Sapwellimen Siohwa Kapai Pohn “Sapwatail”
“Wasa koaros me pillap pahn pwillahng ie, e pahn kahrehda mour.”—ESEKIEL 47:9, New World Translation.
1, 2. (a) Ia uwen kesempwal en pihl? (b) Dahme pillapo nan kasansal me Esekiel kilangada kin mwete?
PIHL kin wia mehkot me kapwuriamwei. Mour koaros anahne pihl. Sohte emen kitail me kak mour werei ma sohte pihl. Kitail pil anahne pihl ong kamwakel, pwehki pihl kin kak wudenwei soahng samin kan. Ihme kitail kin kamwakelehki paliwaratail, lopworki atail likou kan, oh pil wudenki kenetail mwenge. Kitail kak mour ma kitail wia soahng pwukat.
2 Paipel kin doadoahngki pihl pwehn karasahiong sapwellimen Siohwa koasoandi en komour en pali ngehn. (Seremaia 2:13; Sohn 4:7-15) Koasoandi pwukat kin oarepene kamwekelehki sapwellime aramas akan meirong tomw en Krais oh loalokongkihla Koht me dierek nan sapwellime Mahsen. (Episos 5:25-27) Nan kasansal me Esekiel kilangada Tehnpas Sarawio, pillap me pwilipwilsang ni Tehnpas Sarawi kin mwete soahngen kapai kan me kin wahdo komour. Ahpw iahd me pillap tepiada pwilipwilwei, oh ia wehwehn met ong kitail nan rahnwet?
Pillap ehu me Pwilipwilwei nan Sahpw me Pwurehng Miehla Towe
3. Dahme Esekiel kilangada, nin duwen me kileledi nan Esekiel 47:2-12?
3 Nin duwen me sensel kei nan Papilon, nein Esekiel aramas akan uhdahn anahne sapwellimen Siohwa koasoandi kan. Ihme, ia uwen kangoang, ong Esekiel en kilang piletik kis ah pwilipwilsang nan Tehnpas Sarawio oh pwilipwilwei likin wasao! Tohnleng men sohngedi pihlo nanpwungen cubit 1,000 koaros. E kin idihda lel ni tikel en neh, mwuri lel ni pwukie, mwuri lel ni lengelenge oh mwuri loalla wiahla pillap ehu me aramas kak pampap loale. Pillapo kin kapwurehdo mour oh wohkien wahn sahpw. (Esekiel 47:2-11) Siohwa mahsanihong Esekiel: “Wasa koaros ni keilen piletiko soangen tuhke koaros pahn keirda ie pwehn kihda mwenge.” (Esekiel 47:12a) Ni ahnsou me pillapo pwilipwillahng nan Sehd en Mehla—sehd ehu me sohte mour kak mie—mour pwurehng miehla loale! Miehla mwahmw loale. Pisnes en laid ehu pweida mwahu sang wasaht.
4, 5. Iaduwen kokohp en Soel me pid pillap ehu kin rasehng kokohp en Esekiel, oh dahme kahrehda met kin kesempwal?
4 Kokohp kaselel wet ele kin katamankihong mehn Suhs kalipilipla kan duwen ehu kokohp me ntingdi sounpar riepwiki samwa mwowe: “Piletik pwoat pahn pwilipwilweisang nan Tehnpas Sarawien Kauno [“Siohwa,” NW], piletiko ahpw pahn kin kalamwuri nan Wahun Akasia.”a (Soel 3:18) En Soel kokohpo, me duwehte en Esekiel, kin kohpada me pahn mie pillap ehu me pahn pwilisang sapwellimen Koht Tehnpas Sarawi, oh pahn wahdo mour ong sahpw madekeng ehu.
5 Erein sounpar tohto The Watchtower kin kawehwe me kokohp en Soel pweidaiehr nan atail ahnsou.b Eri, ni mehlel, kasansalo me Esekiel kilangada me raseng met pil pweidaiehr. Nan sahpw kapwurpwurdo en sapwellimen Koht aramas kan nan rahnwet, me duwehte nan Israel en mahsie, sapwellimen Siohwa kapai kin uhdahn pwilipwilwei.
