“Tehnpas Sarawio” Oh “Soupeidio” Nan Rahnpwukat

“Soupeidio pahn patohlong ahnsou me aramas akan kin pedolong oh pedoi ahnsou me re kin pedoi.”​—ESEKIEL 46:10.

1, 2. Padahk kesempwal dahieu kin sewese kitail en wehwehkihla pali laud en kasansal en Esekiel me kin pid Tehnpas Sarawio?

EKEI rapai (sounpadahk) kan en mahs sohte kin ni unsek kamehlele pwuhken Esekiel. Nin duwen pwuhken Talmud, ekei kin medemedewe en kihsang pwuhko sang Nting Sarawi kan. Irail kin apwaliki kawehwehda kasansal en Tehnpas Sarawio oh koasoia me aramas akan sohte kak wehwehki pwuhko. Sounpadahk en Paipel teikan pil kin pwonopwonkihda kasansal en Esekiel me kin pid sapwellimen Siohwa Tehnpas Sarawi. Iaduwen kitail?

² Sang ni ahnsoun kasapahldohn kaudok min, Siohwa ketin kapaiada sapwellime aramas akan ki sawas en wehwehki mehkan ni pali ngehn, iangahki atail pahn kak dehdehkihla dahkot Sapwellimen Koht Tehnpas Sarawi ni pali ngehn​—sapwellimen Siohwa koasoandi en Tehnpas Sarawi ong kaudok min.a Padahk kesempwal wet kin sewese kitail en wehwehki pali laud en kasansal en Esekiel me kin pid duwen Tehnpas Sarawio. Eri, kitail kak tehk kanahieng wasa pahieu en kasansal wet​—Tehnpas Sarawio, pwihn en samworo, soupeidio, oh sahpwo. Ia wehwehn mehpwukat ong atail ahnsou?

Tehnpas Sarawio oh Komwi

3. Dahme kitail sukuhliki ni ahnsou me kitail kin kilangdahlahng pahn denso ileile oh kilang mahlen kan me mih ni dihd ni ewen kehl en Tehnpas Sarawio?

³ Medewehong me kitail pahn mwemweitla oh uhdial Tehnpas Sarawio me mih nan kasansal wet. Kitail tepida douda pohn kehndake isuh mehn doudalahng ni ewen kehlo. Ni masloalen ewen kehlo, kitail kilangadahla powe oh pwuriamweikihla. Densohn ihmwo dohkihdahweisang kitail pohnangin piht 100! Met kin katamankin kitail duwen ilelehn kosonned akan en pedolong nan sapwellimen Siohwa koasoandi en kaudok. Ling en ketipin me kin dakedo sang ni wenihmwtok kan kin dakarada dihdo me mahlen en tuhke pahm kei me re lekeong dihden ihmwo. Nan Pwuhk Sarawi, tuhke pahm kan kin wia kilelepen wiewia pwung. (Melkahka 92:12; Esekiel 40:14, 16, 22) Wasa sarawi wet iei ong irail akan me kin tiahk mwakelekel oh pwung ni pali ngehn. Kitail pil men wia aramas pwung kei pwe atail kaudok en pwung ong Siohwa.​—Melkahka 11:7.

4. Ihs me sohte ale mweimwei en pedolong nan Tehnpas Sarawio, oh dahme met kin padahkiong kitail?

⁴ Ni pali koaros en wasahn aluwo, mie perehn sounsilasil siluh. Sounsilasil pwukat pahn mweidong kitail en pedolong nan Tehnpas Sarawio? Siohwa mahsanihong Esekiel me sohte mehn liki men me “sohte sirkumsais ni mongiong” pahn kak pedolong. (Esekiel 40:10; 44:​9, New World Translation) Ia wehwehn met? Koht kin kupwurki ihte aramas akan me kin poakohng sapwellime kosonned akan oh kapwaiada. (Seremaia 4:4; Rom 2:​29) E kin kasamwolong nan sapwellime tehnpaso aramas pwuko. (Melkahka 15:​1-5) Sangete ni ahnsou me kaudok mehlel kasapahldo nan pahr 1919, sapwellimen Siohwa pwihn nin sampah kin utungada oh kasansalehda sapwellime kosonned akan me kin pid tiahk. Irail akan me kahng peikiong kosonned pwukat sohlahr kin ale luhk en werekiong sapwellime aramas akan. Rahnwet, koasoandi me kin poahsoanda pohn Paipel en piskenla aramas akan sang mwomwohdiso me sohte kin koluhla mehlel kin kihda sawas laud en perehla atail kaudok mwakelekel oh min.​—1 Korint 5:​13.

