Tengeteng Nan Amwail Pwoson Ni Peik Unsek Ong Kupwuren Koht

“E kin ngidingidki eh kapakapkin kumwail, pekipeki pwe Koht en ketin kolokol kumwail pwe kumwail en tengeteng nan amwail pwoson ni peik unsek ong kupwuren Koht.”​—KOLOSE 4:12.

1, 2. (a) Dahme mehn liki kan kin koasoiada duwen tepin Kristian akan? (b) Iaduwen pwuhken Kolose kin kasansalehda duwen irairen limpoak?

SAPWELLIMEN Sises tohnpadahk kan kin ni mehlel nsenohki iengerail tohnkaudok akan. Tertullian (soun nting nan keriau oh kasiluhn senturi C.E.) koasoia duwen kadek me sapwellimen Sises tohnpadahk kan kin kasalehda ong irail me sepwoupwou kan, me semwehmwe kan, oh pil ong me mah kan. Kasansalepen limpoak wet kin kamwekidada ekei aramas soh-pwoson akan en koasoia met duwen Kristian akan: ‘Kilang ia uwen irail kin limpoakpene.’

² Pwuhk en Kolose kin kasansalehda duwen limpoak me wahnpoaron Pohl oh Epapras kasalehong riarail brother oh sister kan nan Kolose. Pohl ntingwong irail oh kasalehda me Epapras kin “ngidingidki eh kapakapkin kumwail, pekipeki pwe Koht en ketin kolokol kumwail pwe kumwail en tengeteng nan amwail pwoson ni peik unsek ong kupwuren Koht.” Erein sounpar 2001, Sounkadehdehn Siohwa kan pahn doadoahngki mahsen kan en Kolose 4:12 ong arail iren pahr: “Tengeteng nan amwail pwoson ni peik unsek ong kupwuren Koht.”

3. Irair riau dah kei me Epapras kapakapki?

³ Ke kak kilang me en Epapras kapakapki rie kompoakepah kan kin kasansalehda ire riau: (1) me irail en “tengeteng unsek” oh (2) “tengeteng nan arail pwoson ni peik unsek ong kupwuren Koht.” Ire pwukat kin mih nan Pwuhk Sarawi pwehki kitail pahn kak paiekihda nting pwukat. Eri, wia peidek pwukat ong pein kowe, ‘Dahme I anahne wia pwe ien kak tengeteng unsek oh pwoson ni peik unsek ong kupwuren Koht? Oh dahme pahn imwikihla ai pahn kin wia met?’ Kitail pahn kilang.

Nantihong en “Tengeteng Unsek”

4. Mehn Kolose kan anahne en “unsekla” ni ahl dahieu?

⁴ Epapras men kilang rie brother oh sister kan ni pali ngehn nan Kolose en “tengeteng unsek.” Lepin lokaia pwukat me Pohl doadoahngki wasaht pwehn wehwehki “unsek” kin kihda mouren madamadau ong unsekla, keirada de mahla. (Madiu 19:21; Ipru 5:14; Seims 1:4, 25) Mwein ke wehwehki me mendahki emen me papidaisla nin duwen Sounkadehdehn Siohwa men: met sohte kin wehwehki me e pahn ni ahnsowohte wiahla emen Kristian mah. Pohl ntingwong mehn Episos kan, me kin kousoan ni pali kapi en Kolose, me irail silipen sihpw en mwomwohdiso kan oh irail sounpadahk kan pahn anahne song en sewese “koaros en ehupene ni minimin en pwoson oh ni marainkihla mehlel Sapwellimen Koht Iehros; kitail koaros pahn wiahla aramas dei mehlel kei, lel ni idin deilahn Krais unsek.” Nan iren Paipel teikan, Pohl kin kangoange Kristian akan en “ni arail lamalam, irail en wiahla duwehte ohl mehlel koahiek men.”​—Episos 4:8-13; 1 Korint 14:20.

