Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w98 2/1 pp. 20-25
  • Siohwa Kahredohng Sapwellime Seri Tohto Lingan

Sohte kasdo ong met

Kupwurmahk, mehkot sapwung en kihda kasdo

  • Siohwa Kahredohng Sapwellime Seri Tohto Lingan
  • Kahn Iroir Pakpakairki Wehin Siohwa—1998
  • Sawaspen Oaralap kan
  • Ire kan me Duwehte Met
  • Kahredohng nan Lingan
  • “Ipwisang Rehn Koht”
  • Kadehdehpen Pwekipwekda
  • Sounkadehdehpen Ngehno
  • Pedolong Nan Inou Tohrohr kan
  • Malipilipdo, Pilipilda, oh Loalopwoat
  • Saledek Lingan Kerendohngehr Sapwellimen Koht Seri Kan
    Kahn Iroir Pakpakairki Wehin Siohwa—1998
  • Ke Aleier “Ngenen Padahk Mehlel”?
    Kahn Iroir Pakpakairki Wehin Siohwa—2002
  • Kihpene Mehkan En Nanleng Oh Mehkan En Sampah
    Kahn Iroir Pakpakairki Wehin Siohwa—2006
  • Sihpw Teikan Oh Inou Kapw
    Kahn Iroir Pakpakairki Wehin Siohwa—1998
Kilang Pil Ekei
Kahn Iroir Pakpakairki Wehin Siohwa—1998
w98 2/1 pp. 20-25

Siohwa Kahredohng Sapwellime Seri Tohto Lingan

“Me uhdahn pwungiong Koht​—⁠me ketin kapikada oh komokomour mehkoaros​—⁠en ketin kaunsekala Sises sang ni eh lokolok pwehn kahredohng sapwellime seri tohto, pwe re en iang ahneki sapwellime lingan.”​—⁠IPRU 2:⁠10.

1. Dahme karehda kitail kak kamehlelehki me kupwuren Siohwa ong tohnsampah pahn pweida?

SIOHWA kapikada sampah pwehn wia wasahn kousoan poatopoat ong peneinei en aramas unsek me pahn paikihda mour soutuk. (Eklesiasdes 1:4; Aiseia 45:​12, 18) Mehlel, atail pahpa kahlap Adam dipada oh eri kadaurong nah seri kan dihp oh mehla. Ahpw kupwuren Koht ong tohnsampah pahn pweida ki sapwellime Kadaudek Inoudao, Sises Krais. (Senesis 3:15; 22:18; Rom 5:​12-21; Kalesia 3:16) Limpoak ong tohnsampah kamwekidih Siohwa Koht en ketikihdohki “sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Oh limpoak kamwekidih Sises en “tounmeteikihla moure, pwe me ngeder en maiauda.” (Madiu 20:28) “Meirong pahrek” wet pwainsapahldo pwung oh koapworopwor me Adam kasalongehla oh karehda en mie mour soutuk.​—⁠1 Timoty 2:​5, 6; Sohn 17:⁠3.

2. Dahme kadoadoahkpen meirong tomw en Sises kin mwete ni Rahn en Tomw en Israel me kin wiawi nan ehu ehu pahr?

2 Kadoadoahkpen meirong tomw en Sises kin wia mehn karasaras ong ni Rahn en Tomw me kin wiawi pak ehu nan pahr koaros. Ni rahno, samworou lapalap en Israel kin keiou meirongkihla kou men nin duwen meirong en dihp oh wahla ntahn mahno ni kohpwa sarawio nan Pere me Keiou Sarawi nan imwpwalo, oh mwuri nan tehnpas sarawio. Meirong wet kin wiawi pwehn pwainda dipen pein samworouwo, oh tohnimwe, oh keinek en Lipai. Me rasehng met, Sises Krais ketikihong Koht kesempwalpen nta keieu pwehn pwaindi dipen “rie” kan en pali ngehn. (Ipru 2:12; 10:​19-22; Lipai 16:​6, 11-14) Ni rahn en Tomwo, samworou lapalapo pil kin meirongkihla kuht emen nin duwen meirong en dihp oh wahla ntao nan Pere me Keiou Sarawi, pwehn tomwki dipen keinek 12 en Israel me sohte wia keinek en samworou. Me duwehte met, Samworou Lapalap Sises Krais pahn doadoahngki moure pwehn pwainda tohnsampah kan me kasalehda pwoson, oh iriswei sang rehrail diparail kan.​—⁠Lipai 16:⁠15.

