‘Kumwail Likoukihda Kanengamah’
“Kumwail likoukihda limpoak . . . oh kanengamah.”—KOLOSE 3:12, New World Translation.
1. Kawehwehda duwen emen brother me wia mehn kahlemeng mwahu en kanengamah.
RÉGIS kin kousoan nan palieir en sapwen Prans, oh e wiahla Sounkadehdehn Siohwa me papidaisla nan pahr 1952. Ni erein sounpar tohto, eh pwoud lih kin wia uwen me e kak en kauhdi ih sang papah Siohwa. Liho kin song en kauwehla daia kan en were sidohsa pwehn kauhdi ih en iang towehda mihding kan, oh ehu ahnsou e pil pwakih Regis ni e kin kalohki padahk en Paipel ni ihmw lel ihmw, oh e kin kapailoke ih ni ahnsou me e kin koasoiong tohnihmw akan duwen Rongamwahu en Wehio. Ahpw, mendahki uhwong laud wet kin wiawi, Régis kin kasalehda kanengamah. Régis kin wia mehn kahlemeng mwahu ong Kristian akan koaros, pwe Siohwa kin kupwurki sapwellime tohnkaudok akan koaros en kanengamahiong aramas teikan ahnsou koaros.
2. Ia wehwehn lepin lokaia “kanengamah” ni lokaiahn Krihk, oh dahme lepin lokaia wet kin wehwehki?
2 Ni mahsen en Krihk “kanengamah” kin wehwehki “pwand en mwakar.” Kawehwehn Paipel ni lokaiahn wai—New World Translation—kin kawehwehdi lepin lokaia wet “kanengamah” pahn pak eisek, pak siluh “sohte kin mwadang lingeringer,” oh pak ehu “pwand en mwakar.” Ni lokaiahn Ipru oh Krihk, lepin lokaia wet “kanengamah” kin wehwehki koatonohng sapwung de wiewia kalingeringer en emen.
3. Ia wekpeseng madamadau en irail Kristian akan oh irail mehn Krihk akan nan keieun senturi me pid kanengamah?
3 Mehn Krihk akan nan keieun senturi sohte kin kesempwaliki irairen kanengamah. Sounpadahk en Sidohik (Stoic) akan sohte kin doadoahngki lepin lokaia wet. Nin duwen aramas men me samanih Paipel, William Barclay, koasoia: irairen kanengamah “kin pelianda dahme mehn Krihk kan kin kesempwaliki,” pwe irail kin suweiki me irail kin “kahng kanengamahiong aramas akan me kin kauwe de kamedekihala irail.” E mahsanih: “Ong mehn Krihk akan, ohl kehlail men kin wia uwen me e kak en dupungkihong me suwed. Ahpw, ong irail Kristian akan, ohl me kin kehlail, edetehn e pahn kak dupungkihong me suwed, e sohte kin wia met.” Mehn Krihk akan kin lemeleme me irairen kanengamah iei ehu kilel me aramas luwet, ahpw “mehkot me likamwete me mwahl rehn Koht, e uhdahn siksang loalokong en aramas; oh mehkot me likamwete me luwet rehn Koht, e uhdahn siksang kehlail en aramas.”—1 Korint 1:25.
Mehn Kahlemeng en Krais Duwen Kanengamah
4, 5. Mehn kahlemeng mwahu dahieu Sises wia ong kasalehda kanengamah?
4 Siohwa kin keieu wia mehn kahlemeng mwahu duwen kanengamah, oh Krais Sises me keriaun mehn kahlemeng mwahu duwen kanengamah. Ni ahnsou me Sises mih pahn kalokolok laud, e kasalehda kanengamah laud. Soukohp men me kohpadahr duwen ih: “Ni eh wiemwahlla pahn aramas, e soh mwahn kin kaulimala, sohte mwahn kisin kaulim kis kin kohsang nan ewe. Rasehng sihmpwul men me nektehn kamakamala, rasehng sihpw men me nektehn seiseisang wune kan, e sohte mwahn nda mehkot.”—Aiseia 53:7.
