Siohwa “Pahn Ketikihong Ngehn Sarawi Irail Kan Me Peki Reh”
“Mehnda ma kumwail aramas sapwung kei, a kumwail ese kihong noumwail seri kan dahme mwahu ong irail. Eri, Samamwail me ketiket nanleng soh pahn ketikihong ngehn sarawi irail kan me peki reh?”—LUK 11:13.
1. Iahd kitail kin keieu anahne sawas en ngehn sarawi?
‘ISOHTE kak pein powehdi met. Ihte ki sawas en ngehn sarawi me I pahn kak dadaurete pahn kahpwal wet!’ Mie pak me ke kasalehda soangen pepehm kan me kohsang nan mohngiongomw? Pali laud en Kristian akan kin wia met. Mwein ke kin wia met mwurin ke esehda me ke iangada soumwahu laud. De mwein ni ahnsou me ahmw pwoud en ahnsou werei mehla. De mwein ni ahnsou me ahmw pepehm en sohte koapworopwor duwehte depwek rotorot kan powehdi ahmw irair en kaperen me ke kin ahneki mahs. Nan ahnsou kamedek kan nan mour, mwein ke pehm me ke kin dadaurete ihte pwehki sapwellimen Siohwa ngehn sarawi kin kihong iuk “manaman lapalap.”—2 Korint 4:7-9; Melkahka 40:1, 2.
2. (a) Soangen kahpwal dah kan Kristian mehlel akan kin lelong? (b) Soangen peidek dah kan kitail pahn tehkpene nan artikel wet?
2 Kristian mehlel akan anahne powehdi kapwunod kan me kin lalaudla oh uhwong kan sang sampah en rahnwet me sohte wauneki Koht. (1 Sohn 5:19) Kapatahiong mepwukat, irail akan me kin idawehnla Krais kin ale kalokolok sang rehn Sehdan me Tepil, me kin wia mahwin suwed ieu ong irail akan me kin “kapwaiada kosonned en Koht kan, oh me loalopwoatohng padahk me Sises ketin kadehdehier.” (Kaudiahl 12:12, 17) Kahrehda met sohte kapwuriamwei me kitail anahne utuht en sapwellimen Koht ngehn ni ahnsou wet laud sang mahs. Dahme kitail kak wia pwehn tehk mwahu pwe kitail en kaukaule ale laud sapwellimen Koht ngehn sarawi? Oh dahme kahrehda kitail kak kamehlele me Siohwa kin uhdahn kupwurperenki kihong kitail kehl me kitail anahne ni ahnsoun kahpwal kan? Kitail pahn diarada pasapengpen peidek pwukat sang sapwellimen Sises karasaras riau.
Kapakap Ngidingid
3, 4. Mehnia karasaras me Sises koasoia, oh iaduwen e kin doadoahngki met ong kapakap?
3 Ehu pak emen sapwellimen Sises tohnpadahk peki reh: “Maing at Kaun, komw ketin padahkihong kiht duwen at pahn kapakap.” (Luk 11:1) Nan ah pasapeng, Sises ketikihong sapwellime tohnpadahk kan karasaras riau me pid duwen ire wet. Me keieu kin pid duwen emen ohl me apwahpwalih mehn keiru men, oh me keriau kin pid duwen pahpa men me kin rong nah pwutak. Kitail pahn tehkpene ehu ehu karasaras riau pwukat.
4 Sises mahsanih: “Ma emen kumwail me mie kompoakepah, e ahpw pahn kohla reh ni imwe nin lukepen pwong oh peki reh, nda, ‘Kompoakepahi, menlau kamangaiong ie mahs lopwon en pilawa siluh, pwe I en kamwengehki kompoakepahi men me ahpwtehn lel rehi, pwe sohte mehkot rehi me I en kihong!’ A ma kompoakepahmwo me mihmi nan imweo pahn sapeng, nda, ‘Ke dehr kedirepwe ie, pwe wenihmwet ritidier oh nei seri kat meirier. Eri, I sohte kak pwourda pwe I en kihong uhk mehkot.’ Eri, kumwail en ese pwe ma e sohte pahn pwourda pwe en kihong mehkot pwehki eh kompoakepah, a pwehki eh men piseksang eh pekipek ngidingido e pahn pwourda oh kihong mehkoaros me kompoakepaho anahne.” Sises eri kawehwehda iaduwen karasaras wet kin dokedoke tiahk en kapakap, ni eh mahsanih: “Ihme I ndahkihong kumwail: kumwail peki, e ahpw pahn kohieng kumwail; kumwail rapahki, kumwail ahpw pahn diar; kumwail letelet, e ahpw pahn ritidahng kumwail. Pwe koaros me kin peki pahn ale; oh me kin rapahki, kin diar; oh me kin letelet, e pahn ritidahng.”—Luk 11:5-10.
