Semwehmwe Ahpw Kepwehpwe Iaduwen e kak wiawi?

Sounpar epwiki kei samwalahro ohl loaloakong men kapakapki me endehr semwehmwehla. Dahme karehda e wiahki soahngen pekipek wet? Pwehki e perki pwe mouren semwehmwe de karehda lamalam oh wiewia me kak kauwehla ah nanpwungen rehn Koht. Met kin sansal sang ah lokaia kan: “Eri, komw ketikihong ie uwen kisin tungoal me I anahne. Pwe ma e daulihla, mweinele I pahn pirap oh kasaminehla mwaren ei Koht.”​—LEPIN PADAHK 30:​8, 9.

MET kin wehwehki me e apwal ong aramas semwehmwe men en papah Koht ni lelepek? Soh douluhl! Erein nan poadoapoad laduhn Siohwa Koht tohto kin kolokol arail lelepek ong ih mendahki apwal kan me mouren semwehmwe kin wahdo. Pwehki met, Siohwa kin poakohng irail ko me kin likih ih oh kin ketin apwaliirailla.

Me Lelepek kan en Mah

Mie ahnsou me pein wahnpoaron Pohl kin pil apwalla. (2 Korint 6:​3, 4) E pil kasalehda duwen ‘pokon kalaimwun’ ehu en sounkadehde lelepek kan mwohn ni mwein Kristian kan, me ekei irail kin “sansaruwaruseli, likawih likou kilin sihpw de kuht; re semwehmwe, . . . Re kin kohkohseli nan sapwtehn, pohn nahna kan, pahn paip akan, oh nan pwoahr akan.”​—⁠Ipru 11:​37, 38; 12:⁠1.

Emen me lelepek pwukat iei soukohp Elaisa. Erein sounpar silu elep me sohla keteu, Siohwa kin kaukaule ketikihong ih kene mwenge. Keiou, Koht kamwekidih menpihr (raven) kan en wahdohng soukohpo pilawa oh uduk. (1 Nanmwarki 17:​2-6) Mwuri, Siohwa ni manaman karehong pilawao oh leho en sohte nekla me liohdio kin kamwengehki Elaisa. (1 Nanmwarki 17:​8-16) Mwenge ko kin wia soahngen mwenge ehute, ahpw e komourla soukohpo, oh liho, oh nein liho serio.

Ni ahlohte Siohwa pil komourla soukohp lelepek Seremaia erein ahnsou apwal en paien wehi. Seremaia pitsang lohdi en Serusalem pahn mehn Papilon kan, ni ahnsou me aramas kan “ar pahtoula oh pwunod ni ar pahn kin teneki uwen mwenge me re pahn kang oh pihl me re pahn nim.” (Esekiel 4:16) Kedekedeo, lehk en mwenge nan kahnimwo inenin laudla me karehda ekei lih kan kangala uduk en pein neirail seri kan. (Koulen Kedepwidepw Kan 2:20) Mendahki Seremaia seldi pwehki ah kin soh masak kalokalohk, Siohwa kamwekid aramas kan en kihong ih “pilawa” rahn koaros “lau sohla pilawa nan kahnimwo.”​—⁠Seremaia 37:⁠21.

Ihme Seremaia, me duwehte Elaisa, sohte nohn kenera mwenge. Pwuhk Sarawi sohte padahkiong kitail dahme Seremaia kang de pak depe me e kin mwenge mwurin sohla mwenge nan Serusalem. Ahpw, kitail ese me Siohwa kin komourih oh me e pitsang ahnsou suwed en lehko.

Rahnwet, mouren semwehmwe kin mih wasa koaros nan sampah. Nin duwen me United Nations kosoia, me mouren semwehmwe me keiou laud ie kin dierek nan Aperika. Ehu ripoht en UN me kohda nan 1996 kosoia: “Elep en wehin Aperika uhdahn semwehmwe.” Mendahki suwedlahn irair en paien wehi kin wie kekeirada, mehn Aperika tohto kin kapwaiada kosonned en Paipel nan ahr mour oh kin lelepek papah Koht, ni ahr kin koapworopworki me e pahn komour irail. Tehk duwen ekei karasepe kan sang ehu pali en atail sampah ohla.