5 Sises kin kasalehda kanengamah laud ni erein eh wia sapwellime doadoahk nin sampah! E dadaurete peidek widing kan oh kauwe kan me eh imwintihti kan kin wia ong ih. (Madiu 22:15-46; 1 Piter 2:23) E kin kanengamahiong sapwellime tohnpadahk kan edetehn irail me akamaikipene ihs me keieu laud rehrail. (Mark 9:33-37; 10:35-45; Luk 22:24-27) Kitail pil kak wadek duwen kanengamah laud me Sises kasalehda ni pwong me aramas pangala ih oh pil ni ahnsou me Piter oh Sohn wie memeir mwurinte Sises padahkiong irail koaros en “pepehd”!—Madiu 26:36-41.
6. Iaduwen Pohl kin paiekihda sang kanengamah me Sises kasalehong ih, oh dahme kitail kin sukuhliki sang met?
6 Mwurin eh pwoula oh iasada, Sises kin kasalehdahte kanengamah. Wahnpoaron Pohl kin uhdahn wehwehki duwen met, pwe mahs, pein ih kin kaloke Kristian akan. Pohl ntingihdi: “Eri, met koasoi mehlel pwoat, me kitail en ale unsek oh kamehlele: me Krais Sises ketido nin sampah pwe en komourala me dipan akan. I suwedsang irail koaros; ahpw pwehki iei kahrepe wette me Koht ketin mahkikihong ie, pwe I en kak kasalehda uwen laud en Krais Sises eh ketin kanengamahiong ie. Mehnda ma I suwedsang me dipan akan koaros ahpw I en wiahla mehn kahlemengih ehu ong koaros me pahn pwoson Krais mwuhr oh ale mour soutuk.” (1 Timoty 1:15, 16) Edetehn kitail wiahla aramas mwahu de suwed mahs, ahpw ni ahnsouwet ma kitail kin pwoson Sises, eri, e ahpw pahn kanengamahiong kitail—ahpw e pil kin kupwurki kitail en “wia soahng kan me pahn kasalehda me kitail wiliakapwalahr.” (Wiewia 26:20; Rom 2:4) Mahsen kan me Krais ketikihong mwomwohdiso isuh nan Eisia Maina kin kasalehda me edetehn e kin kanengamah, e kin kupwurki aramas akan en kekeirada.—Kaudiahl irelaud 2 oh 3.
Wahn Ngehn
7. Iaduwen irairen kanengamah oh ngehn sarawi kin doadoahkpene?
7 Nan Kalesia irelaud 5, Pohl kin kaparehkipene doadoahk kan en uduk nin duwen ahnepen aramas oh wahn ngehn akan. (Kalesia 5:19-23) Pwehki kanengamah iei ehu irair sang tohto me Siohwa kin sapwellimaniki, irair wet kin tepidasang reh oh kin wia sapwellimen Siohwa wahn ngehn. (Eksodus 34:6, 7) Kanengamah kin mih ni kapahieu en kairekdi en wahn ngehn akan me Pohl kasalehda, iangahki “limpoak, peren, popohl, . . . kadek, kamwahu, pwoson, opampap, oh liksang me suwed.” (Kalesia 5:22, 23) Ihme kahrehda, ni ahnsou me sapwellimen Koht ladu kan kin kasalehda kanengamah me Koht kin ketin kasalehda, irail kin wia met ki sawas en ngehn sarawi.
