“Kapwaiada Ahmw Pwukoa Koaros Ni Ahmw Kin Wia Doadoahk En Kalohk”
“Wia uwen ahmw kak koaros nan doadoahk en kalohk.”—2 TIMOTY 4:5, Byington.
1, 2. Edetehn Kristian akan koaros kin wiahla sounkalohk kan, dahme Pwuhk Sarawi mahsanih me irail elder kan anahne wia?
KE KIN wia emen sounkalohk en Wehio? Ma iei, kalahngankihong Siohwa Koht pwais kaselel wet. Ke kin wia emen elder nan mwomwohdiso? Met pil ehu pwais kaselel sang rehn Siohwa. Ahpw, kitail en dehr manokehla me sukuhl laud de koahiek en padahk sohte kin wehwehki me kahrehong kitail en warohng wia doadoahk en kalohk de apwalih mwohmwohdiso. Siohwa kin ketikihong kitail koahiek en wia doadoahk en kalohk, oh pil kahrepen ekei ohl akan nanpwungatail kin alehdi pwais kesempwal en papah nin duwen sounapwalih kan kin kohsang arail kapwaiada koasoandi en Koht nan Paipel me pid sounapwalih kan.—2 Korint 3:5, 6; 1 Timoty 3:1-7.
2 Kristian akan koaros me inoukihong Koht arail mour kin wia doadoahk nin duwen sounkalohk, ahpw keieu irail sounapwalih kan, de elder kan, anahne en wia mehn kahlemeng mwahu nan doadoahk en kalohk wet. Koht oh Krais oh Sounkadehdehn Siohwa kan kin pohnese duwen irail elder kan “me doadoahk laudki arail kin koasoakoasoi oh padapadahk kan.” (1 Timoty 5:17; Episos 5:23; Ipru 6:10-12) Sohte lipilipil soangen irair dah kei pahn wiawi, padahk kan en elder anahne utungada padahk mehlel me kin kakairada pali roson en pali ngehn en aramas akan me kin rongorong ih, pwe wahnpoaron Pohl padahkiong Timoty me kin wia sounapwalih men: “Pwe ahnsou ehu pahn leledo me aramas akan sohla pahn men rong padahk mehlel, ahpw re pahn idawehnla pein nsenarail; oh re pahn piladahng pein irail sounpadahk tohto me pahn kin koasoiaiong irail soahng kan me re kin men rong. Re pahn sohpeiweisang ni ar rongorong me mehlelo, oh mweidohng ar ahnsou poadopoad mwahl akan. Ahpw kowe, ke uhdahn pahn kakaun pein uhk ahnsou koaros oh wasa koaros; kanengamahiong kamakam, oh wia omw pwais en sounkadehde en Rongamwahu, oh pil kapwaiada omw pwukoa koaros nin duwen me konehng ladun Koht men.”—2 Timoty 4:3-5.
3. Dahme anahne en wiawi pwe padahk likamw akan sohte pahn kaluwetala tohnmwomwohdiso kan?
3 Pwehn tehk mwahu me padahk likamw akan sohte pahn kauwehla pali ngehn en tohnmwomwohdiso kan, elder kan anahne kapwaiada kaweid en Pohl: “Ke uhdahn pahn kakaun pein uhk ahnsou koaros oh wasa koaros, . . . oh wia uwen ahmw kak koaros nan doadoahk en kalohk.” (2 Timoty 4:5, Byington) Ei, elder men anahne en ‘wia uwen ah kak koaros nan doadoahk en kalohk.’ Met wehwehki me e anahne kapwaiada ah pwukoa kan koaros ni unsek. Elder men me kin wia uwen ah kak koaros nan doadoahk en kalohk kin kapwaiada ah pwukoa koaros, oh e sohte pahn pohnsehsehla ah pwukoa kan de wia ekei ah pwukoa kan oh sohte wia ekei. Ma e kin wia ah pwukoa koaros, soangen ohl pwukat kin loalopwoat ni mehkot tikitik.—Luk 12:48; 16:10.
