Siohwa Iei Sawaspatail

“Sawasepei pahn pwarodo sang rehn Siohwa, me ketin kapikada nanleng oh sampah.”​—MELKAHKA 121:2, New World Translation.

1, 2. (a) Dahme kitail kak ndahki me kitail koaros kin anahne sawas ekei ahnsou? (b) Soangen Sounsawas dahieu Siohwa?

IHS rehtail me sohte kin anahne sawas? Ni mehlel, kitail koaros kin ekei pak anahne sawas​—pwehn kak kehlail ong ahnsou kan me kitail kin lelohng kahpwal laud kan, lamalam kehlail ni ahnsou me kisetail mehla, de pil dadaurete ni ahnsou me kitail kin lelohng nan kalokolok kan. Ahnsou me emen kin anahne sawas, e kin kalapw rapahkihala kompoakpah kan. Ehukihong kompoakepahmw men ahmw iren katoutou kan kin sewese iuk en powehdi ahmw kahpwal. Ahpw mie idin sawas me aramas men kak kihda. Oh pil ekei pak aramas sohte kak sewese iuk ahnsou me ke anahne arail sawas.

² Ahpw, mie emen Sounsawas me sohte idin sapwellime sawas. E pil inoukihong kitail me E sohte pahn ketin likidmelieikitailla. Iei Ih me sounmelkahkao koapworopworki oh mahsanih: “Sawasepei pahn pwarodo sang rehn Siohwa.” (Melkahka 121:2, NW) Dahme kahrehda sounmelkahka menet koapworopworki me Siohwa pahn sewese ih? Pwehn sapeng peidek wet, kitail tehk mahs Melkahka 121. Ni atail pahn wia met, e pahn sewese kitail en kilang dahme kahrehda pil kitail kak koapworopworki oh pil kilangwohng Siohwa nin duwen Sounsawaspatail.

Utupen Sawas Emen Me Sohte Kak Uhdi

3. Mehnia nahna me sounmelkakaho kin kilangdahng oh pwekida?

³ Sounmelkahkaho kawehwehda me pwehki Siohwa me kapikada soahng koaros, kitail kak koapworopworki: “I saradahng nahna kan; ia wasa me sawasepei pahn kohdo sang ie? Sawasepei pahn pwarodo sang rehn Siohwa, me ketin kapikada nanleng oh sampah.” (Melkahka 121:1, 2) Sounmelkahka menet sohte saradahlahng nahna sohlipilipil. Ahnsou me mahsen pwukat ntingihdi, sapwellimen Siohwa Tehnpas Sarawio kokouda Serusalem. Kahnimw wet me mihmi pohn nahna Suda ko kin mwete wasa me Siohwa kin ketiket ie. (Melkahka 135:21) Sounmelkahkao mwein saradahlahng pohn nahnahn Serusalem ko wasa sapwellimen Siohwa Tehnpas Sarawio kokouda, ni ah koapworopworki oh rapahki sapwellimen Siohwa sawas. Dahme kahrehda sounmelkahka menet kin koapworopwoarki me Siohwa pahn sewese ih? Pwehki Siohwa me “sounkapikpen lahng oh sampah.” Mouren koasoi en Sounmelkakaho iei met: ‘Sohte me pahn kak kauhdi Sounkapikada lapalap en sewese ie!’​—Aiseia 40:26.

4. Iaduwen en sounmelkahkaho kasalehda me Siohwa kin pehmtikiong en sapwellime aramas anahn akan, oh dahme kahrehda met wia mehn kamweit ehu ong kitail?

⁴ Sounmelkahkao mwuri kawehwehda me Siohwa kin pohnese anahn akan en sapwellime ladu kan: “E sohte pahn mweidohng ke en pwupwudi; silepomw sohte kin ketin seimwokla. Silepen Israel sohte kin ketin lisoi de seimwok.” (Melkahka 121:3, 4) Koht sohte kak mweidala irail akan me likih Ih en “pwupwudi” de lelohng apwal kan me re pahn sohte powehdi. (Lepin Padahk 24:16) Pwekihda? Pwehki Siohwa duwehte soun silipe men me kin pepehd oh apwahpwalih sapwellime sihpw kan. Met soh wia rohng mwahu ong kitail? Sohte pak ehu e pahn ketin meirpene oh sohte tehk anahn en sapwellime aramas. Ni rahn oh ni pwong E kin ketin apwahpwalih irail ni keneinei.

