Semwehmwe Kitail Kak Diar Pasapengpen Kahpwal Wet Me Pahn Poatoapoat
MENDAHKI ripoht suwed akan me kin kohdohsang wasa koaros nan sampah me pid semwehmwe, mie irail akan me kasikasik me mwahula pahn mie oh me mie mehkot me pahn kak wiawi. Karasepe, nin duwen nuhs me ede Manila Bulletin koasoia, Asian Development Bank ripohtki me “Palien Asia kak kihsang irair en semwehmwe ni erein pahr 25.” Banko kangoange keirdahn paien wehi en wia ahl en kihsang aramas sang nan irair en semwehmwe.
Soangsoangen pwihn teikan oh wehi teikan kihdahr soangen koasoandi kei oh pilahn ekei pwehn song en kamwahuwihala kahpwalo. Nanpwungen mehpwukat iei: social insurance program kan, kamwahuwihala pelien sukuhl, kemehla pweipwand akan me wehi ahpwtehn kekeirkohda kan wia ong wehi kepwehpwe kan, kihsang kahpwal en netikihla dipwisou ong mas likin wehi kan pwe aramas semwehmwe kan en kak iang kadarala arail dipwisou en netila ong likin arail wehi, oh wehi kan en wiahda ihmw ong aramas paisuwed kan.
Nan pahr 2000, United Nations General Assembly koasoanehdi dahme re pahn akadeiong en wiahda mwohn pahr 2015. Met iangahki kihsang semwehmwe mehlel oh duhpek oh sapahrek en elen pweinen aramas nan wehi kan. Ahpw, edetehn koasoandi pwukat ah nohn ngoramwahu, sang tohto me kahrehda atail en sohte kamehlele me met pahn pweida nan sampah sohminiminpene wet.
Ewen Kahk kan me Konehng Pwe en Kamwahuwihala Irair en Semwehmwe
Pwehki koapworopwor me sampah pwon anehkipene a sansal me e apwal en pweida, iawasa aramas kak ale sawas? Nin duwen me kitail koasoahier mwowe, mie wasa me erpit mie me pahn kak sewese aramas nan ahnsou wet. Dahkot met? Iei Mahsen en Koht, Paipel.
Dahme wiahiong Paipel en weksang mehn sawas teikan? E kohdo sang Ih me sapwellimaniki manaman me laudsang mehkoaros, atail Sounkapikada. E ketikihdiong nan pwuhk wet erpit me keieu kesempwal—mehn kaweid me pahn mwahu ong soangen aramas koaros, nan wasa koaros, oh ahnsou koaros. Ma kitail pahn idawehn, mehn kaweid pwukat kak sewese me semwehmwe kan en kak perenki oh itarki arail mour pil nan ahnsou wet. Kitail tehkpene ekei karasepe kan.
Ahneki madamadau pwung ong mwohni. Paipel mahsanih: “Erpit iei perepe ieu pil duwehte mwohni; ahpw kamwahupen loalokong iei met pwe erpit kin kamourala irail akan me ahneki irair wet.” (Eklesiasdes 7:12, New World Translation) Ia mour en mahsen pwukat? Mwohni sohte kak pwainda soahng koaros. Mehlel me e kin kihda uwen mehn perepe ieu. E kin kahrehda kitail en kak pwainda soahng kan me kitail anahne, ahpw miehte soahng kan me e sohte kak pwainda. Ni atail pahn wehwehkihla mwahu met pahn kak sewese kitail kihong atail kesempwaliki dipwisou nan dewe me konehng, oh met pahn irehdi sang aramas pwunod me mih rehn irail oko me kin ihte raparapahki naineki mwohni. Mwohni sohte kak pwainda mour, ahpw mwekidki erpit kak doarehla mour en aramas met oh pil kak ritingada elen ale mour soutuk.
Mourki uwen me mie rehmw oh dehr net laud sang dahme mih rehmw. Dahme kitail mwahuki ahneki kin weksang dahme kitail anahne. Koasoanehdi dahme keieu kesempwal en pid atail anahn akan. Kitail kak mwomwen men kamehlelehiong pein kitail me kitail anahne mehkot, ahpw ni mehlel e wia mehkot me kitail men ahneki a kaidehn mehkot me kitail anahne. Aramas erpit emen pahn pwainkihda mahs nah mwohni kan mehkan me e pahn anahne me rasehng mwenge, likou, wasahn kousoan oh soahng teikan. Mwurin mwo, e pahn tehk mahs ma luwen mwohni kan pahn kak pwainda mehkan likin anahn akan. Nan ehu sapwellimen Sises karasaras, e kangoangehki aramas en “keieu mwohndi mahs oh kapatahda uwen pweinen mehkan, oh kilang ma mie mwohni reh me itar pwainda.”—Luk 14:28, NW.