5. Iaduwen kitail kak akadeiong en unsekla?

⁵ Ma ekei tohnmwomwohdiso kan nan Kolose saikinte mah ni pali ngehn, eri, re anahne nantihong en wiahla met. Ahpw, iaduwen nan atail ahnsou, e soh pahn duwehte? E sohte lipilipil ma kitail papidaislahr sounpar eisek kei samwalahr oko de ahnsou kerendo ieu, kitail kak kilang me kitail kekeirada nan atail koahiek en pilipil oh elen madamadau kan? Kitail kin medemedewe duwen kaweid kan en Paipel mwohn kitail pahn wiahda atail pilipil kan? Soangen irair kan me kin pid Koht oh kamwahu kan en mwomwohdiso kin kalapw kadire atail mour ahnsou koaros de ekeite pak? Kitail sohte kak kawehwehda ahl kan koaros me kitail pahn kak kekeirada, ahpw met kitail pahn koasoiada ahl riau me kitail pahn kak wia met.

6. Ia ehu ahl me emen kak kekeirada lao lel unsekla, duwehte Siohwa kin wia?

⁶ Karasepe ieu: Ma kitail tikada nan wasa ehu me kin mie aramas tohto me kin lipilipilki aramas akan de lemei ong aramas akan me kohsang keinek, de wehi, de sahpw weksang pein arail. Kitail ese me Koht sohte kin lipilipilki aramas oh kitail pil anahne kahlemengih ih. (Wiewia 10:14, 15, 34, 35) Nan pein atail mwomwohdiso de circuit, mie aramas akan me kin kohsang ehu keinek de wehi weksang kitail. Ahpw, iaduwen​—kitail kin ahneki pepehm akan de madamadau kan ong aramas pwukat me sohte konehng Kristian kan en ahneki? Kitail kin mwadangete ahneki madamadau sapwung ehu ni ahnsou me emen me kin kohsang ehu keinek de wehi tohrohr sang kitail pahn wiahda kisin sapwung ong kitail? Ke kak wia peidek wet ong pein kowe, ‘I anahne kamwahuwihala pein ahi irair akan ni ahi kin kahlemengih Koht ni E sohte kin lipilipilki aramas?’

7. Iaduwen emen pahn kilangwong meteikan ma e men wiahla emen Kristian me mah ni pali ngehn?

⁷ Karasepe keriau: Nin duwen Pilipai 2:3 mahsanih, kitail en dehr “wia mehkot sang ni atail ineng en roporop ong pein kitail de suwei mwahl; ahpw kitail mpahipene nanpwungatail, oh dehr wiahki me kitail mwahusang aramas teikan.” Kitail kin wia kekeirada kapwaiada met? Pein emenemen kitail mie pein atail luwet akan oh irair kehlail kan. Mahs, mwein kitail kin mwadangete tehk duwen sapwung kan en aramas teikan, ahpw iaduwen ni ahnsouwet, kitail kekeirada oh sohlahr kin kasik me re uhdahn pahn kak “unsek”? (Seims 3:2) Ahpw ni ahnsouwet, kitail kak kilang​—de rapahki ekei ahl akan​—me kitail pahn kilangwong aramas teikan me re mwahusang kitail? ‘Ei, sister menet kin mwahusang ie ni e kin kasalehda kanengamah.’ ‘Pwoson en brother menet de sister menet kin kehlailsang ei pwoson.’ ‘Ni mehlel, brother menet koahiek sang ie, ni e kin padahk ong aramas teikan.’ ‘E mwahusang ie ni e sohte kin mwadang lingeringerda.’ Mwein ekei mehn Kolose kan anahne en kamwahuwihala arail irair akan. Iaduwen kitail?

8, 9. (a) Ia wehwehn en Epapras kapakap ni e kapakapki irail mehn Kolose kan en “tengeteng” ni unsek? (b) ‘Tengeteng ni unsek’ kin wehwehki dah ong irail ni ahnsou kohkohdo?

⁸ Epapras kapakapki me mehn Kolose kan en “tengeteng unsek.” E sansal me Epapras kapakapki ong Koht me mehn Kolose kan pahn unsekla oh wiahla Kristian mah ni pali ngehn oh re pahn “tengeteng” de kolokolte ahr mah ni pali ngehn.

