“Kumwail Kehlailkihda Amwail Miniminiong Kauno”
“Eri, kumwail kehlailkihda amwail miniminiong Kauno oh manaman en sapwellime roson.”—EPISOS 6:10.
1. (a) Mahwen dahieu wiawi sounpar 3,000 samwalahro? (b) Dahme kahrehda Depit kana ki?
SOUNPAR 3,000 samwalahro, sounpei riemen tuhpenehr nan wasahn mahwen oh ira iang pali riau me uhpene. Me pwulopwul rehrao wia sounsilepen sihpw men me adaneki Depit. Kolaiad kesikesihnen mwohn ih, e wia ohl emen me inenen kehlail oh reirei. Ah likou meteo toutouki paun 125, oh e wah lapalahn ketieu toutou ehu iangahki pil ehu lapalahn kedlahs. Depit sohte likawih likou en mahwen, ihte nah mehn pei me e wahda iei pahi ehu. Kodon en Pilisdia Kolaiad sarohkihdi sounpei en Israel me kohdohn peiong ih wia kisin pwutak men. (1 Samuel 17:42-44) Mehn Israel oh Pilisdia me kilikilang met medemedewe me re esehier ihs me pahn kana. Ahpw kaidehkin me kommwad akan me kin ahnsou koaros powehdi nan mahwen. (Eklesiasdes 9:11) Depit kana pwehki e peiki sapwellimen Siohwa kehl. E mahsanih, “Sapwellimen Siohwa mahwen wet.” Pwuhk Sarawi kilelehdi me “Depit, ahpw kalowehdi oh kemehkihla Kolaiad pahi ehu oh takai ehu.”—1 Samuel 17:47, 50.
2. Soangen mahwen dahieu me Kristian akan kin iang wia?
2 Kristian akan sohte kin iang mahwen. Mendahki irail kin wia aramas meleilei kei, irail kin pei nan mahwen en ngehn ehu ong irail sounmahwen kehlail kei. (Rom 12:18) Nan irelaud kaimwiseklahn sapwellime kisinlikou ong mehn Episos ko, Pohl kawehwehda duwen mahwen ehu me Kristian koaros iang pidada. E ntingihdi: “Pwe kaidehk aramas ekei me kitail mahweniong, pwe ong manaman en ngehn suwed kan en pahnlahng oh ong kaun akan oh me lapalap akan me ahneki manaman, oh pil ong koht akan me kaunda dih rotorot wet.—Episos 6:12.
3. Nin duwen me Episos 6:10, dahme kitail anahne pwehn pweida?
3 Irail “manaman en ngehn suwed kan” iei Sehdan oh ngehn saut akan, me inengieng en kauwehla atail nanpwungmwahu rehn Siohwa Koht. Pwehki irail kehlail sang kitail, kitail pil mih nan irairohte me Depit mih loale, oh kitail sohte pahn kak kana ma kitail sohte kehlki kehl en Koht. Ihme Pohl kangoange kitail en “kehlailkihda atail miniminiong Kauno oh manaman en sapwellime roson.” (Episos 6:10) Mwurin ah kihda kaweid, wahnpoarono kawehwehda soangen sawas ngenin kan me mie oh soangen irair en Kristian kan me kak sewese kitail en kak kana nan mahwen.—Episos 6:11-17.
4. Iren kasukuhl riau dah me kitail pahn kilang nan artikel wet?
4 Kitail pahn kilang dahme iren Pwuhk Sarawi kan mahsanihki duwen kehl oh ahl akan en atail imwintihtio. Mwuhr, kitail pahn kilang soangen ahl akan me kitail pahn kak pere pein kitail. Ma kitail pahn idawehn kaweid en Siohwa, kitail kak koapworoapworki me atail imwintihti kan sohte pahn kak poweikitaildi.
