Nantiong Doadoahk Pwehn Kaunsekala Komourpamwail!
“Eri, kompoakepahi ko, . . . nantiong doadoahk ni lemmwin oh poadidi pwe kumwail en kaunsekala komourpamwail.”—PILIPAI 2:12.
1, 2. Madamadau ndand dah kei kin kahrehong aramas tohto en lemeleme me re sohte kak kaunda pein ahr mour?
“E koasoanehdier ken ipwidi ni soangen mwohmw wet?” Peidek wet me ahpwtehn kohda nan kilin makisihn ndand ehu. Pahnangin oaralap wet, lepin lokaia pwukat ntingihdi: “Irair en aramas akan, oh pil pilipil kan nan omw mour. Repenpen kapw kan kin kasansalehda me ke alehdi irair pwukat sang omw pahpa oh nohno kan.” Koasoi pwukat ele mwein pahn kak kahrehong ekei aramas en ahneki madamadau me irail sohte kak kaunda pein ahr mour.
2 Ekei kin kihkihong me kaweid en arail pahpa oh nohno kan de padahk en arail sounpadahk kan me suwed oh kin kahreong irail en lelohng nan mour kansensuwed. Irail lemeleme me re sohte kak en pitsang, re uhdahn pahn pil wiahda sapwung kan me ahr pahpa oh nohno kin wia, oh poahsoankihda ahr wiewia kan pohn ahr ineng sapwung kan, oh salelepek ong Siohwa—met kin wehwehki me irail pahn wiahda pilipil suwed kan. Ih met, me Paipel kin padahkihong kitail? Mie ekei aramas me kin poadidi nan pelien lamalam kan oh kin kamehlele me Paipel kin wia padahk duwehte met, padahk me dene wiewia kan koaros en aramas kileldier mwohn re ipwidi. Nin duwen padahk wet, me Koht ketin koasoanehdier wiewia kan koaros nan ahmw mour mwohn ke ipwidi.
3. Padahk kangoang dahieu me Paipel ketkihda me pid atail kak wiahda pein atail pilipil kan ong ni ahnsou kohkohdo?
3 Padahk pwukat kin wekpeseng ahpw kin ahneki wehwehteieu: Kaidehn ahmw pilipil en koasoanehdi omw mour. Padahk wet inenen kansensuwed ehu, oh pahtou kin kalaudehla omw kahpwal. Lepin Padahk 24:10 mahsanih: “Ma ke me luwet ni ahnsou apwal, ke me uhdahn lamalam luwet.” Kitail kin ale kangoang en sukuhliki me nin duwen me Paipel kasalehda kitail kak ‘kaunsekala komourpatail.’ (Pilipai 2:12) Iaduwen kitail kak kakehle atail likih iren Paipel wet?
Doadoahk en “Kauwada” Pein Kitail
4. Edetehn 1 Korint 3:10-15 kin koasoia duwen kauwada ihmw ehu ki dipwisou kan me sohte kak mwasingkihla kisiniei, dahme met sohte kin wehwehki?
4 Medewehla duwen karasaras en wahnpoaron Pohl me diarekda nan pwuhken 1 Korint 3:10-15. Nan pwuhk wet, e koasoia duwen doadoahk en Kristian ehu me kin pid kauwada ihmw ni karasaras, oh mouren eh karasaras kak kadoadoahkong pein kitail oh aramas teikan. Ahn Pohl koasoai kin wehwehki me irail ko me padahki oh kaiahne tohnsukuhl men kin pwukoahki ma tohnsukuhlo pilada en papah Siohwa oh kolokolte ah lelepek? Soh. Pohl kin kasansalehda kesempwalpen doadoahk en sounpadahk men en wia uwen me e kak en kauwada ihmw ni karasaras. Ahpw nin duwen me kitail sukuhlikier nan artikel en mwowe, e sohte wehwehki me tohnsukuhlo sohte kak wia eh pilipil. Ni mehlel, ahn Pohl karasaras kin keieu pid doadoahk me kitail kin wia ong aramas teikan, kaidehn ong pein kitail. Met sansal pwehki Pohl kin koasoia duwen doadoahk sakanakan en kauwada ihmw me kin sohrala ahpw sounwia ihmw kin pitsang. Ekei pak, Paipel kin kadoadoahkong soangen karasaras ong doadoahk me kitail kin wiaiong pein kitail.
