‘Kehkehlingkihong Irail Re En Peikiong Mehkoaros Me I Koasoanediong Kumwail’

“Kumwail eri kohwei wasa koaros oh katohnpadahk . . . , kehkehlingkihong irail re en peikiong mehkoaros me I koasoanediong kumwail.”​—MADIU 28:19, 20.

1. Dahme tohnpadahk Pilip oh ohlen Idiopia men koasoakoasoia?

OHLEN Idiopia men seiloaklahng Serusalem. Ih wasa me e kin kaudokiong emen Koht me e kin poakohng me iei Siohwa. Ni sansal e kin pil poakohng sapwellimen Koht Mahsen. Ni eh pwurupwuralahng ni imwe dake were kuruma, e ahpw wadewadek pwuhken soukohp Aiseia, iei ahnsouwo me Pilip ahpw idek rehn ohlen Idiopia menet: “Ia duwe, komw wehwehki dahme komw wadewadeken?” Ohlo ahpw sapengki: “Ia duwen ei pahn kak wehwehki, ma sohte me pahn kawehwehiong ie?” Pilip pousehla sewese ohl menet me kin ni mehlel perenki onop Paipel en wiahla emen tohnpadahk en Krais.​—Wiewia 8:26-​39.

2. (a) Ni ahl dahieu me pasapeng en ohlen Idiopia men kin wia pasapeng kesempwal ieu? (b) Mehnia peidek kan me kin pid kehkehlik en Krais en katohnpadahk me kitail pahn koasoiapene ni ahnsouwet?

² Pasapeng en ohlen Idiopia menet kin wia pasapeng kesempwal ieu. E sapengki: ‘Ia duwen ei pahn kak wehwehki, ma sohte me pahn kawehwehiong ie.’ Ei, e anahne emen en kawehwehiong ih. Mahsen pwukat kin kawehwehda duwen kaweid kesempwal me Sises kehkehlikiong sapwellime kan en katohnpadahk. Mehnia kehkehlik? Pwen diarada pasapengo, kitail kak pousehla wadek duwen mahsen kan en Sises me dierekda nan pwuhken Madiu irelaud 28. Artikel en mwowe sapeng peidek kan me duwehte, dahme karehda? oh iawasa? Ahpw ni ahnsouwet kitail pahn sukuhliki duwen peidek riau me kin pid kehkehlik en Krais en katohnpadahk​—Peidek pwukat tepikihda lepin lokaia pwukat: Dahme? oh Iahd?

“Kehkehlingkihong Irail Re en Peikiong Mehkoaros”

3. (a) Iaduwen emen kin wiahla tohnpadahk en Sises Krais? (b) Katohnpadahk kin pid padahkiong aramas akan duwen dah?

³ Dahme kitail anahne padahkiong mehteikan pwen sewese irail en wiahla tohnpadahk kan en Krais? Sises kehkehlingkihong sapwellime tohnpadahk kan: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh ngehn sarawi, oh kehkehlingkiong irail re en peikiong mehkoaros me I koasoanediong kumwail.” (Madiu 28:19, 20) Eri, kitail anahne padahkiong mehteikan soahng koaros me Krais ketin kehkehlingkiong kitail.a Ahpw, dahme kitail pahn kak wia pwen sewese aramas emen me kin sukuhliki kosonned kan en Sises en kaidehn ihte wiahla emen tohnpadahk ahpw e pahn wiahte tohnkaudok erein ah mour? Kitail kak diarada ire kesempwal ieu ni atail pahn tehk duwen ahn Sises kin ni kanahieng pilada lepin lokaia kan. Tehk wasaht, e sohte kin ihte mahsanih: ‘Kehkehlingkihong irail mehkoaros me I koasoanediong kumwail.’ Ahpw e mahsanih: ‘Kehkehlingkihong irail re en peikiong mehkoaros me I koasoanediong kumwail.’ (Madiu 19:17) Ia wehwehn mahsen pwukat?

4. (a) Ia wehwehn kapwaiada kosonned ehu? (b) Kihda karasaras ong iaduwen kitail kak padahkiong aramas emen en kapwaiada sapwellimen Krais kosonned akan.

