‘Kohwei Oh Katohnpadahk’

“Manaman koaros en nanleng oh sampah mweimweiongieier. Kumwail eri kohwei wasa koaros oh katohnpadahk.”​—MADIU 28:18, 19.

1, 2. (a) Pwukoa dahieu Sises kihong sapwellime tohnpadahk kan? (b) Peidek dah kan me pid kehkehlik en Sises kitail anahne tehk?

EHU rahn nan Israel ni pahr 33 C.E., sapwellimen Sises tohnpadahk kan kohpene ni nahna en Kalili. Arail Kaun, Sises me iasadahr, pahn kohdala nanleng, ahpw mwohn e pahn wia met e men kehkehlikiong irail mahsen kesempwal ehu. Mie pwukoah ehu me e pahn kihong irail. Ia pwukoa wet? Ia ahn tohnpadahk akan arail pepehm duwen met? Oh iaduwen pwukoa wet pid kitail nan rahnpwukat?

² Dahme Sises mahsanih kileledi nan Madiu 28:18-​20: “Manaman koaros en nanleng oh sampah mweimweiongieier. Kumwail eri kohwei wasa koaros oh katohnpadahk; papidaisihirailla ni mwaren Sahm oh Sapwellime oh ngehn sarawi, oh kehkehlingkihong irail re en peikiong mehkoaros me I koasoanediong kumwail. Eri, kumwail en ese pwe I pahn ieiang kumwail ahnsou rahn koaros lel ni imwin kawa.” Sises mahsanih duwen “manaman koaros,” “wehi koaros,” “mehkoaros,” oh “rahn koaros.” Ah kehkehlik kin pid atail pahn kapwaiada soahng pahieu pwukat me pil kihda peidek kei me kesempwal me iei “Dahme kahrehda?” “Iawasa?” “Dahme kitail pahn padahkihong aramas?” oh “Iahd?” Kitail tehk ehuehu peidek pwukat.a

“Manaman Koaros Mweimweiongieier”

3. Dahme kahrehda kitail anahne peikiong kehkehlik en katohnpadahk?

³ Keieu, dahme kahrehda kitail en kapwaiada kehkehlik en katohnpadahk? Sises mahsanih: “Manaman koaros en nanleng oh sampah mweimweiongieier. Kumwail eri kohwei wasa koaros oh katohnpadahk.” Lepin lokaia “eri” kasalehda laud kahrepen atail anahne kapwaiada kosonned wet. Kitail anahne wia met pwehki Sises, me wiahda kehkehlik wet, ahneki “manaman koaros.” Ia uwen laud manaman wet?

4. (a) Ia uwen laud manaman en Sises? (b) Iaduwen atail wehwehki duwen sapwellimen Sises manaman pahn kamwekid kitail en peikiong kehkehlik en katohnpadahk?

⁴ Sises sapwellimaniki manaman en kaunda mwomwohdiso, oh tepisang pahr 1914 e pil sapwellimaniki manaman pohn sapwellimen Koht Wehio me kokouda nanleng. (Kolose 1:13; Kaudiahl 11:15) Sises me kin wia tohnleng me keieu lapalap me adaneki “archangel” oh e kin kaunda sapwellime karis nanleng me wiawihkihda tohnleng rar kei. (1 Deselonika 4:16; 1 Piter 3:22; Kaudiahl 19:14-​16) E alehdi manaman sang rehn Seme pwen kasorehla “wehi kan koaros oh kaunda koaros iangahki manaman koaros” me kin uhwong a koasoandi pwung kan. (1 Korint 15:24-​26; Episos 1:20-​23) Ahn Sises manaman kaidehn ihte ong me momour. E pil wia “sounkopwung en me memour oh me mehla kan” oh pil sapwellimaniki manaman en kaiasada irail me mehlahr akan. (Wiewia 10:42; Sohn 5:26-​28) Pwehki kitail wehwehki me Siohwa ketikihong Sises manaman laud, met pahn kamwekid kitail en peikiong kehkehlik kan me Sises kin ketikihda. Eri, kitail ni wahu oh nseneki kapwaiada kehkehlik en Krais en ‘kohwei oh katohnpadahk.’

