Met Iei Rahnen Komour!
“Kilang! Met iei ahnsou me keieu mwahu. Kilang! Met iei rahnen komour.”—2 KORINT 6:2, New World Translation.
1. Dahme kitail anahne wia oh ahneki ma kitail men pwungla rehn Koht oh Krais?
SIOHWA ketin koasoanediehr rahn ehu en kadeikihda tohnsampah. (Wiewia 17:31) Ma e pahn wia rahn en komourla ehu ong kitail, kitail anahne pwungla mwohn Ih oh pil pwungla rehn sapwellime Sounkopwung idihdidao, Sises Krais. (Sohn 5:22) Pwehn pwungla rehn Koht, atail wiewia kan anahne en pahrekiong Mahsen en Koht oh atail pwoson pahn kamwekid kitail en sewese mehteikan en wiahla sapwellimen Sises tohnpadahk mehlel kan.
2. Dahme kahrehda sampahn aramas kin dohlahsangehr Koht?
2 Pwehki sohsohn dihp, sampahn aramas dohlahsangehr Koht. (Rom 5:12; Episos 4:17, 18) Ihme karehda, irail ko me kitail kin kalohkohng kak ale komourparail ihte ma re pwungla reh. Wahnpoaron Pohl kasalehda met ni sansal ni ahnsou me e ntingwohng Kristian kan nan Korint. Kitail en kasawih 2 Korint 5:10–6:10 pwehn kilang dahme Pohl koasoiahki duwen kadeik, wiahla kompoakepahn Koht, oh komour.
“Se Kin Song en Kamwekid Aramas Akan”
3. Iaduwen Pohl kin “song en kamwekid aramas akan,” oh dahme kahrehda kitail en wia met rahnwet?
3 Pohl kin kadokehpene kadeik oh kalohk ni ah ntingihdi: “Pwe kitail koaros uhdahn pahn pwarala rehn Krais, pwe en kadeingkitailda. Emenemen pahn ale pwaise nin duwen me konehng eh wiewia mwahu de suwed nindoken eh mour nan paliwere nin sampah. Eri, nan at eseier mwahu dahkot lemmwiki Koht, se kin song en kamwekid aramas akan duwe.” (2 Korint 5:10, 11, NW) Wahnpoarono ‘kin song en kamwekid aramas akan’ ni ah kin kalohngki rongamwahuwo. Iaduwen kitail? Pwehki kitail miher ni imwin koasoandi suwed wet, kitail en wia uwen atail kak koaros en kak kamwekid mehteikan en alehda ewen kahk kan me anahn pwe Sises en kak pwungkin irail oh pil en pwungla rehn Siohwa Koht, me Utupen Komour.
4, 5. (a) Dahme kahrehda kitail en dehr kin suweiki dahme kitail wiadahr nan doadoahk en Siohwa? (b) Iaduwen Pohl suwei “pwehki Koht”?
4 Ahpw, ma Koht kapaiadahr atail kalohk, kitail endehr suweiki met. Nan Korint ekei kin pohnmwahsohkihda pein irail de ohl mehteikan, oh eri kin kahrehda saminimin nan mwomwohdiso. (1 Korint 1:10-13; 3:3, 4) Ni ah koasoia irair wet, Pohl ntingihdi: “Se sohte kangoangngoangehkin kumwail kumwail en kapinga kiht, ahpw se songosong kihong kumwail dahme kumwail kak suweikin kiht, pwe kumwail en kak sapeng irail kan me kin suweiki mwomwen ar wiewia kan a kadeihk poadidien nan kapehdirail. Pwe kiht, ma se kin mwomwen iahkala, pwehki Koht me se kin wiahki met; a ma se kin mwomwen loalokong, pwehki kumwail me se kin wiahki met.” (2 Korint 5:12, 13) Me aklapalap kan sohte kin nsenohki me mwomwohdiso en miniminpene oh kamwahupen pali ngehnin mwomwohdiso en mie. Re kin men suwei ni pali liki ahpw sohte kin men sewese iengerail me pwoson kan en kekeirada mohngiong mwahu mwohn Koht. Ihme kahrehda, Pohl panawih kehlail mwomwohdiso oh mahsanih: “Mehmen me men suweiki mehkot, a en suweiki dahme Kauno [“Siohwa,” NW] ketin wiahda.”—2 Korint 10:17.
