Rongamwahu Ong Aramas Sang Nan Wehi Koaros
“Kumwail ahpw pahn kadehde ie . . . lelohng ni irepen sampah.”—WIEWIA 1:8.
1. Nin duwen sounpadahk en Pwuhk Sarawi, dahme kitail anahne tehk oh pwekihda?
SOUNPADAHK koahiek kan sohte ihte kin tehk dahme irail kin padahkiong neirail tohnsukuhl kan ahpw re pil tehk iaduwen arail kin nda mehkan me irail kin kasukuhlki. Nin duwen sounpadahk kan en Pwuhk Sarawi, kitail pil kin wia met. Kitail kin tehk dahme kitail padahngki oh mwomwen atail padahk ki. Padahk me kitail kin padahngki—me iei Rongamwahu en Wehio—sohte kin wekila ahpw kitail kin kak wekidala mwomwen atail pahn wia padahk pwe en kak pwungohng irairo. Pwekihda? Pwe en kak sair mohngiong en aramas akan.
2. Ni atail kin nantiong kawekila oh ahnla atail elen kalohk ihs me kitail kin kahlemengih?
2 Ni atail kin wekwekid mwomwen atail pahn kin padahk, met wehwehki kitail kin kahlemengih irail sapwellimen Koht mehn mahs ako. Karasepe ehu, iei wahnpoaron Pohl. E mahsanih: “I wiahkin ie mehn Suhs emen nin dokon ei kin doadoahk rehn mehn Suhs akan . . . pil duwehte, rehn mehn liki kan me sohte mihmi pahn Kosonnedo, I wiahkiniehla aramas me sohte mih pahn Kosonnedo . . . rehn me luwet akan ni pwoson, I wiahkinielahr aramas luwet emen duwehte irail, pwe en komourirailla. Eri, I wialahr soahng koaros rehn aramas koaros, pwe I en komourala ekei irail nin duwen eh kak pahi.” (1 Korint 9:19-23) En Pohl kin wekiwekid mwomwen ah padahk kan en pwung ong irair en tohnsukuhlo kin pweida mwahu. Kitail pil kak pweida ni atail pahn kin wekidala elen atail padahk kan pwehn kak pwungohng irair en aramas me kitail lokaiaiong.
Lel “ni Irepen Sampah”
3. (a) Soangen kahpwal dah kan kitail kin lelong nan doadoahk en kalohk? (b) Iaduwen mahsen en Aiseia 45:22 pweida nan rahn pwukat?
3 Ehu kahpwal laud me kin lellong irail akan me kin kalohki Rongamwahu iei uwen laud en wasahn kalohk—“me iei wasa koaros nan sampah.” (Madiu 24:14) Nan senturi kei samwalahro irail sapwellimen Siohwa ladu kan kin doadoahk laud pwehn lellahng wasa kapw kan pwehn kalohki Rongamwahuo. Dahme imwikihla met? Ei, doadoahk wet lellahng wasa koaros nan sampah. Nan tepin pahr kan en 1900, doadoahk en kalohk lelahngte ekei sahpw kan, ahpw ni ahnsowohte Sounkadehdehn Siohwa kan lelahngehr sahpw 235! Ei, doadoahk en Wehio me pid Rongamwahuo lelongehr “irepen sampah kan.”—Aiseia 45:22.
4, 5. (a) Ihs me kin iang kapwaiada pwukoa en kalohki Rongamwahuo? (b) Dahme ekei Branch Ohpis kan koasoiahki duwen irail kan me kin kohsang nan sahpw teikan pwehn papah nan wasa teikan?
4 Dahme kahrehda soangen pweida wet? Soahng tohto. Misineri kan kin ale kasukuhl sang ni Watchtower Bible School of Gilead oh pil ni ahnsouwet irail meh 20,000 kesepwilsangehr Ministerial Training Sukuhl oh kin kihda sawas laud. Oh pil irail Sounkadehde tohto pil pein doadoahngki neirail sent oh keseula nan wasa me anahn laud kan. Tohnmetei en irail Kristian—ohl oh lih, pwulopwul oh mah, kiripw de pwopwoud—kin wia sawas laud ong kalohk en doadoahk en Wehio nan sampah pwon. (Melkahka 110:3; Rom 10:18) Kalahngan laud kin kohwong irail. Tehk dahme ekei rahn ohpis kan ntingihda duwen irail kan nan sahpw liki kan me kin papah wasa anahn laud ong wasahn kalohk.
