“Dipwisou Kesempwal Akan” Kin Kadirehla Sapwellimen Siohwa Tehnpas Sarawi

“I [Siohwa] pahn kauwehla wehi koaros, oh ar dipwisou kesempwal akan pahn wisikdohng wasaht, oh Tehnpas Sarawi wet pahn direkihla dipwisou kesempwal.”​—AKKAI 2:7.

1. Ni ahnsoun keper ehu, dahme kahrehda kitail kin keieu nsenohki de medemedewe duwen tohn atail peneinei kan?

MEHNIA dipwisou kesempwal akan me mih nan imwomw? Ke kin naineki sehr oh tehpel pweilaud kan, computor ehu me keieu mwahu oh kapw, oh pil apwoat sidohsa kapw? Mendahki ma ke naineki dipwisou pwukat, ke soh pahn iang pwungki me dipwisou me keieu kesempwal nan imwomw iei aramas​—tohn ahmw peneinei kan? Nna medewehla met: ehu pwong, ke pirikihda pwohn ediniei. Imwomw lulda, oh erein minit kei ke anahne en pidoisang nan imwomw! Dahme ke pahn keieu nsenohki? Noumw sehr oh tehpel kan? Noumw computor? Waromw sidosa? Ke soh pahn nsenohki tohn ahmw peneinei kan? Ke uhdahn pahn nsenohkin irail pwe aramas me kesempwal sang dipwisou kan.

2. Dahme Siohwa kapikada, oh dahme Sises kin keieu perenkihda?

² Nna, medewehla duwen Siohwa Koht oh sapwellime Ohl, Sises Krais. Siohwa iei “Kaun oh Sounwiepen lahng, sampah, sehd, oh audeparail kan koaros.” (Wiewia 4:24) Sapwellime Ohl, “sounsawas emen,” ih emen me Siohwa doadoahngki en kapikada soahng koaros. (Lepin Padahk 8:30, 31; Sohn 1:3; Kolose 1:15-17) Mehlel, Siohwa oh Sises kin kesempwaliki soahng koaros me kapikadahr. (Pil kilang Senesis 1:31.) Ahpw, mehnia kapikapikda kan ke lemeleme ira kin keieu kesempwaliki​—dipwisou kan de aramas akan? Ni ahnsou me pwuhken Lepin Padahk kin karasaiong Sises duwehte irair en erpit, Sises mahsanih: “Mehkan me I kin perenki iei irail aramas akan,” oh nan pil ehu kawehwehn Pwuhk Sarawi, William F. Beck koasoia me Sises “perenkihda aramas akan.”

3. Mehnia kokohp me Siohwa mahsanih ki Akkai?

³ Ni soh peikidpe, Siohwa kin inenen kesempwaliki aramas akan. Kadehdehpen ire wet me dierekda nan sapwellime Siohwa mahsen en kokohp akan nan pahr 520 B.C.E. ki sapwellime soukohp Akkai. Siohwa mahsanih: “I pahn kauwehla wehi koaros, oh ar dipwisou kesempwal akan pahn wisikdohng wasaht, oh Tehnpas Sarawi wet pahn direkihla dipwisou kesempwal. . . . Tehnpas Sarawi kapwo pahn lingan sang mehn mahso, oh I pahn ketikihong nei aramas akan pai oh popohl.”​—Akkai 2:7, 9.

4, 5. (a) Dahme kahrehda e sohte konehng kitail en lemeleme me lepin lokaia pwukat “dipwisou kesempwal akan” kin wehwehki mwohni kan? (b) Iaduwen ke pahn kak kawehwehda lepin lokaia wet “dipwisou kesempwal akan,” oh dahme kahrehda?

⁴ Mehnia “dipwisou kesempwal akan” pahn kadirehla sapwellimen Siohwa Tehnpas Sarawi oh pahn lingan sang mehn mahso? Dipwisou kan oh kapwat pweilaud akan? Kohl, silper, oh takai kesempwal kan? Met sohte pahn kak wiawi. Tamanda, me isimwas en Tehnpas Sarawi en mahso me wiawiehr mpen sounpar limepwiki samwalahro, oh Tehnpas Sarawio me inenen pweilaud, wiawihihda tala lik (billion) kei!a Siohwa sohte pahn kasik me sapwellime aramas malaulau kei, mehn Suhs akan me pwurala nan sapwarail, en kak kauwada Tehnpas Sarawi ehu me lingan oh pweilaud duwehte Tehnpas Sarawi me Solomon wiahda!