Kapai kan kin Pwilipwil Laud
6. Usupiki nta pohn pei sarawio nan kasansalo anahne katamankihong mehn Suhs kan dah?
6 Ia wasa kapai en sapwellimen Koht aramas kan me kapwurpwurdohng uhdakarail tepisang ie? Eri, tehk me pihlo pwilipwilsang sapwellimen Koht Tehnpas Sarawi. Me rasehng met nan rahnwet, kapai kan kin kohdo sang rehn Siohwa ki sapwellime Tehnpas Sarawi ngehnin lapalap—koasoandi en kaudok mwakelekel. Kasansalo me Esekiel kilangada kin kasalehda pil ehu ire kesempwal. Nan Kehl en Masloale, piletiko kin pwilipwilwei daulih pei sarawio, ni palieir. (Esikiel 47:1) Pei sarawio kin mihte nan werengen Tehnpas Sarawio nan kansansalo. Siohwa ni oaritik padahkihong Esekiel duwen met oh kaweidiki me ntahn meirong en usup pohn pei sarawio. (Esekiel 43:13-18, 20) Mie wehwe laud en pei sarawio ong mehn Israel koaros. Arail inou ong Siohwa kamanamanlahr mahso ni ahnsou me Moses usupiki nta pei sarawio ni utupen Dolen Sainai. (Eksodus 24:4-8) Usupiki nta pohn pei sarawio nan kasansalo pahn katamankihong mehn Israel kan me ni ahnsou me re pwurelahng uhdakarail, sapwellimen Siohwa kapai pahn pwilipwildo rehrail erein arail kin wahuneki arail inou ong Koht.—Deuderonomi 28:1-14.
7. Dahme Kristian kan nan rahnwet wehwehkihda me pid pei sarawio nan kasansalo?
7 Me rasehng met, sapwellimen Koht aramas akan nan rahnwet kin ale kapai sang ni inou ehu—inou ehu me mwahusang, inou kapwo. (Seremaia 31:31-34) Inou wet pil kamanamankilahr ntahn Sises Krais. (Ipru 9:15-20) Rahnwet, mehnda ma kitail kisehn me keidi kan, me iang kisehn inouwo, de kitail kisehn “sihpw teikan,” me pahn paiekihda inou wet, kitail diaradahr me mie wehwehn pei sarawio nan kasansalo. E kin kasaraiong kupwuren Koht me pid meirong en Krais. (Sohn 10:16; Ipru 10:10) Duwehte pei sarawio nan kasansalo me mihte nan werengen Tehnpas Sarawi ngehnino, meirong tomw en Krais iei me keieu nan kaudok mwakelekel. E kin wia poahsoan en mahkpen dipatail oh ong atail koapworopwor koaros ong ahnsou kohkohdo. (1 Sohn 2:2) Ihme kitail en mourki kosonnedo me pid inou kapwo, “kosonned en Krais.” (Kalesia 6:2) Erein atail wia met, kitail pahn paiekihda sapwellimen Siohwa koasoandi en komour.
8. (a) Dahme sohte mih nan Kehl en Masloalen Tehnpas Sarawio nan kasansalo? (b) Dahme samworo kan nan kasansal en Tehnpas Sarawio kin kamwekelehkin irail?
8 Ehu soahngen kapai pwukat iei en ahneki nanpwung mwakelekel rehn Siohwa. Nan kasansal en Tehnpas Sarawio, mie mehkot me sohte mie nan Kehl en Masloale me mih nan Kehl en Impwalo oh pil mih nan Kehl en Tehnpas Sarawi en Solomon—met iei lapalahn peisin, me mwuri adaneki sehd, me samworo kan kin wudoudki. (Eksodus 30:18-21; 2 Kronikel 4:2-6) Dahme samworo kan nan kasansal en Esekiel pahn doadoahngki ong kamwakel? Met iei piletiko me pwilipwilsang nan Kehl en Masloale! Ehi, Siohwa pahn ketin kapaiirailda pwe ren paiekihda nanpwung mwahu reh me pil mwakelekel, de sarawi.
