Tengetengete Nan Atail Pwoson Likamwete Kitail Kilang Ih Me Soh Sansal!
“[Moses] tengetengete nan eh pwoson, likamwete e kilang Koht me soh sansal.”—IPRU 11:27, New World Translation.
1. Dahme Sises mahsanih me kapwuriamwei me pid duwen Koht ni ahnsou me e wia Kapahrek en Pohn Dohl?
SIOHWA kin wia Koht me soh sansal. Ni ahnsou me Moses peki rehn Koht en kilang sapwellime lingan, Siohwa mahsanih: “Ke sohte kak kilang ie, pwe sohte aramas emen kak kilang ie ahpw momour.” (Eksodus 33:20) Wahnpoaron Sohn ntingihdi: “Sohte me kin kilangki Koht mese.” (Sohn 1:18) Ni ahnsou me Sises Krais wiahla ohl emen nin sampah, e pil sohte kak kilangki Koht mese. Nan sapwellime Kapahrek en Pohn Dohl, Sises mahsanih: “Meid pai me nan kapehd mwakelekel kan; pwe re pahn udiahl Koht!” (Madiu 5:8) Ia wehwehn mahsen en Sises pwukat?
2. Dahme kahrehda kitail sohte kak kilangki Koht uhdahn mesatail kan?
2 Pwuhk Sarawi kin kawehwehda me Siohwa kin wia Ngehn me soh sansal. (Sohn 4:24; Kolose 1:15; 1 Timoty 1:17) Ihme kahrehda, mahsen en Sises sohte kin wehwehki me aramas akan pahn kak kilangki Siohwa uhdahn meserail kan. Ni mehlel, irail Kristian me keidi kan pahn kilang Siohwa Koht nanleng mwurin re iasada oh wiahla ngehn kei. Ahpw, aramas akan me kin “nan kapehd mwakelekel” oh kin ahneki koapworopwor en momour kohkohlahte nin sampah pahn pil kak “kilang” Koht. Iaduwen met pahn kak wiawi?
3. Iaduwen aramas akan kak dehdehkihla ekei sapwellimen Koht irair akan?
3 Kitail kin sukuhliki duwen Siohwa ni atail kin onopki oh tehk kanahieng mehkan me E ketin kapikada. Mwein kitail kin pwuriamweikihla sapwellime manaman oh met kin kamwekid kitail en kapinga Ih nin duwen Koht me wia Sounkapikpatail. (Ipru 11:3; Kaudiahl 4:11) Wahnpoaron Pohl ntingihdi met: “Sang ni ahnsou me Koht ketin kapikada sampah, aramas kak dehdehki me ih uhdahn Koht mehlel oh sapwellime manaman me poatopoat. Mepwukat me sansal mwahu sang ni wiepen nin lime kan. Kahrehda aramas pwukat sohte kak peikidki ar wiewia kan.” (Rom 1:20) Eri, mahsen en Sises duwen ‘udiahl Koht’ kin wehwehki me emen pahn dehdehki duwen ekei sapwellimen Siohwa irair akan. Aramas kak wia met ni arail pahn wehwehkihla loalokong pwung sang Pwuhk Sarawi oh kin dehdehki soahng pwukat ni pali ngehn ni arail doadoahngki ‘mesen mohngiongarail.’ (Episos 1:18, NW) Sapwellimen Sises mahsen kan oh wiewia kan pil kin kasalehong kitail duwen sapwellimen Koht irair kan. Ihme kahrehda, Sises mahsanih: “Mehmen me kilangieier pil kilangehr Sahm.” (Sohn 14:9) Sises kin kasalehda, ni unsek, sapwellimen Siohwa irair akan. Eri, esehla duwen mouren Sises oh sapwellime padahk kan pahn sewese kitail en kilang, de dehdehki ekei sapwellimen Koht irair akan.
