Siohwa Kin Kapaiada Oh Perehla Irail Akan Me Kin Peik
“A ma mehmen pahn rong ie, e pahn ale komour. E pahn poadoandoarla, oh sohte kahrepen eh pahn masak mehkot.”—LEPIN PADAHK 1:33.
1, 2. Dahme kahrehda e kesempwal kitail en peikiong Koht? Kihda karasaras ieu.
KISIN pwurok tikitik kan me ahpwtehn kasawa kedikedirepwki palpalih kenarail mwenge nan dihpw mwotomwot kan, oh irail sohte ese me menpihr hawk wia pipihr powe oh kilikilangdiong irail. Mwadangete, litok me naineki pwurok ko wiahda ngihl kei pwehn likwerih nah pwurok kan oh kapapeseng peh kan oh nah kisin pwurok ko tangodo pahn pehnpihr ko. Erein sekond kei, irail ruklahr pahn peh kan oh solahr keper mie. Menpihr hawk eri uhdi sang a songen kemehla kisin pwurok ko.a Dahme kitail kak sukuhliki sang met? Peik kin doarehla mour!
2 Mehn kasukuhl wet iei kasukuhl ieu me keieu mwahu ong Kristian akan nan rahnwet, pwe Sehdan kin wia uwen me e kak en koledi sapwellimen Koht aramas akan. (Kaudiahl 12:9, 12, 17) Ah mehn akadei iei en kawehla atail nanpwungmwahu rehn Siohwa pwen kahrehong kitail en katiasang kupwuren Siohwa oh koapworopwor en mour soutuk. (1 Piter 5:8) Ahpw, ma kitail kin karanih Koht oh mwadang en kapwaiada kaweid akan me kitail kin ale sang sapwellime Mahsen oh pwihn, kitail kak kamehlele me e pahn perehla kitail. Sounmelkahkao ntingihdi, “E pahn ketin koaduhpwalkinuhkedi lime kan; ke sohte pahn perki mehkot pahn epwelpen nin lime.”—Melkahka 91:4.
Wehi Sapeik Ehu Lohdier
3. Dahme imwikihla Israel kin pwurpwurehng sapeik?
3 Ni ahnsou wehin Israel kin peikiong Siohwa, e kin mih pahn epwelmwahu en Koht ni ahnsou koaros. Ahpw, pak tohto, aramas pwukat kesehla arail Sounkapikada oh sohpeiwong koht tuhke oh takai kan—“pwe soangen koht pwukat me mwahl oh sohte katepe.” (1 Samuel 12:21) Mwurin sounpar epwuki kei me wehi wet tepida uhwong Koht, wehio pwon, kin wiahla pwihn ehu me kin lalahwe padahk mehlel oh mwomwen sohte mie koapworopwor irail en pwurala rehn Koht. Ihme kahrehda, Sises mahsanih: “Serusalem, Serusalem! Kowe me kemelahr soukohp ako oh kin koasungki takai sapwellimen Koht meninkeder kan me pekederdohng uhk! Pak depe me I kin men pwoalepene noumw aramas akan koaros, rasehng litok emen me kin kompwoalepene nah kisin pwurok kan pahn peh, ke ahpw sohte kin mweidohng ie! Eri, ke en ese pwe Tehnpas Sarawio pahn tehnla douluhl.”—Madiu 23:37, 38.
4. Iaduwen e wia sansal nan pahr 70 C.E. me Siohwa ketin kesehla Serusalem?
4 Nan pahr 70 C.E. Siohwa kasalehda ni sansal me e ketin kesehlahr Israel. Nan pahro, sounpei en Rom akan kolokolte neirail pilaik kan me mahlen en menpihr ikel mie ni pilaik, oh irail kin rasehng mehnpihro ni ar kin pihrdihla pohn Serusalem oh kemehla aramas tohto. Ni ahnsowo, kahnimwo kin direkihla aramas akan me kohdo en wia Pasohpa. Arail meirong tohto sohte kin kahreong Koht en kupwurkinirailla. Met kin wia mehn kataman ieu ong dahme Samuel padahkiong Nanmwarki Sohl me kin sapeik: “Mehnia tiahk me Kauno kin ketin kupwurperenki, rehn peik de kisakis oh meirong? Eri, peik me mwahusang mehlel meirongkihong sihpw me keieu kaselel kan.”—1 Samuel 15:22.
