Met Inenen Kesempwal Sang Mahs, En Wie Pepehd!

“Kitail dehr memeir duwehte meteikan, ahpw kitail pepehd oh onohnop.”—1 Deselonika 5:6.

1, 2. (a) Soangen kahnimw dah kei Pompeii oh Herculaneum? (b) Kaweid dah me pali laud en tohn Pompeii oh Herculaneum sohte tehk, oh ia imwilahn met?

NAN keieun senturi C.E., Pompeii oh Herculaneum wia kahnimw kepwehpwe riau nan Rom oh mih limwahn Nahna Vesuvius. Ong aramas kepwehpwe kan nan Rom, wasaht kin wia wasahn mwemweit. Arail wasahn wia sipai kan laud mehlel oh kak kamwohdong aramas daulih kid, oh nan Pompeii mie ihmw wasahn wia sipai me kereniong tohn kahnimw koaros kak pedolong oh mwohndi loale ni ahnsou tehkis. Aramas en ahnsou wet me weirada oh kamwakelehda kahnimw en mahs wet koasoia me irail diar imwen kang sakau meh 118, ekei pil wia wasahn pilein mwohni oh wasahn netiki lih akan. Mour samin oh noahrok kepwe kin rek, oh met sansalki mahlen akan me mih nin dihd en ihmw akan oh pil wasa teikan.

² Nan August 24, 79 C.E., Nahna Vesuvius tepida kupwupada edin volcano. Semen en kasawih volcano kan kamehlele me dene tepin pospeseng en nahnao, kamwerehdi takai me ede “kehpei” oh pil iangahki mwoalus pohn kahnimw riau ko, oh sohte mweidohng ahnsou ong aramas akan en tang. Ahpw, ele mie tohto me pitila pwehki irail tangasang wasao. Ahpw ekei mwein soh kautih de sohte katapanki kaweid ong irail en tang, kahrehda irail mihmihte nan kahnimw ko. Mwurin mwo, nan lukepen pwongo, lapakehn pwelmatak oh takai ngiringirsek kohdiong oh pwaindi kahnimw Herculaneum, oh kamwopwala irail aramas me sohte tangasang wasao. Ni mensengie, soahngohte pil wiawihiong kahnimw Pompeii oh kemehla towe koaros. Ia uwen lepelepen apwal me lelohng irail pwehki arail sohte men tehk kanahieng kilel akan me pwarada mwohn apwalo!

Imwin Koasoandi en Mehn Suhs akan

3. Dahme duwepenehte nanpwungen ohlahn Serusalem oh me wiawi nan Pompeii oh Herculaneum?

³ Ahpw, imwila kansensuwed en Pompeii oh Herculaneum sohte suwed duwehte ohlahn Serusalem me wiawihier sounpahr 9 mwowe, edetehn apwal laud me wiawihong Serusalem aramas me pein wiahda. Mie me koasoia me ohlahn Serusalem “ehu lohdihn wasa nan poadoapoad me keieu kamasepwehk oh suwed nan poadoapoad pwe mehn Suhs tohtohsang rar (million) me mehla. Ahpw, ohlahn Serusalem duwehte ohlahn Pompeii oh Herculaneum pwehki pakair oh kilel en ohlao wiawi mwowe.

4. Kokohp dah me Sises ketikihda pwehn kaweidih sapwellime tohnpadahk kan ren ese me imwin koasoandi wet kerendohr, oh iaduwen met ah tepin pweida nan keieun senturi?

⁴ Sises Krais kohpadahr me kahnimw en Serusalem pahn ohla, oh e pil ketin kohpada soangen wiewia kei me pahn pwarada mwohn ohlao​—me duwehte mahwen, lehk lapalap, rerrer en sahpw, oh laudlahn kauwehla kosonned. Soukohp likamw akan pahn pwerisek kohkohseli, ahpw Rongamwahu en Wehin Koht pahn lohkseli wasa koaros nan sampah. (Madiu 24:4-7, 11-​14) Mehlel me pweidahn mahsen en Sises ko wie dokedoke rahn pwukat, ahpw re pil pweida ni ahl tikitik ni ahnsou en ohlahn Serusalem. Poadoapoad kasalehda me mie duhpek laud wiawi nan Sudea. (Wiewia 11:28) Sounpoadoapoad en Suhs me ede “Josephus” ripohtki me mie rerrer en sahpw wiawi ekiste mwohn kahnimwo ah ohla. Nin doken Serusalem a kerekerenlahng imwio, moromor ekei pwarada nanpwungen soangsoangen pwihn en politik kan nan Wehio, oh kamaramas wiwiawi nan kisin kahnimw akan me ekei irail aramas en Suhs oh ekei mehn liki. Ahpw, pil Rongamwahu en Wehin Koht lohkseli “ong kepikipik koaros me mih pahn lahng.”​—Kolose 1:23.

