Kitail Kin Rapahki Dahme Kak Kareireila Atail Mour
“Kitail koaros ipwidi luwet. Aramas koaros ahneki soangen mourteieu me mwotomwot oh diren apwal. Kitail kin keirada oh mengidi, rasehng wahnrohs kan; kitail kin sohrala duwehte mwete.”—Sohp 14:1, 2.
PIL nan rahnwet aramas malaulau me pahn sapwungki madamadau wet me pid duwen mwotomwot en mour, mendahki met ntingdi sounpar 3,500 samwa samwalahro. Aramas sohte kin itarki en mour mwotomwot oh eri mahla oh mehla. Ihme karehda, mie wiepe kan en kareireila mour me kin wie kekeirada sangete mahs lel nan rahnwet.
Ni mwein Sohp mehn Isip kan kin kang wisol en mahn akan pwe ren pwulopwulte. Ehu mehn akadei en sounwia wini kan en mahs iei en wiahda ehu pilen wini me kak kahrehong emen en mour werei. Sounwia wini tohto en mahs kin kamehlele me kohl kan me aramas pein wiahda kak kahrehong emen mour soutuk oh ma emen pahn mwenge sang nan dahl akan me wiawihkihda kohl kak kareireila mouren emen. Irail mehn Saina en mahs akan me adaneki Taoists kin kamehlele me re kak wekidala mwekimwekid en paliwar ni ahr pahn doadoahngki soangen wiepen kan me duwehte doudouloale, mwomwen omw pahn esingek, oh soangen mwenge me ke pahn kang de sohte kang oh met kak kahreihong uhk en mour soutuk.
Mehn Spain me adaneki Juan Ponce de León kin ndandki ah kin raparapahki pihl me pahn kapwulopwulla aramas. Emen toahkte nan senturi 18 ntingihdi nan nah pwuhk me adaneki Hermippus Redivivus me meipwon pwulopwul kan en kohieng nan ehu kisin pere nan ahnsoun “spring” oh arail esingek en audaudda nan pwoatol kan oh aramas en doadoahngki pwehn kareireila arail mour. Mendahki met, sohte ehute wiepe pwukat kin pweida mwahu.
Nan rahnwet, sounpar 3,500 samwa mwurin Moses ntingihdi mahsan kan en Sohp, aramas aluehr pohn maramo, wiadahr sidosa kan oh computer kan, oh kasawiehr atom oh cell. Ahpw mendahki soangen deilahn wiepe pwukat, kitail kin “mour mwotomwot oh apwal.” E mehlel me nan sahpw semwehmwe kan mouren aramas kan kin wie reireila sang mahso. Ahpw met kin keieu kohsang mwahulahn pelien roson mwahu, wiepen mwakelekel en paliwar pil mwahula, oh mwenge kan pil mwahula. Karasepe ehu, sang nan werengen senturi 19 lao lel tepin 1990 kan, uwen reirei en mouren ohlen Sweden kin reireila sang sounpar 40 lel sounpar 75 oh lih kan sang sounpar 44 lel sounpar 80. Ahpw met kin wehwehki me en aramas ineng en mour werei kin kaitarala?
Soh, pwehki mendahki nan ekei sahpw aramas tohto kin mour lellahng arail mahla, mahsen kan me Moses ntingihdi sounpar tohto samwalahro kin kadoadoahkte: “Sounpar 70, ihte werein at mour—a ma se kehlail, e pahn lel 80 . . . . mour kin mwadang imwisekla, oh se solahr mie.” (Melkahka 90:10) Nan ahnsou kohkohdo, kitail pahn kilang wekidekla ehu? Aramas pahn kak mour werei? Artikel en mwuhr pahn koasoiahda peidek pwukat.