9. Iaduwen irail me keidi ko oh irail pokon kalaimwun kak ahneki nanpwung mwakelekel ehu rehn Koht nan rahnwet?
9 Me duwehte nan rahnwet, me keidi kan kin paiekihda arail ahneki nanpwung mwakelekel ehu rehn Siohwa. Siohwa kin kilangwohng irail me re sarawi, oh e ketin kasalehda me re pwunglahr. (Rom 5:1, 2) Iaduwen “pokon kalaimwun,” me keinek kan me kaidehn samworo kin mwete? Re kin kaudok nan Kehl en Liki, oh piletik ohte kin pil tang nan Kehl en Liki nan Tehnpas Sarawi en kasansalo. Eri, ia uwen eh konehng, en wahnpoaron Sohn kilangada pokon kalaimwuno likouki likou pwetepwet ni arail kin kaudok nan Kehl en Tehnpas Sarawi ngehnino! (Kaudiahl 7:9-14) Mendahki dahme aramas kin wiaiong irail nan sampah samin wet, re kin koapworopworki me erein arail kasalehda pwoson meirong tomw en Krais, Siohwa pahn wiahkin irail aramas mwakelekel oh soh samin. Iaduwen re kin kasalehda arail pwoson? Ni arail idawehnla nan lipwen Sises, oh kin liki unsek meirong tomwo.—1 Piter 2:21.
10, 11. Ia ehu ire kesempwal en pilen karasaraso, oh iaduwen met kin pidada pwilipwil laudlahn pillapo?
10 Duwen me sansalda mwowe, mie pil ehu ire kesempwal en pilen karasaras wet—loalokong. Nan Israel me pwurehng miehla towe, Siohwa ketin kapaiakihda sapwellime aramas akan kaweid en Pwuhk Sarawi ni ah doadoahngki koasoandi en samworo. (Esekiel 44:23) Ni ahl ehu me rasehng met, Siohwa ketin kapaiakihda sapwellime aramas kan nan rahnwet kaweid duwen sapwellime Mahsen en padahk mehlel, sang rehn “samworo nanmwarki kan.” (1 Piter 2:9) Loalokongkihla Siohwa Koht, oh sapwellime kupwur ong tohnsampah, oh keieu duwen Sises Krais oh Wehin Mesaia kin wie pwilipwilwei nan pillapo me wie loalloalla erein imwin rahnpwukat. Ia uwen kaselel loalloallahn pihl kansenamwahu en pali ngehn me kitail kin aliale!—Daniel 12:4.
11 Duwehte pillap me tohnlengo kin sohngih kin ekis ekis wie loalloalla, ihme pil duwehte kapai en komour me kin pwilipwilsang rehn Siohwa kin wie lalaudla pwehn kak apwaliala aramas akan me kohkohdo nan kapai en sapwatail ni pali ngehn. Ehu kokohp en kapwurpwurdo mahsanih: “Pil peneinei ehu me keieu tikitik oh sohte wede rehmwail pahn lapalapala rasehng wehi lapalap ehu. I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me Kauno [“Siohwa,” NW]!” (Aiseia 60:22) Mahsen pwukat pweidaiehr—aramas rar kan pokondohr pwehn iang kitail nan kaudok mwakelekel! Siohwa ketin wiadahr “pihl” tohto pwehn lelohng koaros me kin sohpeilahng ih. (Kaudiahl 22:17) E kupwurki me sapwellime pwihn nan sampah en kihpeseng Paipel oh sawas kan en Paipel nan sampah pwon, ni lokaia epwiki. Me rasehng met, mihding en Kristian kan oh kapokon kan kin wiawihda nan sampah pwon pwe koaros en kak ale pihl mwakelekel en padahk mehlel. Iaduwen soahngen koasoandi pwukat kin kamwekid aramas kan?
Pihlo Kapwurehdo Mour!
12. (a) Dahme kahrehda tuhke kan nan kasansal en Esekiel kin kak wawah ni ahlo? (b) Dahme tuhke wohkien ko kin mwete erein imwin rahn akan?