5, 6. (a) Sapwellimen Sises mahsen en kokohp dah kan me pweida nan pahr 66 C.E.? (b) Dahme kahrehda aramas tohto mehla ahnsou me Serusalem ohla nan pahr 70 C.E.?

⁵ Eri, nan pahr 66 C.E., mehn Suhs akan eri pelianda oh uhwongada Rom. Ahnsou me Cestius Gallus ah kahrehlong sounpei kan pwehn kalowehdi Serusalem, sapwellimen Sises tohnpadahk kan tamataman mahsen en Sises ko: “Ni ahnsou me kumwail kilang sounpei kan kapilpene Serusalem, kumwail pahn esehki me ahnsoun eh ohla kerendohr. Eri, ni ahnsowo irail kan me mihmi nan Sudia, re en tangalahng nan nahna kan; oh irail akan me mihmi nan kahnimwo, re en pedoi, oh irail me mihmi likin kahnimwo en dehr pwurolong nan kahnimwo.” (Luk 21:20, 21, NW) Ahnsou lelehr aramas akan en pedoisang nan Serusalem​—ahpw iaduwen? Eri, ni soh kahrepe, Gallus kapwurehsang nah sounpei kan, oh met ritingada ahnsou mwahu Kristian kan nan Serusalem oh Sudea en peikiong mahsen en Sises oh tangalahng nan nahna kan.​—Madiu 24:15, 16.

⁶ Mwurin sounpahr pahieu, ahnsoun Pasohpa, sounpei en Rom kan pwurodo pahn kaweid en General Taitus, me kodohn kamwomwala douluhl mehn Suhs akan. Nah sounpei kan kapilpene Serusalem oh kauwada “kelen tuhke imwkeng oh pidahkihpene kahnimwo,” kahrehda sohte me kak pitila. (Luk 19:43, 44) Mendahki uwen kahpwal en mahwen, mehn Suhs wasa koaros nan Wehin Rom pokondihlahng Serusalem pwehn iang kasarawi rahn en Pasohpa. Irail eri tangala nan kahnimwo. Nin duwen me Josephus kasalehda, irail pwukat inenen paisuwed pwehki irail me keieu tohto nanpwungen aramas mehla kan, ni mehn Rom akan arail kaloweiraildi.a Ni ahnsou me Serusalem pwupwudi, mpen isikis ehu en mehn Suhs me mih nan Rom mehla. Ohlahn Serusalem oh ah imwin kaudoko met kin wahdo luwetlahn kaundahn Wehin Suhs oh koasoandi en sarawi me poasoankihda kosonned en Moses oko.b​—Mark 13:1, 2.

7. Dahme Kristian lelepek kan mourkihla ni ohlahn Serusalem?

⁷ Nan pahr 70 C.E., Kristian en Suhs akan kakete iang kamakamala de pil wiahla selidi kan duwehte aramas teikan me mih nan Serusalem ahnsowo. Ahpw, nin duwen mehn kadehde kan sang poadoapoad, irail rong kehkehlik en Sises oko me wiawiher pahr 37 mwowe. Irail tangasang nan kahnimwo oh sohte pwurodo.

