kalingeringerihuhkada, dahme ke soh medemedewe duwen met? Medewehla me pein uhk me mih nan soahngen irairohte me brother de sister menet kin lelong. Ke kak nda me ke sohte pahn pil wiahda sapwung—de mwein sapwung suwed sang met? Kitail en pehmada arail irair akan, met pahn kak sewese kitail en duwehte Siohwa me sohte kin kakos ahpw e kin ‘tamanda me kitail duwehte pwelpwar.’ (Melkahka 103:14; Seims 3:17) E ese uwen me kitail kak wia. E sohte kasik me kitail pahn wia daulihla dahme kitail kak ohng. (Pil kilang 1 Nanmwarki 19:5-7.) Kitail koaros en pehmada irair kan en mehteikan.
8. Iaduwen atail pahn mwekid ni en brother men de sister men lelong kahpwal?
8 Pohl ntingihdi me mwomwohdiso duwehte paliwar ehu, kakon tohto mie me anahne doadoahkpene. E kapataihong: “Ma kakon en war ehu kin medekla, kakon koaros kin iang medekla.” (1 Korint 12:12-26) Kitail anahne pil pehmada irair en irail kan me kin lelong kahpwal akan. Elder kan me kin tiengala mwowe en wia met. Pohl ntingihdi: “Ni emen eh kin luwetala, I pil kin luwetkhila; ni emen eh kin sapwungala wiahda dihp, I pil kin nsensuwedkihla.” (2 Korint 11:29) Elder kan oh sounapwalih en mwemweit kan kin alasang Pohl. Nan ahr padahk kan, nan ahr doadoahk en apwapwalih tohnmwomwohdiso kan, oh pil nan ahr kin tenekih sapwung kan, irail kin nantiong kasalehda pepehm ong mehteikan. Pohl koasoia: “iang sengiseng rehn me kin sengiseng kan.” (Rom 12:15) Ni ahnsou me sihpw kan kin pehmada me silipen sihpw kan kin poakepoake irail, oh ese uwen me irail kak ohng, oh wehwehkihla ahr kahpwal akan, sihpw kan pahn perenkihda ale kaweid oh kaiahn me anahn. Irail pahn perenki iang mihding kan, pwe irail ese me re pahn kak diarada ‘kommoalpen ngenirail kan.’—Madiu 11:29.
Kasalehda Kalahngan
9. Iaduwen Siohwa kin kasalehda me e kin kalahnganki irair mwahu kan me kitail kin ahneki?
9 Ahl kariau en kakairada limpoak ong riatail brother kan iei en kasalehda atail kalahngan. En kalahnganki mehteikan, kitail anahne medemedewe duwen ahr irair mwahu kan oh ahr nannanti kan. Ni ahnsou me kitail kin wia met, kitail kin kahlemengih Siohwa. (Episos 5:1) Rahn koaros e kin mahkong dihpatail tikitik kan. E pil kin mahkong dihpatail laud kan ma kitail kasalehda koluhla mehlel. Oh ni ahnsou me e mahkong kitail dihpatail kan, e sohte kin pwurehng medemedewe duwen dihp pwukat me kitail wiahda. (Esekiel 33:14-16) Sounmelkahka idekda: “Ma komw pahn ketin kilelehdi dipat akan, ihs me kak pitsang sapwellimomwi kadeik?” (Melkahka 130:3) Siohwa kin medemedewe duwen wiewia mwahu kan me kitail kin wia ong atail papahiong ih.—Ipru 6:10.
10. (a) Dahme kahrehda e keper ong pwopwoud kan en sohla kasalehda kalanganki emen emen ira? (b) Dahme emen anahne wia ma eh kalahnganki eh pwoudo kin tikitikla?
