Pwoson Kamwekid Kitail en Kanengamah oh Poadidiong Kapakap
“Kumwail pil kanengamahiong, oh kalaudehla amwail koapworopwor, pwe rahnen ketidohn Kauno kerendohr.”—SEIMS 5:8.
1. Dahme karehda kitail en medemedewe Seims 5:7, 8?
“KETIER” EN Sises Krais me kitail kin awiawih ahnsou wet wiahlahr ire mehlel. (Madiu 24:3-14) Me laud sang mahso, irail ko koaros me kose me dene re pwoson Koht oh Krais ahneki kahrepe en medemewede mahsan pwukat en tohnpadahk Seims: “Eri, riei ko, kumwail kanengamah lao Kauno ketido. Kumwail kilang duwen soumwet men eh kin kanengamah ni eh kin kasikasik wa kesempwal kan en eh mwaht, duwen eh kin kanengamah kasikasik keteu ni ahnsou kan. Eri, kumwail pil kanengamahiong, oh kalaudehla amwail koapworopwor, pwe rahnen ketidohn Kauno kerendohr.”—Seims 5:7, 8.
2. Ia ekei kahpwal akan me kin lelohng irail ko me Seims kin ntingwohng?
2 Irail ko me Seims ntingiwohng nah kisinlikou sarawio anahne kasalehda kanengamah oh kapwungala soahngen kahpwal kan. Wiewiahn me tohto sohte kin parekiong dahme konehng irail kan me dene re pwoson Koht. Karasepe ehu, mehkot anahne wiawihong soahngen ineng kan me kin kekeirada nan mohngiong en ekei. Meleilei anahne kasapahldo nanpwungen Kristian kan en mahs. Re pil anahne ale kaweid pwe ren kasalehda kanengamah oh kapakap. Nin doken atail kasawih dahme Seims padahkiong irail, kitail en kilang iaduwen atail kak kapwaiada ah mahsen kan nan atail mour.
Ineng Sapwung Kan Kin Kauwehla
3. Dahme kin karehda pingiping kan nan mwomwohdiso, oh dahme kitail kak sukuhlkihsang met?
3 Meleilei sohla mih nanpwungen ekei irail kan me dene irail Kristian, oh ineng sapwung me kin karehda irair wet. (Seims 4:1-3) Akamai kin karehda kamwoaroang, oh ekei kin ni sempoak kadeik riarail Kristian kan. Met kin wiawi pwehki inangih mehn kansenamwahu en pali uduk kin wia pepei ehu nan paliwararail. Pein kitail anahne kapakapki sawas en peliandki ineng en pali uduk duwehte en ndandla, ahneki manaman, oh kepwehpwehla pwe kitail en dehr wia mehkot me pahn kauwehla onepek mwahu en mwomwohdiso. (Rom 7:21-25; 1 Piter 2:11) Nanpwungen ekei Kristian kan nan keieun senturi, noahrok kin kekeirada rehrail lau lel ni irair en ngehnin kailok oh kamaramas. Pwehki Koht sohte pahn kapwaiada arail ineng sapwung kan, re kin songosong nantiong alehda arail mehn akadei pwukat. Ma kitail ahneki soahngen ineng sapwung duwehte met, kitail pahn pekih ni kapakap ahpw kitail sohte pahn ale, pwehki atail Koht sarawi sohte kin sapeng soahngen kapakap pwukat.—Koul Kedepwidepw kan 3:44; 3 Sohn 9, 10.