5. Dahme kahrehda e ndahki me Siohwa kin ketiket “ni pali maun”?

⁵ Ni ah koapworopworki me Siohwa wia sounperepe lelepek men ong sapwellime aramas akan, sounmelkahkaho ntingihdi: “Siohwa iei ih me pahn ketin sinsileiuk; e kin ketiket limwahmw pwe en ketin apwalihiuk. Ketipin sohte pahn kauweiukala nin rahn, de maram ni pwong.” (Melkahka 121:5, 6) Ong emen me sapasapahl reirei nan Middle East, wasa mwete kan kin wia wasahn ruksang ketipin karakar. Siohwa duwehte wasa mwete en sapwellime sawas, ni ah kin ketin pere irail sang karakar en kahpwal kan. Tehk mwahu me e pil koasoia me Siohwa kin ketiket ni “pali maun.” Nan mahwen en mahs ako, peh palimaun en sounpei men sohte kin pereperkihla nah mehn sansaro. Kahrehda kompoakpah lelepek men ele mwein pahn kesihnen ni pali maun pwehn pere ih. Ihme kahrehda, duwehte kompoakpah mwahu menet, Siohwa kin ni lelepek kesikesihnen limwahn sapwellime sounkaudok kan oh kin ahnsou koaros kaunopada pwehn sewese irail.

6, 7. (a) Iaduewn en sounmelkahkaho kin kamehlelehiong kitail me Siohwa sohte pahn uhdihsang sewese nah aramas akan? (b) Dahme kahrehda kitail kak iang sounmelkahkao ahneki pepehm wet?

⁶ Iaduwen​—⁠e pahn mie ehu ahnsou me Siohwa pahn sohla sewese sapwellime aramas? Met sohte kak wiawi. Sounmelkahkaho mahsanih: “Siohwa pahn ketin silehsang uhk soahng keper koaros; E pahn ketin sinsileiuk mehlel. Siohwa pahn ketin sinsileiuk ni omw kohwei oh kohdo, met oh pil kohkohlahte.” (Melkahka 121:7, 8) Wasaht soun nting menet sohla koasoia ahnsowo ahpw e uhd koasoia ahnsou kohkohdo. Mwowe sang nan iretikitik 5, sounmelkahkaho mahsanih: “Siohwa kin ketiket limwahmw pwe en ketin apwalih iuk.” Ahpw nan ire pwukat, sounmelkahkaho ntingihdi: “Siohwa pahn ketin sinsileiuk.” Sounpapah mehlel kan kin koapworopworki me Siohwa pahn pil sewese irailte lel pil ahnsou kohkohdo. Sohte lipilipil iawasa irail kohla ie, de soangen kahpwal dah irail lelohng ie, irail pahn ahnsou koaros kak ale sawas sang reh.​—Lepin Padahk 12:21.

⁷ Ei, soun nting en Melkahka 121 koapworopworki me Sounkapikada Lapalahpie kin apwalih sapwellime ladu kan ni maledek duwehte sounapwalih sihpw men me kin nsenoh oh kin tehk wasa kitail pil kak ahneki soangen koapworopworohte me sounmelkakaho ahneki, pwe Siohwa sohte kin wekila. (Malakai 3:6) Met wehwehki me ahnsou koaros kitail pahn kin uhdahn alehdi sawas de perepatail ni war? Soh, ahpw erein atail pahn kin kilangwong Ih nin duwen Sounsawas emen E pahn kin ketin pere kitail sang soahng kan me pahn keper ong atail pali ngehno. E wia ahnepen aramas en idek, ‘Iaduwen Siohwa kin sewese kitail?’ Kitail pahn tehk ni soangen ahl pahieu kan me E kin ketin wia met. Nan artikel wet, kitail pahn tehkpene soangen ahl akan me E kin ketin sewese sapwellime ladu kan en ni mwehin Pwuhk Sarawi. Nan artikel en mwurin met, kitail pahn tehkpene duwen ah kin ketin sewese sapwellime aramas akan nan rahnpwukat.