Dehdehki oh Kalahnganki Soahng Ngehnin kan kin Kesempwal
4. Iaduwen aramas tohto nan rahnpwukat kin kasalehda me re sohte kin dehdehki oh kalahnganki soahng ngehnin kan?
4 Rahnwet, aramas malaulau kin pwoson oh dehdehki oh kalahnganki soahng ngehnin kan. Pohl mahsanih: “Pwe kaidehn aramas koaros kin kamehlele mahseno.” (2 Deselonika 3:2) Aramas tohto kin nsenohkihte pein arail wiewia kan oh re sohte kin pwoson Koht. Arail tiahk sapwung kan iangahki ahr sohte men dehdehki oh kalahnganki soahng ngehnin kan kin irehirailweisang en kilangki Ih ni mesen wehwe, pwe wahnpoaron Sohn ntingihdi: “A mehmen me kin wiewia me suwed e sohte wehwehki Koht.” (3 Sohn 11) Pwehki aramas pwukat sohte kin kilangki Koht uhdahn meserail kan, irail kin lemeleme me E sohte kak mahsanih dahme re wiewia. (Esekiel 9:9) Irail kin mwamwahleki soahng ngehnin kan, ihme kahrehda, re sohte kak “padahngki duwen Koht.” (Lepin Padahk 2:5) Ihme e konehng dahme Pohl ntingihdi: “Mehmen me sohte kin ahneki Ngehn Sarawi, e sohte kak ale kisakis kan me kin pwilisang rehn Ngehno. E pil sohte kak wehwehki soahng pwukat, pwe e kin wiahki mehkot mwahl. Ngehn Sarawihte me aramas kak kasawiheki mehkot ni pali ngehn.”—1 Korint 2:14.
5. Aramas akan me kin loalenohng soahng ngehnin kan kin wehwehki duwen ire mehlel dahieu?
5 Ma kitail kin kesempwaliki soahng ngehnin kan, kitail pahn ahnsou koaros wehwehki me Siohwa mwahngih ahnsou dah kan me kitail kin mwekidki atail madamadau suwed de ineng suwed kahrehda kitail wia dahme suwed—mendahki kitail wehwehki me Siohwa sohte kin rapahki atail sapwung kan. Ni mehlel, “Kauno [“Siohwa,” NW] kin ketin mahsanih mehkoaros me ke kin wia. E kin ketin mwasamwasahn uhk wasa koaros me ke pahn kohla ie.” (Lepin Padahk 5:21) Ma kitail wiahda dihp, kitail en koluhla oh rapahki sapwellimen Siohwa mahk kalahngan pwehki kitail kin poakohng Ih oh sohte men kansensuwedihala Koht.—Melkahka 78:41; 130:3.
Dahme Kin Sewese Kitail en Tengetengete Nan Atail Pwoson?
6. Ia wehwehn en tengetengete nan pwoson?
6 Mendahki kitail sohte kak kilangki Siohwa uhdahn mesetail, kitail anahne tamanda me E kin mahsanih kitail. Ma kitail kin wehwehki me E kin momour oh uhdahn kamehlele me E kin karanih aramas koaros me kin likweriong Ih, met kin sewese kitail en tengetengete nan pwoson—poadidi oh lelepek ong Ih. (Melkahka 145:18) Kitail kak kahlemengih Moses, me Pohl ntingihdi: “Pwoson me Moses lipikihsang Isip, sohte mwahn masak engieng en nanmwarkio. E kin tengetengete nan eh pwoson, likamwete e kilang Koht me soh sansal.”—Ipru 11:27.
7, 8. Dahme sewese Moses en eimah mwohn Parao?
7 Ni e kin kapwaiada eh pwukoa me Koht ketikihong ih en kapitala mehn Israel akan sang ahr kin selidi nan Isip, Moses kin kalapw pwarada mwohn kaun lemei Parao, oh pil mwohn aramas lapalap akan en pelien lamalam akan oh sounpei kan. Mwein dihd kan en Tehnpaso kin dirkihla sansal takai kan. Ahpw, Moses kin uhdahn kamehlele oh likih Siohwa, mehnda ma E sohte sansal, pwe e wehwehki me Siohwa sohte duwehte irail sansal takai kan me kin wia koht en Isip kan me sohte mour. Ihme kahrehda Moses sohte kin masak Parao!
8 Dahme sewese Moses en eimah tuhwong Parao pak tohto? Pwuhk Sarawi kin padahkiong kitail me “Moses, iei ohl aktikitik men, me keieu aktikitik rehn aramas en sampah kan.” (Nempe 12:3) Pwehki Moses kin uhdahn dehdehki oh kalahnganki soahng ngehnin kan oh eh pwoson kehlail me Koht kin ieiang ih, met kin kihong Moses kehl me anahn pwehn sewese ih en wiliandi ‘Koht me soh sansal’ oh tuhwong nanmwarki lemei en Isip. Ia ekei ahl akan me aramas akan me kin “kilang” Koht soh sansal kak kasalehda ahr kin pwoson Ih?