4. Dahme karehda Seims kin ekerki ekei “sounkamwahl,” oh iaduwen sapwellime mahsen pahn kamwekid kitail?
4 Wiewiahn sampah, peirin, oh aklapalap kin pwarada nanpwungen ekei Kristian kan en mahs. (Seims 4:4-6) Seims ekerkin ekei “sounkamwahl” pwehki re kin kompoakepahki sampah oh eri kin dipkihda kamwahl ni pali ngehn. (Esekiel 16:15-19, 25-45) Ni mehlel, se sohte men ahnekihla lamalam, oh lokaia, oh wiewiahn sampah, pwe met pahn wiahkin kitailla imwintihti en Koht. Sapwellime Mahsan kasalehong kitail me “lamalam en peirin” kin wia kisehn lamalam suwed, de “ngehn,” loalen aramas dipan kan. (Senesis 8:21; Nempe 16:1-3; Melkahka 106:16, 17; Eklesiasdes 4:4) Eri ma kitail esehda me se anahne peiong atail lamalam en peirin, de aklapalap, de lamalam sapwung teikan, kitail en rapahki sapwellimen Koht sawas ki ngehn sarawi. Kehl wet, me kadek kalahngan en Koht kin ketikihda, me laudsang “lamalam en peirin.” Oh nin duwen Siohwa kin uhwong me aklapalap kan, e pahn ketikihong kitail kadek kalahngan ma kitail kin peiong atail lamalam dipan kan.
5. Pwehn paikihda sapwellimen Koht kadek kalahngan, dahme kitail anahne kapwaiada?
5 Iaduwen atail kak alehda kadek kalahngan en Koht? (Seims 4:7-10) Pwehn paiekihda kadek kalahngan en Siohwa, kitail anahne peikiong ih, pwungki sapwellime koasoandi kan, oh uhpaiong soahng soh lipilip kan me e kupwurki. (Rom 8:28) Kitail pil anahne “pelianda,” de ‘uhwong,’ Tepilo. E pahn ‘tangawei sang kitail’ ma se koledihte teng atail utungada sapwellimen Siohwa kaundan unsek en lahng oh sampah. Kitail ahneki sawas en Sises, me kin irehdi wiliepen sampah me suwed kan pwe sohte mehkot suwed en wiahiong kitail. Oh dehr manokehla met: Ki kapakap, peik, oh pwoson, kitail kin kerenihla Koht, oh e pahn ieiang kitail.—2 Kronikel 15:2.
6. Dahme karehda Seims ekerki ekei Kristian kan “me dipan kan”?
6 Dahme karehda Seims kin kadoadoahngkiong irail kan me dene re pwoson Koht lepin lokaiao “me dipan kan”? Pwehki re dipikihda “pei” oh kailok—irair kan me sohte konehng Kristian kan. (Taitus 3:3) “Pehrail kan” me dirkihla wiewia suwed, anahne kamwakelda. Re pil anahne kamwakelehda “mohngiongarail,” me iei utupen ineng kan. (Madiu 15:18, 19) “Irail me kohweikohdo” ko kin kalap wekiwekid arail lamalam ni arail kin kompoakepahki Koht oh ni ahnsouwohte kompoakepahki sampah. Pwehki peneu me kitail alehsang arail mehn kalimeng suwed, kitail en mwasamwasahn ahnsou koaros pwe soahng pwukat endehr kauwehla atail pwoson.—Rom 7:18-20.
7. Dahme kahrehda Seims padahkiong ekei en “sengiseng oh makimakiaki”?
7 Seims padahkiong irail kan me kin wadek nah kisinlikou en “nsensuwedla, sengiseng oh makimakiaki.” Ma re kasalehda nsensuwed en Koht, eri met pahn wia kadehdehpen arail koluhla. (2 Korint 7:10, 11) Rahnwet, ekei me dene re pwoson kin raparapaki en kompoakepahki sampah. Ma emen kitail kin raparapahki soahngen mour wet, kitail soh pahn nsensuwedkihla atail irair en pali ngehn luwet wet oh mwadang kopwungala? Ni atail wiahda wekidekla kan me konehng oh alehda mahk kalahngan en Koht, e pahn kapwarehda pepehm en peren pwehki loaletail me mwakelekel oh kapai kaperen en mour soutuk.—Melkahka 51:10-17; 1 Sohn 2:15-17.
Dehr Kadeik Emen Emen
8, 9. Dahme karehda kitail endehr kauwe de kadeikada emen emen?
