Ke Kin Alehdi Sapwellimen Siohwa Sawas?

“Siohwa, iei sawasepei, I sohte pahn masak.”​—IPRU 13:6.

1, 2. Dahme kahrehda e kesempwal kitail en ale sapwellimen Siohwa sawas oh kaweid?

NNA, song medewehla ma ke pahn daur nahna ieu. Ke sohte kelepw, pwe sounkaweid men me keieu mai ong kahre aramas akan pekihda rehmw ma e kak kahre iuk. Edetehn e koahiek oh kehlail sang uhk, e kin kanengamah alialuhte limwahmw. E kilang me ke kin kalap dipekelekel. Pwehki ah nsenohkin uhk, e kapahwei peh pwen sewese iuk nan wasa kan me inenen keper. Iaduwen​—⁠ke pahn kahng ale ah sawas? Uhdahn ke sohte pahn kahng! Pwehki ahmw mour mih nan irair keper.

² Nin duwen Kristian akan, kitail kin keid nan ahl apwal ieu. Ahpw, kitail anahne kelehpwla keid nan ahl tikitik wet? (Madiu 7:14) Soh, pwe Pwuhk Sarawi kin kasalehda me Sounkaweid me keieu mai, iei Siohwa Koht, kin mweidong aramas akan en iang Ih kekeid. (Senesis 5:24; 6:⁠9) Siohwa kin sewese sapwellime aramas kan ni ahnsou me irail kin kekeid nan ahlo? E mahsanih: “Ngehi Kauno, amwail Koht; ngehi me kin kakehlakei kumwail oh mahmahsanihong kumwail, ‘Kumwail dehr masak, pwe I pahn sewesei kumwail.’” (Aiseia 41:13) Duwehte sounkaweido nan karasaraso, Siohwa kin kapahwei lime pwen kak sewese kitail oh men kompoakepahnki aramas akan me kin men iang Ih kekeid. Sohte emen rehtail pahn kahng ale sapwellime sawas!

3. Mehnia peidek kan kitail pahn koasoipene nan artikel wet?

³ Nan artikel en mwowe, kitail sukuhliki duwen ahl pahieu me Siohwa kin ketin sewese sapwellime aramas akan mahs. Ahpw, rahnwet, e kin pil sewese sapwellime aramas akan ni soangen ahl pwukat? Oh iaduwen kitail kak ese ma kitail kin alehdi soangen sawas pwukat? Kitail kak koasoiapene duwen peidek pwukat. Sang ni atail kin wia met, kitail kak likih me Siohwa iei Sawaspatail.​—Ipru 13:6.

Sawas Sang Rehn Tohnleng kan

4. Dahme kahrehda sapwellimen Koht ladu kan en rahnwet kak likih me tohnleng kan kin sewese irail?

⁴ Tohnleng kan kin sewese sapwellimen Siohwa ladu kan nan rahnpwukat? Ei, irail kin sewese. Ahpw, nan rahnpwukat, irail sohte kin pwarada pwen doarehla tohnkaudok akan sang keper kan. Ni mehlel, pil ni ahnsou kan me Pwuhk Sarawi ntingdi, pak malaulau me irail tohnleng kan kin pwarada oh kapitala tohnkaudok mehlel akan sang keper kan. Pali laud en ahnsou, tohnleng kan kin sewese aramas akan, ahpw aramas akan sohte kak kilang irail oh doadoahk kan me irail wiewia, oh met kin duwehte atail ahnsou. Ahpw, sapwellimen Koht ladu kan en mahs kin kehlailkihda arail kin wehwehki me tohnleng kan kin sewese irail. (2 Nanmwarki 6:14-​17) Kitail pil kin ahneki kahrepe mwahu en ahneki soangen madamadauohte.