5. Mehnia iren Paipel kan kin kasalehda me Kristian akan anahne wia doadoahk en “kauwada” ihmw akan ni karasaras ong pein irail?
5 Medemedewe duwen Sud 20, 21: “Eri, kompoakepahi ko, kumwail wiewiahte uwen me kumwail kak pwe kumwail en kakehlahda amwail pwoson sarawi. Kumwail kapakap ni manaman en Ngehn Sarawi, oh dadaurete ni limpoak en Koht.” Wasaht, Sud kin doadoahngki lepin lokaiaohte ni lokaiahn Krihk “kauwada” nan 1 Korint irelaud 3, ahpw mouren eh koasoi kin pid atail pahn kauwada pein kitail pohn poahsoan en atail pwoson. Luk me ntingihdi ahn karasaras en Sises me pid ohlo me wiahda imwe pohn paip, e kin doadoahngki lepin lokaiaohte ni lokaiahn Krihk “poahsoan” me Pohl doadoahngki nan eh karasaras en Kristian akan me kin kauwada ihmw. (Luk 6:48, 49) Oh pil ehu Pohl kin doadoahngki karasaras me poahsoanda pohn “poahsoan” ni ahnsou me e kin kangoange ienge Kristian akan en kekeirada ni pali ngehn. Ei, sapwellimen Koht Mahsen kin padahkiong kitail me kitail kin wia doadoahk en “kauwada” pein kitail.—Episos 3:15-19; Kolose 1:23; 2:7.
6. (a) Kihda ehu karasaras pwehn kasalehda me doadoahkpene en wia ihmw ni karasaras kin imwikihla ni karasaras emenemen tohnpadahk en Kristian. (b) Pwukoah dahieu me emenemen tohnpadahk kan koaros ahneki?
6 Doadoahk en kauwada emen Kristian ni karasaras kin wia doadoahk ehu me emente pahn wia? Eri, medemedewe me ke pahn pilahn en kauwada ehu ihmw. Ke pahn tuhwong emen me samanih wia pilahn en ihmw akan (architect) en wiahda pilahn kan ong uhk. Mendahki ke pilahn me pein kowe pahn wia pali laud en doadoahko, ke pwain emen sounwia ihmw en iang uhk wiahda ihmwo oh kaweidkin uhk duwen ahl akan me keieu mwahu en wia doadoahko. Ma e pahn wiahda poahsoan kehlail ehu, oh sewese uhk en wehwehki pilahn kan, oh sewese uhk en esehla mehnia dipwisou kan me keieu mwahu en pwainda, ele ke pahn pwungki me e wia doadoahk mwahu ehu. Ahpw ma ke pahn pohnsehsehla eh kaweid kan, ke uhd pahn pwainda dipwisou pwetikitik kan de luwet akan, oh pil doalahsang pilahn en soun wia pilahn en ihmwo (architect)? Eri, ke sohte kak ikidki sounwia ihmw (contractor) de soun wia pilahn en ihmwo ma imwomw pahn pwupwudi ohla! Me duwehte met, emenemen tohnpadahk Kristian iei imwilahn doadoahkpene en kauwada ihmwo ni karasaras. Siohwa iei Sounwia pilahn en ihmw me keieu ileile. E kin utungada Kristian lelepek men nin duwen “tohndoadoahk kei me kin iang Koht ketin wiewia sapwellime doadoahk,” me kin kekeirada oh padahkih tohnsukuhlo. (1 Korint 3:9) Ahpw tohnsukuhlo kin pil pidada met. Ni kaimwesekilahn ire wet, tohnsukuhlo kin pein pwukoahki pein eh mour. (Rom 14:12) Ma e men ahneki irairen Kristian mwahu kan, e anahne doadoahk laud, oh kauwada irair pwukat loale.—2 Piter 1:5-8.