4. Dahme pahn kak sewese kitail en kapwaiada atail doadoahk en kalohk ni unsek?
4 Ni atail kin kapwaiada atail pwukoa en kalohk ni unsek, e sohte kin wehwehki me ahnsou koaros kitail anahne ahneki ahnsou laud pwen wia doadoahk wet, ahpw e kin wehwehki me kitail anahne doadoahngki atail ahnsou ni ahl me pwung oh loalokong. Wiahda koasoandi toupahrek oh kaukaule wia doadoahk wet pahn kak sewese Kristian akan koaros en kapwaiada arail pwukoa en kalohk. Emen elder kak kalaudehla eh ahnsoun kalohk, ma e pahn koasonehdi mwahu ah ahnsou kan pwehn tohpahrek oh esehla mehnia doadoahk kan de pwukoa kan me e pahn kak kihong mehteikan en wia oh esehla duwen wiepen ah kin wia met. (Ipru 13:17) Elder wahunla men kin nantiong pein wia ah pwukoa, oh e kin duwehte Nehmaia, pwe pein ih pil kin iang onehda sapahl kehlen Serusalem kan. (Nehmaia 5:16) Sapwellimen Siohwa sounpapah kan koaros anahne kaukaule iang doadoahk en kalohki Wehio.—1 Korint 9:16-18.
5. Madamadau dahieu kitail anahne en ahneki duwen doadoahk en kalohk?
5 Nin duwen sounkalohk kan en Wehio me koukoudaher nanleng, kitail kin ahneki pwukoa kaperen ieu! Ni mehlel kitail kin kesempwaliki atail pwais en iang lohkiseli Rongamwahuo wasa koaros mwohn imwin sampah. (Madiu 24:14) Edetehn kitail aramas soh unsek, kitail kak ale kangoang sang mahsen en Pohl: “Ahpw kiht me kin ahneki pai kesempwal wet, se rasehng sah pwehl kan me kopwukopw oh kehohla; eri met pwe en kadehdehda duwen manaman lapalap eh uhdahn sapwellimen Koht, a kaidehk aht.” (2 Korint 4:7) Ei, atail doadoahk kak pwunglahr mwohn Koht—ahpw, ihte ma Koht pahn ketikihong kitail kehl oh erpit.—1 Korint 1:26-31.
Wia Sansal en Lingan en Koht
6. Wekpeseng dahieu wiawihda napwungen Israel en pali uduk oh Israel en ngehn?
6 Pohl kin koasoiahki Kristian me keidi kan ni ahnsou me e koasoiahda me Koht “ketin kupwurehda se en kak koahiengki papah sapwellime inou kapw.” Wahnpoarono kin kawehwehda duwen inou kapwo me wiawihda rehn Koht oh Israel en ngehn ki Sises Krais me wekpeseng Kosonned meringo me wiawihda rehn Koht oh Israel ni pali uduk ki Moses. Pohl pil kawehwehda ni ahnsou me Moses kohdi sang Nahna Sainai wa pelien takai en Kosonned Eiseko, meseo eh lingaling kahrehda mehn Israel akan sohte kak kilangki meseo. Ahpw, ni ahnsou dower powe, arail “lamalam keptakaila” oh koaduhpwelo kin pereperehte moangarail kan. Ni ahnsou me aramas kin ni lelepek unsek sohpeiong Siohwa, ih ahnsou me koaduhlpwelo kin kohsang. Pohl mahsanih duwen doadoahk me kohwong irail akan me iang kosonned kapwo: “Eri, kitail koaros wia sansal en lingan en Siohwa ni sohte perehpen masatail kan; oh linganohte me kin kohsang rehn Siohwa.” (2 Korint 3:6-8, 14-18; Eksodus 34:29-35) Sapwellimen Sises “sihpw teikan” en rahnwet kin pil ahneki pwais en wia sansal en lingan en Siohwa.—Sohn 10:16.