Kolokolte Mehlel

Michael,a me kin koukousoan nan Nigeria, iei emen soumwet me naineki seri wenemen me e anahne apwalih. E kosoia: “E inenin apwal en mehlel ma sohte nomw mwohni pwehn apwalihki ahmw peneinei. Ahpw, ni ahnsou me ih kin mihla nan songosong en pirap, I kin katamankin pein ngehi pwuken Epsos 4:​28, me mahsanih: ‘Aramas me kin epwehnki pirap, en tokedihsang eh pirap, oh en tapihada wie ehu soahngen doadoahk me e kak momourki oh kak sewesehki me semwehmwe kan.’ Eri ma kasongosong kin lelohng ie, I kin pein idek rehi, ‘I koadoahkehda mwohni wet?’”

“Karaspe ehu,” Michael kapataiong, “ni ahi alialuhwei pohn ahlo rahn ehu, I kilangada ehd ehu me pwupwidihsang pohn sukuter ehu. I sohte kak kauhdi me dakeo, ngehi eri pwekeda ehdo oh diarada me e dirki mwohni! Ni ahi doadoahngki eden me mih nan ehdo, I diarada aramaso me ahneki ehdo oh ngehi eri kapwurehlahng ih ehdo.”

Peiong Nsensuwed

Emen ohl nan North Aperika kosoia: “Mouren semwehmwe kin [duwehte] amw tengala nan pwoahr loal ehu, me ke kak kilang marain oh aramas kan alialuseli ni saledek, ahpw sohte ngiloamw en likwer ren sewesei uhk de sohte kendake pwe ken doukihsang nan pwoahro.” Ihme e sohte kapwuriamwei me mouren semwehmwe kin kalap wahdo pepehm en nsensuwed oh pwunod! Pil ladu kan en Koht ele pahn kilang kepwehpwehn meteikan oh tepiada lemeleme me mouren lelepek sohte katepe. (Kaparekiong Melkahka 73:​2-13.) Iaduwen en powehdi soahngen pepehm pwukat?

Peter, emen mehn West Aperika, kommoal (retired) sang doadoahk en koperment mwurin sounpar 19. Ahnsouwet e kin mourki kisin mwohni (pension) me e alehdi sang ah kommoaldi sang doadoahk. E kosoia: “Ni ahi kin nsensuwedla, I kin katamankin pein ngehi dahme I wadek nan Paipel oh pwuhk kan en Watch Tower Society. Koasoandi mering wet pahn kasohrala, oh kitail kin awiawih ehu koasoandi me mwahusang.

“Pil ehu, I kin medemedewe duwen 1 Piter 5:9 me mahsanih: ‘Eri, kumwail tengeteng ni amwail pwoson oh kehlail ong ih [Sehdan], pwe kumwail ese me riamwail souleng kan wasa koaros nin sampah kin iang kumwail mihla nan soangen lokolok me kumwail kin mihla loale.’ Ihme kaidehn ngehite me kin lokolongki apwal kan. Mehn kataman pwukat sewese ie en kihsang nan ahi lamalam soahngen madamadau me kin kamworos oh kansensuwed.”

“Likin met,” Peter kapataiong, “Sises kin wiahda manaman kapwuriamwei tohto ni ahnsou me e ketiket pohn sampah, ahpw e sohte wiahiong emen en kepwehpwehla. Dahme karehda I lemeleme me e pahn wiahiong ie en kepwehpwehla?”

Manaman en Kapakap

Kerenih Siohwa Koht ni kapakap iei ehu ahl en peiong lamalam en soh. Ni ahnsou me Mary wiahla emen Sounkadehdehn Siohwa nan 1960, ah peneinei kesehla ih. Kiripw oh ahnsouwet e mahkier sounpar 50 samwa, e luwetlahr oh semwehmwe. Mendahki met, e kin ngoang nan doadoahk en Kristian.