10 E keieu kesempwal en wia met nan peneinei. Ni ahnsou me pahpa oh nohno kan kin kasalehda me re kin kalahnganki pein emen emen ira, ira kin wia kahlemeng mwahu ong ahr peneinei. Nan atail ahnsou me pwopwoud kan kin mwadang ohla, e inenen mengei ong ohl pwopwoud kan de lih pwopwoud kan en kasalehda sapwung kan de kalaudehla sapwung en emen pwoud oh pwaindi irair kaselel kan en emen pwoud. Soangen madamadau wet kin kawehla selen pwopwoudo, oh kin imwikihla wiahla katoutou ehu. Ma ahmw kalahnganki ahmw pwoud kin tikitikla, pein idek rehmw, ‘Uhdahn sohte irair mwahu en ahi pwoud?’ Medewehla kahrepen ahmw tepiada poakohng ih oh pwoudkihdaki. Ire pwukat me kahrehong uhk en tepiada poakohng aramas menet sohlahr? Soh douluhl; eri nantiong en kalahnganki ahmw pwoud, oh kasalehda kalahngan ni omw lokaia kan.—Lepin Padahk 31:28.
11. Pwe limpoak en nanpwungen pwopwoud kan en mehlel, soangen wiewia dah kan irail pahn anahne liksang?
11 Kasalehda kalahngan pil kin sewese pwopwoud kan en dehr mweidong ahr limpoak en mwalaun. (Pil kilang 2 Korint 6:6; 1 Piter 1:22.) Soangen limpoak wet, mwekidki kalahngan me kohsang mongiong, sohte pahn mweidohng ira en doadoahngki lokaia kamedek kan oh kasaro emen emen oh sohte pahn pohnsehsehla ahn emen pwoud de sohte koasoiapene rahn kei, oh re sohte pahn pei. (Episos 5:28, 29) Ohl pwopwoud oh lih pwopwoud men me kin ni mehlel kasalehda kalahngan pahn kasalehda wahu. Irail wia met kaidehn mwohn aramas te, ahpw ahnsou me Siohwa kin kilikilang—met wehwehki, ahnsou koaros.—Lepin Padahk 5:21.
12. Dahme kahrehda pahpa oh nohno kan anahne kasalehong neirail seri kan ahr kalahngan?
12 Seri kan pil men ahr pahpa oh nohno kan en nsenohkin irail. Met sohte kin wehwehki me pahpa oh nohno kan anahne kapinga neirail seri kan, nohn daulihla, ahpw re anahne kapinga neirail seri kan ong soahngen irair kaselel kan oh wiewia mwahu kan me re kin wiahda. Tamanda sapwellimen Siohwa kahlemeng mwahu ni ahnsou me e kasalehda e kupwurki sapwellime Ohlo Sises. (Mark 1:11) Tamanda, kahlemeng en Sises nin duwen “kaun” emen nan karasaraso. E kapinga ni pahrek ‘ladu riemen me mwahu oh lelepek’, edetehn mie wekpeseng ong dahme ira alehdi sang ih oh pil mie wekpeseng laud ong dahme ira koaros wiahda. (Madiu 25:20-23; pil kilang Madiu 13:23.) Pahpa oh nohno loalokong kan kin rapahki ahl akan en kasalehda kalahngan ki dahme emen emen neirail seri kan kin wiahda oh irair kaselel kan oh ahr koahiek kan. Ahpw ni ahnsowohte, irail sohte kin kasalehong neirail seri kan me irail nohn kesempwalikihla kilang neirail seri kan en pweida nin duwen re kin wia, pwehki, met kak kahrehong neirail seri kan en men siaiong mehteikan. Irail sohte men neirail seri kan en mwakarada oh mworusala.—Episos 6:4; Kolose 3:21.
13. Ihs me kin wia kahlemeng mwahu en tiangala mwowe ong kasalehda kalahnganki emen emen tohnmwomwohdiso kan?
13 Nan mwomwohdiso en Kristian, elder kan oh sounapwalih en circuit kan kin wia kahlemeng mwahu en tiengala mwowe ong kasalehda ahr kalahngan ki emenemen tohnmwomwohdiso me kin iang pwihn en Koht. Ahr pwukoa inenen apwal, ni ahnsou me re kin pwukoahki pwukoa toutou en kihda kaiahn me anahn ni ahl me pwung, oh ki ngehnen opampap, kapwungala irail kan me wiahda sapwung, oh kihda kaweid kehlail ong irail kan me anahne. Iaduwen irail kin katoupahreki pwukoa pwukat?—Kalesia 6:1; 2 Timoty 3:16.