7. Iaduwen aramas akan kak wia sansal en lingan en Koht?
7 Iaduwen aramas dipan akan kak wia sansal en lingan en Koht, pwe sohte emen aramas kak kilangki silangin Koht oh momour? (Eksodus 33:20) Kitail pil anahne en wehwehkihla me likin sapwellimen Siohwa lingan, pil mie sapwellime kupwur kaselel duwen kalinganahda sapwellime kaunda ki Wehio. Padahk mehlel akan me kin pid Wehio kin kisehn “soahngen manaman kapwuriamwei kan me Koht ketin wiadahr” me tepida lohkiseli sang rehn irail akan me alehdi ngehn sarawi nan Pendekos 33 C.E. (Wiewia 2:11) Ki sawas sang rehn ngehn sarawi, irail kak kapwaiada arail doadoahk en kalohk ni unsek.—Wiewia 1:8.
8. Dahme Pohl kin nantiong en wia me kin pid doadoahk en kalohk?
8 Pohl kin nantihong en dehr mweidong mehkot en kerempwa ih sang ni ah kin song en kapwaiada doadoahk en kalohk. E ntingihdi: “Nan sapwellimen Koht kalahngan lapalap e ketikiong kiht kohwa doadoahk wet; ihme se sohte kin pwangahkihda. Se kin soikeweisang reht soangen tiahk rir oh kanamenek koaros; se sohte kin widinge aramas akan, se pil sohte kin wekidala mahsen en Koht. Se kin momour nan marain unsek en me mehlel mwohn silangin Koht oh kin song kahdamwahuwihkitala rehn aramas koaros me kupwuramwahu.” (2 Korint 4:1, 2) Pohl kin koasoiahki “kohwa doadoahk wet,” oh doadoahk wet kin kapahrengkiseli wasa koaros padahk mehlel oh marain en pali ngehn.
9, 10. Iaduwen kitail kak wia sansal en lingan en Koht?
9 Pohl kin ntingihdi duwen Utupen marain oh marain en pali ngehn: “Pwe Koht me mahsanih, “Marain en pwarada sang nan rotorot,” iei ih Kohtohte me ketin kamakamarainih nan kapehditail kan, pwe kitail en kak marainkihla lingaling en Koht, me dakedaker silangin Krais.” (2 Korint 4:6; Senesis 1:2-5) Pwehki kitail kin alehdi pwais kaselel ieu en wiahla sapwellimen Koht sounpapah kan, kitail en nantiong mwakelekel pwe kitail kak duwehte kilas kan me kin wia sansal en lingan en Siohwa.
10 Aramas akan me kin mihla nan rotorot ni pali ngehn sohte kak kilangki sapwellimen Koht lingan de kilangki Sises Krais iei Moses Lapalap, ni ah kin wia sansal en lingan en Siohwa. Ahpw nin duwen sapwellimen Siohwa ladu kan, kitail kak alehdi marain lingano sang Pwuhk Sarawi oh kaselehiong aramas teikan. Ma irail akan me kin mihla nan rotorot ni pali ngehn men pitsang kamakamo, irail anahne marain me kin kohsang rehn Koht. Ki peren laud oh ngoang, kitail kin peikiong kosonned me kohsang rehn Koht en mweidong marain en pwarada sang nan rotorot.
Mweidong Ahmw Marain en Sansal Mwohn Irail me Ke Kin Onop Paipel Reh
11. Dahme Sises mahsanih duwen atail marain en sansal mwohn aramas teikan, oh ia ehu ahl me kitail pahn kak wia met nan atail doadoahk en kalohk?
