Siohwa Kin Pere Irail Akan Me Kin Likih Ih
“Sapwellimomwi limpoak-kadek oh loalopwoat pahn sinsile iehte ahnsou koaros.”—MELKAHKA 40:11.
1. Dahme Nanmwarki Depit peki rehn Siohwa, oh iaduwen pekipek wet pweida nan atail ahnsou?
NANMWARKI DEPIT en Israel en mahso “kin inenen koapworopworki Siohwa” oh met kamwekid ih en mahsanih me Siohwa “ketin karonge oh karongehda eh likwer ong sawas.” (Melkahka 40:1) E kin pein kilang duwen en Siohwa kin pere irail me kin poakohng ih. Met kahrehong Depit kak peki rehn Siohwa en kin kalapw pere ih. Depit kin uhd iang irail ohl oh lih lelepek kan me iang ale inou en “kaiasada me keieu mwahu” oh ni ahnsouwet, Depit mihmihte nan sapwellimen Koht iren kataman oh e pahn iang ale katingpe. (Ipru 11:32-35) E koapworopwor en ahnsou kohkohdo inenen teng. Mware ntingdier nan sapwellimen Siohwa “pwuhk en kataman.”—Malakai 3:16.
2. Iaduwen Iren Pwuhk Sarawi kan sewese kitail en wehwehkihla wehwehn en ale perepatail sang rehn Siohwa?
2 Mendahki irail me lelepek kan me ntingdier nan pwuhken Ipru irelaud 11 momour mwohn Sises ketido sampah, ahpw arail mour kin pwungiong dahme Sises kin padahki ni e mahsanih: “Mehmen me kin poakohng eh mour uhdahn pahn pwupwusang; a mehmen me kin tounmeteikihla eh mour nin sampah wet, iei ih me pahn kolokolete ong mour soutuk.” (Sohn 12:25) Eri, e sansal me en ale perepe sang rehn Siohwa kin wehwehki me e sohte pahn kak lelong kamakam de lokolok. E kin wehwehki me e pahn pere ahmw pali ngehn oh ke pahn kak kolokol ahmw nanpwung mwahu rehn Koht.
3. Dahme kasalehda me Krais Sises ale perepe sang rehn Siohwa oh ia imwilahn met?
3 Pein Sises pil lelong uhwong oh kalokolok oh ah imwintihti kan pil kihong ih nan kanamenek laud oh pil kemehla ih. Ahpw, met sohte wehwehki me Koht sohte kolokol ah inou en pere sapwellime Mesaiao. (Aiseia 42:1-6) En Sises kaiasada ni rahn kasilu mwurin eh mehla kanameneko, kin kasalehda me Siohwa kin karonge sapwellime likwer—duwehte Siohwa karongehier en Depit likwer en sawas—oh e ketikiong Sises kehl en kolokol ah lelepek. (Madiu 26:39) Pwehki e alehdi mehn perepe ih ni ahl wet, Sises alehier mour kohkohlahte nanleng, oh aramas rar rar kei me kin pwoson sapwellime tomw pil pahn ale mour soutuk.
4. Koapworopwor dah kohieng irail Kristian keidi kan oh “sihpw teikan”?
4 Kitail kak koapworopworki me Siohwa kupwurki oh kak pere sapwellime ladu kan met duwehte e kin wia ni mwehin Depit oh Sises. (Seims 1:17) Eri, irail me malaulau kei rien Sises me iang keidi me mihmihte sampah kak koapworopworki sapwellimen Siohwa inou: “Sohso ieu me sohte kak ohla . . . ketin nekinekdohng kumwail nanleng, me aleier silasil mwahu pahn manaman en Koht pwehki amwail pwoson, nin doken amwail awiawih komourpamwail me nektehn sansalda ni imwilahn ahnsou.” (1 Piter 1:4, 5) Irail “sihpw teikan,” me arail koapworopwor iei sampah, kak pil koapworopworki Koht oh sapwellime inou kan me sounmelkahka mahsanih: “Kumwail poakohng Siohwa, kumwail koaros sapwellime aramas loalopwoat akan. Siohwa kin ketin sinsile me loalopwoat akan.”—Sohn 10:16; Melkahka 31:23.
