Momour Ong Ni Ahnsou Wet De Ong Ni Ahnsou Kohkohdo?
“Atail koapwoaroapwoar me komourkitailla.”—ROM 8:24.
1. Ia padahk kan en Epicurus, oh iaduwen ahr padahk kan kin doake mouren ekei Kristian akan?
WAHNPOARON POHL ntingihwohng Kristian akan nan Korint: “Dahme ekei kumwail ndindahki dene me melahr akan sohte pahn iasada?” (1 Korint 15:12) Ni sansal, padahk keper kan en ohl loalokong en mehn Krihk Epicurus me tepida kasaminehla madamadau en Kristian akan ni tepin senturi. Pohl koasoiaiong irail duwen ahn Epicurus padahk me dene: “Kitail en kin kamakamadipwte, pwe lakapw kitail pahn mehla.” (1 Korint 15:32) Pwehki aramas akan me kin kamehlele padahk kan en Epicurus, irail sohte kin kamehlele koapwoaroapwoar en kaiasada, ihme kahrehda re kin kamehlele me kaperen en sampah ihte me mie katepe nan atail mour. (Wiewia 17:18, 32) Padahk en Epicurus kin roporop, sohte liki aramas, ahr koasoandi kan kin uhdahn suwed.
2. (a) Dahme kahrehda e inenen keper en kahmahmki padahk en kaiasada? (b) Iaduwen Pohl kakehle pwoson en irail Kristian akan nan Korint?
2 Kahmahmki me dene sohte kaiasada kin imwikihla kahpwal tohto. Pohl koasoia: “Pwe ma mehlel pwoat met, eri, Krais sohte pil iasada. A ma Krais sohte ketin iasada sang mehla, eri, at padahk, padahk mwahl ehu, oh amwail pwoson, pwoson mwahl ehu. . . . Ma atail koapwoaroapwoarki Krais e doakedoakehte atail mouren sampah wet, eri, kitail paisuwedsang aramas koaros nin sampah.” (1 Korint 15:13-19) Ei, padahk en Kristian akan pahn wia “padahk mwahl ehu” ma sohte koapwoaroapwoar en mour kohkohlahte. E pahn sohte katepe. Ihme kahrehda, pwehki padahk en mehn peiken wet, mwomwohdiso en Korint dirkihla kahpwal akan. (1 Korint 1:11; 5:1; 6:1; 11:20-22) Ihme kahrehda Pohl nantiong song en kakehle ahr pwoson ong koapwoaroapwoar en kaiasada. Sang ni e doadoahngki kahrepe kehlail kan oh iren Paipel kan oh karasaras akan, Pohl kasansalehda ni soh-peikidpe me koapwoaroapwoar en kaiasada kaidehn padahk mwahl ehu ahpw mehkot me uhdahn mehlel. Pwehki poasoan wet, e kak kangoange ienge pwoson kan: “Eri, riei kompoakepahi ko, kumwail kehlail oh dadaur oh loalenohng amwail doadoahk ong Kauno ahnsou koaros, pwe kumwail ese me papah Kauno kaidehk doadoahk mwahl ehu.”—1 Korint 15:20-58.
“Mwasamwasahn”
3, 4. (a) Nin duwen Piter mahsanih, madamadau keper dah, me ekei pahn ahneki ni imwin rahn akan? (b) Dahme kitail anahne katamankin pein kitail?
3 Nan rahnpwukat, aramas tohto ahneki madamadau en momour ongete ahnsowet. (Episos 2:2) Ih duwen met me wahnpoaron Piter kohpada. E kohpada duwen “Re pahn kinkepitkin kumwail, ndinda, ‘E soh inoukiong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda!’” (2 Piter 3:3, 4) Ma tohn kaudok mehlel akan pahn duhkiong soahngen madamadau wet, re kak “luwetala oh sohte wah mwahu.” (2 Piter 1:8) Ahpw, e kaperen pwe, pali moron en sapwellimen Koht aramas akan sohte kin ahneki soangen madamadau wet.