⁵ Eri, ia wehwehn “dipwisou kesempwal akan” me pahn kadirehla sapwellimen Siohwa Tehnpas Sarawi? Ni sansal, re kin karasaiong aramas akan. Ahpw dahme kin kaperenda sapwellimen Siohwa mohngiong kaidehn silper oh kohl ahpw aramas akan me kin papah Ih ni limpoak. (Lepin Padahk 27:11; 1 Korint 10:26) Ei, Siohwa kin kesempwaliki ohl, lih, oh seri kan me kin kaudokiong ih ni ahl me pwung oh konehng. (Sohn 4:23, 24) Aramas pwukat kin wia “dipwisou kesempwal akan” oh Siohwa kin kesempwaliki irail laudsang dipwisou kaselel kan me Solomon doadoahngki ong Tehnpas Sarawio.

6. Ia kahrepen sapwellimen Koht Tehnpas Sarawi en mahs?

⁶ Edetehn uhwong laud kohwong irail, re kanokehla kakau en Tehnpas Sarawio nan pahr 515 B.C.E. Lao lel ni ahnsou me meirong en Sises wiawi, Tehnpas Sarawi en Serusalem wiahla poasen kaun en kaudok min ong “dipwisou kesempwal” tohto, me wiawikihda uhdahn pwiladak en mehn Suhs akan oh mehn liki kan me iangala kaudok en Mehn Suhs ako. Ahpw kitail pahn kilang iaduwen Tehnpas Sarawio kin karasaiong mehkot laudsang met.

Pweida nan Keieun Senturi

7. (a) Dahme sapwellimen Koht Tehnpas Sarawi en mahs nan Serusalem mwete? (b) Kawehwehda pwukoa kan en Samworo Lapalapo nan Rahnen Tomwo.

⁷ Tehnpas Sarawio nan Serusalem kin mwete koasoandi laud ehu ong kaudok. E kin mwete sapwellimen Koht Tehnpas Sarawi en pali ngehn, me Siohwa ketin wiahda nan pahr 29 C.E. oh Sises kin wia Samworo Lapalapo. (Ipru 5:4-10; 9:11, 12) Tehk duwen pahrekpenehn pwukoah en irail samworo lapalap en wehin Israel oh wiewia kan en Sises. Ehu ehu pahr ni Rahnen Tomw, samworo lapalapo kin kohdohng ni pei sarawi nan kehlen Tehnpas Sarawio oh meirongkihla kouwol men pwehn pwainda dipen samworo kan. Mwurin met, e kin uhd pedolong nan Tehnpas Sarawio oh wah ntahn kouwohl, oh aluhwei ni wenihmw riau me irepeseng kehlen Tehnpas Sarawio oh Wasa Sarawio oh e uhd kin pedolong ni kahdengo me irepeseng Wasa Sarawio sang Wasa Sarawiheo. Ni ahnsou me e pedolong nan Wasa Sarawiheo, samworo lapalapo pahn doadoahngki ntao usupihki mwohn kohpwahn inowo. Oh mwurin met, e pahn wia duwehte dahme e ahpwtehn wia, ahpw e pahn meirongki mahn kuht pwehn tomwki dipen keinek en mehn Israel 12 me sohte iang wia pwukoa en samworo kan. (Lipai 16:5-15) Iaduwen wiewia pwukat kin pidada sapwellimen Koht Tehnpas Sarawio en pali ngehn?

8. (a) Ni ahl dahieu me Sises meirongkihla moure tepidahn pahr 29 C.E.? (b) Nanpwung tohrohr dahieu me Sises oh Siohwa ahneki erein ahn Sises doadoahk en kalohk nin sampah?

⁸ Ni ahnsou me Sises papidaisla oh keikihdi sapwellimen Koht ngehn sarawi nan pahr 29 C.E., e kin rasehng Sises e pahn kihong moure pohn pei sarawi en kupwuren Koht. (Luk 3:21, 22) Ni mehlel, wiewia wet wia kilelepen tepin wiewiahn meirong ehu me Sises wiahdahr ni erein sounpar siluh elep en ah mour. (Ipru 10:5-10) Ni erein ahnsou wet, Sises kin paieki ni ah sapwellimaniki irair en nanpwung mwahu ong Koht oh keikihdier ngehn sarawi. Aramas akan sohte kak uhdahn wehwehki ni unsek duwen nanpwungmwahu me Sises oh Seme nanleng kin sapwellimaniki. Ni karasaras, e mwomwen kahdengo me kin pwaindi meserail kan en dehdehki, duwehte kahdengo me langahda pwehn dehr mweidong aramas me mih likin kehlen Tehnpas Sarawio en kilang nan Wasa Sarawio.​—Eksodus 40:28.