⁴ Kapwaiada kosonned ehu kin wehwehki me emen pahn “kawekila pein ah wiewia kan” pwen pahrekiong kosonnedo​—peik. Eri, iaduwen kitail kak padahkiong emen en peikiong sapwellimen Krais koasoandi kan? Kitail kak medemedewe, iaduwen sounkaweid en diraip sidohsa kin padahkiong nah tohnsukuhl akan en peikiong kosonned kan en tangahki sidohsa. Sounkaweido kin padahkiong nah tohnsukuhl akan duwen kosonned kan en tangahki sidohsa. Ahpw, pwen padahkiong nah tohnsukuhl akan iaduwen irail kak peikiong kosonned pwukat, e anahne kaweidih nah tohnsukuhl akan ni ahnsou e pahn iang irail diraip nan ahl me mie sidohsa teikan tangatangseli oh met kak kahrehong irail en doadoahk laud oh kapwaiada dahme re sukuhlikier. Duwehte ahnsoun kitail kin onop Pwuhk Sarawi rehn aramas akan, kitail kin padahkiong irail sapwellimen Krais kosonned akan. Ahpw, kitail pil anahne kaweidih tohnsukuhl akan ni ahr kin song en kapwaiada sapwellimen Krais kaweid kan nan arail mour ni ehu ehu rahn oh ni ahnsoun kalohk. (Sohn 14:15; 1 Sohn 2:3) Eri, pwen kapwaida ni unsek sapwellimen Krais kehkehlik en katohnpadahk kin wehwehki me kitail en wiahla sounpadahk kan oh pil sounkaweid kan. Ni ahl wet, kitail kin kahlemengih Sises oh Siohwa.​—Melkahka 48:14; Kaudiahl 7:17.

5. Dahme kahrehda aramas emen me kitail kin onop Pwuhk Sarawi reh mwein pahn pweiek en peikiong sapwellimen Krais kosonned en katohnpadahk?

⁵ Padapadahkiong mehteikan en kapwaiada sapwellimen Sises kosonned akan kin pil pid sewese irail en kapwaiada kosonnedo en katohnpadahk. Ong ekei aramas me kitail kin wia onop Pwuhk Sarawi rehrail, irail mwein kin apwaliki wia doadoahk wet. Edetehn ma re kehlail nan pelien lamalam akan en Kristendom mahs, arail kaun en pelien lamalam akan sohte kin padahkiong irail en kowei rehn aramas teikan pwehn katohnpadahk. Ekei kaun en pelien lamalam kan kin ni mehlel wekada me pelien lamalam en Kristendom sohte kin padahkiong neirail tohnmwomwohdiso kan en kalohk ong aramas teikan. Emen Semani Pwuhk Sarawi, John R. W. Stott koasoiada duwen kehkehlik en Sises en kohwei nin sampah oh sewese aramas koaros en wiahla tohnpadahk kan en Sises: “Kiht sohte kin peikiong kosonned wet oh met kin wia luwet laud ong irail Kristian sounkalohk kan en nan rahnpwukat.” E kapataiong: “Kiht kin mwomwen wia aht padahk kan ong aramas teikan sang wasa doh sang irail. E kin mwomwen duwehte aramas akan me kin kesihnenda limwahn oaroahro kihda ahr kaweid kan ni ahr kin likweriong aramas akan me kin peipeiseli nan sehd kereniong pahn duhla. Kiht sohte kin dikoumoang nan sehd pwen doarehla irail. Kiht kin ni karasaras, mwomwen masak wisikisikla.”

6. (a) Ni ahnsou me kitail kin sewese emen en sukuhliki Pwuhk Sarawi, iaduwen kitail kak alasang mehn kahlemeng mwahu en Pilip? (b) Iaduwen kitail kak kasalehda me kitail kin nsenohki atail Paipel study ni ahnsou me e tepida iang doadoahk en kalohk?

