Peneinei Kan Me Pahpa De Nohno Pwurehng Pwopwoudida Kak Pweida

PENEINEI KAN ME PAHPA DE NOHNO PWUREHNG PWOPWOUDIDA KAK PWEIDA MWAHU? Ehi, keieu ma koaros nan peneinei kin tamataman me “audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” (2 Timoty 3:16) Ma koaros kin kapwaiada mouren kosonned kan en Paipel, eri re uhdahn pahn pweida mwahu.

Irair Kesempwal

Paipel kin ketikihda kosonned malaulau ong kaweidpen nanpwungen aramas akan. Pak tohto e kin kangoangehkin kitail en kekeirada irair oh lamalam mwahu kan me pahn kaweid kitail en mwekid kin ahl me loalokong. Soahngen lamalam mwahu pwukat oh irair mwahu pwukat kin wia poahsoan en mouren peneinei nsenamwahu.

E sansal, ahpw e konehng en nda me irair kesempwalo me anahn pwe peneinei en pweida iei limpoak. Wahnpoaron Pohl mahsanih: “Eri, amwail limpoak en uhdahn mehlel. . . . Kumwail limpoakpene nin duwen limpoak en Kristian.” (Rom 12:​9, 10) Lepin lokaia “limpoak” kin kalapw kadoadoahk sapwung, ahpw irairo me Pohl koasoia wasaht me irair tohrohr ehu. E wia limpoak ehu me sang rehn Koht, oh kin “poatopoat.” (1 Korint 13:⁠8) Paipel kin kasalehda me limpoak wet kin soh roporop oh men papah meteikan. E kin kadoadoahk ong kamwahupen meteikan. E kin kanengamah oh kadek, sohte kin peirin, aksuwei, de aklapalap. E sohte kin rapahki pein kamwahupe. E kin mahk, likilik, koapworopwor, oh dadaur pahn kasongosong kan.​—⁠1 Korint 13:​4-7.

Limpoak mehlel kin kamwahuwiala sapwung kan oh kaminiminpene aramas akan me tikida wekpeseng oh ahneki irair kan me wekpeseng. Oh e kin sewese kamwahuwiala lipwalipw kamedek en mweipeseng de mehlahn en seri ko uhdahn pahpa de nohno.

Uhdahn Pahpa de Nohno

Limpoak kak sawas apwalihala en seri kan nanpwung rehn uhdahn ah pahpa de nohno me mweisangehr arail peneinei. Emen pahpa me pwurehng pwopwoudida koasoia: “I men nein liho me I pwoudikihda nah seri kan en keieu poakohng ie. Dahme keieu apwal ong ie iei en pohnese duwen kesempwal en pwukoah me uhdahn arail pahpao ahneki nan mouren nah seri kan.”

Limpoak mehlel sewese pahpa menet en pohnese ire mehlelo me e sapwung en kasik me seri ko pahn “mwadangete” limpoak ong ih. E pohnese me e sohte kak uhdahn wiliandi uhdahn en seri ko pahpao. Seri ko eseiehr arail pahpa sangete ahnsou me re tikitik, ahpw ohl menet ahpwtehn pwoudikihda arail nohno oh e anahne koadoahke pwe seri kan en limpoak ong ih. Sounreperep Elizabeth Einstein kasalehda dahme kin wiawi ong me tohto ni ah koasoia: “Sohte me kak wiliandi uhdahn pahpahn seri ko de nohnohn seri ko​—⁠sohte kak. Pil pahpa men de nohno men me mehla de kesehla seri ko kin kolokolte wasa kesempwal ehu nan mouren seri kan.”

Kaiahn​—⁠Ire Ehu me Apwal

Paipel kasalehda me kaiahn limpoak me anahn ong me pwulopwul kan, oh met kin pil oarepene seri kan sang nan pwopwoud en mwowe. (Lepin Padahk 8:33) Ahpw, nan peneinei kan me pahpa oh nohno pwurehng pwopwoudida, arail kilangwohng kaiahn kak karehda kahpwal laud kan. Seri kan sang nan pwopwoud en mwowe ahnekiehr irair kan me e kihsang uhdahn ah pahpa de nohno me sohlahr mihmi rehn neirail seri kan. Ni mehlel, re kak ahneki soahngen tiahk kan me pahn kalingeringerih ohlo de liho me pwoudikihda arail pahpa de nohno. Oh ele seri kan sohte pahn wehwehki kahrepen ohl menet de lih menet kin lingeringerki ekei soahng kan. Iaduwen en apwaliala mwahu ire wet? Pohl kaweidki Kristian kan: “Nantiong audaudkihda . . . limpoak, kanengamahiong apwal, kadek.” (1 Timoty 6:11) Limpoak en Kristian kin sewese pahpa oh nohno kan me pwurehng pwopwoudida oh seri kan en kadek oh kanengamah ni arail pahn kin sukuhliki en wehwehki emenemen. Ma pahpa de nohno me pwopwoudo nan peneinei kin soh kanengamah, ‘lingeringer, mwakar, lokaia suwed,’ e kak kauwehla nanpwung mwahu me mwein re wiadahr.​—⁠Episos 4:31.