11 Sises padahkiong sapwellime kan: “Kumwail me kamarainpen sampah. Kahnihmw ehu me mi pohn dohl ehu sohte kak rirla. Aramas pil sohte kin isikada lamp oh kihdiong pahn kohpwa, pwe pohn dewe pwe en kamarainihada koaros me mi nan ihmwo. Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” (Madiu 5:14-16) Atail tiahk mwakelekel kan kin kak kahrehong aramas teikan en kapinga Koht. (1 Piter 2:12) Soangsoangen wiepen doadoahk en kalohk kin kihong kitail ahl tohto en mweidong atail marain en sansal mwohn aramas akan. Ehu mehn akadei keieu kesempwal iei en mweidong marain en pali ngehn sang Mahsen en Koht en sansalda sang ni atail kin wia onop Pwuhk Sarawi rehn aramas akan ni ahl me pahn pweida mwahu. Met iei ahl kesempwal en kapwaiada atail doadoahk en kalohk ni unsek. Mehnia kaweid kan pahn kak sewese kitail en onop Pwuhk Sarawi rehn aramas akan ni ahl me pahn sair mohngiong en aramas akan me kin rapahki padahk mehlel?
12. Iaduwen kapakap kin pid doadoahk en wia onop en Pwuhk Sarawi rehn aramas akan?
12 Kapakap ong Siohwa kin kasansalehda uwen laud atail ineng en men wia onop en Pwuhk Sarawi rehn aramas teikan. Met pil kin kasansalehda me kitail kin kesempwaliki sewese aramas teikan en alehda loalokong me pid duwen Koht. (Esekiel 33:7-9) Siohwa uhdahn pahn sapengki atail kapakap kan oh kapaiada atail kin nannanti iang doadoahk wet. (1 Sohn 5:14, 15) Ahpw kitail sohte kin ihte kapakapki diarada aramas emen pwehn onop Pwuhk Sarawi reh. Pwe mwurin kitail kin tepida onop Pwuhk Sarawi rehn aramas emen, kitail kin kapakapki oh doudouloale anahn akan en emen me kitail onop Pwuhk Sarawi, pwe met pahn sewese kitail en wia onop me pahn pweida mwahu.—Rom 12:12.
13. Dahme pahn kak sewese kitail en wia onop en Pwuhk Sarawi rehn aramas akan me kin pweida mwahu?
13 Pwen wia onop en Pwuhk Sarawi rehn aramas akan me pahn pweida mwahu, kitail anahne kaunopada mwahu ong ehu ehu onop. Ma kitail lemeleme me kitail sohte koahiek en wia onop en Pwuhk Sarawi rehn aramas akan, e pahn mwahu kitail en kilang iaduwen sounapwalih en Pwuhk Study en Mwomwohdiso kin wia onopo ni ehu ehu wihk. Ekei ahnsou, kitail kak iang sounkalohk en Wehi kan me kin pweida mwahu ni ahr kin wia onop en Pwuhk Sarawi rehn aramas teikan. Ni mehlel, kitail anahne en kahlemengih madamadau oh wiepen padahk kan en Sises Krais.
14. Iaduwen kitail kak sair mohngiong en aramas emen me kitail kin onop Pwuhk Sarawi?
14 Sises kin perenki wia kupwuren Seme me kin ketiket nanleng oh e kin pil perenki koasoiong aramas teikan duwen Koht. (Melkahka 40:8) E kin opampap oh pweida mwahu ni ah kin sair mohngiong en aramas akan me kin rongorong eh padahk kan. (Madiu 11:28-30) Eri, kitail en nantiong lel mohngiong en aramas akan me kitail kin onop Pwuhk Sarawi. Ma kitail men wia met, kitail anahne kaunopada ong ehu ehu onop oh medemedewe duwen irair akan en aramaso me kitail kin onop ong. Karasepe, ma e kin tikada nan wasa ieu me aramas akan sohte kin wehwehki de kamehlele Pwuhk Sarawi, ele mwein kitail anahne en nantiong kawehweh mwahu ong ih me Pwuhk Sarawi iei pwuhk mehlel ieu. Ma ih duwen, kitail anahne wadek oh kawehwe iren Pwuhk Sarawi tohto.
