Ngehn Saut akan—Iaduwen Kitail Kak Pelianda Irail?
“Kumwail tamanda tohnleng ko me sohte mihmihte nan uhdahn dewerail, ahpw kesehla uhdahn ar wasa: Koht ahpw ketin salihkiniraildi selmete poatopoat nan wasa rotorot mosul pah, oh ketin nekinekid irail ong kadeikparail ni Rahn Lapalapo.”—SUD 6.
1, 2. Peidek dah kei kohda duwen Sehdan me Tepil oh ngehn saut akan?
WAHNPOARON Piter kihda peneu: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.” (1 Piter 5:8) Me pid duwen ngehn saut akan, wahnpoaron Pohl koasoia: “Eri, I sohte mwahuki kumwail en ehuong tepil kan. Kumwail sohte kak nimpil sang nan sapwellimen Kaun-o dahl oh pil nimpil sang nan nein tepil kan dahl; kumwail sohte kak mwohdehng sapwellimen Kaun-o tehpel oh pil ni tehpel en tepil kan.”—1 Korint 10:20, 21.
2 Ahpw ihs Sehdan me Tepil oh ngehn saut akan? Iaduwen oh iahd irail miehla? Koht ketin kapikada irail? Ia wen kehlail en arail kehl oh manaman pohn aramas akan? Mehnia soangen mehn poadoandor kan, ma mie, kitail kak pelianiki irail?
Iaduwen Sehdan oh Ngehn Saut akan Miehla?
3. Iaduwen emen sapwellimen Koht tohnleng wiahla Sehdan me Tepil?
3 Ni tepin poadoapoad en aramas, ahnsou me aramas tepin miehla nan mwetuwel en Ihden, sapwellimen Koht tohnleng emen tepida men uhwongada ih. Pwekida? Pwehki menet sohte itarki pwukoa me e ahneki nan sapwellimen Siohwa koasoandi kan nanleng. Ki kapikipikda en Adam oh Ihp, e kilangada ahl ehu en wekid sang ara peik oh kaudok ong Koht ohng pein ih. Ni ah pelianda Koht oh kahrehong tepin pwopwoud en pilada ahl en dihp, tohnleng menet wiahiong pein ih en wiahla Sehdan me Tepil. Mwurin mwo, tohnleng teikan iangala ih oh uhwongada Koht. Iaduwen?—Senesis 3:1-6; Rom 5:12; Kaudiahl 12:9.
4. Dahme ekei irail tohnleng kan me uhwongada Koht wia mohn Nohliko ni mwein Noha?
4 Pwuhk sarawi padahkiong kitail me ahnsou kis mwohn Nohlik lapalap nan mwein Noha, mie tohnleng kei me tepida ahneki madamadau sapwung ohng lih en sampah kan. Ohng kahrepe sapwung wet Paipel mahsanih: “Ekei nein koht ko ni ar kilangada lingan en serepein ko, re ahpw pwoudikihda me re mwahuki kan.” Soangen tiahk en werek pwukat sapwung, kahrehda irail nainekihda soangen seri kei me kin adaneki Nepilim. (Senesis 6:2-4) Irail ngehn akan me sapeik ohng Koht iangala Sehdan pelianda Siohwa.
5. Dahme wiawiong tohnleng suwed kan ahnsou me Siohwa kasohrala sampah ki Nohliko?
5 Ni ahnsou me Siohwa kahrehdo Nohliko pohn aramas akan, Nepilim kan oh arail nohno me wia aramas en sampah kan mehla. Tohnleng suwed akan ahpw anahne en pwilikihdi arail paliwar uduk oh pwurala nanleng. Ahpw irail solahr kak pil pwurehng “mihmihte nan uhdahn dewerail” rehn Koht. Ahpw re selidi “nan wasa rotorot mosul [ni pali ngehn].”—Sud 6; 2 Piter 2:4.