5. Dahme karasaras en ohl ngidingid men kin padahkiong kitail duwen atail irair kan ni ahnsou me kitail kin kapakap?
5 Karasaras sansal wet en ohl ngidingid men kin kasalehda soangen irair dah kan me kitail anahne ahneki ni ahnsou me kitail kin kapakap. Tehk me Sises mahsanih me ohlo pweida en ale dahme e anahne “pwehki eh pekipek ngidingido.” (Luk 11:8) Lepin lokaia wet “ngidingid” kin kawehwehdi sang lepin lokaiahn Krihk me wehwehki “sohte namenek.” Sohte namenek kin kalapw kasalehda tiahk me sohte mwahu. Ahpw, ni ahnsou me sohte namenek de ngidingid kin sansalda ong kahrepe mwahu, e kak wia irair mwahu. Ih me wiawiong tohnihmwo nan karasaras wet. E sohte namenengki pekipeki ngidingid ong dahme e anahne. Pwehki Sises kin kasalehda tohnihmw menet nin duwen mehn kahlemeng ong kitail, atail kapakap pil anahne wiawi ni ngidingid. Siohwa kupwurki kitail en kaukaulehte pekipeki, kaukaulehte raparapahki, kaukaulehte letelet. Ni ah ketin sapeng, e pahn “ketikihong ngehn sarawi irail kan me peki reh.”
6. Nan mwehin Sises, iaduwen aramas akan kin kilangwohng tiahk en kasamwo mehn keiru kan?
6 Sises kin kasalehong kitail kaidehn ihte iaduwen kitail anahne kapakap—ni ngidingid—ahpw pil dahme kahrehda kitail anahne wia met. Pwehn wehwehki iren mehn kasukuhl wet ni sansal, kitail anahne medemedewe iaduwen irail me rong sapwellimen Sises karasaras duwen tohnihmw ngidingid men kin kilangwohng tiahk en kasamwo mehn keiru kan. Poadoapoad tohto nan Iren Paipel kan kin kasalehda me ni mwehin Paipel, en apwalih mehn keiru kan kin wia tiahk ieu me inenen kesempwal, keieu ong sapwellimen Koht ladu kan. (Senesis 18:2-5; Ipru 13:2) En sohte kasalehda tiahk en kasamwo mehn keiru kan kin wia mehkot kanamenek. (Luk 7:36-38, 44-46) Ni atail tamataman met, kitail pahn pwurehng tehk sapwellimen Sises karasaraso.
7. Dahme kahrehda tohnihmwo nan sapwellimen Sises karasaras sohte namenengki kapirada kompoakepah?
7 Tohnihmwo nan karasaraso kasamwo mehn keiru men nan lukepen pwong. Tohnihmwo pehm me e anahne kamwenge ih ahpw “sohte mehkot reh.” Met, mehkot karuwaru ong ih! E anahne ale ekei lopwon en pilawa, mendahki met pahn apwal. Ih eri kohla rehn kompoakepah oh sohte namenengki kapirada ih. E likwerih: “Kompoakepahi, menlau kamangaiong ie mahs lopwon en pilawa siluh.” E ngidingidki ah pekipek lao lel kompoakepaho kihong ih dahme e anahne. Ihte met, pwehki mieier lopwon pilawa kan reh me e kak wiakihla tohnihmw mwahu men.
Anahn Laud—Pekipek Laud
8. Dahme pahn kamwekid kitail en kapakap ni ngidingid ki ngehn sarawi?
8 Dahme karasaras wet kin kasalehda duwen dahme kahrehda kitail anahne kapakap ni ngidingid? Ohlo pwurepwurehng peki pilawa pwehki e pehm me e uhdahn anahne ale pilawa pwukat pwehn kapwaiada ah pwukoa nin duwen tohnihmw. (Aiseia 58:5-7) Ma sohte pilawa, e sohte pahn kak kapwaiada ah pwukoa. Duwehte met, pwehki kitail wehwehki me kitail uhdahn anahne sapwellimen Koht ngehn pwehn wia atail doadoahk en kalohk nin duwen Kristian mehlel kan, kitail kin kaukaule kapakap ong Koht, pekipeki ngehno. (Sekaraia 4:6) Ma sohte ngehno, kitail sohte pahn pweida. (Madiu 26:41) Ke kin kilang mehn kasukuhl kesempwal me kitail kak alehdi sang karasaras wet? Ma kitail kin kilangwohng sapwellimen Koht ngehn nin duwen mehkot me kitail uhdahn anahne, kitail pahn ngidingid en peki met.
