Dahme Kahrehda Aramas Tohto Sohte Kak Kamehlele Me Pelien Lamalam Kak Kaminiminpene Tohnsampah
“POAKOHNG mehn mpomw.” (Madiu 22:39) Mouren kosonned wet me wia utupen wiewiahn aramas me pelien lamalam tohto kin utung. Ma soangen sarawi pwukat kin kapwaiada oh padahkiong tohn arail sarawi kan en poakong mehn mparail, re pahn miniminpene. Ahpw, iaduwen—ke kin kilang me re kin wia met? Pelien lamalam akan kin kangoange aramas ren miniminpene? Roporop ehu me wiawi nan Germany kihda peidek wet: “Pelien sarawi kan kin kaminiminpene aramas, de re kin kalap kaliaktohrohrpeseng aramas?” Sang nan pasapeng kan, e kasalehda me persent 22 ahneki pepehm me sarawi kin wiahda kaminimin, ahpw persent 52 ahneki pepehm me re kin kihpeseng oh kaliaktohrohrpeseng aramas. Ele mwein aramas akan nan pein ahmw wasa kin ahneki pepehm me duwehte met.
Dahme kahrehda aramas tohto sohte kak kamehlele me pelien lamalam kak kaminiminpene tohn sampah? Mwein ele pwehki dahme re ese me wiawier mahs nan poadoapoad. Palien sarawi sohte kin kihpene aramas, ahpw me re kin wia iei en kadohwanirailpeseng. Ekei pak, pelien lamalam kin poahsoanehda kahpwal laud tohto me kin wiawi ong aramas. Kitail tehkpene mehkan me wiawihier erein sounpar 100 samwalahr oko.
Ni Eden Pelien Lamalam
Nan Mahwen Keriau en Sampah, mehn Croat me Roman Kadohlik kan oh mehn Serb nan Balkan me iang Orthodox nantihong kemehla irail. Pelien lamalam riau pwukat kin kose me dene re kin idawehn Sises, oh re kin padahkiong iengerail akan en poakohng mehn mparail kan. Ahpw, arail mahwenpene kin imwikihla “kamakamalahn aramas me keieu laud nan poadoapoad en aramas,” nin duwen soun roporop emen ah koasoia. Sampah kin masepwehngkihda kamalahn aramas tohtohsang 500,000 ohl, lih oh seri kan.
Nan pahr 1947 wehi kan me kisehn India wia wasahn kousoan ong aramas rar 400—me wehwehki persent 20 en tohn sampah—oh pali laud mehn Hindu, Muslim, oh Sikh. Ahnsou me wehin India pwalpeseng, wehin Pakistan me towe kan wia pelien lamalam en Islam miehla. Ahnsowo mie West Pakistan oh East Pakistan. Pil ahnsowo, mwekid en pwalpeseng wet kahrehda aramas lopw kei kamala, isihsda, kalokolok ni eden pelien lamalam.
Patehng mwekid suwed wet, nan tepin senturi 21 palien terrorism kehlailda. Rahnwet, mwekid en terrorism kihong sampah pwon nan keper, oh pali laud en irail terrorist kan nda me arail mwekid kin poahsoankihda pelien lamalam. Pelien lamalam sohte kin sansaliki kaminiminpenehn aramas. Dahme e kin sansalki, iei wiewia lemei oh katohrepeseng en aramas. E sohte kapwuriamwei me nuhs en Germany me ede FOCUS karasahkihong pelien sarawi kehlail akan—Buddhism, Christendom, Confucianism, Hinduism, Islam, Judaism, oh Taoism—me irail duwehte powder en kesik me kin pos.
Akamai en Mas Loale
Ni ahnsowohte me pelien lamalam akan kin mahwenpene nanpwungarail, ekei pelien lamalam kin uhpene nanpwungarail. Karasepe, nan ahnsou kerendo kei, pelien lamalam en Kristendom kin wie dondolpeseng pwehki arail padahk kan ah sohte kin pahrekpene. Kaunen lamalam oh towe kan, pali koaros kin peidek: Ale wini en kamalau liseian e mweimwei? Kapwilla liseian e mweimwei? Lih akan kak wia kaunen pelien lamalam? Ia madamadau en sarawi ong ohl mwahuki ohl oh lih mwahuki lih? Pelien lamalam pwungki mahwen? Pwehki saminiminpene ah mie, aramas tohto kin peidek, ‘Iaduwen pelien lamalam ahr pahn kak kaminiminpene tohnsampah ma re sohte kak kaminiminpene pein tohn arail sarawi kan?’
E sansal me pelien lamalam pali laud sohte kak wahdo miniminpene. Ahpw, iaduwen—pelien lamalam koaros kin sansaliki towe kan arail sohte kak ehupene? Mie pelien lamalam ehu me weksang meteikan—pelien lamalam ehu me kak kaminiminpene tohn sampah?
[Kilel nan Pali 3]
Polismen ohla ni ahnsou me pelien lamalam kan peipene nan India ni pahr 1947
[Kilel nan Pali 3]
Photo by Keystone/Getty Images