Kahredohng nan Lingan

3. Nin duwen me Ipru 2:​9, 10 kasalehda, dahme Koht ketin wiewia erein sounpahr 1,900?

3 Erein 1900, Koht kin ketin wiewia mehkot kaselel me pid “rien” Sises kan. Me pid duwen met wahnpoaron Pohl ntingihdi: “Ahpw me kitail kin kilang, iei Sises! Ni ahnsou kis e ketin sapwellimanki dehu ehu me mi pahnangin tounleng kan, oh met e ahpw lengilengkidahr lengileng lingan oh wahu pwehki eh ketin lokolok oh pwoula; iei sang ni kalahngan en Koht me Sises ketin pwoukihla aramas koaros. Me uhdahn pwungiong Koht​—⁠me ketin kapikada oh komokomour mehkoaros​—⁠en ketin kaunsekala Sises sang ni eh lokolok pwehn kahredohng sapwellime seri tohto, pwe re en iang ahneki sapwellime lingan. Pwe iei Sises me kin ketin kahluwairaildohng nan mour soutuk.” (Ipru 2:​9, 10) Sounkomouro iei Sises Krais, me sukuhlkihdi peik unsek sang ni mehkan me e lokolongki nin doken ah momour pohn sampah nin duwen aramas men. (Ipru 5:​7-10) Sises me tepin pwekipwekda nin duwen sapwellimen Koht seri ngehnin.

4. Iahd oh iaduwen Sises pwekipwekda nin duwen sapwellimen Koht Ohl ni pali ngehn?

4 Siohwa doadoahngki sapwellime ngehn sarawi, de kehl manaman, en pwekada Sises ni duwen sapwellime Ohl ngehnin, en wisikdohng lingan en nanleng. Ni ah kelepwla rehn Sohn Sounpapidais, Sises kaduhdi douluhl pahn pihl pwehn wia kasalepen ah ketikihong Koht pein ih. Rongamwahu en Luk mahsanih: “Kedekedeo, ni aramas ako koaros ar papidaislahr rehn Sohn, Sises pil ketin iang papidaisla. Nindoken eh ketin loulou, nanleng pa ritpeseng oh ngehn sarawi ahpw ketidiong powe ni mwomwen mwuroi men; a ngihl ehu ahpw peidihdo sang nanleng, me mahsanih, ‘Kowe, me iei nei pwutak kompoake, me I kin kupwurperenki.’” (Luk 3:​21, 22) Sohn kilangada ngehn sarawi ketidiong pohn Sises oh rong en Siohwa mahsanih ni sansal ah kupwurperenki Sises me iei ih Sapwellime Ohl kompoake. Ni ahnsouwo oh ki ngehn sarawi, Siohwa pwekida Sises nin duwen tepin ‘sapwellime seri tohto, me pahn wisikdohng lingan.’

5. Ihs me tepin paikihda meirong en Sises oh ia uwen tohtohn irail?

5 “Rien” Sises kan me tepin ale kapai sang sapwellime meirong. (Ipru 2:​12-18) Nan kasansalo, wahnpoaron Sohn kilangada arail miher nan lingan pohn Dohl en Saion nanleng rehn Sihmpwulo, Kaun Sises Krais me iasadahro. Sohn pil kasalehda uwen tohtohn irail, oh mahsanih: “Eri, I ahpw kilangada Sihmpwulo me ketiket pohn dohlen Saion; oh aramas lopw pahnen pahkid me iang ket wasao, me mwaren Sihmpwulo oh mwaren Sahm ntinting ni temwarail kan. . ..Re kamaiaudahsangehr rehn aramas teikan oh iei irail me tepin meirongalahr ong Koht oh Sihmpwulo. Iei irail me sohte likamw pwoat dierekda sang nan awarail kan; sohte kisin samin kis mie rehrail.” (Kaudial 14:​1-5) Ihme ‘sapwellime seri tohto me wisikdohng lingan’ nanleng kin tohtohki ihte meh 144,000​—⁠Sises oh rie kan ni pali ngehn.

“Ipwisang Rehn Koht”

6, 7. Ihs me “ipwisang Koht,” oh ia wehwehn met ong irail?