5. Soangen peik dahieu Siohwa kin kupwurki, oh iaduwen kitail ese ma aramas kak kasalehda soangen peik wet?
5 Edetehn Siohwa kin kupwurki aramas akan en peik, E kin ketin wehwehki duwen irairen aramas soh-unsek akan. (Melkahka 130:3, 4) Dahme e kupwurki iei mongiong mehlel oh peik me kin poahsonda pohn pwoson, limpoak, oh lemmwiki Koht pwe kitail sohte men kansensuwedih ih. (Deuderonomi 10:12, 13; Lepin Padahk 16:6; Aiseia 43:10; Maika 6:8; Rom 6:17) Soahngen peik wet kin kak wiawi pwe mie ‘pokon kalaimwun ehu me momour mwohn Kristian sounkadehdehn kan,’ me kin kolokolte arail lelepek mendahki irail kin lelong kasongosong laud kan, oh pil mehla. (Ipru 11:36, 37; 12:1) Aramas pwukat kin kaperenda sapwellimen Siohwa mongiong! (Lepin Padahk 27:11) Aramas teikan kin tepida lelepek ahpw ni ahnsou mwuhr, irail sohte kin kak kolokolte arail peikiong Koht. Emen me kin wia met, iei Nanmwarki Sohas en wehin Suda en mahs.
Nanmwarki Emen me Lelong Kahpwal Akan Pwehki Werek Suwed
6, 7. Soangen nanmwarki dah Sohas ni ahnsou Sehoiada memour?
6 Nanmwarki Sohas kereniong kamakamala ni ahnsou e wiahla seri. Ni ahnsou Sohas sounpar isuh, Samworo Lapalap Sehoiada ni eimah kasansalehda ihs ih oh kamanala ih en wiahla nanmwarki. Pwehki Sehoiada me kin lemmwiki Koht kin wiahla pahpa men oh sounkaweid men ong Sohas, kaun pwulopwul menet “wiadahr dahme kin kaparanda kupwur en Kauno erein Sehoiada eh momour.”—2 Kronikel 22:10–23:1, 11; 24:1, 2.
7 Wiewia mwahu kan me Sohas wiahda kin pid onehda sapwellimen Siohwa Tehnpas Sarawi—“Sohas kin perenkihda wia doadoahk wet.” E katamanda Samworo Lapalap Sehoiada anahnpen kihpene daksis ong Tehnpaso sang rehn Suda oh Serusalem, “me Moses koasoanehdi,” pwen mie mwohni ong doadoahk en onehda sapahl wet. Ni sansal, Sehoiada kin pweida ni e kin kangoange nanmwarki pwulopwul menet en onop oh peikiong sapwellimen Koht Kosonnedo. Imwilahn met, irail mwadang kanokehla doadoahk ong Tehnpaso oh dipwisou sarawi kan en Tehnpaso.—2 Kronikel 24:4, 6, 13, 14; Deuderonomi 17:18.
8. (a) Dahme kin keieu kahrehong Sohas en pwupwudi ni pali ngehn? (b) Dahme sapeik en nanmwarkio kahrehong ih en wia?
8 Ahpw, kansensuwed, pwe peik me Sohas wiaiong Siohwa sohte kin wiawi kohkohlahte. Dahme kahrehda? Mahsen en Koht padahkiong kitail: “Ahpw ni Sehoiada eh sipallahr, kaun akan en Suda ngidingidkihong Nanmwarki Sohas en karonge irail. Aramas akan eri sohla kaudok nan Tehnpas en Kauno, Koht en ar pahpa kahlap ako, oh uhd tapihada kaudokiong dikedik en eni oh sansal akan en koht lih Asera. Diparail pwukat eri kahrehiong engieng en Kauno pohn Suda oh Serusalem.” Pwehki irail kaun akan en Suda kin wia werek suwed ong nanmwarkio, oh met kin kahrehong ih en pohnsehsehla sapwellimen Koht soukohp akan, emen iei nein Sehoiada pwutak, Sekaraia, me kin ni eimah kihong Sohas oh aramas akan kaweid pwehki irail kin sapeik. Ahpw, e sohte koluhla, Sohas koasoanehdi aramas akan en katehki takai Sekaraia oh kemehla ih. Sohas uhd wiahla ohl sempoak men oh sapeik—pwehki e kin werek suwed!—2 Kronikel 24:17-22; 1 Korint 15:33.