⁶ Ma aramas emen me kitail kin onop Pwuhk Sarawi reh kin mahs iang pelien lamalam ieu me ahr towe kan kin ni karasaras “mwomwen masak wisikisikla,” eri mwein e pahn kakete ekis apwal ong ih en peikiong sapwellimen Krais kosonned en katohnpadahk. E pahn anahne sawas. Eri, kitail anahne kanengamah kihong ih kaweid me pahn kaloaleila ah kin wehwehki Pwuhk Sarawi me pahn kamwekid ih, duwehte padahk kan en Pilip me kin kamarainih ohlen Idiopia oh kamwekid ih en papdaisla. (Sohn 16:13; Wiewia 8:35-​38) Patehng met, pein atail ineng en padahkiong aramas me kitail kin onop Pwuhk Sarawi en peikiong kosonnedo en katohnpadahk kin kamwekid kitail en iang irail oh kahkahre irail ni ahnsou irail kin tepida iang wia doadoahk en kalohki Wehio.​—Eklesiasdes 4:9, 10; Luk 6:40.

“Mehkoaros”

7. Padahkiong meteikan duwen ‘kapwaiada mehkoaros’ kin pil pidada mehnia kosonnned akan?

⁷ Kitail sohte kin ihte padahkiong tohnpadahk kapw akan en katohnpadahk. Sises kehkehlingkihong kitail en padahkiong aramas teikan en “peikiong mehkoaros” me e kehkehlingkihong kitail en wia. Met kin pidada kosonned riau me keieu kesempwal​—iei en poakohng Koht oh poakohng mehn mpatail kan. (Madiu 22:37-​39) Iaduwen emen tohnpadahk kapw kak sukuhliki en kapwaiada kosonned riau pwukat?

8. Kihda karasaras ieu ong iaduwen tohnpadahk en Pwuhk Sarawi kapw emen pahn kak sukuhliki duwen kosonned en kasalehda limpoak.

⁸ Nna, pwurehng medemedewe duwen karasaras en emen tohnsukuhl en diraip sidohsa. Ni ahnsou me sounpadahk en diraip sidohsa kin iang tohnsukuhl menet diraip were sidohsa nan wasa me mie sidohsa teikan me kin tangatangseli, tohnsukuhl menet sohte kin ihte sukuhliki sang eh sounpadahk, ahpw e pil kin sukuhlikihsang mehteikan me kin diraip wararail sidohsa kan, ni eh kin kilikilang irail. Karasepe, sounpadahk menet mwein pahn padahkiong nah tohnsukuhlo en kilang emen me diraip sidohsa oh ni kadek mweidong sidohsa teio en sop mwowe; de emen me diraip sidohsa kin kihdi dengki en were sidohsa pwen dehr kahrehong soun diraip sidohsa teikan en aksident; de emen soun diraip sidohsa kin uhdi oh men sewese aramas emen me e kin ese pwehki were sidohsa ohla limwahn ahl. Mehn kahlemeng mwahu pwukat kin padahkiong tohnsukuhlo mehn kasukuhl kesempwal kei me pein ih pahn kak doadoahngki ni ahnsou me e kin diraipih were sidohsa. Duwehte met, tohnpadahk en Paipel kapw emen me kin ni karasaras tangatang nan elen mour, pwe e sohte kin ihte sukuhlikihsang rehn emen me kin onop Paipel reh, ahpw e pil kin sukuhlikih sang mehn kahlemeng mwahu en sounkalohk teikan nan mwomwohdiso.​—Madiu 7:13, 14.

