Peidek kan Sang Sounwadawad kan
Nan Rom 12:19, wahnpoaron Pohl kin kasalehda me Kristian kan en dehr engiengda, ni ah mahsanih: “Eri, riei ko, kumwail dehr pein dupuk, ahpw en engiengda”?
Soh. Wahnpoaron Pohl wasaht kin koasoakoasoia duwen engieng en Koht. Ni mehlel, met sohte kin wehwehki me e sohte katepe ma Kristian kan kin lingeringerda. Paipel ni sansal kaweidkin kitail en dehr engiengda. Tehk ekei karasepen kaweid sarawi kan.
“Ke dehr pwunod de lingeringer; pwe met pahn kahrehiong uhk nan apwal.” (Melkahka 37:8) “Mehmen me pahn lingeringer pahn rie mehn Suhs men, e pahn wisikiong ni mwoalen kopwung.” (Madiu 5:22) “Eri, wiewia kan nin duwen ahnepen aramas me sansal, iet akan: nenek oh kamwahl, tiahk samin, pwongih dikedik en eni kan, oh wunahni; kailok, akatat, luwak, lingeringer.” (Kalesia 5:19, 20) “Kumwail kadohwanewei sang kumwail soangen mwakar koaros, soangen ineng suwed koaros, soangen lingeringer koaros, soangen men pei koaros, soangen lahlahwe koaros, soangen kailok koaros en nan kapehdamwail.” (Episos 4:31) “Emenemen kumwail koaros en nan kapehd mwadang ong rong, ahpw dehr nan kapehd karuaru en lokaia oh lingeringer.” (Seims 1:19) Pil ehu, pwuhken Lepin Padahk kin pwurpwurehng kaweidkin kitail en dehr kin engiengda de kalap lingeringerkihda sapwung kan me tikitik oh sapwung en aramas akan.—Lepin Padahk 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Lokaia kan mwohn Romans 12:19 kin pahrekiong kaweid pwukat. Pohl kin kasalehda me atail limpoak en soh mwalaun, me kitail en kapaiada irail kan me kin kaloke kitail, me kitail en medemedewe soahng mwahu kan duwen meteikan, me kitail en dehr dupungki me suwed mehkan me suwed, me kitail en nantihong popohl ong aramas koaros. Ih eri kangoangehki: “Eri, riei ko, kumwail dehr pein dupuk, ahpw mweidohng engieng en Koht en doadoahk. Pwe Pwuhk Sarawi mahsanih, “Kauno [“Siohwa,” New World Translation] ketin mahsanih, ngehi me pahn dupuk, ngehi me pahn ikih.”—Rom 12:9, 14, 16-19.
Ehi, kitail en dehr mweidohng lingeringer en kamwekid kitail en pelianki tiahk en dupuk. Atail wehwehki irair kan oh atail irair en kopwungpwung sohte unsek. Ma kitail mweidohng lingeringer en kamwekid kitail en wiahda tiahk en dupuk, kitail pahn kalap wiahda mehkot sapwung. Met pahn kapwaiada ineng en Imwintihti en Koht, Tepil. Pohl ntingihdi ehu wasa: “Ma kumwail pil lingeringer, kumwail dehr mweidohng amwail lingeringer en kahrehiong kumwail nan dihp; dehr pil kolokol amwail lingeringer rahn ehu pwon. Kumwail dehr kihong Tepil eh ahnsou mwahu.”—Episos 4:26, 27.
Ahl me mwahu, de elen erpit, iei en mweidohng Koht en koasoanehdi iahd oh ihs me e pahn dupukohng. E kak ketin wia met ni ah wehwehki unsek ire kan koaros, oh ikih me e pahn ketin wia pahn kasalehda sapwellime kopwungpwung unsek. Kitail kak kilang me met iei ire kesempwal nan Rom 12:19 me Pohl kasalehda ni atail tehk ah kin koasoia ireo nan Deuderonomi 32:35, 41 me kin iangahki mahsen pwukat: “Kauno pahn ketin ikih oh kaloke irail.” (Pil tehk Ipru 10:30.) Ihme kahrehda, mendahki lepin lokaia ko “en Koht” sohte kin kileledi nan nting en Krihk, ekei sounkawehwe kan en rahnwet kin kihong lepin lokaia pwukat nan Rom 12:19. Met kin kahrehda soangen kawehwe me duwehte “mweidohng Koht en dupuk” (The Contemporary English Version); “kihong wasahn engieng en Koht” (American Standard Version); “mweidohng Koht en kaloke ma e pahn ketin wia met” (The New Testament in Modern English); “mweidohng wasahn ikih en Koht.”—The New English Bible.
Pil ni ahnsou me imwintihti kan en padahk mehlel kin wiakauwe kitail de kaloke kitail, kitail kak kasalehda atail likih dahme Moses karonge me pid Siohwa Koht: “Siohwa, Siohwa, Koht emen me diren mahk oh kalahngan, pwand en mwakar oh diren limpoak kadek oh mehlel, limpoak kadek ong me kid, mahkohng sapwung kan oh dihp, ahpw e sohte pahn koledihsang ketikihda kalokolok.”—Eksodus 34:6, 7, NW.