5 “Irail Sounkadehde pwukat kin tiengla ni arail kin kalohk nan wasa doh kan, oh kin sewese wiahda mwomwohdiso kapw kan oh kihda sawas ong kekeirdahn pali ngehn en irail brother oh sister kan nan sahpw wet.” (Ecuador) “Ma irail Sounkadehde epwiki kei me kohsang nan sahpw liki kan pahn kohkohla, eri aht mwomwohdiso kan sohte kehlail ni pali ngehn duwehte arail mih sahpw wet. E inenen wia kapai ieu arail mih reht.” (Dominican Republic) “Pali laud en aht mwomwohdiso kan—persent 70—kin direki sister kan. (Melkahka 68:11) Pali laud en sister kapw kan nan sahpw wet kin ale sawas laud ong arail pali ngehn sang rehn irail pioneer sister kan me kohsang sahpw teikan pwehn sawas. Sister kan me kohsang sahpw teikan me kin sewese kiht kin wia kisakis laud ong kiht!” (Iurop) Ke soh kin medewe en sawas nan ehu sahpw tohrohr?—Wiewia 16:9, 10.
“Ohl Ehk Sang Nan Lokaia Koaros”
6. Iaduwen Sekaraia 8:23 kin kasalehda duwen apwal en kalohk ong meteikan pwehki wekpeseng en lokaia kan?
6 Ehu kahpwal iei wekpeseng en lokaia kan nan sampah. Mahsen en Koht kohpada: “Ni rahn pwuko mehn liki ehk pahn kohdo rehn mehn Suhs men oh nda, ‘Se pahn ianguhkala nan omw palien lamalam en, pwe se rong me Koht kin ketin ieiang uhk.’ ” (Sekaraia 8:23) Nan ahnsou wet, wehwehn kokohp wet me pid ohl ehko kin wehwehki pokon kalaimwun me kokohpe kohda nan Kaudiahl 7:9. Tehk me nan kokohp en Sekaraia “ohl ehko” sohte ihte pahn kohsang nan wehi koaros ahpw pil “ni lokaia koaros.” Kitail kilangehr pweidahn kokohp wet? Ei.
7. Kekeirda dahieu me kasalehda me aramas sang wehi kan koaros rongehr duwen Rongamwahuo?
7 Kitail kak tehk duwen nempe kan. Pahr limesek samwalahro neitail pwuhk en sawaspen Paipel kawehwehdi ni lokaia 90. Rahnwet, nempe en lokaia kan me kawehwehdier mih pohnangin 400. “Ladu lelepek oh loalokong” wia soang koaros pwehn kawehwehda lokaiahn irail kan me malaulaute kin lokaiahki lokaia pwukat. (Madiu 24:45) Ni karasepe, sawaspen Pwuhk Sarawi ni ahnsouwet pil mih ni lokaiahn Greenlandic (me aramas 47,000 me kin lokaiahki), Palauan (me aramas 15,000 me kin lokaiahki), oh pil Yapese (me malaulausang aramas 7,000 me kin lokaiahki lokaia wet).
“Wenihmw Laud Ieu” Kaluwahlahng Soangen Kapai Tohto
8, 9. Wekidekla dahieu me kahrehong “wenihmw laud ieu” ritida ong kitail oh iaduwen Sounkadehde kid kei arail kin mwekidki met?