9. Ni ahl dahieu kitail kak me kitail kin tengetengete nan pwoson?
9 Ehu ahl en kasalehda me kitail tengetengete nan atail pwoson oh likih Ih me soh sansal iei sang ni atail pahn wia doadoahk en kalohk ni eimah mendahki kitail kin lelohng kalokolok kan. Sises padahkiong sapwellime tohnpadahk kan: “Aramas koaros pahn kailongkinkumwailla pwehki ngehi.” (Luk 21:17) E pil padahkiong irail: “Sohte ladu men kin laudsang eh soumas. Ma irail kalokeieier, re pil pahn kalokei kumwail.” (Sohn 15:20) Sapwellimen Sises mahsen kan pweida, pwe mwurinte e pwoula, sapwellime tohnpadahk kan lelohng kalokolok ni mwomwen lokaia kan me kin kamasepwehk, selidi, oh kamakam kan. (Wiewia 4:1-3, 18-21; 5:17, 18, 40) Mendahki sapwellimen Sises wahnpoaron kan oh tohnpadahk teikan kin lelohng kalokolok laud, irail kin ni eimah kalohki Rongamwahu.—Wiewia 4:29-31.
10. Iaduwen atail kin likih sapwellimen Siohwa kehl en apwahpwalih kitail pahn kak sewese kitail en eimah wia atail doadoahk en kalohk?
10 Duwehte Moses, sapwellimen Sises tohnpadahk kan en mahs sohte kin masak arail imwintihti kan. Sapwellimen Sises tohnpadahk kan kin pwoson Koht, kahrehda, irail kin kak dadaurete pahn kalokolok laud kan. Ei, irail kin tengetengete nan arail pwoson, likamwete irail kin kilang Ih me soh sansal. Rahnwet, ma kitail pahn ahnsou koaros likih me Siohwa kin apwalihada kitail, met pahn kak sewese kitail en eimah wia atail doadoahk en kalohki Wehio. Mahsen en Koht mahsanih, “me keper pwunodki dahme aramas teikan lemeleme duwen kowe, ahpw ma ke pahn likih Kauno [“Siohwa,” NW], ke pahn saledek sang apwal.” (Lepin Padahk 29:25) Ihme kahrehda, ni ahnsou me kitail kin lelohng kalokolok kan, kitail en dehr masepwehkada; de namenengki atail doadoahk en kalohk. Atail pwoson pahn kamwekid kitail en eimah kalohk ong mehn mpatail kan, iengatail tohndoadoahk kan, iengatail tohnsukuhl akan, oh pil rehn aramas teikan.—Rom 1:14-16.
Ih me Soh Sansal kin Kaweidih Sapwellime Aramas akan
11. Nin duwen dahme Piter oh Sud ntingihdi, iaduwen ekei aramas me kin iang mwomwohdiso en Kristian kasansalehda ahr kin sohte dehdehki oh kalahnganki soahng ngehnin kan?
11 Pwoson kin sewese kitail en kilang me Siohwa kin apwahpwalih sapwellime pwihn sansal nan sampah. Kitail en dehr ahneki madamadau kan en kauwe irail akan me kin ahneki pwukoa nan mwomwohdiso. Wahnpoaron Piter oh rien Sises, Sud, padahkiong tohnmwomwohdiso kan en kanahieng soangen aramas akan me sohte kin dehdehki oh kalahnganki soahng ngehnin kan pwehki re kin kauwe irail ohl akan me kin apwalih Kristian akan. (2 Piter 2:9-12; Sud 8) Aramas pwukat me kin rapahki sapwung en aramas teikan pahn kak wia met mwohn Siohwa ma E pahn sansal ong irail? Uhdahn soh! Ahpw, pwehki Koht soh sansal, aramas pwukat me kin kauwe meteikan sohte kin lemeleme me irail kin pwukoahki ahr wiewia kan mwohn Koht.