5. (a) Iaduwen Piter peikiong sapwellimen Sises mahsen? (b) Ni en Piter peikiong sapwellimen Sises kehkehlik kahrehong ih en alehdi soangen kapai dahieu?

⁵ Ni tepidahn sapwellimen Sises doadoahk en kalohk nin sampah wet, e kasukuhlih sapwellime tohnpadahk kan ni ahl ehu me inenen kapwuriamwei, e kasalehong irail me ma aramas akan pahn wehwehki duwen sapwellime manaman oh peikiong sapwellime kosonned akan, met pahn imwikihla kapai kan. Ehu ahnsou, e padahkiong Piter, me wia emen sounlaid: “Kumwail kaieilahng mahs kisin pwohto wasa loal, pwe kumwail en sehngkipeseng amwail uhk kan.” Piter wehwehki me wasa sohte mwahmw, kahrehda e ndaiong Sises: “Maing, se laidier pwohng wasa lao rahnpeseng, ahpw sohte seikat.” Ah Piter ni aktikitik mahsanih: “Eri, soh, ni mwaromwien me se pahn kihdihki at uhk kat.” Mwurin Piter a kapwaiada kaweid en Krais, e koledi “kiden mwahmw.” Piter ahpw masepwehkada “poaridihsang Sises, patohwanohng, ‘Maing, komw ketiweisang ie, pwe ngehi aramas dipan emen.’ ” Ahpw Sises mahsanihong Piter, “Ke dehr masak, pwe sang met kohla ke pahn kin laidih aramas.” (Luk 5:1-10; Madiu 4:18) Dahme kitail sukuhliki sang met?

6. (a) Dahme kitail sukuhliki duwen soangen peik dahieu Sises mwahuki ni ahnsou me kitail kin wadek duwen manaman me Sises wiahda ni arail koledi mwahmw tohto? (b) Iaduwen kitail kak kahlemengih Sises?

⁶ Sises kihong Piter, Andrew, oh tohnpadahk teikan pwukoa en “wiahla sounlaidi aramas,” kaidehn mwowe ahpw mwurin arail koledi mwahmw tohto. (Mark 1:16, 17) E sansal me Sises sohte lemeleme me aramas pahn peikiong ni arail sohte ese kahrepe. E kihong kahrepe mwahu me kamwekid irail ong ia kahrepe irail anahne en peikiong ih. Duwehte arail peikiong Sises en kesehla neirail uhk oh kahrehong irail koledi mwahmw tohto, e pil duwehte ni atail pahn peikiong sapwellimen Sises kehkehliko en ‘laidih aramas’ pahn imwikihla kapai laud kan. Ni pwoson, wahnpoaron ko peikiong. Iet imwin dahme wiawio: “Re ahpw nihdadahng wararail pwoht ko nansapw, oh pwilikihdi arail dipwisou kan koaros oh iangala Sises.” (Luk 5:11) Rahnwet, ni atail kangoange meteikan en iang wia doadoahk en katohnpadahk, kitail en kahlemengih Sises. Kitail sohte ihte men aramas en rong oh wia dahme kitail ndaiong irail en wia, ahpw kitail en kihong irail kahrepe me irail anahne en peikiong Sises, kahrepe kan me pahn sair arail mohngiong oh kamwekid irail en men kapwaiada kehkehlik wet.

Kahrepe Mwahu kan oh Irair Pwung oh Konehng

7, 8. (a) Ia ekei kahrepe sang Pwuhk Sarawi me kin kak kamwekid kitail en iang wia doadoahk en kalohk oh katohnpadahk? (b) Mehnia iren Paipel kin kamwekid uhk en wia uwen me ke kak nan doadoahk en kalohk? (Pil kilang footnote.)

⁷ Pwehki kitail pohnese manaman en Krais, kitail anehki pwukoa en kalohki duwen Wehio oh wia doadoahk en katohnpadahk. Ia ekei kahrepe kan sang Pwuhk Sarawi me kitail men ehukihong irail kan me kitail men kamwekid en iang wia doadoahk kesempwal wet? Nna, medemedewe mwahu dahme kamwekid ekei Sounkadehde lelepek sang sahpw teikan kasalehda, oh tehk iaduwen iren Pwuhk Sarawi me kileledi pah kin utung arail pasapeng kan.