8 Rahnpwukat, mwein kitail sohte anahne seiloaklahng ehu wasa pwehn ehukihong aramas teikan duwen Rongamwahuo. Ni ahnsou wet, aramas tohto kin keseula nan sahpw kan me paiamwahu pwehn rapahki arail mour oh met kin kahrehda tohtohla soangen aramas akan nan wasa tehieu. Karasepe, nan Paris, France, lokaia epwiki kei kin doadoahk wasaohte pwehki tohtohlahn soangen aramas wasao. Nan Toronto, Canada, lokaia 125 kin doadoahk; oh nan London, England, tohtohsang lokaia 300 kin doadoahk wasao! Pwehki aramas akan me kin kohsang nan sahpw tohto oh keseula wasahkis met kin langada wenihmw laud ong ahl akan en ehukihong Rongamwahu en Wehio rehn aramas en wehi koaros.—1 Korint 16:9.
9 Sounkadehde kid kei kin nannanti ni arail pil kin sukuhliki ehu lokaia tohrohr pwehn kalohki Rongamwahu. Ong pali laud en irail e kin wia mehkot apwal ahpw e kin wia mehkot me pil kin wahdo peren laud ni arail kin sewese irail me kin kohdo sang sahpw teikan en sukuhliki duwen Mahsen en Koht. Nan pahr me apwtehn nek kereniong persent 40 en irail me papdaisla nan ehu kapokon en Western Europe kohsang nan ehu sahpw tohrohr likin Western Europe.
10. Iaduwen ahmw doadoahngki pwuhk en Rongamwahu Ong Aramas en Wehi Koaros? (Kilang koakon “Ire Kesempwal kan en Pwuhk wet Rongamwahu ong Aramas en Wehi Koaros,” ni pali 18.)
10 Ei, mehlel me pali laud en kitail mih nan irair ieu me kahrehong kitail en sohte kak sukuhliki ehu lokaia tohrohr. Mendahki met kitail kak iang sawas oh ehukihong aramas me kin seiloakdo kan sang ni atail pahn doadoahngki pwuhk me oaralap koasoia Good News for People of All Nations,a me kin mih ni soangsoangen lokaia kei. (Sohn 4:37) Ke kin doadoahngki pwuhk wet nan ahmw doadoahk en kalohk?
Ni Aramas akan Sohte kin Mwekid
11. Ia pil ekei kahpwal me kin pwarada nan ekei wasahn kalohk kan?
11 Ni en Sehdan doadoahk kin kekeirada nan sampah, ehu kahpwal pil pwarada me iei kapwal en irail kan nan wasahn kalohk sohte kin mwekidki dahme re rong. Ni mehlel, irair wet sohte kin kapwuriamwei ong kitail pwe Sises kohpadahr me soahng wet pahn wiawi. Ni ah koasoia atail ahnsou e mahsanih: “Limpoak en me tohto pahn tikitikla.” (Madiu 24:12) Ei, aramas tohto solahr kin kamehlele Koht oh wauneki Pwuhk Sarawi. (2 Piter 3:3, 4) Kahrehda nan ekei wasa nan sampah ekeite me kin kak wiahla tohnpadahk kapw en Krais. Met sohte wehwehki me doadoahk laud en riatail brother oh sister kan nan sahpw pwukat sohte katepe. (Ipru 6:10) Pwekihda? Tehk duwen met.
12. Ia kahrepe riau me kitail kin kalohk?
12 Nan Rongamwahu en Madiu e kin kasalehda duwen kahrepe riau en atail doadoahk en kalohk. Ehu, iei en “katohnpadahkiala aramas en wehi koaros.” (Madiu 28:19) Oh keriau, iei Rongamwahu en Wehio kin wia mehn “kadehde ieu.” (Madiu 24:14) Kahrepe riau koaros kesempwal ahpw me keriauo mie wehwe tohrohr ong kitail. Pwekihda?
13, 14. (a) Ia kilel keieu sansa me pid duwen ketier en Krais? (b) Dahme kitail en kin ahnsou koaros taman ni atail pahn kalohk nan wasa kan me aramas akan sohte nohn mwekidki?