8 E wia dihp ehu kauwe emen iengetail me pwoson kan. (Seims 4:11, 12) Ahpw ekei kin kauwe iengerail Kristian kan, ele met pwehki sang ni pein arail lamalam me dene irail me pwung de pwehki re men kasapwilda pein irail ni arail kin mwamwahleki mehteikan. (Melkahka 50:20; Lepin Padahk 3:29) Lepin lokaiahn Krihk me kin kawehwe ‘kauwe’ kin wehwehkiong kailok oh pil wehwehki en kadipe emen daulihla de karaune likamwih emen. Met kin wehwehki kadeikada laud emen Kristian. Iaduwen met kin ‘kauwe kosonned en Koht oh kadeikada’? Eri, sounkawehwehn Kosonnedo oh Parisi kan kin ‘kauwehla kosonned en Koht, pwe re en apwalih mwahu pein arail tiahk kan’ oh kin wia kadeik sang ni pein arail kosonned kan. (Mark 7:1-13) Me rasehng met, ma kitail kin kadeikada riatail Kristian men me Siohwa sohte pahn kadeikada, kitail soh kin ‘kadeikada kosonned en Koht’ oh dipikihda atail mwomwen kin kihkihong me kosonned en Koht sohte itar? Oh ni atail kin sapwung kauwe riatail Kristian men, kitail sohte kin kapwaiada kosonned en limpoak.—Rom 13:8-10.
9 Kitail en tamataman met: “Emente sounketikihda kosonned oh kadeik”—iei Siohwa. Sapwellime ‘kosonned me unsek.’ (Melkahka 19:7; Aiseia 33:22) Koht kelepw me ahneki pwung en ketikihda koasoandi kan oh kosonned kan ong komourla. (Luk 12:5) Ihme Seims kalelepek: “Ihs kowe pwe ke en kadeikada mehn mpomw kan?” Sohte atail pwung en kadeik oh pakadeikada mehteikan. (Madiu 7:1-5; Rom 14:4, 10) Medemedewe sapwellimen Koht kaunda unsek en lahng oh sampah oh ah sohte kin ketin lipilipilki emen oh pil medemedewe pein atail dipan pahn sewese kitail en liksang kihkihong me pein kitail me pwung oh eri kadeikada meteikan.
Liksang Suweiki Pein Kitail
10. Dahme kahrehda kitail en pohnese Siohwa nan atail mour en ehu ehu rahn?
10 Kitail en ahnsou koaros pohnese Siohwa oh sapwellime kosonned. (Seims 4:13-17) Irail kan me kin koapworopworki pein irail kin pohnsowehla Koht oh nda: ‘Rahnwet de lakapw se pahn seiloaklahng ni kahnimwo oh mihmihki ie sounpar ehu. Eri, se pahn kauwada ehu pisnes en oh koadoahkihada kiden mwohni.’ Ma kitail kin ‘koasoakepene ong pein kitail kepwehn sampah, ahpw semwehmwe mwohn silangen Koht,’ atail mour kak imwisekla lakapw oh kitail sohte pahn ahneki ahnsou mwahu en papah Siohwa. (Luk 12:16-21) Nin duwen me Seims mahsanih, kitail rasehng pwoik en pahnlahng me kin “pwarada ahnsou kis oh kin mwadang sohrala.” (1 Kronikel 29:15) Ihte ma kitail kasalehda pwoson Siohwa eri kitail pahn kak koapworopworki peren soutuk oh mour soutuk.
11. Ia wehwehn en nda, “Ma Siohwa ketin kupwurki”?
11 Kitail endehr suwei oh pohnsowehla Koht, ahpw kitail en ahneki lamalam wet: “Ma Kauno (Siohwa) ketin kupwurki, oh ma se pahn momourte, se pahn wiahda mehkotet de mehkoto.” Ni atail kin nda, “Ma Siohwa ketin kupwurki” kin kasalehda me kitail kin songosong en mwekid pahrekiong kupwure. E pil wia anahn ehu en wia doadoahk kan pwehn apwalihki atail peneinei, en seiloak nan doadoahk me pid Wehio, oh soahngen doadoahk teikan me duwehte met. Ahpw kitail endehr suwei. “Soahngen aklapalap oh suwei me sapwung” pwehki e kin kahrehda sen pohnsowehla atail en likih Koht.—Melkahka 37:5; Lepin Padahk 21:4; Seremaia 9:23, 24.