Sewese Tohnsukuhl en Pwuhk Sarawi kan en Wehwehkihla Karasaras kan
15, 16. (a) Iaduwen kitail kak sewese emen tohnsukuhl en Pwuhk Sarawi ni ahnsou me e sohte kin wehwehki ehu karasaras me pwarada nan Pwuhk Sarawi? (b) Dahme kitail kak wia ma ehu pwuhk sang rehtail kin doadoahngki ehu karasaras me nohn apwal ong emen tohnsukuhl en Pwuhk Sarawi en wehwehki?
15 Mwein emen tohnsukuhl en Pwuhk Sarawi sohte pahn wehwehki duwen karasaras ehu me mih nan Pwuhk Sarawi. Karasepe, mwein e sohte kin wehwehki ahn Sises karasaras ni ah mahsanih en kihda lamp pohn dewe. (Mark 4:21, 22) Wasaht, Sises mahsanih duwen soangen lamp en mahs me kin doadoahngki oil oh wick. Lamp pwukat kin kohdahng nan dewen lamp tohrohr ehu pwe ihmwo pohn pahn marainla. Ma kitail pahn onop mwahu duwen oralap pwukat “Lamp” oh “Dewen Lamp” nan pwuhken Insight on the Scriptures, kitail kak kawehwehda mwahu karasaras me Sises wiahda.a Ahpw ia uwen kansenamwahu en kaunopada mwahu ohng Paipel study oh kilang me e kin wehwehkihla oh kalahnganki karasaraso!
16 Mwein ong emen tohnsukuhl en Pwuhk Sarawi e pahn apwaliki wehwehki duwen ehu karasaras me sawaspen Pwuhk Sarawi ehu kin kihda. Eri, kitail pahn isaneki ahnsou laud en kawehwe mwahu, de pil kak doadoahngki karasaras tohrohr ieu me kin kawehwehda duwen oaralap ohte. Mwein sawaspen Pwuhk Sarawi ehu kin kasansalehda duwen pahrekpene oh miniminpene nanpwungen ohl pwopwoud oh lih pwopwoud me kesempwal ma pwopwoudo pahn pweida. Karasepe wet kin wiawihda nan pwuhko, ohl sounsirkis emen me kin likas, oh ni ahnsou me e kin kadar sahlo, e kin liki sounsirkas teio en koledi ih. Ahpw pwen sansal ong tohnsukuhlo, mwein kitail anahne wiahda pil ehu karasaras pwen kasansalehda duwen kesempwalpen diarada werek mwahu men me kin miniminpene. Kak doadoangki karasaras duwen ni ahnsou me tohndoadoahk kan kin kihsang koakon kan sang nan pwoat, irail kin miniminpene oh sawaspene ni ahr kin wihda lain oh passeli koakon kan.
17. Dahme kitail kak sukuhliki sang Sises duwen karasaras kan?
17 Doadoahngki pil ehu karasaras likin karasaras me ntingihdi nan Paipel oh sawaspen Paipel kan kin wehwehki me kitail anahne en kaunopada mwowe. Ahpw, sang ni atail kin wia met, pahn kasalehda me kitail kin pein nsenohki tohnsukuhl en Paipel menet. Sises kin doadoahngki karasaras mengei kan pwen kawehwehda duwen oaralap apwal akan. Mie karasaras mengei kan me kin wiawiahda nan eh Padahk Pohn Dohlo, oh Pwuhk Sarawi kin kasalehda me sounrongorong kan kin mwekidiki sapwellime padahk kan. (Madiu 5:1–7:29) Pwehki Sises kin nsenohki aramas akan, e kin ni kanengamah kawehwehda mwahu sapwellime padahk kan.—Madiu 16:5-12.