5. (a) Ia ekei irair akan nan kasansal en Esekiel oh kasansal en Sohn me ntingihdi nan Kaudiahl 7:​9-​15 me duwepenehte? (b) Nan kasansal en Esekiel, ihs me keinek 12 me kin kaudokiong Koht nan Kehl en Liki kin mwete?

⁵ Wasahn aluwo kin kohlahng ni Kehl en Liki, wasao me aramas akan kin kaudokiong oh kapinga Siohwa. Met kin katamankin kitail duwen kasansal en wahnpoaron Sohn ni ahnsou me e kilangada “pokon kalaimwun” kaudokiong Siohwa “ni rahn ni pwong nan tehnpese.” Nan kasansal riau koaros mie tuhke pahm kan. Nan kasansal en Esekiel, mahlen en tuhke pahm kei kin mih ni dihd en ewen kehlo. Nan kasansal en Sohn, tohnkaudok kan me kolokol tehn paini, oh met kin karasaiong ahr peren ni ahr kin kapinga Siohwa oh kasamwo Sises nin duwen ahr Nanmwarki. (Kaudiahl 7:​9-​15) Nan kasansal en Esekiel, keinek 12 en Israel kin mwete “sihpw teikan.” (Sohn 10:16; pil kilang Luk 22:28-​30.) Komw pil emen me kin perenki kapinga Siohwa oh lohkiseli sapwellime Wehi?

6. Dahme kahrehda wasahn mwenge kan kin mih nan Kehl en Liki, oh met kin katamankin sihpw teikan duwen pwais dahieu?

⁶ Ni ahnsou me kitail pahn kilang Kehl en Liki, kitail kilang wasahn mwenge 30 oh iei wasao me aramas akan kin pein toukihda ahr meirong kan. (Esekiel 40:17) Rahnwet, irail me kin iang pwihn me sihpw teikan sohte kin wia ahr meirong en mahn akan, ahpw re sohte kin kohla ni Tehnpas Sarawi en pali ngehn sohte wah mehn meirong. (Pil kilang Eksodus 23:15.) Wahnpoaron Pohl ntingihdi: “Eri, kitail poaden wiahiong Koht atail tungoal meirong en kaping rehn Sises; pwe ih soangen meirong wet me kin kadehdehda duwen Sises me Kaun. Kumwail dehr manokehla wiewia mwahu kan oh amwail sawaspene, pwe ih soangen meirong pwukat me Koht kin ketin kupwurperenki.” (Ipru 13:15, 16; Oseia 14:2) E wia pwais kaselel laud ieu en wia soangen meirong kan ong Siohwa.​—Lepin Padahk 3:​9, 27.

7. Sosohng en Tehnpas Sarawio kin kamehlelehong kitail duwen dah?

⁷ Esekiel kilangada tohnleng men sosohng Tehnpas Sarawio nan kasansal wet. (Esekiel 40:3) Me duwehte met, mahsen ehu pil wiawihong Wahnpoaron Sohn: “Uhda oh sohngedi tehnpas en Koht oh pei sarawien, ke ahpw wadekada tohtohn aramas akan me wiewia kaudok nan tehnpasen.” (Kaudiahl 11:1) Ia wehwehn sosohng wet? Ong ni pali koaros, met kin wia kamehlel ehu, ehu kilel me sohte mehkot pahn kak kalohmwet Siohwa sang E kapwaiada sapwellime kupwur kan me kin pid kaudok min. Duwehte nan atail ahnsou, kitail kak likih me sohte mehkot​—pil uhwong laud kan me kin kohsang koperment kehlail kan​—⁠kak kauhdi onohnsapahl en kaudok min.

