Pwangada Ahpw Sohte Pwangahkihda Papah Siohwa

“Siohwa, iei ih me kapikada sampah pwon, . . . kin ketin kakehlahda me luwet oh me pwangadahr kan.”​—AISEIA 40:28, 29.

1, 2. (a) Soangen luhk kesempwal dahieu kohwong irail akan me kin iang kaudok mehlel? (b) Dahme kak keper ong atail pali ngehn?

NIN DUWEN sapwellimen Sises tohnpadahk kan, kitail wehwehki duwen luhk kesempwal wet me Sises ketikihda: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. . . . Pwe mehn wisik me I pahn kihong kumwail me mengei, oh audepe me marahra.” (Madiu 11:28-​30) “Siohwa kin ketikihong Kristian kan . . . ahnsou kan me kin sewese irail.” (Wiewia 3:19) Ni mehlel, ke pein kilang soangen kamwahu kan me kohsang sukuhliki padahk mehlel sang nan Paipel, ahneki koapworopwor ong ahnsou kohkohdo, oh doadoahngki kaweid sang Siohwa nan ahmw mour.

² Ahpw, ekei sapwellimen Siohwa tohnkaudok kan kin ahneki pepehm en pwangada. Ong ekei irail, ahnsou kan me re pahtou kin malaulau. Ong pil ekei irail, ahnsou kan me re pahtou kin reirei. Eri, met kin kahrehong ekei Kristian kan en ahneki pepehm me arail pwukoah en pali ngehn wia mehkot katoutou, a kaidehn mehkot kansenamwahu duwehte Sises inoukihda. Soangen pepehm soh-konehng pwukat kakete kauwehla ahn emen Kristian ah nanpwung mwahu rehn Siohwa.

3. Dahme kahrehda Sises ketikihda kaweid nan Sohn 14:1?

³ Mwohnte aramas salihedi Sises oh kemehla ih, Sises padahkiong sapwellime tohnpadahk ko: “Kumwail dehr nsensuwed oh pahtou. Kumwail pwoson Koht oh pil pwoson ie.” (Sohn 14:1) Sises mahsanih mahsen pwukat pwehki e ese me wahnpoaron kan pahn lelohng irair apwal oh kansensuwed akan. Mwuri, aramas kin uhwong irail. Sises wehwehki me sapwellime wahnpoaron ko kakete dipekelekeliki soahng kansensuwed kan me wiwiawi. (Sohn 16:1) Ma sohte petehkpe kohwong irail, pepehm kansensuwed pwukat kakete kaluwetala ahn wahnpoaron ko ahr pali ngehn oh kakete kahrehiong irail en kesehla arail likih Siohwa. Met me mehlel ong Kristian akan rahnwet. Mehn kansensuwed akan kak kahrehong pwunod laud, oh kak katoutouwihala mohngiongatail. (Seremaia 8:18) Nan loaletail kakete luwetala. Pahn soangen kapwunod pwukat, atail pepehm oh pali ngehn kakete luwetala, oh pil sohla inengih papah Siohwa.

4. Dahme kak sewese mohngiongatail ni karasaras en dehr pwangada?

⁴ Ih ahnsou me konehng kaweid en Paipel wet: “Pohnangin soahng kan koaros me kitail en pere, pere mohngiongomw, pwehki sang loale iei me utupen mour kin kohsang ie.” (Lepin Padahk 4:23) Pwuhk Sarawi kin kihda kaweid mwahu me kin kak sewese kitail en pere mohngiongatail sang nsensuwed, pahtou laud oh pwangada ni pali ngehn. Ahpw, keieu kesempwal, kitail anahne wehwehki kahrepen atail pwangada.