18. Kaweid dahieu kohda me kin pid eden Pwuhk Sarawi kan oh irelaud kan me kin ntingihdi nan neitail pwuhk kan?
18 Atail kin nsenohki aramas teikan pahn kamwekid kitail en ‘kawehwehiong irail oh kadekadehde sang nan Pwuhk Sarawi.’ (Wiewia 17:2, 3) Kitail anahne wia atail onop Pwuhk Sarawi ki kapakap oh doadoahngki sawaspen Pwuhk Sarawi kan me pwihn en “ladu oh lelepek” kin wiahda ong kitail. (Luk 12:42-44) Karasepe ieu, audepen iren Pwuhk Sarawi tohto kin ntingdi nan pwuhken Loalokong me Kin Kahluwalahng Mour Soutuk.b Ahpw, pwehki pwuhk wet tikitik, audepen iren Pwuhk Sarawi kan koaros sohte kak ntingdi loale, pwehki met, e kileledi eden pwuhko oh irelaud oh iretikitik kan. Nan onop en Pwuhk Sarawi, e kesempwal kitail en wadek oh kawehwehda ekei iren Pwuhk Sarawi kan me kileledihte nan pwuhko. Pwe, ni mehlel, atail padahk kan kin poahsonda pohn Mahsen en Koht, oh e manaman. (Ipru 4:12) Doadoahngki Pwuhk Sarawi ni ehu ehu onop, koasoaiapene iren Pwuhk Sarawi kan me dierekda nan parakrap kan. Sewese tohnsukuhl en Pwuhk Sarawi men en kilang dahme Pwuhk Sarawi mahsanih duwen oaralap ehu de wiewia ehu. Nantiong en kasalehiong ih duwen kapai kan me e pahn paiekihda sang ni ah kin peikiong Koht.—Aiseia 48:17, 18.
Wia Peidek kan Me Kin Sewese Aramas akan en Medemedewe
19, 20. (a) Dahme kahrehda kitail anahne doadoahngki soangen peidek kan me pahn kahrehong atail Paipel study kan en kasalehda ah pepehm kan? (b) Dahme kitail kak wia ma tohnsukuhlo anahne pil ekis sawas duwen oaralap ieu me kitail kin koasoiapene?
19 Sises kin doadoahngki peidek kan ni ahl koahiek, oh met kin sewese aramas akan en medemedewe. (Madiu 17:24-27) Ma kitail kin doadoahngki soangen peidek kan me kin kahrehong tohnsukuhl en Pwuhk Sarawi en kasalehda ah madamadau kan oh sohte kin kasarohdi ih, dahme e pahn sapengkin kitail, pahn kak kasalehda ah madamadau kan duwen ehu oaralap. Mwein kitail pahn diarada me e kin kolokolte madamadau kan me sohte kin kohsang Pwuhk Sarawi. Karasepe ieu, mwein e kin kamehlele padahk en Trinity. Nan pwuhken Loalokong nan irelaud 3 e kin kasalehda me lepin lokaia wet “Trinity” sohte kin pwarada nan Pwuhk Sarawi. Pwuhko kin ntingihdi audepen iren Pwuhk Sarawi kan oh kileledi eden pwuhk oh irelaud kan en Pwuhk Sarawi me kin kasalehda me Siohwa kin tohrohr sang Sises oh ngehn sarawi iei sapwellimen Koht manaman, kaidehn emen. Wadawad oh koasoiapene duwen iren Pwuhk Sarawi pwukat mwein pahn itar ong kasalehda dahme pwung. Ahpw dahme kitail kak wia ma e sohte pahn itarki met? Mwein mwurin ke pahn onop reh, ke kak isaneki ahnsou en koasoiapene duwen oaralap wet oh kak doadoahngki pil ehu pwuhk me Sounkadehdehn Siohwa kan me wiahda, me oaralap koasoia Should You Believe in the Trinity? Mwurin ke pahn wia met, ke kak pwurehng doadoahngki pwuhk en Loalokong.
20 Ahpw, dahme kitail pahn wia ma emen tohnsukuhl en Pwuhk Sarawi pahn sapengki peidek me kitail wia ni ahl kapwuriamwei ehu de ni ahl ehu me pahn kansensuwediahla kitail. Ma oaralap kin pid duwen simoak, de pil ehu oaralap apwal en koasoaiapene ni ahnsowo, kitail kak nda me kitail pahn kak pousehla onopo oh koasoiapene duwen oaralap wet mwuhr. Oh pwehki kitail eseier me tohnsukuhl en Pwuhk Sarawi menet saikinte kesehla simoak, kitail pahn kak doadoahngki sawaspen Paipel kan me pahn kak sewese ih en kekeirada ni pali ngehn. Ni atail kin nantiong sair mongiong en tohnsukuhlo, kitail kak kapakapki sapwellimen Siohwa sawas en sewese tohnsukuhlo en kekeirada.