6 Irail ko me Siohwa pwekida kin “ipwisang rehn Koht.” Ni ah koasoia duwen soahngen aramas pwukat, wahnpoaron Sohn ntingihdi: “Sapwellimen Koht men sohte kin mihmihte nan dihp, pwehki ieias en Koht [sapwellime wahr en kaparahda] kin ketiket reh, oh Koht, iei Seme; ihme e sohte kak mihmihki nan dihp.” (1 Sohn 3:⁠9) “Wahr en kaparahda” wet iei ngehn sarawi en Koht. Ngehn sarawi oh padahk mehlel en Koht kin kihong emen emen 144,000 ko “ipw kapw ehu” ong koapworopwor en nanleng.​—⁠1 Piter 1:​3-5, 23.

7 Sises iei sapwellimen Koht Ohl sang ah ipwidi nin duwen aramas men, duwehte ohl unseko Adam kin wia “sapwellimen Koht ohl.” (Luk 1:35; 3:38) Ahpw, mwurin Sises papidaisla, e kesempwal me Siohwa en mahsanih: “Kowe, me iei nei pwutak kompoake, me I kin kupwurperenki.” (Mark 1:11) Sang ni mahsan pwukat iangahki mweredi en ngehn sarawi, e sansalda me Koht ahnsouwo pwainda Sises nin duwen Sapwellime Ohl ni pali ngehn. Ni karasaras, Sises eri kohieng “ipw kapw” ehu iangahki pwung en pil pwurehng ale mour nin duwen sapwellimen Koht Ohl ni pali ngehn nanleng. Duwehte ih, rie kan ni pali ngehn 144,000 pil “ipwsapahl.” (Sohn 3:​1-8; kilang The Watchtower, November 15, 1992, pali 3-6.) Pil duwehte Sises, Koht ketin keiedi irail oh kehkehlikiong irail en kalohkiseli rongamwahuwo.​—⁠Aiseia 61:​1, 2; Luk 4:​16-21; 1 Sohn 2:⁠20.

Kadehdehpen Pwekipwekda

8. Ia mehn kadehde me ngehn sarawi pwekida (a) Sises (b) sapwellimen tohnpadahk kan en mahs?

8 Mie mehn kadehde me Sises pwekipwekihda ngehn. Sohn Sounpapidais kilangada ngehn sarawi ah mwerediong pohn Sises, oh rong kapitien Koht ah mahsanih duwen keidi kapw en Mesaia me wiahla sapwellimen Koht Ohl ni pali ngehn. Ahpw iaduwen tohnpadahk kan en Sises pahn ese me re pwekipwekihda ngehn? Eri, rahno me e poukadala nanleng, Sises mahsanih: “Pwe Sohn papidaisihkinkumwailehr pihl, ahpw mwurin rahn ekei kumwail pahn papidaiskihla ngehn sarawi.” (Wiewia 1:5) Tohnpadahk kan en Sises “papidaiskihlar ngehn sarawi” nin rahn en Pendekos 33 C.E. Mweredi en ngehn sarawi kin iangete ‘ngihl ehu ahpw peidihdo sang nanleng, me likamwete ngihlen engimah ehu’ oh “mpwulen kisiniei me sirangarang” pohn moangen emen emen tohnpadahk kan. Me keieu kapwuriamwei iei en tohnpadahk kan koahiek en “lokolokaiahki ekei lokaia tohrohr, nin duwen me ngehn sarawi ketin kalokaiahkin irail.” Ihme karehda mie mehn kadehde sang dahme re kilang oh rong me elen kolahng nan lingan en nanleng nin duwen sapwellimen Koht seri kan ritdahngehr werek kan en Krais.​—⁠Wiewia 2:​1-4, 14-21; Soel 2:​28, 29.

9. Ia mehn kadehde me mehn Sameria kan, oh Kornelios, oh meteikan nan senturi keieu kin pwekipwekihda ngehn sarawi?

9 Ahnsou kis mwuri, sounkalohko Pilip kalohkseli nan Sameria. Mendahki mehn Sameria kan pwungki rohng me e kalohngki oh papidaisla, re sohte ahneki mehn kadehde me Koht pwekirailda nin duwen sapwellime seri kan. Ni ahnsou me wahnpoaron Piter oh Seims kapakapkin irail oh pwil pehra ko pohn irail ko me pwoson, re “ahpw ale ngehn sarawi” ni soahngen ahl kei me sansal ong irail ko me kilikilang. (Wiewia 8:​4-25) Met kin wia mehn kahdehde me mehn Sameria kan me pwoson pwekipwekdahr nin duwen sapwellimen Koht seri kan. Ni ahl wette, nan pahr 36 C.E., Kornelios oh Mehn Liki teikan alehda padahk mehlel en Koht. Piter oh mehn Suhs pwoson kan me iang ih “inenen pwuriamweikihla duwen Koht eh pil ketikihong sapwellime ngehn sarawi pohn mehn liki kan. Pwehki ar rongada duwen ar tapihada lokolokaiahki ekei lokaia tohrohr oh kapikapinga sapwellimen Koht roson lapalap.” (Wiewia 10:​44-48) Kristian tohto nan keioun senturi alehda “kisakis en ngehn,” duwehte lokaiahki lokaia tohrohr kan. (1 Korint 14:​12, 32) Aramas pwukat eri ahnekilahr mehn kadehde sansal me re pwekipwekihda ngehn. Ahpw iaduwen Kristian kan en mwuhr pahn kak ese ma re pwekipwekihda ngehn de soh?