Sawas Sang Tohnleng kan

8. Dahme kahrehda e sohte kapwuriamwei me tohnleng kan kin nsenohki sapwellimen Koht ladu kan nin sampah wet?

⁸ Siohwa kin ketin kakaun tohnleng rar rar kei. (Daniel 7:9, 10) Sapwellime ngehn pwukat kin peikiong sapwellime kupwur kan. (Melkahka 103:20) Irail uhdahn wehwehki me Siohwa sapwellimaniki limpoak laud ong sapwellime aramas sounkaudok akan oh e kupwurki sewese irail. E sohte kapwuriamwei me tohnleng kan pil kin nsenohki duwen kamwahu kan ong sapwellimen Koht ladu kan pohn sampah. (Luk 15:10) E sansal me tohnleng ko kin perenki Siohwa ah kin ketin doadoahngki irail pwehn sewese sapwellime aramas akan. Ni ahl dah kan me Siohwa kin ketin doadoahngki tohnleng kan pwehn sewese sapwellime ladu en mahs ako?

9. Kihda mehn karasepe ong iaduwen tohnleng kan kin ale kehlsang Koht pwehn pere aramas me lelepek kan.

⁹ Koht ketikihong tohnleng kan manaman en pere oh kapitala me lelepek kan. Tohnleng riemen sewese Lohd oh nah serepein ko en tangasang ohlahn Sodom oh Komora. (Senesis 19:1, 15-​17) Tohnleng emente kemehla sounpei en mehn Asiria 185,000 me kamasak tohn Serusalem. (2 Nanmwarki 19:35) Ahnsou me Daniel lekdeklahng nan pwoaren laion ko, Siohwa ketin “poaronehdo sapwellime tohnleng me kakuhpene ewen laion kat.” (Daniel 6:21, 22) Tohnleng emen kapitala wahnpoaron Piter sang imwetengo. (Wiewia 12:6-​11) Pwuhk Sarawi kin kasalehda soangen karasepe tohto me pid duwen sawas me tohnleng kan kin wia me kasalehda mehlelpen dahme Melkahka 34:7 mahsanih: “Sapwellime tohnleng kin sinsile irail kan me kin wauneki Siohwa, oh kin kapitirailsang soahng keper kan.”

10. Iaduwen Siohwa doadoahngki tohnleng men en kangoange soukohp Daniel?

¹⁰ Mie pak me Siohwa ketin doadoahngki tohnleng kan pwehn kangoange oh kakehle me lelepek kan. Ehu karasepe iei me dierek nan Daniel irelaud 10. Ahnsowo, Daniel mwein ele kereniongehr sounpar 100. Soukohpo inenen pahtoukihla sohte tohn Serusalem oh pwehki pwandalahn kokoudahn Tehnpas Sarawio. E pil masepwehkada oh pwunodada mwurin ah kilangehr kaudiahl kamasepwehk ehu. (Daniel 10:2, 3, 8) Koht ni limpoak ketin kadaralahng ih tohnleng emen pwehn kangoange ih. Daulih pak ehu me tohnlengo kin katakatamankihong ih me Koht ketin “poakohng” ih. Ia imwilahn met? Soukohp mah menet padahkiong tohnlengo: “Komwi ketin kakehlaiedahr.”​—Daniel 10:11, 19.

11. Ia ehu karasepe tohnleng kan ahr doadoahk pwehn kahluwa doadoahk en kalohki Rongamwahu?

¹¹ Siohwa pil doadoahngki tohnleng kan pwehn kahluwa doadoahk en kalohki Rongamwahu. Tohnleng men kaweidiki Pilip en kalohki duwen Krais ong mehn Idiopia men, me mwuri papdaisla. (Wiewia 8:26, 27, 36, 38) Ahnsou kis mwuri, e wia kupwuren Koht me kalohkpen Rongamwahuo en pil wiawiong mehn liki ko me sohte sirkumsais. Nan kaudiahl ehu, tohnleng men pwarehng Kornilius, mehn liki men me kin lemwiki Koht, oh padahkiong ih en luhklahng wahnpoaron Piter. Ahnsou me nein Kornilius sounkair ko tuhwong Piter, irail nda: “Kornilius . . . aleier kaweid sang rehn tohnleng men me mahsanih ong en lukeikomwilahng reh, pwe en kak rong dahme komw pahn mahsanih.” Piter peikiong ilek wet, oh ihme kahrehda keieun mehn liki me sohte sirkumsaisla wiahlahr kisehn mwomwohdiso en Kristian. (Wiewia 10:22, 44-​48) Nna, song medewe ia pahn ahmw pepehm ma ke ese me tohnleng men me sewese iuk ken tuhwong aramas me konehng ale mour soutuk!