5. Iaduwen Pwuhk Sarawi kin kawehwehda me irail tohnleng kan kin iang pidada doadoahk en kalohk rahnwet?

⁵ Sapwellimen Siohwa tohnleng kan kin nsenohki wia doadoahk tohrohr ieu me kin pid dahme kitail kin wia. Soangen doadoahk dahieu met? Kitail kak diarada pasepengo nan Kaudiahl 14:6: “Mwuri, I ahpw pil kilangada pil emen tohnleng me pipihr nan wehwe, me weuwa Rongamwahu poatopoat ehu me e pahn lohkihong tohnsampah kan, wehi koaros, oh sahpw koaros.” “Rongamwahu poatopoat” wet kin pid duwen “Rongamwahu en Wehio,” me Sises kohpada, “me pahn lohkseli wasa koaros nin sampah, pwe kadehde en mie ong aramas koaros” mwohn imwin sampah ahpw pahn kohdo. (Madiu 24:14) Ni mehlel, tohnleng kan sohte kin kalohk ong aramas akan. Sises ketikihong aramas akan pwukoa kesempwal wet. (Madiu 28:19, 20) Met soh kin kangoange kitail en ese me ni atail kin kapwaiada pwukoa kesempwal wet, irail tohnleng kan me sarawi, loalokong oh kehlail kan kin sewese kitail?

6, 7. (a) Dahme kin kadehdehda me irail tohnleng kan kin sewese kitail en wia doadoahk en kalohk? (b) Iaduwen kitail kak likih me sapwellimen Siohwa tohnleng kan kin sewese kitail?

⁶ Mie mehn kadehde tohto me irail tohnleng kan kin sewese kitail en wia doadoahk wet. Karasepe ieu, kitail kin kalap rong duwen Sounkadehdehn Siohwa kan arail iang wia doadoahk en kalohk oh irail kin tuhwong aramas akan me ahpwtehn kapakap ong Koht pwehn ale sawas en diarada padahk mehlel. Met kaidehn deipweila ieu, pwehki e kin wiawi ahnsou koaros. Pwehki sawas sang rehn tohnleng kan, aramas tohto kin sukuhliki dahme “emen tohnleng me pipihr nan wehwe” ngihl laudida, nda: “Kumwail lemmwiki Koht oh kapinga sapwellime roson lapalahpie.”​—Kaudiahl 14:7.

⁷ Ke men alehdi sawas sang rehn sapwellimen Siohwa tohnleng kehlail kan? Eri, wia uwen ahmw kak nan doadoahk en kalohk. (1 Korint 15:58) Ni atail kin perenki wia doadoahk tohrohr wet me kin kohsang rehn Siohwa, kitail kak likih me sapwellime tohnleng kan pahn sewese kitail.

Sawas Sang Rehn Kaunen Tohnleng kan

8. Sises kin sapwellimaniki pwukoa laud dahieu nanleng, oh dahme kahrehda met kin sewese kitail en likih ih?

⁸ Siohwa kin ketikihong kitail sawas ehu me kin kohsang rehn pil emen tohnleng kan. Kaudiahl 10:1 kin mahsanih duwen “tohnleng kehlail men” me “duwehte ketipin.” Tohnleng menet me mih nan kasansal wet kin karasahiong Sises Krais linganla oh aleier manaman nanleng. (Kaudiahl 1:13, 16) Sises uhdahn emen tohnleng? Ei, pwe Sises iei emen archangel. (1 Deselonika 4:16) Ia wehwehn lepin lokaiahn wai “archangel”? Lepin lokaia wet kin wehwehki “tohnleng keieu kesempwal,” de “kaunen tohnleng.” Sises iei me keieu lapalap sang rehn sapwellimen Siohwa ngehn akan. Siohwa ketikihong ih en wiahla kaunen sapwellimen Siohwa karis en tohnleng kan. Pwehki ih me archangel, e kin kihda sawas laud kan ni ahnsou me anahn. Ni ahl dah kei e kin wia met?

9, 10. (a) Iaduwen Sises kin wiahla “sounsawasapatail” ni ahnsou me kitail kin wiahda dihp? (b) Sawas dah kei kitail kak alehda sang mehn kahlemeng mwahu en Sises?

⁹ Wahnpoaron Sohn ni ahnsou me e mahlahr ntingihdi: “A ma emen pahn wiahda dihp, sounsawasapatail mie rehn Koht, iei Sises Krais, pwe ih me pwung.” (1 Sohn 2:1) Dahme kahrehda Sohn kawehwehda me Sises iei “sounsawasapatail,” mehlel ni ahnsou me kitail kin “wiahda dihp”? Eri, kitail kin wiahda dihp rahn koaros, oh dihp kin imwikihla mehla. (Eklesiasdes 7:20; Rom 6:23) Ahpw, Sises tohnmeteikihla moure pwehki dipatail. Oh pil, e kin wia pekipek rehn Samatail me diren mahk pwen mahk ong kitail dipatail kan. Emen emen kitail anahne soangen sawas. Iaduwen kitail kak ale sawas wet? Kitail anahne koluhkihla dipatail kan oh pek mahk me kin poahsoanda pohn meirong tomw en Sises. Kitail pil anahne en dehr pwurpwurehng wiahda dihp.