9. Iaduwen dahme wiaiong Sohas oh nah soupeidi kan kasansalehda duwen suwed en sapeikiong Koht?
9 Pwehki Sohas oh ienge kaun suwed akan kesehla Siohwa, dahme wiaiong irail? Pwihn en sounpei ieu en mehn Siria kan—“pwihn tikitik ehu”—kalowehdi Suda oh “soupeidi kan koaros kamakamala.” Irail pil idingki nanmwarkio en kihong irail nah dipwisou kan iangahki kohl oh silper me kohsang Tehnpaso. Edetehn Sohas pitsang irail, e soumwahuda oh luwetala. Ahnsoukis mwuri, sang nah pwihn en ladu kan mie ekei aramas me uhwong ih oh kemehla ih. (2 Kronikel 24:23-25; 2 Nanmwarki 12:17, 18) Sapwellimen Siohwa mahsen kan ong wehin Israel me inenen mehlel: “Ahpw ma kumwail sohte peikiong Kauno, amwail Koht, oh sohte loalopwoatohng kapwaiada sapwellime kosonned akan koaros . . . , soahng suwed pwukat koaros pahn pweiong kumwail”!—Deuderonomi 28:15.
Emen Sekretary me Doarehla e Mour Pwehki Peik
10, 11. (a) Dahme kahrehda e pahn mwahu ong kitail en medemedewe duwen sapwellimen Siohwa kaweid ong Paruk? (b) Kaweid dahieu Siohwa ketikihong Paruk?
10 Ekei ahnsou ke kin nsensuwed pwehki aramas malaulau kin perenki rong rongamwahu ni ahnsou kitail kin iang wia doadoahk en kalohk en Kristian? Ke kin ekei ahnsou peirinki aramas kepwehpwe kan oh arail mour saledek oh noarok? Ma ei, medemedewe duwen Paruk, sekretary en Seremaia, oh sapwellimen Siohwa kaweid limpoak me kohwong ih.
11 Ni ahnsou me Paruk tepida ntingihdi kokohp ieu, Siohwa uhd kihong ih sawas ieu. Dahme kahrehda? Pwehki Paruk tepida kaulimki eh mour oh tepida inengiengada mehkot mwahu sang eh pwais tohrohr en papah Koht. Pwehki Siohwa ketin mahsanih me ahn Paruk madamadau wekila, e ketikiong ih kaweid kadek wet: “Ia duwe, ke raparapahki ehu kamwahu ong pein kowe? Eri, ke dehr wia met. Pwe I pahn ketikihdo kahpwal pohn aramas koaros, ahpw kowe, ke pahn pitla sohte mehla, wasa kis me ke pahn kohla ie.”—Seremaia 36:4; 45:5.
12. Dahme kahrehda kitail anahne en liksang raparapahki “ehu kamwahu” ong pein kitail nan koasondi en ni ahnsouwet?
12 Sang dahme Siohwa mahsanihong Paruk, ke kak pehmada me Siohwa kin nsenohkin ohl kaselel menet, me kin iang Seremaia ni lelepek oh eimah papah Siohwa? Duwehte nan rahnwet, Siohwa kin nsenohkin aramas akan me kin lelong kasongosong kan en alehdi mehkan me mwahu nan koasondi en ahnsou wet. Ahpw kaperen en kilang me pali laud en aramas pwukat kin duwehte Parak, kin mwekidki kaweid limpoak me kohsang brother mah kan ni pali ngehn. (Luk 15:4-7) Ei, kitail koaros kak dehdehkihla me aramas akan me kin rapahki “ehu kamwahu” ong pein irail nan koasondi wet sohte arail koapworopwor ong ni ahnsou kohkohdo. Irail sohte pahn kak diarada peren mehlel, ahpw suwed sang met, irail pahn iang sampah wet oh dipen ineng en uduk sosohrala.—Madiu 6:19, 20; 1 Sohn 2:15-17.