21. Dahme pahn kak wiawi ma kitail pahn kawekila wiepen padahk kan pwen kak sewese anahn akan en tohnsukuhl en Pwuhk Sarawi men?
21 Ma kitail pahn kaunopada mwahu oh sawas me kin kohsang rehn Siohwa, eri, kitail pahn kak kawekila wiepen padahk kan pwen kak sewese anahn akan en tohnsukuhl en Pwuhk Sarwai men. Ni ahnsou dower powe, kitail pahn kak sewese ih en kakehlahda eh limpoak ong Koht. Kitail pil kak pweida ni atail pahn kin song en sewese ih en kalaudehla ah wahu oh kalahngan ong sapwellimen Siohwa pwihn. Oh ia uwen kansenamwahu ong kitail ni ahnsou me atail tohnsukuhl en Pwuhk Sarawi kan pahn kamehlel oh nda, ‘Mehlelete pwe Koht ketiket rehmwail met’! (1 Korint 14:24, 25) Eri, kitail nantiong en onop Pwuhk Sarawi rehn aramas akan ni ahl me pahn pweida mwahu oh wie uwen me kitail kak en sewese aramas teikan en wiahla sapwellimen Sises tohnpadahk kan.
Kesempwaliki Pai Kesempwal Wet
22, 23. Dahme kitail anahne ma kitail men kapwaiada atail doadoahk en kalohk ni unsek?
22 Pwen kapwaiada atail doadoahk en kalohk ni unsek, kitail anahne en likih kehl me kin kohsang rehn Koht. Pohl kin ntingwohng ienge Kristian me keidi kan duwen doadoahk en kalohk: “Ahpw kiht me kin ahneki pai kesempwal wet, se rasehng sah pwehl kan me kopwukopw oh kehohla; eri met pwe en kadehdehda duwen manaman lapalap eh uhdahn sapwellimen Koht, a kaidehk aht.”—2 Korint 4:7.
23 Edetehn kitail kin kisehn pwihn en irail me keidi kan de pwihn en “sihpw teikan,” kitail koaros kin rasehng sah pwehl me kopwukopw oh kehohla. (Sohn 10:16) Ahpw, Siohwa kak ketikihong kitail kehl me anahn pwen sewese kitail en kapwaiada atail pwukoa kan edetehn kitail kin lelong kahpwal akan. (Sohn 16:13; Pilipai 4:13) Eri, kitail en ni unsek likih Siohwa, kesempwaliki atail pai kesempwal en kalohk, oh kapwaiada atail doadoahk en kalohk ni unsek.
[Nting tikitik me mi pahs]
a Wiawihda sang rehn Sounkadehdehn Siohwa kan.
b Wiawihda sang rehn Sounkadehdehn Siohwa kan.
Iaduwen Ke Pahn Sapeng?
• Dahme elder kan kak wia pwen kapwaiada arail doadoahk en kalohk ni unsek?
• Iaduwen kitail kak koahiekla wia onop Pwuhk Sarawi rehn aramas akan?
• Dahme ke pahn wia ma emen tohnsukuhl en Pwuhk Sarawi sohte wehwehki karasaras ieu de mwein e anahne sawas pwen wehwehki duwen oaralap ehu?
[Kilel nan Pali 24]
Kristian elder kan kin padahk nan mwomwohdiso oh irail kin kangoange oh kaiahne iengerail tohnkaudok kan nan doadoahk en kalohk
[Kilel nan Pali 26]
Wia onop en Pwuhk Sarawi rehn aramas akan ni ahl me pahn pweida mwahu iei ehu ahl en mweidong atail marain en sansal mwohn aramas akan