¹⁰ Patehng ah kin mehkihla kitail, Sises pil wia mehn kahlemeng unsek ieu ong kitail. (1 Piter 2:21) Ah kahlemeng mwahu kin wiahla sounkaweid ong kitail, e kin sewese kitail en liksang dihp laud kan pwe kitail kak kaperenda Siohwa Koht. Kitail soh kin perenki soangen sawas pwukat? Sises inoukiong sapwellime tohnpadahk kan me irail pahn alehda pil ehu sawas.

Sawas Sang Rehn Ngehn Sarawi

11, 12. Dahkot sapwellimen Siohwa ngehn, oh ia uwen kehlail ngehno, oh dahme kahrehda kitail anahne ngehn sarawi rahnwet?

¹¹ Sises inoukihda: “I pahn peki rehn Semei, oh e pahn ketikihong kumwail pil emen Sounsawas, iei ih ngenen mehlel, pwe en ieiang kumwail kohkohlahte. Tohnsampah wet sohte kak ale.” (Sohn 14:16, 17) “Ngenen mehlel,” de ngehn sarawi, kaidehn emen ahpw kehl ieu​—sapwellimen Siohwa manaman. Sohte irepen sapwellime Siohwa kehl. Iei kehlo me Siohwa doadoahngki ni ahnsou me e kapikada audepen lahng oh sampah, oh pil ni ahnsou me e wiahda manaman kapwuriamwei kan, oh ni ah kin doadoahngki kasansal kan pwen padahkiong sapwellime aramas akan duwen sapwellime kupwur kan. Pwehki Siohwa sohte kin doadoahngki sapwellime ngehn sarawi ni ahl pwukat nan rahnwet, eri, met kin wehwehki me kitail sohte anahne sapwellime ngehn sarawi?

¹² Soh! Nan “ahnsou apwal pwukat,” kitail anahne sapwellimen Siohwa ngehn sarawi laud sang mahs. (2 Timoty 3:1) E kin kakehlailihala kitail pwe kitail en kak dadaur mendahki kalokolok kan. E kin sewese kitail en kakairada loalatail irair kaselel kan me kin sewese kitail en karanih Siohwa oh riatail brother oh sister kan. (Kalesia 5:22, 23) Iaduwen kitail kak paiekihda sawas kaselel wet me kin pwilisang rehn Siohwa?

13, 14. (a) Dahme kahrehda kitail kak likih me Siohwa kin perenki ketikihong sapwellime aramas akan ngehn sarawi? (b) Wiewia dah kan pahn kasalehda me kitail sohte kin uhdahn alehda kisakis en ngehn sarawi?

¹³ Keieu, kitail anahne kapakapki ngehn sarawi. Sises mahsanih: “Eri, mehnda ma kumwail aramas sapwung kei, a kumwail ese kihong noumwail seri kan dahme mwahu ong irail. Eri, Samamwail me ketiket nanleng soh pahn ketikihong ngehn sarawi irail kan me kin peki reh!” (Luk 11:13) Ei, Siohwa iei Sahm me keieu mwahu. Ma ni pwoson oh mehlel kitail kin peki ngehn sarawi, Siohwa uhdahn pahn ketikihong kitail kisakis wet. Ahpw, peidek me konehng kitail koaros iei met: Kitail kin peki rehn Siohwa sawas en ngehn sarawi? Kitail anahne en peki rehn Koht sawas wet rahn koaros.