⁸ Roy, me papidaisla nan pahr 1951: “Ni ahi inoukihong ai mour ong Siohwa, I inoukihda me I pahn ahnsou koaros papah Ih. I men kolokolete ahi inou.” (Melkahka 50:14; Madiu 5:37) Heather, me papidaisla nan pahr 1962: “Ni ai kin uhdi oh medemedewe soahng mwahu koaros me Siohwa wiaiong ie, I men kasalehda ai kalahngan ni ai pahn papah Ih.” (Melkahka 9:1, 9-​11; Kolose 3:15) Hannelore, me papidaisla nan pahr 1954: “Ehu ehu ahnsou kitail kin iang oh utungada doadoahk en kalohk, tohnleng kan kin ieiang kitail​—soangen kapai laud ehu met!” (Wiewia 10:30-​33; Kaudiahl 14:6, 7) Honor, me papidaisla nan pahr 1969: “Ni ahnsoun kadeik en Siohwa pahn leledo, I sohte men emen mehn mpei en nda me Siohwa oh sapwellime pwihn sohte nsenohki kaireki duwen dahme pahn wiawi!’ ” (Esekiel 2:5; 3:17-​19; Rom 10:16, 18) Claudio, me papidaisla nan pahr 1974: “Ni atail kin kalohk, ‘Koht kin mahsanih dahme kitail wiewia’ oh ‘Krais pil ieiang kitail.’ Nna, medewehla mahs soangen kapai wet! Oh ni atail kalohk, kitail perenki iang riatail kan me kitail uhdahn karanih.”​—2 Korint 2:17.b

9. (a) Iaduwen dahme wiawi ni ahnsou me re koledi mwahmw tohto kin kasalehda duwen kahrepe konehng en peikiong Krais? (b) Ia kahrepe konehng en peikiong Koht oh Krais rahnwet, oh dahme kahrehda?

⁹ Dahme wiawi ni ahnsou me re koledi mwahmw tohto pil kasalehda kesempwalpen atail pahn anahne ahneki kahrepe konehng en peikiong Krais me iei limpoak. Ni ahnsou me Piter nda, “Komw ketiweisang ie, pwe ngehi aramas dipan emen,” Sises sohte kohkohla sang de pil kailongkihla Piter pwehki sapwungalao. (Luk 5:8) Sises pil sohte kauwe Piter ni a ngidingidki en kohkohla sang. Ahpw, ni kadek Sises sapeng: “Dehr masak.” Masak sohte pahn wia kahrepe mwahu en peikiong Krais. Sises eri padahkiong ih me ih oh ienge kan pahn wia sounlaid en aramas akan. Rahnwet, kitail en dehr kakairada soangen masak sapwung wet pwehki atail pepehm kan, de kitail namenek sapwung, pwehn idingkihong meteikan en peikiong Krais. Ihte mour unsek oh mohngiong unsek me poasoanda pohn limpoak ong Koht oh Krais me kin kaperenda mohngiong en Siohwa.​—Madiu 22:37.

“Wia Katohnpadahk ong Aramas en Wehi Koaros”

10. (a) Dahme pid kehkehlik en Sises en katohnpadahk me pahn wia doadoahk laud ong sapwellime tohnpadahk kan en kapwaiada? (b) Iaduwen sapwellimen Sises tohnpadahk kan mwekidki kehkehlik en Sises?

¹⁰ Keriaun peidek me pil pwarada me doke kehkehlik en Krais iei met: Iawasa doadoahk en katohnpadahk pahn wiawi ie? Sises padahkiong sapwellime tohnpadahk ko: “Wia doadoahk en katohnpadahkih aramas en wehi koaros.” Mwohn Sises tepida wia doadoahk en kalohk, aramas koaros kin ale luhk en kohdohng Israel pwehn papah Siohwa. (1 Nanmwarki 8:41-​43) Pein Sises kin kalohk ong mehn Suhs tohto, ahpw met e padahkiong sapwellime tohnpadahk kan en kohla nan wehi koaros. Ni mehlel, wasahn laid de wasahn kalohk nin tepio kin kohwongete mehn Suhs akan, ahpw mwuri irail eri kak uhd laidih aramas de kalohk nan wasa teikan koaros me aramas mie. Mendahki wekidekla laud met kin wia doadoahk laud ong irail en kapwaiada, irail tohnpadahk kan onopada en peik ong kehkehlik en Sises. Sohte lel sounpar 30 mwuri, wahnpoaron Pohl kak ntingihdi me Rongamwaho lel kaidehn ongete mehn Suhs akan ahpw ong “soahng kapikipikda koaros pahn lahng.”​—Kolose 1:23.