4 E sohte sapwung ma emen men ese duwen imwin koasoandi suwed wet. Medemedewe duwen ia uwen laud sapwellimen Sises wahnpoaron kan kasalehda ahr men ese duwen met: “Maing, ia duwe, ih ahnsou kiset me komw pahn ketin kapwurehda Wehin Israel?” Sises eri ketin sapengkin irail: “Ahnsou kan oh irair kan koasoandier rehn Semei sang pein sapwellime manaman, ahpw e sohte mweiong kumwail en ese ahnsou me mepwukat pahn wiawi.” (Wiewia 1:6, 7) Mahsan pwukat duwehte dahme e mahsanih pohn Nahna Olip: “Kumwail eri mwasamwasahn pwe kumwail sehse rahn me amwail Kauno pahn ketido.” (Madiu 24:42, 44) Kitail anahne pein katamankin kitail duwen kaweid wet! Ekei ele mwein pahn ahneki madamadau, ‘Ele, I pahn ekis wawaila, de ekis kommoal.’ Met inenen sapwung! Medemedewe duwen Seims oh Sohn, “Nein Nansapwe.”—Mark 3:17.
5, 6. Dahme kitail kak sukuhliki sang mehn kahlemeng en Seims oh Sohn?
5 Kitail ese me Seims emen wahnpoaron me inenen ngoangki wia eh doadoahk. (Luk 9:51-55) Ni ahnsou me mwomwohdiso en Kristian wiawihda, e kin iang pidada pwukoah tohto nan mwomwohdiso. Ahpw ni ahnsou me Seims wie pwulopwulte, Herod Agrippa I padahkiong aramas en kamehla ih. (Wiewia 12:1-3) Kitail lemeleme me Seims koluhkihla e ngoangki wia eh doadoahk pwehki eh pahn mwadang mehla? Soh dohluhl! E inenen perenki doadoahngki eh mour mwotomwot nan eh papah Siohwa. Kitail koaros pil sehse ma kitail soh pahn mwadang mehla. (Eklesiasdes 9:11; pil kilang Luk 12:20, 21.) Ahl en loalokong iei en ahnsou koaros ngoangki papah Siohwa. Ni ahl wet kitail pahn kolokolte atail ahd mwahu rehn Siohwa oh momourki atail koapwoaroapwoar en mour kohkohlahte.—Eklesiasdes 7:1.
6 Mie mehkot me kitail kak sukuhliki sang mouren wahnpoaron Sohn, me mihmi rehn Sises ni ahnsou me Sises kangoange irail en, “Kumwail pepehd oh mwasamwasahn!” (Madiu 25:13; Mark 13:37; Luk 21:34-36) Sohn kamehlele kangoang wet, oh kin papah Siohwa ni ngoang erein sounpar tohto. Ni mehlel, ih me memour reirei sang wahnpoaron teikan. Ni ahnsou Sohn me mahla, oh kak medemedewe duwen sounpahr tohto kan me e kin papah ni lelepek, e kin koluhkihla met, oh medemedewe me e momourki soahngen mour sapwung de sohte toupahrek? Soh douluhl! E kaskasik ahnsou kohkohdo. Ni ahnsou me Sises iasada, e mahsanih: “Ei, mehlel pwoat! I pahn mwadang leledo,” Sohn mwadang sapengki, “Eri, en pweida. Kaun Sises, komw ketidohla!” (Kaudiahl 22:20) Sohn sohte kin momourkihte ong ah ahnsou, soangen mour me meleilei oh sohte pwunodki wia kupwuren Koht. Soh, e kin nantiong en papah Siohwa ki eh mour unsek oh kehl unsek, sohte lipilipilki iahd Kauno pahn ketido. Iaduwen kitail?
Poahsoan kan ong Kamehlele Koapwoaroapwoar en Mour Soutuk
7. (a) Ia duwen koapwoaroapwoar en mour soutuk ah “inoukihongkitailehr mour wet mwohn tepin kawa”? (b) Iaduwen Sises kasansalehda koapwoaroapwoar en mour soutuk?