14, 15. (a) Iaduwen Pohl kasalehda tohpahrek ni ahnsou me e kin kihda kaweid kehlail? (b) Iaduwen Kristian elder kan kak katoupahreki anahn en kapwungala sapwung kan? Kihda karasaras ehu.
14 Kahlemeng en Pohl kin kihda sawas laud ong kitail. Ih emen sounpadahk, elder oh sounapwalih en tohnmwomwohdiso me inenen deila. E anahne sewese mwomwohdiso kan me kin lelong kahpwal laud, ahpw e sohte masak oh pweiehk en kihda kaweid ni ahnsou me konehng. (2 Korint 7:8-11) Ma kitail kin kousapahlih doadoahk en Pohl, kitail pahn diarada me e sohte kin kalap kihda kaweid kehlail—ihte ahnsou me anahn de konehng. Ni ahl wet e kasalehda erpit me kohsang powe.
15 Ma kitail pahn karasaiong doadoahk en elder men duwehte koul ehu, eri, kaweid kehlail pahn rasehng nohd ehu me pahn iang koulo. Nohd wet inenen kaselel ma kadoadoahk pwung nan koulo. (Luk 17:3; 2 Timoty 4:2) Medewehla, ma koul ehu pahn ahneki ihte nohdo, oh ke pahn pwurpwurehng rong nohdohte. E uhd pahn katairongla. Duwehte met, Kristian elder kan pahn anahne katoupahrekih arail padahk kan oh audehki soangsoangen padahk kan. Irail sohte pahn ihte kapwungala kahpwal akan. Ahpw, ahr padahko pwon kin kekeirada tohnmwomwohdiso kan. Duwehte Sises Krais, elder kompoak kan kin tehk mahs en kapinga, kaidehn kauwe sapwung kan en sounkalohk kan. Irail kin kalahnganki doadoahk laud en iengarail Kristian akan. Irail kin liki, me emen emen sounkalohk kan kin wia uwen me re kak ong pwehn papah Siohwa. Oh elder kan kin mwadang kasalehda met ni lokaia kan.—Pil kilang 2 Deselonika 3:4.
16. Dahme imwikihla ahn Pohl kalahnganki iengarail Kristian akan?
16 Ni soh pekidpe, pali moron en Kristian akan me Pohl papah ese me Pohl kin kalahngankin irail oh poakepoake irail. Iaduwen kitail ese met? Kilang arail pepehm ong Pohl. Irail sohte masak ih, mendahki e ahneki pwukoah laud. Soh, Pohl emen me kin kasalehda limpoak oh mengei en tuhwong ih. Ni ahnsou me e kohkohlasang ehu wasa, elder kan en wasa ‘pwoalehdi Pohl, sengiseng oh metik’! (Wiewia 20:17, 37) Elder kan oh kitail koaros inenen kalahnganki—me kitail ahneki kahlemeng en Pohl oh kak alasang ih! Ei, kitail en kasalehda atail kalahngan ki riatail brother kan.
Wiewia kan en Kadek-Limpoak
17. Ia ekei wiewia mwahu kan me kak imwikihla pwehki tohnmwomwohdiso kan kin kasalehda kadek nan mwomwohdiso?
17 Wiewia ehu me pahn kak kainengiada limpoak ong riatail brother kan iei wiewia en kadek. Nin duwen me Sises mahsanih, “Kihwei kaperen sang ale.” (Wiewia 20:35) Edetehn kitail kin kihwei ni pali ngehn, pali war, de atail ahnsou oh kehl, kitail sohte ihte pahn kaperenda mehteikan, ahpw pein kitail pahn peren. Nan mwomwohdiso, kadek kin kainengiada mehteikan en pil kasalehda kadek. Wiewia kadek pahn kak kamwekid mehteikan en pil kasalehda kadek. Oh mwuhr, kadek ong riatail brother kan pahn kekeirada nan mwomwohdiso!—Luk 6:38.