6. Iaduwen ngehn saut akan kin pitihedi aramas akan?
6 Sangete ahnsou me tohnleng suwed kan kesehla “uhdahn dewerail” irail wia ngehn saut akan en Sehdan me utung ah doadoahk suwed kan. Sang ahnsou kohkohdo, ngehn saut akan solahr ahneki manaman en alehda paliwar uduk. Ahpw irail kak kasonge lih oh ohl akan en wia soangsoangen tiahk en nenek samin kan. Ngehn saut akan kin pil pwerisek en pitiheki aramas akan wunahni, me kin iangahki soahng kan duwehte akmanaman, mesehl, oh ketieni. (Deuderonomi 18:10-13; 2 Kronikel 33:6) Imwilahn tohnleng suwed pwukat pahn duwehte en Tepil—kasohrala soutuk. (Madiu 25:41; Kaudiahl 20:10) Ahpw ni ahnsou pwukat, kitail anahne kesihnenda teng oh pelianda irail. E pahn elen loalokong ma kitail kin tehk kanaiehng ia wen kehlail oh manaman en Sehdan oh iaduwen kitail kak pelianda ih oh nah ngehn saut akan.
Ia Wen Kehlail oh Manaman en Sehdan?
7. Soangen manaman dah ehu Sehdan ahneki pohn Sampah?
7 Erein poadoapoad en aramas, Sehdan kin karaun likamwih Siohwa. (Lepin Padahk 27:11) Oh eh pil kahredahr pali laud en aramas akan mihla pahn eh manaman. Nan 1 Sohn 5:19 mahsanih: “Sampah unsek mi pahn manaman en Me Suwedo.” Ki kahrepe wet, Tepil kak en kasonge Sises oh men kihong ih en ahneki manaman oh lingan en “wehin sampah koaruhsie.” (Luk 4:5-7) Me pid Sehdan, Wahnpoaron Pohl koasoia: “Ma rongamwahu me se kin kapahrengki me sawehwe, eri, ongete me pahn lekdekla kan me e sawehwehiong. Re sohte kin pwoson, pwehki nan kapehdirail kan rotorotkilahr koht suwed en sampah wet. Koht menet kin karotongeirailla pwe re dehr kilang marain me dakedaker irail, marain en Rongamwahu duwen lingan en Krais, me uhdahn duwehte mwomwen Koht.” (2 Korint 4:3, 4) Sehdan iei “ih likamw men, oh pil semen soangen likamw koaros,” ahpw e wekidala pein ih duwehte “tohnleng en marain.” (Sohn 8:44; 2 Korint 11:14) E ahneki manaman oh wiepe kan me anahn pwehn karotongehla kaun akan en sampah oh irail akan me re kin kaunda. Ni e kin doadoahngki koasoi likamw akan, koasoi en pelian lamalam kan duwen tiahk en mahs akan oh pil arail padahk likamw akan, e kin pitihdi aramas.
8. Dahme Paipel kasalehda duwen en Sehdan manaman oh kehl en kamwekid aramas akan?
8 En Sehdan kehl en kamwekid aramas sansalda ni ahnsou en soukohp Daniel, mpen sounpar 2,500 samwalahr. Ahnsou me Siohwa kadarala tohnleng emen en wahla mahsan en kangoang ohng Daniel, tohnleng menet lelong pelianda ehu sang “tohnleng soupeidi en wehin Persia.” Tohnleng lelepeko kolokoldi erein rahn rieisek ehu lao lel ahnsou me, “Maikel, emen tohnleng lapalap ako,” ahpw ketido pwehn sewese ih. Dahme wiawi kin pil koasoia duwen “tohnleng [ngehn saut] silepe en Krihs.” (Daniel 10:12, 13, 20) Oh nan Kaudiahl 13:1, 2, Sehdan kin kasansalda duwen ih me iei ih “Drakono” me kihong mahn lawalo me wia palien politik “pein eh kehl, mwoale, oh eh manaman en kaunda wasa.”
9. Ihs me Kristian akan kin mahweniong?
9 Ih kahrepen wahnpoaron Pohl ntingihdi: “Pwe kaidehk aramas ekei me kitail mahweniong, pwe ong manaman en ngehn suwed kan en pahnlahng oh ong kaun akan oh me lapalap akan me ahneki manaman, oh pil ong koht akan me kaunda dih rotorot wet.” (Episos 6:12) Leledo nan rahnpwukat, ni soh sansal, Sehdan kin katanga karis en ngehn saut akan, en doadoahngki arail manaman ohng kaun en aramas akan oh pil aramas en sampah kan, pwe irail en wiahda tiahk en kemehla keinek kan, tiahk en terrorist oh tiahk en kamaramas. Kitail pahn tehk met iaduwen kitail kak pweida ni atail pahn pelianda ngehn kehlail pwukat.