Kaweid Sang Wahnpoaron kan me Konehng Ahnsou

8. Anahn dah me Piter kasawihada, oh mahsen dah en Sises me ele e tamataman?

⁸ Nan rahnwet, mie ohla ieu me keieu laud me kohkohdo, ohla ieu me pahn kaimwisekala koasoandi en sampah ahnsou wet pwon. Pahr weneu mwohn ohlahn Serusalem, wahnpoaron Piter kihda kaweid karuwaru oh konehng ahnsou me mwahu ong Kristian nan atail ahnsou: Pehmitik! Piter kilang anahnepen Kristian akan en doadoahngki arail “kehl en madamadau” pwe irail dehr soukautihiongala “Kosonned en Kauno,” Sises Krais. (2 Piter 3:1, 2) Ni ahnsou me Piter kangoangeki Kristian akan en pemitikiong mehkan, e kakete medemedewe dahme e rongasang rehn Sises ni ah mahseniong sapwellime wahnpoaron oko rahn ekei mwohn ah matala: “Kumwail mwasamwasahn oh pepehd, pwe kumwail sehse ahnsawi.”​—Mark 13:33.

9. (a) Soangen madamadau keper dah me ekei ahnekihda? (b) Dahme kahrehda madamadau en peikasal wia mehkot keper?

⁹ Rahnwet, ekei aramas kin kepitiki oh idek: “E soh inoukihong kumwail me e pahn pwurodo? Eri, ia ih?” (2 Piter 3:3, 4) E sansal me aramas pwukat ahneki pepehm me sohte wekidekla ieu mie ahpw me dene soahng kan duweduwehte sangete nin tepin kapikipikdahn sampah. Soangen madamadau wet me keper. Peikasal en madamadau kak kaluwetehla atail pepehm en dahme karuwaru, kahrehong kitail en peila nan atail madamadau ong wia atail ineng en uduk kan. (Luk 21:34) Oh pil, Piter kawehwehda me irail aramas en kapailok pwukat manokehla Nohlik en mwehin Noha, me kauwehla koasoandi en sampah ahnsowo. Sampah inenen wekidekila ni ahnsowo!​—Senesis 6:13, 17; 2 Piter 3:5, 6.

10. Mahsen dah kan me Piter kangoangehki irail oko me pahn sohla kak kanengamah?

¹⁰ Piter sewesehki irail me kin wadek sapwellime kisinlikou me ren kanengamah oh awiawih ni arail pahn tamataman dahme Koht sohte kalap mwadangete wia sapwellime mwekid. Keieu, Piter mahsanih: “Rahn ehu rehn Siohwa rasehng pahr kid oh pahr kid rasehng rahn ehu.” (2 Piter 3:8) Pwehki Siohwa ketiket kohkohlahte, E pahn kak ketin sapwellimaniki kupwur me unsek oh ketin wia pilipil me keieu mwahu me pid sapwellime ahnsoun mwekid. Mwuri, Piter kasalehda sapwellimen Siohwa kupwur me aramas wasa koaros en koluhla. Sapwellimen Koht kanengamah kin wehwehki komour ong aramas tohto me kakete mehla ma Koht pahn ketin doadoahk karuwaru. (1 Timoty 2:3, 4; 2 Piter 3:9) Ahpw, sapwellimen Siohwa kanengamah sohte wehwehki me e sohte pahn wia sapwellime doadoahk. Piter mahsanih: “Rahn en Siohwa pahn kohdo duwehte lipirap.”​—2 Piter 3:10.

11. Dahme pahn sewese kitail en pepehd ni pali ngehn, oh iaduwen met ah pahn likamwete ‘kamwadangahla’ Rahn en Siohwa?

¹¹ Sapwellimen Piter karasaras wia mehkot katapan ong kitail. Lipirap akan sohte mengei ren lohdi, oh soupisilei men me wie pepehd pwohng ehu pwon pahn kakete diar lipirap sang ih me kin meir, pirida, meir, pirida. Iaduwen sounpisilei men ah pahn kak wie pepehd? Wie alialuhseli pahn kak kahrehda aramas en wie pepehd sang ih me pahn wie mwomwohd pwohng ehu pwon. Pil duwehte, ma emen Kristian men pepehd ni pali ngehn, e anahne kalap wia wiewia kan me pahn kakehlailihala ah pali ngehn. Kahrehda, Piter kangoangehkin kitail en kedikedirepweki “wiewia sarawi kan en papah Koht.” (2 Piter 3:11, NW) Soangen wiewia pwukat pahn sewese kitail en wie “tamataman me Rahn en Siohwa kerendohr.” Lepin lokaiahn Krihk me kin wehwehki “tamataman” kak pil wehwehki “kamwadangahla.” (2 Piter 3:12; footnote) E mehlel me kitail sohte kak wekid sapwellimen Siohwa koasoandi. Sapwellime rahn pahn lelodo nin duwen sapwellime ahnsou. Ahpw, Rahn en Siohwa pahn likamwete mwadang leledo ma kitail pahn kedirepwki atail doadoahk en papah Koht.​—1 Korint 15:58.