9. Dahme kahrehda Sises sohte kak pedolong nanleng nin duwen aramas men, oh iaduwen met wekihla?

⁹ Mendahki Sises iei sapwellimen Koht Ohl me keidi men, ni ahnsou me e wiahla aramas men, e sohte kak ale mour nanleng. Dahme kahrehda? Pwehki uduk oh nta sohte kak sohsohki Wehin Koht nanleng. (1 Korint 15:44, 50) Pwehki uduk en Sises me irehdi ih en pedolong nanleng, met kin rasehng kahdengo me irepeseng Wasa Sarawio sang Wasa Sarawiheo nan sapwellimen Koht Tehnpas Sarawi en mahso. (Ipru 10:20) Ahpw rahn siluh mwurin eh pwoula, Koht ketin kaiasada ih oh Sises uhd ieias ni pali ngehn. (1 Piter 3:18) Mwurin met, e pahn kak pedolong nan Wasa Sarawiheo en Sapwellimen Koht Tehnpas Sarawi en pali ngehn​—iei nanleng. Oh met uhdahn wiawi. Pohl ntingihdi met: “Pwe Krais sohte ketilong nan Wasa Sarawi ehu me wiepen aramas, me duwehte mwomwen me uhdahno. Pwe e ketilong nanleng, wasa e ketiket ie ahnsou wet mwohn silangin Koht pwehn sewesei kitail.”​—Ipru 9:24.

10. Dahme Sises wia ni ahnsou me e pwurdalahng nanleng?

¹⁰ Ni ahnsou me Sises kohdahla nanleng, e ‘usupihki’ ntahn eh meirong ni e kasalehong Siohwa kesempwalpen tomwo. Ahpw, Sises wia laudsang met. Mwohnte e pwoula, e padahkiong sapwellime tohnpadahk kan: “I pahn kohla oh kaunopadahng kumwail deumwail. I lao kohla oh kaunopada deumwail, I ahpw pahn pwurodo oh kahreikumwaildong ie, pwe kumwail en mi wasa me I kin mih ie.” (Sohn 14:2, 3) Sises ritingihda ahl ong aramas teikan en idawehnla ih, ni ahnsou me e pedolong nan Wasa Sarawiheo, de nanleng. (Ipru 6:19, 20) Aramas pwukat, meh 144,000, pahn papah nin duwen samworo kan pahn sapwellimen Koht koasoandi en Tehnpas Sarawi en pali ngehn. (Kaudiahl 7:4; 14:1; 20:6) Duwehte Samworo Lapalap en Israel me wahla ntahn kouwol nan Wasa Sarawiheo pwehn tomwki dipen samworo kan, katepen ntahn Sises pahn keieu kadoadoahk ong samworo 144,000 pwukat.b

“Dipwisou Kesempwal Akan” Nan Rahnpwukat

11. Ong ihs me samworo lapalap en Israel kin meirongkihla mahn kuht men, oh dahme met kin mwete?

¹¹ Nan sounpar 1935, kihkihpene en me keidi kan imwisekila.c Ahpw, Siohwa saikinte nek ah kalinganahda sapwellime Tehnpas Sarawio. Soh, “dipwisou kesempwal akan” pahn pedolong nan sapwellime Tehnpas Sarawio. Tamanda me Samworo Lapalap en Israel kin meirongkihla mahn riemen​—kouwol men pwehki dipen samworo kan oh kuht men pwehki dipen keinek kan me sohte iang wia pwukoah en samworo kan. Pwehki samworo kan kin karasaiong irail me keidi kan me pahn iang Sises nan Wehin Nanleng, ihs me rasehng irail keinek kan me sohte iang wia pwukoa en samworo kan? Pasepeng dierekda ni mahsen en Sises me ntingihdi nan pwuhken Sohn 10:16: “Pil mie ekei nei sihpw me sohte mi nan kehl wet. I uhdahn pahn weiraildo, oh re pahn rong ngilei. Eri, re pahn wiahla pwihn sihpw teieu, oh sileparail pahn mehtehmen.” Eri, ntahn Sises kin kapaiada aramas akan me wiawihkihda pwihn riau​—keieu, irail Kristian akan me kin ahneki koapworopwor en iang Sises kakaun nanleng oh keriau, irail akan me kin kasikasik en mour soutuk nan paradais nin sampah. E sansal me keriaun pwihn wet me kin rasehng “dipwisou kesempwal akan” nan kokohp en Akkai.​—Maika 4:1, 2; 1 Sohn 2:1, 2.