⁹ Kitail sohte kak lemeleme me emen me pahn wiahla Kristian men, oh pil iangahki emen me mah ni pali ngehn, pahn kakete tengeteng nan pwoson. Sises mahsanih duwen sapwellimen Koht tohnleng me “sohte kin tengeteng nan pwoson.” (Sohn 8:44, New World Translation) Pohl katamankin irail akan me mih nan Korint duwen ekei me kin papah Siohwa ahpw mwuhr irail pwupwudi. E kaweidkin riarail brother me keidi kan: “Eri, mehmen me pepehm me e kesikesihnen teng, a en kanahieng pwe e de pwupwudi.” (1 Korint 10:12) Met kin kasalehda ia uwen kesempwal kapakap me kin pid mehn Kolose kan en “tengeteng ni unsek.” Ni ahnsou me re wiahla Kristian mah kan ni pali ngehn, re anahne nannanti, dehr mworusala, luwetala, de peila sang padahk mehlel. (Ipru 2:1; 3:12; 6:6; 10:39; 12:25) Eri, re pahn “unsekla” ni rahn en arail kadeik oh ale pwais nin duwen me konehng.​—2 Korint 5:10; 1 Piter 2:12.

10, 11. (a) Epaphras wia mehn kahlemeng dahieu ong kitail me kin pid kapakap? (b) Dahme ke pahn pein koasonehdi nan mongiongomw en wia ni omw pahn kahlemengih Epapras?

¹⁰ Kitail koasoia nan artikel mwohn artikel wet duwen kesempwalpen kapakapki meteikan oh doadoahngki adarail kan nan atail kapakap kan, oh peki sawas ni oaritik sang rehn Siohwa pwehn sewese, kamweitala, kapaiada, oh kihong irail ngehn sarawi. Ih soangen kapakap kan me Epapras wia duwen mehn Kolose kan. Kitail kak​—oh kitail anahne​—pil diarada kaweid kesempwal ehu me diarekda nan mahsen pwukat ong dahme kitail kin kapakapkihong ong Siohwa me kin pid pein kitail. Ni mehlel, kitail anahne en peki rehn Siohwa en sewese kitail sang met kohla en kak “tengeteng unsek.” Ke kin wia met?

¹¹ Dahme ke soh pahn kapakapki omw irair akan ni pali ngehn? Kasalehong Koht duwen ia uwen laud de tikitik me ke kekeirada ni pali ngehn en “unsekla,” wehwehki en wiahla Kristian mah ni pali ngehn. Peki rehn Koht ni ngidingid en sewese iuk pohnese duwen wasa kan nan omw mour me ke anahne kekeirada ni pali ngehn. (Melkahka 17:3; 139:23, 24) Uhdahn pahn mie ekei wasa nan omw mour me ke anahne kamwahuwihala. Menlau ke dehr nsensuwedki met, ahpw en wia omw kapakap ong Koht ni sansal, oaritikiada wasa kan me ke anahne sawas pwehn kekeirada ni pali ngehn. Wia met tohto sang pak teieu. Dahme ke soh pahn koasoanehdi me nan wihket me ke pahn wia omw kapakap reirei oh peki rehn Siohwa en sewese iuk en “tengeteng ni unsek.” Oh ni omw medemedewe duwen iren pahr wet, ken koasoanehdi nan mongiongomw en wia met pak tohto. Nan omw kapakap kan, koasoia duwen ire kan me ke kin luwetkihla de ke kak pil koasoia duwen ahnsou kan me ke sohlahr iang wia sapwellimen Koht doadoahk, oh iaduwen ke kak powehdi pepehm pwukat.​—Episos 6:11, 13, 14, 18.

Kapakapki en Peik Unsek

12. Dahme kahrehda mehn Kolose kan anahne “peik unsek”?

¹² Epapras pil kapakapki mehkot me kesempwal ma mehn Kolose kan men kenikenla rehn Koht. Met pil pahn wia mehkot kesempwal ong kitail en wia. Dahkot met? E kapakapki me re pahn tengeteng “ni peik unsek ong kupwuren Koht.” Padahk kan me sohte kin poahsoankihda padahk mehlel oh padahk kan me kin poahsoankihda loalokong en aramas akan kin kapilpene irail, oh pil ekei padahk kan kin mwomwiong kaudok mehlelo. Karasepe ieu, aramas akan kin idingkihong irail en iang kasarawi rahn tohrohr kan iangahki kaisisohl de kamadipw me mehn Suhs akan kin wia mahs nan arail kaudok. Sounpadahk likamw akan kin mwomwen kaudokiong tohnleng kan, ngehn kehlail kei me Koht ketin doadoahngki en kihong Moses Kosonnedo. Medemedewe duwen omw pahn lelohng soangen kasongosong pwukat! Padahk tohto me kin kapilpene irail kin uhpene oh kasapwurupwur.​—Kalesia 3:19; Kolose 2:8, 16-18.