9, 10. (a) Karasahiong dahme kahrehda kitail anahne ngidingid ni atail kin peki rehn Koht sapwellime ngehn. (b) Soangen peidek dahieu kitail anahne idek rehtail, oh pwekida?
9 Pwehn kapwaiada mehn kasukuhl wet nan atail mour rahnwet, medewehla ma emen nan ahmw peneinei soumwahuda ni lukepen pwong. Ke pahn kapirada toahkte men pwehn peki reh sawas? Ke sohte pahn wia met ma me soumwahuo ah kahpwal tikitik. Ahpw, ma e lel soumwahu en mohngiong (heart attack), ke sohte pahn namenengki en likwerih toahkte men. Pwekida? Pwehki ke lelong mehkot karuwaru. Ke wehwehki me sawas en aramas koahiek men me uhdahn anahn. En sohte peki sawas pahn kakete kahrehda mehlahn me soumwahuo. Duwehte met, Kristian mehlel kan kin kaukaule lelohng kahpwal me kin mih nan irair en karuwaru, ni karasaras. Ni mehlel, Sehdan kin kohkohseli duwehte “laion emen me kin weriwer,” songosong en kadallehla. (1 Piter 5:8) Pwe kitail en momour ni pali ngehn, sawas en sapwellimen Koht ngehn me uhdahn anahn. En sohte peki sapwellimen Koht sawas kakete kahrehda mehla. Kahrehda, ni ngidingid kitail kin peki rehn Koht sapwellime ngehn sarawi. (Episos 3:14-16) Ihte ni atail kin wia met kitail pahn kolokol kehl me anahn pwehn ‘dadaurete lel ni imwi.’—Madiu 10:22; 24:13.
10 Ihme kahrehda e inenen kesempwal ong kitail en uhdi ekei ahnsou oh idek rehtail, ‘Ni mehlel, ia uwen ngidingid en ahi kapakap?’ Tamataman, ni ahnsou me kitail kin uhdahn wehwehki me kitail anahne sapwellimen Koht sawas, atail kapakapki ngehn sarawi pahn uhdahn ngidingid.
Dahme Kamwekid Kitail en Kapakap ni Pwoson?
11. Iaduwen Sises doadoahngki karasaras en pahpa men oh nah pwutak duwen kapakap?
11 Sapwellimen Sises karasaras en tohnihmw ngidingid men kin kasansalehda irair en emen me kin kapakap—me pwoson men. Karasaras en mwuhr kin kasalehda irair en emen me kin rong kapakap kan—Siohwa Koht. Sises idek: “Mie rehmwail sahm emen, me ni nah seri men eh pahn peki kene kisin mwahmw, e ahpw pahn kihong sineik? De ni eh peki kene kutohr, e ahpw pahn kihong meninrahn?” Sises doula oh kasalehda mehn kasukuhl, ni ah mahsanih: “Eri, mehnda ma kumwail aramas sapwung kei, a kumwail ese kihong noumwail seri kan dahme mwahu ong irail. Eri, Samamwail me ketiket nanleng soh pahn ketikihong ngehn sarawi irail kan me peki reh?”—Luk 11:11-13.
12. Iaduwen karasaras en pahpa men me kin rongorong pekipek en nah pwutako kin kasalehda sapwellimen Siohwa irair en perenki sapeng atail kapakap kan?
12 Ki karasaras wet en pahpa men me kin sapeng nah pwutako, Sises kasalehda iaduwen sapwellimen Siohwa pepehm ohng irail akan me kin sohpeiong ih ni kapakap. (Luk 10:22) Keieu, tehk wekpeseng en karasaras riau pwukat. Sohte duwehte ohlo nan keieu karasaraso me sohte men mwekidki pekipek ong sawas, Siohwa kin duwehte pahpa men me kin nsenoh, me kin ngoangki mwekidki pekipek sang rehn nah seri. (Melkahka 50:15) Sises pil kasalehda sapwellimen Siohwa irair en perenki sapeng kitail sang ni ah kapahrekiong pahpa en aramas men oh samatail nanleng. E mahsanih me ma pahpa en aramas men, mendahki e wia “aramas sapwung” men pwehki dihp me e sohsohki, kin kihong nah pwutak kisakis mwahu, kitail kak uhdahn kasik me samatail nanleng, me kin wia me pwung, pahn kihong sapwellime peneinei en tohnkaudok kan ngehn sarawi!—Seims 1:17.