8. Ihs me kin pedolong nan ewen kehl en Kehl en Masloaleo, oh dahme ewen kehl pwukat kin katamankihong kitail?

⁸ Ni atail kekeidwei nan Kehl en Liki, kitail kilang me ewen kehl siluh me kohlongalahng nan Kehl en Masloaleo; oh ewen kehl siluh en Masloale kin inenpene oh soangen uwe teieu. (Esekiel 40:​6, 20, 23, 24, 27) Ihte samworo kan me mweimwei en pedolong nan Kehl en Masloaleo. Ewen Kehl en Masloaleo kin katamankihong kitail me irail me keidi kan anahne kapwaiada sapwellimen Koht koasoandi oh kosonned akan, ahpw koasoandi oh kosonned pwukat kin kahre Kristian mehlel akan koaros. Ahpw ia doadoahk en samworo kan, oh ia wehwehn met ong ni atail ahnsou?

Pwihn en Samworo Lelepek Ehu

9, 10. Iaduwen “pwihn samworo en Nanmwarki,” me rasehng pwihn en samworo kan nan kasansal en Esekiel, kin kihda kaweid ni pali ngehn?

⁹ Mwohn ahnsoun Kristian kan, irail pwihn en samworo kan kin wia doadoahk apwal ehu nan Tehnpas Sarawio. Kemehla mahn en meirong kan, oh meirongki mahn pwukat pohn pei sarawi, oh papah de sewese iengerail samworo kan oh aramas akan kin wia doadoahk laud ehu. Ahpw irail pil kin ahneki doadoahk kesempwal ehu. Siohwa kehkehlikiong pwihn en samworo kan: “Samworo kan pahn kin padahkihong nei aramas akan wekpeseng en dahme sarawi oh sohte sarawi, oh pil wekpeseng en dahme mwakelekel oh sohte mwakelekel ong kaudok.”​—Esekiel 44:23; Malakai 2:7.

¹⁰ Komw kin kalahnganki doadoahk laud oh papah karakarahk me pwihn en me keidi kan, “pwihn samworo en Nanmwarki,” kin wia pwehn utungada kaudok min? (1 Piter 2:9) Duwehte pwihn en samworo en mehn Lipai kan en mahs, irail kin tiengala mwowe ni ahr kin kihda kaweid ni pali ngehn, sewese aramas akan en wehwehki dahme mwakelekel oh pwung mwohn silangin Koht oh dahme Koht sohte kin kupwurki. (Madiu 24:45) Kaweid pwukat me kin kohda sang sawaspen pwuhk kan, me kin poahsoanda pohn Paipel, oh Kristian mihding kan oh kapokon kan, kin sewese aramas rar kei en ehuong Koht.​—2 Korint 5:​20.

11. (a) Iaduwen kasansal en Esekiel kin kasalehda duwen ia uwen kesempwal samworo kan en mwakelekel? (b) Ni imwin rahn akan, iaduwen irail me keidi kan mwakelekelda ni pali ngehn?

¹¹ Ahpw, irail samworo kan anahne wia laudsang ihte padahkiong meteikan en mwakelekelda; pein irail pahn anahne en mwakelekel. Ihme kahrehda, Esekiel kilangada wiawiahn kamwakel ong pwihn en samworo kan en Israel. (Ezekiel 44:10-​16) Me duwehte met, poadoapoad kin kasalehda me nan 1918, Siohwa wiahla “sounkamwakelehda silper men” ong sapwellime tehnpas ni pali ngehn, ni ah ketin kasawiahda pwihn en samworo keidi kan. (Malakai 3:​1-5, NW) Irail akan me mwakelekel ni pali ngehn de koluhkihla ahr kin kaudokiong dikedik kan kin ale mweimwei en mihmihte nan arail pwukoah en papah nan sapwellime Tehnpas Sarawi ni pali ngehn. Ahpw, duwehte aramas koaros, emenemen irail me keidi kan kak wiahla aramas samin kan​—ni pali ngehn oh tiahk. (Esekiel 44:22, 25-​27) Irail anahne nantiong en “dehr saminkihla tiahk suwed kan en sampah wet.”​—Seims 1:​27; pil kilang Mark 7:​20-​23.