13. Mehnia mehn kasukuhl duwen lamalam en aktikitik me kitail kin padahngkihsang poadopoad en Paruk?
13 Poadopoad duwen Paruk kin pil padahkiong kitail mehn kasukuhl kaselel ieu duwen aktikitik. Tehk mwahu wasaht, Siohwa sohte pein mahsanihong Paruk sapwellime kaweid, e doadoahngki Seremaia, ohl soh-unsek men me kin ahneki irair tohrohr kan me Paruk kin wehwehki duwen. (Seremaia 45:1, 2) Ahpw, Paruk sohte mweidong aklapalap en powehdi ih, ni aktikitik e kin dehdehkihla me utupen kaweid wet kin kohsang rehn—Siohwa. (2 Kronikel 26:3, 4, 16; Lepin Padahk 18:12; 19:20) Eri, ma kitail ‘lohdiong nan sapwung ehu’ oh kitail ale kaweid me kohsang Mahsen en Koht, eri, kitail anahne alasang Paruk me kin kasalehda me e kin mah ni pali ngehn, dehdehkihla irair akan, oh lamalam en aktikitik.—Kalesia 6:1.
14. Dahme kahrehda e pahn katep laud ong kitail en peikiong irail akan me kin apwaliahda kitail?
14 Ma kitail kasalehda lamalam en aktikitik, met pahn sewese aramas akan me kin kihda kaweid akan. Ipru 13:17 mahsanih: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih ngenomwail kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.” Ahnsou koaros irail elder kan kin wia ar kapakap ngidingid kan ong Siohwa, kapakapki eimah, erpit, oh koasoia kadek pwen sewese irail en kapwaiada arail pwukoa en apwaliahda tohnmwomwohdiso kan! Kitail en “wauneki soangen ohl pwukat.”—1 Korint 16:18.
15. (a) Iaduwen Seremaia kasansalehda me e kin liki Paruk? (b) Kating dahieu kohwong Paruk pwehki e kin ni lamalam aktikitik peikiong Koht?
15 E sansal me Paruk kapwungala ah madamadau, pwe Seremaia kihong ih pwukoa apwal ieu—e anahne kohla ni Tehnpas Sarawio oh wadek laud kadeiko me Seremaia ndaiong ih en ntingihdi. Eri, Paruk peikiong? Ei, e wia “soahng koaros me soukohp Seremaia kehkehlingkihong ih en wia.” E pil, wadek kokohp wet ong irail soupeidi kan en Serusalem, met kin wehwehki me e kin eimah. (Seremaia 36:1-6, 8, 14, 15) Ni ahnsou kahnimwo lohdi pahn Papilon ni mpen sounpar 18 mwuri, medemedewe duwen uwen laud ahn Paruk kalahngan ni e pitsang mehla pwehki e kin kapwaiada sapwellimen Siohwa kaweid kan oh uhdi sang rapahki “ehu kamwahu” ong pein ih!—Seremaia 39:1, 2, 11, 12; 43:6.
Peik ni Ahnsou Wehi ieu kin Kapilpene Aramas akan kin Doarehla Mour
16. Iaduwen Siohwa kin ketin kasalehda limpoak ong mehn Suhs akan me mih nan Serusalem ni ahnsou mehn Papilon kan kapilpene irail nan pahr 607 B.C.E.?
16 Ni ahnsou Serusalem ohlahr ni pahr 607 B.C.E., sapwellimen Koht limpoak ong aramas peik kan kin sansalda. Ni ahnsou wehio kin kapilpene irail, Siohwa mahsanihong mehn Suhs akan: “Ngehi, Kauno, me ketikihong kumwail en pilada ahl en kowohng mour oh ahl en kowohng mehla. Mehmen me pahn mihmi nan kahnimwo, pahn mehkihla mahwen, lehk lapalap de soumwahu. A mehmen me pahn pedoi oh [pein lohdi] rehn mehn Papilonia kan, me met mahmahweniong kahnimwo, sohte pahn mehla; e pahn pitla oh mourla.” (Seremaia 21:8, 9) Edetehn tohn wehin Serusalem warohng en kamakamala, Siohwa ketin kasalehda limpoak ong irail akan me kin peikiong Ih, mehnda ma pwand.b
17. (a) Ni ahl riau dah kei me peik Seremaia kin kasalehda kin lelong kasongosong ni ahnsou Siohwa padahkiong ih en kaweidih mehn Suhs akan ni ahnsou me arail imwintihti kan kin kapilpene irail en ‘pein lohdi pahn mehn Kaldia kan’? (b) Iaduwen kitail kak paiekihda sang mehn kalemeng mwahu en Seremaia ni e kin kasalehda eimah peikiong Koht?