9. Iaduwen tohnpadahk kapw emen pahn kak sukuhliki duwen ia wehwehn kapwaiada kosonnedo en kasalehda limpoak?

⁹ Karasepe ieu, tohnsukuhl en Pwuhk Sarawi emen mwein pahn kak kilang pahpa de nohno kiripw emen me kin nantihong kahrehla nah seri tikitik kan nan Kingdom Hall. Mwein e pahn kilang aramas emen me kin nantihong powehdi ah soumwahu en pahtoula ahpw e kin ni lelepek iang towehda mihding kan, de e pahn kilang emen liohdi mah me kin doadoahngki were sidohsa oh idanla aramas mah teikan ong mihding en mwomwohdiso kan, de emen mwahnakapw kamwakamwakel nan Kingdom Hall. Tohnsukuhl en Pwuhk Sarawi emen mwein pahn pil kilang emen elder nan mwomwohdiso me kin ni lelepek iang kalohk edetehn ah pwukoa en mwomwohdiso me tohto. Mwein e pahn tuhwong Sounkadehde emen me soumwahu oh sohte kak pidoi sang ihmw, ahpw e kin kangoange irail me kin mwemweitla reh kangoang ni pali ngehn. Tohnsukuhlo mwein pahn kilang pwopwoud ehu me kin wiahda wekidekla laud tohto nan ara mour, pwe ira pahn kak apwalih ara pahpa oh nohno mahlahr me sohte kak apwalih pein ira. Ni ahnsou me tohnsukuhl kapwo pahn kilikilang Kristian teikan me kin kadek oh likilik, e pahn sukuhliki sang ahr mehn kahlemeng mwahu kan oh e pahn kak wehwehki duwen peikiong sapwellimen Krais kosonned en poakohng Koht oh mehn mpatail kan oh pil kesempwal en poakohng iengatail pwoson akan. (Lepin Padahk 24:32; Sohn 13:35; Kalesia 6:10; 1 Timoty 5:4, 8; 1 Piter 5:2, 3) Ni ahl wet, emenemen tohn mwomwohdiso Kristian kan kak​—oh anahne​—wiahla sounpadahk oh sounkaweid men.​—Madiu 5:16.

“Lao Kaimweseklahn Koasoandi kan”

10. (a) Ia uwen werei kitail pahn wia doadoahk wet en katohnpadahk? (b) Mehn kahlemeng dahieu Sises wia ong kitail en kapwaiada pwukoa kan?

¹⁰ Lao lel iahd kitail anahne kaukaule wia doadoahk en katohnpadahk? Lao lel kaimwiseklahn koasoandi suwed wet. (Madiu 28:20) Kitail pahn kak kapwaiada atail pwukoa me kohsang rehn Sises? Nin duwen mwomwohdiso ehu me mih wasa koaros nin sampah, kitail kin nantihong kapwaiada atail pwukoa. Nan sounpar kan mahs, mwein kitail kin perenki doadoahngki atail ahnsou, kehl, oh mwohni kan en rapahki irail akan me “konehng ale mour soutuk.” (Wiewia 13:48) Ni ahnsouwet, nin sampah pwon, irail Sounkadehdehn Siohwa kan kin wia doadoahk en kalohki Wehio oh katohnpadahk awa silirar samwa ehuehu rahn. Kitail kin iang wia doadoahk en kalohk pwehki kitail kin kahlemengih Sises. E mahsanih: “Ei kapwaiada kupwuren Ih me ketin poaroneiehdo, oh kanekehla sapwellime doadoahk, iei me ei tungoal.” (Sohn 4:34) Kitail pil men wia doadoahk wet. (Sohn 20:21) Kitail sohte men ihte tepiada wia doadoahk me kohwong kitail; ahpw kitail men kanekehla doadoahk wet.​—Madiu 24:13; Sohn 17:4.

11. Dahme wiawiong ekei Kristian brother oh sister kan, oh dahme kitail anahne idek pein kitail?

¹¹ E kin kansensuwediahla kitail ni ahnsou me ekei iengetail pwoson akan kin luwetala ni pali ngehn, oh met kin imwikihla ahr kin ekei ahnsou de sohlahr peikiong sapwellimen Krais kosonned en katohnpadahk. Dahme kitail kak wia pwen sewese irail en pwurehng iangala tohnmwomwohdiso kan oh pwurehng iang doadoahk en katohnpadahk? (Rom 15:1; Ipru 12:12) Ni mwomwen Sises ah ketin sewese sapwellime wahnpoaron kan ni ahnsou ehu me irail luwetala, kin kak padahkiong kitail dahme kitail kak wia pwen sewese aramas teikan.

Kasalehda Nsenohki Aramas Teikan

12. (a) Mwohn Sises pwoula, dahme sapwellime wahnpoaron kan wia? (b) Iaduwen Sises sewese sapwellime wahnpoaron kan mendahki mie arail luwet laud akan?