Pei ong Ngehn Suwed akan
5. Iaduwen tepin kawehwehpen lepin lokaia nan Episos 6:12 kasalehiong kitail duwen elen Sehdan akan?”
5 Pohl kawehwehda me kitail “mahweniong . . . manaman en ngehn suwed kan en pahnlahng.” Ngehn suwed me keieu kehlail iei Sehdan me Tepil, “kaun en ngehn suwed akan.” (Madiu 12:24-26) Pwuhk Sarawi karasahieng pei wet duwehte “poadoar” de poadoar en peh. Ni mwehin mehn Krihs, ahnsou me poadoar ehu kin wiawi, emenemente kin nantiong en kahrehiong mehteio en salahngada pwehn kesehdi mehteio nan pwehlo. Duwehte met, Tepilo pil kin nantiong en kahrehong kitail en salahngada ni pali ngehn. Iaduwen eh kak kahrehiong kitail en wia met?
6. Doadoahngki iren Pwuhk Sarawi pwehn kasalehda iaduwen Tepilo kin doadoahngki soangsoangen ahl wekpeseng kan pwehn kalowehdi atail pwoson.
6 Tepilo kak mwekid nin duwen sineik men, laion men me weriwerseli, de pil tohnleng en marain. (2 Korint 11:3, 14; 1 Piter 5:8) E kak doadoahngki aramas pwehn kaloke kitail de kahrehong kitail en luwetala. (Kaudiahl 2:10) Pwehki Sehdan ahneki manaman pohn sampah, e kak doadoahngki ineng oh lingan en sampah pwehn lidipeikitaildi. (2 Timoty 2:26; 1 Sohn 2:16; 5:19) E kak doadoahngki madamadau en sampah de madamadau en uhwong kan duwehte eh pitihdi Ihp.—1 Timoty 2:14.
7. Dahme ngehn saut akan sohte kak wia, oh met wia kamwahu dah kei ong kitail?
7 Mendahki soangen mehn uhwong kan oh pil kehl en Sehdan oh nah ngehn saut akan me mwomwen kehlail, miehte pil soahng kan me re sohte kakong. Ngehn suwed pwukat sohte kak idingki kitail en wia soahng kan me suwed oh kin kansensuwedih Samatail nanleng. Kitail wiawihda en pein pilada ma kitail en wia me pwung de me sapwung, oh kitail pein kaun atail madamadau oh wiewia kan. Pil ehu, kitail sohte kelepw. Dahme wiawi ni mwehin Elisa duwehte pil nan atail ahnsou: “Iangata kan tohtohsang irail.” (2 Nanmwarki 6:16) Pwuhk Sarawi kamehlelehong kitail me ma kitail pahn peikiong Koht oh pelianda Tepil, Tepil pahn tangasang kitail.—Seims 4:7.
Pohnese en Sehdan Doadoahk kan
8, 9. Soangen kahpwal dah kan me Sehdan wahdohng Sohp pwehn kawehla eh loaloapwoat, oh soangen keper en pali ngehn dah kan me kitail kin lelohng nan rahnpwukat?
8 Kitail kin ese en Sehdan doadoahk kan pwehki iren Pwuhk Sarawi kan kin kasalehda duwen ahl akan me e kin doadoahngki. (2 Korint 2:11) Ong ohl pwungo Sohp, Tepilo doadoahngki paisuwed, mehlahn kompoakpe kan, uhwong en peneinei, lokolok en paliwar, oh karaun likamw en irail akan me sohte wia kompoakpe mehlel kei. (Sohp 10:1, 2) Mendahki Sehdan mwein sohte pein kahrehda kahpwal kan rahnpwukat, kahpwal akan kin lelohng Kristian akan, oh Tepil kin doadoahngki lokolok me re lelohng pwehn wia kamwahupe.
9 Keper akan ong pali ngehn kin lalaudala nan imwin ahnsouwet. Kitail mih nan sampah ehu me repen kepwehn sampah kin kehlailsang wia mehn akadei en pali ngehn. Kasdo kan kin kalapw kasalehda tiahk suwed akan nin duwen mehkot kaperen oh kaidehn mehn kansensuwed. Oh pali laud en aramas kin “inengieng pein arail peren laudsang kupwur en Koht.” (2 Timoty 3:1-5) Soangen madamadau wet kak keper ong pali ngehn ma kitail sohte “kehlail nan mouren pwoson.”—Sud 3.