13. Pohnese irair dahieu pahn kak sewese mehn Kolose kan, oh iaduwen met pil kak sewese kitail?

¹³ Mwurin mwo, Pohl kawehwehda mwahu duwen pwukoa en Sises Krais. “Nin duwen amwail wiahkilahr Krais Sises amwail Kaun, kumwail en weweidki ih ni amwail miniminiong ih. Mourimwail en poadidiong reh, en pil kekeirkihda ih, oh amwail pwoson en kin kehlailla mehlel nin duwen me kumwail padahngkiher.” Ei, irail anahne en ahneki pwoson unsek duwen pwukoa en Krais me kin pid kupwuren Koht oh pil pid atail mour. Pohl kawehwehda met: “Pwe Krais kin ieiaski roson unsek en Koht ni eh wia-aramasala; oh kumwail pil iang pwaisanki roson wet ni amwail miniminiong ih; pwe ih me ketin kaunda soangen ngehn koaros me kakaun oh manaman.”​—Kolose 2:6-10.

14. Dahme kahrehda mehn Kolose kan kin kamehlele arail koapworopwor?

¹⁴ Irail mehn Kolose wiahlahr Kristian me keidi kan. Re kin wehwehki ni sansal duwen arail koapworopwor (mour nanleng) oh re kin ahneki kahrepe mwahu en tengeteng nan arail koapworopwor. (Kolose 1:5) Met iei “kupwuren Koht” me re en tengeteng nan arail koapworopwor. Mie kahrepe emen rehrail en peikasalki arail koapworopwor? Uhdahn soh! E pahn wekila nan atail ahnsou ong irail akan me kin ahneki koapworopwor en mour nin paradais sampah me Koht ketikihong irail? Soh! Koapworopwor wet uhdahn “kupwuren Koht.” Medemedewe duwen peidek pwukat: Ma ke nantihong en iang “pokon kalaimwun” me pahn pitsang “kahn kamakam kowahlap,” ia uwen kehlail omw koapworopwor? (Kaudiahl 7:9, 14) Omw koapworopwor kin wia kisehn ahmw nantihong “peik unsek ong kupwuren Koht”?

15. Pohl kawehwehda ireirekdi en ire kan dahieu me koapworopwor kin pil iang?

¹⁵ “Koapworopwor” wet sohte kin wehwehki mehkot me kitail kin koapworopworki ahpw e sohte nohn sansal de auremen ehu. Met kin sansal sang ire kan me Pohl kawehwehda ong mehn Rom akan. Nan irereklahn kawehwehda wet, ehu ehu ire kan kin pid dahme e kin koasoiada mwuhr. Menlau tehk duwen iawasa me Pohl kin koasoiada duwen “koapworopwor” nan eh kawehwe wet: “Kitail pil suweiki atail apwal akan, pwe kitail ese me apwal kin kahrehiong kitail en nannanti ni kanengamah, oh nannanti ni kanengamah kin kahrehiong Koht eh kin ketin kupwuramwahwih kitail, oh sapwellime kupwuramwahu wet kin kahrehiong kitail koapworopwor. Eri, koapworopwor wet sohte kin pitihkitaildi, pwe Koht keti kapwiledohngehr nan mohngiongitail sapwellime limpoak sang rehn ngehn sarawi, me iei sapwelimen Koht kisakis ong kitail.”​—Rom 5:3-5.

16. Ni ahnsou me ke sukuhliki Paipel, koapworopwor dahieu me ke sukuhliki?

¹⁶ Ni ahnsou me Sounkadehdehn Siohwa kan tepin ehukihong uhk duwen padahk kan en Paipel, ele mie ehu padahk me sair uhk laudsang padahk teikan, me duwehte padahk me pid duwen irair en me mehlahr akan de me pid koapworopwor en iasada. Ong aramas tohto, padahk kapw ong irail me kin pid koapworopwor en mour nan paradais nin sampah oh met kin poahsoankihda iren Paipel kan. Tamanda ni ahnsou me ke tepin rong padahk wet. Koapworopwor kaselel ehu​—sohlahr soumwahu oh mahla, ke kak mour oh kilang wahn doadoahk kan me ke kin wia, oh popohl nanpwungen mahn akan! (Eklesiasdes 9:5, 10; Aiseia 65:17-25; Sohn 5:28, 29; Kaudiahl 21:3, 4) Ke alehdi koapworopwor kaselel ehu!