Sounkadehdehpen Ngehno

10, 11. Me poahsoanda pohn Rom 8:​15-17, iaduwen komw pahn kawehwe me ngehno kin kadehdeiong irail ko me wia kisehn tohnsohso en Krais?

10 Kristian keidi 144,000 kan koaros kin ahneki mehn kadehde mwuledek me re ahneki ngehnin Koht. Ni ahl wet, Pohl ntingihdi: “Ngehno kin wiahkin kumwail sapwellimen Koht. Oh sang ni manaman en ngehno emenemen kitail kin likweriong Koht, ‘Semei, Semei.’ Ngehnen Koht kin ketin ehuong ngehnitail oh kadehdehda me kitail sapwellimen Koht seri. Pwehki atail wiahlahr sapwellime, kitail pahn pil paieki pai kan me e ketin nekinekidohng sapwellime seri kan, oh kitail pil pahn iang Krais paieki dahme Koht ketin nekinekidohng; pwe ma kitail iang Krais ni sapwellime lokolok, eri, kitail pil pahn iang ni sapwellime lingan.” (Rom 8:​15-17) Kristian keidi kan kin ahneki pepehm me irail sapwellimen Samarailo nanleng, de pepehm kehlail me Koht sapwellimankin irail. (Kalesia 4:​6, 7) Re uhdahn kamehlele me Koht pwekirailda en wiahla sapwellime seri kan ni pali ngehn nin duwen tohnsohso kan me pahn iang Krais nan Wehin nanleng. Ni ahl wet, ngehn sarawi en Siohwa kin wie doadoahk kesempwal ehu.

11 Pahn mwekid en ngehn sarawi en Koht, ngehno, de pepehm kehlail wet, me me keidi kan kin ahneki kin kamwekid irail en kapwaiada ni ahl ehu me re pahn pein daodoahngki dahme Koht mahsanihki koapworopwor en nanleng. Karasepe ehu, ni ahnsou me re kin wadek dahme Pwuhk Sarawi koasoiahki sapwellimen Siohwa seri kan ni pali ngehn, re kin pein pehm me soahngen mahsan pwukat kin dokedoke irail. (1 Sohn 3:⁠2) Re ese me re “papidaisongehr Krais Sises” oh ong ah matala. (Rom 6:⁠3) Dahme re kamehlel unsek iei me irail iei sapwellimen Koht seri kan ni pali ngehn, me pahn mehla oh kaiasadahng lingan en nanleng, duwehte me wiawihong Sises.

12. Dahme ngehnin Koht kin kapwarehda nan loalen Kristian me keidi kan?

12 Pwekipwekda pwehn wiahla seri kan ni pali ngehn kaidehn ineng ehu me emen kekeirada. Irail kan me pwekipwekihda ngehn sohte kin men kohla nanleng pwehki ren pitsang pwunodki kahpwal kan pohn sampah ahnsouwet. (Sohp 14:⁠1) Ahpw, ngehnin Siohwa kin kapwarehda loalen me keidi kan koapworopwor oh ineng kan me weksang dahme aramas koars kin ahnehr. Irail pwukat me pwekipwekdahr ese me mour soutuk ni duwen aramas unsek pohn sampah nan paradais oh kapilpilkihpene peneinei oh kompoakepah peren kan pahn inenen kaselel. Ahpw, soahngen mour wet kaidehn ih ineng kehlail en mohngiongarail. Me keidi kan ahneki soahngen ineng oh koapworopwor kehlail en mour nanleng me karehda re nsenki tohnmeteikihla koapworopwor oh soahng koaros nin sampah pwehki met.​—⁠2 Piter 1:​13, 14.

