Kalohki Rongamwahu Ni Pwoson Kehlail

¹ Nan keieun senturi, Sises Krais kehkehlikiong sapwellime tohnpadahk kan en kalohki Rongamwahu en Wehin Koht oh “padahkiong tohn wehi kan koaros pwe re en wiahla nei tohnpadahk.” (Madiu 24:14; 28:19, 20) E sansal me Sounkadehdehn Siohwa kan kin kesempwaliki kaweid wet pwehki, nan imwin senturi keriesek wet, mieher sounkalohk 5,900,000 samwa me kin kalohk nan sahpw 234. Irail wia kaping laud ong Samatail nanleng!

² Met kitail miher nan senturi karieisek ehu. Atail imwintihti, Sehdan, kin nantihong kauwehla doadoahk en kalohk en Wehio oh doadoahk en katohnpadahk. E kin doadoahngki kahpwal en koasoandi suwed wet en kangala atail ahnsou oh kaluwetala kitail ni atail pahn kedirepwkihla soahng teikan pwe kitail sohte pahn uhdahn nsenohki doadoahk en kalohk. Ahpw, kitail en dehr mweidong kedirepw en sampah wet en wiahla dahme keieu kesempwal nan atail mour, ahpw, kitail en ale sawas sang Mahsen en Koht en koasoanehdi dahme keieu kesempwal nan atail mour​—⁠iei en wia kupwuren Koht. (Rom 12:2) Met wehwehki me kitail men peikiong kehkehlik me kohwong kitail sang nan Pwuhk Sarawi me mahsanih: ‘ke en kalohkiseli mahseno, ke en nantihong koasoakoasoia duwe, mehnda ma ahnsou mengei de apwal oh pil kapwaiada ni unsek ahmw doadoahk en kalohk.’​—2 Tim. 4:​2, 5.

³ Kakehlail Ahmw Pwoson: Kristian akan anahne “tengeteng nan arail pwoson, oh . . . peik unsek ong kupwuren Koht.” (Kolose 4:​12) Lepin lokaia “pwoson” kin wehwehki “uhdahn kamehlele.” Nin duwen Kristian akan, kitail anahne kamehlele me Mahsen en Koht kin mehlel oh kitail memour ni imwin rahn akan. Kitail anahne ahneki pwoson kehlail duwehte wahnpoaron Pohl, me mahsanih me Rongamwahu “manaman en Koht me kin komourala koaros me kin pwoson.”​—Rom 1:​16.

⁴ Sehden me Tepil kin doadoahngki aramas me pein ih pil kin pitih, aramas suwed akan, en kaweid sapwung oh pitih meteikan. (2 Tim. 3:​13) Pwehki kitail wehwehki met, kitail anahne kakehlail atail pwoson me kitail ahneki padahk mehlel. Kitail sohte pahn mweidohng pwunod en mour en ahnsou wet en kaluwetala atail ngoangki kalohk, ahpw, kitail pahn rapahki mahs Wehin Koht. (Madiu 6:​33, 34) Oh pil, kitail sohte men manokehla me kitail mihmi nan ahnsou karuwaru, de lemeleme me imwin koasoandi suwed wet saikinte keren. Pwe, ni mehlel, imwin koasoandi suwed wet kerendohr. (1 Pit. 4:7) Mendahki ma kitail pehm me kalohki Rongamwahu sohte kin kamwekid aramas tohto nan ekei sahpw akan, kitail anahne tamataman me kitail anahne kehsehki aramas akan me rahn en kadeik kerendohr.​—Esekiel 33:​7-9.

⁵ E pahn mwahu en medemedewe ekei peidek kesempwal kan duwehte: ‘I kin mwekidki kehkehlik en Sises en katohnpadahk? Ni ahi kin kalohki Rongamwahu, I kin kasalehda me I uhdahn kamehlele me Wehin Koht me pahn kerenieng kaunda aramas akan? I kin wia uwen me I kak en iang doadoahk kesempwal wet me kak sewese aramas akan en ale komourparail?’ Ni ahnsou me kitail kin tamataman me koasoandi suwed wet pahn kerenieng imwila, kitail anahne kasawihada mwahu pein kitail oh pil tehk ma kitail wia uwen me kitail kak nan doadoahk en kalohk oh katohnpadahk. Ma kitail pahn wia met, kitail pahn doarehla pein kitail oh irail kan me kin rong kitail. (1 Tim. 4:​16) Iaduwen soahng pwukat kak kakehlail atail pwoson nin duwen sounkalohk kan?