13 Sounnting en Pwuhk Sarawi Madiu ntingihdi dahme wahnpoaron kan idek rehn Sises: “Komw ketin mahsanihiong kiht ahnsou dah me mepwukat pahn wiawi, oh kilel dah me mepwukat pahn wiawi, oh kilel dah kei me pahn kasalehda ahnsou omwi ketiket nan mwoalomwi oh imwin koasoandi wet?” (Madiu 24:3) Sises sapengkin irail me ehu kilel me pahn keieu sansal iei met: aramas pahn kalohkiseli Rongamwahuo nan sampah pwon. Wasaht, e koasoakoasoia duwen doadoahk en sewese aramas en wiahla tohnpadahk kan? Soh. E mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros.” (Madiu 24:14) Eri, Sises kasalehda me doadoahk en kadehde duwen Wehin Koht me pahn wia irair kesempwal en kilelo.
14 Kahrehda, ni atail pahn kin kalohki duwen Wehio, kitail en taman me mendahki ma kitail sohte pahn pweida ni atail katohnpadahk, kitail en taman me kitail pweida ni atail kin “kadehde.” Sohte lipilipil iaduwen irail aramas akan kin mwekidki duwen Rongamwahuo, irail ese dahme kitail wiewia oh kitail kin iang kapwaiada pweidahn sapwellimen Sises kokohp. (Aiseia 52:7; Kaudiahl 14:6, 7) Jordy, emen Sounkadehde pwutak pwulopwul nan Western Europe, koasoia: “Sang ni ai ese me Siohwa kin doadoahngki ie nan pweidahn doadoahk en Madiu 24:14 kin inenen kaperen ong ie.” (2 Korint 2:15-17) Mwein ke pil kin ahneki soangen pepehm ohte.
Ni Ahnsou Me Aramas kin Uhwong Rongamwahuo
15. (a) Duwen dah me Sises kehkehlikiong mwowe ong sapwellime tohnpadahk kan? (b) Dahme kin kakehle kitail en kalohk mendahki uhwong?
15 Uhwong laud me pil kin wia ehu kahpwal nan doadoahk en kalohki duwen Wehio. Sises kehkehlikiong sapwellime tohnpadahk kan: “Tohn wehi koaros pahn kailongkin kumwail pwehki ngehi.” (Madiu 24:9) Duwehte tepin Kristian akan, sapwellimen Sises tohnpadahk kan nan rahnwet kin lelohng uhwong, kailok, oh kalokolok. (Wiewia 5:17, 18, 40; 2 Timoty 3:12; Kaudiahl 12:12, 17) Nan ekei sahpw nan rahn pwukat, koperment kin uhwong irail. Ahpw pwehki arail kin peikiong Koht, irail Kristian mehlel akan nan sahpw pwukat kin doulahte kalohki duwen Rongamwahu en Wehio. (Amos 3:8; Wiewia 5:29; 1 Piter 2:21) Dahme kin kakehle irail Sounkadehde pwukat iangahki Sounkadehde teikan nin sampah pwon en kak doulahte kalohki Rongamwahuo? Siohwa kin kihong irail kehl sang ni sapwellime ngehn sarawi.—Sekaraia 4:6; Episos 3:16; 2 Timoty 4:17.
16. Iaduwen Sises kasalehda duwen ehupene en sapwellimen Koht ngehn sarawi oh doadoahk en kalohk?
16 Sises kin kasalehda duwen doadoahkpene en sapwellimen Koht ngehn sarawi oh doadoahk en kalohk ni ah mahsanihiong sapwellime ko: “Ahpw kumwail pahn audaudkihda manaman ni ahnsou me ngehn sarawi pahn ketidohng kumwail, oh kumwail ahpw pahn kadehde ie . . . oh lelohng ni irepen sampah.” (Wiewia 1:8; Kaudiahl 22:17) Mwomwen irekdi en wiewia kan nan iretikitik wet kesempwal. Ni tepio irail tohnpadahk ko alehdi mahs ngehn sarawi, a mwuhr re ahpw tepida doadoahk en kalohk. Sapwellimen Koht ngehn sarawi me kak kihong irail kehl en “kalohki Rongamwahuo ong wehi kan koaros.” (Madiu 24:13, 14; Aiseia 61:1, 2) Ihme e konehng ni en Sises kin mahsanihki duwen ngehn sarawi nin duwen “sounsawas.” (Sohn 15:26) E mahsanih me sapwellimen Koht ngehn sarawi pahn kahluwa oh kaweid sapwellime tohnpadahk kan.—Sohn 14:16, 26; 16:13.