Pil mie peidek en ihs me pahn kihda kaiahn nan peneinei kan me pahpa de nohno pwurehng pwopwoudida. Mwurin arail kin koasoiapene ire kan, ekei pahpa oh nohno koasoanehdier me uhdahn pahpahn de nohnohn seri kan me pahn kihda kaiahn pwehn kihong ohlo de liho me pwoudikihda arail pahpa de nohno ahnsoun wiahda nanpwung mwahu rehn seri ko. Ren mweidohng seri ko en sukuhliki en ese me ohlo de liho kin poakohng irail mwohn re kak kaiahne seri ko.

Ahpw, iaduwen ma arail nohno pwurehng pwopwoudida? Paipel soh mahsanih me pahpa me tapwin peneinei? Ehi. (Episos 5:​22, 23; 6:​1, 2) Ahpw, ohlo me pwoudikihda arail nohno ele pahn men pwukoahki iren kaiahn ong ahnsou kis, keieu ma e kin pidada kalokolok. Ele e pahn mweidohng seri kan en peikiong ‘kosonned en arail nohno’ nindoken e wiahda poahsoan ehu ong irail en ‘rong kaiahn en arail pahpa [kapw].’ (Lepin Padahk 1:8; 6:20; 31:⁠1) Mehn kadehde kan kasalehda me, imwilahn met, e sohte kin uhwong kosonned en tapwi.

Pahpa oh Nohno kan Anahne Kapehse

Lepin Padahk 15:22 mahsanih: “Pilahn kan pahn ohla ma sohte kosoipenen ire rir kan.” (New World Translation) Nan peneinei ehu me pahpa de nohno pwurehng pwopwoudida, kesempwal pahpa oh nohno en koasoiapene ire rir kan ni ahl en meleilei oh mehlel. Emen soun nting nuhs nan nuhspehpao O Estado de S. Paulo koasoia: “Seri kan kin ahnsou koaros men song soahng kan me pahpa oh nohno irehdi. Met kin mehlel nan peneinei kan me pahpa oh nohno pwurehng pwopwoudida. Ihme kahrehda, pahpa oh nohno anahne en pwungkihpene ire kan pwe seri kan pahn kilang me re kin miniminpene. Ahpw, iaduwen ma ohlo de liho me pwopwoudo nan peneineio kin wia mehkot me uhdahn pahpa de nohnohn seri kan kin lemeleme me sapwung? Eri, ira anahne kapwungala ire wet ni rir, kaidehn mwohn seri kan.

Sapwung kan pahn wiawihda. Seri kan pahn nda de wia soahng kan me kamedek. Kapwunod en ahnsouwo pahn karehong ohlo de liho me pwoudikihda arail pahpa de nohno en wiahiong seri ko soahng kan me sapwung. Ahpw, lepin lokaia mengei ko, “Kupwurmahk, menlau mahkong ie,” pahn kak kamwahuwiala sapwung kan.

Kakehlailla Minimin en Peneinei

Anahne ahnsou laud en wiahda nanpwung limpoak nan peneinei kan me pahpa de nohno pwurehng pwopwoudida, ahpw soahngen peneinei wet kak pweida mwahu. Me kin keieu pweida mwahu iei peneinei ko me tohn peneinei koaros kin nantiong en miniminpene, keieu pahpa oh nohno, pwehn kekeirada lamalam pwung oh koapworopwor mehlel kan. Wahnpoaron Sohn ntingihdi: “Kompoakepahi ko! Kitail en poakpene, pwehki limpoak kin kohsang rehn Koht.” (1 Sohn 4:⁠7) Ehi, limpoak me kin kohsang nan mohngiong kin wia kih mehlel ong nsenamwahu en peneinei kan me pahpa de nohno pwurehng pwopwoudida.