Perenki oh itarki dahme mie. Pil ehu kaweid en Paipel mahsanih: “Eri, ma kitail tungoalenki kisin tungoal akan oh likou, met e itarohng kitail.” (1 Timoty 6:8) Mwohni sohte kin wahdo peren mehlel. Aramas kepwehpwe tohto sohte kin peren, ah me semwehmwe tohto kin ahneki peren mehlel. Irail me semwehmwe tohto ese itariki ahneki soahng malaulau kan me anahn nan mour. Sises kaweidki aramas en ahneki ‘pwoaren mas me mwakelekel oh marain’ oh met wehwehki kitail en kainenehlahng atail madamadau mehkot me uhdahn kesempwal. (Madiu 6:22) Met pahn sewese aramas emen en ahneki pepehm en itariki dahme e ahneki. Aramas semwehmwe tohto kin peren pwehki re kin ahneki nanpwung mwahu rehn Koht oh ahneki mour en peneinei peren—mehkan me mwohni sohte kak pwainda.
Mepwukat iei ekeite karasepen kaweid mwahu en Paipel kan me kak sewese irail akan me semwehmwe oh sohte kak ale pasapengpen arail apwal akan. Mie pil ekei me tohto sang met. Karasepe, irehweisang uhk wiewia suwed kan duwehte simoak oh pilein mwohni, me kin kihsang ahn aramas pai; oh nantihong kasawihada mehkan me uhdahn kesempwal nan mour, ahpw mehlel mehn akadei en pali ngehn akan; oh wasa me doadoahk en mwohni inenen apwal en dierek ie, nantihong sawaski koahiek de sawas me aramas teikan anahne.—Lepin Padahk 22:29; 23:21; Pilipai 1:9-11.
Ni ahnsowo me kaweid en Paipel pahn kihda kamweitpen loale ong irail oko me mihmi nan irair en semwehmwe, ahpw peidek kan duwen dahme pahn wiawi ong irail mwuhr mihmihte rehrail. Iaduwen—irail me semwehmwe kan pahn mihmihte nan irair en apwal kohkohlahte? Wekpeseng laud nanpwungen irail me kepwehpwe kan oh irail me semwehmwe kan pahn sohla mie mwuhr? Kitail tehkpene pasapeng ieu me aramas tohto saikinte ese.
Paipel Kin Ketikihda Kahrepen Kitail Kak Ahneki Koapworopwor
Aramas tohto pwungki me Paipel kin wia pwuhk mwahu ehu. Ahpw, pak tohto irail sohte wehwehki me pwuhk wet audaudki mehkan me koasoakoasoia duwen wekidekla laud me ahnsou keren pahn wiawi.
Koht kupwurki en kamwahuwihala kahpwal akan me mih rehn aramas, me pil iangahki semwehmwe. Pwehki e sansalehr me ahn aramas koperment akan sohte kak oh sohte nsenohki wia met, Koht kupwurehda en kihsang irail. Iaduwen? Paipel mahsanih nan Daniel 2:44: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”
Mwurin ah pahn ketikihsang “mwehi” de koperment pwukat, pein sapwellimen Koht kaun me pahn wia met. Kaun menet kaidehn aramas emen ahpw tohnleng roson emen me pein ih rasehn Koht, oh ahneki kehl en wiahda wekidekla laud me anahn pwehn kihsang douluhl sapahrek kan me mie rehn aramas nan ahnsou wet. Koht ketin piladahr sapwellime Ohlo pwe en wia met. (Wiewia 17:31) Melkahka 72:12-14 kasalehda dahme Kaun menet pahn wia oh mahsanih: “E kin ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan. E kin ketin kupwurkalahngan ong me luwet oh semwehmwe kan; e kin doarehla mouren me paisuwed kan. E kin ketin kapitirailla sang nan arail kehnaudek oh angkehlail kan; e kin ketin kesempwaliki ar mour.” Met kapai laud ehu! Aramas pahn maiauda! Sapwellimen Koht Kaun idihdda menet pahn sewese me semwehmwe oh wia aramas tikitik kei.
Ni aramas ah pahn tepin rong inou en Paipel pwukat, e kak ahneki pepehm me mehpwukat sohte kak wiawi. Ahpw ni ah pahn kasawih kanahieng Paipel, e pahn diar me sapwellimen Koht inou kan koaros mahso pweidahr. (Aiseia 55:11) Eri, met kaidehn ma e pahn pweida. Ahpw, peidek met kitail pahn ahneki iei met: Dahme kitail anahne wia pwe kitail en iang ale kapai kan ni ah pahn pweida?
Pwehki koperment wet iei sapwellimen Koht, kitail uhdahn pahn wia soangen aramas me E pahn kupwurki en wia towe mehlel en kaunda wet. E sohte kin ekihsang kitail duwen dahme kitail pahn wia pwe kitail en kak wiahla towe mehlel. Dahme kitail anahne wia kin sansalda nan Paipel.
Sang ni ahmw pahn onop Paipel oh doadoahngki kaweid kan loale, omw mour pahn onopadahngehr kapai me kohkohdo mwohmw. (Sohn 17:3) Sounkadehdehn Siohwa kan pahn perenki sewesehkin uhk onop wet. Se luhke komwi en alehda ahnsou mwahu wet en iang towehda pwihno me solahr pahn ahneki irair en semwehmwe oh tenek sapahrek kan.