¹⁴ Keriau, kitail kin alehda kisakis en ngehn sarawi ma kitail pahn kapwaiada doadoahk en ngehn sarawi. Karasepe ieu: Kristian emen mwein kin nantihong dehr kilang pornography (kilel kilisou kan). E kapakapkihong Siohwa sawas en ngehn sarawi pwen sewese ih en soikala tiahk samin wet. E pil rapahki kaweid sang rehn irail elder Kristian akan, oh irail kin kaweidih ih en wiahda ah pilipil pwung en dehr kilang soangen kilel samin pwukat. (Madiu 5:29) Ahpw, iaduwen ma e pahn pohnsehsehla arail kaweid oh pwurehng kilang kilel suwed akan? E kin wia mwekid kan me pwung ong ah kapakap en ale sawas en ngehn sarawi? De e mih nan irair keper ieu me iei en kansensuwedihala ngehn sarawi oh sohte mweidohng ngehn sarawi en doadoahk nan ah mour? (Episos 4:30) Ni mehlel, kitail koaros anahne wia uwen atail kak en alehdi sawas kaselel wet me kohsang rehn Siohwa.

Sawas Sang Sapwellimen Koht Mahsen

15. Dahme kitail kak wia pwen kasalehda me kitail sohte kin kesempwaliki Pwuhk Sarawi?

¹⁵ Pwuhk Sarawi kin sewese sapwellimen Siohwa aramas lelepek kan ni erein sounpar tohto. Kitail en dehr kilangwong Pwuhk Sarawi nin duwen pwuhk ieu me duwehte pwuhk teikan, kitail en dehr manokehla ia uwen laud Pwuhk Sarawi kin sewese kitail. Alehdi sawas pwukat kin pil wehwehki kitail anahne doadoahk laud. Kitail anahne wadek Pwuhk Sarawi rahn koaros.

16, 17. (a) Iaduwen Melkahka 1:2, 3 kin kawehwehda duwen kapai kan me kin kohsang wadek Mahsen en Koht? (b) Iaduwen Melkahka 1:3 kin kawehwehda duwen doadoahk laud ieu me kitail anahne wia?

¹⁶ Pwuhken Melkahka 1:2, 3 kin kasalehda duwen ohl emen me kin kaperenda Koht ni e mahsanih: “E kin perenki kosonned en Siohwa, oh e kin wadek oh doudouloale kosonnedo ni rahn oh nipwong. Oh e pahn rasehng tuhke kan limwahn pihl akan, me kin materek nan rahk koaros, oh tehrail kan sohte kin mengila. E kin pweida mwahu ni soahng koaros me e kin wia.” Ke kilang mouren padahk nan iren Pwuhk Sarawi wet? E pahn mengei en wadek mahsen pwukat oh medemedewe duwen wasa kaselel oh meleilei ieu​—tuhke pwoat limwahn pillap ieu. Ia uwen kansenamwahu ken meir en souwas pahn mwetehn tuhke wet! Ahpw melkahka wet sohte kin koasoia duwen wasa mwahu en kommoal. E kin padahkiong kitail duwen doadoahk laud ieu. Ia mwomwen e kin wia met?

¹⁷ Tehk mwahu me nan melkahka wet tuhke pwoatet sohte kin ihte kihda mwete oh depweila mih limwahn pillap ieu. E kin wa mwahu, oh aramas “uhdahn koasoanehdi en padokedi” tuhkeo “limwahn pihl akan.” Iaduwen tuhke pwoat kak kekeirada limwahn pihl akan? Pwe nan mwetuwel en tuhke kan me kin wa, aramas me ahneki mwetuwelo kin wiahda warawar kan pwe pihl en kak kalamwuri kalowehn tuhke kan. Eri, met kitail kak wehwehki duwen karasaras wet! Ma kitail kin kekeirada ni pali ngehn duwehte tuhkeo, met kin wehwehki aramas kin doadoahk laud en sewese kitail. Kitail iang pwihn ieu me kin wahdohng kitail “pihl min” en padahk mehlel, ahpw pein kitail pil anahne doadoahk laud. Kitail anahne alehda pihl kesempwal wet, sang ni atail kin doudouloale oh research (onop) pwe padahk mehlel en Mahsen en Koht en kak lel atail madamadau oh mongiongatail kan. Ni ahl wet, kitail pil pahn wa mwahu.