12. Dahme kahrehda kitail anahne kasalehda atail kalahnganki doadoahk me irail me keidi kan kin wia?

¹² Pein emenemen kitail kak wia peidek wet, ‘I kin kalahnganki mehn kahlemeng mwahu en irail me keidi kan kin wia doadoahk lelepek erein sounpar tohto? I kin kahlemengih arail pwoson?’ E pahn mwahu ma irail “pokon kalaimwun” en tamataman me irail me keidi kan sohte pahn mih rehrail nin sampah kohkohlahte. Siohwa mahsanihiong samworo kan nan kasansal en Esekiel: “Re sohte pahn sapweniki sahpw ehu nan Israel: Ngehite me wia arail sohso.” (Esekiel 44:​28, NW) Duwehte irail me keidi kan, sohte ahr wasa nin sampah ni ahnsou kohkohlahte. Irail kin ahneki sohso nanleng, oh irail pokon kalaimwun kan kin utungada oh kangoange irail ni ahnsou me re kin mihmi nin sampah.​—Madiu 25:​34-​40; 1 Piter 1:​3, 4.

Soupeidio​—Ihs Ih?

13, 14. (a) Dahme kahrehda kitail wehwehki me soupeidio kin kisehn sihpw teikan? (b) Ihs me soupeidio kin mwete?

¹³ Peidek kapwuriamwei ehu pwarada. Soupeidio kin mwete ihs? Pwehki kasansalo kin koasoiada ih nin duwen emen oh pil nin duwen pwihn ehu, kitail kak wehwehki me soupeidio kin mwete pwihn en aramas ehu. (Esekiel 44:3; 45:​8, 9) Ahpw ihs? Kaidehn irail me keidi kan. Nan kasansalo, e kin iang doadoahk rehn pwihn en samworo kan, ahpw ih kaidehn emen samworo. E weksang pwihn en samworo kan, pwehki e kin ale sohso en sahpw ehu oh met sansal me mie eh koapworopwor en mihmi nin sampah ahpw kaidehn nanleng. (Esekiel 48:21) Oh pil, Esekiel 46:10 mahsanih: “Soupeidio pahn patohlong ahnsou me aramas [irail keinek kan me kaidehn keinek en samworo kan] akan kin pedolong [Kehl en Liki], ahnsou me aramas akan kin pedolong oh pedoi ahnsou me re kin pedoi.” E sohte kin pedolong nan Kehl en Masloale ahpw e kin kaudok nan Kehl en Liki, oh e kin iang aramas akan pedolong oh pedoi sang nan Tehnpas Sarawio. Ire pwukat kin sewese kitail en wehwehki me soupeidio kin kisehn pokon kalaimwun en sihpw teikan.

¹⁴ E sansal me soupeidio kin ahneki ekei pwukoah kan nanpwungen sapwellimen Koht aramas akan. Nan Kehl en Liki, e kin mwondi ni Ewen Kelen Palimese. (Esekiel 44:​2, 3) Met wehwehki irail kin kowahki ehu doadoahk en apwalih aramas, oh met duwehte ohl mah kan en Israel me kin mwohndi ni ewen kehl en kahnimwo oh wia kadeik. (Ruhd 4:​1-​12; Lepin Padahk 22:22) Nan rahnpwukat, ihs nanpwungen pwihn en sihpw teikan me kin ahneki pwukoah en apwalih sapwellimen Siohwa aramas kan? Elder kan me ahneki koapworopwoar en mih nin sampah oh idihdkihda ngehn sarawi. (Wiewia 20:28) Eri, pwihn en soupeidio kin onopada en papah nin duwen pwihn en epwel ehu nan sampah kapwo.