12. Iaduwen emenemen kitail en isaneki ahnsou mwahu me mie pwehki kupwur kanengamah en Siohwa?

¹² Kahrehda, mehmen me pehm me Rahn en Siohwa me pwand kangoang kohwong ih en rong kanahieng kaweid en Piter en kanengamah oh awiawih sapwellimen Siohwa ahnsou. Ni mehlel, kitail kak isaneki doadoahngki kanahieng ahnsou kan me mihmi pwehki sapwellimen Siohwa kanengamah a ketin mweidohng. Karasepe, kitail kak kakairada irair kesempwal en Kristian akan oh pil ehukihong aramas tohto duwen Rongamwahu. Ma kitail wie pepehd, Siohwa pahn diar me kitail “mwakelekel oh pwung mwohn silangin Koht ni kapehd popohl” ni imwin koasoandi suwed wet. (2 Piter 3:14, 15) Met wia kapai laud!

13. Ia mahsen en Pohl ong mehn Deselonika me inenen mwahu oh konehng atail ahnsou wet?

¹³ Wahnpoaron Pohl, nan keieun sapwellime kisinlikou ong Kristian akan nan Deselonika, koasoia duwen anahnepen wie pepehd. E kaweidiki: “Kitail dehr memeir duwehte meteikan, ahpw kitail pepehd oh onohnop.” (1 Deselonika 5:2, 6) Rahnwet, pwehki ohlahn koasoandi wet en sampah ah kerendohr, ia uwen met ah nohn kesempwal! Irail akan me kin kaudokiong Siohwa kin koukousoan nan sampah ieu me direki aramas me sohte nsenohki irair en pali ngehn, oh met kak wia mehn kaluwete irail. Kahrehda, Pohl kaweidki: “Kitail onohnop oh kapwatkihda pwoson oh limpoak pwe en wia perehpen mwaremwaratail; oh atail lisoarop en mahwen, iei koapworopwor en mour soutuk.” (1 Deselonika 5:8) Kaukaule sukuhliki Mahsen en Koht oh kalap werekiong riatail akan nan mihding kan pahn sewese kitail en kak idawehn kaweid en Pohl oh pil kak tetehk uwen karuwaru en ahnsou.​—Madiu 16:1-3.

Irail Aramas Million Kei Wie Pepehd

14. Dahme kin kasalehda me aramas tohto kin idawehn kaweid en Piter me kitail en pepehd?

¹⁴ Iaduwen​—⁠aramas tohto nan rahnwet me kin kapwaiada kaweid sarawi me pid pepehd? Ei. Nan pahr en kalohk en pahr 2002, ehu kekeiradahn sounkalohk wiawi oh e lel sounkalohk 6,304,645​—⁠persent 3.1 keirda sang nan pahr 2001⁠—met kin wia kamehlelepen me aramas wie pepehd ni pali ngehn ni arail kin doadoahngki awa 1,202,381,302 pwehn kalohkihong aramas akan duwen Rongamwahu en Wehin Koht. Ong irail pwukat, soangen doadoahk wet sohte kin wia mehkot mwahl. E kin wia dahme keieu kesempwal nan arail mour. Pali laud en irail​—⁠arail madamadau duwehte madamadau en Eduardo oh Noemi nan El Salvador.

15. Soangen ekspiriens dah me wiawi nan El Salvador me kin kasalehda me aramas tohto wasao kin wie pepehd ni pali ngehn?

¹⁵ Pahr ekei samwalahr oko, Eduardo oh Noemi tehk kanahieng mahsen en Pohl me mahsanih: “Irair en sampah kin wekiwekidekla.” (1 Korint 7:31) Irail kihsang nan arail mour soahng soh katapan kan oh ira wiahla Regular Pioneer kan (kaukaule wie doadoahk en kalohk). Ni ahnsou a dower powe, ira ale kapai tohto oh pil iang pwukoa nan doadoahk en circuit oh district. Edetehn ara kin lel kahpwal laud akan, Eduardo oh Noemi kamehlele me ira wiahda pilipil pwung ni ara meirongkihla nsenamwahu en palien dipwisou pwe ira en iang doadoahk en kalohk kaukaule. Irail me tohto nanpwungen sounkalohk 29,269 nan El Salvador​—iangahki pioneer 2,454​—pil iang wia soangen meirongo duwehte ira me kasalehda ngenen meirong nan arail mour, oh iei ehu kahrepe me weio keirkihdahki persent 2 ong sounkalohk nan pahr teio.