18. Dahme kitail anahne wia ma kitail men diarada pasepeng en atail peidek kan me kin kohsang Paipel?

¹⁸ Pwuhk Sarawi sohte pahn katapan ong kitail ma e kin mihmihte nan deupen pwuhk kan. E pil kaidehn pwuhk en kosetipw​—me kitail pahn meirpene, pakpeseng Pwuhk Sarawi, oh kasik me pasapengpen atail peidek pahn mih mwohtail. Ni ahnsou me kitail kin wiahda atail pilipil kan, kitail anahne en rapahki “loalokong me pid duwen Koht” duwehte kitail kin rapahki dipwisou pweilaud kan nan pwehl. (Lepin Padahk 2:1-5) Ma kitail men diarada kaweid en Paipel me kin pid atail anahn kan, kitail anahne nantihong research oh onop mwahu. Kitail kin naineki sawaspen Paipel tohto. Ni ahnsou me kitail kin doadoahngki pwuhk pwukat en rapahki kaweid kesempwal en Mahsen en Koht akan, eri, ih ahnsou me kitail kin doadoahngki mwahu sawas me Siohwa kin ketikihong kitail.

Sawas Sang Rehn Iengetail Pwoson akan

19. (a) Dahme kahrehda kitail kak kilangwong artikel kan nan Kahn Iroir oh Awake! nin duwen sawas me kin kohsang iengetail pwoson akan? (b) Iaduwen ke aleier sawas sang artikel ehu me kohsang neitail makisihn kan?

¹⁹ Sapwellimen Siohwa aramas akan kin ahnsou koaros sawaspene. Eri, Siohwa wekidekla koasoandi wet? Soh. Pwe kitail koaros kak tamanda ahnsou kan me iengetail pwoson akan kin sewese kitail ni ahnsou me konehng. Karasepe ieu, ke kak tamanda ekei artikel kan nan Kahn Iroir de Awake! me sewese iuk ni ahnsou me ke anahne sawas de makisihn pwukat sewese iuk en powehdi kahpwal ehu? Eri, Siohwa ketikihong uhk sawas ki pwihn en “ladu lelepek oh loalokong” me ahneki pwukoa en kihda “mwenge ahnsou me konehng.”​—Madiu 24:45-​47.

20. Ni ahl dah kei irail Kristian elder kan kin kasalehda me irail iei “kisakis kan me mih rehn ohl akan”?

²⁰ Ahpw pali laud en ahnsou, sawas me kitail kin ale sang rehn iengetail pwoson akan kin kohsang pein irail. Kristian elder men wia padahk ieu me kin kamwekid mohngiongatail, de e kin mwemweitdo rehtail oh sewese kitail ni ahnsoun atail apwal, de e kihda kaweid ni kadek me kin sewese kitail en powehdi atail luwet akan. Emen Kristian sister kasalehda uwen e kalahnganki sawas me emen elder kihong ih oh e koasoia: “Ni ahnsou se ehu nan kalohk, e kin kangoange ie en kasalehda pein ai pepehm loal kan. Ni pwong en mwoweo, I kapakap ong Siohwa oh peki me I men koasoaiong emen pwen sewese ie. Mandahn rahno, brother menet koasoiong ie ni ahl me inenen kadek. E sewese ie en kilang iaduwen Siohwa kin sewese ie ni ahnsou werei. I kin kalahnganki Siohwa eh doadoahngki elder menet en sewese ie.” Ni ahl pwukat, irail Kristian elder kan kin kasalehda me irail iei “kisakis kan me mih rehn ohl akan,” oh kisakis pwukat kin pwilisang rehn Siohwa ki Sises Krais pwen sewese kitail en dadaurete kekeid nan elen ale kamourpatail.​—Episos 4:⁠8.

21, 22. (a) Dahme kin imwikihla ni ahnsou me irail akan nan mwomwohdiso kin kapwaiada kaweid me dierekda nan pwuhken Pilipai 2:4? (b) Dahme kahrehda e kesempwal kitail en pil kasalehda kadek ong riatail kan mehnda atail kadek kin wiawi ni ahl tikitik?