17 Padahkiong mehn Suhs akan en pein duhkiong pahn mehn Papilon kan kin pil wia mehn kasong ieu ong Seremaia ma e pahn peik de soh. Pwe, e kin ngoangki en utungada mwaren Koht. E sohte men kilang eh imwintihti kan en lahlahwe mwaren Koht oh kapingahki arail koht dikidek en eni kan me sohte kin momour duwen arail kalohwedi irail. (Seremaia 50:2, 11; Koulen Kedepwidepw kan 2:16) Oh pil, Seremaia ese ma e pahn padahkiong aramas akan en pein duhkiong pahn mehn Papilon kan, met pahn kahrehong pein eh mour en mihla pahn apwal ieu, pwe aramas tohto pahn lemeleme me ah mahsen kan kin mwomwen uhwong Koht. Ahpw e sohte kin masak, ni peik e kin padahkiong aramas akan duwen sapwellimen Siohwa mahsen kan. (Seremaia 38:4, 17, 18) Duwehte Seremaia, kitail kin pil lohkiseli rong ieu me aramas tohto sohte kin perenki rong. Rong wet me duwehte rongamwahu me Sises lohkiseli ahpw aramas kin mwamwaleki. (Aiseia 53:3; Madiu 24:9) Eri, kitail en dehr ‘masak aramas,’ ahpw kitail en kahlemengih Seremaia, ni eimah peikiong Siohwa, likih Ih ni unsek.—Lepin Padahk 29:25.
Peik ni Ahnsoun Kok Pahn Tepida Mahwen
18. Kasongpen peik dah kei pahn wiawi ni ahnsou kohkohdo me sapwellimen Siohwa ladu kan pahn lelong?
18 Ni ahnsou keren, koasondi suwed en Sehdan pwon pahn kamakamala nan “kahn kamakam kowalap.” (Madiu 24:21) Ni sansal, mwohn oh ni ahnsou kamakam wet pahn wiawi, sapwellimen Koht aramas akan pahn lelong kasongosong laud oh met pahn kasonge arail pwoson oh peik. Karasepe ieu, Pwuhk Sarawi mahsanih me Sehdan, “Kok nan sapwen Makok,” pahn mahweniong sapwellimen Siohwa ladu kan, kaunopada en kihpene nin duwen me ntingihdi “lapalahn karis kehlail en sounpei . . . , me kin rasehng depwek kan me mwekimwekid pohn sahpw.” (Esekiel 38:2, 14-16) Sapwellimen Koht aramas me malaulau sang pwihno oh pil sohte arail tehtehn mahwen kan, ahpw irail pahn rukala pahn sapwellimen Siohwa “pehn pihr kan,” me e kin ketin doadoahngki pwehn perehla aramas peik kan.
19, 20. (a) Dahme kahrehda e kesempwal mehn Israel akan en kasalehda peik ni ahnsou irail mih limwahn Sehd Weitahta? (b) Iaduwen kitail kak paiekihda sang ni atail pahn kin kapakap oh doudouloale duwen poadopoad en Sehd Weitahta?
19 Irair wet kin katamankin kitail duwen ahnsou me mehn Israel akan kin kohkohlahsang Isip. Mwurin Siohwa kaloke Isip ki kalokolok eisek, Siohwa sohte kahre sapwellime aramas akan en sapahl nan ahl me pahn kohla Sahpwen Inou me keieu mwotomwot, ahpw e kahreiraildihlahng Sehd Weitahta, wasa me arail imwintihti kan kak ni mengei pwahkihiraildi oh kalohwehdi. Mwekid sapwung laud ieu ma ke men pitsang imwintihti kan. Ma ke iang mih wasao, ke pahn peikiong sapwellimen Siohwa mahsen me Moses kin pakairki en keidihla Sehd Weitahta ki pwoson, edetehn ke ese me Sapwen Inou kin mih nan ehu wasa tohrohr?—Eksodus 14:1-4.
20 Ni ahnsou me kitail kin pousehla wadek pwuhken Eksodus irelaud 14, kitail kin kilang iaduwen Siohwa doadoahngki sapwellime manaman pwehn kapitala sapwellime aramas akan. Soangen poadoapoad pwukat kin kakehlailihala atail pwoson ni ahnsou me kitail onop duwen poadoapoad pwukat oh doudouloale duwen mehpwukat! (2 Piter 2:9) Ma kitail pwoson kehlail Siohwa, met pahn sewese kitail en peikiong Ih, edetehn sapwellime koasoandi kan kin weksang madamadau en aramas. (Lepin Padahk 3:5, 6) Eri, pein idek rehmw, ‘I kin wia uwen me I kak en kakehlailih ahi pwoson ni ahi kin kaukaule onop Paipel, kapakap, oh doudouloale, iangahki kalap iang towehda mihding kan oh miniminiong sapwellimen Koht aramas akan?’—Ipru 10:24, 25; 12:1-3.