17. Ni atail kin lelong uhwong laud, iaduwen ngehn sarawi kin sewese kitail?
17 Ni ahl dah kei me sapwellimen Koht ngehn sarawi kin sewese kitail nan rahnwet ni atail kin lellong uhwong nan doadoahk en kalohki Rongamwahu? Sapwellimen Koht ngehn sarawi kin kakehle kitail oh kin uhwongada irail kan me kin kaloke kitail. Pwen karasahda met, kitail en tehk duwen mour en Nanmwarki Sohl.
Lelohng Uhwong me Kohsang Sapwellimen Koht Ngehn Sarawi
18. (a) Wekidekla suwed dahieu me Sohl wia? (b) Ahl dah kei me Sohl wia pwehn kaloke Depit?
18 Nin tepio Sohl wia nanmwarki mwahu men en Israel ahpw mwuhr e sapeikiong Siohwa. (1 Samuel 10:1, 24; 11:14, 15; 15:17-23) Met imwikihla sapwellimen Koht ngehn sarawi sohla iang nanmwarkio. Sohl uhd tepida lingeringer oh uhwongada Depit me Koht pilada me pahn wia nanmwarki mwurin Sohl oh me kin uhd paieki en Koht ngehn sarawi. (1 Samuel 16:1, 13, 14) Depit wia aramas emen me mwomwen mengei en kalowehdi. Met pwehki ihte me e kin kolokol iei mehn keseng arp, ahpw Sohl kin kolokol kesik keteiu nan peh. Ehu rahn, ni ahnsou me Depit kesekesengki arpo, “Sohl ahpw doakoahki ketieu pak riapak oh mengimengloalki: ‘I pahn ilewediong nin dihden!’ ahpw Depit sarekala pak riapak.” (1 Samuel 18:10, 11) Mwurin mwo Sohl rong nah pwutak Sonadan me wia kompoakpahn Depit oh kahukihla: “Ni mwaren Siohwa me Depit sohte pahn kamakamala.” Ahpw, mwurin mwo, Sohl pwurehng “song en doakoahki Depit sapwellime ketieuwo pwe en ilewediong nin dihdo.” Ahpw Depit “sarek oh ketieuo uhd lel nin dihdo.” Depit tangasang ahpw Sohl pil pwakihala. Ni ahnsoun apwal wet, sapwellimen Koht ngehn sarawi kin uhwong Sohl. Ni ahl dahieu?—1 Samuel 19:6, 10.
19. Iaduwen sapwellimen Koht ngehn sarawi pere Depit?
19 Depit tangala rehn soukohp Samuel ahpw Sohl kadarala nah ohl kan en wahsang Depit. Ahpw ni arail lelahng wasa me Depit rukuruk ie, “sapwellimen Koht ngehn sarawi tihada pohn nein Sohl ohl akan me kahrehong irail en tepda alasang soukohp ko.” Irail direkihla sapwellimen Koht ngehn sarawi me kahrehong irail en manokehla kahrepen arail kohla wasao. Pak riau Sohl kadarala irail ong kahrepe ohte, ahpw ahnsou koaros irail kin pwurala soahngohte kin wiawi. Met imwikihla en Sohl eh pein kohla pwehn ale Depit ahpw Sohl pil sohte kak pelianda sapwellimen Koht ngehn sarawi. Ngehn sarawi kadirehla ih “rahno pwon oh pwohngo pwon”—me kahrehong Depit ah ahneki ahnsou laud en tang.—1 Samuel 19:20-24.