13. Dahme kitail kak kamehlele ni ahnsou me kitail kin kapakap ong Siohwa?
13 Ia mehn kasukuhl ong kitail? Kitail kak kamehlele me ni ahnsou me kitail kin peki rehn Samatail nanleng ngehn sarawi, e pahn uhdahn perenki kihong dahme kitail kin peki. (1 Sohn 5:14) Ni ahnsou me kitail kin pwurepwurehng sohpeiong ih ni kapakap, Siohwa sohte mwahn pahn mahsanih, duwehte: “Ke dehr kedirepwe ie, pwe wenihmwet ritidier.” (Luk 11:7) Ni pali tehieu, Sises mahsanih: “Kumwail peki, e ahpw pahn kohieng kumwail; kumwail rapahki, kumwail ahpw pahn diar; kumwail letelet, e ahpw pahn ritidahng kumwail.” (Luk 11:9, 10) Ehi, Siohwa pahn “ketin sapeng [kitail] ni [atail] kin patohwan likweri.”—Melkahka 20:9; 145:18.
14. (a) Soangen madamadau sapwung dah kan kin kansensuwedih ekei me kin lelong kahpwal akan? (b) Ni ahnsou me kitail kin lelong kahpwal akan, dahme kahrehda kitail pahn mwein ele kapakap ong Siohwa ni pwoson?
14 Sapwellimen Sises karasaras en pahpa nsenoh men kin kasalehda me sapwellimen Siohwa kamwahu kin siksang kamwahu me pahpa de nohno en aramas men kin kasalehda. Kahrehda, sohte emen rehtail anahne pehm me kahpwal akan me mwein kitail kin lelong iei kasalepen sapwellimen Koht engieng pahtail. Atail imwintihti me keieu laud, Sehdan, iei ih me men kitail en ahneki soangen madamadau wet. (Sohp 4:1, 7, 8; Sohn 8:44) Sohte iren Paipel kan me soangen madamadau kan me kin kadeik pein kitail kin poahsoankihda. Siohwa sohte kin ketin kasonge kitail ki “me suwed.” (Seims 1:13) E sohte kin ketikihong kitail kahpwal ieu duwehte sineik de kasongosong ieu duwehte meninrahn. Samatail nanleng kin ketikihong irail kan me kin peki reh “dahme kin mwahuong irail.” (Madiu 7:11; Luk 11:13) Ni mehlel, ma atail kin kalahnganki sapwellimen Siohwa kamwahu oh ah kin kupwurperenki sewese kitail pahn laudla, atail men kapakap ni pwoson pil pahn laudla. Ni atail kin wia met, kitail pil pahn kak kasalehda soangen pepehm duwehte ahn sounmelkahka menet me ntingihdi: “Koht ketin kupwureiehla; e ketin karonge ei kapakap.”—Melkahka 10:17; 66:19.
Iaduwen Ngehn Sarawi Kin Wia Sawaspatail
15. (a) Soangen inou dahieu Sises wiahda me pid duwen ngehn sarawi? (b) Ia ehu ahl me ngehn sarawi kin sewese kitail?
15 Mwohnte eh pwoula, Sises kapwurehiong mehn kamehlel me e ketikihda nan sapwellime karasaras kan. Ni ah koasoia duwen ngehn sarawi, e mahsanihong sapwellime wahnpoaron kan: “I pahn peki rehn Semei, oh e pahn ketikihong kumwail pil emen sounsawas, iei ih ngenen mehlel, pwe en ieiang kumwail kohkohlahte.” (Sohn 14:16) Sises eri inoukihda me sounsawaso, de ngehn sarawi, pahn mihmi rehn sapwellime tohnpadahk kan ni ahnsou kohkohdo, iangahki atail ahnsou. Ia ehu ahl kaselel me kitail rahnwet kin ale soangen utuht? Ngehn sarawi kin sewese kitail en dadaurete pahn soangsoangen kahpwal akan. Ia mwomwe? Wahnpoaron Pohl, me pein lelong kahpwal kan, kawehwehda nan kisinlikou ong Kristian akan nan Korint iaduwen sapwellimen Koht ngehn kin sewese ih. Na, kitail pahn tehkpene ni mwotomwot dahme e ntingihdi.