Perepomw ni Pali Ngehn
5, 6. (a) Iaduwen sapwellimen Koht aramas akan ale pereparail nan rahnwet? (b) Dahme mie nanpwungen irail me keidi kan oh iaduwen irail akan me arail koapworopwor iei sampah?
5 Ni ahnsouwet, Siohwa wiahdaher koasoandi kan me pahn pere sapwellime aramas akan ni pali ngehn. Mendahki e sohte kin kihsang kahpwal oh kalokolok kan sang sapwellime kan ahpw e kin kihong irail sawas oh kangoang kan me kak sewese irail en kolokolte arail nanpwung mwahu reh. Poahsonpen arail nanpwungmwahu rehn Koht iei sang ni arail pahn pwoson sapwellimen Koht kisakis me iei tomw en Krais. Ekei irail Kristian lelepek pwukat me keikihdi sapwellimen Koht ngehn sarawi pahn iang Krais kaun nanleng. Irail wiahlahr sapwellimen Koht seri pwung kei oh mahsen pwukat kin doke irail: “E ketin kapitkitailsang pahn manaman en rotorot, oh ketin kahreikitaildohng nan wehin Sapwellime Iehros kompoak, iei ih me ketin kasaledengkitailla me wehwehki e ketin lapwahsang dipatail kan.”—Kolose 1:13, 14.
6 Aramas rar kei me pil iang kisehn irail Kristian lelepek teikan pil kak koapworopworki me irail pahn iang paiekihda en Koht kisakis me iei tomwo. Kitail wadek: “Pwe pil Nein-Aramas ketido, kaidehkin pwe aramas en papah, a pwe en papah aramas koaros oh tounmeteikihla eh mour pwe en komourala aramas ngeder.” (Mark 10:45) Irail Kristian akan kin kilikilangwong ni ahnsou me irail pahn iang perenki “saledek lingan me pahn kohwong sapwellimen Koht seri kan.” (Rom 8:21) Ahpw met irail kin kesempwalki arail nanpwungmwahu rehn Koht oh kin uhdahn nannantiong en kakehlailla nanpwungmwahu wet.
7. Ki dah me Siohwa kin perehki sapwellime kan ahr pali ngehn rahnwet?
7 Ehu ahl me Siohwa kin pere sapwellime aramas akan arail pali ngehn iei ni ah kin wiahda koasondi en kekeirada oh deila ni arail pali ngehn. Met pahn kahrehiong irail en wehwehkihla laud padahk mehlel. Siohwa kin kaukaule kihda kaweid ki sapwellime Mahsen, pwihn, oh ngehn sarawi. Pahn kaweid en “ladu lelepek oh loaloakong,” sapwellimen Koht aramas akan nan sampah pwon kin duwehte peneinei laud ehu sang nan sahpw koaros. Pwihn en ladu wet kin apwahpwalih anahn en pali ngehn oh ma pil anahn, paliwar en peneinei laud wet—sohte lipilipil iawasa irail kohsang ie de pil ihs irail.—Madiu 24:45.
8. Soangen koapworopwor dah Siohwa kin kihong pohn sapwellime lelepek kan oh met kin kamehleleiong irail dah?
8 Nin duwen en Siohwa sohte kin pere Sises sang kalokolok en war sang ah imwintihti kan, pil duwehte met, e sohte kin pere Kristian kan rahnwet ni ahl wet. Met sohte wehwehki me Siohwa sohte kupwurperenkin irail. Uhdahn soh! Ahpw met kin kasalehda en Siohwa ah ketin koapworopworki me irail pahn uhki te Ih nan kahpwal wet. (Sohp 1:8-12; Lepin Padahk 27:11) Siohwa sohte kak soikala irail me kin lelepek ong Ih, “pwe Siohwa kin kupwurperenki dahme pwung, oh sohte kin likidmeliehla sapwellime aramas loalopwoat akan. E kin ketin sinsile irail ahnsou koaros.”—Melkahka 37:28.
Alehdi Mehn Perepe ki Limpoak-Kadek oh Mehlel
9, 10. (a) Iaduwen sapwellimen Siohwa mehlel kin pere sapwellime kan? (b) Iaduwen Pwuhk Sarawi kasalehda me Siohwa kin pere irail me lelepek kan ki sapwellime limpoak kadek?
