Mie Pak Ke Kin Dipada Ong Ngehn Sarawi?
“Mie soangen dihp me kin imwikihla mehla.”—1 SOHN 5:16.
1, 2. Iaduwen kitail ese me emen kak dipada ong sapwellimen Koht ngehn sarawi?
“IKIN inenen medemedewe laud me I dipada ong ngehn sarawi.” Emen lih en Germany me ntingihdi met, mendahkihte e kin wie papah Koht. Iaduwen, ni mehlel Kristian men kak dipada ong sapwellimen Koht ngehn sarawi, de kehl?
2 Ei, aramas kak dipada ong sapwellimen Siohwa ngehn sarawi. Sises Krais mahsanih: “Dihp koaros oh soangen lahlahwe koaros kak lapwasang aramas akan; a ihte, dipen lahlahwe Ngehn Sarawi, me sohte kak lapwasang.” (Madiu 12:31) Kehkehlik kohwong kitail: “Ma kitail pahn nsenkihte wiewia dihp, mwurin atail marainkilahr padahk mehlel kan, solahr meirong ehu me pahn kak kamwakelehsang kitail nan dihp. Ihte, kitail en kasikasik ni masak Kadeiko.” (Ipru 10:26, 27) Oh wahnpoaron Sohn ntingihedi: “Mie soangen dihp me kin imwikihla mehla.” (1 Sohn 5:16) Ahpw iaduwe, ih me dipadao me pahn koasoanehdi ma iei e wiahda “soangen dihp me kin imwikihla mehla”?
Koluhla Kin Kahrehda Mahk
3. Dahme mwein ele mehlel ma kitail kin nsensuwedkihla mehlel dihp ehu me kitail wiahda?
3 Siohwa me wia Sounkopwung keieu lapalap ong irail me kin dipada. Ni mehlel, kitail koaros pahn pein pwukoahki atail mour mwohn Koht, oh e kin ahnsou koaros wia me pwung. (Senesis 18:25; Rom 14:12) Siohwa me kin ketin koasoanehdi ma iei kitail wiahda dihp ehu me sohte mahk kak kohwong, oh iei ih me kin ketikihsang sapwellime ngehn sarawi sang rehtail. (Melkahka 51:11) Ahpw, ma kitail kin nsensuwedkihla mehlel dihp ehu me kitail kin wiahda, mwein ele kitail uhdahn koluhkihla mehlel dihp me kitail wiahda. Ahpw dahkot koluhla mehlel?
4. (a) Ia wehwehn en koluhla? (b) Dahme kahrehda mahsen kan en sounmelkahkao me kileldi nan Melkahka 103:10-14 kin wia mehn kamweit?
4 En koluhla kin wehwehki me kitail kin wekila oh sohla wia soangen sapwung kan me kitail wiahda de nsenkihda kitail en wiahda mwohn atail koluhla. E kin wehwehki me kitail nsensuwedla de koluhla oh sohla pwurehng wiahda soangen dihpo. Ma kitail wiahda dihp laud ehu ahpw wekila oh wia kahk kan me kasalehda me kitail koluhla mehlel, kitail kak ale kamweit sang mahsen kan en sounmelkahkao: “E sohte kin ketin kalokei kitail nin duwen me konehng kitail; e sohte kin dupukohng kitail duwen dipatail kan oh atail sapwung kan. A duwen ileilehn lahng sang sampah, ih duwen sapwellime limpoak lapalap ong me kin wauneki. Duwen mesenleng oh kepinleng ara dohpeseng, ih duwen eh kin ketin kadohwaneweisang kitail dipatail kan. Duwen sahm emen eh kin kadekohng nah seri kan, ih duwen KAUN-O eh kin ketin kupwurkalahngan ong irail kan me kin wauneki. Pwe e mwahngih dahme kitail wiawihkihda; e pil ketin tamataman me kitail uhdahn pwehl.”—Melkahka 103:10-14.
5, 6. Ia mouren iren 1 Sohn 3:19-22, oh kawehwehda ia wehwehn mahsen kan en wahnpoaron menet.