10-12. (a) Ia ehu kehkehlik me Sises kihda nan eh karasaras en sounkamwerek weren tuhkeo? (b) Karasahda iaduwen irair akan eh kak kasokehla atail irair en pali ngehn.
10 Ehu elen Sehdan me kin inenen pweida iei en kahrehiong kitail en nohn nsenohkihla repen kepwehn sampah. Nan sapwellime karasaras en soun kamwarako, Sises kasalehda me ong ekei “anahn en sampah kan oh poakepen dipwisou kan kin kasokehla mahseno rehrail, iei me e sohte kin wahki.” (Madiu 13:18, 22) Lepin lokaiahn Krihk ong “kasokehla” kin wehwehki “padikpene oh kamwopwehla douluhl.”
11 Nan wahl akan, kin mie soangen tuhke en me ni lokaiahn wai adaneki “strangler fig.” E kin ekis ekis kekeirada oh pidila tapin tuhke. Ni ah kin ekis ekis kekeirada oh pidila tuhkeo, kalowe ko kin wia kehkehlailla. Kalowen tuhken kin kangasang ketihnain en pwelen tapin tuhkeo oh mwetehla tuhke oh perehlahsang marain en ketipin. Mwuhr, tuhke me e pidilao eri kin mehla.
12 Ni ahlohte, pwunod en koasoandi wet oh repen kepwehpwe oh mour nsenamwahu kin ekis ekis kihsang atail ahnsou oh kehl. Ni atail kedirepwkihla kepwehn sampah, kitail kak mengei en sohla tehk oh wia pein atail onop Pwuhk Sarawi oh uhd wiahkihla atail tiahk en katiasang mihding en Kristian akan, oh sohte alehda mwengehn ngehn. Mehn akadei en noahrok kepwe kan uhd weliandi mehn akadei ngenin kan, oh e mengei ong kitail en lohdi pahn Sehdan.
Kitail Anahne en Kesihnenda Teng
13, 14. Dahme kitail anahne en wia ni ahnsou me Sehdan kin uhwong kitail?
13 Pohl kangoange me pwoson kan en “pelianda kehlail en Tepil eh widing suwed kan.” (Episos 6:11) Mehlel, me kitail sohte kak kalowehdi Tepilo oh nah ngehn saut akan. Koht ketikihong Sises Krais pwukoa wet. (Kaudiahl 20:1, 2) Erein Sehdan ah mihmihte, kitail anahne en “kesihnenda teng” pwe en dehr kaloweikitaildi.
14 Wahnpoaron Piter pil kasalehda anahnepen en kesihnenda teng oh pelianda Sehdan. Piter ntingihedi, “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla. Eri, kumwail tengeteng ni amwail pwoson oh kehlail ong ih, pwe kumwail ese me riamwail brother kan wasa koaros nin sampah kin iang kumwail mihla nan soangen lokolok me kumwail kin mihla loale.” (1 Piter 5:8, 9) Ni mehlel, sawas en kitail kan en pali ngehn kin kesempwal mehlel ni atail kin kesihnenda teng ni Sehdan e kin pei ong kitail nin duwen laion emen me wia weriwer.
15, 16. Doadoahngki ehu karasepen iren Pwuhk Sarawi me kin kasalehda iaduwen sawas de utuht en riatail nan pwoson kan kak sewese kitail en kak kesihnenda teng.
15 Ahnsou me laion emen me keren en kin wer nan wasa patapat me sohte tuhke kan nan Africa, tie kan kin rongete oh pitipitte tangasang wasao ni marahra oh tang lao irail pitsang nan kahpwal. Elephant kan kin wia mehn karasepe mwahu duwen en sawaspene. Pwuhko Elephants—Gentle Giants of Africa and Asia kawehwehda: “Elen pere irail me elephant kan kin wia iet en mwutumwutpene oh pidakiala elephant tikitik ko oh irail me laud ko sohpeilahng imwintihti kan.” Ni laion kan kin kilang ahr mwutumwutpeneo oh duwen kehl me re ahneki, e sohte kin peiong irail de pil elephant pwulopwul ko.