Peik Kin Kahrehong Aramas en Koapworopwor
21. Soangen kapai dah kan, mahs oh pil ni ahnsou kohkohdo, pahn kohwon irail me kin peikiong Siohwa?
21 Irail me kin mourki arail peikiong Siohwa kin pehm duwen pweidahn Lepin Padahk 1:33, NW me mahsanih: “A ma mehmen pahn rong ie oh peikiong ie, e pahn ahneki mour meleilei oh pahn poadoandoarla, oh sohte kahrepen eh pahn masak mehkot.” Ia uwen kaselel ahnsou me mahsen en kamweit pwukat pahn pweida ahnsoun sapwellimen Siohwa Rahn en kadeik pahn leledo! Ni mehlel, Sises mahsanih ong sapwellime tohnpadahk ko: “Ni mepwukat eh pahn tepida wiawi, kumwail uhda oh sarada, pwe komourpamwail kerendohr.” (Luk 21:28) E sansal me ihte irail me kin peikiong Koht me pahn kak kapwaiada mahsen pwukat.—Madiu 7:21.
22. (a) Dahme kahrehda sapwellimen Siohwa aramas akan ahneki kahrepe mwahu en likih Siohwa? (b) Soahng dah kan kitail pahn sukuhliki nan artikel en mwurin met?
22 Pil ehu kahrepe kitail en likih Siohwa iei met: “Kauno [“Siohwa,” NW], Wasa Lapalahpie, sohte kin ketin wia mehkot ma e sohte kin ketin kasalehiong sapwellime ladu soukohp kan kupwure.” (Eimwos 3:7) Rahnwet, Siohwa sohte kin doadoahngki soukohp kan duwehte mahs; ahpw, E kin ketin doadoahngki pwihn en ladu lelepek oh loalokong pwehn kihong sapwellime aramas akan mwengehn ngehn me konehng ong ahnsou wet. (Madiu 24:45-47) Kahrehda, e kin kesempwal en peikiong “laduwo”! Nin duwen artikel en mwurin met pahn kasalehda, atail peikiong laduwo pahn pil kasalehda atail peikiong Sises, me iei Ih me soumas en ‘laduwo.’ Ih me ‘pahn sapwellimaniki peik en aramas.’—Senesis 49:10.
[Nting tikitik me mi pahs]
a Ehu pwuhk sang pwihn en “Humane Society” (pwihn me kin apwalih mahn kan oh rapahki ahl akan en pere irail sang keper) koasoia: Edetehn litok kan kin mwomwen luwet, “litok emen pahn peiki nah pwurok kan oh pil mehkihirailla ma irail pahn lelohng keper.”
b Seremaia 38:19 kasansalehda me mie mehn Suhs akan me ‘pwupwudiong’ rehn mehn Kaldia kan oh sohte kamakamala ahpw irail me kalipilipla. Ma irail me pilada en pedoi oh pein lohdi rehn mehn Papilon kan, kapwaiada mahsen en Seremaia, kitail sehse. Ahpw, arail kin pitsang kin kamehlelehong kitail mahsen kan en soukohpo.
Ke Kin Tamataman?
• Ia imwilahn mehn Israel arail kin kalap sapeikiong Siohwa?
• Iaduwen Nanmwarki Sohas kin mwekidki ihs me e kin werekiong, ahnsou me e pwulopwul oh pil mwuhr?
• Soangen mehn kasukuhl dah kan kitail kak sukuhliki sang Paruk?
• Dahme kahrehda sapwellimen Siohwa aramas peik kan sohte anahne masak mehkot mendahki koasoandi suwed wet pahn kereniong imwisekla?
[Kilel nan Pali 21]
Pwehki Sohas kin ale kaweid mwahu sang Sehoiada ahnsou me e pwulopwul, Sohas kin peikiong Siohwa
[Kilel nan Pali 22]
Werek suwed kan kamwekid Sohas en koasoanehdi pwehn kemehla sapwellimen Koht soukohp
[Kilel nan Pali 24]
Mahs, ke lemeleme ke pahn peikiong Siohwa oh eri kilang sapwellime manaman en doarehla mour en aramas?