8. Dahme pahn kak sewese kitail en kakairada wahn ngehn akan, iangahki irairen kanengamah?
8 Ahpw, met sohte kin wehwehki me Siohwa kin idingkihong aramas akan sapwellime ngehn sarawi. Kitail anahne pein nseneki mweidong ngehn sarawi en sewese kitail. (2 Korint 3:17; Episos 4:30) Kitail kin mweidong ngehn sarawi en sewese kitail en kapwarehda wahn ngehn akan ni atail wiewia kan koaros. Mwurin Pohl me ntingihdi duwen wiewia kan nin duwen ahnepen aramas oh wahn ngehno, e pousehla ntingihdi met: “Ngehno ketikihongkitailehr mour; eri, e uhdahn pahn ketin kakaun mouritail. Kumwail dehr pitih pein kumwail; pwe sohte emen kak pitih Koht. Pwe mehkot me aramas pahn padokedi, ihme e pahn dolung. Ma e padokedi nan mwetuwel en paliwere ineng en paliwar, e pahn dolungasang mehla; a ma e padokedi nan mwetuwel en Ngehn, e pahn dolungasang rehn Ngehno mour soutuk.” (Kalesia 5:25; 6:7, 8) Ma kitail men pweida ni atail kin kakairada kanengamah, kitail pil anahne kakairada wahn ngehn teikan me Kristian akan kin kapwarehda ki ngehn sarawi.
“Limpoak me Kanengamah”
9. Dahme kahrehda Pohl padahkiong mehn Korint kan me “limpoak me kanengamah”?
9 Pohl kasalehda me limpoak oh kanengamah kin ahneki miniminpene tohrohr ehu ni e mahsanih met: “Limpoak me kanengamah.” (1 Korint 13:4) Emen ohl me semen en Paipel, Albert Barnes, kin kawehwehda me Pohl kin kasansalehda met pwehki e kin kilang duwen saminimin oh akamai me kin wiwiawi nan mwomwohdisohn Kristian en Korint. (1 Korint 1:11, 12) Barnes me kawehwehda met: “Lepin lokaia wet me kadoadoahkong wasaht [ong kanengamah] kin wia peliapen lamalam karuwaru: madamadau oh lokaiahn lingeringer kan, oh kailok. E kin wehwehki soangen madamadau me kak dadaur ni ahnsou werei mendahki aramas teikan kin kasonge ih.” Limpoak oh kanengamah kin sewese tohnmwomwohdisohn Kristian en ahneki popohl.
10. (a) Ni ahl dahieu limpoak kin sewese kitail en kasalehda kanengamah, oh mehnia kaweid wahnpoaron Pohl kin kihda? (b) Dahme emen semen en Paipel koasoia duwen sapwellimen Koht kanengamah oh kadek? (Kilang footnote.)
10 “Limpoak me kanengamah oh kadek; limpoak . . . sohte kin mehwo, sohte kin mwadang lingeringerda.” Eri, ni ahl tohto, limpoak kin sewese kitail en kanengamah.a (1 Korint 13:4, 5) Limpoak kin sewese kitail en kanengamahiong aramas teikan oh katamankin kitail me pein kitail kin soh-unsek oh koaros kin wia sapwung kan. E pil kin sewese kitail en medemedewe duwen pepehm en aramas teikan oh mahk ong meteikan. Wahnpoaron Pohl kin kangoange kitail en kin weweidki ni “mpahi, meleilei oh kanengamah. Kumwail kasalehda nanpwungamwail amwail limpoak ni amwail sohte pahn idingki meteikan en wia soangen mour me kumwail kin pwungki de men wia. Kumwail wia uwen me kumwail kak pwe kumwail en kin dadaurte minimin me ngehno kin ketikihong kumwail sang ni sapwellime kisakis en popohl me kin kolokolkumwailpene.”—Episos 4:1-3.
11. Dahme kahrehda e kesempwal en kasalehda kanengamah nan wasa kan me Kristian akan kin kousoanpene?
11 Ma tohnmwomwohdiso kin kasalehda kanengamah, met kak kahrehong popohl oh peren en mihmi nanpwungen Kristian akan koaros, duwehte nan mwomwohdiso kan, imwen Bethel kan, imwen misineri kan, pwihn en tohndoadoahk kan, oh sukuhl en Kristian akan. Pwehki wekpeseng me mie ong irair en aramas akan, oh wekpeseng me pid dahme kitail kin mwahuki, oh wekpeseng en wasa me kitail tikada ie, oh wekpeseng en atail tiahk kan, oh wekpeseng en mwakelekel en war kan, ekei ahnsou kahpwal akan pahn kak pwarada nanpwungarail. E duwehte nanpwungen tohnpeneinei kan—kahpwal akan pil kak pwarada ekei pak. E inenen kesempwal kitail en dehr mwadang lingeringerda. (Lepin Padahk 14:29; 15:18; 19:11) Kanengamah—dadaur pahn kalokolok, koapworopworki me irairo pahn mwahula—aramas koaros anahne kasalehda kanengamah.—Rom 15:1-6.