7. Kahpwal dah kei me ekei Kristian akan kin lelohng, oh dahme pahn kak sewese irail?
7 Met kin wehwehki me kisin irair kan me emen sohsohkihsang pahpa oh nohno oh irair kan me kin kapilpene uhk (environment), oh uwen koahiek en atail sounpadahk kan, sohte katepe? Uhdahn soh. Sapwellimen Koht Mahsen kin pohnese me irair pwukat koaros me kesempwal oh kin kamwekid atail mour. Kitail kin ipwikihdi irairen dihp tohto, oh met kin wia apwal ehu ong kitail en peiong. (Melkahka 51:5; Rom 5:12; 7:21-23) Kaiahn sang pahpa oh nohno kan oh irairen peneinei kan pahn kak kamwekidada seri kan—en wia me mwahu de wia me suwed. (Lepin Padahk 22:6; Kolose 3:21) Sises kadeikada kaun en pelian lamalam en mehn Suhs akan pwe imwila suwed en ahr padahkih aramas teikan. (Madiu 23:13, 15) Rahnwet, irair pwukat kin dokedokei kitail koaros. Karasepe ieu, ekei sang sapwellimen Koht aramas akan kin lelohng kahpwal akan pwehki kahpwal akan me irail kin lelohng ni ahnsou re tikitik. Aramas pwukat anahne kitail en kasalehong irail kadek oh wehwehki arail pepehm akan. Oh re kak ale kamweit sang Paipel me irail sohte pahn anahne pwurehng wiahda sapwung kan me ahr pahpa oh nohno wia de wiahla aramas salelepek kan. Tehk iaduwen ekei nanmwarki kan en Suda kin kadehdehda duwen irewet.
Nanmwarki en Suda kan—Irail Wiahda Pein Ahr Pilipil kan
8. Kahlemeng suwed dahieu ahn Sodam pahpa wia ong ih, ahpw pilipil dahieu me Sodam wiahda?
8 Usaia wiahla nanmwarki en Suda ni eh sounpar 16, oh e kakaun erein sounpar 52. Pali laud en ahnsouwo, “E kahlemengih karasepen seme Amasaiah oh wia dahme Kauno kin ketin kupwurperenki.” (2 Nanmwarki 15:3) Siohwa kapaiahda ih ni e kana nan mahwen kan ireirekla. Ahpw, inenen paisuwed, pwehki Usaia me kin kalap kana aklapalapla. E uhd wiahla aramas aklapalap oh uhweng Siohwa ni e doadoahngki warpwohmwahu nan pei sarawi nan tehnpas sarawio, pwukoah ehu me irail pwihn en samworo kante kin wia. Kaweid kohwong Usaia, ahpw e lingeringerda. Mwurin met e namenekla—pwe e alehda soumwahu en tokutok oh erein eh mour e kin kelekelepw. (2 Kronikel 26:16-23) Iaduwen nah pwutak Sodam mwekidki met? Ohl pwulopwul menet kakete mweidong eh pahpa en powehdi eh pepehm akan oh nsensuwedkihla sapwellimen Siohwa kaweid. Aramas ako ele pil kin wia werek suwed ong Sodam pwehki irail kin wia kaudok likamw akan. (2 Nanmwarki 15:4) Ahpw Sodam wiahda pein ah pilipil. “Sodam wiadahr dahme kaparanda kupwuren Kauno.”—2 Kronikel 27:2.
9. Ia ekei irair mwahu kan me Ahas ahneki, ahpw ia imwilahn eh mour?
9 Sodam kaunda erein sounpar 16, oh e kolokolte eh lelepek ong Siohwa. Nah pwutak Ahas, ahneki kahlemeng mwahu en eh pahpa lelepek. Oh pil mie aramas teikan nan sahpwo en sewese Ahas ni ahl me mwahu. E paiekihda en mih ni ahnsou me soukohp lelepek kan duwehte Aiseia, Oseia, Maika kin pwerisek wia ahr doadoahk en kokohp. Ahpw, e wiahda eh pilipil suwed. “E sohte kahlemengih karasepe mwahu en seme kahlap Nanmwarki Depit.” E wiahda sansal kan en Paal oh kaudokiong oh pil meirongkihla sapwellime pwutak kan nin duwen meirong isihs ong dikedik en eni kan. Mendahki Ahas ahneki sawas laud, e sohte pweida nin duwen nanmwarki oh ladu men en Siohwa.—2 Kronikel 28:1-4.