5 Pein Pohl soh kin pil suwei? Ekei pahn lemeleme me e kin wia met pwehki dahme e mahsanihki duwen en wiahla emen wahnpoaron. Ahpw e anahne suwei “pwehki Koht.” E kin suweiki ah koahiek kan nin duwen wahnpoaron men, pwe mehn Korint kan endehr kesehla Siohwa. Pohl kin wia met pwehn kasapahliraildo ong Koht pwehki wahnpoaron likamw akan kin kahluwairaillahng nan ahl sapwungo. (2 Korint 11:16-21; 12:11, 12, 19-21; 13:10) Ahpw, Pohl sohte kin ahnsou koaros songosong en suweikihong aramas koaros mehkan me e wiahda.—Lepin Padahk 21:4.
Limpoak en Krais kin Kamwekid Komwi?
6. Iaduwen limpoak en Krais en kamwekid kitail?
6 Nin duwen wahnpoaron mehlel men, Pohl kin padahkihong mehteikan duwen meirong tomw en Sises. Met kin kamwekidada laud mouren Pohl, pwehki e ntingihdi: “Pwe limpoak en Krais me kamwakamwakid kiht, pwehki at dehdehkier padahk wet: aramastehmen pwoukihla aramas koaros; met wehwehki me aramas koaros pil iang mehla. E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.” (2 Korint 5:14, 15) Ia uwen limpoak me Sises kasalehda ni ah tohnmeteikihla moure pwehki kitail! Ni mehlel, met pahn kamwekid atail mour. Atail kalahngan ong Sises pwehki ah tohnmeteikihla moure pwehki kitail en kamwekid kitail en ngoangki doadoahk en kalohkiseli rongamwahu en komour me Siohwa ketikihda ki sapwellime Ohl kompoak. (Sohn 3:16; pil tehk Melkahka 96:2.) “Limpoak en Krais” kin kamwekid komwi en ngoangki iang kisehn doadoahk en kalohki Wehio oh katohnpadahk?—Madiu 28:19, 20.
7. Ia wehwehn en “solahr pahn kin kilang oh kasawih aramas nin duwen lamalam en aramas”?
7 Ni arail doadoahngki arail mour ni ahl ehu me kasalehda arail kalahnganki dahme Krais wia pwehki irail, me keidi kan ‘sohla kin momourki pein ihr, ahpw re en kin momourkihte ih.’ “Eri,” Pohl mahsanih, “sang met kohla, kitail solahr pahn kilang oh kasawih aramas nin duwen lamalam en aramas. Mehnda ma kitail kasawih Krais mahso nin duwen lamalam en aramas, a met kitail solahr wia soahng wet.” (2 Korint 5:16) Kristian kan en dehr kasawih aramas nin duwen lamalam en aramas, ele pwungki mehn Suhs kan laud sang mehn Liki kan de pwungki me kepwehpwe kan laud sang me semwehmwe kan. Me keidi kan “solahr pahn kin kilang oh kasawih aramas nin duwen lamalam en aramas,” pwe ih me kesempwal iei arail nanpwung en pali ngehn rehn iengerail me pwoson kan. Kaidehn irail kohte me ‘kasawih Krais mahso nin duwen lamalam en aramas’ me uhdahn kilang Sises ni ahnsou me e ketiket pohn sampah. Mendahki ma ekei me kin koapworopworki Mesaia kilangehr Krais nin duwen aramas men, re solahr kin wia soahng wet. E ketikihda paliwere nin duwen tomw ehu oh iasada nin duwen ngehn emen me kin ketikihda mour. Mehteikan me iasadahng mour nanleng pahn tohnmeteikihla paliwarerail uduk ni arail sohte pahn kak kilang Sises Krais ni pali uduk.—1 Korint 15:45, 50; 2 Korint 5:1-5.