Kanengamah kin Sewese Kitail en Dadaur
12. Dahme kahrehda kanengamah kin kesempwal ni ahnsou me kitail kin lelohng kahpwal akan?
12 Kanengamah kin sewese kitail en dadaur mendahki kahpwal akan mwomwen sohte pahn uhdi de mwadang mwahula. Nan parakrap ehu en artikel wet, e kawehwe duwen emen brother, Régis, me kin mihmi nan irair apwal ehu. Erein sounpar tohto, eh pwoud lih kin uhwong ih ni e kin papah Siohwa. Ahpw, ehu rahn, liho sengiseng oh nda: “I ese me met padahk mehlel. Sewese ie. I men onop Paipel.” Mwuhr, liho papidaisla oh wiahla emen Sounkadehde. Régis koasoia: “Met kin kadehde me Siohwa kapaiada sounpar kan me I kin lelohng kahpwalo ahpw kanengamah oh dadaur.” E ale kapai pwehki e kin kanengamah.
13. Dahme sewese Pohl en dadaur, oh iaduwen eh mehn kahlemeng pahn kak sewese kitail en pil dadaur?
13 Nan keieun senturi C.E., wahnpoaron Pohl kin wia mehn kahlemeng mwahu en kasalehda kanengamah. (2 Korint 6:3-10; 1 Timoty 1:16) Ni kereniong imwin eh mour, ni ahnsou e kihda kaweid ong ienge pwulopwul Timoty, Pohl padahkiong ih me Kristian akan koaros pahn lelohng kasongosong kan. Pohl koasoia duwen pein ih oh kihda ekei irairen Kristian akan me kin kesempwal en sewese irail en dadaurete. E ntingihdi: “Eri, ke idawehnehr ei padahk, ei wiewia, oh pil kahrepen ei mour nan mour wet; ke kilangehr duwen ei pwoson, ei kanengamah, ei limpoak, ei kin nannanti ni ahnsou apwal akan, ei kamakam akan, oh pil ei lokolok kan. Ke ese soahng kan koaros me lelohng ie nan Andiok, Aikoniomw, oh Listra, kamakam apwal akan me I aleier! Ahpw Kauno ketin kapitiehsang soahng pwukat koaros. Aramas koaros me men ahneki mour mwahu ni arail pahn miniminiong Krais Sises, re pahn ale kamakam.” (2 Timoty 3:10-12; Wiewia 13:49-51; 14:19-22) Pwehn sewese kitail en dadaur, kitail koaros anahne pwoson, limpoak, oh kanengamah.
Likoukihda Kanengamah
14. Dahme Pohl karasaiong irair akan me Koht kin sapwellimaniki duwehte kanengamah, oh kaweid dahieu e kihong Kristian akan nan Kolose?
14 Wahnpoaron Pohl kin karasaiong kanengamah oh irair teikan me Koht kin ketin sapwellimaniki nin duwen likou kan me Kristian akan pahn anahne pwuhriong loale mwurin arail kin pwilikidi “mour mering en mahso iangahki eh wiewia kan.” (Kolose 3:5-10) E ntingihdi met: “Kumwail sapwellimen Koht aramas; e ketin loalloale kumwail oh ketin pilkumwailda pwe en sapwellimankinkumwailla. Ihme kahrehda kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah. Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kauno eh ketin mahkohngkumwailehr. Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.”—Kolose 3:12-14.
15. Dahme kin wiawi ni ahnsou me Kristian akan kin ‘likoukihda’ kanengamah oh irair teikan me Koht kin ketin sapwellimaniki?