7 Koapwoaroapwoar en mour soutuk kaidehn auremen ehu. Nan pwuhken Taitus 1:2 mahsanih, me atail lelepek ong Koht kin poahsoankida “koapwoaroapwoar en mour soutuk. Koht, me sohte kin ketin likamw, ketin inoukihongkitailehr mour wet mwohn tepin kawa.” Met iei sapwellimen Koht tepin kupwur ong aramas peik kan koaros en mour kohkohlahte. (Senesis 1:28) Sohte mehkot, pil uhweng me Adam oh Ihp wia pahn kak kawehla kupwuren Koht. Nin duwen pwuhken Senesis 3:15 mahsanih, me Koht mwadangete inoukihda “kadaudok men” me pahn kihsang kalokolok me kin lelong aramas koaros. Ni ahnsou me “kadaudoko” de Mesaia, Sises ketido, e wiahkihla koapwoaroapwoar en mour soutuk ehu ah padahk kesempwal kan. (Sohn 3:16; 6:47, 51; 10:28; 17:3) Ki eh meirongkihla moure nin duwen tomw ehu, Krais alehda pwung en ketikihong mour soutuk aramas akan. (Madiu 20:28) Ekei sapwellime tohnpadahk kan, 144,000, pahn ale mour soutuk nanleng. (Kaudiahl 14:1-4) Ekei aramas akan me mahs kin mehla “sohlahr kak mehla”!—1 Korint 15:53.
8. (a) Dahkot mour me sohte kak mehla, oh dahme kahrehda Siohwa kin ketikihong met irail meh 144,000? (b) Koapwoaroapwoar dahieu Sises kihong “sihpw teikan”?
8 “Sohlahr kak mehla” kin wehwehki laudsang sohte pahn mehla. Met kin pidada “manaman en eh mour poatopoat.” (Ipru 7:16; pil kilang Kaudiahl 20:6.) Dahme Koht kapwaiada ma e pahn kihong aramas kisakis kaselel wet? Eri, tamanda ahn Sehdan uhweng, me dene sohte emen sapwellimen Koht aramas kak likilik. (Sohp 1:9-11; 2:4, 5) Ni ah mweidong irail meh 144,000 en ahneki mour me sohlahr kak mehla, Koht kin kasalehda eh kin likih pwihn wet me kin sapengala ahn Sehdan uhweng. Ahpw iaduwen aramas teikan? Sises padahkiong aramas akan me tepin iang “pwihn tikitik” en Wehio me re pahn “iang mwohd nan mwoalomwail mwoalen kopwung pwe en wia kapwungpen kadaudok eisek riaun Israel.” (Luk 12:32; 22:30) Met kin wehwehki me aramas teikan pahn ale mour soutuk nin sampah nin duwen aramas kei me pahn uhpaiong Wehi wet. Mendahki “sihpw teikan” sohte ale mour me sohte kak mehla, irail pahn ale “mour soutuk.” (Sohn 10:16; Madiu 25:46) Mour soutuk iei koapwoaroapwoar en Kristian koaros. Met kaidehn auremen ehu ahpw ehu inou me kohsang “Koht, me sohte kak likamw,” oh pweipweikihda ntahn Sises.—Taitus 1:2.
Pweida Nan Ahnsou Kohkohdo?
9, 10. Mehn kadehde sansal dah me kasalehda me kitail mihmi ni imwin koasoandi wet?
9 Wahnpoaron Pohl kohpadahr me “ahnsou apwal ekei” pahn kasalehda me kitail ni sohpeikidpe miehr ni “imwin rahn akan.” Nin duwen koasondi en aramas akan nan rahnpwukat kin kohkohdi oh aramas akan kin sempoak, noarok, inengieng pein arail peren laudsang kupwur en Koht, kitail kin wehwehkihda me sapwellimen Siohwa rahn kadeikada ong koasoandi suwed wet en sampah inenen kerendohr? Nin duwen kekeiradahn wiewiahn dihp oh kailok kin tohtohla, kitail soh kilang pweidahn ahn Pohl mahsan: “ahpw aramas suwed oh me likamw akan pahn nantihweite sang ni me suwed ong ni me suwedsang”? (2 Timoty 3:1-5, 13) Ekei pahn nda “Mehkoaros meleilei oh mwahu,” ahpw koapwoaroapwoar wet ong popohl pahn sohla, pwe “iei ahnsowo me apwal laud pahn mwadangete lelohng irail—e pahn mwadangete lelohng irail rasehng medek en neitik ong lih emen, oh aramas sohte pahn pitsang.” Kitail sohte mih nan rotorot, pwe kitail ese wehwehn kokohp pwukat. Eri, “kitail dehr memeir duwehte meteikan, ahpw kitail pepehd oh onohnop.”—1 Deselonika 5:1-6.