16. Soangen madamadau dah me brother mwahnakapw men nan Côte d’Ivoire kasalehda?

¹⁶ Nan Côte d’Ivoire, emen Kristian mwahnakapw pil kasalehda soangen madamadauohte oh e sansal ni e ntinglahng Branch Ohpis oh koasoia: “I wia emen Ministerial Servant. Ahpw, I sohte kak ndaiong riei brother oh sister teikan en wia doadoahk en pioneer ni pein ngehi sohte wia mehn kahlemeng mwahu nan irair wet. Eri, I kesehla ahi doadoahk pweilaud oh pein wiahda ahi doadoahk ehu, me kihong ie ahnsou laud ohng doadoahk en kalohk.” Mwahnakapw menet iangahla kisehn sounkalohk 983 me wia doadoahk en pioneer nan Côte d’Ivoire, wasakis me ripohtki sounkalohk 6,701 nan pahr teio, me wehwehki irail keirkihda persent 5.

17. Iaduwen emen Sounkadehde pwulopwul nan Belgium ah kasalehda me e sohte masak irail akan me kin liaktohrohr?

¹⁷ Nan Belgium, sou kanengamah, liaktohrohr, oh lipilipilki aramas wia kahpwal laud ong irail sounkalohki Wehio 24,961 wasao. Ahpw, irail pil nannantihte oh pwerisek oh sohte masepwehk. Ni ahnsou me emen Sounkadehde sounpahr 16 rongada (nan sukuhl​—⁠soangen mehn kasukuhl me adaneki ethics) me dene Sounkadehdehn Siohwa kan wia pwihn en kamwekid suwed ieu, oh e pekihda en kihda duwen kamwahupen palien Sounkadehdehn Siohwa kan. E kasalehda video cassette me oaralap koasoia: “Jehovah’s Witnesses​—The Organization Behind the Name” oh pil brochure Jehovah’s Witnesses​—Who Are They?, oh e kawehwehda ihs irail Sounkadehdehn Siohwa kan. Irail me rongorong kan inenen perenkihda, oh wihk en mwurio, tohnsukuhl kan ale test oh peidek kan koaros pid sarawi en Sounkadehdehn Siohwa kan.

18. Mehn kadehde dah me mie me kahpwal en mwohni sohte kin wekidala koasoandi en sounkalohk kan nan Argentina oh Mozambique ong ni arail wia doadoahk en papah Siohwa?

¹⁸ Pali laud en Kristian akan kin lelohng kahpwal laud akan ni imwin rahn akan. Ahpw, irail sohte kin mweidong arail madamadau en salongasang dahme kesempwal. Mendahki ah sansal me Argentina mihmi nan kahpwal laud en mwohni, wasao ripohtki me sounkalohk tohtohsang mahs oh lelehr Sounkadehde 26,709 nan pahr teio. Nan Mozambique, semwehmwe inenen rek. Ahpw, re ripohtki me aramas 37,563 kin iang kalohk, met wia keirada persent 4. Nan Albania, mour inenen apwal wasao, ahpw re ripohtki me sounkalohk keirkihda persent 12 oh irail lelehr sounkalohk 2,708. E sansal mwahu me sapwellimen Siohwa ngehn sarawi sohte kin luwetala ni ahnsoun apwal ni ahnsou me sapwellime ladu kan kin rapahki mahs sapwellime Wehio.​—Madiu 6:33.

19. (a) Dahme wia mehn kadehdehpen me miemiehte aramas tohto me rasehng sihpw akan me kin duhpengki arail men kang padahk mehlel en Paipel? (b) Dahme sansal nan ripoht en doadoahk en Sounkadehdehn Siohwa kan me kin kasalehda me sapwellimen Siohwa ladu kan kin wie pepehd ni pali ngehn? (Kilang ripoht me mihmi ni pali 20-23.)