Soangen Mehn Pelian Dahkei Kitail Ahneki?
10, 11. Iaduwen kitail kak pelianda Sehdan oh nah tohnleng suwed akan?
10 Kitail sohte kak pelianda Sehdan oh nah tohnleng suwed akan ki pein atail kehl, mendahki ma kehl en lamalam de kehl en paliwar. Pohl kin kaweidki: “Eri, kumwail kehlailkihda amwail miniminiong Kaun-o oh manaman en sapwellime roson.” Kitail anahne en sohpeilahng Koht ong mehn perepatail. Pohl kapataiong: “Kumwail pwuhriong nan tehtehn mahwen koaros me Koht ketikihong kumwail, pwe kumwail en kak pelianda kehlail en Tepil eh widing suwed kan. Eri, kumwail ale sapwellimen Koht tehtehn mahwen [“koaros,” NW] pwe ni rahn suwedo eh pahn leledo, kumwail en kak kehlail ong amwail imwintihtio, oh ni imwilah kumwail en dadaurete, sohte lohdi.”—Episos 6:10, 11, 13.
11 Pak riau Pohl kangoangehki ienge Kristian akan en pwuhriong “tehtehn mahwen koaros me Koht ketikihong.” Lepin lokaia wet “koaros” kin wehwehki, en pelian ahpw kaidehn ni mohngiong unsek pahn sohte itar en pelianda ngehn saut akan. Eri, mehnia pali kesempwal akan en tehtehn mahwen me Kristian akan rahn pwukat anahne ni ahnsou karuwaru pwe en pelianda ngehn saut akan?
“Kesihnenda Teng”—Iaduwen?
12. Iaduwen Kristian akan en katengehki lukeparail padahk mehlel?
12 Pohl kawehwehda: “Eri, kumwail onopada [“Kesihnenda teng,” NW]! Katengehki lukepamwail kan kateng en me mehlel; kumwail perehki mwaremwaramwail kan perehpen pwung.” (Episos 6:14) Pali riau en tehtehn mahwen wet iei mehn kateng oh mehn perehki mwaremwaramwail. Sounpei men anahne katengehdi teng ah mehn katenge lukepe pwe en kak perehla lukepe (me iangahki pwone, denge oh kapehde) oh pil kak wahda nah kedlahs. Pwe en pil duwehte, kitail anahne padahk mehlel en Paipel en kapilpene atail mour teng pwe kitail en mour pahrekiong padahk mehlel. Kitail kin ahneki koasoandi en wadek Paipel rahn koaros? Iaduwe, atail tohn peneinei pwon kin iang towehda? Kitail kin ahneki koasoandi en rahn koaros en kin tehkpene iren rahn nin duwen peneinei ehu? Patehng met, kitail kin iang wadewadek kawehwe kan en neitail pwuhk kan me kohsang rehn “ladu lelepek oh loalokong”? (Madiu 24:45) Ma iei, kitail kin nannanti en mourki en Pohl ah kaweido. Kitail kin pil naineki video kan oh DVD kan me kak kihda kaweid en Pwuhk Sarawi kan. Atail kin kolokol padahk mehlel kin kak sewese kitail en wiahda pilipil mwahu kan oh perehla kitail sang en keid ni ahl sapwung.
13. Iaduwen kitail kak perehla atail mohngiong en karasaras?
13 Uhdahn perepen mwaremwarerail kin kadoadoahk en perehla en sounpei men ah mohngiong oh kepwe kesempwal akan nan paliwere. Kristian emen kak perehla ah mohngiong me wia ni karasaras—loalen aramaso—ni eh pahn kakairada limpoak ohng Sapwellimen Koht pwung kan oh uhpaiong koasoandi pwung kan en Siohwa. Mwaremwaretail ni karasaras kin perehla kitail sang en katikala atail kin kesempwaliki mahsan en Koht. Ni atail kin tepida “tatki me suwed, oh kesempwalki dahme mwahu,” kitail kin kaweid atail kahk en dehr wia “soangen tiahk suwed koaros.”—Eimwos 5:15; Melkahka 119:101.