10 Paipel pil mahsanih me imwin rahn akan iei “ahnsou mwotomwot ehu.” (Kaudiahl 12:12; pil kilang Kaudiahl 17:10.) Pali laud en “ahnsou mwotomwoto” imwiseklahr. Kokohp en Daniel, ni karasaras, kin kohpada duwen kailokpene nanpwungen “nanmwarki en paliepeng” oh “nanmwarki en palieir” me wiawi lao lel nan atail ahnsou. (Daniel 11:5, 6) Ihte me saikinte pweida iei kaimwseklahn uhweng en “nanmwarki en paliepeng,” me kileledi nan pwuhken Daniel 11:44, 45.—Pil kilang The Watchtower en July 1, 1987, oh November 1, 1993, ong koasoiapen kohkohp wet.
11. (a) Ia uwen laud pwuhken Madiu 24:14 pweida? (b) Dahme mahsen kan en Sises me kilelehdi nan Madiu 10:23 kasalehda?
11 Pil mie ahn Sises kohkohp me “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:14) Rahnwet, Sounkadehdehn Siohwa kan kin wia arail doadoahk nan sahpw 233. Ni mehlel, ekei wasahn kalohk kan saikinte kalohk wiawi ie, ahpw ele mwein ni pein sapwellimen Siohwa ahnsou, sounkalohk kan kak kalohk nan wasa pwukat. (1 Korint 16:9) Ahpw, mendahki met, sapwellimen Sises mahsan ko me ntingihdi nan Madiu 10:23 me kesempwal: “Pwe kumwail en ese pwe kumwail sohte pahn kanekehla amwail doadoahk nan kanihmw koaros en Israel, mwohn Nein-Aramas eh pahn pwurodo.” Mendahki rongamwahuo pahn lohkiseli nin sampah pwon, ahpw kaidehn emen emen kitail me pahn lel wasa koaros nin sampah ki rongamwahu en Wehio mwohn Sises pahn “pwurodo” nin duwen Sounkamakam en Aramas suwed akan.
12. (a) Mehnia ‘kilel’ me pwuhken Kaudiahl 7:3 kin koasoia? (b) Ia wehwe kesempwal en nempehn irail meh keidi kan wia malaulaula?
12 Medemedewe duwen iren Paipelo nan Kaudiahl 7:1, 3, me mahsanih me tohnleng pahmeno pahn kolokol “ahng pahieu” lao lel “irail kihong kilel ehu ni temwen sapwellimen Koht ladu kan.” Met sohte kin wehwehki tepin kilel me wiawi, ni ahnsou me irail 144,000 kan ale luhk en kohdala nanleng. (Episos 1:13) Met kin wehwehki kaimwseklahn kilel, ni arail kasalehda me irail aramas lelepek kei nin duwen “sapwellimen Koht me lelepek kan.” Nempehn sapwellimen Koht aramas keidi kan me momour kin wie malaulaula. Oh pil ehu, Paipel ni sansal kasalehda me “pwehki sapwellime me pilipil kan” me tepidahn kahn kamakam kohwalap “pahn ketin kamalaulaukilahr rahn ako.” (Madiu 24:21, 22) Pali laud en irail kan me keidi mahlahr. Met soh pahn kasalehong kitail meh imwi kerendohr?
Silepe Lelepek men
13, 14. Ia pwukoahn pwihn en silepe kan?