12. Ia wehwehn mahsen kan en Seims 4:17?
12 Pwehn kaimwsekla dahme e mahsanihki duwen aklapalap oh suwei, Seims mahsanih: “Eri, mehmen me wehwehki dahme pwung me en wia, ahpw sohte wia, e wiahda dihp.” Kristian koaros anahne ni aktikitik pohnese me ahr mour poahsoanda sang rehn Koht. Ma e sohte pohnese ire wet, “e wiahda dihp.” Ni mehlel, mour en kosonned wette kin pil kadoadoahk ong atail sohte wia dahme atail pwoson Koht kupwurki kitail en wia.—Luk 12:47, 48.
Peneu Me Pid Me Kepwehpwe kan
13. Dahme Seims mahsanihki duwen irail ko me kin doadoahngki sapwung arail kepwehpwe?
13 Pwehki ekei Kristian kan en mahs kin roporop en mehn kepwehpwehla de re kin natih me kepwehpwe kan, Seims wiahda lokaia kehlail kan ong ekei ohl kepwehpwe kan. (Seims 5:1-6) Ohl en sampah kan me kin doadoahngki sapwung arail kepwe kan pahn ‘sengiseng oh mwahieiki paisuwed kan me pahn lelohng irail’ ni ahnsou me Koht pahn pwain ong irail nin duwen arail wiewia kan. Ni rahn oko, me tohto kin kepwehpwehki likou, oh weren pilawa, oh wain. (Soel 2:19; Madiu 11:8) Ekei soahng pwukat kak ohla de “loangenmwet kangala,” ahpw wasaht Seims kin koasoakoasoia duwen soh katepe en kepwehpwe, ahpw kaidehn pwehki e kak mwadang ohla. Mendahki kohl oh silper sohte kin merla, ma kitail kin nekinekidpene kepwe pwukat, re pahn sohla katepe duwehte soahng kan me kin merla. “Mer” kin wehwehki me kepwe kan sohte kin kohieng ni kadoadoahk mwahu. Ihme kahrehda, kitail koaros en tamataman me “mehkot me duwehte kisiniei” iei dahme irail ko me kin likihala arail kepwe kan “kin nahkpene ni imwin rahn akan” ni ahnsou me engieng en Koht pahn kohdo pohrail. Pwehki atail momour ni “ansoun imwi,” soahngen mahsan pwukat kin ahneki wehweh tohrohr ehu ong kitail.—Daniel 12:4; Rom 2:5.
14. Dahme me kepwehpwe kan kalap wia, oh dahme kitail en wiahiong met?
14 Me kepwehpwe kan kin kalap pitih neirail soundondol kan, oh sohte pwain irail me karehda pweinerail kan me sohte kin pweipweila kin ‘liklikwerki’ en pweipweila. (Pil tehk Senesis 4:9, 10) Ohlen sampah kan me kepwehpwe kin “mour nsenamwahu.” Ni arail kin wia peren en uduk daulihla, re kin kekeirada mohngiong kan me wihla oh sohla kak mwekid oh pahn wiewiahte met ni “rahno” me koasoansoandi ong ahr kamakamla. Re ‘kadeikadahr oh kemehlahr aramas soh dipe kan.’ Seims kalelepek: “E sohte peliankumwailda?” Ahpw ehu kawehwe iei, “me pwungo; e sohte kin pelianda kumwail.” Kitail endehr natih me kepwehpwe kan. Kitail en kolokol mehkan en pali ngehn en keieu nan atail mour.—Madiu 6:25-33.
Pwoson Sewese Kitail en Kasalehda Kanengamah
15, 16. Dahme karehda e kesempalki en kasalehda kanengamah?
15 Ni ah koasoia duwen lemei en me kepwehpwe kan en sampah, Seims mwuhr kin kangoangehki Kristian kan me kin ale kalokolok en kasalehda kanengamah. (Seims 5:7, 8) Ma me pwoson kan pahn kanengamahiong arail apwal kan, re pahn ale katingpen arail lelepek erein ketier en Krais, ni ahnsou me kadeik pahn wiawihong arail sounkalokolok kan. (Madiu 24:37-41) Irail Kristian en mahs ko anahne en duwehte soumweto me kin ni kanengamah awiawih ansoun keteu duwehte tepin keteu ni ansoun pou, ni ahnsou me e kak padok wahr akan, oh kaimwseklahn keteu ni ansoun karakar me kin imwikihla tuhke kan weuwa. (Soel 2:23) Kitail pil anahne kasalehda kanengamah oh wiahiong mohngiongatail en kehlail, keieu pwehki “ketier en Kauno” Sises Krais miher met!