9 Nan sapwellime kapakap me ntingdi nan Melkahka 40, Depit peki Siohwa en pere ih ki sapwellime limpoak kadek oh mehlel. Sapwellimen Siohwa mehlel oh limpoak ong pwung kin anahne en kasalehda ni sansal kupwure kan. Irail me kin mour pwung ong kupwure kan pahn mengei en ale pereparail sang soangen kapwunod, masak oh kahpwal kan me irail sohte kin men karonge ih kin lelohng. Karasepe ehu, kitail kak pere pein kitail oh kompoakpatail kan sang kahpwal kansensuwed tohto ma kitail pahn liksang ale wini suwed kan oh kamamsakau, dipen nenek, oh mour en lemei dihd. Irail akan me kin peiweisang sapwellimen Siohwa mehlel—duwehte Depit ekei pak kin wia—kak pil kamehlele me Koht kak pil wiahte “wasahn ruk ehu” ong irail me kin koluhla mehlel. Irail pwukat kak pil ni peren weriki: “Komwi pahn ketin doareiesang apwal.” (Melkahka 32:7) Mahsen pwukat kin kasansalehda duwen sapwellimen Siohwa limpoak-kadek!
10 Pil ehu karasepen en Koht limpoak kadek iei ni ah kin kehkehliki ong sapwellime ladu kan en dehr patehng sampah suwed wet me e pahn kereniongehr kauwehla. Kitail wadek: “Kumwail dehr poakohng sampah, de dipwisou me mihmi nin sampah. Pwe ma kumwail kin poakohng sampah, poakepen Sahmo sohte mi loalamwail. Pwe mepwukat koaros kisehn sampah: dipen ineng en uduk, oh mehkan me aramas kin kilang oh ahnehda, oh mehkoaros me mih nin sampah me aramas kin pohnmwahsohkihda—mepwukat koaros sohte kohsang rehn Sahm, re kohsang nin sampah.” Ni atail pahn rong kaweid pwukat oh kapwaiada, kitail kak pere atail mour sang met oh pil kohkohlahte, ihme ireo pousehla mahsanih: “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.”—1 Sohn 2:15-17.
Alehdi Perepatail ki Atail kin Doadoahngki Elen Madamadau kan, Dehdehki, oh Erpit
11, 12. Kawehwehda iaduwen elen madamadau, dehdehki, oh erpit kin pere kitail.
11 Ong irail akan me men Koht en kupwurperenki irail, sapwellimen Depit pwutak Solomon mahsanih: “Omw kin doadoahngki elen madamadau kan oh omw kin dehdehki pahn wia poadoarepomw.” E pil kangoange: “Nantihong alehda erpit . . . Ke dehr kesehla kupwurokong pwe e pahn sinsileiuk. Poakohng pwe e pahn kamouruhkala.”—Lepin Padahk 2:11; 4:5, 6.
12 Kitail doadoangki elen madamadau ni atail pahn doudouloale mehkan me kitail kin sukuhlikihsang Mahsen en Koht. Doudouloale kin sewese kitail en kekeirada oh kalaudehla atail wehwe pwe kitail en kak koasonehdi dahme keieu kesempwal. Met kesempwal pwehki pali laud en kitail ese—me kahpwal akan kin kohsang ni en aramas akan kin ni sohte nsenki de pil nsenkihda en wiahda koasondi kan me sohte uhdahn kesempwal. Ahn Sehdan sampah kin kasonge kitail en akadeiong kepwehpwe kan, ndand oh ahneki manaman laud. Ahpw, Siohwa kin kangoange kitail en kesempwalki mehkan me ngenin. Ma kitail sohte pahn mwohneki soahng ngehnin kan atail peneinei pahn mweipeseng, atail nanpwung mwahu rehn kompoakpatail kan pahn ohla oh mehkan en ngehn pahn sohrala. Imwilahn met, aramas emen ihte pahn nsensuwedla oh sapwellimen Sises mahsan pahn pweida ni ah mahsanih: “Pwe ia pahn katepehiong aramas, ma e pahn sapwenikihla sampah pokon, e ahpw katihasang uhdahn eh mour?” (Mark 8:36) Erpit iei en kapwaiada sapwellimen Sises kaweid me iei: “Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn kin ketikihong kumwail.”—Madiu 6:33.