15. (a) Iaduwen kasansal en Esekiel kasansalehda irair en ehupene nanpwungen elder kan me kin iang pokon kalaimwun oh pwihn en samworo keidi kan? (b) Ni ahl dahieu me irail elder me keidi kan kin tiengala mwowe nan sapwellimen Koht pwihn nin sampah?

¹⁵ Eri, ia mwomwen irair en ehupene me mie nanpwungen pwihn en samworo me keidi kan oh ohl mah kan me iang pwihn en pokon kalaimwun me kin papah nin duwen sounapwalih kan? Kasansal en Esekiel kin kasalehda me irail elder kan me kin iang pokon kalaimwun kin ahneki pwukoah en utung ehu, ahpw irail me keidi kan kin ahneki pwukoah en epwel ni pali ngehn. Iaduwen? Tamataman me, irail samworo kan nan kasansal kin ale pwukoah en kihong aramas akan kaweid me kin pid pali ngehn. Re ale pwukoah en wiahla sounkopwung kan ong mehkan me kin pid kosonned. Patehng met, mehn Lipai kan me ale pwukoah en “apwalih ewen kehl kan”. (Esekiel 44:11, 23, 24) E sansal, soupeidio pahn anahne uhpaiong pwihn en samworo kan me kin apwalih aramas akan ni pali ngehn. E pil konehng nan atail ahnsou me irail me keidi kan kin tiengala mwowe nan kaudok min. Karasepe ieu, irail tohn Governing Body en Sounkadehdehn Siohwa kan me pilipilda sang pwihn en me keidi kan. Elder lelepek en me keidi kan kin kaiahne pwihn en soupeidi kan erein sounpar tohto, kaunopada towe kan en pwihn wet ong rahno me irail pahn alehdi ahr pwukoah unsek nan sapwellimen Koht sampah kapw ni ahnsou kohkohdo.

16. Nin duwen Aiseia 32:​1, 2, dahme elder koaros anahne wia?

¹⁶ Soangen sounapwalih dah kei irail akan, ni ahnsou kohkohdo, pahn ale pwukoah laud kan nin duwen pwihn en soupeidio? Kokohp me diarek nan Aiseia 32:1, 2 mahsanih: “Ahnsou ehu nanmwarki men pahn mie me inenen inen oh pwung, oh sapwellime kaunen wehi kan pahn kin kakaun ni pwungen kosonned. Emenemen irail pahn rasehng wasahn ruksang kisinieng oh melimel. Re pahn rasehng piletik kansenamwahu kan me kin tangatang nan wasa karakar kan, oh mwetehn paipalap ehu nan sapwtehn.” Kokohpo pweida rahnwet nin duwen elder en Kristian kan​—me keidi kan oh sihpw teikan​—kin doadoahk pwehn pere pwihno sang ‘melimel’ duwehte kalokolok oh pahtou.

17. Ni ahl dahieu silipen sihpw en Kristian akan anahne kilangwong pein irail, oh madamadau dahieu pelin sihpw pahn anahne ahneki ong silipen sihpw pwukat?

¹⁷ Lepin lokaia “kaunen wehi kan” oh “soupeidi” kin ahneki wehwe teieu ni lokaiahn Ipru, oh met kaidehn daidel kan en kapinga aramas akan. Ahpw, lepin lokaia pwukat kin kasalehda duwen pwukoah kan me ohl pwukat kin kowahki en apwaliada sapwellimen Koht sihpw. Siohwa ketikihong irail mahsen en kaweid me kehlail: “Kumwail kaunen Israel kan, kumwail dipadahr ahnsou reirei! Kumwail katokehdi amwail kamaramas oh kahpwalih irail. Kumwail wia dahme pwung oh pahrek.” (Esekiel 45:​9) E pahn mwahu ong elder kan koaros nan rahnpwukat en tamataman kaweid wet. (1 Piter 5:​2, 3) Pelin sihpw kin pohnese me Sises kin ketikihda silipen sihpw pwukat nin duwen “kisakis kan.” (Episos 4:8) Ahr irair en koahiek kan kileledi nan sapwellimen Koht mahsen. (1 Timoty 3:​1-7; Taitus 1:​5-9) Kristian akan kin idawehn kaweid en elder kan.​—Ipru 13:7.