⁶ Kahlemengih Mehn Deselonika: Wahnpoaron Pohl, ni eh kin tamataman doadoahk laud me rie kan me mihmi nan Deselonika kin wia, mahsanih ong irail: “Pwe se kalohkiwohngkumwailehr Rongamwahwo, kaidehn ni lokaiahte, ahpw ni manaman oh ni Ngehn Sarawi, oh pil ni at kamehlele unsek en me mehlelo. Kumwail ese duwen at mour ni at mihmi rehmwail, pwe e wia kamwahupamwail. Kumwail kahlemengih kiht oh pil Kauno, oh mehnda ma kumwail alehdi lokolok laud, ahpw kumwail perenkihda ale mahseno; eri, peren me kin sang rehn Ngehn Sarawio.” (1 Des. 1:​5, 6) Ei, Pohl kapinga tohnmwomwohdiso en Deselonika pwe re kin ngoangki kalohk oh kin kamehlele unsek en me mehlelo (pwoson kehlail) mendahki kalokolok lelohng irail. Dahme sewese irail en wia met? Pwehki re kin kilang wahnpoaron Pohl oh irail me kin iang ih kin ngoangki kalohk oh ahneki pwoson kehlail oh mehpwukat kamwekid irail. Iaduwen?

⁷ Mour en Pohl oh irail me kin iang ih kin kasalehda me sapwellimen Koht Ngehn Sarawi kin ieiang irail oh e sansal me re kin uhdahn kamehlele dahme re kin kalohki. Nan Deselonika, Pohl kin doadoahk pwehn pwainda pein ah anahn akan, ahpw, likin met, e kin wia uwen me e kak en padahkihong mehn Deselonika padahk mehlel. E sohte kin pweiek, ahpw, e kin kalohki Rongamwahu ahnsou koaros. (1 Des. 2:9) Pwehki Pohl kin ngoangki kalohk oh e sansal me e kin uhdahn kamehlele dahme e kin kalohki, soahng pwukat kin kamwekid aramas akan oh ekei irail kesehla arail kaudok likamw oh tepida papah Koht mehlel, Siohwa.​—1 Des. 1:​8-​10.

⁸ Kalokolok sohte kin kauhdi irail me kapw kan en nantihong kalohki Rongamwahu. Re mwekidki arail pwoson kapw oh re uhdahn kamehlele me re pahn ale kapai kan ong arail mour en ahnsou kohkohlahte, mehn Deselonika men kalohki padahk mehlel wet me re ahpwtehn alehdi. Pwehki mwomwohdiso en Deselonika inenen pwerisek oh ngoangki kalohk oh pwoson kehlail, rohng duwen irail kohpeseng oh lellahng ni Masedonia oh Akaia. Ihme kahrehda, ni ahnsou me Pohl ntingihdi keieun nah kisinlikou ong mehn Deselonika, aramas tohto esehier duwen arail wiewia mwahu kan. (1 Des. 1:7) Re wia mehn kahlemeng mwahu!

⁹ Mwekidki Limpoak ong Koht oh Limpoak ong Aramas akan: Iaduwen kitail, duwehte mehn Deselonika, kak ahneki pwoson kehlail ni atail kin kalohki Rongamwahu rahnwet? Pohl koasoi duwen mehn Deselonika ni eh mahsanih: “Se kin tamanda . . . duwen amwail kin doadoahngki amwail pwoson, oh duwen amwail limpoak me kin kahrehiong kumwail doadoahk laud.” (1 Des. 1:3, ftn.) E sansal me re ahneki limpoak loal ong Siohwa Koht me kohsang mohngiongarail oh pil re ahneki limpoak ong aramas me re kin kalohk ong. Soangen limpoak wet pil kamwekid Pohl oh irail me kin iang ih pwehn kihong mehn Deselonika kan “kaidehn Rongamwahuohte me sang rehn Koht, ahpw pil pein amwail mour.”​—1 Des. 2:8.