12 Pillapo nan kasansalo me Esekiel kilangada kin kapwurehdo mour oh roson mwahu. Ni ahnsou me Esekiel esehda duwen tuhke kan me pahn wosada ni keilen pillapo, Koht mahsanihong: “Tehrail kan sohte pahn mengida, oh wah sohte pahn tokedi. . . . Tuhke kan pahn kihda kisin mwenge, oh tehrail kan pahn wia wini ong aramas akan.” Dahme kahrehda tuhke pwukat wah ni ahl kapwuriamwei wet? “Pwehki ar kalamwurki piletiko— me pwilipwilsang ni Tehnpas Sarawio.” (Esekiel 47:12b) Tuhke ni karasaras pwukat kin mwete sapwellimen Koht koasoandi kan koaros me e pahn ketin doadoahngki pwehn kapwurehdo tohnsampah en unsekla me pahn poahsoankihda meirong tomw en Sises. Pohn sampah ahnsouwet, luhwen me keidi kan kin tiengla mwowe kihda mehn karoson en pali ngehn oh wini en pali ngehn. Mwurin 144,000 koaros ale arail kating nanleng, kapai kan me kin kohsang arail papah nin duwen samworo ni arail pahn iang Krais kaunda pahn wiawi lao lel nan ahnsou kohkohdo, ni ah imwisekihla powehdi douluhl mehla me kohsang rehn Adam.—Kaudiahl 5:9, 10; 21:2-4.
13. Kamwahula dahieu me wiawihda erein atail ahnsou?
13 Pillapo nan kasansalo kin tangalong nan Sehd en Mehla me sohte mour kak mih loale oh e kin kamwahuwiala mehkoaros me e kin pwila ie. Sehd wet kin mwete irair en wasa ehu me mehla ni pali ngehn. Ahpw mour miehla “wasa koaros me e pahn pwillahng ie.” (Esekiel 47:9) Me duwehte met, ni imwin rahn akan, aramas akan kin mourada ni pali ngehn ni ahnsou me pilen komour kin sair irail. Irail kan me tepin pwurehng kehlailda iei luhwen me keidi kan nan 1919. Re pwurehng mourada ni pali ngehn sang irair en mehla, de soh mwekid ni pali ngehn. (Esekiel 37:1-14; Kaudiahl 11:3, 7-12) Sangete ahnsouwo pihl kesempwal pwukat lelohngehr irail teikan me mehla ni pali ngehn, oh irail pwukat pwurehng mourda sapahl ni pali ngehn oh wiadahr pokon kalaimwun en sihpw teikan me kin wie tohto, me kin poakohng oh papah Siohwa. Ni ahnsou keren, diren me mehlahr kan pahn pil pwurehng mourda.
14. Pisnes en laid me pweida mwahu pohn oaroahr en Sehd en Mehla kin mwete dahkot nan rahnwet?
14 Kehlail ni pali ngehn kin wahdo wah tohto. Met kin rasehng pisnes en laid me kin pweida mwahu pohn oaroahr en sehdo me mahs sohte mwahmw kak mour loale. Sises padahkihong sapwellime werek kan: “I ahpw pahn padahkihong kumwa duwen laidih aramas akan.” (Madiu 4:19) Ni imwin rahn akan, doadoahk en laid tepida ni kihkihpenen luhwen me keidi kan, ahpw e sohte uhdi wasao. Pilen komour me kohsang ni sapwellimen Siohwa Tehnpas Sarawi en pali ngehn, iangahki kapai en loalokong pwung, kin kamwekid aramas en wehi kan koaros. Wasa koaros me pillapo kin pwillahng ie, e kin wahdo mour ni pali ngehn.
15. Dahme kasalehda me kaidehn aramas koaros pahn men ale sapwellimen Koht koasoandi kan en komour, oh ia imwilahn soahngen aramas pwukat?
15 Ni mehlel, kaidehn koaros kin ahnsouwet pwungki rongen komouro; pil kaidehn irail koaros me kaiasada erein Kaundahn Pahr Kid en Krais pahn pwungki rongen komouro. (Aiseia 65:20; Kaudiahl 21:8) Tohnlengo kasalehda me ekei wasa nan sehdo sohte mwahula. ‘Soahl kin kohieng’ wasa pwukat me mour sohte kak mie. (Esekiel 47:11) Ong aramas akan nan atail ahnsou, kaidehn koaros me kin rong sapwellimen Siohwa pilen komour kin pwungki. (Aiseia 6:10) Nan Armakedon, soahl pahn kohieng irail ko koaros me pilada en mihmihte nan irair en mehla oh soumwahu ni pali ngehn, de re pahn kasohrala. (Kaudiahl 19:11-21) Ahpw, irail ko me kin ni lelepek niminim pihl pwukat kak koapworopworki en pitla oh kilang kaimwseklahn pweidahn kokohp wet.