16 Dahme karehda kitail en kanengamahki? (Seims 5:9-12) Kanengamah pahn sewese kitail endehr kaulim ni ahnsou me iengetail me pwoson men kalingeringerih kitail. Ma kitail kin “kaulime emenemen nanpwungatail” ki ngehnin lamalam suwed, kitail pahn pakadeikada rehn Sounkadeiko Sises Krais. (Sohn 5:22) Ni ahnsou wet pwehki “ah ketier” tepiadahr oh e mwomwen kin “kesikesihnen mwohn wenihmw,” kitail en wiahda pwehn mie meleilei ni atail pahn kanengamahiong riatail Kristian kan, me kin lelohng kasongosong tohto. Pein atail pwoson kin kehlailla ni ahnsou me kitail kin tamanda me Koht kin katingih Sohp pwehki e ni kanengamah dadaur ah kasongosong kan. (Sohp 42:10-17) Ma kitail kin kasalehda pwoson oh kanengamah, kitail pahn kilang me “Kauno (Siohwa) me diren kadek oh kalahngan.”—Maika 7:18, 19.
17. Dahme karehda Seims mahsanihki, “Dehr kahula”?
17 Ma kitail sohte kin kanengamah, kitail pahn doadoahngki sapwung lowetail ma kitail mihla pahn pwunod. Karasepe ehu, kitail ele kak wiahda kahula kan me lemei. Seims mahsanih: “Dehr kahula,” oh panawihki me kitail en dehr wiahda kahula soh katepe kan de ma kitail mwakar. Ahnsou koaros kahukihla lokaia ehu pwe dene e mehlel pahn pil mwalaun. Ihme karehda, atail lokaia en mehlel, atail ehi en ehi, oh soh soh. (Madiu 5:33-37) Ni mehlel, Seims sohte kin kosokosoia me e sapwung en kahukihla ahmw pahn lokaia mehlel nan mwoalen kopwung.
Pwoson oh Atail Kapakap kan
18. Pahn soahngen irair dah me kitail “en kapakap” oh “koulki melkahka kan”?
18 Kapakap pahn wia mehkot kesempwal nan atail mour ma se pahn koledi atail lokaia, oh kasalehda kanengamah, oh kolokolte atail pwoson Koht. (Seims 5:13-20) Keieu ma kitail mihla pahn kasongosong eri kitail en “kapakap.” Ma kitail kin peren, kitail en “koulki melkahkahn kaping,” duwehte me Sises oh sapwellime wahnpoaron kan wia ni ahnsou me e tepiada Katamanpen ah matala. (Mark 14:26, footnote) Ni ahnsou kan, ele kitail kin dirkihla soahngen kalahngan ong Koht me karehda kitail en koulki koul en kaping ong ih nan mohngiongatail. (1 Korint 14:15; Episos 5:19) Oh ia uwen kaperen en kapinga Siohwa nan koul kan nan mihding en Kristian kan!
19. Dahme kitail en wia ma se soumwahuda ni pali ngehn, oh dahme karehda sen wiahki soahngen kahk wet?
19 Ele se sohte pahn men koul ma kitail kin soumwahu ni pali ngehn, ele pwehki wiewia sapwung ehu de atail sohte kin mwenge kaukaule ni tehpel en Siohwa. Ma kitail mihla nan soahngen irair wet, kitail en ni karakarahk ekerdo elder kan pwe ren ‘kapakapkin kitail.’ (Lepin Padahk 15:29) Re pil pahn ‘keiehkin kitail leh ni mwaren Kauno (Siohwa).’ Duwehte leh kansenamwahu pohn ohla, arail lokaiahn kamweit kan oh kaweid en Pwuhk Sarawi pahn sewese irehdi atail kapwunod kan, peikasal kan, oh masak. ‘Kapakap wet me pahn wiawi ni pwoson, pahn kamwahuwikitailla’ ma e kin utuhtkihda pein atail pwoson. Ma elder kan diarada me atail soumwahu en pali ngehn kin kohsang dihp toutou ehu me kitail wiahda, re pahn ni kadek kasansalehda atail sapwungo oh nantiong sewese kitail. (Melkahka 141:5) Oh ma kitail kin koluhkihla met, kitail kak pwoson me Koht pahn karonge atail kapakap oh mahkong kitail.