Keper en Ahneki Madamadau en Roporop
13, 14. Ia wehwehn madamadau en roporop oh dahme kahrehda e pweipwei en ahneki soangen madamadauo?
13 Aramas kin nsenohki pein irail oh met konehng. Ahpw, ma kitail mwohnekihla dahme kitail mwahukihte met pahn imwikihla kahpwal. Eri, pwe kitail en pere atail nanpwungmwahu rehn Siohwa, e padahkiong kitail en liksang madamadau en roporop. Lepin lokaia wet roporop kin wehwehki en “nsenohki pein ah ineng kan, anahn kan oh soahng kan me e kin perenki.” Iaduwen, met soh kin kawehwehda mour en me tohto rahnwet? Pwuhk Sarawi kohpada me “ni imwin rahn akan” aramas akan pahn “poakohngete pein irail” oh pahn roporop ohngete pein irail.”—2 Timoty 3:1, 2.
14 Kristian akan kin perenki kesempwalpen de elen loalokong en kapwaiada iren Pwuhk Sarawi me kaweidki en nsenohki meteikan oh poakohng mehteikan duwehte arail poakohng pein irail. (Luk 10:27; Pilipai 2:4) Aramas akan ele pahn kilangwong met nin duwen mehkot me sohte kak wiawi oh e kesempwal kitail en perenki pwopwoud pweida, mour en peneinei peren, oh kompoakpah mwahu kan. Eri, ladu mehlel en Siohwa men sohte pahn mweidala arail ineng en roporop en powehdi soahng kesempwal akan nan mour. Me keieu kesempwal, iei dahme Siohwa Koht kin kupwurki.
15, 16. (a) Dahme roporop kak kahrehda oh karasaras en ihs me pwarada met? (b) Ni mehlel, dahme aramas emen kin wia ni e kin mwadang kadeik meteikan?
15 Madamadau en roporop kak kahrehda emen en ahnekihda lamalam me ih me keieu pwung, oh met pahn uhd kahrehda aramas en uhd aklapalap. Pwuhk Sarawi mahsanih: “Eri, ia duwen kowe, kompoakepahi, ke kin kadeikada aramas teikan? Eri, sohte lipilipil ihs kowe, sohte peikidpomw; pwe ni omw kin kadeikada meteikan oh wia soahngohte me re kin wia, ke kin pein kadeikuhkada.” (Rom 2:1; 14:4, 10) Irail kaun en pelien lamalam kan ni mwehin Sises inenen koapworopworkihla me irail aramas pwung kei me kahrehiong irail en pehm me irail kin kopwung Sises oh sapwellime ko. Ni arail kin wia met, irail pein wiaiong irail en wiahla sounkopwung kei. Irail maskunla ong arail sapwung kan oh met wahdohng irail kahpwal.
16 Sudas, iengen Sises me pangala ih, mweidala en wia emen me kin song kadeik mehteikan. Ehu ahnsou nan Pedani, ni Mery rien Lasarus serepein, keiekihdi Sises leh pweilaud, Sudas uhdahn uhwongada. E kasalehda ah sapwungki oh akamai nda: “Dahme kahrehda leh wet sohte netila ni mwohni silper silipwiki, pwe mwohni wet en kohieng me semwehmwe kan?” Pwuhk Sarawi pousehla mahsanih: “E nda met, kaidehn pwehki eh kin nsenohki me semwehmwe kan, ahpw pwehki lipirap men ih. Ih me kin weuwa neirail edin mwohnio oh ki kihkihsang mwohni.” (Sohn 12:1-6) Kitail dehr duwehte Sudas oh kaun en pelien lamalam akan me mwadang en kadeik mehteikan ahpw ihte met kin wahdohng pein irail kahpwal kan.