10. Soahngen pahpa dahieu, Ahas, ahpw pilipil dahieu me nah pwutak Esekaia wiahda?
10 Me pid duwen kaudok mehlel, e apwal ong kitail en medemedewe duwen emen pahpa me suwed sang Ahas. Ahpw, nah pwutak Esekaia sohte pilada eh pahpa! Pwutak pwulopwul kan me Ahas meirongkihong Paal, ele mwein irail rien Esekaia. Pwehki ahn Esekaia pahpa wiahla aramas suwed men, met kin kahrehong Esekaia en salelepek ong Siohwa? Soh, Esekaia wiahla emen sang nanpwungen ekei nanmwarki kaselel kan en Suda—me lelepek, erpit, oh koampoake. “Kauno kin ketin ieiang.” (2 Nanmwarki 18:3-7) Ni mehlel, kitail kak kamehlele me ni ahnsou me Esekaia wia soupeidi pwulopwul men ih me ntingihdi Melkahka 119th. Ma met me mehlel, e sohte apwal en wehwehki kahrepen e ntingihdi met: “I toutoukilahr nsensuwed.” (Melkahka 119:28) Mendahki e kin lelohng kahpwal akan, Esekaia kin mweidong sapwellimen Siohwa Mahsen en kaweidih. Melkahka 119:105 mahsanih: “Sapwellimomwi mahsen, iei serepei, mehn kaweid ie, oh kamarainpen elei kan.” Ei, Esekaia wiahda pein eh pilipil—pilipil pwung ehu.
11. (a) Mendahki eh pahpa wia mehn kahlemeng mwahu ehu, ia uwen deila ahn Manase kin uhwong Siohwa? (b) Pilipil dahieu me Manase wiahda ni imwilahn eh mour, oh dahme kitail kak sukuhlikisang met?
11 Inenen pwuriamweikihla, pwehki sang rehn nanmwarki en Suda mwahu men kohsang nanmwarki men me keieu suwed. Nein Esekaia pwutak Manase kin utungada kaudok en dikedik en eni kan, wunani, oh tiahk lemei me reklahr me sohte kin wiawi mahso. Paipel ntingihdi me “Mendahte Siohwa eh ketin kapehmehr Manase oh sapwellime aramas akan,” ele sang ni ah kin doadoahngki soukohp akan. (2 Kronikel 33:10) Nting kan me kin koasoia duwen tiahk en mehn Suhs me Manase kahrehong Aiseia en rasaraspeseng. (Pil kilang Ipru 11:37.) Mendahki met mehlel de soh, Manase sohte rong kaweid akan me kohsang powe. Ni mehlel, e kahrehong ekei nah pwutak kan en isihsla nin duwen meirong kan ni ahr memourte, oh met duwehte dahme ah pahpa kalap Ahas kin wiahda. Ahpw, ohl suwed menet, mwuri nan eh mour, e lelohng kasongosong laud kan, oh e koluhla oh wiliakapwala. (2 Kronikel 33:1-6, 11-20) Mour en Manase kin padahkiong kitail me aramas men me wiahda eh pilipil sapwung kan sohte kin wehwehki me e sohlahr kak pwurala rehn Koht. E kak kawikihla ah mour.
12. Pilipil wekpeseng riau dahieu me Amon oh nah pwutak Sosaia wiahda me pid papah Siohwa?
12 Nein Manase pwutak, Amon, kak sukuhliki laud duwen ah pahpa eh koluhkihla eh sapwung kan. Ahpw e wiahda eh pilipil sapwung kan. Amon “wiahda dihp laudsang” lao lel aramas kamehla ih. Nah pwutak Sosaia me weksang ih. Sosaia pilada en sukuhlikihdi dahme wiaiong eh pahpa kalap. E tepiada kaunda ni eh sounpahr waluh. Ni ahnsou me e mahkier sounpar 16, e tepiada rapahki Siohwa oh e wiahlahr nanmwarki lelepek men. (2 Kronikel 33:20–34:5) E wiahda e pilipil—pilipil pwung ehu.
13. (a) Dahme kitail sukuhlikisang wiewiahn nanmwarki kan en wehin Suda? (b) Ia uwen kesempwal pahpa oh nohno kan en kaiahne neirail seri kan?
13 Keseupe mwotomwot en nanmwarki isimen en Suda kin padahkiong kitail padahk kesempwalie. Ong ekei, nanmwarki suwed akan kin naineki pwutak me inenen mwahu, ahpw ni pali teio, ekei nanmwarki mwahu kan nainekihda pwutak suwed akan. (Pil kilang Eklesiasdes 2:18-21.) Met sohte kin katikitikiala kesempwalpen kaiahne seri kan. Pahpa oh nohno kan me kin kaiahne neirail seri kan nin duwen elen Siohwa kin kihong neirail kan ahnsou mwahu ehu en wiahla sapwellimen Siohwa ladu lelepek kan. (Deuderonomi 6:6, 7) Ahpw, ekei seri kan, mendahki arail pahpa oh nohno kan kin wia uwen me irail kak, seri kan kin pilada ahl sapwung. Seri teikan, mendahki ahr pahpa oh nohno kan sohte kin wia mehn kahlemeng mwahu, irail kin pilada en poakohng oh papah Siohwa. Ki sapwellime kapai kan, arail mour kin pweida mwahu. Komw kin medemedewe ekei pak, dahme pahn wiawi ong pein uhk? Medewehla duwen sapwellimen Siohwa kangoang kan me pahn kahrehong uhk en kak wiahda omw pilipil pwung ehu!