12. Soahngen madamadau dahieu kitail anahne kasalehong irail akan me kin apwahpwalih mwomwohdiso?
12 Mehlel, mwomwohdiso en Kristian wiawihkihda aramas soh unsek kan. Irail akan me kin papah nin duwen pwukoa en elder kan pil kak wiahda sapwung kan, oh ekei ahnsou ahr sapwung kan pahn kak kansensuwedih kitail. Ahpw, Siohwa kin doadoahngki ohl pwukat en apwalihada sapwellime pwihn nin sampah. (1 Piter 5:1, 2) Ohl oh lih kan me kin dehdehki oh kalahnganki soahng ngehnin kan kin wehwehki me koasoandi wet kin wia ehu ahl me Siohwa kin kahre sapwellime aramas akan. Ihme kahrehda, kitail Kristian akan anahne en dehr kaulim oh kauwe, ahpw kasalehda wahu ong sapwellimen Koht koasoandi kan. Sang ni atail pahn peikiong irail akan me kin apwahpwalih kitail, kitail kin kasalehda me kitail kin kilang Ih me soh sansal.—Ipru 13:17.
Kilangwong Koht me Iei Ih Atail Sounpadahk Lapalap
13, 14. Ia wehwehn atail kilangwong Siohwa me iei Ih atail Sounpadahk Lapalap?
13 Mie pil mehkot me kin kasalehda me kitail kin dehdehki oh kalahnganki soahng ngehnin kan. Aiseia kohpadahr: “Mesomw kat pahn anahne wiahla mas kan me pahn kak kilikilang omw Sounpadahk Lapalap.” (Aiseia 30:20) Irair en pwoson me kesempwal pwe e kin sewese emen en kamehlele me Siohwa iei Ih me kin padapadahkiong kitail ni E kin doadoahngki sapwellime pwihn sansal nin sampah. (Madiu 24:45-47) Kilang Koht nin duwen atail Sounpadahk Lapalap kin wehwehki laudsang kolokolete atail koasoandi en onop Paipel oh kaukaule iang towehda mihding kan koaros. E kin wehwehki me kitail pahn doadoahngki mwahu sapwellimen Koht koasoandi en sawas kan me kin sewese kitail en kekeirada ni pali ngehn. Karasepe ieu, kitail anahne rong kanahieng kaweid kan me Siohwa kin ketikihda sang rehn Sises pwehn sewese kitail en dehr luwetala ni pali ngehn.—Ipru 2:1.
14 Ekei ahnsou, kitail anahne en doadoahk laud oh nannanti pwehn ale kapai laud kan sang mwengehn ngehn. Karasepe ieu, ma ekei wasa kan nan Paipel kin apwal en wehwehki, mwein kitail sohte kin wadek kanahieng ahpw kin kilang semwenehte wasa pwukat ni atail kin wadawad. De ni ahnsou me kitail kin wadek Kahn Iroir oh Awake! makisihn kan, mwein kitail sohte kin wadek ekei artikel kan pwehki kitail sohte kin perenki oaralap en artikel pwukat. De mwein ni ahnsoun mihding en Kristian kan kin wiawi, kitail kin medemedewe duwen soahng kan likin dahme kin wiawi nan mihding kan. Ahpw, ma kitail pahn nantihong medemedewe duwen padahk kan oh ire kan me re koasoia, kitail sohte pahn medemedewe mehkot tohrohr. Ma kitail kin kasalehda me kitail kalahnganki kaweid ngehnin kan, met kin kasalehda me kitail kin wehwehki me Siohwa kin wia atail Sounpadahk Lapalap.
Kitail Anahne Wehkohng Koht Duwen Pein Kitail
15. Dahme ekei aramas kin wia pwehki re lemeleme me Siohwa sohte pahn kin mahsanih irail?
15 Pwehki suwed akan kin mih wasa koaros nan “imwin ahnsou wet,” pwoson Ih me soh sansal me inenen kesempwal. (Daniel 12:4) Aramas akan me sohte kin mehlel oh pil aramas me kin wia dipen nenek kin mih wasa koaros nan sampah. Ni mehlel, e kin wia elen loalokong en tamantaman me Siohwa kin mahsanih atail wiewia kan ahnsou koaros, mehnda ma aramas akan sohte kak kilang kitail. Ekei aramas kin manokehla duwen ire mehlel wet. Ni ahnsou me aramas sohte kin kilang irail, re kin wia tiahk suwed kan me Pwuhk Sarawi kin kasalehda me sapwung. Karasepe ieu, ekei aramas sohte kin soikala de pelianda kasongosong en kilang mehn kamweit keper kan oh kilel suwed akan nan Internet, TV, oh soahng teikan. Pwehki wiewia pwukat pahn kak wiawi ni ahnsou emen kelekelepw, ekei aramas kin lemeleme me Siohwa sohte pahn kak kilang arail wiewia suwed kan.