En Wia Kristian Men Kaidehn Mehkot Apwal oh Toutou

5. Ia ekei iren Paipel kan me kin mwomwen uhpene me pidada atail doadoahk nin duwen tohnpadahk kan en Krais?

⁵ Mehlel, en wia emen Kristian kin doadoahk laud. (Luk 13:24) Sises mahsanih: “Mehmen me sohte kin kapaikada eh tuhkehn kalokolok oh idawehniehdo, e sohte kak wiahla nei tohnpadahk.” (Luk 14:27) Mwein mahsen pwukat kin mwomwen uhwong mahsen me Sises kasalehda me e pahn kihong kitail mehn wisik me mengei oh audepe me marahra, ahpw, ni mehlel mahsen pwukat koaros sohte uhpene.

6, 7. Dahme kahrehda kitail kak ndahki me atail kaudok sohte kin apwal?

⁶ Doadoahk laud, mendahki emen kin pwang mwurin eh wia doadoahk laud wet, ahpw e kin kansenamwahu oh kaperen ma aramaso pahn wia doadoahk wet ong kahrepe mwahu ieu. (Eklesiasdes 3:13, 22) Oh soangen kahrepe mwahu dahieu me mwahu sang atail ehukihong mehn mpatail kan duwen padahk mehlel? Oh pil, atail doadoahk laud pwehn mourki sapwellimen Koht koasoandi kan me pid tiahk mwahu oh mwakelekel kin sohte wia mehn katoutou ni ahnsou me kitail kin medewehla soangen kapai kan me kitail kin paiekihda pwehki atail mour mwahu oh mehlel ong Siohwa. (Lepin Padahk 2:10-​20) Mehnda ma kitail lelohng kalokolok, kitail kin pehm me kitail ahneki pwais kaselel me kitail lokolok pwehki Wehin Koht.​—1 Piter 4:14.

⁷ Mehn wisik me Sises kihong kitail kin marahra oh kansenamwahu ni atail kin kapahrekiong rotorot en pali ngehn me aramas tohto kin mihmi loale ni arail mihmi pahn mehn wisik en kaudok likamw. Koht kin ketin loalloale kitail oh e sohte kin kihong kitail kosonned katoutou kan me kitail sohte kak kapwaiada. Sapwellimen Siohwa “kosonned akan me sohte apwal.” (1 Sohn 5:3) En mourki koasoandi kan ong Kristian mehlel akan, me sansalda nan Pwuhk Sarawi, e sohte pahn apwal. E sansal me atail kaudok sohte pahn kahrehiong kitail en pwangada oh kapehd tikitikla.

“Kihsang Mehn Katoutou Koaros”

8. Pali laud en ahnsou, dahme kahrehda emen pahn pwangada ni pali ngehn?

⁸ Ma emen pahn pwangada ni pali ngehn, pali laud en ahnsou met kin kohsang mehn katoutou kan me koasoandi suwed wet kin kihong kitail. Pwehki “sampah unsek mi pahn manaman en Me Suwedo,” soangen irair kansensuwed kan kin kapilkitailpene oh kaluwetala kitail oh kakete kahrehiong atail mour en Kristian en sohla toupahrek. (1 Sohn 5:19) Soahng kan me sohte kesempwal kakete kahpwalihala de kauwehla atail koasoandi en wia soahng ngenin kan. Mehn katoutou pwukat kakete kansensuwedih kitail de kahrehong kitail en ahneki pepehm en pahtou. Ihme kahrehda, e konehng kaweid en Paipel me kin kangoange kitail en “kesehsang kitail mehkoaros me kerempwa kitail.”​—Ipru 12:1-3.