15 Ni ahnsou me tohnmwomwohdiso kan kin ‘likoukihda’ kadek, aktikitik, mpai, kanengamah, oh limpoak, irail pahn kak kapwungala arail kahpwal akan oh ni minimin wonoweite nan doadoahk en Siohwa. Sounapwali Kristian akan en nantihong kasalehda kanengamah. Ekei ahnsou, re anahne kapwungala Kristian teikan, ahpw mie soangen ahl tohto en kapwungala aramas teikan. Pohl kin kawehwe ong Timoty duwen lamalam me keieu mwahu en ahneki ni ahnsou emen pahn kapwungala aramas teikan iei met: “Panawih irail oh kakehlaka irail ni omw kin padahk ni kanengamah.” (2 Timoty 4:2) Ei, sounapwalih kan anahne ahnsou koaros kasalehda kanengamah, wahu, oh kadek ong sapwellimen Siohwa sihpw kan.—Madiu 7:12; 11:28; Wiewia 20:28, 29; Rom 12:10.
“Kanengamahiong Aramas Koaros”
16. Dahme pahn kak wiawi ni ahnsou me kitail kin “kanengamahiong aramas koaros”?
16 Sapwellimen Siohwa kanengamah ong aramas akan kin kapwukoahki kitail en pil “kanengamahiong aramas koaros.” (1 Deselonika 5:14) Met kin wehwehki me kitail pahn kanengamahiong tohnpeneinei kan me saikinte wiahla Sounkadehde kan, oh pil kanengamahiong mehn mpatail kan, iengatail tohndoadoahk kan, oh iengatail tohnsukuhl akan. Sounkadehde kan kin sewese aramas tohto en solahr ahneki madamadau en kailongki de uhwong irail pwehki re kin kanengamahiong iengarail tohndoadoahk kan de tohnsukuhl akan me kin kapailoke, kauwe de uhwong irail, ekei pak, erein sounpahr tohto. (Kolose 4:5, 6) Wahnpoaron Piter ntingihdi: “Amwail tiahk kan nanpwungen me rotorot akan en kin mwahu, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.”—1 Piter 2:12.
17. Iaduwen kitail kak kahlemengih sapwellimen Siohwa limpoak oh kanengamah, oh dahme kahrehda kitail anahne en wia met?
17 Sapwellimen Siohwa kanengamah pahn kahreong aramas rar kei en ale komourparail. (2 Piter 3:9, 15) Ma kitail pahn kahlemengih sapwellimen Siohwa limpoak oh kanengamah, kitail pahn ni kanengamah en pousehla wia doadoahk en kalohki rongamwahu en Wehin Koht oh padahkiong aramas teikan en uhpahiong kaundahn Wehin Krais. (Madiu 28:18-20; Mark 13:10) Ma kitail pahn uhdi sang atail doadoahk en kalohk, mwomwen kitail kin mwamwalehki sapwellimen Siohwa kanengamah oh kitail sohte wehwehki kahrepen E kin ketin kasalehda kanengamah pwehki en mweidong aramas akan ahnsou en kolukihla diparail kan.—Rom 2:4.
18. Dahme Pohl kapakapki mehn Kolose kan en wia?
18 Nan sapwellime kisinlikou ong Kristian akan nan Kolose, Pohl ntingihdi: “Pwehki sang ni kahrepe wet, se kin poaden kapakapkin kumwail ahnsou koaros, sangete ni ahnsou me se rongada duwen kumwail. Se kin peki Koht en ketin audehkinkumwailda kupwure iangahki erpit koaros oh marain sang rehn Ngehno. Eri, kumwail ahpw pahn kak momour nin duwen me Kauno kin ketin kupwurki, oh pil wiewia dahme e kin ketin kupwurperenki. Amwail mour pahn kasalehda wa mwahu ni soangen doadoahk mwahu koaros, oh kumwail pil pahn kekeirda ni amwail marainkihla Koht. Se pil peki kumwail en kehlailkihda soangen kehlail koaros me kin pwilisang ni sapwellime roson lingan, pwe kumwail en kak nannanti nan apwal akan koaros ni kanengamah.”—Kolose 1:9-11.
19, 20. (a) Iaduwen kitail kak liksang madamadau ehu me sapwellimen Siohwa kanengamah kin wia kasongosong ehu ong kitail? (b) Kapai dah kei pahn kohwong kitail ma kitail kin kasalehda kanengamah?