18. Ia wehwehn “kadek” nin duwen me ntingihdi nan pwuhken Maika 6:8?
18 Siohwa kangoangeki sapwellime aramas akan, Mehn Israel, en kasalehda kadek. Nan Maika 6:8 kitail wadek, “Kauno ketin padahkihongkitailehr dahme mwahu. Eri, iet me Kauno kin ketin kupwurki kitail en wia: kitail en wiahda me pwung; kitail en kin kasalehda atail limpoak poatopoat (kadek-limpoak), oh peikiong atail Koht ni karakarahk. Ia wehwehn “kadek-limpoak”? Lepin lokaiahn Ipru me kin kadoadoahk wasaht ong “kadek” iei cheʹsedh me kin pil kawehwehdiong ni lokaiahn wai “mahk-kalahngan.” Nin duwen pwuhk wet me oaralap koasoia: The Soncino Books of the Bible, lepin lokaia wet ahneki “wehwe loalsang lepin lokaiahn waio, mahk-kalahngan. E kin wehwehki ‘mahk-kalahngan ni wiewia kan,’ pein ahn aramas wiewia kadek-limpoak, kaidehn ongete ong aramas semwemwe kan, ahpw ong aramas koaros.” Pil emen me sukuhl laud, koasoia me lepin lokaia wet cheʹsedh kin wehwehki “limpoak me sansal sang ni wiewia kan.”
19. (a) Ni ahl dah kei kitail kak pein kasalehda atail kadek ong mehteikan nan mwomwohdiso? (b) Kihda ehu karasaras ong iaduwen Kristian kan kasalehong uhk limpoak.
19 Atail limpoak ong riatail Kristian kan kaidehn mehkot me apwal en wehwehki. Limpoak ong riatail Kristian kan iei mehkot me tengeteng. Ihme kahrehda, kitail anahne rapahki ahl akan en wia mehkot mwahu ong riatail Kristian ohl oh lih kan. Kitail anahne alasang Sises, me ahnsou koaros sohte kin awih aramas akan en pwarwohng ih peki sawas, soh, ahpw e kin pak tohto kohla rehn aramas akan pwehn sewese irail. (Luk 7:12-16) Medemedewe keieu duwen irail akan me anahne sawas laud. Emen mah de soumwahu anahne emen en mwemweitala reh de e anahne sawas sang emen en kohla wasakis wiahda mehkot ong ih de netinet? Emen ‘sepwoupwou’ anahne ahmw ahnsou? Mie emen me pahtouki mehkot oh eh anahne emen en kamweitala ih? Ni uwen me kitail kakong, kitail en koasonehdi atail ahnsou en kasalehda wiewiahn kadek ong riatail Kristian kan. (Sohp 29:12; 1 Deselonika 5:14; Seims 1:27) Dehr manokehla me nan mwomwohdiso ehu me audaudki aramas soh-unsek tohto, ehu wiewiahn kadek me keieu kesempwal iei mahk—en dehr kolokolte ahmw lingeringer de kouimwintihti, edetehn mie ahmw pwung en kaulimki met. (Kolose 3:13) Ma kitail pahn mwadang kasalehda mahk, met pahn kak sewese tohnmwomwohdiso kan en miniminpene oh sohte pahn mie liaktohrohr, kouimwintihti, akamai, me pahn rasehng likou wisikisik pahn pwaindi oh kakunla kisiniei en limpoak ong riatail Kristian kan.