17, 18. (a) Iaduwen ire kan me ireirekdi me Pohl kawehwehong mehn Rom akan kin pid koapworopwor? (b) Soangen koapworopwor dahieu me ntingihdi nan Rom 5:4, 5, oh ke pil kin ahneki soangen pwoson wet?

¹⁷ Ahpw ekiste mwuri, mwein aramas teikan tepida uhwong uhk. (Madiu 10:34-39; 24:9) Pil nan atail ahnsou, aramas akan kin kauwehla imwen Sounkadehde kan nan ekei sahpw akan oh Sounkadehde kan anahne en kalipalipla ong ehu sahpw tohrohr. Ekei Sounkadehde kan kin lelohng kamakam, oh aramas teikan kin kihsang neirail pwuhken sawaspen Paipel kan pwehn kauwehla de aramas akan kin karaun likamwih irail nan nuhs kan. Sohte lipilipil soangen kalokolok dah kan me kitail kin lelohng, nin duwen Rom 5:3 mahsanih, kitail kak peren mendahki kahpwal akan, oh e imwila mwahu. Nin duwen me Pohl ntingihdi, kalokolok kin kihong uhk kanengamah. Oh eri, kanengamah kin kihong uhk irair en pwung. Ke eri esehier me ke wiewia dahme pwung, wiewia kupwuren Koht, ke eri ahneki pepehm me E ketin kupwurkinuhkalahr. Sang sapwellimen Pohl mahsen, ke pahn wehwehki me “Koht kin ketin kupwuramwahuih iuk.” Pohl uhd pousehla oh ntingihdi met, “oh sapwellime kupwuramwahu wet kin kahrehiong kitail koapworopwor.” Ahpw met kin mwomwen mehkot kapwuriamwei. Dahme kahrehda Pohl ntingihdi “koapworopwor” ni kaimwiseklahn ire kan me ireirekdi? Ke sohte ahneki koapworopwor ni ahnsou ke tepin rong Rongamwahu?

¹⁸ E sansal wasaht me Pohl sohte kin koasoia duwen tepin atail kin ahneki koapworopwor en mour unsek. Dahme e kin koasoia kin deila sang met; e wehwe loal oh kamwekidada laud atail pepehm akan. Ni ahnsou me kitail kin dadaurete ni lelepek oh tepida pohnese me Koht kin kupwuramwahuih kitail, met kin ni kehlail kalaudehla atail koapworopwor me kitail kin tepin alehdi. Koapworopwor me kitail kin ahneki ahnsou wet kin wia koapworopwor mehlel ehu me kehlail oh pein atail. Koapworopwor loal wet kin lingaling oh dakedakehr wasa. E kin wiahla kisehn atail mour unsek. “Eri, koapworopwor wet sohte kin pitihkitaildi, pwe Koht ketin kapwiledohngehr nan mohngiongitail sapwellime limpoak sang rehn ngehn sarawi, me iei sapwellimen Koht kisakis ong kitail.”

19. Iaduwen ke pahn kaukaule kapakapki omw koapworopwor?

¹⁹ Kapakap ngidingid en Epapras kin sewese rie brother oh sister kan nan Kolose en uhdahn kamehlele dahme pahn wiawi mwohrail, oh irail kin “peik unsek ong kupwuren Koht.” Pein emenemen kitail en ahnsou koaros kapakapki ong Koht duwen atail koapworopwor. Ni ahnsou me ke pahn wia pein omw kapakap ong Koht, kasalehong ih omw koapworopworki sampah kapw. Kasalehong Siohwa omw pepehm kan duwen ia uwen laud omw kin koapworopworki sampah kapwo, oh ke kin uhdahn kamehlele me e pahn pweida. Poadidi ong kapakap ong Koht pwehn peki sawas en kakehle omw pwoson. Nin duwen me Epapras kapakapki me mehn Kolose kan en “peik unsek ong kupwuren Koht,” eri, kitail en pil alasang met. Oh ke kak wia met ni ahnsou koaros.