14. Ia wehwehn en “suhtihada kupwur en ngoang en waseli rongamwahu en popohl”?
14 Nehn sounpei en Rom kan kin suhtihada suht kehlail oh mwahu kan ohng arail en karis kohwei mwail epwiki kei pohn ahl akan en Rom me kapilpene wehio. Dahme lokaia pwukat ‘suhtihada kupwur en ngoang en waseli Rongamwahu en popohl” kin wehwehiong Kristian akan? (Episos 6:15) Met kin wehwehki me kitail kin kaunopada mwahu. Kitail kin kaunopada mwahu pwehn kalohki rongamwahu en Wehin Koht ni ahnsou mwahu kan koaros me kohda. (Rom 10:13-15) Atail kin soupisengki doadoahk en kalohk en Kristian kin wia mehn perepe ohng en Sehdan “widing suwed kan.”—Episos 6:11.
15. (a) Dahme kasalehda me pwoson me wia mehn sansar kin inenen kesempwal? (b) Mehnia “ketieu kisiniei” me kak kaluwetehla atail pwoson?
15 Pohl doula, “Ahnsou koaros kumwail pahn wa pwoson pwe en wia amwail mehn sansar, pwe kumwail en kak kakunkihla ketieu kisiniei kan sang rehn Me Suwedo.” (Episos 6:16) Kaweido en wa pwoson pwe en wia amwail mehn sansar kin tepikihda “ahnsou koaros” me kasalehda mehn poadoandor en sounpei wet me inenen kesempwal. Atail pwoson en dehr tikitikla. Duwehte mehn poadoandor lapala ehu, atail pwoson kin perehsang kitail en Sehdan “ketieu kisiniei kan.” Dahme mepwukat kin wehwehki nan rahn pwukat? Mepwukat kak wehwehki kapailok kan, karaun likamw akan oh koasoi me kak sohte ni pwon mehlel me wiawihda sang imwintihti kan oh soun padahk likamw akan pwehn wia mehn kaluwetehla atail pwoson. Kesik “ketieu kisiniei” pwukat ele kak pil wia mehn kasongosong kan duwehte, men ahneki kepwe tohto me kin kahrehiong kitail en kedirepwkihla pwainda soangen kepwe tohto, oh kakete kahrehiong kitail en men siai ohng irail kan me mihlahr nan mour me kin suweiki me irail ahneki kepwe tohto oh men ekei en pil ahneki soangen mour ohte. Mwein irail kin nekidala nehrail mwohni kan ohng en kamwahuiala de kalaudehla imwarail kan, ohng wararail weren nan sahpw akan, de mehn kapwat pweilaud kan oh likou wadawad oh kaselel kan me re kin men suweikihseli. Mendahki dahme mehteikan kin wia, kitail anahne en ahneki pwoson kehlail me kak sewese kitail en sarek sang “ketieu kisiniei” pwukat. Iaduwen kitail kak kekeirada oh kolokol pwoson kehlail?—1 Piter 3:3-5; 1 Sohn 2:15-17.
16. Dahme kak sewese kitail en kauwada pwoson kehlail?
16 Kitail kak karanih Koht sang ni atail kin kaukaule pein onopki Paipel oh sang ni atail kin wia kapakap me kasalehda atail nsenoh. Kitail kak ngoangki kapakap ong Siohwa en kakehlahda atail pwoson oh en pil kin wia soangen wiewia kan me kin ehuong de pahrekiong dahme kitail kin kapakapki. Karasepe ehu, kitail kin kaunopada mwahu ong onop en Kahn Iroir en wihk kan oh medemedewe en iang pasapeng? Atail pwoson pahn kehlail ma kitail kin onopki Paipel oh pwuhk kan me poasoanda sang Paipel.—Ipru 10:38, 39; 11:6.