17. Kawehwehda kahpwal me kin kohsang pohnmwahso oh nohn koapworopworkihla pein ih.
17 E kansensuwed pwe ekei tepin Kristian akan mendahki irail sohte lipirap duwehte Sudas ahpw irail wiahla aramas aklapalap kei me pid irail Seims ntingihdi: “A met, kumwail me aklapalap oh aksuwei.” E kapataiong: “Eri, met me sapwung.” (Seims 4:16) Ni atail kin aklapalapla oh suweiki mehkan me kitail wiahda de atail pwukoa kan nan sapwellimen Siohwa doadoahk, met ihte kin wia ohla ehu ong pein kitail. (Lepin Padahk 14:16) Kitail kak tamanda dahme wiawiong wahnpoaron Piter me ekis aklapalapla oh mwadang suweiki nda: “Maing, mehnda ma meteikan koaruhsie pahn tangasang komwi, a ngehi I soh mwahn pahn keseikomwihla! . . . I sohte mwahn pahn kahmahmkin komwi, mehnda ma I pahn iang komwi pwoula.” Ni mehlel sohte mehkot kitail kak kalahkihki pein kitail. Soahng koaros me kitail alehdi kin sang ni limpoak kadek en Siohwa. Ni atail pahn tamataman met, e pahn koledi kitail en dehr ahneki madamadau en aklapalapla.—Madiu 26:33-35, 69-75.
18. Iaduwen Siohwa kin kilangwong aklapalap?
18 Kitail rongehr me, “Aklapalap kin kohdo mwohn ohla ehu oh pohnmwahso kin kohdo mwohn pwupwudi ehu.” Pwekihda? Siohwa sapeng: “I kin kailongki . . . pohnmwahso oh aklapalap.” (Lepin Padahk 8:13; 16:18) Ihme kahrehda Siohwa kin kalahdeki “ahn nanmwarki en Asiria ah suwei oh pohnmwahso”! (Aiseia 10:12) Siohwa kaloke ih ki ah pohnmwahso. Ni ahnsou keren sapwellimen Sehdan sampah iangahki irail kaun pohnmwahso me sansal oh sohte sansal kan pahn ale kalokeparail. Kitail en dehr alasang soangen lamalam en roporop pwukat me Koht kalahdeki!
19. Iaduwen sapwellimen Koht aramas akan kin suwei oh ni ahnsowohte aktikitik?
19 Kristian mehlel kan ahneki kahrepe mwahu en suweiki arail kin wia sapwellimen Siohwa ladu kei. (Seremaia 9:24) Ni ahnsowohte irail ahneki kahrepe mwahu en aktikitik. Pwekihda? Pwehki “aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas.” (Rom 3:23) Eri, kitail en kolokolete nan dewetail nin duwen sapwellimen Siohwa ladu kei, kitail anahne ahneki madamadau en wahnpoaron Pohl, ni a nda me “Krais Sises ketido nin sampah pwe en komourala me dipan akan,” oh e kapataiong: “I suwedsang irail koaros.”—1 Timoty 1:15.
20. Iaduwen Siohwa kin pere sapwellime kan met, oh iaduwen e pahn pere irail ni ahnsou kohkohdo?
20 Pwehki sapwellimen Siohwa aramas akan kin mwohneki mahs dahme Koht kupwurki ahpw kaidehn arail ineng akan, eri kitail kak kamehlele me Siohwa pahn doulahte pere irail ni pali ngehn. Kitail pil kak kamehlele me ni Kahn Kamakam Kowahlap pahn leleldo, Siohwa pahn pere sapwellime kan kaidehn ni pali ngehn kelehpw ahpw pil paliwar. Ni arail pahn pidelong nan sapwellimen Koht sampah kapwo irail pahn weriwerki: “Iei ih me at Koht! Kitail koapworopworkilahr ih, oh e ketin kapitkitaillahr. Iei ih me Siohwa! Kitail koapworopworkilahr ih, oh met kitail nsenamwahulahr oh pereperen pwehki eh ketin doareikitaillahr.”—Aiseia 25:9.
Ke Tamataman?
• Iaduwen Nanmwarki Depit oh Sises Krais ale perepara?
• Iaduwen sapwellimen Siohwa kan ale pereparail rahnwet?
• Dahme kahrehda kitail en dehr pohnmwahsohla?
• Dahme kahrehda kitail kak suwei oh pil aktikitik ni ahnsouwohte?
[Kilel nan Pali 17]
Iaduwen Siohwa pere Depit oh Sises?
[Kilel nan Pali 19]
Iaduwen sapwellimen Koht aramas akan kin ale pereparail ni pali ngehn rahnwet?
[Kilel nan Pali 20]
Mendahki kitail kin suweiki atail papah Siohwa, kitail anahne ahnsou koaros aktikitik