Mary kosoia: “Ni ahnsou me I kin ahneki pepehm en mworusala, I kin kapakap ong Siohwa. I ese me sohte emen me kak sewese ie laud duwehte ih. I sukuhlki me ma ke likih Siohwa, e pahn sewese uhk. I kin ahnsou koaros tamanda mahsan pwukat en Nanmwarki Depit me dierek nan Melkahka 37:25: ‘Ni ei pwulopwul, oh met ni ei mahlahr, I saikinte kilang aramas mwahu men me Kauno ketin likidmeliehla, de nah seri kan pekipeki ar tungoal kisin mwenge.’

“I kin ale mehn kangoang sang eksperiens en riei ohl oh lih mah kan en pali ngehn me kin sansalda nan The Watchtower. Siohwa Koht kin sewese irail ihme I ese me e pahn pil kaukaule sewese ie. E kin kapaiada ahi kisin doadoahk en netikih fufu [mwenge wiawihsang kehp tuhke], oh I kin kak apwaliala ahi anahn en ehu ehu rahn. Ekei pak ni ahnsou me sohla nei mwohni oh I kin medemedewe dahme I pahn wia, Siohwa kin kadaredo emen me kin kihong ie kisakis ehu oh nda, ‘Sister, menlau ale met.’ Siohwa sohte kin likamw ni ah kin sewese ie.”

Kesempwalpen en Onop Paipel

Sounkadehde kan en Siohwa kin kesempwalki onop en Mahsan en Koht, Paipel, oh me semwehmwe kan nanpwungarail kin pil kesempwalki met. John me mahki sounpar weneisek kin papah nin duwen pioneer men (sounkalohk en Wehio kaukaule men) oh pil iangahki ministerial servant men nan mwomwohdiso. E kin kousoan nan ihmw poasoke riau ehu me uhdahn meringla me peneinei 13 kin iang ih kousoan loale. Ah pere iei wasa kis nan wasahn alu nanpwungen pere kan nan poasoke keiouwo, me kin pereperkihla dinapw. Nan pereo mie sehr mering riau oh tehpel ehu me pwuhk en sawas kan en Paipel kin koasokoasok powe. Ohlo kin meir pohn lohs.

Mahso John kin wiahda tala ehu rahn ehu netikih pilawa, ahpw ni ahnsou me pekderdohn pilawa nan sahpwo kainapwdi, e sohla kak koadoahkehda ah mour. E kosoia: “I diarada me ekei pak e inenin apwal, ahpw I wohnlahte sohte uhdisang pioneer. Siohwa me kin komour ie. I kin wia soahngen doadoahk koaros me I kak diarada oh I sohte kin likih aramas me re pahn apwalih ie de kamwenge ie, mendahki rie Kristian kan nan mwomwohdiso kin uhdahn sewese ie. Re sewese ie rapahki doadoahk oh ekei pak kihong ie kisakis en mwohni kan.

“I kin wiahda ahnsoun wadek Paipel oh pwuhk kan en Watch Tower Society. I kin onop ni mensengie ni ahnsou me tohnihmwo memeir oh I kin wadawad mwuhr ni pwong ahnsou kan me mie lioal. I ese me I anahne kolokolte ahi kin onop ong pein ngehi.”

Kaiane Seri kan ong Mour

Daniel iei emen ohl me ah pwoudo mehsang me naineki seri wenemen. Nan 1985 e katiasang doadoahko me e ahnekier erein sounpar 25, ahpw e diarada doadoahk nin duwen sounnetinet en sidowa. “Mour inenin apwal ong peneinei ni pali en mwohni,” e kosoia. “Ahnsou wet se kak mwenge ihte pak ehu nan rahn ehu. Mie pak me se sohte mwengehki rahn silu. Ihte me se wia iei nimpil pwe sen kak kehlail.”

Daniel kin papah nin duwen elder men nan mwomwohdiso. E kosoia: “I saikinte katiasang mihding en Kritian kan, oh I kin soupisengki pwukoahn mwomwohdiso. Ahnsou koaros ma kin mie doadoahk me anahne wiawihda likin Kingdom Hall, I kin wia pwe ih en kak mih wasao. Oh ni ahnsou me soahng kan inenin apwalla, I kin katamankin pein ngehi mahsan kan en Piter ong Sises, me kileledi nan Sohn 6:68: ‘Maing, ihs me se pahn patohla reh?’ Ma I uhdisang papah Siohwa, iawasa I pahn kohla ie? Mahsan en Pohl me kitail diar nan Rom 8:​35-37 kin pil kadirehiehla en nannanti pwehki re kasalehda me sohte mehkot me kak irekitaildi sang ni limpoak en Koht oh Krais. Ih lamalam wet me I kin katengehdi rehn nei seri kan. I kin ahnsou koaros padahkiong irail me sen dehpa kesehla Siohwa.” En Daniel ngoang, iangahki onop en Paipel kaukaule en peneinei, kin wia mehkot mwahu ong nah seri kan.