Pillapo Pwilipwil nan Paradais
16. Iahd oh iaduwen kasansal en Tehnpas Sarawio me Esekiel kilangada pahn pweida ni unsek?
16 Duwehte kokohp en kapwurpwurdo teikan, kaimwseklahn pweidahn kasansal me Esekiel kilanaga Tehnpas Sarawio pahn wiawi erein Pahr Kido. Ahnsouwo, pwihn en samworo sohla pahn mih nan sampah. “Re pahn wiahla samworo en Koht oh Krais, oh re pahn iang kakaun [nanleng] erein pahr kido.” (Kaudiahl 20:6) Samworo en nanleng pwukat pahn iang Krais kihda kating en meirong tomw en Krais ni unsek. Eri, tohnsampah pwung kan pahn komourala, pwurehng unsekla!—Sohn 3:17.
17, 18. (a) Iaduwen Kaudiahl 22:1, 2 kin kasalehda duwen pillap en komour ehu, oh iahd tepin kadoadoahkpen kasansalo? (b) Nan Paradais, dahme kahrehda pillap en pilen komour pahn lelohng ahnsou ehu me ah pwilipwilwei pahn laudla?
17 Pwehki met, pillapo me Esekiel kilangada eri pahn pwilipwilkihwei pilen komour me keieu manaman. Met iei tepin kadoadoahkpen kokohp me kileledi nan Kaudiahl 22:1, 2: “Tohnlengo pil kasalehiong ie pillap en pilen komouro, mwakelekel duwehte kilahs, me uhsang ni mwoalen Koht oh Sihmpwulo, oh kin pwilipwilwei nanwerengen ahl en kahnimwo. Ni pali koaros en keilen pillapo tuhken komour pwoat uhda ie me kin wah pak ehu nan sounpwong koaros; oh teh kan kin wiahla wini mehn kamwahwihala tohn wehi kan.”
18 Erein Pahr Kihdo, soumwahu koaros—en paliwar, madamadau, oh pepehm—pahn mwahula. Met kin mwete “wini mehn kamwahwihala tohn wehi kan” me pahn kohsang tuhke ko ni karasaras. Pwehki kalahngan en koasoandi kan me Krais oh 144,000 kihda, “sohte emen me kin kousoan nan sahpwo pahn kaulimkihla eh soumwahu, oh koaruhsie pahn ale lapwepen diparail kan koaros.” (Aiseia 33:24) Oh pillap wet pahn lel ni irair me e pahn keieu laud. E pahn tehlappeseng oh loalla pwehn apwaliala aramas rar kan, ele aramas lik kei, me pahn kaiasada me pahn nim pihl mwakelekel en komour. Pillapo nan kasansalo kamwahwihala Sehd en Mehla, wahdo mour ong wasa kan koaros me pihlo pwilla ie. Nan Paradais, ohl oh lih akan pahn mourki mour ni irair ehu me keieu unsek, ma re pahn pwosonla kamwahu kan me kohsang ni meirongo, eri, irail pahn saledek sang douluhl mehla me irail sohsohkihsang Adam. Kaudiahl 20:12 kohpada me “pwuhk limilim kan” pahn papahkpeseng ni rahn ako, ni ahr pahn kihda kalaudepen marain en wehwe me irail me kaiasada kan pahn paiekihda. E kansensuwed pwe, ekei sohte pahn men mwahula, pil nan Paradais. Irail me uhwong pwukat pahn ‘ale soahl’ en kasohrala soutuk.—Kaudiahl 20:15.
19. (a) Iaduwen nehnepeseng en sahpwo pahn pweida nan Paradais? (b) Ire dahieu nan Paradais me kahnimwo kin mwete? (c) Ia wehwehn en kahnimwo kin mih wasa ehu me dohsang Tehnpas Sarawio?