20. Iaduwen kitail koaros anahne en kaukaule kasawiahda pein kitail?
20 Kitail koaros en nantiong kolokolte limpoak wet nan mongiongatail. Kitail en ahnsou koaros tehk pein kitail. Kitail kin kasalehda atail limpoakong mehteikan? Kitail kin kasalehda atail kalahnganki mehteikan? Kitail kin kasalehda atail kadek ong mehteikan ki wiewia kan? Ma kitail kin wia met, atail limpoak pahn sansalda oh sewese riatail Kristian kan edetehn sampah wet me inenen sempoak. Eri, kitail koaros en “dadaurete atail limpoakpenehn Kristian akan rehn Krais”—nan ahnsou wet oh nan ahnsou kohkohlahte!—Ipru 13:1.
[Nting tikitik me mi pah]
a Ekei kawehwehn Paipel kan kin kawehwehda iren Paipel wet me meno me kin doake sapwellimen Koht aramas akan kin doake kaidehn silangen Koht ahpw pwoaren mesen Israel de pein pwoaren mese. Sapwung en kawehwe wet kohsang soun nting en mahs, me kin kawukila iren Paipel pwung kan pwehki re leme me iren Paipel pwukat sohte kasalehda wahu. Sang ahr kin wia met, irail mwomwen katikitikiala sapwellimen Siohwa limpoak ong aramas akan.”
Ia Ahmw Madamadau?
◻ Dahkot limpoak ong riatail brother kan, oh dahme kahrehda kitail anahne en kalaudehla limpoak wet?
◻ Iaduwen ahneki irairen pepehm ong riatail brother kan, kin sewese kitail en kolokolte atail limpoak ong riatail brother kan?
◻ Iaduwen kalahngan kak sewese kitail en kasalehda limpoak ong riatail brother kan?
◻ Iaduwen wiewiahn kadek kin sewese limpoak ong riatail brother kan en pweida nan mwomwohdiso en Kristian?
[Koakon nan pali 27]
Wiawiahn Limpoak
Sounpahr kei samwalahro ako, mie emen ohl me kin onop Paipel rehn Sounkadehdehn Siohwa kan erein ahnsou kis, ahpw saikinte nohn kamehlele me mie limpoak en riatail brother kan. E ese me Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:35) Ahpw e apwaliki en kamelele met. Ehu rahn, e pein kilang limpoak en Kristian wet.
Edetehn e mih nan wheelchair, ohl menet seilokla doh sang ihmwe. Nan Pedlehem, Israel, e iang towehda ehu mihding en mwomwohdiso. Emen Sounkadehdehn Arab kangoangehkin emen Sounkadehde me mwemweitla wasao en pweidi reh oh rehn eh peneinei ni pwongo, oh tohnsukuhl en Paipel menet pil ale luhk wet. Mwohn e meirla, tohnsukuhl en Paipel menet idek rehn ohlo (me luke ih) ma e kak pedoila liki ni menseng pohn palangk en ihmwo pwehn kak kilang dakadahn ketipino. Brothero padahkiong ih me e sohte kak wia met. Mandahn rahno, brother en Arabo kawehwehda ia kahrepe. Sang emen sounkawehwehn ah lokaiao, e koasoiada me ma mehn mpe kan pahn ese me e mweidong mehn Suhs akak en pweidi reh—pwe Tohnsukuhl en Paipel menet mehn Suhs men—irail pahn isikila imwe iangahki ih oh eh peneinei. Tohnsukuhl en Paipel menet ekis pwonopwonki oh idekda, “Eri, dahme kahrehda ke mweidong ie en pweidi, pwe met pahn kak kahrehong uhk en lelong apwal?” Brother en Arabo menet sohte doadoahngki emen sounkawehwe en kawehwe ah lokaiao, ahpw e kilang ohlo oh nda, “Sohn 13:35.”
Tohnsukuhl en Paipel menet inenen pwuriamweiki duwen limpoak wet. Mwurin ahnsou kis.
[Kilel nan pali 29]
Wahnpoaron Pohl kin kadek oh kin kasalehda kalahngan oh met karehong aramas teikan en mengei ki koasoiong ih