Kahpwal Tohrohr Kan En Peneinei Kan Me Pahpa De Nohno Pwurehng Pwopwoudida
PENEINEI KAN ME PAHPA DE NOHNO PWUREHNG PWOPWOUDIDA KAK NSENAMWAHU! IADUWEN?
Peneinei me pahpa oh nohno pwurehng pwopwoudida kin wia tohtohla nan sahpw tohto nan sampah. Ahpw, soahngen peneinei duwehte met kin ahneki kahpwal kan me weksang peneinei teikan. Me keieu apwal, ni mehlel, iei apwalihada seri kan. Ahpw, nin duwen me artikel riau pwukat pahn kasalehda, peneinei me pahpa de nohno pwurehng pwopwoudida kak pweida mwahu ni arail apwalihada seri kan.
NAN SOAI KAN, PAHPA DE NOHNO ME KIN PWUREHNG PWOPWOUDIDA KIN AHDSUWED. Ni ahnsou me kitail seri, me tohto rehtail kin tamataman soai en Cinderella, oh iaduwen liho me pwurehng pwoudikihda en Cinderella pahpa kin kaloke Cinderella. Seri kan nan Iurop kin pil sukuhliki duwen soai en Snow White and the Seven Drawfs. Liho me pwurehng pwoudikihda en Snow White pahpa kin wia siet mwersuwed men!
Soahngen soai pwukat kin kasalehda mehlel en peneinei kan me pahpa oh nohno pwurehng pwopwoudida? Soahngen pahpa oh nohno pwukat koaros me suwed? Soh. Pali moron en irail kin mwahuki dahme pahn keieu mwahu ong seri kan me kohsang tepin en arail werek kan pwopwoud. Ahpw re anahne powehdi ekei kahpwal apwal kan me kin pwarada nan mouren soahngen peneinei wet me pahpa de nohno kin pwurehng pwopwoudida.
Kahpwal akan en Apwalihada Seri kan
Ni ahnsou me riemen kin tepin pwopwoudida oh ara pwopwoud kin ohla, kahrepe kin kalapw kohsang ara sohkoahiek. Ni en emen ira kin pwurehng pwopwoudida, kekeirada seri kan en tepin ara pwopwoud kin kak kahpwaliala pwopwoudo. Ekei rekord kan kasalehda me tohto sang pwopwoud kan me kin pwurehng pwopwoudida 4 sang nanpwungen meh 10 kin imwikihla mweipeseng erein tepin sounpar limau en ara pwopwoud.
Ohlo oh liho me ahpwtehn pwurehng pwopwoudida sapahl ele sohte pahn kak wehwehki pwunod en pali en pepehm en seri kan, duwehte ihs me ren loalopwoat ong, oh pepehm en peirin oh kailok ong ohlo de liho me pwoudikihda arail pahpa de nohno. Seri kan kak lemeleme me ohl menet de lih menet pahn kahrehda arail pahpa de nohno en sohla poakohng irail. Me pil laud sang met, uhdahn pahpahn serio de nohnohn seri pahn apwalki wehwehki en serio limpoak ong uhdahn ah pahpa de nohno me keseirailla. Emen pwutak song en kawehwehiong ah nohno ah nanpwung mwahu rehn uhdahn ah pahpa, ni ah koasoia, “Nohno, I ese me pahpa kin wia suwed ong uhk, ahpw e kin mwahu ong ie!” Soahngen lokaia wet, ma e mehlel, kin kak kahrehong nohno men en peiriniong en serio pahpa.
Emen pahpa me pwurehng pwopwoudida wehkada: “I sohte uhdahn onopadahng apwaliala kahpwal akan me kin pid kekeirada nein liho me I pwoudikihda nah seri kan. I pedelong nan irair wet medemedewe me met pwehki I pwoudikihlahr arail nohno, I wialahr arail pahpa. Ong ie, e sohte apwal en wehwehki met! I sohte wehwehki en seri ko limpoak ong uhdahn arail pahpa, oh I wiahda sapwung tohto.”
Lamalam suwed kak pwarada keieu nan irair me pid kaiahn. Seri kan anahne kaiahn limpoak, ahpw re kin kalap pelianda met mendahki ma e pil kohsang rehn uhdahn arail pahpa oh nohno. Eri, ia uwen e pahn apwal ren ale kaiahn sang rehn ohlo de liho me pwoudkihda arail pahpa de nohno! Pak tohto, ni ahnsou me kaiahn kin kohwong irail, re kin nda, “Kaidehn uhdahn ahi pahpa kowe!” Ia uwen soahngen lokaia pwukat kin kamedek ong ohlo me pwoudikihda arail nohno!
Apwaliada mwahu seri kan kak wiawi nan soahngen peneinei wet? Pahpa oh nohno kan me pwurehng pwopwoudida kak wiahda pwe arail peneinei en pweida mwahu? Pasapengpen peidek riau pwukat koaros kak en ehi ma koaros nan soahngen peneinei wet kin idawenla kaweid kan nan sapwellimen Koht Mahsan sarawi, Paipel.
[Kilel nan pali 3]
“Kaidehn uhdahn ahi pahpa kowe!”