16 Ni Sehdan oh nah ngehn saut akan kin uhwong kitail, kitail anahne en mihmihpene oh ehuong riatail me kehlail ni pali ngehn. Pohl kasalehda me ekei Kristian akan kin wia “sawas laud” ong ih ahnsou me e sensel nan Rom. (Kolose 4:10, 11) Lepin lokaiahn Krihk me kawehwehda “sawas laud” pak ehute nan pali nting en Krihk. Nin duwen me Vine’s Expository Dictionary of New Testament Words, “kawehwehda lepin lokaia wet kin mwete wini me kin kihsang medek.” Duwehte wini kansenamwahu ehu, sawas en tohnkaudok mah kan en Siohwa kin sewese kihsang medek en pepehm oh lokolok en paliwar.
17. Dahme kak sewese kitail en lelepek ong Koht?
17 Kangoang sang riatail Kristian kan nan rahnwet kak sewese kitail en koasonehdi en papah Koht ni lelepek. Eri, keieu irail Kristian elder kan me kin men kihda sawas ngenin kan. (Seims 5:13-15) Pwe kitail en kak wie papah ni lelepek, kitail anahne onop Pwuhk Sarawi kaukaule oh iang mihding en Kristian kan, kapokon tikitik kan oh kapokon laud kan. Atail nanpwungmwahu rehn Koht kin sewese kitail en papah Ih ni lelepek. Kahrehda, mehnda ma kitail wie mwengemwenge, niminim, de wia soahng soh lipilipil kan, kitail pahn kin men wia soahng koaros me pahn kalinganahda Koht. (1 Korint 10:31) Likih Siohwa oh kapakap ong Ih inenen kesempwal pwe kitail en kak doudoulahte oh kaperenda Ih.—Melkahka 37:5.
18. Dahme kahrehda kitail en dehr uhdi, mehnda ma soangen irair kapwunod kan kin kihsang atail kehl?
18 Ekei pak Sehdan kin kasonge kitail ahnsou kan me kitail kin luwet ni pali ngehn. Laion men kin lusuk mahn emen me luwetala. Kahpwal en peneinei, kahpwal en mwohni, de soumwahu kak kaluwetala atail kehl en pali ngehn. Ahpw kitail en dehr uhdihsang wia mehkan me kin kaperenda Koht, pwe Pohl nda: “Pwe ni ei kin luwet, iei ahnsou me I kin kehlail.” (2 Korint 12:10; Kalesia 6:9; 2 Deselonika 3:13) Dahme e ndinda wasaht? E ndinda me sapwellimen Siohwa kehl kak wia kamwahu ong luwet en war, ma kitail kapakapki kehl en Siohwa. En Depit powehdi Kolaiad kasalehda me Koht kak kakehle sapwellime aramas. Sounkadehdehn Siohwa kan nan rahnpwukat kin kak kasalehda duwen sawas kan me Siohwa kin ketikihong irail nan ahnsou suwed pwukat.—Daniel 10:19.
19. Kihda ehu karasepen me Siohwa kak kakehle sapwellime ladu kan.
19 Me pid duwen sawas kan me Koht kin kihong irail, ehu pwopwoud kasalehda: “Sounpar kan me dower powe, se kin papah Siohwa nin duwen pwopwoud ehu oh se kin perenki kapai kan me se kin alehdi oh aramas mwahu kan me se kin tuhwong. Se pil ale kasukuhl oh kakehl sang Siohwa pwehn powehdi kahpwal akan. Duwehte Sohp, kitail sohte kin ahnsou koaros wehwehki kahrepen irail kan me kin pwarada, ahpw kitail ese me Siohwa kin ahnsou koaros onopadahr pwehn sawas.”