Ngehnen Kihkihwei

Ele emen pahn medemedewe me irail ko me mourki mouren semwehmwe sohte pahn kak kihda sawas en mwohni pwehn utungada mehkan en Wehio. Ahpw met sapwung. (Pil tehk Luk 21:​1-4.) Ekei Sounkadehde kan nan Ghana me ihte arail doadoahk iei mwetwel kin katohrehla ekis sapwerail pwehn kadoadoahkong utungada mehkan en Wehin Koht. Ni ahnsou me wahnsahpw en kisehn sahpw wet kin netila, mwohnio kin kadoadoahk ong utungada Wehio, me kin iangahki sawaskihda mwohni ong ni Kingdom Hall en Sounkadehdehn Siohwa kan.

Joan, me kin koauson nan Central Aperika, kin wia emen pioneer. Pwehn apwaliala ah pwoud mwoatoro oh seri pahmen likin met, e kin netikih pilawa. Ni ahnsou me mwomwohdiso me e kin towehda anahne sehr ong Kingdom Hallo, en Joan peneinei koasoanehdi en sawaskihda neirail mwohni ko koaros me re naineki. Met karehda en sohla neirail mwohni. Ahpw, mandahn rahno, aramas emen me pweipwand ong irail wereilahr oh me re lemeleme me e sohte pahn pwain ah pweipwando pweinla pweipwand wet!

Joan peren oh sohte kin nohn pwunodki duwen mwohni. “I kawehwehong Siohwa ahi irair nan kapakap, oh ngehi eri kohla kalohk. Se ese me sohte koapworopwor en ahnsou mwahu nan koasoandi wet en mehkan. Mendahki met, se pohnese me Siohwa pahn ketikihdo dahme kitail anahne.”

Kasalehda Pwerisek

Sounkadehdehn Siohwa kan kin sansalkihda arail lipoak ong emen emen. (Sohn 13:35) Irail ko me naineki mwohni kin sewese iengerail Kristian kan me anahne sawas. Met kin kalap kohda ni mwomwen kisakis ehu oh ekei pak sawaski doadoahk en mwohni.

Mark, me kin koauson nan Congo, kin soumwahuki soumwahu en tokutok. Soumwahuwo kauwehla sendin neh kan oh sendin peh kan. Pwehn kak alu, ih eri kin doadoahngki sokon. Ni ahnsou me Mark koasoanehdi pwehn papah Siohwa, e tepiada wiahda wekidekla laud kan nan ah mour. E sohla kin pekipek mwenge duwen me e kin wia mahso, ahpw e tepiada padok pein kene mwenge kan. E kin pil wiahda lepin takai pwehl, mehn wia ihmw, me e kin netikihla.

Mendahki paliwere soumwahu, Mark kin kaukaule doadoahk pwerisek. Kedekedeo e pwainda sahpw kis oh kauwada kisin ihmw ehu powe. Rahnwet, Mark kin papah nin duwen elder men nan mwomwohdiso oh tohn kahnimwo me e kin kousoan loale kin wauneki ih. Ahnsouwet e kin sewese meteikan me semwehmwe.

Ni mehlel, nan wasa tohto doadoahk en mwohni me inenin apwal en rapahkihda. Emen Kristian elder me kin papah ni ehu rahn ohpis en Watch Tower Society nan Central Aperika ntingihdi: “Brother tohto wasaht sohte arail doadoahk en mwohni. Ekei kin songosong en wiahda pein arail doadoahk kan, ahpw met me inenin apwal. Me tohto kin lemeleme me pwehki re pahn mihmihte nan apwal mendahki ma re doadoahk en mwohni de soh, re pahn tohnmeteikihla kepwe kan pwehn wia sounkalohk en pioneer. Ni ahr wia met, me tohto diarada me re kin ale paiamwahu laudsang ma re ahneki doadoahk en mwohni me pweitikitik de soh pweine.”