12. Nan rahnpwukat, iaduwen “dipwisou kesempwal” tohto kin wisikdohng nan sapwellimen Koht Tehnpas Sarawio?

¹² “Dipwisou kesempwal akan” sohte kin uhdi ni ahr kin pedolong nan sapwellimen Siohwa Tehnpas Sarawio. Nan sounpar kei samwalahro keinepwi kan sohlahr kin wiawi nan sahpw en Pali Mesen Iurop, ekei sahpw kan nan Aprika, oh sahpw teikan, oh met kin mweidong rongamwahu me Wehin Koht me tepidaehr kakaun en pweida mwahu nan sahpw akan me saikinte rong duwen rongamwahu wet. Ni ahnsou me irail me kin rasehng dipwisou kesempwal kan kin pedolong nan sapwellimen Koht koasoandi en Tehnpas Sarawio, re kin uhd peikiong kosonned en Sises en katohnpadahk. (Madiu 28:19, 20) Nin duwen re kin wia met, re kin tuhwong aramas tohto, me pwulopwul kan oh pil me mah kan me, mwein ehu rahn, re pil kakete wiahla, ni karasaras, “dipwisou kesempwal akan” me pahn kalinganada sapwellimen Siohwa Tehnpas Sarawio. Kitail en tehk ekei mehn kahlemeng duwen iaduwen met kin pweida ni ahnsou wet.

13. Iaduwen emen serepein pwulopwul nan Bolivia kasalehda me e kin ngoangki kalohki rongamwahu en Wehio?

¹³ Nan Bolivia, serepein men me mahki sounpar limau me ah pahpa oh nohno iang Sounkadehde kan pekihda rehn eh sounpadahk ma e pahn kak kommoal sang sukuhl erein wihk me Sounapwalih en Circuit pahn mwemweitla rehrail. Dahme kahrehda? E men iang doadoahk en kalohk erein wihk tohrohr wet. Eh pahpa oh nohno pwuriamwekihla, ahpw ira inenen perenki kilang ngoang wet me neira serepein kin kasalehda. Ni ahnsou wet serepein tikitik menet kin onop Paipel rehn aramas limen, oh ekei irail kin iang towehda mihding en Kristian akan. E pil kahre eh sounpadahk en kohla ni Kingdom Hall. Ele mwein ni ahnsou kohkohdo, ekei aramas me e kin wia onop Paipel rehrail pahn wiahla duwehte “dipwisou kesempwal akan” me kin kalinganada sapwellimen Siohwa Tehnpas Sarawio.

14. Nan Korea, iaduwen emen sister pweida ni e kin nantihong koasoiong aramas men me mwomwen e sohte kin perenki rong duwen Paipel?

¹⁴ Nan Korea, emen lih Kristian kin awiawih nan wasahn kisa, oh e uhd kohla rehn emen tohnsukuhl me kin rongorong keseng kan ni “headphones.” E wia peidek wet, “Mie omw pelien lamalam?” Tohnsukuhlo sapeng, “I sohte perenki pelien lamalam koaros.” Sister menet sohte pweiekdi. E uhd pousehla nda met, “Ehu rahn, emen mwein pahn men pilada ehu pelien lamalam. Ahpw ma e sohte ese duwen pelien lamalam akan, mwein e pahn wia pilipil sapwung.” Madamadau en tohnsukuhl menet wekidala, oh e uhd rong kanahieng dahme riatail sister koasoia. E kihla pwuhk wet me oaralap koasoia Is There a Creator Who Cares About You? oh e nda me pwuhk wet pahn kihong ih sawas laud ni ahnsou me e men pilada ehu pelien lamalam. E mwadangete alehdi pwuhko. Wihk ehu mwurin met, e tepida onop Paipel rehn Sounkadehdehn Siohwa kan, oh ni ahnsou wet e kin iang towehda mihding en mwomwohdiso kan koaros.

15. Iaduwen emen serepein pwulopwul nan Sapahn kin tepida onop Paipel rehn aramas akan, oh kapai dah kan e ale pwehki e kin ngoangki wia doadoahk wet?