Siohwa kin Likih Komwi!
14. Iaduwen kitail ese me Siohwa kin wehwehki atail luwet akan?
14 Siohwa kin ketin mahsanih mehkoaros. Lepin Padahk 15:3 mahsanih: “Kauno ketin mwahngih dahme kin wiawi wasa koaros, e kin ketin mwasamwasahn kitail ma kitail kin wia me mwahu de me suwed.” Nanmwarki Depit koasoiahda met duwen Siohwa: “Komw ketin mahsanihieier mwohn ei ipwidi. Rahn akan en mouriet kileldi nan sapwellimwomwi pwuhk, pil mwohn tepidahn keieun rahn.” (Melkahka 139:16) Siohwa ketin mwahngih duwen irair suwed akan me ke kin peiong—mendahki ma ke ale irair suwed pwukat sang ahmw pahpa oh nohno de sang rehn aramas teikan. E ketin wehwehki iaduwen irair suwed pwukat kin kerempwa uhk. E wehwehki omw luwet akan laudsang pein uhk. Oh Ih emen me kin kadek oh mahk. E sohte kin kasik kitail en wia laudsang dahme kitail kak wia.—Melkahka 103:13, 14.
15. (a) Ia ehu mehn kamweit me kak kohwong aramas akan me aramas teikan nseneki wia suwed ong irail? (b) Siohwa kin kalinganada pein emen emen kitail ni eh ketikihong kitail pwukoah dahieu?
15 Ni pali teio, Siohwa sohte kin kilangwong kitail nin duwen aramas akan me kin lelong kahpwal akan ahpw me sohte kak wia mehkot. Ma kitail lellong kahpwal akan mahso, kitail kak ale kamweit me Siohwa kin kalahdeki tiahk suwed akan me aramas akan kin nseneki wiaiong kitail. (Melkahka 11:5; Rom 12:19) Ahpw, Koht pahn pere kitail sang imwilahn atail wiewia suwed akan ma kitail pahn koluhla ahpw nsenekihte en wia atail pilipil sapwung kan? Uhdahn soh. Sapwellime Mahsen mahsanih: “Pwe emenemen kitail koaros uhdahn pahn pein wia eh wisik.” (Kalesia 6:5) Siohwa kin kalinganakihda pein emenemen sapwellime kapikapikda kan pwukoah en pein pilada en papah ih. Nin duwen me Moses padahkiong wehin Israel: “Eri, met sampah oh nanleng en wia ei sounkadehde me I kihongkumwailehr, kumwail en pilada nanpwungen mour oh mehla, nanpwungen sapwellimen Koht kupwuramwahu de sapwellimen Koht keria. Eri, pilada mour.” (Deuderonomi 30:19) Siohwa kin liki kitail me kitail pil kak wiahda atail pilipil mwahu. Iaduwen kitail ese met?
16. Iaduwen kitail kak pweida ni atail kin ‘nantihong doadoahk ni kaunsekala komourpatail’?
16 Tehk duwen dahme wahnpoaron Pohl ntingihdi: “Eri, kompoakepahi ko, . . . kumwail nantiong doadoahk ni lemmwin oh poadidi pwe kumwail en kaunsekala komourpamwail, pwe Koht kin ketin wie doadoahk loalamwail ahnsou koaros, pwe kumwail en materek oh kak kapwaiada kupwure.” (Pilipai 2:12, 13) Lepin lokaia ‘wie doadoahk’ ni lokaiahn Krihk kin wehwehki en kanokehla doadoahko. Eri, sohte emen rehtail me koasoansoandiongehr kitail sang ni ahnsou me kitail ipwidi me kitail pahn uhdahn pwupwudi de sohte pweida. Siohwa Koht kin likih me kitail pahn kak kanokehla doadoahko me e ketkihong kitail en wia—doadoahko me kin kahluwa kitail ong mour soutuk—pwe ma soh, eri e sohte mahsanihiong kitail mahsen ko. Ahpw iaduwen kitail kak pweida? Met kaidehn sang ni pein atail kehl. Ma kitail me kehlail, kitail sohte anahne “lemmwin.” Ahpw, Siohwa kin ketin ‘wie doadoahk loalatail,’ oh sapwellime ngehn sarawi kin doadoahk nan atail madamadau kan oh mongiongatail kan, oh kin sewese kitail en “materek oh kak kapwaiada kupwure.” Ki soangen sawas kompoak wet, mie kahrepe me kitail en dehr wiahda pilipil pwung nan atail mour oh mourkihla? Soh!—Luk 11:13.