9. Iaduwen raparapahki kepwehn sampah kan kak kahrehong kitail en pwangada?

⁹ Karasepe, aramas en sampah kan kin kedirepwki ineng en men ndandla, naineki mwohni, mehn kamweit, seiloak pwehn rapahki pein arail peren, oh pil ahneki kepwehn sampah tohto, oh soangen mehn akadei pwukat pil kak kaluwetala atail madamadau kan oh kahrehiong kitail en solahr papah Siohwa. (1 Sohn 2:15-​17) Nan keieun senturi, ekei Kristian kan kin rapahki kepwehn sampah oh met kahpwalihala arail mour. Wahnpoaron Pohl kawehwehda: “Irail kan me men kepwehpwehla kin pwupwudiong nan songosong oh lohdiong nan lidip en ineng pweipwei oh keper tohto, me kin kauweirailla. Pwe limpoak ong mwohni, iei tepin soangen suwed koaros. Mie ekei me kin inenen kasikasik en naineki mwohni, eri, re ahpw salongalahsang pwoson oh kauwehkihla mohngiongirail soangen kapahtou tohtohie.”​—1 Timoty 6:9, 10.

10. Dahme kitail kak sukuhliki duwen kepwehpwehla sang sapwellimen Sises karasaras duwen sounkamwarak?

¹⁰ Ma kitail pwangada oh kapehd tikitikla nan atail papah Koht, met kakete kohsang atail nannanti raparapahki kepwehn sampah kan kahrehda atail pali ngehn wie luluwetala? Met kakete wiawi, oh met sansal sang karasaras me Sises ketikihda duwen sounkamwarak. Sises kapahrekiong “pwunod en mouren sampah kan, noahrok en dipwisou kan oh soangen ineng teikan me kin pwarada” nin duwen dihpw tekatek me kin “kasokehla” waren Mahsen en Koht nan mohngiong en aramas. (Mark 4:18, 19) Ihme kahrehda, Pwuhk Sarawi kin kaweidki kitail: “Kumwail dehr noahrok mwohni, ahpw kumwail nsenamwahukihte dahme kumwail ahneki. Pwe Koht mahsanih: ‘I sohte pahn mweisang uhk; I sohte pahn keseiukala.’ ”​—Ipru 13:5.

11. Iaduwen kitail kak kihsang soahng soh-katepe kan me kin kahrehong kitail en pwangada?

¹¹ Ekei pak, dahme kin kahpwalihala atail mour, kaidehn atail nantihong ale kepwe tohto, ahpw dahme kitail wia ong soahng kan me kitail ahnekier de nainekier. Ekei aramas kin lelohng ohlahn pepehm pwehki kahpwal kan me pwarada sang soumwahu, de mehlahn aramas me re poakpoake, de sang kapwunod teikan. Irail kin kilang me, ekei pak, re anahne wiahda wekidekla kan nan arail mour. Ehu pwopwoud wia ara pilipil oh koasoanehdi me re solahr pahn wia ekei soahng kan me re wia ong pein ara peren (hobbies) oh re pil koasoanehdi me re pahn kihsang soangen koasoandi kan oh dipwisou kan me sohte kesempwal ong ara mour. Ira eri tehk ara dipwisou kan me pidada koasoandi soh-katepe pwukat oh nekidala soahng pwukat pwe re sohlahr pahn kilang oh medemedewe duwen mepwukat. Ekei pak, e pahn mwahu ma kitail koaros kak medemedewe duwen dahme kitail wiewia nan atail mour oh pil duwen soahng kan me kitail ahneki oh naineki, oh kihsang soahng soh-katepe kan pwe kitail en dehr pwangada oh uhdi sang atail papah Siohwa.

E Kesempwal Kitail en Ahneki Lamalam Aktikitik oh Doadoahngki Atail Loalokong

12. Dahme kitail pahn pohnese duwen pein atail sapwung kan?

¹² Ekei pak, pein atail sapwung kan me kitail kin wia kin kahpwalihala atail mour. Ia uwen mehlel mahsen en Depit: “I mwopwlahr nan ahd en dipei kan, dipei kan katoutouwihielahr, I solahr kak wahda.” (Melkahka 38:4) Pali laud en ahnsou, kitail kak wia wekidekla kan nan atail mour oh met pahn sewese kitail en kihsang mehn katoutou kan.

13. Doadoahngki pein atail loalokong pahn kak sewese kitail en ahneki madamadau dahieu me pid duwen atail doadoahk en kalohk?