8. Iaduwen aramas kan pahn “wiahla sapwellimen Krais”?
8 Ni ah koasoakoasoiongete me keidi kan, Pohl kapataiong: “Pwe ni mehmen eh wiahla sapwellimen Krais, e kin wiahla aramas kapw men; mehn mahso sohrala, oh me kapw uhd wiliandi.” (2 Korint 5:17) Pwehn “wiahla sapwellimen Krais” kin wehwehki en ehuong ih. (Sohn 17:21) Aramas menet kin ahnekihla nanpwung wet ni ahnsou me Siohwa kakeren ih ong sapwellime Ohlo oh keiekihdi aramaso ngehn sarawi. Nin duwen sapwellimen Koht seri men me keikihdi ngehn sarawi, e “wiahla aramas kapw men” me ahneki koapworopwor en iang Krais nan Wehin nanleng. (Sohn 3:3-8; 6:44; Kalesia 4:6, 7) Irail Kristian keidi kan alehdahr kapai en doadoahk lap ehu.
“Wiahla Kompoakepahn Koht”
9. Dahme Koht ketin wiadahr pwe aramas en kak kompoakepahnkihla ih?
9 Ia uwen Siohwa kupwurki “aramas kapwo”! Pohl mahsanih: “Koht me kin ketin wiahda soahng pwukat koaros. E ketin wekidkitailla rehn Krais sang ni imwintihti ong ni kompoakepah kei. E pil ketikihong kitail atail kohwa doadoahk pwe aramas teikan en pil wiahla kompoakepah. Eri, ih audepen atail rongamwahu en met: duwen Koht eh ketin kupwukupwure pwe ni mwaren Krais aramas koaros en wiahla kompoakepah. Oh duwen eh sohte men ketin kapwukoanehkin irail diparail kan, oh eh ketikihong irail mahseno me padahkihong irail duwen eh kin ketin wiahkinirailla kompoakepah.” (2 Korint 5:18, 19) Tohnsampah dohlahsanger Koht sangete ni ahnsou me Adam dipada. Ahpw Siohwa, ni limpoak, ketin ritingada elen kompoakepahkin ih sang ni meirong en Sises.—Rom 5:6-12.
10. Ihs me Koht likihkihong doadoahk en pwungla reh, oh dahme re wiadahr pwehn kapwaiada met?
10 Siohwa ketin likihkihong me keidi kan doadoahk en wekid aramas kan en kompoakepahnkihla Koht, ihme kahrehda Pohl kak mahsanih: “Eri, iet kiht, meninkeder en Krais kei, oh pein Koht me ketin panapanawih kumwail sang ni at padahk. Eri, se peki rehmwail ni ngidingid, ni mwaren Krais, kumwail en wekila sang ni imwintihti ong ni kompoakepahn Koht.” (2 Korint 5:20) Mahso, meninkeder kan kin pekederla keieu erein ahnsoun mahwen pwehn kilang ma re kak kauhdi mahwen. (Luk 14:31, 32) Pwehki sampahn aramas dipan dohlahsanger Koht, e ketin kadarodo sapwellime meninkeder keidi kan pwehn kehsehki aramas kan duwen sapwellime koasoandi en wekiohng ih oh kompoakepahnkihla ih. Nin duwen meninkeder kei en Krais, me keidi kan kin pekih: “Kumwail en wekila sang imwintihti ong ni kompoakepahn Koht.” Pekipek wet kin wia kangoang me diren mahk pwehn rapahki popohl rehn Koht oh alehda komour me e ketikihda sang rehn Krais.
11. Sang ni arail pwoson tomwen Krais, ihs me kak pwungla mwohn Koht?
11 Aramas koaros me pwoson tomwen Krais kak kompoakepahnkihla Koht. (Sohn 3:36) Pohl mahsanih: “Krais sohte uhdahn dipe, Koht ahpw wiahkihla ih mwomwen aramas dipan duwehte kitail, pwe kitail en iang ahnekihla pwungen Koht reh.” (2 Korint 5:21) Ohl unseko Sises iei meirong en dihpo me wiawihda ong kadaudok en Adam kan koaros me maiouda sang dihp me re ipwikihdi. Re ahnekihla “pwungen Koht” pwehki Sises. Pwung wet, de pwungla mwohn Koht, kin wiawihong mahs tohn sohso en Krais 144,000 kan. Erein ah Kaundahn Pahr Kido, aramas en sampah me nein Sahm Poatopoat, Sises Krais, pahn pwungla reh nin duwen aramas unsek kan. E pahn kesepwiliraildahng irair en aramas pwung oh unsek pwe ren lelepek ong Koht oh alehda kisakis en mour soutuk.—Aiseia 9:6; Kaudiahl 14:1; 20:4-6, 11-15.