11. Iaduwen ‘wasahn laid kan’ wie lalaudla nan tepin senturi 20?

¹¹ Pil nan atail ahnsou me keren, kalaudepen wasahn doadoahk en kalohk pil sansalda. Ni tepin senturi 20, wasahn kalohk de ni karasaras ‘wasahn laid kan’ wiawihte nan sahpw malaulaute. Ahpw, sapwellimen Krais tohnpadahk kan kahlemengih mehn kahlemeng mwahu en Kristian kan nan tepin senturi ong ngoangki en kalaudehla arail wasahn kalohk. (Rom 15:20) Ni tepin pahr 1930, irail wia doadoahk en katohnpadahk nan sahpw epwiki samwa. Rahnwet, atail ‘wasahn laid kan’ laudla lella sahpw 235.​—Mark 13:10.

“Sang Lokaia Koaros”

12. Doadoahk apwal dahieu me kokohp en Sekaraia 8:23 kasalehda me pahn wiawi?

¹² En wia katohnpadahk nan wehi koaros doadoahk apwal ehu kaidehn pwehki wasa laud oh tohto me kitail anahne kohla ie ahpw pil pwehki lokaiahn wasa kan. Ki soukohp Sekaraia, Siohwa kohpada: “Ni rahn pwuko mehn liki ehk pahn kohdo rehn mehn Suhs men oh nda, ‘Se pahn ianguhkala nan omw palien lamalam en, pwe se rong me Koht kin ketin ieiang uhk.’ ” (Sekaraia 8:23) Nan pweidahn kokohp wet, “ohlo me wia mehn Suhs” kin mwete luwen Kristian me keidi kan, oh “ohl ehko” kin mwete “pokon kalaimwun.”c (Kaudiahl 7:9, 10; Kalesia 6:16) Pokon kalaimwun wet en sapwellimen Krais tohnpadahk pahn diarek nan wehi tohto, oh duwehte Sekaraia kohpada, irail pahn lokaiahki lokaia tohto. Iaduwen​—⁠sapwellimen Koht aramas akan rahnwet kohsang wehi tohto oh irail kin lokaiahki lokaia tohto? Ei, met kin sansal rahnwet.

13. (a) Dahme wiawi nanpwungen sapwellimen Koht aramas akan rahnwet me pidada lokaia kan? (b) Dahme ladu lelepek oh loalokong wia pwehn sewese irail me anahne mwengehn ngehn ni soangsoangen lokaia kan? (Pil koasoia koakon me oaralap koasoia “Pwuhk kan ong me Maskun kan.”)

¹³ Nan pahr 1950, kerenieng Sounkadehdehn Siohwa meh 3 sang 5 nan sampah pwon kin wehwehki oh doadoahngki lokaiahn wai. Ahpw, nan pahr 1980, irair wet wekila oh irail meh 2 sang 5 kin wehwehki oh doadoahngki lokaiahn wai, oh rahnwet e pil ehu wekila oh met Sounkadehde 1 sang 5 kin wehwehki oh doadoahngki lokaiahn wai. Eri, dahme pwihn en “ladu lelepek oh loalokong” wia pwe pali laud en Sounkadehde kan rahnwet kin doadoahngki ehu lokaia me kaidehn lokaiahn wai? Irail eri tepida kihda mwengehn ngehn ni lokaia tohto laud sang mahs. (Madiu 24:45) Karasepe ehu, neitail pwuhk kan kawehwehdi ni lokaiahte 90, ahpw rahnwet neitail pwuhk kan kawehwehdi ni lokaia 400 samwa. Iaduwen​—⁠mie kamwahupen doadoahk en sewese aramas me kin lokaiahki lokaia kan likin lokaiahn wai oh wiahda pwuhk kan me audaudki mwengehn ngehn ni pein arail lokaia? Ei! Average en aramas 5,000 sang ‘lokaia koaros’ kin wiahla tohnpadahk en Krais ehu ehu wihk nan pahr koaros! (Kaudiahl 7:9) Oh tohtohlahn tohnpadahk en Krais kan wie lalaudla ahnsou koaros. Nan ekei sahpw kan, “uhk kan” kin koledi “mwahmw” tohto me wehwehki aramas tohto!​—Luk 5:6; Sohn 21:6.