¹³ Pwuhk Sarawi kin kangoange kitail en doadoahngki atail “loalokong oh erpit.” (Lepin Padahk 3:21, 22) Pwuhk Sarawi mahsanih: “Erpit me kohsang powe . . . kin loalokong.” (Seims 3:17) Ekei kin ahneki pwunod laud pwehki irail men wia dahme meteikan kin wia nan doadoahk en kalohk. Ahpw, Pwuhk Sarawi kin ketikihda kaweid wet: “Emenemen en pein kasakasawih pein eh wiewia kan. Ma eh wiewia kan me mwahu, eri, e kak pohnmwahsohki; a ieremen e kapahrekiong en meteikan ar wiewia kan. Pwe emenemen kitail koaros uhdahn pahn pein wa eh wisik.” (Kalesia 6:4, 5) Mehlel, mehn kahlemeng mwahu en riatail Kristian kan kin kangoange kitail en papah Siohwa sang mohngiongatail, ahpw kitail anahne doadoahngki atail loalokong oh erpit ni atail koasoanehdi mehn akadei kan me konehng atail irair kan.

14, 15. Iaduwen atail doadoahngki atail loalokong pahn kak sewese kitail en apwalih anahn en pein paliwaratail oh atail pepehm kan?

¹⁴ Atail doadoahngki atail loalokong nan soangen irair kan me mwomwen tikitik ahpw met pahn kak sewese kitail en dehr ahneki pepehm en pwangada. Karasepe, kitail kin ahneki koasoandi mwahu me kak sewese kitail en roson ni paliwar? Menlau tehk mehn kahlemeng mwahu en pwopwoud ehu me kin papah Siohwa nan Branch Ohpis ieu en Sounkadehdehn Siohwa kan. Ira kin kilang kesempwalpen doadoahngki ara loalokong pwehn dehr nohn pwangada. Sistero koasoia: “Sohte lipilipil ia uwen laud en doadoahk me se anahne wia, se kin song en meirla ni ahnsou ehute ni pwong koaros. Se pil kin eksersais ahnsou koaros. Koasoandi pwukat kin sewese kiht. Se eri esehla dahme se kak wia oh dahme se sohte kak wia, oh met kin sewese kiht en koasoanehdi aht koasoandi kan me mwahu oh konehng kiht. Se kin song en dehr kapahrekiong kiht ong irail me diren kehl me kin kak wia soahng koaros me re men wia.” Ke kin kang mwenge me mwahu ong paliwaromw oh ahmw kommoal kin itar? Ma kitail pahn kasawih pein atail koasoandi me pid atail roson en paliwar oh wiahda soangen koasoandi kan me konehng kitail, met pahn katikitikala atail pepehm en kapehd tikitikla, pwunod oh pwangada ni pali ngehn.

¹⁵ Ekei kitail ahneki anahn tohrohr kan. Menlau tehk duwen mehn kahlemeng mwahu en emen Kristian sister me iang doadoahk en kalohk nan wasa kan me apwal en kalohk. E ahneki soumwahu laud kan, iangahki kanser. Dahme sewese ih en nannantihte mendahki soangen irair apwal pwukat? E koasoia: “E kesempwal ong ie en koasoanehdi ahi ahnsou pwe ien kelekelepw oh medemedewe. Ni ahnsou me I kin pwunod, I kin anahne mwadang kelepwla pwehn kak wadawad oh kommoal.” Ma kitail pahn doadoahngki atail loalokong oh erpit, met pahn sewese kitail en pohnese oh kaitarala atail anahn akan oh kitail sohte pahn pwangada ni pali ngehn.

Siohwa Koht Kin Kakehlailihala Kitail

16, 17. (a) Dahme kahrehda en apwalih atail pali ngehn me keieu kesempwal? (b) Dahme kitail anahne wia rahn koaros?