¹⁹ Ripoht en pahr teio me kasalehda me nan ehuehu sounpwong, irail me onop Paipel nan sampah pwon lel aramas 5,309,289, oh met kin kasalehda me mihmiehte aramas me rasehng sihpw me kin duhpengki arail men kang padahk mehlel en Paipel. Nanpwungen aramas 15,597,746 me iang towehda Katamanpen Kamatalahn Krais nan pahr teio, pali laud en irail saikinte papah Siohwa. Irail en doula oh kekeirada nan arail limpoak oh loalokongkihla Siohwa oh pirien en riarail Kristian kan. E kaperen en kilang me “pokon kalaimwun” en “sihpw teikan” doulahte oh ahneki doadoahk pweida mwahu ni arail papah Sounkapikpatail “ni rahn oh ni pwohng nan sapwellime Tehnpas” ni arail kin patehng riarial me keidi kan.​—Kaudiahl 7:9, 15; Sohn 10:16.

Mehn Kasukuhl Sang Lohd

20. Dahme kitail kak sukuhliki sang karasepen Lohd oh ah pwoud?

²⁰ Pil irail ladu lelepek en Koht akan kak ekis ahnsou sohla tehk karuwaru en ahnsou. Medewehla nein rien Eipraam ohl Lohd. E esehsangehr rehn tohnleng riemen me kohdohng reh ko me Koht pahn kauwehla Sodom oh Komora ni ahnsou keren. Pakair wet sohte kak wia mehkot kapwuriamwei ieu ong Lohd pwehki “ah inenen pahtoukihla sapeik en aramas oko ni arail wiewia samin akan.” (2 Piter 2:7, NW) Ahpw, ni tohnleng riemeno pahn kahre ih sang nan Sodom, e “wie pwapwand.” Tohnleng ko kereniong urahdekihiei ih oh ah peneinei sang nan kahnimwo. Mwurin mwo, ahn Lohd pwoudo sapeikiong kaweid en tohnleng ko en dehr sohpeila mwuri. Ah soukautih kahrehong en mehla. (Senesis 19:14-​17, 26) Sises kaweidki: “Tamataman ahn Lohd ah pwoud.”​—Luk 17:32.

21. Dahme kahrehda e kesempwal ahnsou wet sang mahs aramas en wie pepehd?

²¹ Apwal laud me pwarada nan Pompeii oh Herculaneum oh pil mehkan me pid ohlahn Serusalem, oh pil dahme wiawi ni Nohlik nan mwehin Noha oh Lohd: mehpwukat koaros kasalehda kesempwalpen idawehn kaweid. Ni atail wia sapwellimen Siohwa ladu kan, kitail pohnesehier kilel en imwin rahn akan. (Madiu 24:3) Kitail katohre kitail sangehr kaudok likamw. (Kaudiahl 18:4) Kitail pil duwehte Kristian en keieun senturi, kitail anahne ‘tamataman me Rahn en Siohwa kerendohr.’ (2 Piter 3:12) Ei, ahnsou wet e kesempwal sang mahso me kitail uhdahn pahn wie pepehd! Soahng dah kan me kitail anahne wia, oh irair en mour dah kan me kitail anahne kakairada pwe kitail en wie pepehd? Artikel en mwuri pahn koasoia ire pwukat.

[Nting tikitik me mi pahs]

Ia Mwomwen Omw Pahn Sapeng?

• Dahme elehiong Kristian en Suhs akan arail kak pitsang ohlahn Serusalem?

• Iaduwen kaweid nan sapwellimen Piter oh Pohl nting sarawi kan ar sewese kitail en wie pepehd?

• Ihs irail akan nan rahnwet me kin kasalehda mehn kadehdehpen arail wie pepehd?

• Mehn kasukuhl dah me kitail alehsang wiewiahn Lohd oh ah pwoud?

[Chart on page 20-23]

RIPOHT EN DOADOAHK EN SOUNKADEHDEHN SI 2002

(See bound volume)

[Kilel nan Pali 17]

Nan 66 C.E., pwihn en Kristian kan me mihmi nan Serusalem kapwaiada kehkehlik en Sises

[Kilels nan Pali 18]

Nantihong wiewia doadoahk kin sewese Kristian akan en wie pepehd