5 Sapwellimen wahnpoaron Sohn mahsen kan pil inenen wia mehn kamweit: “Ihme kitail pahn esehki me kitail kisehn me mehlelo. Oh iei duwen atail pahn ahneki likilik mwohn silangin Koht. Pwe ma kadeikpen loalatail kadeingkitailda, kitail en ese me Koht lapalapasang kadeikpen loalatail, oh pein ih kin ketin mwahngih mehkoaros. Eri, kompoakepahi kesempwal ko, ma kadeikpen loalatail sohte pahn kadeingkitailda, a kitail pahn eimah mwohn silangin Koht. Kitail kin ale sang reh mehkoaros me kitail kin peki, pwehki atail kin peikiong sapwellime kosonned akan oh pil wia soahng kan me kin kaparanda kupwure.”—1 Sohn 3:19-22.
6 Kitail pahn “esehki me kitail kisehn me mehlelo” sang ni atail pahn kin kasalehda limpoak ong riatail kan oh sohte nsenki wiahda dihp. (Melkahka 119:11) Ma kitail pehm me kitail riahla, kitail en tamataman me “Koht lapalapasang kadeikpen loalatail, oh pein ih kin ketin mwahngih mehkoaros.” Siohwa kin kasalehda mahk ong kitail pwehki eh mwahngih duwen atail “limpoak mehlel ong [riatail Kristian] kan,” atail kin pepeiong dihp oh atail kin nanti en kapwaiada kupwure. (1 Piter 1:22) Atail mohngiong “sohte pahn kadeingkitailda” ma kitail pahn likih Siohwa, kasalehda limpoak ong riatail kan, oh sohte dipkihda atail kin nsenki wiahda dihp. Kitail pahn “eimah mwohn silangin Koht” ni kapakap, oh e pahn ketin sapeng kitail pwehki kitail kin kapwaiada sapwellime kosonned akan.
Irail Dipada ong Nehn Sarawi
7. Dahme kin kasalehda ma iei mahk kak kohwong soangen dihp ehu de soh?
7 Soangen dihp dah kan me sohte mahk kin kohwong? Pwehn sapeng peidek wet, kitail pahn tehkpene ekei karasaras akan sang nan Paipel. Met pahn wia kamweit ehu ong kitail ma kitail koluhla mendahkihte atail nsensuwedkihla mehlel sapwung laud me kitail wiahda. Kitail pahn kilang me kaidehn ih me kesempwal iei ma soangen dihp dah me emen wiahda; ahpw ih me kesempwal iei ma dahme kahrehda dihpo wiawi, ia irair en mohngiong en aramaso, oh ia uwen laud en aramaso nsenkihda wiahda dihpo iei me kin kasalehda ma mahk en kohwong soangen dihp ehu de soh.
8. Iaduwen ekei irail kaun en mwomwohdiso kan en mehn Suhs nan ahnsoun Sises kin dipada ong ngehn sarawi?
8 Irail kaun en mwomwohdiso kan en mehn Suhs me kin lemeiong oh uhwong Sises Krais kin dipada ong ngehn sarawi. Irail kilang duwen sapwellimen Koht ngehn sarawi eh kin ieiang Sises sang ni manaman kan me e kin wiahda me kin wahdo wahu ong Siohwa. Mendahki met, imwintihti en Krais pwukat kin kose me dene manaman wet kohsang rehn Sehdan me Tepil. Nin duwen me Sises kasalehda, irail akan me kin lahlahwe sapwellimen Koht ngehn sarawi kin wiahda dihp me sohte mahk pahn kohwong “met oh pil kohkohlahte.”—Madiu 12:22-32.
9. Dahkot lahlahwe, oh dahme Sises mahsanih duwen lahlahwe?
9 Lahlahwe iei lokaia me likamw, kamedek, oh lemei. Pwehki ngehn sarawi kohsang rehn Koht, ma emen kin wia koasoi kan me uhwong ngehn sarawi e pil duwehte me e uhwong Siohwa. Sohte mahk kin kohwong aramas me kin wia soangen koasoi pwukat ahpw sohte koluhkihla. En Sises mahsen me pid duwen soangen dihp wet kasalehda me Sises kin koasoakoasoia irail akan me nsenkihda en uhwong doadoahk en sapwellimen Koht ngehn sarawi. Pwehki sapwellimen Siohwa ngehn sarawi kin kadoadoahk rehn Sises ahpw irail me kin uhwong ih kan kin kose me dene manaman wet kohsang rehn Tepilo, irail kin dipikihda dipen lahlahwe ngehn sarawi. Ihme kahrehda Sises mahsanih: “Mehmen me pahn lahlahwe Ngehn Sarawi, sohte mwahn kak ale mahkpen dihp wet, pwehki eh wiadahr dihp ehu me sohte mwahn kak lapwada.”—Mark 3:20-29.