19 Sapwellimen Siohwa kanengamah sohte pahn mwomwen wia kasongosong ehu ong kitail ma kitail kin “audehkinkitailda kupwure,” me E ketin kupwurki “aramas koaros en ale komourparail oh marainkihla me mehlel.” (1 Timoty 2:4) Kitail pahn “wa mwahu ni soangen doadoahk mwahu koaros,” keieu doadoahk en kalohki “Rongamwahu en Wehio.” (Madiu 24:14) Ma kitail pahn ni lelepek pousehla wia doadoahk wet, Siohwa pahn ketin kakehlahda kitail oh kitail pahn “kehlailkihda soangen kehlail koaros,” oh met pahn sewese kitail en “nannanti nan apwal akan koaros ni kanengamah oh peren.” Ni ahnsou me kitail kin wia met, kitail kin “momour nin duwen me Kauno kin ketin kupwurki,” oh kitail pil pahn ahneki popohl oh meleilei me kin kohsang atail kin wehwehki me kitail kin “wiewia dahme e kin ketin kupwurperenki.”
20 Kitail en kamehlele ni unsek duwen elen erpit en sapwellimen Siohwa kanengamah. Wiewia pwukat pahn kak doarehla pein kitail oh pil irail kan me kin rong atail padahk kan. (1 Timoty 4:16) Kakairada nan loalatail kan wahn ngehn akan—limpoak, kadek, kamwahu, opampap, oh liksang me suwed—pahn sewese kitail en perenki kasalehda kanengamah. Kitail pahn kak miniminiong tohn atail peneinei oh pil miniminiong riatail brother oh sister kan nan mwomwohdiso. Kanengamah pil pahn sewese kitail en kanengamahiong iengatail tohndoadoahk kan de tohnsukuhl akan. Oh atail kin kanengamah pahn katapan pwehn sewese aramas dipan akan en ale komourparail oh pil kapinga Koht me kin kasalehda kanengamah iei Siohwa.
[Nting tikitik me mi pahs]
a Emen semen en Paipel Gordon D. Fee me koasoia duwen ahn Pohl koasoiahki me “limpoak me kanengamah oh kadek,” e ntingihdi met: “Padahk kan en Pauline, kin kawehwehda me irair pwukat [kanengamah oh kadek] kin kasansalehda duwen pali riau koaros ong kupwuren Koht ong aramas akan. (cf. Rom. 2:4). Ni pali teio, sapwellimen Koht kanengamah kin sansalda sang ni e kin kolokolte sapwellime engieng ong aramas sapeik akan; ahpw ni pali teio, sapwellime kadek kin dierekda nan koasoiapen kid kid kei duwen sapwellime mahk kalahngan. Ihme, ahn Pohl kawehwe duwen limpoak kin tepkihda kawehwehpen irair riau pwukat duwen Koht oh sang rehn Krais e ketin kasalehda kanengamah oh kadek ong irail akan me kin warongki sapwellimen Koht kadeik.”
Ke Kak Kawehwe?
• Ni ahl dah kei Krais kin wia mehn kahlemeng kaselel ong kasalehda kanengamah?
• Dahme pahn sewese kitail en kakairada kanengamah?
• Iaduwen kanengamah kin sewese peneinei kan, tohnmwomwohdiso en Kristian akan, oh elder kan?
• Iaduwen atail pahn kasalehda kanengamah pahn wahdohng kitail oh pil aramas teikan kapai kan?
[Kilel nan Pali 28]
Edetehn Sises kin lelohng kahpwal laud kan, e kin kasalehda kanengamah ong sapwellime tohnpadahk kan
[Kilel nan Pali 29]
Kristian sounapwalih kan kin ale kangoang en wia mehn kahlemeng mwahu en kasalehda kanengamah ong riarail brother oh sister kan
[Kilel nan Pali 30]
Ma kitail pahn kahlemengih sapwellimen Siohwa limpoak oh kanengamah, kitail pahn dadaurete nan atail doadoahk en kalohki Rongamwahu
[Kilel nan Pali 31]
Pohl kin kapakapki me Kristian akan “en kanengamah oh peren”