20. Mehn kasukuhl dah kitail kak sukuhliki sang ahn Sohl kaloke Depit?
20 Koasoipen Sohl oh Depit kin audaudki mehn kasukuhl ieu: Koaros me kin kalohke sapwellimen Koht akan sohte kak pweida ni ahnsou me sapwellimen Koht ngehn sarawi pahn uhwongirailda. (Melkahka 46:11; 125:2) Siohwa koasonehdi me Depit pahn wia nanmwarki en Israel. Sohte me kak kasapwungehla met. Nan atail ahnsou Siohwa koasonehdi me “Rongamwahu en Wehio pahn lohkseli.” Oh sohte me pahn kak kauhdi met en dehr wiawi.—Wiewia 5:40, 42.
21. (a) Dahme ekei me kin uhwong rahnwet kin wia? (b) Dahme kitail kin koapworopworki?
21 Ekei kaun en lamalam oh politik kan kin doadoahngki likamw oh elen lemei pwehn kak kauhdi kitail. Ahpw, duwehte en Siohwa kin pere Depit ni pali ngehn, e pil pahn pere sapwellime aramas akan rahnwet. (Malakai 3:6) Kahrehda kitail kin duwehte Depit oh nda ni soh peikasal: “I kin likih, oh I sohte pahn masak mehkot. Pwe dahme aramas kak wiahiong ie?” (Melkahka 56:11; 121:1-8; Rom 8:31) Ki sapwellimen Siohwa sawas, kitail en doulahte kapwaiada pwukoah me Siohwa ketikihong kitail oh kalohk ong aramas koaros nan wehi koaros duwen Rongamwahu en Wehio.
[Nting tikitik me mi pahs]
a Wiawihda sang rehn Sounkadehdehn Siohwa kan.
Ke Kak Tamataman?
• Dahme kitail kin kawekihla atail elen kalohk?
• “Wenihmw laud ieu” kin langadahng kitail soangen pwukoah dah kei?
• Dahme kin pweida sang ni atail doadoahk en kalohk mendahki ekei wasahn kalohk kan sohte me kin mwekid?
• Dahme kahrehda sohte emen me uhwong kak kauhdi doadoahk en kalohki Rongamwahuo?
Ire Kesempwal kan sang Pwuhken Good News for People of All Nations
Pwuhken Rongamwahu ong Aramas Sang Wehi kan koaros kin audaudki mehn kair kan me kawehwehda ni lokaia 92. Mehn kair pwukat ntingdi ni ahl ehu me ni ahnsou me tohnihmwo pahn wadek, e mwomwen me pein kowe me koasokoasoiong ih.
Map en sampah me mahlendi ni pali mas loale en pwuhko. Doadoahngki map wet en wia ahl ehu me ke kak wiahda nanpwungmwahu rehn tohnihmwo. Ele ke kak kasalehong ih sahpw me ke kohsang ie oh ke kak ndaiong ih en uhd kasalehong uhk iawasa e kohsang ie. Ni ahmw pahn wia met, e pahn kak kahrehong aramaso en nsenamwahu oh meleilei.
Tepin mahsen kan en nan pwuhko kin kasalehda ahl akan me kitail kak wia pwe kitail en kak sewese irail akan me kin lokaiahki lokaia me kitail sohte wehwehki. Menlau wadek ahl pwukat oh kapwaiada ni keneinei.
Nan Table of Contents, e sohte ihte kairekehdi lokaia kan ahpw e pil kin kihdi kilel kan en lokaia ko. Met kin kamengeiong uhk en diarada mehnia kilel en lokaia me kin mih nan neitail trak oh pwuhk kan me kin wiawihda ni lokaia tohto.
[Kilel nan Pali 18]
Ke kin doadoahngki pwuhk wet nan kalohk?
[Kilel nan Pali 18]
Good News for People of All Nations
[Kilel nan Pali 15]
Neitail sawaspen Pwuhk Sarawi kin wiawihda ni lokaia 400 samwa
[Kilel nan Pali 15]
GHANA
[Kilel nan Pali 15]
PHILIPPINES
[Kilel nan Pali 15]
LAPLAND (SWEDEN)
[Kilel nan Pali 16]
Ke kak kalohk nan wasa kan me anahn laud ong sounkalohk en Wehio?
[Kilel nan Pali 16]
ECUADOR
[Kilel nan Pali 17]
DOMINICAN REPUBLIC
[Kilel nan Pali 18]