¹⁰ E pil duwehte kitail, limpoak loal ong Siohwa oh limpoak ong aramas teikan pahn kamwekid kitail en wia uwen me kitail kak en iang doadoahk en kalohk me Koht ketikihong kitail en wia. Pwehki soangen limpoak wet, emen emen kitail pohnese me e wia atail pwukoah me kohsang Koht en kalohki Rongamwahuwo. Ma kitail kin medemedewe loal oh kalahnganki dahme Siohwa wia ong kitail pwehn kahluwa kitail ong “mour mehlel,” kitail pahn mwekidki met oh men padahkiong meteikan duwen padahk mehlel me pein kitail kin kamehlele sang mohngiongatail. (1 Tim. 6:​19) Ni ahnsou me emen emen kitail pahn wia pein atail pwukoah, met pahn imwikihla mwomwohdiso ehu me ngoangki kalohk oh kehlail ni pali ngehn duwehte mwomwohdiso en Deselonika.

¹¹ Ke Dehr Kesehla Ahmw Pwoson Pwehki Kasongosong kan: Pwoson kehlail pil pahn sewese kitail ni atail kin lelohng kasongosong kan. (1 Pit. 1:​6, 7) Tepil kin kahrehda kasongosong tohto kin lelohng kitail. Ong ekei, arail peneinei kin kasonge de kaloke irail. Irail me lahlahwe padahk mehlel kin song en kaluwetala pwoson en ekei. Ekei kin pwunodki pweipwand laud kan oh iaduwen re pahn pwainda arail anahn akan en mour. Me pwulopwul kan kin lelohng kasongosong kan nan sukuhl. Iaduwen kitail kak powehdi kasongosong pwukat? Dahme kitail anahne wia ma kitail men kasalehda me kitail kin uhdahn kamehlele padahk mehlel?

¹² Keieu, kitail anahne ahneki nanpwung mwahu rehn Siohwa. Ni ahnsou me Pohl oh Sailas mihmi nan imweteng, re sohte mwomwohd oh kaulimki soahng suwed kan me re lelohng. Re mwadang kapakap ong Koht oh kouliong Ih. Pwekihda? Pwehki re ahneki nanpwung mwahu rehn Samarail nanleng. Re wehwehki me re lelohng kalokolok wet pwehki dahme re wia me pwung oh Siohwa me kak doarehla ira.​—Melkahka 3:8.

¹³ Ni atail pahn lelohng kasongosong rahnpwukat, kitail pil kak koapworopworki Siohwa. Pohl kin kangoange Kristian kan en ‘peki dahme kumwail kin anahne. . . . Eri, sapwellimen Koht popohl, me inenen laud sang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.’ (Pilipai 4:​6, 7) E kin wia mehn kamweit ong kitail en wehwehki me Siohwa sohte pahn mweidohng kitail en dadaur pahn kalokolok kelepw! (Aiseia 41:10) E pahn ieiang kitail ma kitail pahn papah ih oh ahneki pwoson kehlail.​—Melkahka 46:7.

¹⁴ Pil ehu mehn sawas me pahn sewese kitail en ahneki pwoson kehlail iei en pwerisek ni atail kin papah Siohwa. (1 Kor. 15:58) Pohl oh Sailas lekidekiong nan imweteng pwehki re kin pwerisek ni arail kin kalohki Rongamwahu. Re uhdi sang arail kalohk pwehki re lelohng kasongosong kan? Soh, re nantihong kalohk pil ahnsou me re mihmi nan imweteng, oh mwurin ara saledek sang imweteng, re seiloaklahng Deselonika oh kohla ni sinakoke en mehn Suhs pwehn ‘kawehwehiong irail . . . sang nan Pwuhk Sarawi.’ (Wiewia 17:​1-3) Ma kitail kin pwoson Siohwa oh kitail uhdahn kamehlele me kitail ahneki padahk mehlel, sohte mehkot “kak irehdihsang kitail ni limpoak en Koht me kitail ahneki rehn Krais Sises atail Kaun.”​—Rom 8:​35-​39.