20. Ma ekei pahn pwupweisang elen Kristian, dahme kahrehda kitail en dehr mworusala?

²⁰ Ke sohte pahn luwetki ire mehlelo me kaidehn koaros pahn tengeteng nan arail pwoson ni peik unsek. Mwein ekei pahn pwupwudi, ekei pahn nsensuwedla oh ekei pahn luwetla oh kesehla arail pwoson. Ih me pil wiawihong irail akan me kin keieu karanih Sises: sapwellime wahnpoaron kan. Ahpw ni ahnsou me Sudas pangala Sises, wahnpoaron teikan luwetala de kesehla ahr pwoson? Uhdahn soh! Piter doadoahngki Melkahka 109:8 pwehn kasalehda me mie emen me pahn wiliandi Sudas. Emen eri pilipilda en wiliandi ih, oh sapwellimen Koht lelepek kan pousehla arail doadoahk en kalohk. (Wiewia 1:15-26) Irail kin nannanti en tengeteng nan arail pwoson.

21, 22. Ni ahl dahieu omw kin tengeteng nan pwoson pahn sansalda rehn aramas teikan?

²¹ Ke kak uhdahn kamehlele me omw kin tengeteng nan pwoson oh peik unsek ong kupwuren Koht pahn sansal ong koaros. Ihs me pahn kilang oh kalahnganki omw kin tengeteng nan pwoson?

²² Riomw brother oh sister kan me kin ese iuk oh poakohng uhk pahn kilang duwen omw pwoson. Mendahki ma pali moron en irail sohte kin ni lokaia koasoia duwen ahr kin kalahnganki omw pwoson kehlail, ahpw e pahn duwehte dahme kitail kin wadek nan 1 Deselonika 1:2-6: “Se kin poaden kapingkalahngankihong Koht pwehki kumwail koaros, oh kin kalap tamankumwailda nan at kapakap akan. Pwe se kin tamanda, mwohn silangin Samatail Koht, duwen amwail kin doadoahngki amwail pwoson, oh duwen amwail limpoak me kin kahrehiong kumwail doadoahk laud, oh pil duwen amwail tengediong nan amwail koapworopworki atail Kaun Sises Krais. Pwe. . . se kalohkiwohng kumwailehr Rongamwahuwo, kaidehn ni ngehn sarawi, oh pil ni at kamehlele unsek en me mehlelo. . . ; kumwail kahlemengih kiht oh pil Kauno.” Irail Kristian lelepek kan me kin karanih uhk pahn pil ahneki soangen madamadauohte ni ahr pahn kilang iuk “tengeteng nan omw pwoson ni peik unsek ong kupwuren Koht.”​—Kolose 1:23.

23. Erein sounpar kohkohdo, dahme ke pahn nantiong en wia?

²³ Oh pil, Samatail nanleng pahn pil kilang oh kupwurperenki kowe. Ken kamehlele met. Dahme kahrehda? Pwehki ke kin tengeteng nan omw pwoson oh peik unsek ong kupwuren Koht.” Pohl ntingwong mehn Kolose kan duwen ahr kin “momour nin duwen me Siohwa kin ketin kupwurki.” (Kolose 1:10) Ei, aramas soh-unsek kan pahn kak kaperenda Koht. Riomw brother oh sister kan nan Kolose kin wia met. Irail Kristian akan me kin kapilpene iuk pil kin wia met. Eri, ke pil kak kapwaiada met! Ihme, erein sounpar me pahn wad, omw kapakap kan ni ehu ehu rahn oh omw wiewia kan en kasalehda ma ke uhdahn men “tengeteng nan omw pwoson ni peik unsek ong kupwuren Koht.

Ke Kak Tamanda?

• Dahme kin pid omw kin “tengeteng ni unsek’?

• Nan omw kapakap kan dahme ke pil pahn koasoia duwen pein uhk?

• Nin duwen pwuhken Rom 5:4, 5, soangen koapworopwor dahieu ke men ahneki?

• Atail onop kin kamwekid iuk en mehn akadeiong dah ong sounpar kohkohdo?

[Kilel nan Pali 26]

Epapras kapakapki rie brother kan en tengeteng ni unsek, oh peik unsek duwen Krais oh arail koapworopwor

[Kilel nan Pali 28]

Kowe oh aramas rar kei kin ahneki koapworopwor oh tengeteng nan pwoson teieu