Kapai kan me Kohsang Doadoahk en Kalohk —​Ke Kak Iang Kisehn Doadoahk wet?

14. Iaduwen kitail kak sewese irail nan atail wasahn kalohk me kin lokaiahki lokaia tohrohr? (Pil koasoia koakon me oaralap koasoia “Lokaiahki Peh kan oh Doadoahk en Katohnpadahk.”)

¹⁴ Nan sahpw tohto, anahn laud pwarada rahnwet pwehki aramas tohto uhd kousoanla nan sahpw akan likin pein sapwarail kahrehda kitail anahne katohnpadahki aramas pwukat me kin kohsang ‘lokaia koaros.’ (Kaudiahl l4:6) Iaduwen kitail kak sewese irail akan nan atail wasa me kin lokaiahki lokaia ehu weksang pein atail lokaia? (1 Timoty 2:4) Kitail anahne doadoahngki “dipwisou en laid” me konehng. Kihong irail sawaspen Pwuhk Sarawi kan ni pein arail lokaia. Ma kak, koasoanehdi rehn emen Sounkadehde me wehwehki ahn aramaso lokaia en kohla rehrail. (Wiewia 22:2) En wiahda koasoandi pwukat mengeilahr pwehki Sounkadehde tohto rahnwet sukuhliki lokaia ehu likin pein arail lokaia pwehn kak kalohk ong aramas pwukat oh sewese irail en wiahla sapwellimen Krais tohnpadahk kan. Ripoht kan kasalehda me sewese aramas ni ahl wet kin wia mehkot me kaperen.

15, 16. (a) Karasepe dah kan kasalehda me e kin kesempwal en sewese irail me kin lokaiahki lokaia tohrohr? (b) Peidek dah kan me pid duwen kalohk nan wasa doh kan me kitail kak medemedewe?

¹⁵ Menlau tehk karasepe riau me wiawi nan sapwen Netherlands, wasa me koasoandi mwahu en kalohk kin wiawi ni lokaia 34. Pwopwoud en Sounkadehde ehu toukihda ara ahnsou en wia doadoahk en katohnpadahk rehn mehn Poland kan me kin mihmi nan arail wasa. Arail kalohk ong aramas pwukat inenen pweida mwahu kahrehda ohl pwopwoudo men katikitikla ah awahn doadoahk en mwohni pwehn kak kalohk pil ehu rahn en onop Paipel rehn irail me kin perenki rong. Sohte pwand, pwopwoudo tepidahr onop Paipel rehn aramas 20 nan wihk koaros. Ira koasoia: “Aht doadoahk en kalohk kin wahdohng kiht peren laud.” Irail me kin wia doadoahk en katohnpadahk kin ahneki peren laud ni ahnsou me irail me kin rong padahk mehlel sang Paipel ni pein arail lokaia oh met kin kamwekid irail en kasalehda arail kalahngan. Karasepe ehu, ni ahnsou me mihding ehu wiawi ni lokaiahn Vietnam, emen ohl mah kesihnenda oh peki en koasoi. Pilen mese dirda oh e ndaiong Sounkadehde kan me iang mihdingo: “Kalahnganki doadoahk laud me kumwail wia pwehn sukuhliki ahi lokaia me uhdahn apwal. I uhdahn kalahnganki soahng koaros me kumwail padahkiong ie sang nan Paipel ni ahi mahlahr.”

¹⁶ Ihme kahrehda, e sohte kapwuriamwei me irail kan me kin papah nan mwomwohdiso kan me kin doadoahngki lokaia teikan likin uhdahn lokaiahn sahpwo kin pepehm me irail kin ale kapai tohto. Pwopwoud ehu sang Britain koasoia: “Aht doadoahk en kalohk rehn irail me kin doadoahngki lokaia teikan kin wia mehkot me keieu kaperen nan aht mour erein sounpahr 40 me se iang doadoahk en kalohk.” Ke kak kawekila ahmw koasoandi nan ahmw mour pwe ken kak kalaudehla ahmw kalohk ong aramas me kin doadoahngki lokaia kan likin pein ahmw lokaia? Ma ke wie sukusukuhlete, ke kak onopki ehu lokaia tohrohr pwehn kaunopadahng kalohk ong aramas akan me kin doadoahngki lokaiao? Ni ahmw pahn wia met, e pahn ritingadahng uhk elen mour me kansenamwahu mehlel oh kapai tohto. (Lepin Padahk 10:22) Ke soh koasoiong ahmw pahpa oh nohno duwen met?