13. Nin duwen me 2 Korint 5:​1-5 kasalehda, ia ‘ineng kehlail’ en Pohl, oh dahme met kin kasalehda me pid irail kan me pwekipwekihda ngehn?

13 Koapworopwor en mour nanleng me Koht ketikihda me inenen kehlail nan loalen soahngen irail pwukat me karehda arail pepehm kin duwehte en Pohl, me ntingihdi: “Pwe kitail ese me impwal wet me kitail kin mihmi loale​—⁠iei paliwar en sampah wet​—⁠ni eh pahn mwerpeseng, Koht pahn ketikihong kitail ihmw ehu nanleng pwe kitail en kin kousoan ie; eri, dehu wet pein ih me ketin wiahda oh e pahn poatopoatete. Eri, nin sampah wet, kitail kin tihwohkihla atail men pedolong nan deutail nanleng, pwe ma kitail pahn alehdi dèutailo, e pahn mie paliwaratail. Nindoken atail kin mihmi nan impwal en sampah wet, kitail kin weirengkihla atail pwunod, kaidehkin pwehki atail men kesehla paliwaratail mehn sampah wet, ahpw pwehki atail ngoangki alehdi paliwaratail mehn nanleng, pwe mehla en lohdiong pahn mour. Koht me ketin kaunopadahng kitail wekidekla wet, iei me e ketkihongkin kitail ngehne, mehn kadehdepen mehkoaros me e pahn ketikihong kitail.” (2 Korint 5:1-5) ‘Ineng kehlail’ en Pohl iei en kaiasadahng nanleng nin duwen ngehn men me sohte kak pwurehng mehla. Ni ah kosoia duwen paliweren aramas, e doadoahngki karasaras en “impwal” ehu me mengei en rengkidi, me luwetasang ihmw ehu oh ongete ahnsou mwotomwot kis. Mendahki arail momour pohn sampah ni paliwar uduk me kak mehla, Kristian kan me ahneki ngehn sarawi nin duwen pweipwei ehu ong mour kohkohdo nanleng kin kilikilangwohng “ihmw ehu sang rehn Koht,” paliwar ngehnin ehu me sohte kak pwurehng mehla. (1 Korint 15:​50-53) Duwehte Pohl, re kak nda ni ngoang: “Eri, loalatail diren kehlail oh kitail kin ngoangki pedoisang nan paliwaratail wasaht oh kolahng nan deutail rehn Kauno.”​—⁠2 Korint 5:⁠8.

Pedolong Nan Inou Tohrohr kan

14. Ni ah tepiada kasarawi en Katamano, inou dahieu me Sises tepin kasalehda oh pwukoa dahieu me inouwo kin wia me pid Israel en ngehn?

14 Kristian kan me pwekipwekihda ngehn kin uhdahn kamehlele me re pedolongehr nan inou tohrohr riau. Sises koasoia duwen ehu inou pwukat ni ahnsou me e doadoahngki pilawa soh mwet oh wain pwehn tepiada Katamanpen ah matala me kohkohdo oh koasoiahki kep en waino: “Dahl wet iei delen sapwellimen Koht inou kapw me wiawihkidahr ntahi, me kepwilipwildier pwehki kumwail.” (Luk 22:20; 1 Korint 11:25) Ihs me towe inou kapwo? Siohwa Koht oh tohn Israel en pali ngehn​—⁠irail ko me Siohwa kupwurki en kahredohng nan lingan en nanleng. (Seremaia 31:​31-34; Kalesia 6:​15, 16; Ipru 12:​22-24) Pwehki kadoadoahkpen ntahn Sises me kapwilpwildi, inou kapwo ketikihsang nan wehi kan pwihn en aramas ehu ong mwaren Siohwa oh wiahkihla Kristian pwekipwekihda ngehn pwukat kisehn “kadaudek” en Eipraam. (Kalesia 3:​26-29; Wiewia 15:14) Inou kapwo ketikihong mehn Israel kan koaros en ngehn en wisikdohng lingan ni ahr pahn kaiasadahng mour soutuk nanleng. Pwehki e wia “inou poatopoat ehu,” katingpe kan pahn mihmi kohkohlahte. Ahnsou kohkohdo pahn kasalehda ma inou wet pahn pil pwukoahki doadoahk teikan erein Pahr Kido oh sounpar kan en mwuri.​—⁠Ipru 13:⁠20.

