Koht Emen de Aramas Emen?

“NGEHI me marain en sampah. Mehmen me pahn idawehniehdo pahn ahneki marain en mour, oh sohte pahn weweid nan rotorot.” (Sohn 8:12) Mahsen pwukat Sises Krais me mahsanih. Aramas sukuhl laud emen nan senturi keieu ntingihdi duwen ih: “Iei ih me kak kasalehda sapwellimen Koht kapai rir kan koaros me kin pwilisang ni sapwellimen Koht erpit oh kupwurokong unsek.” (Kolose 2:3) Likin met, Pwuhk Sarawi mahsanih: “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.” (Sohn 17:3) Kitail anahne wehwehki dahme mehlel duwen Sises me inenen kesempwal ma kitail men kaitarala atail anahn en pali ngehn.

Aramas akan nan sampah pwon rongehr duwen Sises Krais. Dahme e ketin wiahda nan poadoapoad en tohn sampah sohte me kak kalikamwe. Ni mehlel, calendar me aramas kin doadoahngki wasa tohto nan sampah kin poahsoankihda sounpar me aramas akan kin lemeleme me iei ahnsou me Sises ipwidi. Pwuhk me ede The World Book Encyclopedia kawehwehda, “Aramas tohto kahdaneki pahr akan mwohn neitail calendar B.C., de mwohn Krais. Irail kin doadoahngki A.D. ong pahr akan en atail ahnsou me wehwehpe iei anno Domini (pahr en atail Kaun).”

Ahpw, mie madamadau tohto me kin uhpene me pid duwen Sises. Ong ekei aramas, ih aramas emen me duwehte aramas teikan ahpw kihdi lipwalipw kei nan poadoapoad en aramas. Pil ekei aramas kin kaudokiong ih oh wiahki ih Koht Wasa Lapalahpie. Ekei aramas me iang pelien lamalam en Hindu kin karasahiong Sises Krais duwehte koht en Hindu me adaneki Krishna, me iei Koht me wia-aramasala. Ahpw, iaduwen—Sises iei ih aramas me duwehte kitail, de e wia emen me kitail pahn kaudokiong? Ni mehlel, ihs ih? Iawasa e kohsang ie? Ia mwomwe? Ia ih ahnsouwet? Nin duwen atail pahn kilang nan artikel en mwurin met, pwuhk me pahn kasalehda laud duwen Sises me iei Paipel kin kihda pasapeng mehlel ong peidek pwukat.