¹⁵ Nan Sapahn, Megumi, me mahki sounpahr 12, kin kilangwong wasahn sukuhl nin duwen wasahn kalohk. E pil kin tepida onop Paipel rehn aramas tohto. Iaduwen Megumi kin wia met? Ni ahnsoun kommoal en mwengehn souwas kan, e kin wadek nah Paipel oh kaunopada ong mihding kan, oh ienge tohnsukuhl akan kin kalap idek reh dahme e kin wia. Ekei kin idek rehn Megumi dahme kahrehda e sohte kin iang ekei wiewiahn sukuhl akan. Megumi kin sapengla ahr peidek kan oh padahkiong irail me mie mwaren Koht. Met kin kalap kahrehong tohnsukuhl akan en perenki rong. E uhd idek rehrail ma re mwahuki onop Paipel reh. Ni ahnsou wet, Megumi kin onop Paipel rehn aramas 20​—oh 18 rehrail iei tohnsukuhl kan.

16. Iaduwen emen brother nan Cameroon tepida onop en Paipel rehn ekei aramas me kapailoke ih?

¹⁶ Nan Cameroon, mie pwihn en tohndoadoahk en ohl wahlimen me kin wia doadoahk nan arail wasahn doadoahk, oh irail likweri emen brother me kin kihkihseli sawaspen Paipel kan rehn aramas akan me kin pisere ih. Pwehki re men kapailoke brother menet, re idek reh duwen dahme kahrehda e sohte kamehlele padahk en Trinity, lehn kisiniei, de soul sohte kak mehla. Brother menet kin doadoahngki Paipel oh sapengla arail peidek kan. Ohl silimen sang pwihn wet tepida onop Paipel. Emen rehrail, Daniel, uhd tepida iang towehda mihding kan oh kauwehla eh dipwisou kan me kin pid wunani. (Kaudiahl 21:8) Sohte lel sounpar ehu mwuri, e papidaisla.

17. Dahme ekei brother kan nan El Salvador wia pwehn kak kalohk ong emen ohl me, nin tepio, sohte kin perenki rong Rongamwahu en Wehio?

¹⁷ Nan El Salvador, emen ohl kin pirehdi nah kidi lemei ni wehnimwen imwe ni ahnsou me e kin kilang Sounkadehdehn Siohwa kan kohkohdohng imweo. Ohl menet kin awih lao irail Sounkadehde kan kin kohkohsang imweo, oh iei ih ahnsou me e kin kapwurehlong nah kidi nan imweo. Sounkadehde kan sohte kak koasoaiong ohlo. Ehu rahn re medewehla ren wia ehu soahng tohrohr. Re ese me ohl menet kin rongorong dahme re kin nda, ihme kahrehda, re tepida kalohk ong nah kidi. Eri, re kohla ni ihmwo, rahnmwahuwih kidio, oh re tepida kawehwe ong kidio me re kapingki arail kak koasoiong ih. Irail eri koasoia me pahn mie ahnsou ehu me pahn kohdo me sampah pahn wiahla paradais, oh ni ahnsowo sohte me pahn lingeringer​—ni ahnsowo, mahn akan pil pahn mandala. Ira, ni karakarahk, rahnmwahuwih kidio oh tepida aluweisang ni ihmwo. Re pwuriamwei ni ahnsou me ohlo pidoi sang imwe oh e pekmahk pwehki ah sohte kin mweidong Sounkadehde kan ahnsou mwahu en koasoiong ih. E ale makisihn kan oh tepida onop Paipel. Ni ahnsowet, ohl menet wiahla riatail brother​—ih emen “dipwisou kesempwal akan”!

“Dehr Masak”

18. Kristian tohto kin lelohng soangen kahpwal dah kei, ahpw iaduwen Siohwa kin kilangwong sapwellime tohnkaudok akan?

¹⁸ Ke kin iang doadoahk kesempwal en kalohki Wehio oh katohnpadahk? Ma iei, ke inenen paiamwahu. Ni mehlel, sang doadoahk wet, “dipwisou kesempwal akan” pahn wisikdohng nan sapwellimen Siohwa Tehnpas Sarawio. (Sohn 6:44) Mehlel, ekei pak ke pahn ekis pwang de nsensuwed. Ekei ahnsou pil ekei sounpapah lelepek kan en Siohwa kin ahneki madamadau me re sohte katepe. Ahpw dehr mworusala! Siohwa kin kilangwong emenemen sapwellime tohnkaudok kan nin duwen aramas katepe kan, oh e pil kin nsenohki ken komourala.​—2 Piter 3:9.