Sawas Sang Rehn Ngehn Sarawi

12, 13. (a) Dahme kahrehda sapwellimen Sises wahnpoaron kan ahneki kahrepe mwahu en kamehlelehki me ngehn sarawi kak sewese irail? (b) Ni ahl dah me ngehn sarawi kakehlahda Kristian en keieun senturi?

¹² Ahnsoukis mwohnte eh pahn pwoula, Sises kamehlelehiong sapwellime wahnpoaron ko me irail sohte pahn kelepwla ahpw sawas pahn kohwong irail. Sahmo pahn ketikihong irail “sounsawas, ngehn sarawi.” (Sohn 14:26) Wahnpoaron ko ahneki kahrepe mwahu en kamehlele me ngehn sarawi kak sewese irail. Ni mehlel, Pwuhk Sarawi kin audaudki karasepe tohto duwen Siohwa ah kin ketin doadoahngki ngehn sarawi, me wia kehl me keieu kehlail, pwehn sewese sapwellime aramas.

¹³ Pak tohto, ngehn sarawi kin doadoahk pwehn kihong aramas kehl en kapwaiada kupwuren Siohwa. Ngehn sarawi me kakehle irail sounkopwung kan en kahluwa Israel. (Sounkopwung kan 3:9, 10; 6:34) Soahngen ngehnohte me kakehle irail Kristian en keieun senturi en kaukaule wia doadoahk en kalohk ni eimah mendahki uhwong kan. (Wiewia 1:8; 4:31) Arail kin pweida nan arail doadoahk en kalohk kin wia mehn kadehde ong iaduwen ngehn sarawi kin doadoahk. Mie pil ehu soangen kehl likin met me kak kamwakid aramas pwukat “me sohte wad oh pil sohte iang sukuhl” en kalohkiseli Rongamwahu en Wehio wasa koaros nin sampah?​—Wiewia 4:13; Kolose 1:23.

14. Iaduwen Siohwa eh doadoahngki sapwellime ngehn sarawi en kamarainih sapwellime aramas?

¹⁴ Siohwa pil kin doadoahngki sapwellime ngehn sarawi ong ni kamarainpen sapwellime aramas akan. Ki sapwellimen Koht ngehn sarawi, Sosep kak en kawehwehda en Parao auramen kan. (Senesis 41:16, 38, 39) Ki sapwellime ngehn sarawi, Siohwa kin kahrehong sapwellime kupwur kan en sansal ong irail me aktikitik, oh e sohte kin sansal ong irail me aklapalap. (Madiu 11:25) Ahpw, ong ni mehkan me Siohwa kin ketikihong “irail kan me poakoang ih,” wahnpoaron Pohl mahsanih: “Ahpw Koht ketin kasalehiong kitail sapwellime kupwur rir sang ni sapwellime ngehn sarawi.” (1 Korint 2:7-​10) Ihte sawas sang sapwellimen Koht ngehn sarawi me kak kahrehong emen en wehwehkihla mehlel en kupwuren Koht akan.

Sawas Sang Mahsen en Koht

15, 16. Poahngok dah me kohwong Sosua pwehn mwekid ni ahl loalokong?

¹⁵ Sapwellimen Siohwa Mahsen kan kin “mwahu ong padahkih meteikan,” oh kin kahrehong sapwellimen Koht ladu kan en “kakong soangen doadoahk mwahu koaros.” (2 Timoty 3:16, 17) Pwuhk Sarawi kin audaudki mehn kadehde tohto ong iaduwen irail sapwellimen Koht aramas akan mahs kin alehdi sawas sang sapwellime Mahsen me ntingdier.