20. ia iren Pwuhk Sarawi kan me kasalehda me Siohwa kin ahnsou koaros sewese sapwellime aramas?
20 Siohwa kin sewese oh kakehle sapwellime aramas lelepek kan. (Aiseia 59:1) Sounmelkahka Depit koulki: “Siohwa kin ketin sewese irail kan me kin pwupwudi; e kin ketin pwekada irail kan me kin mihla nan apwal.” (Melkahka 145:14, NW) Ehi, Samatail nanleng “kin ketiki atail tungoal wisik toutou kan rahn koaros” oh ketikihong kitail soahng kan me kitail uhdahn anahne.—Melkahka 68:19.
Kitail Anahne “Tehtehn Mahwen Koaros me Koht Ketikihda”
21. Ia duwen Pohl kasalehda duwen anahnepen tehtehn mahwen en ngehn?
21 Kitail tehkpenehier ahl akan me Sehdan kin doadoahngki oh kilangehr anahnepen kesihnenda teng mendahki eh kin uhwong kitail. Met kitail pahn pil tehkpene ehu sawas me kohda pwe kitail en kak pweida ni atail pere atail pwoson. Pak riau nan sapwellime kisinlikou ong mehn Episos ko, wahnpoaron Pohl koasoiahda dahme anahn pwehn pelianda oh powehdi elen Sehdan kan oh pweida nan atail peiong ngehn suwed kan. Pohl ntingihdi: “Kumwail pwuhriong nan tehtehn mahwen koaros me Koht ketikihong kumwail, pwe kumwail en kak pelianda kehlail en Tepil eh widing suwed kan . . . Eri, kumwail ale sapwellimen Koht tehtehn mahwen, pwe ni rahn suwedo eh pahn leledo, kumwail en kak kehlail ong amwail imwintihtio, oh ni imwila, kumwail en dadaurete, sohte lohdi.”—Episos 6:11, 13.
22, 23. (a) Soahng dah kan me wia kisehn atail tehtehn mahwen? (b) Dahme kitail pahn tehkpene nan artikel en mwurin met?
22 Ei, kitail anahne en pwuhriong nan “tehtehn mahwen koaros me Koht ketikihong kitail.” Ni ahnsou me Pohl ntingihda sapwellime kisinlikou ong mehn Episos ko, irail sounpei en Rom kan, me kin sinsile ih mwein ekei pak kin pwuhriong nan tehtehn mahwen en Koht. Ahpw, ngehn sarawi en Koht me kamwekid wahnpoarono en kasalehda tehtehn mahwen me sapwellimen Siohwa ladu kan koaros anahne likoukihda.
23 Tehtehn mahwen me Koht ketikihda iei irair akan me Kristian men anahne ahneki iangahki koasondi ngehnin akan me Siohwa kin koasoanehdi. Nan artikel en mwurin met, kitail pahn tehkpene ehu ehu kisehn tehtehn mahwen wet. Met pahn kasalehiong kitail soangen perepe dah kan me mie ong atail pali ngehn. Ni ahnsowohte, kitail pahn kilang iaduwen mehn karasepe mwahu kan en Sises Krais kak sewese kitail en pweida nan atail pelianda Sehdan me Tepil.
Iaduwen Ahmw Pahn Sapeng?
• Soangen mahwen dah ehu me Kristian akan kin iang wia?
• Kawehwehda ia ekei ahl akan me Sehdan kin doadoahngki.
• Iaduwen sawas en riatail nan pwoson kan kak kakehle kitail?
• Sapwellimen ihs kehl me kitail en kehliki, oh pwekida?
[Kilel nan Pali 7]
Kristian akan ‘kin pepeiong ngehn suwed akan’
[Kilel nan Pali 8]
Iren kapwunod akan en koasoandi wet kak kasokehla mahsen en Wehio
[Kilel nan Pali 9]
Kristian akan kak wia “sawas laud ehu”
[Kilel nan Pali 10]
Ke kin kapakap oh peki kakehl sang rehn Koht?