“Ahnsou Me Keieu Mwahu”
12. Doadoahk kesempwal dahieu me sapwellimen Siohwa meninkeder kan oh sounkair kan wiahda?
12 Pwe kitail en komourala, atail wiewia anahne en pahrekiong mahsan en Pohl: “Eri, kiht me kin iang ih [Siohwa] doadoahk, se peki ni ngidingid kumwail en dehr mwamwahliki sapwellimen Koht kupwurkalahngan. Pwe e ketin mahsanih: ‘Ni ahnsou me mwahu I karongeiuhk, oh ni rahn en komourla I seweseiukada.’ Kilang! Met iei ahnsou me keieu mwahu. Kilang! Met iei rahnen komour.” (2 Korint 6:1, 2, NW) Sapwellimen Siohwa meninkeder keidi kan oh sapwellime sounkair kan, “sihpw teikan,” sohte kin mwamwahliki kupwurkalahngan en Samarailo nanleng. (Sohn 10:16) Sang ni arail wiewia pwung oh kalohk ngoang ni “ahnsou mwahu” wet, re kin rapahki kupwuren Koht oh kin kehsehki tohnsampah me met iei “rahnen komour.”
13. Ia audepen Aiseia 49:8, oh iaduwen e tepin pweida?
13 Pohl wadekada nan Aiseia 49:8, me mahsanih: “Iet me Siohwa ketin mahsaniher: ‘Ni ahnsoun kupwuramwahu I sapeng kumwail, oh ni rahnen komour I sewesei kumwail, oh I sinsile kumwail pwe I pahn wiahda inou ehu ong aramas kan, pwehn kamwahuwiala sahpwo, pwe kumwail en pwurehng sapwenikihla sapwamwail me ahnsou wet mwomwlahr.’ ” Kokohp wet tepin pweida ni ahnsou me mehn Israel kan saledek sang sensel nan Papilon oh mwuri sapahllahng sapwarailo me ohla.—Aiseia 49:3, 9, NW.
14. Iaduwen Aiseia 49:8 pweida rehn Sises?
14 Ni pousehpen pweidahn kokohp en Aiseia, Siohwa ketikihong sapwellime “ladu” Sises nin duwen “kamarainpen wehi kan—pwe tohnsampah koaros en kak mourla.” (Aiseia 49:6, 8; pil tehk Aiseia 42:1-4, 6, 7; Madiu 12:18-21.) Lepin mahsen “ahnsoun kupwuramwahu,” de “ahnsou mwahu,” kin kadoadoahkohng Sises ni ahnsou me e ketiket nin sampah. E kapakap, oh Koht ketin “sapeng” ih. Met wiahla “rahnen komour” ehu ong Sises pwehki e kolokolte ah loaloapwoat unsek oh eri “wiahla pwarer en mour soutuk ong irail koaros me kin peikiong.”—Ipru 5:7, 9; Sohn 12:27, 29.
15. Tepidasang iahd me Israel en pali ngehn kin nannantiong en kadehdehda me re warohng sapwellimen Koht kupwurkalahngan, oh ia arail mehn akedei?
15 Pohl kin doadoahngki Aiseia 49:8 ong irail Kristian keidi kan, oh kin pekih rehrail ren ‘dehr mwamwahliki sapwellimen Koht kupwurkalahngan’ ni arail sohte pahn rapahki sapwellime kupwuramwahu erein “ahnsou mwahu” oh “rahnen komour” me e ketikihda. Pohl kapataiong: “Kilang! Met iei ahnsou me keieu mwahu. Kilang! Met iei rahnen komour.” (2 Korint 6:2, NW) Sangete Pendekos 33 C.E., mehn Israel kan en pali ngehn kin nannanti en kasalehda arail warohng sapwellimen Koht kupwurkalahngan pwe “ahnsou mwahuwo” en wiahla “rahnen komour” ong irail.