13 Nan ahnsouwet, kitail anahne rong kaweid me kohsang ‘ladu lelepeko.’ (Madiu 24:45) Pohnangin sounpahr epwiki, “ladu” en atail ahnsou kin wia papah nin duwen “Silepe men.” (Esekiel 3:17-21) Makisihn en The Watchtower en sounpwong en January 1, 1984, kawehwehda: “Silepe menet kin tehk duwen wiewia kan en sampah wet me kin pweida nin duwen kokohp kan en Paipel, oh irail kin pakairki duwen ‘kahn kamakam kohwalap me pahn wiawi oh sohte me pahn duwe sang met kohla’ oh irail kin lohkiseli ‘rongamwahu en popohl.’”—Madiu 24:21; Aiseia 52:7.
14 Tamataman: Ih pwukoah en silepe men en pakairki “dahme e pahn kilang.” (Aiseia 21:6-8) Ni ahnsoun Paipel, silepe men pahn pakairkihda ma mie imwintihti mehnda ma irail mihmi wasa doh oh sohte nohn sansal. (2 Nanmwarki 9:17, 18) Ekei pak dahme silepe men kin pakairki kin sapwung. Ahpw emen silepe mwahu sohte pahn pweiehk en pakair pwe e de sarohdi. Ma imwomw lulda, ia pahn ahmw pepehm ma sounkakun kisiniei kan sohte kohdo imwomw pwehki irail lemeleme me pakairo likamw? Soh, kitail uhdahn kasik me sounkakun kisiniei kan pahn mwadangete mwekidki kilel en keper ehu! Me duwehte met, pwihn en silepe kan kin wia pakair nin duwen irairen sampah wet eh suwedla.
15, 16. (a) Dahme kahrehda kawukilahn atail wehwehki kohkohp akan kin wiawi ekei pak? (b) Dahme kitail kak sukuhliki sang rehn sapwellimen Koht ladu lelepek kan, me sohte wehwehki ekei kohkohp akan?
15 Nin duwen wiewiahn sampah kin pweida, atail wehwehki kohkohp kan kin sansalda. Poadoapoad kan kin kasalehda me kohkohp kan sang powe, sohte me kin wehwehki lao irail kin pweida. Koht mahsanihiong Eipram ia uwen werei eh kadaudok pahn “keikeiruseli nan sapwen wai,” erein sounpar 400. (Senesis 15:13) Ahpw Moses, kihda pein ih en wiahla sounpodoarpen Mehn Israel kan mwohn kokohpo.—Wiewia 7:23-30.
16 Medemedewe duwen kokohp kan me pid Mesaia. Ahnsou me kitail kin wia met, e kin inenen sansal me matalahn Mesaia oh pil iasadahn Mesaia miher nan kokohp. (Aiseia 53:8-10) Ahpw, sapwellimen Sises tohnpadahk kan sohte wehwehki met. (Madiu 16:21-23) Irail sohte wehwehki me pwuhken Daniel 7:13, 14 pahn pweida erein pa·rou·siʹa en Krais ni ahnsou kohkohdo.” (Madiu 24:3) Arail lamalam kin mwadangkihla sounpahr 2,000 ni arail patohwan idek rehn Sises: “Maing, ia duwe, ih ahnsou kiset me komw pahn ketin kapwurehda Wehin Israel?” (Wiewia 1:6) Pil mwurin mwomwohdisohn Kristian kan kehlailla, madamadau sapwung kan oh kaskasik sapwung kan kin pwarada. (2 Deselonika 2:1, 2) Mehndahki ekei kin ahneki madamadau sapwung kan me pid kohkohp kan, Siohwa ni sohte peikidpe kin kapaiada doadoahk en tepin Kristian akan!
17. Ia duwen kitail pahn kilangwong wekideklahn kawehwehn iren Paipel kan?
17 Pwihn me mwetehn sounsilepe nan rahnpwukat pil ekei pak anahne kapwungala arail madamadau kan. Ahpw mie me kak peikasalki me Siohwa sohte kapaiada ‘ladu lelepeko’? Oh pil, kaidehn kapwungala kan me irail wiahda wia mehkot tikitik? Atail wehwehki Paipel sohte kin wukila. Atail kamehlele me kitail mih ni imwin rahn akan kin kehlailla sang mahs!