Siohwa Ketin Komourih Sapwellime Aramas kan

Sises Krais mahsanihki pein ih: “Kidien wel kan mie dewerail, oh menpihr en pahnlahng kan mie pasarail; a sohte wasa me Nein-Aramas kak wendi oh kommoaldi ie.” (Luk 9:58) Me rasehng met, wahnpoaron Pohl ntingihdi: “Sang mahs kohdo lel rahnwet, se kin duhduhpek oh men nimpil, se kin mwomwmwomwsaminseli; se kin wie kamakamseli; se kin pweipweidiseli pwehki eh sohte at wasahn kousoan.”​—⁠1 Korint 4:⁠11.

Sises oh Pohl pilada en mourki mouren itarki ekiste mwohni pwe ren kak wohnlahte wia ara kalohk. Kristian tohto rahn wet me semwehmwe pwehki re sohte kak wekidala met. Mendahki met, re kin kapwaiada kosonned en Paipel nan ahr mour oh ngoangki rapahki pwehn papah Koht. Re ese me Siohwa kin uhdahn poakohng irail ni arail lelohng mehlelen ahn Sises mahsan likilik: “Eri, kumwail rapahki mahs Wehin Koht oh dahme e kin ketin kupwurki, a soahng teikan koaros [anahn en war] e ahpw pahn kin ketikihong kumwail.” (Madiu 6:33) Me laud sang met, ladu semwehmwe pwukat en Koht ahneki mehn kadehde me “kapai en Siohwa​—⁠ihme kin kakepwehpwehiukala.”​—⁠Lepin Padahk 10:​22.

[Nting tikitik me mi pah]

[Koakon nan pali 6]

Ihs Me Kin “Kapwaiada Mahsano”?

NIN DUWEN me ehu roporop en 1994 kasalehda, me persent 96 en mehn Amerika kan kin “kamehlele Koht de kamehlele ngehn ehu.” Pil “nan United States mie imwen sarawi tohto ong wad en emen emen aramas me tohtohsang nan wehi teikan pohn sampah,” U.S. News & World Report kosoia. Mendahki soangen mwomwen poadidi wet, emen sounroporop me adaneki George Gallup, Jr., kosoia: “Ire mehlelo iei, me mehn Amerika tohto sohte ese dahme re kamehlele de dahme karehda re kamehlelehki met.”

Ripoht kan pil kasalehda me mie wekpeseng laud ehu nanpwungen dahme aramas tohto kin kamehlele oh arail wiewia. Karasepe ehu, “soun onopki koasoandi en aramas diarada me ekei wasa kan me mwersuwed kin keiou wiawi ie nan sahpwo kin pil wia wasa me pwoson oh wiewiahn sarawi kan kin keiou kehlail ie,” sounnting Jeffery Sheler kosoia.

Met sohte pahn kapwuriamwei. Dahme karehda? Pwehki mahsie nan senturi keiou, wahnpoaron Pohl panauwihki ienge Kristian kan en kaleke irail ko me kin “kosekose me re kin ese Koht, ahpw arail wiewia kan sohte parekiong me re kin kosoia.” (Taitus 1:16) Patohngete met, Pohl padahkiong ohl pwulopwul Timoty me “imwin rahn” pahn sansalkihda aramas kan me pahn “liksansalamwahuki mwomwen atail pelien lamalam, ahpw re kin kahmahmki katepe.”​—2 Timoty 3:1, 5.

Ahpw, Kristian mehlel, kin wia uwen me re kak pwehn idawen kehkehlik en Sises Krais en “kowei . . . oh padahkihong tohn wehi kan koaros; pwe re en wiahla nei tohnpadahk.” (Madiu 28:19) Ni ahl wet re “kapwaiada mahsan en Koht, ah kaidehn rongorongete.”​—Seims 1:22.

[Kilel nan pali 7]

Aramas kan nan sampah pwon kin kesempwalki onop en Paipel