19 Pil ni ahnsouwo, kaimwseklahn pweidahn nehnepeseng en sahpwo nan kasansal en Esekiel pahn wiawi. Esekiel kilangada sahpwo nehnepeseng pwung; oh me duwehte met, emenemen Kristian lelepek kan kak koapworopworki me e pahn sapwenikihla wasakis, de ahnekihla sohso ehu, nan Paradais. Ele, ineng en pein imwaneki imwomw pwehn mihmi loale oh apwapwalih pahn wiawi ni ahl ehu me soandi mwahu. (Aiseia 65:21; 1 Korint 14:33) Kahnimwo me Esekiel kilangada kin ni pwung mwete koasoandi en epwel me Siohwa kupwurki ong sampah kapwo. Pwihn en samworo keidio solahr pahn ni war mih rehn tohnsampah. Kasansalo kasalehda duwen met ni ah kasalehda me kahnimwo mih nan sahpw “soh sarawi” me dohsang tehnpas sarawio. (Esekiel 48:15) Nindoken 144,000 pahn iang Krais kaunda nanleng, mie wiliepen Nanmwarkio pohn sampah. Sapwellime kan me mih pahn ah kaunda pahn paiekihda laud kaweid limpoak kan sang rehn pwihn en soupeidio. Ahpw, poahsoan kaun en kopermento pahn mih, kaidehn pohn sampah, ahpw nanleng. Koaros pohn sampah, iangahki pwihn en soupeidio, pahn uhpaiong Wehin Mesaia.—Daniel 2:44; 7:14, 18, 22.
20, 21. (a) Dahme kahrehda eden kahnimwo konehngki? (b) Peidek dahkei me atail wehwehkihla kasansal en Esekiel pahn kahrehong kitail en kalelepek pein rehtail?
20 Tehk kaimwseklahn mahsen en kokohp en Esekiel: “Sang met kohla kahnimwo pahn adanekihla ‘Kauno [“Siohwa,” NW] Ketiket Wasaht.’” (Esekiel 48:35) Kahnimw wet sohte koukouda pwehn kihong aramas manaman de kehl; e pil sohte koukouda pwehn ale idihd en kapwaiada kupwuren aramas. Kahnimw wet iei sapwellimen Siohwa kahnimw, me kin ahnsou koaros kasalehda audepen sapwellime lamalam oh sapwellime ahl limpoak kan. (Seims 3:17) Met kin kihong kitail mehn kamehlel me Siohwa pahn ketin kapaiada sapwellime “sampah kapw” en koasoandi en aramas kohkohlahte lel ahnsou soh imwi.—2 Piter 3:13.
21 Kitail soh kin perenkihda koapworopwor me mih mwohtail? Ihme e konehng emenemen kitail en kalelepek: ‘Iaduwen I kin mwekidiki kapai kaselel kan me sansalda nan kasansal en Esekiel? I kin ni lelepek utungada doadoahk en sounapwalih limpoak kan, iangahki irail luhwen me keidi kan oh irail ko me pahn wiahla tohn pwihn en soupeidio? I wiakilahr kaudok mwakelekel mehkot me keieu nan ahi mour? I kin isaneki pilen komour me pwilipwilwei laud rahnwet?’ Emenemen kitail en kaukaule wia met oh perenkihda sapwellimen Siohwa koasoandi en komour sang met kohkohlahte soutuk!
[Nting tikitik kan me mi pah]
a Pillap en wahu wet ele kin wehwehki Wahun Kidron, me kohsang ni palieir en palimesen Serusalem oh imwisekla ni Sehd en Mehla. Pali pah en wasaht kin keieu sohte pihl oh madekeng nan pahr koaros.
b Kilang Watchtower en English en May 1, 1881, oh June 1, 1981.
Iaduwen Komw Pahn Sapeng?
◻ Dahme pillapo me pwilipwilsang ni Tehnpas Sarawio kin mwete?
◻ Kamwahula dahieu Siohwa ketin wiahda sang ni pillap en karasaraso, oh dahme kahrehda pwilipwil en pillapo laudla?
◻ Dahme tuhke ko ni keilen pillapo kin mwete?
◻ Dahme kahnimwo pahn mwete erein Kaundahn Pahr Kido, oh dahme kahrehda eden kahnimwo me konehng?
[Kilel kan nan pali 21]
Pillap en komour kin mwete sapwellimen Koht koasoandi en komour