20. Dahme karehda sen wehkada dipatail kan oh kapakapki emen emen?
20 ‘Wehkpene dipatail kan’ pahn irehdi kitail endehr pwurehng wiahda dihp. E pahn kapwarehda lamalam en limpoak, irair ehu me pahn kamwekidih kitail en “kapakapki emenemen.” Kitail kak pwoson me met pahn mie katepe pwehki kapakap en ‘aramas pwung men’—emen me kin kasalehda pwoson oh me Koht kin kupwurki—kin wiahda soahng tohto rehn Siohwa. (1 Piter 3:12) Soukohp Elaisa ahneki luwet akan me duwehte atail, ahpw ah kapakap kan me lipwalipw. E kapakap, oh e keteu sohte mwerki sounpar 3 elep. Ni ahnsou me e pwurehng kapakap, keteu mwerdi.—1 Nanmwarki 17:1; 18:1, 42-45; Luk 4:25.
21. Dahme kitail kak wia ma iengetail Kristian men “salongasang padahk mehlel”?
21 Iaduwen ma emen tohnmwomwohdiso kin “salongasang padahk mehlel,” peilahsang padahk pwung oh wiewia pwung? Kitail ele kak kapwurehdo ih sang nan ah sapwungo sang ni kaweid en Paipel, kapakap, oh sawas teikan. Ma sawas pwukat pweida, met kin kolokol ih pahn meirong en Krais oh kapit ih sang melahn pali ngehn oh kadeik en kasorala. Ni atail sewese aramaso me wiahda dihp, kitail kin pwaidi dipe tohto kan. Ni ahnsou me me dipano me ale kaweid kin sohpeisang ah wiewia sapwungo oh koluhla, oh rapahki mahkpen dipe, kitail pahn perenki me kitail koadoahke pweipweidi en dipe kan.—Melkahka 32:1, 2; Sud 22, 23.
Mehkot ong Kitail Koaros
22, 23. Iaduwen atail pahn mwekidikih mahsen kan en Seims?
22 E sansal me, nein Seims kisinlikouwo kin audaudki mehkot me katapan ong kitail koaros. E kasalehong kitail iaduwen kitail en powehdi kasongosong kan, oh kaweidihkin kitail endehr lipilipilki meteikan, oh kangoangehkin kitail en wia doadoahk kan me pwung. Seims kangoangehkin kitail en koledi lowetail, oh en pelianda lamalam en sampah, oh en utungada meleilei. Sapwellime mahsan kan pahn pil karehong kitail en kanengamah oh poadidiohng kapakap.
23 Mehlel, nein Seims kisinlikouwo kin tepin pekederlahng Kristian keidi kan en mahs. Ahpw, kitail koaros en mweidohng kaweid en kisinlikou wet en sewese kitail en kolokolte tengeteng atail pwoson. Mahsen kan en Seims kak utungada pwoson me kaweidih kitail ong wiewia tengeteng kan nan doadoahk en Koht. Oh kisinlikou sarawi wet kin kauwada pwoson me poatopoat me pahn karehong kitail en wia Sounkadehdehn Siohwa kan me kanengamah, oh kin poadidiohng kapakap rahnwet, erein “ketier en Kaun” Sises Krais.
Iaduwen Komw Pahn Sapeng
◻ Dahme karehda ekei Kristian kan en mahs anahne wekidala arail lamalam oh wiewia?
◻ Peneu dahieu Seims kihong me kepwehpwe kan?
◻ Dahme karehda kitail en kasalehda kanengamah?
◻ Dahme karehda sen kapakap ahnsou koaros?
[Credit Line5]
Pictorial Archive (Near Eastern History) Est.
[Kilel nan pali 19]
Ekei Kristian kan en mahs anahne kanengamahiong iengerail me pwoson teikan
[Kilel nan pali 20]
Kristian kan anahne kanengamah, limpoak, oh poadidiohng kapakap