¹² Ni kaimwiseklahn sapwellimen Sises doadoahk nin sampah, ni ahnsou me e kereniong pahn pwoula, irail wahnpoaron oko “eri kesehla oh tangdoaui.” Nin duwen me Sises kohpadahr, irail “mwarahkpeseng nan arail wasa kan.” (Mark 14:50; Sohn 16:32) Iaduwen Sises sewese ienge kan me luwetala ni pali ngehn? Mwurinte e iasadahr, Sises padahkiong ekei sapwellime tohnpadahk kan: “Kumwail dehr masak, kumwail kohwei kairehki riei ko re en mwesellahng Kalili, pwe ih wasao me se pahn tuhpene ie.” (Madiu 28:10) Edetehn e sansal me irail wahnpoaron oko mie ahr luwet laud akan, Sises kin likwerih irail “riei ko.” (Madiu 12:49) Met kin wehwehki me e kin pousehla likih irail. Ni ahl wet, Sises kin kasalehda mahk, duwehte Siohwa kin kasalehda mahk kalahngan. (2 Nanmwarki 13:23) Iaduwen kitail kak alasang Sises?

13. Ia mwomwen kitail pahn anahne kilangwong irail akan me luwetala ni pali ngehn?

¹³ Kitail anahne en nsenohki irail akan me kin ekei ahnsou iang doadoahk en kalohk de irail akan me sohlahr iang. Kitail kin tamanda doadoahk en limpoak me iengetail tohnpadahk kan kin wia mahs​—ekei irail mwein ni sounpar tohto. (Ipru 6:10) Kitail kin ni mehlel loaloidki irail. (Luk 15:4-7; 1 Deselonika 2:17) Iaduwen kitail kak kasalehda atail kin nsenohkin irail?

14. Iaduwen kitail kak alasang Sises ong sewese aramas luwet men?

¹⁴ Sises padahkiong wahnpoaron oko me pahtoula en kohla Kalili oh irail pahn tuhwong ih wasao. Met kin wehwehki me Sises kin luhke irail en iang towehda mihding tohrohr ehu. (Madiu 28:10) Duwehte rahnwet, kitail kin kangoange irail akan me kin luwet ni pali ngehn en iang towehda mihding kan en mwomwohdisohn Kristian, oh mwein kitail anahne luhke irail tohto sang pak ehute. Ong irail wahnpoaron oko, luhk me Sises kihong irail pweidahr, pwe “tohnpadahk ehk emeno eri mwesellahng pohn nahnahn Kalili, wasa Sises mahsanihong irail re en patohla ie.” (Madiu 28:16) Ia uwen kaperen ni ahnsou me irail luwet akan kin mwekidki atail kin luhkong irail en pwurehng iang towehda mihding en Kristian akan!​—Luk 15:6.

15. Iaduwen kitail kak idawehn Sises ni atail kin kasamwo aramas luwet akan me pahn pedolong nan atail wasahn mihding?

¹⁵ Iaduwen kitail pahn wia ni ahnsou Kristian luwet emen pahn pedolong nan Kingdom Hall? Eri, dahme Sises wia ni ahnsou me e kilangada sapwellime wahnpoaron akan me ahr pwoson luwetala ni ahnsoukis ni wasa me irail kosonnedi en tuhpene ie? “Sises eri ketin keiong mparail oh mahsanihong irail.” (Madiu 28:18) E sohte kesihnenda sang wasa doh oh kakil, ahpw e keiong mparail. Medemedewe ia uwen kansenamwahu wahnpoaron oko ni ahnsou me Sises wia met! Kitail pil kak sang pein kitail en keiong mparail oh kasamwo irail luwet akan ni pali ngehn me kin nantiong en pwurodo nan mwomwohdiso en Kristian.

16. (a) Dahme kitail kak sukuhliki sang ni mwomwen Sises kin sewese sapwellime tohnpadahk kan? (b) Iaduwen kitail kak alasang ahn Sises madamadau ong me luwet akan? (Kilang footnote.)

¹⁶ Dahme Sises pil wia? Keieu, e wiahda pakair ehu: “Manaman koaros en nanleng oh sampah mweimweiongieier.” Keriau, e kihong irail pwukoa ehu: “Kumwail eri kohwei wasa koaros oh katohnpadahk.” Kasilu, e wiahda inou ehu: “I pahn ieiang kumwail ahnsou koaros lel ni imwin kawa.” Ahpw ke kilang dahme Sises sohte wia? E sohte lipwoare tohnpadahk kan ni ahr kin luwet oh peikasal. (Madiu 28:17) Mwomwen ahn Sises wiewia kan ong irail kin pweida mwahu? Ei. Pwe mwurin met, wahnpoaron oko pwurehng “wonoweite ni padahk oh kawehwe Rongamwahuo.” (Wiewia 5:42) Ni atail kin alasang mehn kahlemeng en Sises ong ia mwomwen kitail pahn kilangwong me luwet akan oh dahme kitail kak wia ong irail, eri nan pein atail mwomwohdiso, e pahn kak pweida mwahu.b​—Wiewia 20:35.