16. Iaduwen atail irair kin mwein duwehte ahn Pohl?
16 Keieu, Pohl koasoia ni inen ong ienge me pwoson akan me “kisin tek kamedek kis kohieng ni paliwere,” ehu soangen kahpwal. Ih eri koasoia: “Pak silipak I ahpw ngidingidkihong Kauno [Siohwa] oh peki en ketikihsang ie kisin tek kiset.” (2 Korint 12:7, 8) Mendahki Pohl peki rehn Koht en ketikihsang ah kalokolok, e mihmihte. Mwein ke pil kin lelong irair ehu duwehte met rahnwet. Duwehte Pohl, mwein ke kin kapakap ni ngidingid oh ni pwoson, pekipeki rehn Siohwa en ketikihsang kahpwalo. Mendahki ke kin pwurepwurehng pekipek, kahpwalo mihmihte rehmw. Met wehwehki me Siohwa sohte kin ketin sapeng ahmw kapakap kan oh sapwellime ngehn sohte kin sewese iuk? Soh douluhl! (Melkahka 10:1, 17) Tehk dahme wahnpoaron Pohl koasoia mwurin met.
17. Iaduwen Siohwa ketin sapengki ahn Pohl kapakap kan?
17 Nin duwen pasapengpen ahn Pohl kapakap kan, Koht mahsanihong ih: “Ei kalahngan itarohng uhk; pwe ei manaman kin sansalda mehlel rehn me luwet akan.” Pohl koasoia: “Ihme I kin perenki oh suweiki ei luwet akan, pwe I en kin pehm manaman en Krais rehi [‘manaman en Krais me duwehte impwal ieu kin pwaindi ie,’ New World Translation of the Holy Scriptures—With References].” (2 Korint 12:9; Melkahka 147:5) Kahrehda, Pohl kin pehm me sang rehn Krais, sapwellimen Koht mehn perepe kehlail kin pwaindi ih duwehte impwal ieu. Rahnwet, Siohwa kin ketin sapeng atail kapakap kan ni ahl me duwehte met. E kin ketikihdi sapwellime mehn perepe duwehte impwal ieu pohn sapwellime ladu kan.
18. Dahme kahrehda kitail kak dadaurete pahn kahpwal akan?
18 Mehlel, impwal sohte kin kauhdi keteu sang ah mweredi de kisinieng sang ah ipihp, ahpw e kin wia mehn perepe sang soahng pwukat. Duwehte met, impwal me wiawihkihda “manaman en Krais” sohte kin kauhdi kasongosong akan en wiawiong kitail de kahpwal akan en lelong kitail. Ahpw, e kin kihda mehn perepe ni pali ngehn ong irair keper kan en sampah wet oh uhwong kan sang eh kaun, Sehdan. (Kaudiahl 7:9, 15, 16) Ihme kahrehda, mendahki ma ke kin lelong kahpwal ehu me sohte kin ‘kohsang rehmw,’ ke kak kamehlele me Siohwa kin ketin mwahngih ahmw kahpwal kan oh e kin sapeng ahmw kin “peki sapwellime sawas.” (Aiseia 30:19; 2 Korint 1:3, 4) Pohl ntingihdi: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.”—1 Korint 10:13; Pilipai 4:6, 7.
19. Dahme ke kin koasoanehdi teng en wia, oh pwekida?
19 Mehlel,“imwin rahn akan” en sampah wet me sohte kin wauneki Koht nan atail ahnsou kin wia “ahnsou apwal ekei.” (2 Timoty 3:1) Mendahki met, ong sapwellimen Koht ladu kan, ahnsou pwukat sohte kin nohk apwal en powehdi. Pwekida? Pwehki utuht oh mehn perepe en sapwellimen Koht ngehn sarawi, me Siohwa kin kupwurperenki kihong irail koaros me kin peki reh ni ngidingid oh pwoson. Kahrehda, kitail en koasoanehdi teng en kaukaule kapakapki ngehn sarawi rahn koaros.—Melkahka 34:6; 1 Sohn 5:14, 15.
Iaduwen Ke Pahn Sapeng?
• Dahme kitail anahne wia pwehn ale sapwellimen Koht ngehn sarawi?
• Dahme kahrehda kitail kak kamehlele me Siohwa pahn sapeng atail kin kapakapki ngehn sarawi?
• Iaduwen ngehn sarawi kin sewese kitail en dadaurete pahn kahpwal akan?
[Kawehwehpen kilel kan nan ehu ehu pali 9]
Dahme ke kak sukuhliki sang sapwellimen Sises karasaras duwen tohnihmw ngidingid men?
[Kawehwehpen kilel kan nan ehu ehu pali 10]
Ke kin kapakapki ni ngidingid sapwellimen Koht ngehn sarawi?
[Kawehwehpen kilel kan nan ehu ehu pali 11]
Dahme kitail sukuhliki duwen Siohwa sang karasaras en pahpa nsenoh men?