Kamwahuwihala Wiepen Atail Doadoahk en Kalohk

17. Iaduwen kitail kak sewese aramas tohto nan atail wasahn kalohk?

¹⁷ Mehlel, irair en pali laud en kitail sohte kin mweidohng kitail en “laid” de kalohk ong irail me kin doadoahngki lokaia ehu weksang pein atail lokaia. Ahpw, mwein kitail kak sewese aramas tohto nan pein atail wasahn kalohk. Iaduwen kitail kak wia met? Kitail kak wia met ni atail pahn kawekila, kaidehn dahme kitail koasoia, ahpw mwomwen atail koasoi. Nan wasa tohto, aramas kin kousoan nan ihmw laud kan me perepe mwahu (high-security buildings). Oh pil, aramas tohto sohte kin mihmi nan imwarail ni ahnsou me kitail kin wia doadoahk en kalohk ihmw-lel-ihmw. Kahrehda, kitail anahne kesehla atail “uhk kan” me wehwehki song en kalohk ong aramas nan ahnsou kan oh wasa kan likin ihmw-lel-ihmw. Ih mwomwen atail kak kahlemengih Sises. Sises kin rapahki ahnsou mwahu koaros en kalohk ong aramas nan wasa kan koaros me e kin kohla ie.​—Madiu 9:9; Luk 19:1-​10; Sohn 4:6-​15.

18. Iaduwen kalohk nan wasa sohte lipilipil kak pweida mwahu? (Pil koasoia koakon me oaralap koasoia “Katohnpadahki Aramas akan me Kitail Tuhwong nan Wasahn Pisnis.”)

¹⁸ Nan ekei wasa kan nan sampah, kalohk wasa koaros aramas kak diarek ie kin wia elen katohnpadahk me mwahu. Irail sounkalohk kan me ekspiriens laud kin kalaudehla arail kalohk nan wasa sohte lipilipil. Likin arail iang kalohk ihmw-lel-ihmw, sounkalohk kan met kin kalohk nan wasahn sompihr, wasahn pisnis oh ohpis kan, ni sidohwa kan, wasahn peidi sidohsa kan, nan bus stop kan, nanial kan, wasahn kommoal kan, ni oaroahr, oh wasa teikan. Aramas tohto nan Hawaii ahpwtehn papidaisla pwehki irail tuhwong Sounkadehde kan nan soangen wasa pwukat. Ni atail pahn kamwahuwihala de kalaudehla atail iang wiepen kalohk tohto, e kin sewese kitail en wia uwen me kitail kak en kapwaiada kehkehlik en Sises.​—1 Korint 9:22, 23.

19. Ire riau dah kan me pid kehkehlik me Sises ketikihda me kitail pahn sukuhliki nan artikel en mwurin met?

¹⁹ Pwukoa kan me Sises ketikihong kitail en katohnpadahk kin pid kaidehn ihte dahme kahrehda oh iasawa kitail pahn wia doadoahk wet, ahpw pil dahme kitail pahn koasoia ahnsoun kalohk oh pil iahd me kitail pahn kanekehla pwukoa doadoahk wet. Kitail pahn sukuhliki duwen ire riau pwukat me pid en Sises kehkehlik ong kitail nan artikel en mwurin met.

[Nting tikitik me mi pahs]

Ke Tamataman?

• Kitail kin wia doadoahk en kalohk oh katohnpadahk pwehki kahrepe mwahu dah kan oh pil pwehki kahrepe konehng dahieu?

• Ia uwen laud sapwellimen Siohwa ladu kan rahnwet kin kapwaiada kehkehlik en Sises en katohnpadahki aramas akan sang nan wehi koaros?