¹⁶ Pwuhk Sarawi kin kihda sawas ong sapwellimen Koht tohnkaudok akan. Ni ahnsou Sosua alehdi likilik en kahluwa mehn Israel kan e alehdi kaweid wet: “Kanahieng pwe pwuhken Kosonnedo pahn kin wadawad ni ahnsoun kaudok koaros. Ke pahn kin sukusukuhlki nin rahn oh nipwong, oh kanahieng soang koaros me ntingdier loale. Eri, ke ahpw pahn kepwehpwehla oh pweida.” Tehk me Koht sohte inoukihong Sosua me e pahn wiahda manaman me pahn kihong ih loalokong weksang met. E sansal me Sosua pahn anahne wadek oh doudouloale duwen “pwuhken kosonnedo,” pwehn kak weid ni loalokong.​—Sosua 1:8; Melkahka 1:1-3.

17. Iaduwen Daniel oh Nanmwarki Sosaia diarada sawas kan sang ekei iren Pwuhk Sarawi kan?

¹⁷ Sapwellimen Koht Mahsen kin pil sewese kasalehda kupwure kan. Karasepe, Daniel diarada ia uwen werei Serusalem pahn tehnla, sang ni mehkan me Seremaia ntingihdi. (Seremaia 25:11; Daniel 9:2) Pil tehk dahme wiawi ahnsou me nanmwarki Sosaia kakaun Suda. Ni ahnsowo, wehin Serusalem dohweisangehr Siohwa oh met kasansalehda me irail nanmwarki ko sohte wiahda pein neirail nting en Kosonnedo oh kapwaiada. (Deuderonomi 17:18-​20) Ahpw erein ahnsou me Tehnpas Sarawio pwurehng onohnsapahl, “uhdahn pwuhken kosonnedo,” me pein Moses ntingihdier dierekda. Nting en kosonned wet me kakete wia keieun nting en Kosonnedo ele mwein sounpar 800 samwalahro. Mwurin ah rongehr wadawadpen kosonnedo Sosaia kilangdahr ia uwen laud en wehio kawehla kosonned en Siohwa kan oh uhwongda Siohwa, eri nanmwarkio koasonehdi ni kehlail en kapwaiada dahme ntingdi nan pwuhko. (2 Nanmwarki 22:8; 23:1-7) E soh sansal me sapwellimen Koht aramas akan mahs kin alehdi sawas kan sang nan Pwuhk Sarawi?

Sawas Sang Riatail Pwoson akan

18. Dahme kahrehda kitail kak ndahki me Siohwa me sawas ni ahnsou kan me emen sounkaudok mehlel kin sewese emen?

¹⁸ Sawas me Siohwa kin kihda kin kalapw kohsang riatail pwoson akan. Ahpw ni mehlel, Koht me kin kahrehong emen iangatail tohnkaudok en sewese tohnkaudok teio. Dahme kitail kak ndahki met? Mie kahrepe riau. Keieu, sapwellimen Koht ngehn sarawi. Ngehn sarawi wet me kin kamwekid wahn ngehn me duwehte limpoak oh kamwahu rehn irail kan me kin kapwarehda met. (Kalesia 5:22, 23) Kahrehda, ni en emen sapwellimen Koht kin mwekidki en sewese meteikan, met kin wia kasalepen en Siohwa ngehn sarawi kin doadoahk. Keriau, kitail wiawihda ni mwomwen Koht. (Senesis 1:26) Met wehwehki me kitail ahneki koahiek en kasalehda sapwellime irair kan, me duwehte kadek oh poakehla meteikan. Kahrehda ni en emen ladu en Siohwa kin kihda sawas ong mehteikan, sawaso uhdahn kohsang rehn Ih me kitail kin kahlemengih.