17. Wekidekla dah kei kitail kak wia ong pein kitail, oh iaduwen Siohwa kin sewese kitail en wia met?
17 Mie mehn kerempwa kan me kitail anahne powehdi—ele mwein irair suwed akan me kitail ahneki erein atail mour oh manaman suwed kan me kak kapingada atail madamadau kan. Ahpw, ki sawas en sapwellimen Siohwa ngehn, kitail kak powehdi kahpwal pwukat! Nin duwen me Pohl ntingihwong Kristian akan nan Korint, Sapwellimen Koht Mahsen me kehlail oh kak “kamwomwala wasa kehlail kan.” (2 Korint 10:4) Ni mehlel, Siohwa kak sewese kitail en kawukihla pein atail mour. Sapwellime Mahsen kin kangoange kitail en “kesehla atail mouren mahs” oh kitail en “onehda sapahl pein kitail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.” (Episos 4:22-24) Sapwellimen Siohwa ngehn pahn kak uhdahn sewese kitail en kawekihla mouratail? Uhdahn kak! Sapwellimen Koht ngehn kin kapwarehda nan loalatail kan—irair kaselel oh kesempwal kan me kitail koaros men kekeirada loalatail. Keieu kesempwal iei limpoak.—Kalesia 5:22, 23.
18. Pilipil dahieu me aramas koaros kak wiahda, oh dahme met pahn kak sewese kitail en nantiong en wia?
18 Pwehki met en kak wiawi, mie irair mehlelo me kin kaperenda kitail. Siohwa Koht kin sapwellimaniki irairen limpoak me sohte imwi, oh kitail wiawihkihda duwehte ih. (Senesis 1:26; 1 Sohn 4:8) Eri, kitail kak wiahda atail pilipil en poakohng Siohwa. Oh limpoak wet—kaidehn mouratail mwohn kitail wiahla Kristian akan, kaidehn atail sapwung kan, kaidehn atail ineng suwed akan me kitail kin ipwikihdi—iei mehn kapir ong kitail en pweida ni ahnsou kohkohdo. Adam oh Ihp anahne kaselehda ahr limpoak ong Siohwa Koht ma re men kolokolte ahr lelepek nan Ihden. Kitail koaros pil anahne doadoahngki limpoak wet ma kitail men pitsang Armakedon oh pitsang kasongosong ni imwin kaunda en Krais erein Pahr Kihdo. (Kaudiahl 7:14; 20:5, 7-10) Pein emenemen kitail, mendahki atail irair akan, kak kekeirada soangen limpoak wet nan atail mour. (Madiu 22:37; 1 Korint 13:13) Kitail en nantiong poakohng Siohwa oh en wiahda atail poahsoan pohn limpoak wet erein atail mour.
Dahme Komw Lemeleme?
◻ Madamadau ndand dah kei kin uhwong padahk en Paipel me kin pid duwen pwukoah en emenemen kitail koaros?
◻ Mehnia doadoahk en kauwada ihmw ni karasaras, me pein emenemen Kristian anahne wia ong pein eh mour?
◻ Iaduwen kahlemeng kan de wiewia kan en nanmwarki en Suda kin kasansalehda me pein emenemen kitail kin wiahda pein atail pilipil kan?
◻ Iaduwen Siohwa kin kamehlel kitail me kitail kak wiahda pilipil pwung kan nan atail mour, mendahki irair suwed akan kin kapilpene kitail?
[Kilel nan pali 28]
Dahme ke pahn wia nan ahmw mour kin poahsoankihda irair akan me ke sohsohkihsang rehn omw pahpa oh nohno?
[Kilel nan pali 30]
Mendahki kahlemeng suwed en eh pahpa, Nanmwarki Sosaia wie eh pilipil en papah Koht