17. Iaduwen kitail kak en ele “ale lisoarop en komour”?
17 Pohl kaimwisekihla oh kawehwehda tehtehn mahwin en pali ngehn ki kaweid wet: “Kumwail pil ale lisoarop en komour oh kedlahs en ngehn sarawi, iei mahsen en Koht.” (Episos 6:17) Lisoarop en mahwen kin perehla moangen sounpeio oh ah mwahliel, utupen wiawihdahn pilipil kan. Pil duwehte, atail koapworopwor en Kristian kin pere atail kehl en madamadau kan. (1 Deselonika 5:8) Me kin weksang audehkihdahte atail madamadau ki mehn akadei kan en sampah wet oh men kepwehpwehla, kitail anahne kainene atail madamadau ohng koapworopwor me Koht ketikihda nin duwen Sises kin pil wia.—Ipru 12:2.
18. Dahme kahrehda kitail en dehr uhdihsang wia atail prokram en kaukaule wadek Paipel?
18 Kaimwisekpen atail mehn poadoandor sang en Sehdan oh nah ngehn saut akan ahr kehl en kamwekid kitail iei mahsan en Koht, de kaweid kan me kileldi nan Paipel. Met pil ehu kahrepe kitail anahne en dehr uhdi sang wia atail prokram en kaukaule wadek Paipel. En kalaudehla oh wehwehkihla loalokong pwung en Mahsan en Koht kin pere kitail sang en Sehdan likamw akan oh en ngehn saut akan ahr kin lohkiseli karaun likamw akan oh pil koasoi en uhwong kan sang soun pelian kan en padahk mehlel.
“Kapakap Ahnsou Koaros”
19, 20. (a) Dahme kin awiawih Sehdan oh nah ngehn saut akan? (b) Dahme kak kakehla kitail ni pali ngehn?
19 Kasohrlahn Sehdan, nah ngehn saut akan oh pil sampah suwed wet kerendohr. Sehdan ese me eh “ahnsou mwotomwotalahr.” E kin lingeringer kowahlap oh kin mahweniong irail akan “me kin kapwaiada kosonned en Koht kan, oh me kin loalopwoatohng padahk me Sises ketin kadehdehier.” (Kaudiahl 12:12, 17) E inenen kesempwal kitail en pelianda Sehdan oh nah ngehn saut akan.
20 Ia wen kitail en kalahnganki kaweid en pwuhriong tehtehn mahwen koaros sang Koht! Pohl kaimwisekihla a koasoia tehtehn mahwen en ngehn ki kaweid wet: “Kumwail wia mepwukat koaros ni kapakap ngidingid, pekipeki sawas sang rehn Koht. Kapakap ahnsou koaros, nin duwen Ngehno eh pahn ketin audehda kapehdamwail kan. Iei me kumwail en mwasamwasahn oh dehr tokedihsang kapakapki sapwellimen Koht aramas akan koaros.” (Episos 6:18) Kapakap kin kakehlahda kitail ni pali ngehn oh sewese kitail en pepehd oh mwasamwasahn. Kitail en ale en Pohl kaweid kan oh katengehdi nan atail mohngiong oh kin kapakap ahnsou koaros pwehki met pahn sewese kitail en pelianda Sehdan oh nah ngehn saut akan.
Dahme Ke Sukuhlikihdi?
• Ia duwen Sehdan oh nah ngehn saut akan miehla?
• Ia uwen kehlail en Tepil?
• Mehn poadoandor dahkei kitail ahneki pwehn pelianda Sehdan oh nah ngehn saut akan?
• Ia duwen kitail kak pwuhriong tehtehn mahwen kan koaros sang Koht?
[Kawehwehpen kilel kan nan ehu ehu pali 27]
“Sapwellimen Koht mehlelo tohnleng akan kilangada nein aramas serepein kan”
[Kawehwehpen kilel kan nan ehu ehu pali 29]
Ke kak kawehwehda pali weneu en atail tehtehn mahwen en pali ngehn?
[Kawehwehpen kilel kan nan ehu ehu pali 31]
Ia duwen iang wia wiewia pwukat kak wia mehn pelian ehu ohng Sehdan oh nah ngehn saut akan?