19. Nin duwen me Pwuhk Sarawi mahsanih, iaduwen Siohwa kin ketkihda sawas ki emen me pwoson?

¹⁹ Iaduwen Siohwa kin doadoahngki sapwellime tohnkaudok kan ni ahnsou mahs en kihda sawas ong iengarail tohnkaudok akan? Siohwa kin ni pak tohto kamwekid sapwellime ladu kan en kihda kaweid ong emenemen, duwehte ni ahnsou me Seremaia kihda kaweid me kapitala mour en Paruk. (Seremaia 45:1-5) Ekei ahnsou tohnkaudok mehlel kan kin mwekidki en kihda sawas en kepwe kan ong iengarail pwoson akan, duwehte irail Kristian kan en Masedonia oh Akaia me kasalehda arail men sewese riarail kan nan Serusalem. Wahnpoaron Pohl kasalehda me soangen wiewiahn kadek wet kin wia “kasalepen atail kalahngan ong Koht.”​—2 Korint 9:11.

20, 21. Ni soangen ahnsou dah kan me wahnpoaron Pohl kin alehdi kakehl sang brother kan en Rom?

²⁰ Me keieu sair loaletail iei soangen rong kan me pid sapwellimen Siohwa ladu me kin nantiong kakehle oh kangoange emenemen. Ehu karasepe mwahu iei me pid wahnpoaron Pohl. Ahnsou me e seiseiloaklahng Rom nin duwen emen me sensel, Pohl keid nan ahl me re kin kahdaneki Appian Way. Kerenlahng imwin ahr seiloako me inenen apwal, pwe me keid wasao anahne alu nan sahpw me pwelmatak.a Irail brother kan nan mwomwohdisohn Rom ese me Pohl kohkohla rehrail. Dahme irail pahn wia? Re pahn mihmi nan imwarail wasa me re pahn nsenamwahu nan kahnimwo oh awih lao Pohl lel rehrail, irail ahpw pahn nek kohla kasamwo ih?

²¹ Emen soun nting en Pwuhk Sarawi, Luk, me iang Pohl nan seiloako padahkiong kitail dahme wiawi: “Me pwoson kan nan Rom rongada duwen kiht; re ahpw pwarodo lel wasahn netikihla wahntuhke en Appius oh Imwen Keiru Siluh ko pwe re en tuhwong kiht.” Ke kak medewehla duwen met? Ni arail esehda me Pohl kohkohla irail me tohto seiloak sang Rom pwehn tuhwong ih. Kisehn arail pahn kasamwo ih awiawih ni wasahn netinet en Appius, wasa me irail sounseiloak kan kin kalapw keid ie pwehn welian neirail oahs kan de pil kommoal, oh wasa ndand wet mpen mwail 46 likin Rom. Brother teikan kin awiawih ni Imwen Keiru Siluh, me iei wasahn kommoal ieu me mpen mwail 36 likin kahnimwo. Iaduwen Pohl mwekidki met? Luk ripohtki: “Ni Pohl eh kilangirailda, e ahpw kapingkihong Koht oh eh koapworopwor ahpw laudla.” (Wiewia 28:15) Nna song medewehla​—kilang irail brother tohtohie me kihda pein arail ahnsou en seiloak kohla wasao pwehn wia mehn kakehl oh kangoang ong Pohl! Oh ihs me Pohl kalahngankihong mepwukat? E kalahngankiong Ih me kahrehda met en wiawi, iei Siohwa Koht.

22. Ia iren pahr en 2005, oh dahme kitail pahn tehkpene ni artikel en mwuhr?

²² E sansal me en Siohwa mwekid kan kin kasalehda me Siohwa me wia sounsawas. E wia Sounsawas emen me sohte me kak pahrekiong. Ihme kahrehda, e konehng en Sounkadehdehn Siohwa kan iren pahr 2005 me sansalda nan Melkahka 121:2: “Sawasepei pahn pwarodo sang rehn Siohwa.” Ahpw iaduwen Siohwa kin sewese kitail rahnwet? Met pahn sansalda nan artikel en mwurin met.

[Nting tikitik me mi pahs]

Ke Tamantamante?

Ni ahl dah kei me Siohwa kin ketikihda sawas​—⁠

• ki tohnleng kan?

• ki sapwellime ngehn sarawi?

• ki sapwellime Mahsen?

• ki iengetail tohnkaudok akan?

[Kilel nan Pali 9]

Iren Pahr en 2005 iei: “Sawasepei pahn pwarodo sang rehn Siohwa.”​—Melkahka 121:⁠2.

[Kilel nan Pali 10]

Pohl kalahgankihong Koht sawas me e alehdi sang brother kan nan Rom