18. Ia ekei pwukoah kan en pwihnen soupeidi nan rahnpwukat, oh ia arail pwukoah ni ahnsou kohkohdo?

¹⁸ Nan ahnsoun Paipel, ekei soupeidi kan ale manaman laud, oh meteikan ekiste. Rahnwet, pwukoah kan en emenemen elder en pokon kalaimwun kin wekpeseng. Ekei kin papah nan ehu mwomwohdiso; ekei kin papah mwomwohdiso tohto nin duwen soundoulik men; ekei kin papah wehio pohn nin duwen tohn Branch Committee; ekei kin kihda ahr sawas nan pwihn kan me kin mihmi pahn epwelpen Governing Body. Nan sampah kapw, Sises pahn idihada “soupeidi kan nin sampah pwon” pwehn tiengala mwowe oh apwaliahda sapwellimen Siohwa tohnkaudok kan nin sampah. (Melkahka 45:​16, NW) Sohte pekidpe, Sises pahn pilada tohto sang nanpwungen pwihn en elder lelepek kan en rahnwet. Pwehki ohl pwukat kin lelepek ni ahnsouwet, e pahn pilada en kihong irail pwukoah tohto ni ahnsou kohkohdo ni ahnsou me e pahn kasansalehda pwukoahn pwihn en soupeidio nin sampah kapw.

Sapwen Sapwellimen Koht Aramas Akan Rahnwet

19. Ia wehwehn sahpwo nan kasansal en Esekiel?

¹⁹ Kasansal en Esekiel kasalehda duwen kasapahldohn sapwen Israel. Ia wehwehn kasansal wet? Kokohp teikan me kin pid kasapahldohn sahpwo, Israel, kasalehda me e pahn wiahla paradais duwehte Ihden. (Esekiel 36:34, 35) Rahnwet, kitail kin paiekihda kasapahldohn “sahpw” ehu, oh e kin rasehng Ihden. Duwehte met kitail kin kalapw koasoia duwen atail paradais ni pali ngehn. The Watchtower kawehwehdahr me atail “sahpw” kin wehwehki “wasahn wiewia kan” en sapwellimen Koht aramas pilipilda kan.b Sohte lipilipil iawasa sapwellimen Siohwa ladu kin mih ie, e kin mihmi nan “kasapahldohn sahpwo” ma e kin utungada kaudok mehlel ni ah idawehnla nan lipwen Krais Sises.​—1 Piter 2:​21.

20. Dahme kitail kak sukuhliki sang koasoandi en “Meirong Sarawi” nan kasansal en Esekiel, oh iaduwen kitail kak doadoahngki dahme kitail sukuhliki?

²⁰ Iaduwen wasao me adaneki “Meirong Sarawi”? Met iei sawas me kohsang rehn aramas akan ong utungada pwihn en samworo kan oh kahnimwo. Eri, “koaros tohn sahpwo” anahne meirongkihong soupeidio ehu sahpw. Ia wehwehn met nan atail ahnsou? Met sohte kin wehwehki me kaunen lamalam akan pahn katoutouieki sapwellimen Koht aramas akan pweinen arail doadoahk. (2 Deselonika 3:8) Ahpw, utuht me kin kohwong elder kan kin keieu pid laud mehkan en pali ngehn. Met kin wehwehki kihda sawas ong doadoahk me mie rahnwet oh kasalehda ngehnen minimin oh aktikitik. Ni mwehin Esekiel, meirong wet kin kohwong “Siohwa,” kaidehn aramas.​—Esekiel 45:​1, 7, 16.