¹⁶ Ni mehlel, e keieu kesempwal en apwalih atail pali ngehn. Ma mie atail nanpwung mwahu rehn Siohwa Koht, mehnda ma kitail pahn pwangada ni paliwar, ahpw kitail sohte pahn pwangada ni atail papah Ih. Siohwa “kin ketin kakehlahda me luwet oh me pwangadahr kan.” (Aiseia 40:28, 29) Wahnpoaron Pohl, me pein kilang mehlelpen mahsen pwukat, ntingihdi: “Ih kahrepen at sohte kin loaltikla. Pwe ma paliwarat kin luhluwetala, a pali ngenit kin kekehlailla rahn koaros.”​—2 Korint 4:16.

¹⁷ Menlau tehk lepin mahsen pwukat “rahn koaros.” Met wehwehki me kitail pahn ale sawas sang rehn Siohwa rahn koaros ni atail pahn idawehn oh kapwaiada koasoandi kan me Siohwa koasoanehdi ong sapwellime aramas akan. Emen sister me, ni lelepek, wia doadoahk en misineri erein sounpahr 43, kin lelohng ahnsou kan me e kin pwangada ni paliwar oh pil ahnsou kan me e kin kapehd tikitikla. Ahpw, e sohte kesehla ah doadoahk en papah Siohwa. E koasoia: “I kin ahn ahi koasoandi en pirida mwadang ni menseng pwe mwohn I pahn wia ahi doadoahk, I kin kapakap ong Siohwa oh wadek sapwellime Mahsen. Koasoandi wet kin sewese ie en dadaurete lel met.” Kitail kak likih sapwellimen Siohwa sawas oh kehl ma kitail pahn “rahn koaros” kapakap ong Ih oh doudouloale duwen sapwellime irair kaselel kan oh sapwellime inou kan.

18. Soangen kangoang dahieu me Paipel kin ketikihda me pidada irail me mah oh soumwahu kan me lelepek ong Siohwa?

¹⁸ Met kin inenen sawas laud ong irail me nan kapehd tikitiklahr pwehki irail mahla oh soumwahu. Soangen aramas pwukat kin pahtou, kaidehn pwehki irail men duwehte meteikan, ahpw pwehki irail kin tamataman mahs ahnsou me re kehlail. E kin kansenamwahu en ese me Siohwa kin wauneki irail me mah kan! Pwuhk Sarawi mahsanih: “Mour werei iei ketingpen pwung; moangepwet iei kapwat lingan ehu.” (Lepin Padahk 16:31) Siohwa kin ketin mwangih atail luwet akan oh E kin kesempwaliki atail kaudok ong Ih sang mohngiongatail unsek mendahki atail soh-itar akan. Oh Siohwa kin tamataman wiewia mwahu kan me kitail wiadahr. Pwuhk Sarawi kin kamehlelehiong kitail met: “Koht me uhdahn pwung; e sohte kin ketin meliehla amwail wiewia mwahu kan de amwail limpoak ong mware ni sawas me kumwail kasalehdahr ong riamwail kan oh pil ni amwail kin papah ih ni lelepek.” (Ipru 6:10, NW) Ia uwen atail peren en kilang nanpwungatail irail kan me lelepek papah Siohwa erein sounpahr tohto!

Ken Dehr Kesehla Ahmw Pwoson

19. Iaduwen kitail kak paiekihda atail wiewia dahme mwahu?

¹⁹ Aramas tohto kin kamehlele me eksersais kehlail oh doadoahk laud kin katikala atail pwang. Duwehte met, ma kitail kaukaule wia koasoandi ngenin kan, mehpwukat pahn kihsang pepehm en pwang ni pali ngehn oh pepehm kan. Pwuhk Sarawi mahsanih: “Kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung. Eri, nin doken eh mie atail ahnsou, kitail en wia mwahu ong aramas koaros, ahpw mehlel ong irail kan me kisehn atail pwoson.” (Kalesia 6:9, 10) Menlau tehk lepin mahsen pwukat: “wiewia mwahu kan” oh “wia mwahu ong . . . .” Mahsen pwukat kasalehda me mie atail pwukoa. Wia mwahu ong meteikan pahn sewese kitail en dehr pwangahkihda atail papah Siohwa.