10. Dahme kahrehda Sises likwerihki Sudas “me kileldier en salongala”?
10 Na pil medewehla duwen irair en Sudas Iskariot. E kin mourki mour en salelepek, pirapirapa mwohni sang koakon en mwohni me kohwong ih en apwalih. (Sohn 12:5, 6) Mwuhr Sudas kohla rehn irail kaun en mehn Suhs akan oh koasoanehdi pwehn pangala Sises ki mwohni silper 30. Ei, mwuhr Sudas nsensuwedkihla dahme e wia, ahpw e sohte koluhkihla dihp wet me pein ih koasoanehdi en wia. Imwilahn met, Sudas sohte warohng ale kaiasada, kahrehda Sises kin likweriki ih “me kileldier en salongala.”—Sohn 17:12; Madiu 26:14-16.
Irail Sohte Dipada ong Ngehn Sarawi
11-13. Iaduwen Nanmwarki Depit wiahda dihp pwehki Padsipa, oh mehn kamweit dah kitail kak alehsang ni atail pahn medemedewe duwen en Koht mahkohng ira?
11 Ekei pak, Kristian kan me kin wehkadahr diparail kan me inenen laud oh pil alehier sawas ngenin akan sang irail elder en mwomwohdiso kan ele pahn kin pwunpwunodkihte dipen uhwong sapwellimen Koht kosonned me irail wiahda mahs. (Seims 5:14) Ma kitail ahneki soangen kahpwal wet, kitail ele pahn paiekihda ni atail pahn kin medemedewe duwen dahme iren Paipel kan koasoiahki duwen irail kan me mahkpen diparail kohwong.
12 Nanmwarki Depit wiahda dihp rehn Padsipa, en Uraia pwoud. Ni en Depit kilangada lih pwopwoud masamwahu menet eh wie duhdu pohn pwelengen ihmw ehu me karanih eh wasa, e ahpw ilekila pwe liho en wisikdo reh oh ih eri wendi reh. Mwuhr ni eh esedahr me liho liseiandahr, e ahpw wiahda koasoandi mwersuwed ehu me en liho pwoud, Uraia, en kohdo wendi rehn eh pwoud pwehn ekihla dipen kamwahl me e wiadahr. Ni eh koasoandio sohte pweida, nanmwarkio koasoanehdi pwe Uraia en kamakamala nan mahwen. Mwuhr, Padsipa wiahla en Depit pwoud oh e naitikihong ih seri men me mehla.—2 Samuel 11:1-27.
13 Siohwa ketin apwalihala irair me pidada Depit oh Padsipa. Koht mahkohng Depit, ele pwehki eh kin mwahngih duwen eh koluhla oh pwehki inou me e ketin wiahiong ih me pid duwen Wehio. (2 Samuel 7:11-16; 12:7-14) Ahpw e sansal me Padsipa ahneki madamadau pwung, ihme kahrehda e alehdi kapai en wiahla nohno en Nanmwarki Solomon oh emen nohno kahlap en Sises Krais. (Madiu 1:1, 6, 16) Ma kitail wiahda dihp, e pahn mwahu kitail en tamataman me Siohwa kin mwahngih ni atail kin koluhla.