16. Dahme pahn kak sewese kitail en kapwaiada sapwellimen Siohwa kosonned ileile kan?
16 E mwahu en medemedewe duwen mahsen kan en wahnpoaron Pohl: “Eri, emenemen kitail uhdahn pahn wehkohng Koht duwen pein ih.” (Rom 14:12) Kitail anahne en wehwehki me ahnsou koaros kitail kin wiahda dihp, kitail kin wia dihp ong Siohwa. En esehla met pahn kak sewese kitail en kapwaiada sapwellime kosonned ileile kan oh sewese kitail en liksang tiahk samin kan. Paipel kin katamankin kitail: “Sohte mehkot me kak rirsang silangin Koht. Mehkoaros nanleng oh sampah pokon kin sansal oh dehde mwohn silangi. Eri, kitail koaruhsie pahn wehkadahng Ih atail wiewia kan.” (Ipru 4:13) Ni mehlel, kitail anahne wehkohng Koht duwen pein kitail, ahpw, kahrepe keieu kesempwal kitail kin kapwaiada sapwellime kupwur kan iei pwehki atail limpoak kehlail ong Siohwa. Eri, kitail en doadoahngki atail loalokong oh kanahieng ni atail kin pilada mehn kamweit kan kitail pahn kilang de wia oh pil kanahieng atail tiahk rehn emen me kaidehn atail pwoud.
17. Ia mwomwen Siohwa kin mwasamwasahn kitail?
17 Siohwa kin mwasamwasahn kitail, ahpw met sohte kin wehwehki me E kin awiawih ahnsou dah kitail pahn wiahda sapwung kan pwe E pahn kak kaloke kitail. Ahpw, ni limpoak E kin mwasamwasahn kitail, duwehte sahm men me men katingih nah seri peik kan. Ia uwen kansenamwahu en ese me Samatail nanleng kin perenki kilang atail pwoson oh “katingih irail kan me kin raparapahki”! (Ipru 11:6) Eri, kitail en pwoson Siohwa, likih Ih oh “papah Ih ni mohngiong unsek.”—1 Kronikel 28:9.
18. Pwehki Siohwa kin mwasamwasahn kitail oh atail lelepek ong ih, likilik dahieu kitail kin alehdi sang Pwuhk Sarawi?
18 Lepin Padahk 15:3 mahsanih: “Kauno [“Siohwa,” NW] ketin mwahngih dahme ki wiawi wasa koaros; e kin ketin mwasamwasahn kitail ma kitail kin wia me mwahu de me suwed.” Ei, Koht kin mwasamwasahn aramas suwed akan oh E kin kadeikada irail nin duwen arail wiewia kan. Ahpw, ma kitail iang pwihn en “aramas mwahu kan,” kitail kak tamataman me Siohwa kin mahsanih atail wiewia lelepek kan. Ia uwen laud e kin kakehlailda atail pwoson en ese me ‘atail doadoahk en papah Kauno kaidehk doadoahk mwahl ehu’ oh Ih me soh sansal sohte pahn ‘ketin meliehla atail wiewia kan de atail limpoak ong Ih.’!—1 Korint 15:58; Ipru 6:10.
Peki Rehn Siohwa en Kasawih Kitail
19. Ia ekei kapai kan me kin kohsang pwoson kehlail ong Siohwa?
19 Nin duwen sapwellimen Siohwa ladu lelepek kan, kitail kin kenikenla reh. (Madiu 10:29-31) Edetehn e soh sansal ong kitail, kitail pahn kak uhdahn kamehlele Ih, oh kitail en pil kesempwaliki atail nanpwungmwahu reh. Ma kitail ahneki madamadau pwung duwen Samatail nanleng, met kin wahdohng kitail kapai tohto. Atail pwoson kehlail pahn kak sewese kitail en ahneki mohngiong mwekelekel oh nsen mwakelekel mwohn Siohwa. Ma atail pwoson sohte kin mwalaun, e pahn sewese kitail en dehr momourki mour riau. (1 Timoty 1:5, 18, 19) Atail pwoson kehlail ong Koht kin wia mehn kahlemeng mwahu oh pil pahn kak kangoange aramas teikan. (1 Timoty 4:12) Pwoson wet pil kin sewese emen en tiahk mwahu, oh met kin kaperenda Siohwa.—Lepin Padahk 27:11.