15. Me parekiong Luk 22:​28-30, mehnia pil ehu inou me sounidawehn Sises kan ni pali ngehn pil pedolong loale?

15 “Seri tohto” kan me Siohwa kupwurki en ‘kahredohng nan lingan,’ pil pedolongehr nan inou en Wehin nanleng. Me pid inou wet nanpwungen ih oh sapwellime sounidawehn nan lipwe kan, Sises mahsanih: “Kumwail kin mihmihte rehi ahnsou koaros nan ei apwal akan; oh nin duwen Semei eh ketikihongieier manaman en kaunda wasa, I pil pahn kihong kumwail soangen manamanohte. Kumwail pahn iang ie konot de sak ni ei tehpel nan ei wehi, oh kumwail pahn iang mwohd nan mwoalomwail mwoalen kopwung pwe en wia kopwungpen kadaudek eisek riaun Israel.” (Luk 22:​28-30) Inoun Wehio kasarawihla ni ahnsou me tohnpadahk kan en Sises keikihdi ngehn sarawi ni Pendekos en pahr 33 C.E. Inouwo kin wie doadoahkte nanpwungen Krais on ienge nanmwarki kan kohkohlahte. (Kaudial 22:⁠5) Eri, ihme karehda, Kristian kan me pwekipwekihda ngehn kin kamehlele me re mih nan inou kapwo oh nan inoun Wehio. Ihme karehda, ni kasarawi en Sak en Soutuk en Kauno, irail luhwen me keidi malaulau kei me momourte pohn sampah kin tungoale pilawao, me kin mwete paliwaren aramas soh dipeo Sises, oh nim waino, me kin wehwehki nta unsek en Sises me kapwilpwildi ni ah matala oh kamanahla inou kapwo.​—⁠1 Korint 11:​23-26; kilang The Watchtower, February 1, 1989, pali 17-20.

Malipilipdo, Pilipilda, oh Loalopwoat

16, 17. (a) Pwehn ‘wisikdohng nan lingan,’ dahme 144,000 kan koaros anahne kasalehda? (b) Ihs “nanmwarki ehk ko,” oh ia arail wiewia ong luhwen “rien” Krais kan me momourte nan sampah?

16 Tepin kadoadoahkpen meirong tomw en Sises karehong 144,000 ko en malipilipdohng mour nanleng oh pilipilda en pweipwekihda ngehn sang rehn Koht. Pwehn ‘wisikdohng lingan,’ ni mehlel, re anahne ‘wia uwen me re kakohng pwehn wiahiong arail malipilipdo oh pilipilda en uhdahn mehlel,’ oh re anahne kadehde arail loalopwoat lau re mehla. (2 Piter 1:10; Episos 1:​3-7; Kaudial 2:10) Luhwen me keidi malaulau kan me momourte pohn sampah kin kolokolte arail lelepek mendahki uhwong kan sang “nanmwarki ehk” me kin mwete manaman kan koaros en pelien politik. Tohnleng men mahsanih: “Re pahn mahweniong Sihmpwulo; ahpw re pahn lohdi pahn Sihmpwulo oh sapwellime aramas pilipil kan, me e ketin malipe, oh me loalopwoat, pwehki Sihmpwulo eh Kaunen kaun akan oh Nanmwarkien en nanmwarki kan.”​—⁠Kaudiahl 17:​12-14.

17 Kaun en aramas kan sohte kak wiahiong Sises mehkot, “Nanmwarki en nanmwarki kan,” pwehki e ketiket nanleng. Ahpw re kin kasalehong luhwen “rie” kan me momourte nan sampah arail kailok. (Kaudiahl 12:17) Kailok wet pahn imwisekla nan mahwen en Koht ni Armakedon, ni ahnsou me kana pahn kohwong “Nanmwarki en nanmwarki kan” oh “rie” kan​—⁠“irail ko me malipilipdo oh pilipilda oh loalopwoat.” (Kaudiahl 16:​14, 16) Nin doken met, Kristian kan me pwekipwekihda ngehn kin inenin soupisek. Dahme re wiewia met, mwohn Siohwa kahredohng irail nan lingan?

Ia Ahmw Pasapeng?

◻ Ihs me Koht ‘kahredohng nan lingan en nanleng?

◻ Ia wehwehn en “ipwisang rehn Koht”?

◻ Iaduwen ‘ngehno ah wia kadehde’ ong ekei Kristian kan?

◻ Irail kan me pwekipwekihda ngehn wisikilong nan inou dah kei?

[Kilel nan pali 23]

Ni Pendekos 33 C.E., mie mehn kadehde me kasalehda me elen pedolong nan lingan en nanleng ritdaiehr

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share