Mie me Kilangehr Koht?
Paipel Sapengki
Sohte aramas emen me kilangehr Koht. (Eksodus 33:20; Sohn 1:18; 1 Sohn 4:12) Paipel mahsanih me “Ngehn ehu Koht,” mwomwen mour ehu me aramas sohte kak kilang.—Sohn 4:24; 1 Timoty 1:17.
Ahpw, tohnleng kan kak kilang Koht pwehki irail wia ngehn kei. (Madiu 18:10) Patehng met, ekei aramas akan me mehla pahn iasadahng mour nanleng oh re pahn wia ngehn kei oh re pahn kak kilang Koht.—Pilipai 3:20, 21; 1 Sohn 3:2.
Ia duwen atail kak “kilang” Koht ahnsou wet
Paipel kin kalapw doadoahngki lepin lokaiao “kilang” pwehn karasahda ni emen eh kin wehwehkihla mehkot. (Aiseia 6:10; Seremaia 5:21; Sohn 9:39-41) Ni ahl wet, aramas men kak kilangki Koht “mesen [eh] mohngiong” sang ni eh pwoson en esehla Ih oh kalahnganki sapwellime irair kaselel kan. (Episos 1:18) Paipel mahsanih duwen ahl kan en kakairada soangen pwoson wet.
Sukuhlki sapwellimen Koht irair kaselel kan, me duwehte sapwellime limpoak oh kadek sapan, oh pil sapwellime erpit oh manaman me kin sansalda nan sapwellime kepikipik kan. (Rom 1:20) Mwurin ohl lelepeko Sohp eh pwurehng rong duwen sapwellimen Koht kepikipik kaselel kan, e pehm me e mwomwen kak kilang Koht.—Sohp 42:5.
Esehla Koht sang ni omw kin onopki Paipel. Paipel mahsanihong kitail: “Ma ke pahn sohpeiong [Koht], e pahn ketin kupwurperenkinuhkala.”—1 Kronikel 28:9; Melkahka 119:2; Sohn 17:3.
Sukuhlki duwen Koht sang ni mouren Sises. Pwehki Sises ketin kasalehda ni unsek irair kaselel kan en Semeo Siohwa Koht, e kak mahsanih: “Mehmen me kilangieier pil kilangehr Sahmo.”—Sohn 14:9.
Mour ni ahl ehu me kin kaperenda Koht, oh kilang ia duwen eh pahn ketin seweseiuk. Sises mahsanih: “Meid pai irail me nan kapehd mwakelekel, pwe re pahn kilang Koht.” Nin duwen me kitail koasoiapene mwoweo, ekei me kin kaperenda Koht pahn iasadahng mour nanleng oh pahn “kilang Koht” wasao.—Madiu 5:8; Melkahka 11:7.
Moses, Eipram, oh meteikan uhdahn kilang Koht?
Koasoipen Paipel kan me mwomwen mahsanih me aramas akan uhdahn kilang Koht, irelaud ko kin kasalehda me tohnleng men me wia wiliepen Koht de Koht ketin sansalda nan kaudiahl ehu.
Tohnleng kan.
Mahso, Koht kin ketin poaronehla tohnleng kan nin duwen wiliepe pwehn pwarohng aramas akan oh koasoi ni mware. (Ipru 1:14) Karasepe, ehu pak, Koht ketin mahseniong Moses sang ni tuhke ehu me lullul, oh Paipel mahsanih me “Moses eri perehla meseo, pwehki eh lemmwiki udiahl Koht.” (Eksodus 3:4, 6) Ahpw Moses sohte uhdahn kilang Koht, pwehki ire ko mwowe kasalehda me e kilang “tohnleng en KAUN-O.”—Eksodus 3:2.
Duwehte met, ni Paipel eh mahsanih me Koht ketin “mahseniong Moses ni sansal mehlel,” met wehwehki me Koht mahmahseniong Moses. (Eksodus 4:10, 11; 33:11) Moses sohte uhdahn kilang silangin Koht pwehki “tohnleng ko” me “peusehiong” ih soahng kan sang Koht. (Kalesia 3:19; Wiewia 7:53) Ahpw ahn Moses pwoson Koht uhdahn laud me kahrehda Paipel mahsanih me e “kilang Meno me soh sansal.”—Ipru 11:27.
Ni ahlohte me e ketin mahseniong Moses, Koht pil mahseniong Eipram ni eh ketin doadoahngki tohnleng kan. Ei mehlel, emen me wadek Paipel kakete medewe me Eipram uhdahn kilang Koht. (Senesis 18:1, 33) Ahpw, nan irelaudo kasalehda me “ohl silimen” ko iei tohnleng kei me Koht ketin poaronehla pwehn tuhwong Eipram. Eipram wehwehki me irail wia wiliepen Koht oh koasoiong irail ni mwomwen me e uhdahn koasoakoasoiong Siohwa.—Senesis 18:2, 3, 22, 32; 19:1.
Kaudiahl kan.
Koht pil ketin pwarohng aramas akan sang ni eh ketin doadoahngki kaudiahl kan, de kilel kan me kin pwarada nan ahn aramas emen madamadau. Karasepe, ni Paipel eh mahsanih me Moses oh mehn Israel teikan “kilangada Koht en Israel,” re uhdahn “kilangada kaudiahl en Koht mehlelo.” (Eksodus 24:9-11, NW) Duwehte met, ekei pak Paipel kin mahsanih me soukohp kan “kilangada” de “patohwanehr KAUN-O.” (Aiseia 6:1; Daniel 7:9; Eimwos 9:1) Nan ehuehu irair ko, irelaud kan en pwuhk ko kasalehda me irail alehdi kaudiahl en Koht ahpw re sohte uhdahn kilang ih.—Aiseia 1:1; Daniel 7:1, 2; Eimwos 7:1.