20, 21. (a) Dahme kahrehda kitail en perenki Siohwa en mwasamwasahn kitail? (b) Iaduwen kitail kak doadoahngki Melkahka 139:23, 24 ong pein kitail?
20 Ma kitail loalokong, kitail pahn perenki wehwehki me Siohwa kin mwasamwasahn kitail. Kitail men Siohwa en kaidehn ihte mahsanih kitail, ahpw pil kasawihada mwahu atail madamadau loal kan oh wiewia kan koaros. Nan atail kapakap kan, kitail kak peki rehn Siohwa en tehk oh dehdehki ma kitail kin ahneki madamadau kan me sohte konehng. E pahn kak sewese kitail en powehdi atail kahpwal akan oh kapwungala atail mour. Sounmelkahka Depit koulki: “Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi oh ketin kahluwa ie nan ahl me mour soutuk.”—Melkahka 139:23, 24.
21 Depit peki rehn Siohwa en kasawih ih pwehn tehk ma “mie suwed ehu” rehn Depit. Duwehte sounmelkahkao, kitail pil sohte kin peki rehn Koht en kasawih mohngiongatail kan oh tehk ma mie suwed ehu rehtail? Eri, ni atail kin pwoson Siohwa, kitail en peki reh en kasawih kitail. Ahpw, ma kitail kin pwunodki mehkot kitail wia me sapwung de mie suwed ehu rehtail, dahme kitail kak wia? Kitail en kalapw kapakap ong atail Koht, Siohwa limpoak, oh ni lamalam aktikitik uhpaiong kaweid kan me kin kohsang rehn sapwellime ngehn sarawi oh sapwellime Mahsen. Kitail kak likih me Koht pahn sewese kitail oh kahluwa kitail pwe kitail en kak ale mour soutuk.—Melkahka 40:11-13.
22. Dahme kitail anahne koasoanehdi nan atail madamadau kan en wia me pid ong Ih me soh sansal?
22 Ei, ma kitail pahn kapwaiada sapwellimen Siohwa kosonned akan, E pahn ketikihong kitail mour soutuk. Ni mehlel, kitail anahne pohnese duwen sapwellime kehl oh manaman, nin duwen wahnpoaron Pohl wia ni e ntingihdi met: “Eri, ong Koht mehtehmen, Nanmwarki poatopoat, me sohte kak pwoula, oh me sohte sansal—lingan oh wahu en kowohng sang met oh pil kohkohlahte! Amen.” (1 Timoty 1:17) Ahnsou koaros, kitail anahne kasalehda soangen kalahngan oh wahu ong Siohwa me kin kohsang mohngiongatail. Sohte lipilipil dahme pahn wiawi, kitail en dehr luwetala ahpw tengetengete nan atail pwoson likamwete kitail kilang Ih me soh sansal.
Iaduwen Ke Pahn Sapeng?
• Iaduwen aramas akan pahn kak kilang Koht?
• Ma kitail uhdahn kin kamehlele Siohwa, dahme kitail pahn wia ni ahnsou me kitail kin lelohng kalokolok kan?
• Ia wehwehn kilangwohng Siohwa me iei Ih atail Sounpadahk Lapalap?
• Dahme kahrehda kitail en perenki Siohwa en ketin kasawih kitail?
[Kilel nan pali 26]
Moses, me sohte masak Parao, kin mwomwen kak kilang Siohwa, Koht soh sansalo
[Kilel nan pali 29]
Kitail en dehr iang wiewia kan oh lemeleme me Siohwa sohte kak mahsanih atail wiewia kan
[Kilel nan pali 31]
Kitail en ngoangki sukuhliki loalokong me pid duwen Koht pwehki kitail kak kilang Ih nin duwen atail Sounpadahk Lapalap