“I Pahn Ieiang Kumwail Rahn Koaros”

17, 18. Kangoang dah kei me kin kohsang sapwellimen Sises mahsen pwukat, “I pahn ieiang kumwail rahn koaros”?

¹⁷ Kaimwiseklahn mahsen kan en sapwellimen Sises kaweido, “I pahn ieiang kumwail rahn koaros,” kin kangoange koaros me kin nantihong kapwaiada sapwellimen Krais kekehlik en katohnpadahk. Sohte lipilipil soahngen uhwong oh karaun likamw me atail imwintihti kan pahn wiaiong kitail, kitail en dehr masak irail. Dahme kahrehda? Sises atail Kaun, me aleier, ‘manaman koaros en nanleng oh sampah,’ kin ketin ieiang oh sewese kitail!

¹⁸ Sapwellimen Sises inou “I pahn ieiang kumwail rahn koaros” kin pil wia kamweit laud ieu ong kitail. Ni atail kin nantiong en kapwaiada sapwellimen Krais kehkehlik en katohnpadahk, kitail sohte kin ahnekihte rahn kaperen kan, ahpw kitail kin pil ahneki rahn kansensuwed kan. (2 Kronikel 6:29) Ekei rehtail kin mwamwahieiki emen re poakohng me mehlahr. (Senesis 23:2; Sohn 11:33-​36) Ekei kin nannanti mendahki irail mahlahr oh ahr roson oh kehl kin kohkohdi. (Eklesiasdes 12:1-6) Ekei kin lelohng ahnsou kan me irail kin inenen pahtou laud. (1 Deselonika 5:14) Oh ni ahnsouwet, aramas tohtohla sang nanpwungatail kin lelong kahpwal en mwohni kan. Ahpw, mendahki kitail kin lelohng soangen kahpwal pwukat, atail doadoahk kin pweida, pwe Sises kin ketiket rehtail “rahn koaros,” pil nan rahn apwal kan nan atail mour.​—Madiu 11:28-​30.

19. (a) Sapwellimen Sises kehkehlik en katohnpadahk kin audaudkihda mehnia kaweid kan? (b) Dahme kin sewese kitail en kapwaiada sapwellimen Krais kehkehlik?

¹⁹ Nin duwen kitail sukuhlikier nan artikel wet oh artikel en mwowe, sapwellimen Sises kehkehlik en katohnpadahk kin oarapene soahng tohto. Sises padahkiong kitail dahme kahrehda oh iawasa kitail anahne kapwaiada sapwellime kehkehlik. E pil padahkiong kitail dahme kitail pahn padahkiong aramas akan oh lao lel iahd kitail pahn wia doadoahk wet. Ni mehlel, e sohte mengei en kapwaiada pwukoa wet. Ahpw, pwehki sapwellimen Krais manaman kin sewese kitail oh pil ni pali ngehn e kin ketiket rehtail, kitail kak kapwaiada atail pwukoa! Ke soh kin pwungki?

[Nting tikitik me mi pahs]

Iaduwen Ke Pahn Sapeng?

• Iaduwen kitail kin padahkiong mehteikan en kapwaiada sapwellimen Sises kehkehlik?

• Iren kasukuhl dah kei me tohnpadahk kapw men kak sukuhliki sang rehn mehteikan nan mwomwohdiso?

• Dahme kitail kak wia pwen sewese irail akan me luwetala ni pali ngehn?

• Kehl oh kamweit dah kitail kin ale sang sapwellimen Sises inou “I pahn ieiang kumwail rahn koaros”?

[Kilel nan Pali 26]

Kitail anahne en wiahla sounpadahk kan oh pil sounkaweid kan

[Kilel nan Pali 28]

Tohnpadahk kapw emen kin sukuhliki ire kesempwal kan sang kahlemeng mwahu en meteikan