Momourki Mour Kohkohlahte
18. Dahme kahrehda kitail anahne liksang ahneki madamadau en momourkihte ong rahnwet?
18 Aramas nin sampah kak nda, ‘Kitail en kin kamakamadipwte, pwe lakapw kitail pahn mehla,’ ahpw kitail en dehr ahneki soangen lamalam wet. Ia katepe en nantiong rapahki peren en sampah ongete mour en ahnsowet me kitail kak doadoahk ong mour kohkohlahte? Koapwoaroapwoaro, edetehn ma koapwoaroapwoar en mour nanleng de mour soutuk nin sampah, met kaidehn auremen ieu. Koapwoaroapwoar wet me mehlel me Koht inoukihong kitail oh ih Koht men me “sohte kak likamw.” (Taitus 1:2) Mehn kadehde kan inenen sansalda me atail koapwoaroapwoar kerendohr! “Atail ahnsou mwotomwotalahr.”—1 Korint 7:29.
19, 20. (a) Iaduwen Siohwa kin kilangwong atail tounmetei kan me kitail wiahda pwehki Wehio? (b) Dahme kahrehda kitail anahne momourki atail kilikilangwohng mour kohkohlahte?
19 Mehlel, koasoandi suwed wet mihmiher ahnsou werei sang dahme aramas lemeleme. Ekei mwein pahn ahneki soangen madamadau me, ma re ese duwen met, re sohte pahn tounmeteiki ahr ahnsou ong ekei doadoahk ong Siohwa. Ahpw kitail en dehr koluhkihla met. Pwe, en tounmeteiki atail mour oh ahnsou ong Siohwa iei poahson en wiahla emen Kristian. Kristian akan kin ‘tounmeteikihla pein irail.’ (Madiu 16:24) Kitail en dehr lemeleme me atail nantiong en papah Koht sohte katepe. Sises inoukihda: “Eri, I men kumwail en ese pwe mehmen me pahn mweidala imwe, de rie kan, de ine de seme de nah seri kan, de sapwe, pwehki ngehi oh pil rongamwahu, e pahn ale me laudsang nan mouren dih wet. E pahn ale pahn pak epwiki ni imwe, ni rie kan, ni ine, ni nah kan, . . . a nan mour me pahn kohdo, e pahn ale mour soutuk.” (Mark 10:29, 30) Sounpahr kid sang met, ia uwen kesempwal en ahmw doadoahk en mwohni, imwomw, de mwohni kan nan pank? Ahpw, dahme komw tounmetikihla ong Siohwa pahn mie katepe, sounpahr rar kei sang met—oh pil lik kei sang met! “Koht me uhdahn pwung, e sohte pahn ketin meliehla amwail wiewia kan.”—Ipru 6:10.
20 Eri, kitail en momour ni atail kilikilangwohng mour kohkohlahte, kaineneiong atail madamadau kan kaidehn ong “mehkan me sansal ong kitail, pwe mehkan me sohte sansal. Pwe mehkan me kitail kin kilangki masatail, iei me kin mie ahnsou kis, a mehkan me kitail sohte kin kilangki masatail, ih me soutuk.” (2 Korint 4:18) Soukohp Apakuk ntingihdi: “Ntingihdi, pwehki e saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” (Apakuk 2:3) Iaduwen atail ‘awiawihete’ imwio, pahn kamwekidada atail pahn apwaliahda pein atail pwukoah kan oh pwukoah en peneinei kan? Artikel en mwuhr pahn sapengla peidek wet.
Ire Kan ong Kousapahl
◻ Iaduwen ekei nan rahnpwukat mwekidki mwomwen pwand en imwin koasoandi suwed wet?
◻ Ia atail poahsoan ong koapwoaroapwoar en mour soutuk?
◻ Iaduwen kitail anahne kilangwohng tounmetei kan me kitail wiahda ong Wehio?
[Kilel nan pali 7]
Doadoahk en kalohk nin sampah pwon anahne en kaneknekla mwohn imwio