• Iaduwen kitail kak kawekila atail ‘wiepen laid,’ oh dahme kahrehda kitail anahne wia met?

[Kaokon nan Pali 22]

Pwuhk kan ong me Maskun kan

Albert emen Kristian elder oh pioneer men me kin mihmi nan United States. E maskun. E kin doadoahngki pwuhk, brochure oh makisihn kan me Society wiahda ong me maskun kan (Braille) oh pwuhk pwukat kin sewese ih en pweida mwahu nan doadoahk en kalohk oh pil nan ah doadoahk nin duwen Sounapwalih en Kalohk. Iaduwen e kin kapwaiada ah pwukoa nan mwomwohdiso?

James, Presiding Overseer en mwomwohdiso me Albert kin iang koasoia: “Saik pak ehu se ahneki emen Sounapwalih en Kalohk me pweida mwahu duwehte Albert.” Albert iei emen nanpwungen aramas maskun 5,000 samwa nan United States me, sangete mahs lel met, kin ale pwuhk, brochure oh makisihn kan nan Braille en lokaiahn wai de lokaiahn Spain. Ni mehlel, sang pahr 1912 lel met, ladu lelepek oh loalokong wiahda soangsoangen pwuhk, brochure, oh makisihn ni lokaiahn Braille. Pwehki kekeiradahn misihn kan, wasahn print pwuhk kan en Sounkadehdehn Siohwa kan met kin print teh rar rar kei en pwuhk kan ong me maskun kan nan pahr koaros ni lokaia eisek oh kin kihpeseng pwuhk pwukat ong me maskun kan nan sahpw 70 samwa. Ke kin ese emen me kak paiekihda sawaspen Paipel pwukat me Society kin wiahda ong me maskun kan?

[Kaokon nan Pali 23]

Katohnpadahkih Aramas akan me Kitail Tuhwong nan Wasahn Pisnis

Ni ahnsou emen Sounkadehde kalohk nan wasahn pisnis nan Hawaii, e tuhwong kaun en kompani en mehn peidaid. Mendahki e kin kedirepw, ohlo pwungki me e pahn onop Paipel erein minit 30 nan wihk koaros nan ah ohpis. Ni menseng en Ni Esil koaros, e kin ndaiong nah tohndoadoahk kan en ndaiong aramas koaros me kin telephone ih soangen ahnsou kan en call mwuhr oh e kin rong kanahieng dahme e kin sukuhliki sang nan Paipel. Pil emen Sounkadehde nan Hawaii kin onop Paipel pak ehu nan wihk ehu rehn emen lih me kin ahneki wasahn wiahda suht kan. Onopo kin wiawi wasahn kasamwo customer kan. Ni ahnsou me customer kin pedolong, sistero kin ekis keila oh awih. Ni ahnsou me customer kin pedoi, ira kin pwurehng wia ara onop.

Koaros kaun riemen pwukat kin tuhwong Sounkadehde pwukat pwehki Sounkadehde pwukat kin nantihong kesehla neirail “uhk kan” me wehwehki ira isaneki ahnsou mwahu koaros oh kohla wasa koaros pwehn kalohk. Ke kak medewehla wasa kan nan ahmw wasahn kalohk me ke kak tuhwong aramas me kin apwal en diar nan imwarail?

[Kaokon nan Pali 24]

Lokaiahki Peh kan oh Doadoahk en Katohnpadahk

Sounkadehde kid kid kei nan sampah pwon, iangahki me pwulopwul tohto, sukuhliki lokaiahki peh kan pwehn sewese irail me salengopon en wiahla tohnpadahk kan en Krais. Karasepe ehu, nan sapwen Brazil kelepw, aramas salengopon 63 papidaisla nan pahr ehu me ahpwtehn nek oh Sounkadehde 35 me salengopon kin papah Siohwa nin duwen Regular Pioneer kan ahnsouwet. Nan sampah pwon, mie mwomwohdiso oh pwihn en lokaiahki peh 1,200 samwa. Circuit en Russia me wiawihkihda mwomwohdiso kan me kin lokaiahki peh iei circuit me keieu laud nan sampah pwehki e kipe sahpw kan koaros nan Russia!

[Kilel nan Pali 23]

Ke kak papah Siohwa nan sahpw kan me kin doadoahngki lokaia tohrohr kan?