19. Siohwa doadoahngki Akkai en kihda kangoang dahieu, oh iaduwen mahsen pwukat pahn pil kak kakehlailda kitail?

¹⁹ Ni ahnsou me kitail kin pahtoula, pwehki aramas kin uhwong kitail de irair suwed akan kin pwarada, sapwellimen Siohwa mahsan kan ong mehn Suhs akan me pwurala sapwarail pahn kak pil kakehlekitailla. Nan Akkai 2:4-6 (New World Translation) mahsanih: “‘Siohwa mahsanihong Serupapel en dehr kapehd tikitikla oh e mahsanihong Sosua me nein Sehosadak en kehlailda. Kumwail doadoahk pwe I pahn ieiang kumwail. Ni amwail kohdo sang Isip, I inoukihda me I pahn ieiang kumwail kohkohlahte. I ieiang kumwailte, eri kumwail dehr perki mehkot. Mwurin ahnsou mwotomwot I pahn itikada nanleng oh sampah, sahpw oh sehd.’” Tehk wasaht, Siohwa sohte kin ihte kangoange kitail en kehlailda, ahpw e pil kin ketikihong kitail sawas en kehlailda. Iaduwen e kin wia met? Tehk duwen mahsen pwukat: “I ieiang kumwailte.” Met kin kakehlailda kitail en ese me Siohwa pahn ieiang kitail mendahki kitail pahn lelohng kahpwal akan!​—Rom 8:31.

20. Ni ahl dahieu me lingan ehu wisikdohng nan sapwellimen Siohwa Tehnpas Sarawio?

²⁰ Siohwa kin kasalehda ni sansal me e kin ieiangete sapwellime aramas akan. Nin duwen e doadoahngki sapwellime soukohp Akkai en koasoia met: “Tehnpas Sarawi kapwo pahn lingan sang mehn mahso, oh I pahn lingan sang mehn mahso, oh I pahn ketikihong nei aramas akan pai oh popohl.” (Akkai 2:9) Ni mehlel, lingan me keieu laud kin dierekda nan sapwellimen Siohwa Tehnpas Sarawi en pali ngehn. Ihme kahrehda, aramas lop kei ni ehu ehu sounpar kin pedolong nan kaudok mehlel. Aramas pwukat kin ale reken mwenge ni pali ngehn, oh mehnda sampah lisilepeng wet re kin paiekihda popohl me ihte me pahn kak siksang met iei nan sapwellimen Koht sampah kapwo.​—Aiseia 9:6, 7; Luk 12:42.

21. Dahme kitail anahne en nantihong wia?

²¹ Ni ahnsou keren Siohwa pahn kauwehla wehi kan nan Armakedon. (Kaudiahl 16:14, 16) Eri, kitail en doadoahngki luwen ahnsou en nantihong sewese aramas akan en komourala. Kitail en kehlailda oh likih Siohwa ni unsek. Kitail en tengla kaukaule kaudokiong Siohwa nan sapwellime Tehnpas Sarawi en pali ngehn, pwe “dipwisou kesempwal akan” pahn wisikdohng loale, lao lel Siohwa mahsanih me atail doadoahk nekier.

[Nting tikitik me mi pahs]

Ke Tamanda?

• Dahme Siohwa kin kesempwaliki me keneinei sang dipwisou kan?

• Pwihn en aramas riau dah kei kin paiekihda ntahn Sises?

• Ihs irail “dipwisou kesempwal akan” me pahn kadirehla sapwellimen Siohwa Tehnpas Sarawio oh kalinganada Tehnpas Sarawio?

• Mehn kadehde dahieu kin kasansalehda me kokohp en Akkai kin pweida nan atail ahnsou?

[Kilel nan pali 28]

Ke ese ia wehwehn Sapwellimen Siohwa Tehnpas Sarawi en mahso?

(For fully formatted text, see publication)

Kahdengo

Wasa Sarawio

Pei Sarawi

Wasa Sarawiheo

Palangk

Likin Kehl

[Kilel nan pali 29]

Samworo lapalap meirongkihla emen kouwol pwehki dipen mehn Lipai kan oh emen kuht ong dipen keinek en Israel me sohte iang pwukoah en samworo kan

[Kilel nan pali 30]

Doadoahk en kalohki Wehio nin sampah pwon kin kahrehong sapwellimen Siohwa Tehnpas Sarawio en direkihla aramas