‘Kasalehda Me Kiht Laduhn Koht kei’
16. Pahn soahngen irair apwal dah kei me Pohl kin kasalehda me pein ih laduhn Koht men?
16 Ekei ohl akan me kin iang mwomwohdisohn Korint sohte kin kasalehda me re warohng sapwellimen Koht kupwurkalahngan. Re kin kauwe Pohl pwehn kauwehla ah manaman en wahnpoaron, mendahki e kin liksang “kadirapwahki emen.” E kin kasalehda me ih laduhn Koht men “sang ni ah kin kanengamah ni ahnsoun lokolok, ni apwal akan, ni ahnsoun pwunod akan, ni wokiwok, lekdekiong nan imweteng, ni aramas akan ar kin kamwoarong, ni doadoahk laud akan, ni pepehd nipwong oh kaisihsol.” (2 Korint 6:3-5) Mwuri, Pohl kawehwehda me ma irail kan me kin uhwong ih kin wia ladu kei, ih me “mwahu sang irail” pwehki e seldi pak tohto, wokiwok tohto, lelohng nan keper pak tohto, oh pak tohto e duhpek oh men nimpilda oh sohte eh wasahn pweidi de eh likou.—2 Korint 11:23-27.
17. (a) Irair dah kei kitail kak kapwarehda me pahn kasalehda me pein kitail kin wia laduhn Koht kei? (b) Ia “tehtehn mahwen en pwung”?
17 Duwehte Pohl oh ienge kan, kitail kak kasalehda me pein kitail laduhn Koht kei. Iaduwen? “Sang ni at mour mwakelekel,” oh atail wiewia en pahrekiong loalokong pwung en Paipel. Kitail kak kasalehda pein kitail ni irair wet “sang ni kanengamah,” ni atail kin dadaurete pahn sapwung kan me aramas wiahiong kitail de pahn engieng en mehteikan, oh “kadek” ni atail sewese mehteikan. Oh pil ehu, kitail kak kasalehda me pein kitail laduhn Koht kei ni atail pahn ale kaweid sang sapwellime ngehn sarawi, ni atail pahn kasalehda “limpoak soh mwalaun,” ni atail pahn kin lokaia mehlel, oh likih me e pahn ketikihong kitail manaman en kapwaiada doadoahk en kalohk. Kitail en tehk duwen en Pohl pil kadehdehda ah irair en wia emen laduhn Koht “sang ni tehntehn mahwenki pwung ni peh pali maun oh pali meing.” Nan mahwen en mahs akan, peh pali maun me kin kalapw doadoahngki kedlahs oh peh pali meing me kin koledi mehn sansaro. Ni ah kin mahwen ni pali ngehn ong irail sounpadahk likamw akan, Pohl sohte kin doadoahngki mehn pei en dipen uduk kan—mwersuwed, pitih, likamw. (2 Korint 6:6, 7, NW; 11:12-14; Lepin Padahk 3:32) E kin doadoahngki “tehtehn mahwen” de wiepe pwung kan, pwehn kekeirada kaudok mehlel. Kitail en pil wia soahng wette.
18. Ma kitail iei laduhn Koht kei, ia pahn mwomwen atail mwekid?
18 Ma kitail iei laduhn Koht ekei, mwomwen atail mwekid pahn duwehte en Pohl oh ienge tohndoadoahk kan. Atail wiewia pahn rasehng en Kristian mehnda ma aramas kin wauneki kitail de soh. Kitail sohte pahn uhdihsang atail doadoahk en kalohk ma aramas kin kauwe kitail, oh kitail sohte pahn aklapalapla ma re koasoiahkin kitail mehkot mwahu. Kitail pahn koasoia me mehlel oh kak ndandkihla atail doadoahk sarawi kan. Ni ahnsou me kitail mihla nan keper sang uhwong kan en imwintihti kan, kitail pahn likih Siohwa. Oh kitail pahn kalahnganki alehda kaiahn kan.—2 Korint 6:8, 9.
