Miniminkihpeene Limposk Ong Koht
AHNSOU me mwomwohdiso en Kristian wiawihda nan keieun senturi, ehu irair me sansal mwahu rehrail—mendahki towe kan wia soangsoangen aramas—irail kin miniminpene. Irail akan me kin kaudok ong Koht mehlelo kin kohsang Asia, Europe, oh Africa. Irail kin kohsang ni soangesoangen aramas—kaunen lamalam, sounpei, ladu, aramas me kin lipalipseli, soun netinet, oh aramas semen akan. Ekei irail mehn Suhs ah ekei mehn liki kan. Me tohto nanpwungarail me mahs kin wia aramas en kamwahl, ohl mwahuki ohl oh lih mwahuki lih, kamamsakau, sounpirap, oh sounkam aramas. Ahpw, ni arail wiahla Kristian ekei, irail kesehla arail wiewia en mahs akan oh irail miniminpene nan pwoson.
Dahme kaminiminpene Kristian akan nan keieun senturi? Dahme kahrehda irail ahnekihpene meleilei oh pil kin meleilei ong aramas teikan? Dahme irail sohte kin iang pidada moromor akan? Dahme kahrehda tepin Kristian kan inenen weksang pali laud en sarawi kan en nan rahnwet?
Dahme kin Kakaranihpene Tohnmwomwohdiso kan?
Dahme kin keieu kaminiminpene irail me pwoson akan nan keieun senturi iei arail limpoak ong Koht. Kristian pwuko kin pohnese me arail pwukoa me keieu laud iei en poakohng Koht mehlelo, Siohwa, ki arail mohngiong, lamalam oh kehl unsek. Karasepe, wahnpoaron Piter, me wia mehn Suhs emen, ale kaweid en pwarek imwen aramas en liki men, soangen aramas me re sohte kin patehng mahs. Dahme kamwekid ih en peik wasaht, iei ah limpoak ong Siohwa. Piter oh Kristian teikan en mahs kin ale kapai en karanih Koht pwehki arail kin loaloakongkihla sapwellimen Koht irair kaselel kan, dahme E ketin kupwurki oh dahme E kin ketin kalahdeki. Irair sounkaudok kan koaros wehwehkihla me kupwuren Siohwa ong irail iei “irail en miniminkihpene lamalam tehieu oh madamadau tehieu.”—1 Korint 1:10; Madiu 22:37; Wiewia 10:1-35.
Irail oko me pwosonla pil kin ehukihpene arail pwoson Sises Krais. Irail kin men idawehn mohn lipwe kan. E kehkehlikiong irail: “Poakohng emenemen; duwehte ai kin poakohng kumwail . . . Pwehki met aramas koaros pahn esehki me kumwail nei tohnpadahk kan, me kumwail pahn poakpene nanpwungamwail.” (Sohn 13:34, 35) Met sohte pahn wia pepehm pedeped ieu, ahpw en wia limpoak me emen en ahneki madamadau en tohnmetei. Ia pahn imwilahn met? Sises kapakap oh mahsaniheki duwen irail akan me pwoson ih: “I peki . . . me irail koaros en kak wiahki ehu, duwehte komwi, Sahmo, kin ehuiong ngehi, oh ngehi kin miniminiong komwi, pwe ren pil kak miniminiong kita.”—Sohn 17:20, 21, NW; 1 Piter 2:21.
Siohwa ketin kamwerehdiong sapwellime ladu mehlel kan ngehn sarawi. Ngehn wet kin kahrehda miniminpene nanpwungarail. E kamarainiekin irail padahk en Pwuhk Sarawi kan me irail tohnmwomwohdiso kan koaros kin pwungkihpene. Tohnkaudok en Siohwa kan arail padahk kin duwepenehte—kasarawihala mwaren Siohwa ki sapwellimen Koht Wehin Mesaia, me iei koperment en lahng ehu me pahn kaunda tohn sampah koaros. Kristian akan en mahso wehwehki arail pwukoa “en dehr wia kisehn sampah wet.” Sohte lipilipil soangen moromor dah—ma tohn wehi de palien sounpei, Kristian akan en kolokol sohte poupali. Irail kin men kolokol meleilei ong aramas koaros.—Sohn 14:26; 18:36; Madiu 6:9, 10; Wiewia 2:1-4; Rom 12:17-21.
Miniminpenehn Kaudok Nan Atail Ahnsou
Soangen miniminpene wet kak wiawi nan atail ahnsou? Iaduwen soangen irair pwukohte kak kaminiminpene tohn pelien lamalam tehieu oh wiahiong irail en ahneki meleilei ong soangen aramas koaros nan wasa koaros nan sampah? Ei, met kin wiawi! Sounkadehdehn Siohwa kan kin miniminpene ni arail wia pirien ehu nan sahpw oh deke pohnangin 230 nan sampah pwon. Oh arail minimin kin poahsoankihda soangen kahrepe ohte me Kristian akan en keieun senturi ko kin wia.
Me keieu laud me kin kaminiminpene Sounkadehdehn Siohwa kan iei arail mehleliong Siohwa Koht. Met wehwehki me irail kin nannantihong en lelepek ong Ih nan irair sohte lipilipil. Sounkadehdehn Siohwa kan pil kin pwoson Sises Krais oh sapwellime padahk kan. Kristian pwukat kin kasalehda limpoak tohnmetei ong iengarail tohn kaudok kan oh pil kin kalohki soangen Rongamwahu en Wehin Koht ohte nan sahpw koaros me re kin kalohk ie. Irail kin perenki koasoia Wehi wet ong aramas me ahneki soangsoangen pelien lamalam koaros, tohn wehi oh keinek koaros. Sounkadehdehn Siohwa kan pil kin sohte poupalihada ehu pwihn nan moromor en sampah kan, kahrehda irail sohte kin iang pingiping en palien politik, palien tiahk, palien pisnes me kin katohrehpeseng tohnsampah.
Sounkadehdehn Siohwa kan kin kamehlele inou kan en Pwuhk Sarawi me koasoia me soangen irair ohte me kin wiahda minimin nan arail kaudok nan rahnwet, pahn ni ahnsou keren pil pahn kaminiminpene aramas koaros me kin peikiong Koht. Mwuri, pahn sohlahr wiewia suwed, saminimin oh tohrohrpeseng kan me kin wiawi ni eden pelien sarawi. Sampah pwon pahn uhpene nan ar kaudok Koht mehlelo, Siohwa.—Kaudiahl 21:4, 5.
[Kilel nan Pali 4]
Mendahki ma Kristian en mahs akan arail kohsang nan soangesoangen irair en aramas, irail kin minimin