14. Iaduwen irair en Nanmwarki Manase kasalehda uwen laud en sapwellimen Koht mahk?
14 Uwen laud en sapwellimen Siohwa mahk pil sansalda sang dahme wiawi ong Nanmwarki Manase mehn Suda. E wiahda mehkot me inenen suwed mwohn silangin Siohwa. Manase kauwada pei sarawi kan ong Paal, kaudokiong “usu kan,” oh e pil kauwada pei sarawi kei nan kehl riau en tehnpas sarawio. E meirongkihla nah pwutak kan nin duwen meirong isihs, kangoange tiahk en wunahni, oh kahrehiong towe kan en wehin Suda oh Serusalem en “wiahda dihp me laudsang dihp kan me wehi ko me KAUN-O ketin koahkoahsang wiadahr ni ahnsou me sapwellime aramas akan mwekimwekidlahng wasao.” Irail sohte peikiong iren kehkehlik kan me sapwellimen Koht soukohp kan wia. Mwuhr, nanmwarki en Asiria kalowehdi oh saliedi Manase. Erein eh wie sensel, Manase koluhla oh ni karakarahk kapakapkiong Koht, oh Koht mahkohng ih oh kapwurehiong ih en wia nanmwarki en Serusalem, wasa me e pwurehng kapwurehdo kaudok mehlel.—2 Kronikel 33:2-17.
15. Dahme wiawiong wahnpoaron Piter me kasalehda me Siohwa “me kupwurkalahngan” oh kin mahk?
15 Sounpar epwiki kei mwuri, wahnpoaron Piter dipada ni eh kahmahmkihla Sises. (Mark 14:30, 66-72) Ahpw Siohwa “me kupwurkalahngan” oh mahk ong Piter. (Aiseia 55:7) Pwekida? Pwehki Piter koluhla mehlel. (Luk 22:62) Sapwellimen Siohwa mahk sansalda rahn 50 mwuri ni rahn en Pendekos ahnsou me Piter alehdi ahnsou mwahu tohrohr ehu en kak kadehde duwen Sises ni eimah. (Wiewia 2:14-36) Mie kahrepen kitail en medewe me Koht sohte pahn mahkohng Kristian kan en ahnsouwet me kin koluhla mehlel? Sounmelkahkao koulki: “Ma komw pahn ketin kilelehdi dipat akan, ihs me kak pitsang sapwellimomwi kadeik? A komw kin ketin mahkohng kiht, pwe se en kin lemmwikin komwi.”—Melkahka 130:3, 4.
Katikala Kapwunod en Wiahda Dihp ong Ngehn Sarawi
16. Nan soangen irair dah kan me Koht kin ketin kasalehda mahk?
16 Mehn karasepe kan me kileldier mwowe kak sewese katikala atail kin pwunodki ma kitail sou wiahdahr dihp ong ngehn sarawi. Mehn karasepe pwukat kasalehda me Siohwa kin ketin mahkohng irail kan me kin wiahda dihp ahpw koluhkihla. Me keieu kesempwal iei en kapakapohng Koht ni ngidingid. Ma kitail dipada, kitail kak peki mahk pwehki meirong tomw en Sises, sapwellimen Koht mahk kalahngan, soh unsek me kitail sohsohki, oh atail kin lelepek nan atail doadoahk en papah. Ni atail kin wehwehki duwen sapwellimen Siohwa mahk kalahngan, kitail kak koapworopworki me e pahn mahkohng kitail ni atail kin peki mahk.—Episos 1:7.
17. Dahme konehng wiawi ma kitail wiahda dihp oh anahne sawas en pali ngehn?
17 Iaduwen ma kitail wiahda dihp ahpw kitail sohte kak kapakap pwehki dihp me kitail wiahda kahrehiong kitail en luwetala ni pali ngehn? Me pid duwen ire wet, tohnpadahk Seims ntingihdi: “En ekerodo me mah kan en mwomwohdiso pwe re en kapakapki oh keiehki leh ni mwaren Kauno. Oh kapakap wet me pahn wiawi ni pwoson, pahn komourala me soumwahwo: Kauno pahn ketin kakehlahda, oh ketin lapwahsang dipe kan.”—Seims 5:14, 15.