²¹ Kaidehn irail elder kante, ahpw emen emen Kristian lelepek kan koaros men kapwaiada kaweid wet en “pohnese ineng mwahu en meteikan, kaidehn amwail kante.” (Pilipai 2:⁠4) Ni ahnsou me tohnmwomwohdiso kan en Kristian kin kapwaiada kaweid wet, wiewia kaselel kan en kadek kin wiawi nanpwungarail. Karasepe ieu, peneinei ieu lelohng kahpwal laud kan. Pahpa wahda nah serepein pwulopwul en iang ih kohla ni sidohwa. Ni ahnsou me ira pwurpwurala ni imwarailo, ira lelohng nan aksiden ehu. Serepeino mehla nan aksideno; pahpao ohla laud. Ni ahnsou me ohlo kapidoi sang nan imwen winio, e sohte kak wia mehkot. Ah pwoudo ahneki pwunod laud me kahrehong e sohte kak kelepw apwalih ah pwoudo. Ahpw, pwopwoud ehu nan mwomwohdiso wahla ira nan imwara oh apwalih ira erein wihk kei.

²² Ni mehlel, kaidehn wiewiahn kadek koaros kin pid tohnmetei laud. Ekei sawas kan me kitail kin alehdi kin wiawi ni ahl tikitik. Ahpw, mendahki wiewiahn kadek me tikitik, kitail soh kin kalahganki? Ke kak tamanda ehu ahnsou brother de sister men lokaiahiong uhk ni ahl kadek de wia mehkot kadek ong uhk ni ahnsou me ke uhdahn anahne sawas oh kangoang? Siohwa kin kalap apwalih kitail ni ahl kadek pwukat.​—Lepin Padahk 17:17; 18:24.

23. Ia kupwuren Siohwa ni ahnsou me kitail kin nantiong en sawaspene?

²³ Ke men Siohwa en doadoahngki uhk nin duwen emen me kin sewese aramas teikan? Pwais kaselel wet pahn kak kohwong uhk. Ni mehlel, Siohwa kin kesempwaliki ahmw kin nsenohki sewese meteikan. Sapwellime Mahsen mahsanih: “Ni omw kin kisekise me semwehmwe kan, duwehte omw patohwanohng Kauno, oh Kauno ahpw pahn ketin kasapahldohng uhk.” (Lepin Padahk 19:17) Peren laud kin kohsang atail kin tohnmeteikihla pein atail ahnsou oh kehl pwen sewese riatail brother oh sister teikan. (Wiewia 20:35) Ahpw, irail akan me sohte kin men patehng meteikan sohte kin wehwehki duwen peren en kihkihwei de kangoang me kin kohwong aramas teikan. (Lepin Padahk 18:⁠1) Eri, kitail en ni lelepek pokonpene nan mihding en Kristian akan oh nantihong kakehlaka nan kapehd en emenemen.​—Ipru 10:24, 25.

24. Dahme kahrehda kitail en dehr ahneki madamadau me kitail sohte kin alehdi sawas me itar pwe kitail sohte pein kilangada sapwellimen Siohwa manaman kapwuriamwei kan en mahs?

²⁴ E soh kin kaperen en medemedewe duwen ahl akan me Siohwa kin ketin sewese kitail? Mendahki kitail sohte kin memour ni ahnsou kan me Siohwa kin wiahda manaman kapwuriamwei kan pwen kapwaiada sapwellime kupwur kan, kitail en dehr ahneki madamadau me kitail sohte kin alehdi sawas me itar. Keieu kesempwal iei me Siohwa kin ketikihong kitail koaros sawas me anahn pwen sewese kitail en kolokolete atail lelepek ong Ih. Oh ma kitail pahn sawaspene mihmihte nan pwoson, kitail pahn iang kilang sapwellimen Siohwa wiewia kapwuriamwei kan me keieu kaselel nan poadoapoad en aramas! Kitail en koasonehdi nan loaletail en alehda sapwellimen Siohwa sawas ong sewese kitail en kapwaiada mahsen kan en iren pahr 2005: “Sawasepei pahn pwarodo sang rehn Siohwa.”​—Melkahka 121:⁠2.

Ia Ahmw Madamadau?

Rahnwet, iaduwen Siohwa kin ketikihda sawas—

• ki tohnleng kan?

• ki sapwellime ngehn sarawi?

• ki sapwellime Mahsen?

• ki iengetail pwoson akan?

[Kilel nan Pali 12]

E kin wia mehn kangoang ong kitail en ese me irail tohnleng kan kin sewese kitail nan doadoahk en kalohk

[Kilel nan Pali 15]

Siohwa mwein kak doadoahngki emen iengetail pwoson akan en kangoange kitail