Ahnsou Apwal kan ong me Mah kan
MAMA ONIYAN, me mahki sounpar 68, kin mih nan kahnimw laud ehu nan West Aperika. Ni ahnsou me e pwulopwul, e kin auramanih me e pahn nsenamwahuki ah mour ni ahnsou me e mahla oh eri komkommoal, oh mihmi rehn nah seri kan oh nein nah seri kan. Ahpw met sohte wiawi pwe ni ahnsou me e mahla e kin netiki pilen nimpil loamwuloamwur pahn ketipino. Kisin sent me e kin koledi kin sewese pwehn kak mour. Nah pwutak riemeno kin mih nan ehu sahpw dohsang ih. Ahnsou wereilahr me re kadardohng ih mwohni.
Mahso, irail me mah kan nan Aperika kin inenen waunla. Re kin waunla pwehki arail eksperiens kan, oh pwehki arail loaloakong, erpit oh pwehki arail lamalam touparek. Re kin sewese apwaliada nein nehrail kan. Me pwulopwul kan kin rapahki arail kaweid oh men kenikenla pahrail. Aramas kan kin mour parekiong kaweid en Paipel: “Mwohn me moangpwet kan kumwail en kesihnenda, oh kumwail anahne kasalehda wauneki ohl mah [de, lih mah].”—Lipai 19:32, New World Translation.
Ahnsou kan wekilahr. Semwehmwe, pweilaudlahn dipwisou kan, sohte doadoahk en mwohni, oh keseulahn aramas tohto ong kahnimw laud kan kin karehdahr me mah tohto en apwalih pein irail. Director en HelpAge Kenya, Camillus Were, kosoia: “Tiahk en utung oh apwalih me mah kan kin wie luluwetla.”
Ni mehlel, luwetlahn selen peneinei sohte kin wia mehkot kapw nan sapwen Aperika kan. Ni ah kosoia duwen Sapan, nuhso Guardian Weekly ripohtki: “Loaloapwoatohng pahpa oh nohno mahs kin wia poahsonen koasoandi kesempwal en Sapan me kohsang Confucianism, ahpw e sohla pwehki kahpwal kan sang mouren nan kahnimw oh mweipeseng en selen peneinei: rahnwet, persent 85 en mehn Sapan kan kin mehla nan imwen wini kan de nan imwen aramas mah kan.”
Mendahki ia irairo, irail ko me uhdahn men kaperenda Koht kin nantiong wauneki arail pahpa oh nohno kan. Re kin kapwaiada kaweid en Paipel: “Kahkahki semomw oh inomw . . . pwe ke en pweida mwahu oh mour werei nin sampah.” (Episos 6:2, 3) Mendahki e sohte kin ahnsou koaros mengei en wauneki oh apwalih pahpa oh nohno kan me mahlahr, e kak wahdo kating tohto.