20. Ma kitail sohte men nsensuwed oh pahtou, kitail sohte pahn werekiong ihs?

²⁰ Weksang met, werekiong irail me sohte kin kesempwaliki sapwellimen Koht koasoandi kan kin wia mehkot katoutou oh kapwang ong kitail. Pwuhk Sarawi mahsanih: “Toutoun takai oh pihk kan sohte kak kapahrekiong kahpwal me aramas pweipwei kak wiahda.” (Lepin Padahk 27:3) Ma kitail sohte men ahneki pepehm en nsensuwed, pahtou oh pwang, kitail sohte pahn werekiong aramas akan me kin kalap ahneki madamadau suwed kan oh irail me kin kalap rapahki sapwung en meteikan oh kauwe irail.

21. Iaduwen kitail kak kangoange meteikan ahnsoun mihding kan?

²¹ Mihding en Kristian kan kin wia koasoandi mwahu sang rehn Siohwa me kak sewese kitail en ahneki kehl en pali ngehn. Ahnsoun mihding kan, kitail kak kangoange meteikan oh pil ale kaweid oh werek mwahu rehn riatail me pwoson kan. (Ipru 10:25) Koaros nan mwomwohdiso anahne kangoange meteikan ni arail kin wia arail pasapeng kan, padahk kan, kamwomwada kan oh interview kan. Irail akan me kin apwalih mwomwohdiso nin duwen sounpadahk kan keieu anahne kangoange meteikan. (Aiseia 32:1, 2) Ni ahnsou me elder kan pahn kaweid meteikan, irail anahne wia met ni elen limpoak oh kadek. (Kalesia 6:1, 2) Atail limpoak ong Siohwa pahn sewese kitail en kasalehiong meteikan limpoak oh kitail sohte pahn pwangahki wia met.​—Melkahka 133:1; Sohn 13:35.

22. Mehnda ma kitail aramas soh-unsek, dahme kahrehda kitail kak eimah?

²² Papah Siohwa ni ahnsou imwi wet kin pidada doadoahk laud. Mehlel, Kristian kan kin lelohng nsensuwed, pahtou, pepehm en nan kapehd tikitikla, oh irair kapwunod akan. Kitail me duwehte dahl kan me wiawihkihda pwehl me luwet. Ahpw, Pwuhk Sarawi mahsanih: “Ahpw, kiht me kin ahneki pai kesempwal wet, se rasehng sah pwehl kan me kopwukopw oh kehohla; eri met pwe en kadehdehda duwen manaman lapalap eh uhdahn sapwellimen Koht, a kaidehk aht.” (2 Korint 4:7) Ei, kitail pahn pwang, ahpw kitail en dehr pwangahki papah Siohwa de kesehla atail pwoson. Weksang met, kitail en “eimah oh patohwan: ‘Siohwa iei sawasepei.’ ”​—Ipru 13:6, NW.

Kousapahl

• Ia ekei mehn katoutou kan me kitail kak kihsang atail mour?

• Iaduwen kitail kak “wia mwahu” ong riatail Kristian kan?

• Iaduwen Siohwa kin kakehle kitail ni ahnsou me kitail kin pwangada, nsensuwed oh pahtou?

[Kilel nan Pali 17]

Sises mwahngih me ma sapwellime wahnpoaron kan pahn pahtou ni ahnsou werei, re pahn kakete luwetala ni pali ngehn

[Kilel nan Pali 18]

Ekei pilada re solahr pahn wia ekei soahng kan me re kin wia ong pein arail peren (hobbies) oh solahr wia koasoandi soh-katepe kan

[Kilel nan Pali 20]

Mendahki kitail soh-unsek, Siohwa kin kesempwaliki atail kaudok me kohsang mohngiong unsek