19. Iaduwen atail kak ‘kakepwehpwehla me tohto’ ni pali ngehn?
19 Ni ah kaimwsekla ah koasoia duwen doadoahk en wekid aramas kan pwehn kompoakepahnkihla Koht, Pohl koasoiahki pein ih oh ienge kan “mehnda ma se nsensuwed, se kin pereperen ahnsou koaros; likamwete se me semwehmwe, se ahpw kin kakepwehpwehla me tohto; likamw se sohte ahneki mehkot, ahpw se ahneki mehkoaros.” (2 Korint 6:10) Nindoken e kin mie kahrepe kan me laduhn Koht pwukat en nsensuwedkihla arail kalokolok kan, re ahneki peren en loale. Sohte arail kepwe, ahpw re ‘kakepwehpwehla’ ni pali ngehn. Ni mehlel, re “ahneki mehkoaros’ pwehki arail pwoson kin wahdohng irail kepwehpwe ni pali ngehn—pil iangahki koapworopwor en wiahla seri en Koht en nanleng. Oh arail mour kin audepen oh nsenamwahu nin duwen ladu Kristian kei. (Wiewia 20:35) Duwehte irail, kitail kak ‘kakepwehpwehla me tohto’ ni atail pahn iang kisehn kalohkihong aramas kan en wekila oh kompoakepahnkihla Koht ahnsou wet—ni rahnen komour wet!
Likih Komour Sang Rehn Siohwa
20. (a) Dahme Pohl keieu inengieng, oh dahme kahrehda ahnsou me luhluhwe mwotomwotlahr? (b) Dahme kin kadehdehda rahnen komour me kitail momour loale ahnsouwet?
20 Sounpahrte 15 me luhluhwe ong koasoandi en mehn Suhs ni ahnsou me Pohl ntingihdi nah kisinlikou keriau ong mehn Korint kan mpen pahr 55 C.E. Wahnpoarono uhdahn men mehn Suhs kan oh mehn Liki kan en kompoakepahnkihla Koht ki Krais. Ahnsouwo iei rahnen komour, oh ahnsou me luhluhwe inenen mwotomwotalahr. Eri, kitail pil mihmi ni ahnsou ehu me pahrekiong met ni imwin koasoandi sangete nan 1914. Doadoahk en kalohngki Wehio nan sampah pwon me kin wiawi ahnsouwet kin wia mehn kilel me met iei rahnen komour.
21. (a) Mehnia iren pahr me pilipilda ong 1999? (b) Dahme kitail anahne wia ni rahnen komour wet?
21 Aramas kan en wehi kan koaros anahne en rong duwen sapwellimen Koht koasoandi en komour me e pahn ketikihda ki Sises Krais. Solahr ahnsou en pwapwand. Pohl ntingihdi: “Kilang! Met iei rahnen komour.” Mahsan ko nan 2 Korint 6:2 (NW) pahn wia en Sounkadehdehn Siohwa kan iren pahr en 1999. Ia uwen met konehng, pwe kitail kin kohkohieng mehkot me suwedsang ohlahn Serusalem oh ah tehnpaso! Me mihmi mwohtail iei imwin koasoandi wet, oh aramas koaros nin sampah pahn anahne wia arail pilipil. Ahnsouwet—kaidehn lakapw—iei ahnsou me kitail en mwekidiki met. Ma kitail kamehlele me komour kin kohsang rehn Siohwa, ma kitail poakohng ih, oh ma kitail kin kesempwalki mour soutuk, kitail sohte pahn mwamwahliki sapwellimen Koht kupwurkalahngan. Ki ineng sang nan mohngiongatail en kawahuwih Siohwa, kitail pahn kadehdehda sang ni atail lokaia oh wiewia me kitail uhdahn kin mehlelki atail kin koasoia: “Kilang! Met iei rahnen komour.”
Iaduwen Komw Pahn Sapeng?
◻ Dahme kahrehda kompoakepahnkihla Koht kin wia mehkot me kesempwal?
◻ Ihs meninkeder kan oh sounkair kan me kin iang doadoahk en wekid aramas en kompoakepahnkihla Koht?
◻ Iaduwen atail kak kasalehda me pein kitail laduhn Koht ekei?
◻ Ia wehwehn en Sounkadehdehn Siohwa kan ahr iren pahr en 1999 ong komwi?
[Kilel kan nan pali 28]
Duwehte Pohl, komw kin ngoangki kalohk oh sewese mehteikan en kompoakepahnkihla Koht?
United States
France
Côte d’Ivoire
[Kilel nan pali 30]
Ni rahnen komour wet, komw kin iang kisehn pokon en aramas kan me kin kompoakepahnkihla Siohwa Koht?