18. Dahme kahrehda mendahte ma emen wiahda dihp oh piskensang mwomwohdiso, e sohte wehwehki me sohte mahk kohwong dipe?
18 Mehnda ma aramas men me wiahda sapwung ehu sohte koluhla ni ahnsowo oh ih eri piskensang nan mwomwohdiso, e sohte wehwehki me sohte mahk kak kohwong dipe. Pohl ntingihdi met me pid duwen emen me keidi nan Korint me wiahda sapwung ehu: “A kalokolok me e aleier sang pali laud en kumwail e itarohngehr. Eri met, kumwail pahn mahkohng oh sewesehda, pwe eh nsensuwed dehr lalaudla oh kauwehla eh mouren [Kristian].” (2 Korint 2:6-8; 1 Korint 5:1-5) Pwe irail en kak pwurehng kehlailda ni pali ngehn, irail kan me wiahda sapwung anahne alehda sawas ngenin kan me poahsoanda sang nan Paipel me irail elder Kristian kan kin kihda oh pil kasalehda me irail koluhla mehlel. Irail anahne kasalehda “tiahk kan me pahn kasalehda [arail] kolulahr oh wiliakapwalahr.”—Luk 3:8.
19. Dahme kak sewese kitail en kak “kehlail nan . . . pwoson”?
19 Dahme ele pahn kahrehda kitail en ahneki pepehm me kitail dipada ong ngehn sarawi? Ele met kin kohsang ni atail kin nohn pwunod daulihala de atail kin ahneki luwet en paliwar. Nan soangen irair wet, e pahn sawas me kitail kin kapakap oh kin kakommoalehdi paliwaratail. Ni mehlel kitail dehr mweidohng Sehdan en kaluwetekitailla, kahrehda atail tokedihsang papah Koht. Ma Siohwa sohte kin kupwurperenki mehlahn me suwed kan, e sansal me e sohte kupwurki emen sapwellime ladu kan en salongala. Kahrehda me kitail kin masak de pwunodki ma kitail sou dipadahr ong ngehn sarawi, e konehng kitail en pousehlahte aliale mwengehn ngehn kan sang sapwellimen Koht Mahsen, me iangahki mahsen kansenamwahu kan me duwehte iren Melkahka kan. Kitail anahne doulahte oh ieiang mihding en mwomwohdiso kan oh iang wia doadoahk en kalohki Wehio. Atail wia met pahn sewese kitail en kak “kehlail nan . . . pwoson” oh sohte pwunpwunodiki ma kitail sou wiadahr dihp me sohte mahkpe.—Taitus 2:2.
20. Soangen iren peidek dah kan me kak sewese emen en kak kilangada me e sohte dipada ong ngehn sarawi?
20 Irail kan me masak oh kin pwunodki ma irail sou dipada ong ngehn sarawi kak pein idek rehrail: ‘Iaduwen, mie pak I lahlahwe ngehn sarawi? I koluhkihla mehlel dipei? I kin koapworopworki sapwellimen Koht mahk? I wia emen me lahlahwe me soikala marain en pali ngehn?’ Ele soangen aramas pwukat pahn diarada me irail sohte kin keriahla sapwellimen Koht ngehn sarawi, oh irail sohte wiahla aramas lahlahwe kei. Irail koluhla, oh irail kin pwoson mehlel sapwellimen Koht mahk kalahngan. Ma iei, eri irail sohte dipada ong sapwellimen Siohwa ngehn sarawi.
21. Mehnia peidek kan me kitail pahn tehkpene nan artikel en mwuhr?
21 Ia uwen eh wia kapai ehu ni atail kin ese me kitail sohte dipada ong ngehn sarawi! Mie ire kan me pid duwen met me kitail pahn tehkpene nan artikel en mwuhr. Karasepe ehu, kitail kak pein idek rehtail: ‘Uhdahn mehlel ngehn sarawi en Koht me kin kahluwa ie? Wah kan kin sansalda nan ei mour?’
Ia Ahmw Pasapeng?
• Dahme kahrehda kitail kak nda me dipada ong ngehn sarawi kak wiawi?
• Ia wehwehn en koluhla?
• Ihs me dipada ong ngehn sarawi ni ahnsou me Sises ketiket sampah?
• Iaduwen emen kak powehdi eh kin pwunodki ma e sou wiahda dihp ehu me sohte mahk kak kohwong?
[Kawehwehpen kilel kan nan ehu ehu pali 15]
Irail kan me nda me dene Sises wiahda manaman kan ki manaman me kohsang rehn Sehdan dipadahr ong sapwellimen Koht ngehn sarawi
[Kawehwehpen kilel kan nan ehu ehu pali 16]
Mendahki e kahmahmkihla Sises, Piter sohte wiahda dihp me sohte mahkpe