21. Dahme kitail kak sukuhliki sang nehnepeseng en sahpw nan kasansal en Esekiel?

²¹ Kaidehn ihte soupeidio oh pwihn en samworo kan me sapwenikihla wasa kan nan kasapahldohn sahpwo. Nehnepeseng en sahpwo kin kasalehda me keinek 12 koaros kin sohsohki sapwarail. (Esekiel 47:13, 22, 23) Eri, rahnwet, irail pokon kalaimwun sohte kin ihte ahneki wasa ehu nan paradais en ngehn, ahpw irail pil pahn ale uhdahn sapwarail ni ahnsou me re kin sohsohki ehu wasa nin sampah pahn Wehin Koht.

22. (a) Kahnimwo nan kasansal en Esekiel kin mwete dah? (b) Dahme kitail kin sukuhliki sang ewen kehl kan me kin mihmi ni pali koaros en kahnimwo?

²² Ni imwio, ia wehwehn kahnimwo nan kasansalo? Met kaidehn kahnimw ehu me mih nanleng, pwe e kin mih nan werengehn sahpw me “sohte sarawi”. (Esekiel 48:15-​17) Eri, e kin wehwehki mehkot nin sampah. Dahkot kahnimw ehu? E soh kin wehwehki aramas akan me kin kapokonpene nin duwen pwihn ehu oh wiahda mehkot soandi? Ehi. Ihme kahrehda, kahnimwo kin mwete pwihn en aramas nin sampah me kin wiawihkihda aramas pwung kan nin sampah. E pahn tepida doadoahk ni unsek nan “sampah kapw.” (2 Piter 3:​13) Ewen kanihmw kan kin mihmi ni pali koaros, ehu ong ehu ehu keinek, kin kasansalehda saledek. Rahnwet, sapwellimen Koht aramas akan sohte mih pahnangin pwihn rir ehu. Aramas akan kin mengeiki tuhwong brother likilik kan; kaweid kan me kin kahluwa irail kin sansal ong koaros. Ire mehlelo me aramas sang keinek koaros kin koadoahki pwelen sampah me kin utungada kahnimwo kin katamankihong kitail duwen sihpw teikan kin utungada, pil ni pali en mwohni, koasoandi kan en pwihno me kin apwalih sapwellimen Koht aramas akan nin sampah pwon.​—Esekiel 48:19, 30-​34.

23. Dahme kitail pahn sukuhliki nan artikel en mwuri?

²³ Ahpw, iaduwen pillapo me pwilipwilwei sang Tehnpas Sarawio? Dahme met kin wehwehki ong atail ahnsou oh ong ahnsou kohkohdo pahn wia oaralap en artikel kasiluh oh kaimseklahn artikel kan.

[Nting tikitik kan me mi pah]

Kousapahl

◻ Dahme Tehnpas Sarawio nan kasansal en Esekiel kin mwete?

◻ Irail samworo kan me kin papah nan Tehnpas Sarawio kin mwete ihs?

◻ Ihs pwihn en soupeidio, oh ia ekei arail pwukoah kan?

◻ Dahkot sahpwo nan kasansal en Esekiel, oh ni ahl dahieu e nehnepeseng ong ni keinek 12?

◻ Kahnimwo kin mwete dah?

[Kilel/Map nan pali 13

(Pwehn kilang nting kan ni soandi mwahu, kilang pwuhk wet)

Nehnepeseng en sahpwo nan kasansal en Esekiel

KEINEK EISEK RIAU

Sehd Laud

Lehen Kalili

Pillap Sordan

Sehd en Mehla

DAN

ASER

NAPDALI

MANASE

EPRAIM

REUPEN

SUDA

SOUPEIDIO

PENSAMIN

SIMION

ISAKAR

SEPULON

KAD

[Kilel]

KILEL LAUD EHU EN “MEIRONG SARAWI”

A. “Siohwa Ketiket Wasaht” (Siohwa-Shammah); B. sapwen kahnimwo

Sohso en Mehn Lipai kan

Sapwellimen Siohwa Tehnpas Sarawi

Sohso en Pwihn en Samworo kan

B A B